TTDL-ZABTER-15-BA-053

Previous Text Back to Volume Page Next Text

Wylie title
Location	bdud 'joms gling pa zab gter Volume 15, Text 53, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

[edit]

དག་སྣང་ཡེ་ཤེས་དྲྭ་བ་ལས༔ བསླུ་བདུད་ནག་པོ་ཨར་ལ་གཏད་པའི་གདམས་པ་བཞུགས་སོ༔ སྙིགས་མ་ལྔ་བདོའི་མཐར་ཐུག་ཚེ༔ བསྒོམ་ཆེན་འདྲེ་ཡིས་བསླུས་ནས་སུ༔ སྣ་ཚོགས་ནད་ཀྱི་གདུང་བ་དང་༔ སྨྱོ་ཞིང་འབོགས་ཏེ་བརྒྱལ་བ་དང་༔ ཆོས་བརྒྱད་ཡུལ་ལ་ཁ་འབྱམས་ཞེན༔ གཅོད་པ་ཕལ་ཆེར་འདྲེས་བསླུས་ཏེ༔ གོང་བཞིན་ནད་ཀྱིས་གདུང་བ་དང་༔ གྲོང་ཆོག་འདྲེ་བརྡུང་དཀོར་ལ་འབྱམས༔ འདོད་སྲེད་ཁྱི་ལས་ཆེ་བ་ཡིས༔ རྫུན་དང་གཡོ་སྒྱུ་ཆགས་སྡང་གིས༔ ཆོས་བརྒྱད་ཡུལ་ལ་རྟག་ཏུ་འབྱམས༔ ཤི་ནས་མཁའ་རྒྱུའི་ཡི་དྭགས་སུ༔ འདྲེ་རུ་འཁྲུལ་ཏེ་སྲོག་ལ་རྒྱུ༔ དེ་ཕྱིར་རྐྱེན་ངན་དེ་བཟློག་ཆེད༔ འདི་ལྟར་དུས་གསུམ་དམིགས་གནད་ཀྱིས༔ གཟིར་ཞིང་བསྲེ་འཕོ་ཡང་ཡང་བྱ༔ རང་གི་སྙིང་མཆོང་ཟུར་སྨུག་པོ་ལྟ་བུའི་འོད་ཀྱི་གུར་ཁང་གི་ནང་དུ་པདྨ་དང་ཉི་མའི་གདན་ལ་བདུད་འདུལ་པདྨ་འབྱུང་གནས་སྐུ་མདོག་མཐིང་ནག་ཁྲོ་ཞིང་གཏུམ་པའི་ངང་ཚུལ་ཅན་ཕྱག་གཉིས་སྣང་སྲིད་ཟིལ་གནོན་གྱི་ཕྱག་རྒྱ་དང་༔ ཞབས་གཉིས་རྒྱལ་པོ་རོལ་པའི་སྟབས་སུ་བཞུགས་པ་པད་ཞྭ་བེར་མཐིང་བླ་གོས་སོགས་ཆོས་གོས་རྣམ་གསུམ་གསོལ་བ༔ འོད་དང་གཟི་བརྗིད་རབ་ཏུ་འབར་བ་ཞིག་ཏུ་བསྒོམ༔ རང་གི་མདུན་དུ་གནོད་ཅིང་འཚེ་བར་བྱེད་པའི་ཕོ་གདོན་མོ་གདོན་ཀླུ་གདོན་ནད་འདྲེ་གནོད་བྱེད་གང་ཡིན་པ་ཐམས་ཅད་ཁྲོམ་འཚོགས་པ་བཞིན་དུ་གསལ་ཏེ་སྣ་བུག་ནས་རླུང་རྔུབ་པ་དང་མཉམ་གནོད་བྱེད་ཐམས་ཅད་སྣ་བུག་ནས་དྲངས་ཏེ་སྙིང་དབུས་པད་འབྱུང་གི་ཐུགས་ཀར་ཐིམ་པར་བསྒོམ༔ སླར་ཡང་རང་གི་བསམ་རྒྱུད་དང་ལྷ་འདྲེའི་སེམས་རྒྱུད་དང་པདྨ་འབྱུང་གནས་ཀྱི་ཐུགས་རྒྱུད་རྣམ་རོ་གཅིག་ཏུ་གྱུར་པ་ཕཊ་བརྗོད་པས་དབྱིངས་ཀུན་ཏུ་བཟང་མོའི་མཁའ་ཀློང་དུ་བསྲེས་ཏེ་ཁྱབ་བརྡལ་གྱི་ངང་དུ་མཉམ་པར་འཇོག་པ་ཡིན༔ དེ་ལྟར་དམིགས་པ་གནད་ལྡན་པས༔ བསླུ་བྱེད་བདུད་བགེགས་ཀྱིས་རྒོལ་བའི༔ རྐྱེན་སྣང་ངན་པའི་གཡུལ་བཟློག་ཅིང་༔ སོར་ཆུད་པ་རུ་ཐེ་ཚོམ་མེད༔ ས་མ་ཡ༔ ཨྠིྀ༔ བདུད་འཇོམས་རྡོ་རྗེས་སྨྲས་པ་ཡོངས་སུ་དགེ་བར་གྱུར་ཅིག།དགེའོ།།དགེའོ།།དགེའོ།།སརྦ་མངྒ་ལཾ།།།།