DJYD-KABUM-24-YA-040

Previous Text Back to Volume PageNext Text

Wylie title
Location	bdud 'joms rin po che bka' 'bum Volume 24, Text 40, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. '. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 24: . Kalimpong: Dupjung Lama, 1979-1985.
Side notes
More details More details
Genre

Tibetan Text

[edit]

༄༅། །ཨོཾ་སྭསྟི། སློབ་དཔོན་བི་མ་ལ་དང་འཇམ་དཔལ་དབྱངས་དངོས་མངའ་བདག་ཁྲི་སྲོང་ལྡེའུ་བཙན་ཟུང་དུ་འཇུག་པའི་རྣམ་རོལ་བཀའ་བབས་བདུན་ལྡན་འཇམ་དབྱངས་མཁྱེན་བརྩེའི་དབང་པོ་པདྨ་འོད་གསལ་མདོ་སྔགས་གླིང་པ་དང། ལྷ་སྲས་མུ་ཁྲི་བཙན་པོའི་རྣམ་རོལ་གཏེར་ཆེན་མཆོག་གྱུར་གླིང་པ་སྟེ་ཡབ་སྲས་ལྷན་རྒྱས་པས་མདོ་ཁམས་འོག་མིན་ཀརྨའི་དཔལ་གྱི་དེའུ་ནས་ཁྲག་འཐུང་མངོན་རྫོགས་རྒྱལ་པོའི་མན་ངག་མ་མོ་སྤྱི་འདུས་ཀྱི་ཟབ་ཆོས་དང་ལྷན་ཅིག་ཏུ་སྤྱན་དྲངས་པའི་སྐུ་གསུང་ཐུགས་ཀྱི་རིལ་བུ་ཁྱད་འཕགས་ཚུལ་དྲུག་དང་ལྡན་པ་ལས། གཟི་བརྗིད་བསྐྱེད་པ་སྐུའི་རིལ་བུ་དམ་རྫས་ཉི་མའི་སྙིང་པོ་ནི། གཏེར་གཞུང་དམ་རྫས་སྒྲུབ་པའི་ཡན་ལག་ལས། དཔལ་ཆེན་མངོན་རྫོགས་རྒྱལ་པོ་ཡིཿ འཆི་མེད་བདུད་རྩིའི་ལུང་བསྒྲུབ་ཚེཿ ལས་ཀྱི་ཁ་བསྒྱུར་ཡན་ལག་ནིཿ སྐུ་གསུང་ཐུགས་ཀྱི་རིལ་བུ་བསྒྲུབཿ གཟི་བརྗིད་སྐུ་ཡི་རིལ་བུ་ནིཿ ཨ་རུ་དབང་ལག་ཀ་ར་དངཿ དམར་སེར་བ་ཡི་འོ་མས་བསྒྲིལཿ ཞེས་གསུངས་པ་ལྟར་ཨ་རུ་རུ་གསེར་མདོག་དང། དབང་ལག་དུག་འདོན་བཅུད་འགུགས་སོགས་ཚད་ལྡན་དུ་བྱས་པའི་ཕྱེ་མ། བ་གསར་དམར་སལ་གྱི་འོ་མ་དང་ཤེས་ཀ་ར་སྦྱར་བས་སྦོལ་བ་ལ། ཕབ་གཏའ་བ་འོར་སྦྱར་བ་བྲན་ཏེ། ཐོག་མར་བདུད་རྩི་འཕུར་མའི་ཚུལ་དུ་འོག་མིན་ཚོགས་ཆེན་འདུས་པའི་བདུད་རྩི་སྨན་གྱི་ཆོ་གས་བསྒྲུབས། སླར་ཡང་རིལ་བུ་སྲན་འཕོས་ཙམ་དུ་དྲིལ་ནས་སངས་རྒྱས་ཀུན་གྱི་སྐུ་རྡོ་རྗེའི་བདག་ཉིད་འཇམ་དཔལ་ཡེ་ཤེས་སེམས་དཔའི་ངོ་བོར་བྱིན་གྱིས་བརླབས་པ་སྟེ། ཕན་ཡོན་ནི། གནས་སྐབས་སུ་ལུས་ཀྱི་ནད་དོན་ཞི། སྡིག་སྒྲིབ་དག། །ཚེ་དང་སྟོབས་དང་གཟི་བརྗིད་རྒྱས། གཞན་སྣང་ཟིལ་གྱིས་གནོན། སྐྲ་དཀར་དང་གཉེར་མ་མི་འབྱུང། མཐར་ལུས་ཀྱི་རྩ་མདུད་གྲོལ་ཞིང། སྐུ་རྡོ་རྗེ་སྤྲུལ་པའི་སྐུར་འགྲུབ་པར་བྱེད་པ་སོགས་ཕན་ཕོན་མཐའ་ཡས་པས་མྱོང་གྲོལ་རིགས་སྤྱི་དང། བཅུད་ལེན་གྱི་རྫས་སོགས་ལའང་མཆོག་ཏུ་བསྔགས་སོ། ། ༈ ཚངས་དབྱངས་བསྐྱེད་པ་གསུང་གི་རིལ་བུ་དམ་རྫས་ཟླ་བའི་བདུད་རྩི་ནི། གཏེར་གཞུང་ལས། ཚངས་དབྱངས་གསུང་གི་རིལ་བུ་ནིཿ ཁུག་གྲེ་སྤང་རྒྱན་ཀྱི་ཀྱེ་དངཿ ཅནྡན་དམར་པོ་ཆ་མཉམ་སྦྱརཿ ཞེས་པ་ལྟར། སྤང་རྒྱན་དཀར་པོ། ཀྱེ་ཀྱེ་དཀར་པོ། ཙནྡན་དམར་པོ་རྣམས་ཆ་མཉམ་དང། ཁུ་བྱུག་གི་གྲེ་བ་བཅས་ཞིབ་པར་

༢༽ བཏགས་པ་ཙནྡན་དམར་པོའི་ཁུ་བས་སྦོལ། ཕབ་གཏའ་ཙན་དམར་གྱི་ཁུ་བ་དང་སྦྱར་བས་བྲན་ཏེ་འགོ་མིན་ཚོགས་ཆེན་འདུས་པའི་བསྙེན་སྒྲུབ་བཞི་ལྡན་བདུད་རྩི་བདེ་བ་ཆེན་པོའི་དཀྱིལ་འཁོར་དུ་བྱིན་གྱིས་བརླབ་ཅིང། སླར་རིལ་བུ་སྲན་མ་ཙམ་དུ་བསྒྲིལ་ཏེ་གསུང་རྡོ་རྗེ་འཇིག་རྟེན་དབང་ཕྱུག་གི་ངོ་བོར་བསྒྲུབས་པ་སྟེ། ཕན་ཡོན་ནི། གནས་སྐབས་ངག་གི་ནད་གདོན་ཞི། སྡིག་སྒྲིབ་དག། །ལྕེ་བདེ། གྲེ་བ་སྙན། དབང་པོ་གསལ་ཞིང་དྭངས། ཡིད་འཕྲོག་པ་ཚངས་པའི་དབྱངས་ལྟ་བུ་ཐོབ་ཅིང། མཐར་ཐུག་རླུང་དབུ་མར་ཐིམ་ནས་གསུང་རྡོ་རྗེ་ལོངས་སྤྱོད་རྫོགས་པའི་སྐུ་འགྲུབ་པ་སོགས་མཐའ་ཡས་པས་ན། མྱོང་གྲོལ་བདུད་རྩིའི་རིགས་སྤྱི་དང། ཁྱད་པར་བློ་འཕེལ་གྱི་རིལ་བུའི་རིགས་སོགས་ལའང་མཆོག་ཏུ་བསྔགས་སོ། ། ༈ བདེ་ཆེན་སྐྱེད་པ་ཐུགས་ཀྱི་རིལ་བུ་དམ་རྫས་དགའ་བཞིའི་ཐིག་ལེ་ནི། གཏེར་གཞུང་ལས། བདེ་ཆེན་ཐུགས་ཀྱི་རིལ་བུ་ནིཿ ཤ་ཆེན་ལུག་མུར་ཅོང་ཞི་གཉིསཿ རྒྱལ་བའི་གདུང་རྟེན་རིང་བསྲེལ་བཅསཿ ཞེས་གསུངས་པ་ལྟར། སྟོན་དུས་བརྐོས་པའི་ལུག་མུར་གྱི་ཕྱེ་མ་དང། ཅོང་ཞི་མཛོ་མོའི་འོ་མར་འདམ་བཏགས་ཆ་མཉམ། ཤ་ཆེན་ནུས་ཐོན་ཞིབ་བཏགས་བཅས་གར་ཆང་གིས་སྤོལ། དེལ་ཕབ་གཏའ་ཆང་གི་ཉིང་ཁུར་སྦྱངས་པ་ལས། སངས་རྒྱས་ཀྱི་འཕེལ་གདུང་དང། དགའ་རབ་རྡོ་རྗེའི་གདུང་རྟེན་ཅོང་ཞི་དང་ལྷན་ཅིག་ཞིབ་ཏུ་བཏགས་པ་བྲན་པའི་བདུད་རྩི་ཕུར་མ་ཉིད་དཔལ་ཆེན་འདུས་པའི་བདེ་ཆེན་སྦྱོར་བའི་དཀྱིལ་འཁོར་དུ་ཧེ་རུ་ཀ་བྱེ་བ་སྙེད་ཡབ་ཡུམ་གྱི་དགའ་བཞིའི་ཟིལ་མངར་དང་རོ་གཅིག་ཏུ་བྱིན་གྱིས་བརླབས། སླར་རིལ་བུ་སྲན་མ་ཙམ་དུ་དྲིལ་ནས་ཐུགས་རྡོ་རྗེ་གསང་བའི་བདག་པའི་ཡེ་ཤེས་སུ་བསྒྲུབས་པ་སྟེ། ཕན་ཡོན་ནི། གནས་སྐབས་སུ་ཡིད་ཀྱི་ནད་གདོན་ཞི། སྡིག་སྒྲིབ་དག། །ཉམས་རྟོགས་དང་རིག་རྩལ་ཕྱོགས་མེད་དུ་རྒྱས། གཟུངས་དྲན་དང། མངོན་ཤེས། ཏིང་ངེ་འཛིན་འགྲུབ། དགའ་བཞིའི་ཡེ་ཤེས་ལ་བརྟེན་ནསཐུགས་རྡོ་རྗེ་ཆོས་ཀྱི་སྐུའི་གོ་འཕང་ལ་སྦྱོར་བ་སོགས་བསྔགས་པ་མཐའ་ཡས་པས་ན། མྱོང་གྲོལ་གྱི་རིགས་སྤི་དང། ཁྱད་པར་བདུད་རྩི་ཕུར་མ་དང། རིལ་བུ་སོགས་བླ་མེད་ཀྱི་རྫས་མཐའ་དག་ལའང་མཆོག་ཏུ་གཅེས་ཤིང། ཚོགས་ཀྱི་འཁོར་ལོའི་དུས་སུ་མ་ད་ན་ལ་སྦྱར་ནས་བརྟེན་ན་ཉམས་རྟོགས་རྩོལ་མེད་དུ་ ༣༽ འཆར་བ་དང། ཡེ་ཤེས་དབབ་པའི་སྐབས་སུ། གླ་རྩི། ཙནྡན་དཀར་དམར། མིའི་སྐྲ་སེན་དང་ཉྭ་བཞིའི་ཤ། མི་ཀླད། ཚིལ་ཆེན། བྱང་སེམས་དཀར་དམར། བྱི་ལའི་བྲུན། གུ་གུལ། སྤོས་དཀར། ཤུ་དག་ནག་པོ་བཅས་ཕྱེ་མ་ཆང་གིས་སྦོལ་བ་དང་སྦྱར་ཞིང། ཐུགས་སྒྲུབ་སྙིང་བྱང་གི་པདྨ་དཔའ་བོའི་ལས་ཚོགས་ལྟར་བསྒྲུབས་པ་རོ་སོལ་གྱི་མེར་བདུག་པས་ཡེ་ཤེས་ཀྱི་ཟིལ་ཆེན་ལྷག་པར་འབེབས་ཏེ། བསྙེན་སྒྲུབ་དུས་སུ་བདུག་པ་ཡིསཿ ཡེ་ཤེས་པ་རྣམས་དབང་མེད་འདུཿ བྱིན་ཆེན་འབེབས་ཤིང་ཉམས་རྟོགས་འཕེལཿ དངོས་གྲུབ་རྣམ་གཉིས་ཐོབ་པར་འགྱུརཿ ཞེས་སོགས་གསུངས་པས་མཚོན་ཏེ། དབང་བསྐུར་བའི་དུས་སུ་བདུད་རྩིར་སྦྱར་ནས་བྱིན་པས་དཔེ་དོན་གྱི་ཡེ་ཤེས་འདྲེན་པ་དང། ཟབ་མོའི་རྣམ་འབྱོར་གྱི་སྐབས་སུ་བསྟེན་པས་ཏིང་ངེ་འཛིན་གནད་དུ་འགྲོ་བ་སོགས་མཐའ་ཡས་པར་རྟོགས་པར་བྱའོ། །ཁྱད་ཆོས་དེ་ལྡན་གྱི་སྐུ་གསུང་ཐུགས་རིལ་འདི་ཉིད་གསར་དུ་སྦྱར་བསྒྲུབ་བྱེད་ན། རྩ་བའི་ཕབ་གཏའ་གཏེར་བྱོན་དངོས་ལ་གཞི་བྱས། གོང་གསལ་སོ་སོའི་སྨན་རྣམས་ཚད་ལྡན་དུ་སྦྱར་ཞིང། སྒྲུབ་པའི་ཚུལ་ཡང་ཇི་སྐད་གསུངས་པ་ལྟར་ཕྱག་ལེན་གཙང་ཞིང་ཆོ་གའི་ཡན་ལག་མ་འཁྲུལ་མཉམས་པའི་སྒོ་ནས་གཙང་དག་ཏུ་སྤེལ་བ་གནད་དུ་ཆེའོ། །ཞེས་པའང་དམ་རྫས་དཀར་ཆག་ལས་ཁོལ་དུ་ཕྱུངས་པ་སྟེ་ཛྙཱ་ནས་སོ།། །།