TTDL-ZABTER-14-PHA-050

Previous Text Back to Volume PageNext Text

Wylie title
Location	bdud 'joms gling pa zab gter Volume 14, Text 50, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

Tibetan Text

[edit]

༄༅།།བྱི་བའི་ལོ་གསར་ཟླ་བའི་ཚེས་གཅིག་ནུབ་མོ་རྨི་ལམ་སྒྱུ་མའི་སྣང་ཆ་ལ།མཁར་ཤིན་ཏུ་མཐོ་བ་བ་གམ་གནམ་དུ་སྙེགས་པ་ཞིག་གི་གཡོན་ངོས་ན་ཁང་བཟང་དམར་པོ་ཟླ་གམ་ཞིག་འབྲེལ་བ་ལ།ཡང་ཁང་པ་སྔོན་པོ་ཟླུམ་པོ་དང་གསུམ་ཀ་གཅིག་ལ་གཅིག་བརྟེན་དུ་འབྲེལ་བར་སྣང་སྟེ།སྣང་མ་ཐག་ཏུ་མཁར་སྐྱ་བོའི་ནང་དུ་སོང་བས་དེའི་ནང་དུ་བདག་གིས་བུ་ཆུང་བསྙལ་ནས་བདག་ཕྱིར་སྒོར་འབུད་སྙམ་ནས།ཁང་པ་གསུམ་ལ་སྒོ་གཅིག་ལས་མེད་སྙམ་ནས་སྒོ་ཚོལ་བའི་ཚེ་སྒོ་རྣམས་རུབ་ནས་མ་རྙེད་པར་ཚོལ་བའི་སྐབས་ཞིག་ཏུ།བུད་མེད་རྒན་མོ་ཞིག་གིས་ཁང་པ་འདི་སྒོ་གཅིག་ཡིན་པར་བསམ་ནས་ཚོལ་ན་སྒོ་མི་རྙེད།སྒོ་ཐ་དད་པ་ཡིན་བསམ་ན་སྒོ་མཐོང་སྲིད་ཟེར།དེ་ནས་སྒོ་སོ་སོ་ཡིན་པར་སེམས་ནས་མར་ལ་བལྟས་པས་ཁང་སྒོ་ཧར་གྱིས་ཕྱེ་བ་མཐོང་བའི་མོད་ལ།དེ་ནས་ཕྱིར་བུད་ནས་ཅུང་ཟད་སོང་སྟེ་དེར་འདུག་པའི་ཚེ།བུད་མེད་རྒན་མོ་ན་རེ་ཡ་གི་མཁར་གསུམ་འབྲེལ་བ་འདི་ཕོ་གདོན་རྒྱལ་པོ་དང་།མོ་གདོན་འདྲེ་མོ་དང་།ཀླུ་གདོན་ས་བདག་གསུམ་གྱི་གནས་ཡིན་པ་ཨི་གོ་ཟེར་བའི་མོད་ལ།བདག་གི་བསམ་པ་ལ་ངའི་བུ་ཆུང་དེ་རྒྱལ་པོའི་ཁང་པ་རུ་བསྙལ་ཡོད་པས་དེ་ལ་སྲུང་དམིགས་ཞིག་འཛིན་དགོས་བསམ་པ་སྐྱེས་ནས་དམིགས་པ་འདི་ལྟར་བྱས།བདག་གི་མིག་ནས་ལྕགས་ཀྱི་སྡིག་པ་མེ་འབར་བ་དགུ་ཁང་པའི་ནང་དུ་སོང་བར་བསྒོམ་ནས་སྡང་མིག་བྱས་པའི་མོད་ལ།མི་སྲུན་པའི་སྐྱེས་བུ་ལྕགས་ཀྱི་སེན་མོ་མཐོ་གང་བ་ཅན་ཞིག་གིས་ངའི་ལག་པ་ནས་བཟུང་ལག་པའི་སྟོད་སྨད་ཐམས་ཅད་ཐལ་མར་ཕུག་ནས་ཚ་ཟིང་ངེ་སོང་བའི་མོད་ལ།ངས་འཁོར་འདས་སྟོང་ཉིད་ཟང་ཐལ་གྱི་རོལ་པར་དྲན་ཏེ་བདེ་སྟོང་གི་ཉམས་ཞིག་ཤར་ནས་བདག་གིས་དམིགས་པ་འདི་ལྟར་བྱས།བདག་གི་སེན་མོ་ལྕགས་ཐུར་མེ་འབར་བ་འདོམ་གང་བར་བསྒོམ་སྟེ་ཁོའི་ཕྲག་པ་གཉིས་ནས་བཏབ་པས་བརླ་གཉིས་ཀྱི་འོག་ཏུ་སྔོ་ཤར་གྱིས་ཐོན་པ་མངོན་སུམ་དུ་མཐོང་ཚེ།འདྲེ་ལྕགས་སེན་རིང་བ་གྲངས་མེད་པས་བདག་གི་ལུས་ཐམས་ཅད་ལ་བྲད་ཅིང་འདེབས་པའི་ཚེ།བདག་གིས་མི་ཤིགས་ནམ་མཁའི་རྡོ་རྗེ་ཞེས་བྱ་བའི་ལྟ་གདིང་ལྡན་པའི་ངང་ནས་མཚར་བཞིན་དུ།རྨི་ལམ་འཁྲུལ་པ་འདི་བདེན་བདེན་དུ་འདྲ་བར་སྣང་བ་འདི་བདེན་བདེན་འདྲ་བ་ཅི་ཡིན་བསམ་ནས་དགོད་ཤོར་བཞིན་འདི་སྨྲས་སོ།།ངའི་སྒྱུ་མའི་ངར་འཛིན་བག་ཆགས་པའི།།འཕྲུལ་པའི་སྣང་ཆ་སྟོང་པའི་ལུས།།སྐྱེ་འཆི་མེད་པའི་དོན་ཞིག་རྟོགས།།འདི་གསོད་མཁན་འཇིག་རྟེན་ཁམས་ན་མེད།།ཁྱེད་སྣང་ཞིང་སྲིད་པའི་ལྷ་འདྲེ་རྣམས།།ངའི་གཉིས་འཛིན་འཁྲུལ་པའི་ཆོ་འཕྲུལ་ལགས།།ང་བསད་ན་ཁྱེད་ཅག་མཉམ་དུ་འཆི།།ཁྱོད་རང་སྲོག་རང་གིས་གཅོད་པ་ན།།ངས་རིག་པ་ཡེ་ཤེས་རྒྱ་ཡིས་འདེབས།།ཁྱེད་རྨི་ལམ་སྣང་ཆའི་འདྲེ་ཚོགས་རྣམས།།དོན་ཅིའི་ཕྱིར་རང་སྲོག་གཅོད་ལ་ཆས།།ངས་འཁོར་འདས་རང་སྣང་ཉིད་དུ་རྟོགས།།གདངས་རིག་སྟོང་ཆོས་སྐུའི་རྒྱལ་ས་ཟིན།།དོན་མི་འགྱུར་རྡོ་རྗེའི་གོ་ཁྲབ་ཡོད།།ཁྱོད་ཅི་དགའ་གང་དགར་སྤྱོད་དང་ཆོག།ཅེས་པའི་ལན་དུ་འདྲེ་དཔོན་གྱིས།།ངེད་ལྷ་འདྲེ་མ་རུངས་སྲིད་པའི་འདྲེ།།མི་ཁྱོད་ཀྱི་སྣང་ཆ་ག་ལ་ཡིན།།ངེད་སྲ་མཁྲེགས་བརྟན་པའི་མཁར་གསུམ་ནས།།འཁོར་མི་བརྒྱ་མི་སྟོང་ཁྱོད་ཀྱིས་འཕྲོགས།།དེ་མ་བཟོད་ར་མདར་ཆས་པ་ཡིན།།མི་ཕལ་ཆེར་སྟོང་པའི་ཡུལ་ལ་ཤོར།།མི་ལ་ལ་སྲིད་པའི་རྩེ་རུ་འཕང་།།མི་ཕལ་ཆེར་ནམ་མཁའི་དབྱིངས་ལ་ནུབ།།མི་ལ་ལས་བཙན་པའི་མཁར་རྫོང་བཟུང་།།འདི་ཉེས་པ་ཆེན་པོའི་བྱ་བ་ཡིན།།དུས་ད་དུང་ཁྱོད་ཉིད་མ་བསད་ན།།ངེད་སྣང་སྲིད་ལྷ་འདྲེ་འཇིག་ལ་རེ།།དོན་དེ་ཕྱིར་བདུད་ཕོ་བཀྲག་མེད་ཀྱིས།།ངེད་ལྷ་འདྲེ་དམག་གིས་དཔུང་དུ་བསྡུས།།མི་ཁྱོད་ལ་རྒོལ་བའི་ཕོ་ཉ་ཡིན།།ཁྱོད་འཐབ་ཡ་ཡོད་ན་ངེད་དང་འཐོབ།།ཞེས་ཟེར་བའི་ཚེ་ངས་འདི་སྐད་སྨྲས།ཀྱེ།སྟོང་གཟུགས་ཀྱི་ལྷ་འདྲེ་ཚུར་ལ་ཤོག།ངའི་སྟོང་གཟུགས་ཀྱི་ཡན་ལག་ཉིང་ལག་དང་།།མགོ་བོ་དང་དོན་སྙིང་ཁྱེར་ལ་སོང་།།ངས་སྟོང་ཉིད་རྟོགས་པས་ཡ་ང་མེད།།འཐབ་དང་འཐབ་ཡུལ་ཤན་མི་འབྱེད།།ང་མི་འཐབ་ཁྱེད་ཀྱིས་ཅི་དགའ་གྱིས།།ཞེས་སྨྲས་ཏེ་ཡན་ལག་བརྐྱང་ནས་སོད་སོད་ཁྱེར་ཁྱེར་སྨྲས་ནས་འདྲེ་རྣམས་ཀྱི་ཚལ་དུ་རྒྱུག་པའི་ཚེ།འདྲེ་ཐམས་ཅད་ར་ལུག་སེར་བས་དེད་པ་ལྟར་བྲོས་ཏེ་ཁང་པ་གསུམ་གྱི་ནང་དུ་བྲོས་ནས་སྒོ་བསྡམ་པའི་སྒོ་འགྲམ་དུ་སོང་ནས་ངས་གླུ་འདི་བླངས་སོ།།ཨེ་མ་སྟོང་པ་ཉིད་ཀྱི་དཔའ་ལ་ལྟོས།།སྣང་སྲིད་ལྷ་འདྲེ་ཉམ་རེ་ཐག།ང་རྣལ་འབྱོར་གྱི་ཐོག་བརྫིས་དཔའ་གདིང་གིས།།བདུད་ནག་པོའི་དཔུང་གི་དཔའ་བསྐོང་ཐལ།།ཁྱེད་དཔའ་བོ་ཡོད་ན་སྒོ་ལ་བུད།།ཁྱོད་རྩལ་ལྡན་ཡོད་ན་སྒོ་ལ་བུད།།ཁྱོད་འཕྲུལ་ལྡན་ཡོད་ན་སྒོ་ལ་བུད།།ཁྱོད་དཔའ་བོ་རྣམས་ལ་སྲོག་འདི་སྦྱིན།།ཁྱོད་ཟས་རྔམས་ཅན་ལ་ཤ་ཁྲག་སྦྱིན།།ཁྱོད་ཞེ་སྡང་ཅན་ལ་ལུས་སྲོག་སྦྱིན།།ད་མ་བྲོས་མ་སྐྲག་ཚུར་ལ་ཤོག།ངའི་ལུས་སྲོག་འདི་རུ་ལྷགས་ནས་ཡོད།།དུས་དེ་རིང་ཁྱེར་ས་ཡོད་ན་ཁྱེར།།དུས་དེ་རིང་གསོད་བདག་ཡོད་ན་སོད།།ཅེས་པའི་གླུ་ལན་དུ།མཁར་སྐྱ་བོའི་ནང་ནས་གླུ་འདི་ལེན་གྱིས།ངེད་ཞེ་སྡང་གི་མཁར་རྫོང་འཛིན་པའི་འདྲེ།།དཔའ་ཡང་དཔའ་སྟེ་བཙན་ཡང་བཙན།།སྟོང་ཉིད་ལ་ཡ་ལན་མ་བྱུང་བས།།དུས་ད་ལྟ་སྟོང་པར་འཇིགས་ལ་སྐྲག།རང་གི་མཁར་རྫོང་འཛིན་པ་ལས།།སྟོང་ཉིད་ཀྱི་དབྱིངས་ལ་འགྲོ་བ་མིན།།ཁྱོད་དཔག་ཚད་མང་པོའི་རྒྱང་ལ་སོང་།།ཤ་མཁོན་ཐད་ཀར་བྱང་བ་ཡིན།།ཁྱོད་དང་ང་གཉིས་སོ་སོར་སོང་།།ཞེས་ཟེར།ཡང་མཁར་དམར་པོ་ཟླ་གམ་གྱི་ནང་ནས་གླུ་འདི་ལེན།ངེད་ལྷ་འདྲེ་མི་སྲུན་གདུག་པ་ཅན།།དཔའ་ཡང་དཔའ་སྟེ་རྩལ་ཡང་ཆེ།།བཙན་ཡང་བཙན་སྟེ་རྔམས་ཡང་རྔམས།།འདོད་ཆགས་ཁྲག་མཚོའི་མཁར་རྫོང་ཡོད།།སྟོང་ཉིད་ཀྱི་མཁར་ལ་འགྲོ་མི་ནུས།།སྟོང་ཉིད་ཀྱི་ལྟ་བ་འདི་ལ་འཇིགས།།ང་དང་ཁྱོད་གཉིས་མི་མཐུན་པས།།ད་མཁོན་འཁྲུགས་ཤུགས་ཀྱིས་དེངས་པ་ཡིན།།ཁྱོད་དཔག་ཚད་མང་པོའི་ཕ་མཐར་སོང་།།ངེད་འདོད་ཆགས་བཙན་པའི་མཁར་ལ་འདུག།ཅེས་ཟེར་བའི་མཐར།སླར་ཡང་མཁར་སྔོ་ནག་གི་ནང་ནས་གླུ་འདི་ལེན་གྱིས།ཨེ་ཨེ།ལན་ཚྭ་ཅིས་འཇིག་ཆུ་ཡིས་འཇིག།ག་བུར་ཅིས་འཇིག་རླུང་གིས་འཇིག།འཁོར་བ་ཅིས་འཇིག་སྟོང་པས་འཇིག།ལྷ་འདྲེ་ཐོག་བརྫིས་རྟོགས་པས་འཇིག།ལྷ་འདྲེ་དཔའ་ལ་རྩལ་སྟོབས་ཆེ།།གཉིས་འཛིན་གྱི་ཡུལ་ལ་ཐོགས་རྡུགས་མེད།།ངེད་ལྷ་འདྲེ་ཤ་དང་ཁྲག་ལ་དགའ།།གཅེས་འཛིན་གྱི་ཡུལ་ལ་ཐོགས་རྡུགས་མེད།།ངེད་ལྷ་འདྲེ་སྲོག་དང་དབུགས་ལ་དགའ།།རེ་དོགས་ཅན་ལ་ཐོགས་རྡུགས་མེད།།མེ་དབལ་ཚ་བ་ཆུ་ཡིས་འཇིག།ཤིང་སྡོང་བཙན་པ་མེ་ཡིས་འཇིག།བསྐལ་པ་བཙན་པ་རླུང་གིས་འཇིག།རིན་ཆེན་སྲ་བ་རྡོ་རྗེས་འབིགས།།ཉི་ཟླ་གསལ་མྱུར་གཟའ་ཡིས་བསྒྲིབ།།ཆོས་མིན་ཐམས་ཅད་ཆོས་ཀྱིས་ཆོམ།།སངས་རྒྱས་རྣམས་ཀྱིས་བདུད་ཕམ་བྱེད།།དེ་བཞིན་འདྲེ་རྣམས་སྟོང་པས་ཕམ།།བདག་རྟོག་བདག་མེད་རྟོགས་པས་འཇིགས།།ཁྱོད་སྟོང་ཉིད་དྲན་པའི་མཚོན་ཆ་ཡིས།།ངེད་ལྷ་འདྲེའི་སྒྱུ་ལུས་ཐལ་མར་ཕུག།ད་ཁྱོད་ལ་མི་འཐབ་ཁ་མཆུ་འདུམ།།ད་ཁྱོད་དང་རྩོད་པ་ངང་གིས་ཞི།།ཁྱོད་ངེད་དང་ལྟ་སྤྱོད་མི་མཐུན་པས།།ཡུལ་རིང་བའི་ས་ཕྱོགས་གཞན་དུ་སོངས།།།།