TTDL-ZABTER-18-TSHA-015

Previous Text Back to Volume Page Next Text

Wylie title
Location	bdud 'joms gling pa zab gter Volume 18, Text 15, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. '*. In Sprul pa'i gter chen bdud 'joms gling pa'i zab gter gsang ba'i chos sde, Vol. 18: . Thimphu, Bhutan: Lama Kuenzang Wangdue, 2004.*
Side notes	Recto: zhal gdams Verso: bdud 'joms gsung mgur skor
More details More details
Genre	Advice - zhal gdams

[edit]

༄༅། །ཆོས་རྒྱལ་ལ་གདམས་པའོ། །དུས་གསུམ་སངས་རྒྱས་འདུས་པའི་དཔལ། །ཀུན་བཟང་མཚོ་སྐྱེས་རྡོ་རྗེས་སྐྱོངས། །སྨོན་ལམ་ལས་འབྲེལ་སྐྱེས་བུ་ཁྱོད། །ངེས་པར་ཆོས་ཞིག་བསྒྲུབ་འདོད་ན། །དལ་འབྱོར་རྙེད་དཀའི་ཚུལ་ལ་སོམས། །དོན་དང་ལྡན་པ་ཞིག་ལ་རེམ། །མི་རྟག་འཆི་བ་མ་བརྗེད་པར། །བློ་ཐག་རིང་པོའི་སྣ་ཀ་བསྟུང་། །ཚེ་རབས་ཐོག་མ་མེད་ལ་ལྟོས། །དམ་པའི་ཆོས་དང་འཕྲད་པར་དཀའ། །མི་ཚེ་རྨི་ལམ་སྐབས་ཙམ་ལ། །བྱ་བྱེད་མ་མང་ཆོས་ལ་དྲིལ། །ལོ་ཟླའི་སྒྲུབ་པ་ཙམ་རེ་ལ། །ཡུས་ཆེ་མ་བྱེད་ཚེ་མཐར་གཏུག །ཚེ་དང་སྒྲུབ་པ་མཉམ་བྱས་ན། །སྐྱེས་བུ་རབ་ཀྱི་སྤྱོད་པ་ཡི། །ངོ་ལྐོག་གཡོ་སྒྱུ་མེད་པ་རུ། །དམ་སྡོམ་བསྲུང་ན་རྒྱལ་སྲས་ཡིན། །སྟོང་ཉིད་ལྟ་བ་རིན་པོ་ཆེ། །བར་མེད་བསྒོམ་ན་རྣལ་འབྱོར་ཡིན། །རིག་པ་བྱར་མེད་བློ་བདེའི་ངང་། །རང་ཁར་འདུག་ན་རིག་འཛིན་ཡིན། །སྤྱོད་པ་མི་དང་མི་བསྟུན་པར། །རང་ས་བཟུང་བ་བྱ་བཏང་ཡིན། །གང་དང་ཐུག་འཕྲད་མེད་པ་རུ། །གཅིག་པུར་གནས་པ་རི་ཁྲོད་ཡིན། །ཆོས་བརྒྱད་བྱ་བའི་མཚམས་བཅད་ནས། །ཆོས་ཉིད་ངང་གནས་མཚམས་པ་ཡིན། །ཡིན་པ་བདུན་དང་ལྡན་གྱུར་ན། །དུས་གསུམ་རྒྱལ་བའི་གདུང་འཚོབ་ཡིན། །བླ་མ་དམ་པའི་བརྒྱུད་འཛིན་ཡིན། །ཨ་ཧོ།གནས་གང་འདུག་སྣང་བ་རྒྱ་ཡན་ནེ། །དུས་ནམ་ཡང་ཤེས་པ་དགའ་སལ་ལེ། །གྲོགས་སུ་འཕྲད་ཞི་དུལ་སྤྱོད་པ་མཛང་། །ལས་ཅི་བྱས་བག་ཡོད་དགེ་བར་འདྲེས། །དེ་གདམས་པའི་ཡང་བཅུད་དམ་པ་ཡིན། །སེམས་ཡེ་ནས་མ་བཅོས་སྤྲོས་མཐའ་བྲལ། །ངང་མངོན་དུ་གྱུར་ན་རྟོགས་ལྡན་ཡིན། །སེམས་ཡེ་སྟོང་དྭངས་གསལ་རྙོག་བྲལ་ལགས། །ངོ་རང་ཐོག་འཕྲོད་པ་རྟོགས་ལྡན་ཡིན། །སེམས་ངོ་བོ་ཡེ་སངས་རྒྱས་པ་ལགས། །ངང་མངོན་དུ་གྱུར་ན་རྟོགས་ལྡན་ཡིན། །སེམས་ཡེ་གྲོལ་འཁོར་འདས་དག་མཉམ་ཆེ། །ངོ་རང་སར་ཤེས་པ་རྟོགས་ལྡན་ཡིན། །སེམས་འཁོར་འདས་འུབ་ཆུབ་ཆེན་པོ་ལགས། །དེ་རང་ངོ་འཕྲོད་ན་རྟོགས་ལྡན་ཡིན། །དབྱིངས་ལྷུན་གྲུབ་བདེ་ཆེན་ཐིག་ལེའི་སྐུ། །འཕེལ་སྨིན་ནས་ཟད་པའི་མཐའ་རུ་ཕེབས། །མཐར་གཞོན་ནུ་བུམ་སྐུར་འཇའ་ལུས་གྲོལ། །ཚེ་འདི་རུ་གྲོལ་ཐོབ་ཞིག་ཏུ་རེམ། །ང་རྒན་པོའི་ལབ་མོ་དེ་ཡིན་པས། །དོན་ཉམས་སུ་ལོངས་ཤིག་སྐལ་བཟང་བུ། །ཞེས་ཆོས་རྒྱལ་གྱིས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་སྨྲས་པ་དགེའོ། །སརྦ་མངྒ་ལཾ། །། །