TTDL-ZABTER-13-PA-114

Previous Text Back to Volume Page Next Text

Wylie title
Location	bdud 'joms gling pa zab gter Volume 13, Text 114, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. '*. In Sprul pa'i gter chen bdud 'joms gling pa'i zab gter gsang ba'i chos sde, Vol. 13: . Thimphu, Bhutan: Lama Kuenzang Wangdue, 2004.*
Side notes	Verso: bdud 'joms
More details More details
Tertön	བདུད་འཇོམས་གླིང་པ་ (bdud 'joms gling pa)
Genre
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)

[edit]

ཆོས་ཉིད་ནམ་མཁའི་ཀློང་མཛོད་ལས༔ བཀའ་སྲུང་དྲེགས་པའི་མཁོན་སྦྱངས་འདའ་དཀའ་རྡོ་རྗེ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ ཤ་ཁྲག་དམར་གཏོར་སྐྱེམས་ཕུད་བཤམས༔ རང་ཉིད་ཡི་དམ་ལྷར་གསལ་ངང་༔ ན་མོ༔ དཀོན་མཆོག་རིན་ཆེན་གསུམ་གྱི་བདེན་སྟོབས་དང་༔ གསང་སྔགས་བླ་ན་མེད་པའི་རྟེན་འབྲེལ་དང་༔ བདེན་པར་སྨྲ་བ་རྣམས་ཀྱི་བདེན་ཚིག་དང་༔ ཆོས་ཉིད་རྣམ་དག་རྟེན་འབྲེལ་བསླུ་མེད་མཐུས༔ ཡེ་ཤེས་འཇིག་རྟེན་བཀའ་སྲུང་དྲེགས་པ་ཅན༔ མ་ལུས་བདག་གི་འབངས་སུ་མཆིས་གྱུར་ཏེ༔ ཅི་བསྒོས་བཀའ་ཉན་འདོད་དོན་སྒྲུབ་གྱུར་ཅིག༔ ཧཱུྃ༔ གསོན་ཅིག་དགོངས་ཤིག་བཀའ་སྲུང་དམ་ཅན་ཚོགས༔ ཁྱད་པར་གཟའ་བཙན་གནོད་སྦྱིན་དྲེགས་པའི་སྡེ༔ ཁྱེད་ཀྱི་ཐུགས་དང་འགལ་བ་ཅི་མཆིས་པ༔ མཐོལ་བཤགས་བཟོད་པར་གསོལ་ལ་ཐུགས་བརྩེས་དགོངས༔ ཉེས་པ་བཤགས་ཤིང་འགལ་བ་བསྡུམ་འགྱུར་ཅིང་༔ ཕན་ཚུན་མི་མཐུན་པ་དག་མཐུན་པར་བཅོས༔ ཤ་ཁྲག་དམར་གྱི་གཏོར་མ་འདི་འབུལ་བཞེས༔ ང་ཡི་ཡིད་ལ་མི་འདོད་རྐྱེན་སྣང་ཀུན༔ མཐུ་སྟོབས་ནུས་པ་དྲག་ཤུལ་ཤུགས་ཕྱུང་ལ༔ ཞི་བཟློག་གཞོམས་ཤིང་དབྱིངས་སུ་སྒྲོལ་མཛོད་ཅིག༔ ནད་གདོན་འགལ་རྐྱེན་བར་ཆད་ཞི་བ་དང་༔ ཚེ་བསོད་དཔལ་འབྱོར་ཡོན་ཏན་རྒྱས་པ་དང་༔ ཁམས་གསུམ་མོས་པ་རྣམ་བཞིས་དབང་དུ་བསྡུས༔ མངོན་སྤྱོད་ལས་ཀྱིས་དགྲ་བགེགས་ཚར་ཆོད་ཅིག༔ རྩ་གསུམ་དམ་ཅན་སྲུང་མ་རྒྱ་མཚོ་ཡི༔ ཤེས་རབ་དང་ནི་ཡེ་ཤེས་རྩལ་ཤུགས་ཀྱིས༔ གཤིན་འདྲེའི་འཁྲུལ་པ་དབྱིངས་སུ་བཤིག་པ་དང་༔ ཆོས་ཉིད་འཁྲུལ་མི་ཤེས་པའི་ས་རུ་སྒྲོལ༔ ས་ལམ་བར་ཆད་བྱེད་པའི་འདྲེ་གདོན་བགེགས༔ མངོན་སྤྱོད་དྲག་པོའི་སྟོབས་ཀྱིས་མྱུར་དུ་སོད༔ གསང་བདག་མི་འཇིགས་རྡོ་རྗེ་གཏུམ་པོ་དང་༔ ཨོ་རྒྱན་ཆེན་པོ་པདྨ་ཐོད་ཕྲེང་གི༔ བཀའ་དང་དམ་ཚིག་གཉན་པོ་དཔང་བཙུག་གོ༔ མ་འདའ་བདག་གིས་བཅོལ་བའི་ལས་དེ་དག༔ མ་འགྱང་མྱུར་དུ་སྒྲུབས་ཤིག་ས་མ་ཡ༔ ཞེས་པ་འདི་དད་ལྡན་སྤྲེལ་ལོས་ནན་དུ་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའོ།།དགེའོ།།དགེའོ།།དགེའོ།།ལེགས་སོ།།སརྦ་མངྒ་ལཾ།།།།