TTDL-ZABTER-03-GA-044

Previous Text Back to Volume Page Next Text

Wylie title
Location	bdud 'joms gling pa zab gter Volume 3, Text 44, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

[edit]

ཟབ་གསང་མཁའ་འགྲོའི་སྙིང་ཐིག་ལས༔ བླ་མ་ཞི་ཁྲོ་འདུས་པའི་སྒོམ་བཟླས་ཡེ་ཤེས་འོད་ཟེར་བཞུགས་སོ༔ ༠༠༠༠བརྡ་ཡིག༤༢༥ན་མོ་གུ་རུ་པདྨ་ཀ་ར་ཡེ༔ བླ་མ་ཞི་ཁྲོ་འདུས་པའི་སྒྲུབ་པ་འདི༔ ཉམས་སུ་ལེན་པའི་སྐལ་པ་བཟང་པོ་ལ༔ སྒོམ་བཟླས་དམིགས་གནད་ཡེ་ཤེས་འོད་ཟེར་བསྟན༔ འདི་ལྟར་ཉམས་སུ་ལོངས་དང་ངེས་པར་གྲོལ༔ བྷྲུྃ་ཧཱུྃ༔ བདག་བསྐྱེད་བསྒོམ་པའི་དཀྱིལ་འཁོར་ལྷའི༔ གདངས་ལས་མདུན་བསྐྱེད་རྟེན་བརྟེན་པ༔ བྱད་དང་མེ་ལོང་གཟུགས་བརྙན་བཞིན༔ རང་བྱུང་རང་ཤར་ཆེན་པོར་བསྒོམ༔ ཐུགས་ཀར་པདྨ་ཟླ་གདན་ལ༔ གསེར་གྱི་རྡོ་རྗེ་རྩེ་ལྔ་པའི༔ ལྟེ་བར་ཧྲཱིཿལ་སྔགས་ཀྱིས་བསྐོར༔ བཟླས་པས་བདག་སྣང་དབྱིངས་སུ་ཞིག༔ ཆོས་ཉིད་རོལ་པར་རྫོགས་སངས་རྒྱས༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ འདི་ཉིད་རྩེ་གཅིག་བཟླས་པའི་ཚེ༔ སྔགས་ཕྲེང་འཁོར་བའི་འོད་ཟེར་གྱིས་རྒྱལ་བ་སྲས་དང་བཅས་པ་ཐམས་ཅད་མཆོད༔ གསང་བ་གསུམ་གྱི་དབང་བྱིན་ནུས་པ་ཐམས་ཅད་བསྡུས༔ ཁམས་གསུམ་སེམས་ཅན་ཐམས་ཅད་ཀྱི་ལས་སྒྲིབ་བག་ཆགས་ཐམས་ཅད་སྦྱངས༔ སྣོད་བཅུད་བརྟན་གཡོ་ཐམས་ཅད་ཀྱི་གཟི་བྱིན་བསྡུས་ཏེ་སྔགས་ཕྲེང་ལ་ཐིམ་པར་བསྒོམ༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ དེ་ནི་བསྙེན་པ་དང་ཉེ་བསྙེན་ནོ༔ སླར་ཡང་སྒྲུབ་པ་ནི༔ བསྒོམ་པའི་ལྷ་རྣམས་ཀྱི་ཐུགས་ཀར་རང་རང་གི་ཐུགས་སྲོག་ས་བོན་གྱི་མཐར་སྔགས་ཀྱི་ཕྲེང་བས་བསྐོར་བའི་འོད་ཟེར་གྱིས་སྣང་བ་ལྷ༔ སྒྲ་གྲགས་སྔགས༔ དྲན་རྟོག་ཐམས་ཅད་ཆོས་ཉིད་ཀྱི་རོལ་པར་སངས་རྒྱས་པར་བསམ༔ ཀུན་བཟང་ཡབ་ཡུམ་གྱི་ཐུགས་ཀར་ཨཱཿཡིག་དཀར་པོའི་མཐར༔ ཨོཾ་བྷོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷ་ཏུ་ཨཱ༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཅི་ནུས་བཟླས་ཚེ་ལྷར་གསལ་མི་འགྱུར་བའི་ཏིང་ངེ་འཛིན་བསྒོམ་པར་བྱ༔ སླར་ཡང་ལས་ལ་སྦྱོར་བ་ནི༔ བདག་མདུན་གྱི་ཐུགས་ཀའི་སྔགས་ཕྲེང་ལས་འོད་ཟེར་དཔག་ཏུ་མེད་པ་འཕྲོས་པས་འགྲོ་བ་རིགས་དྲུག་གི་སེམས་ཅན་ཐམས་ཅད་ཀྱི་རྒྱུད་སྦྱངས༔ དེ་དག་གི་སྣང་བ་ཐམས་ཅད་སྒྱུ་མའི་འཁྲུལ་འཁོར་ཞིག་པའམ༔ རྨི་ལམ་དབྱིངས་སུ་སད་པ་བཞིན་དུ་ཡེ་ཤེས་ཀྱི་སྣང་བ་ཆེན་པོར་གྲོལ་ཏེ་ཁམས་གསུམ་འཁོར་བ་དོང་ནས་སྤྲུགས་པར་བསྒོམ༔ ཨོཾ་བྷོ་དྷི་ཙིཏྟ་མ་ཧཱ༴ཨཱཿཨོཾ་རུ་ལུ༴ཧཱུྃ༔ ཞེས་བཟླས་པའི་ཚེ་ཁམས་གསུམ་གྱི་སེམས་ཅན་ཐམས་ཅད་སྐུ་གསུམ་ཞི་ཁྲོ་རབ་འབྱམས་ཀྱི་སྐུར་གྱུར༔ སྔགས་ཀྱི་སྒྲ་བར་མ་ཆད་པར་དི་རི་རི་སྒྲོགས་པས་སྣང་སྲིད་ཐམས་ཅད་གཡོ་བར་བསམ༔ ཨོཾ་བྷོ་དྷི་ཙིཏྟ་མ་ཧཱ་སུ་ཁ་སོགས་བྷྱོ་ཧཱུྃ༔ ༈གཞན་ལ་དབང་བསྐུར་བྱེད་འདོད་ན༔ བུམ་པ་མཚན་ལྡན་མགུལ་ཆིངས་ཅན༔ སྙིང་པོ་རིན་ཆེན་དྲི་སྨན་དང་༔ འབྲུ་ལྔ་སྦྱོར་བའི་ཆུས་བཀང་སྟེ༔ དཀྱིལ་འཁོར་དབུས་སུ་བཞག་བྱས་ལ༔ ཧཱུྃ༔ བུམ་པ་བརྡལ་ཁྱབ་གཞལ་ཡས་སུ༔ གེ་སར་ཉི་ཟླའི་གདན་སྟེང་དུ༔ རྫོགས་པའི་སངས་རྒྱས་པདྨ་སྐྱེས༔ སྣང་སྲིད་ཟིལ་གནོན་རྒྱལ་བའི་སྐུ༔ ཞི་ཁྲོ་རབ་འབྱམས་རྒྱུད་སྡེའི་ལྷ༔ ཏིལ་གོང་ཕྱུར་བཞིན་ཡོངས་སུ་རྫོགས༔ ཉི་མ་དང་ནི་འོད་ཟེར་བཞིན༔ རིག་འཛིན་བླ་མའི་འཁོར་གྱིས་བསྐོར༔ གདོད་ནས་དམ་ཚིག་ཡེ་ཤེས་པ༔ དབྱེར་མེད་ཆེན་པོར་ལྷུན་གྱིས་གྲུབ༔ ཅེས་བསྐྱེད་པས་འཛབ་ཁང་དབྱེ་ལ༔ བུམ་པའི་ལྷ་རྣམས་ཀྱི་ཐུགས་ཀར་རང་རང་གི་ཐུགས་སྲོག་ས་བོན་གྱི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་དཔག་ཏུ་མེད་པ་འཕྲོས་པས་རྒྱལ་བ་སྲས་དང་བཅས་པ་མཆོད༔ དབང་བྱིན་ནུས་པ་ཐམས་ཅད་བསྡུས་ཏེ་སྔགས་ཕྲེང་ལ་ཐིམ༔ སེམས་ཅན་ཐམས་ཅད་ཀྱི་ལས་ཉོན་བག་ཆགས་སྦྱངས་ཏེ་སླར་འདུས་སྔགས་ཕྲེང་ལ་ཐིམ༔ སྔགས་ཕྲེང་ལས་བདུད་རྩིའི་རྒྱུན་བབས་པས་བུམ་པ་གང་བར་དམིགས༔ ཨོཾ་ཨཱཿཧཱུྃ་བྷོ་དྷི་ཙིཏྟ་མ་ཧཱ་སུ༴བྷྱོ་ཧཱུྃ༔ ཅི་འགྲུབ་བཟླས་མཐར་མཆོད་བསྟོད་བྱས་ནས༔ དུང་ཆོས་ཀྱི་ཆུ་ཕུལ་བས་ལྷ་རྣམས་དགྱེས་ཆགས་དགའ་བདེའི་ཉམས་ཀྱིས་མྱོས་ཤིང་བདེ་སྟོང་གཉིས་སུ་མེད་པའི་ངོ་བོར་ཞུ་ནས་བུམ་ཆུ་ལ་ཐིམ་པས་དབང་གི་ནུས་པ་རྫོགས་པའོ༔ ༈ཁྲུས་བྱེད་ལས་ཀྱི་བུམ་པ་ལ༔ མགུལ་ཆིངས་དཀར་པོ་རབ་དཀྲིས་ཏེ༔ གཙང་མ་ཆུ་ཡིས་ལེགས་བཀང་ནས༔ དཀྱིལ་འཁོར་དེ་ཡི་མཐའ་རུ་བཞག༔ ཧཱུྃ༔ བུམ་པ་སྟོང་གསལ་གཞལ་ཡས་སུ༔ པདྨ་ཟླ་རྒྱས་གདན་སྟེང་དུ༔ ཧཱུྃ་ལས་དཔལ་ལྡན་རྡོ་རྗེ་སེམས༔ དཀར་གསལ་ཞལ་གཅིག་ཕྱག་གཉིས་པ༔ གཡས་པས་རྡོ་རྗེ་ཐུགས་ཀར་བསྣམས༔ གཡོན་པས་དྲིལ་བུ་དཀུ་ལ་བརྟེན༔ ཞི་འཛུམ་གཞོན་ཚུལ་མཚན་དཔེས་བརྒྱན༔ ལོངས་སྤྱོད་ཆས་རྫོགས་གཟི་འོད་འབར༔ ཞབས་གཉིས་རྡོ་རྗེའི་སྐྱིལ་ཀྲུང་བཞུགས༔ འཁོར་བ་དོང་སྤྲུགས་དཔལ་དུ་བསྐྱེད༔ སྐུ་གསུམ་རྒྱལ་བ་ཐམས་ཅད་ཀྱི༔ མཁྱེན་བརྩེ་ནུས་བཅུད་བསྡུས་ཏེ་བསྟིམ༔ ཐུགས་ཀར་ཧཱུྃ་ལ་ཡིག་བརྒྱས་བསྐོར༔ བཟླས་པས་སྒྲིབ་གཉིས་དག་བྱེད་ཀྱི༔ ཡེ་ཤེས་བདུད་རྩིའི་ཆར་རྒྱུན་བབས༔ ཨོཾ་བཛྲ་སཏྭ་སོགས་ཡི་གེ་བརྒྱ་པ་ཅི་ནུས་བཟླ༔ མཐར་ནི་མཆོད་ཅིང་བསྟོད་པ་ལ༔ ཧཱུྃ༔ མི་མཇེད་འཇིག་རྟེན་མཐའ་ཡས་ན༔ བཀོད་པ་རབ་འབྱམས་འདོད་ཡོན་དཔལ༔ བསྡུས་ཏེ་རྒྱལ་བ་དགྱེས་ཕྱིར་འབུལ༔ འགྲོ་ཀུན་ཚོགས་གཉིས་རྫོགས་གྱུར་ཅིག༔ ཨོཾ་ཨཱཿཧཱུྃ༔ བཛྲ་ཨརྒྷཾ་པཱདྱཾ་སོགས་རཱུ་པ་ཤཔྡ་གནྡྷེ་རཱ་ས་སྤཪྴེ་པྲ་ཏཱིཙྪ་ཡེ་སྭཱ་ཧཱ༔ ཧཱུྃ༔ དུས་གསུམ་རྒྱལ་བ་འདུས་པའི་སྐུ༔ ཡོན་ཏན་ཡེ་ཤེས་རྒྱ་མཚོའི་གཏེར༔ རྫོགས་པའི་སངས་རྒྱས་བྱང་ཆུབ་དཔལ༔ རྡོ་རྗེ་སེམས་ལ་ཕྱག་འཚལ་བསྟོད༔ བུམ་པའི་ལྷ་འོད་དུ་ལྟེམ་གྱིས་ཞུ་བ་ལས་བྱུང་བའི་དག་བྱེད་ཀྱི་ཆུ་ནུས་པ་དང་ལྡན་པར་བསམ༔ འདི་ལྟར་བསྒོམ་བཟླས་བྱེད་པའི་ཚེ༔ དམིགས་པ་གཞན་དུ་མ་ཡེངས་པར༔ གང་གིས་སྒྲུབ་པར་བྱེད་པ་དེ༔ ལུས་བདེ་ནད་དང་ཟུག་རྔུ་མེད༔ ངག་སྦྱང་དབྱངས་སྙན་འགགས་པ་ཁྲོལ༔ སེམས་ལ་ཉམས་རྟོགས་ཡོན་ཏན་འཕེལ༔ འདི་དག་རབ་ཀྱི་རྟགས་མཚན་ཡིན༔ ཉམས་ཀྱི་སྣང་བ་ལྷ་ཞལ་མཐོང་༔ དག་སྣང་མ་ངེས་སྣ་ཚོགས་པ༔ གང་བྱུང་འབྲིང་གི་རྟགས་མཚན་ཏེ༔ རྨི་ལམ་ལ་ཡང་ལྷ་ཞལ་མཐོང་༔ དབང་དང་གདམས་པ་ཐོབ་པ་དང་༔ མེ་ཏོག་སྣ་ཚོགས་རྒྱས་པ་དང་༔ ཉི་མ་ཤར་དང་ལོ་ཏོག་རྒྱས༔ རོལ་མོ་འཁྲོལ་དང་ཟས་ནོར་རྙེད༔ མཁའ་ལ་འཕུར་དང་རི་རྩེར་འཛེག༔ འདི་དག་དངོས་གྲུབ་མཚན་མ་ལགས༔ ཞིང་རྨོས་ཤིང་གཅོད་བྲག་བཤིག་ཅིང་༔ སྐྱེ་འགྲོ་མང་པོས་གྲུ་གཏིང་ནས༔ ཆུ་བོ་ཆེན་པོ་བརྒལ་དཔོན་བྱེད༔ ཕྱུགས་མང་འཚོ་རྫི་བྱེད་པ་དང་༔ འགྲོ་བའི་འཇིགས་སྐྱོབ་བྱེད་པ་རྣམས༔ ཕྲིན་ལས་གྲུབ་པའི་ལྟས་སུ་ལེགས༔ དེ་ལྟར་བཀྲ་ལྟས་མ་བྱུང་བར༔ རྩེ་གཅིག་སྒྲུབ་ལ་གཞོལ་མཛོད་ཅིག༔ འདི་ནི་ཡང་གསང་བཅུད་དྭངས་མ༔ འབྲེལ་ཚད་རྣམ་པར་གྲོལ་གྱུར་རོ༔ བཀའ་སྲུང་ཚོགས་ཀྱི་བདག་པོས་སྲུངས༔ བསྟན་པ་མི་ནུབ་རྒྱལ་མཚན་ཚུགས༔ དམ་ཉམས་ལག་ཏུ་མ་བཏང་ཞིག༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་རྡོ་རྗེ་བྲག་གི་མགུལ་ནས་བཏོན་ཏེ་མི་ལོ་ཉི་ཤུའི་བར་དུ་བཀའ་རྒྱ་བྱས་ཏེ་མཐར་རྟེན་འབྲེལ་དུས་ལ་བབ་ཚེ་སྨར་མདོ་ནས་གཏན་ལ་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ།།དགེའོ།།སརྦ་མངྒ་ལཾ།།།།