TTDL-ZABTER-15-BA-003

Previous Text Back to Volume Page Next Text

Wylie title
Location	bdud 'joms gling pa zab gter Volume 15, Text 3, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. '*. In Sprul pa'i gter chen bdud 'joms gling pa'i zab gter gsang ba'i chos sde, Vol. 15: . Thimphu, Bhutan: Lama Kuenzang Wangdue, 2004.*
Side notes	Verso: bdud 'joms
More details More details
Tertön	བདུད་འཇོམས་གླིང་པ་ (bdud 'joms gling pa)
Genre
Cycle	དག་སྣང་ཡེ་ཤེས་དྲྭ་བ་ (dag snang ye shes drwa ba)

[edit]

དག་སྣང་ཡེ་ཤེས་དྲྭ་བ་ལས༔ བླ་མའི་ཚོགས་མཆོད་འདོད་ཡོན་སྤྲིན་དཔུང་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ ༠༠༠༠བརྡ་ཡིག༩ཡང་དག་ལམ་ཞུགས་སྐྱེས་བུ་ཡིས༔ ཉམས་ཆག་མ་ལུས་སྐོང་བའི་ཕྱིར༔ འབྱོར་ཚོགས་འདོད་ཡོན་བཤམས་བྱས་ནས༔ ཏིང་འཛིན་ནམ་མཁའ་མཛོད་ཀྱིས་སྤེལ༔ རཾ་ཡཾ་ཁཾ༔ རྣམ་རྟོག་མཚན་མའི་བག་ཆགས་སྦྱངས༔ རྣམ་དག་ཡེ་ཤེས་བདུད་རྩི་ཡིས༔ རྒྱལ་བའི་ཞིང་ཁམས་ཡོངས་ཁྱབ་གྱུར༔ འདོད་རྒུའི་དཔལ་ཡོན་ནམ་མཁའ་མཛོད༔ ཨོཾ་ཨཱ༔ ཧཱུྃ༔ ལན་གསུམ༔ དེ་ནས་སྤྱན་འདྲེན་པ་ནི༔ ཧཱུྃ༔ རང་སྣང་དོན་གྱི་འོག་མིན་ནས༔ བཀའ་དྲིན་གསུམ་ལྡན་བླ་མ་ལ༔ བརྒྱུད་གསུམ་བླ་མའི་ཚོགས་ཀྱིས་བསྐོར༔ ཚོགས་ལ་སྤྱན་འདྲེན་གཤེགས་སུ་གསོལ༔ བཛྲ་ས་མ་ཡ་ཛ་ཛཿདེ་ནས་ཚོགས་ཕུད་འབུལ་ཞིང་བར་པ་བཤགས་པ་ནི༔ ཧཱུྃ༔ རིག་འཛིན་བླ་མའི་དཀྱིལ་འཁོར་ལ༔ འདོད་ཡོན་ལོངས་སྤྱོད་ཚོགས་མཆོད་འབུལ༔ དམ་ཚིག་ཉམས་ཆགས་འགལ་འཁྲུལ་ཀུན༔ ཚོགས་ཀྱི་མཆོད་པས་བསྐང་ཞིང་བཤགས༔ ན་མོ་སརྦ་མ་ཧཱ་གུ་རུ་ག་ཎ་ཙཀྲ་ཁཱ་ཧི༔ བཛྲ་ས་མ་ཡ་ཤུདྡྷེ་ཨཱ༔ དེ་ནས་བསྒྲལ་ཞིང་བསྟབ་པ་ནི༔ ཧཱུྃ༔ མ་རིག་ཉོན་འཁྲུལ་དགྲ་བགེགས་རྣམས༔ བདག་མེད་ཡེ་ཤེས་ཆེན་པོས་བསྒྲལ༔ ཕུང་ཁམས་སྐྱེ་མཆེད་དབང་ཡུལ་བཅས༔ རིག་འཛིན་བླ་མའི་ཞལ་དུ་བསྟབས༔ སརྦ་ཤ་ཏྲུཾ་མཱ་ར་ཡ་རྦད་ཁཱ་ཧི༔ དེ་ནས་ལྷག་མ་འབུལ་བ་ནི༔ ཧཱུྃ༔ སྔོན་ཚེ་དཔལ་གྱི་སྤྱན་སྔ་རུ༔ ཁས་བླངས་དམ་བཅས་ལྷག་སྐྱོང་རྣམས༔ འདིར་གཤེགས་ལྷག་མའི་ལོངས་སྤྱོད་བཞེས༔ ཕྲིན་ལས་རབ་འབྱམས་ཡོངས་གྲུབ་མཛོད༔ ཨུཙྪི་ཥྚ་བ་ལིཾ་ཏ་ཁཱ་ཧི༔ དེ་ནས་བསྐུལ་བ་ནི༔ ཧཱུྃ༔ རིག་འཛིན་བླ་མའི་ལྷ་ཚོགས་རྣམས༔ ཆོས་ཀྱི་དབྱིངས་ནས་སྐུར་བཞེངས་ལ༔ བདག་རྟོག་འཁོར་བའི་བག་ཆགས་བསྒྲལ༔ མཉམ་ཉིད་ཡེ་ཤེས་དངོས་གྲུབ་སྩོལ༔ དེ་ནས་ཆད་མདོ་ལ༔ ཧཱུྃ༔ སྔོན་ཚེ་དཔལ་ཆེན་ཧེ་རུ་ཀ༔ བར་དུ་ཨོ་རྒྱན་ཐོད་ཕྲེང་རྩལ༔ ཐ་མ་རིག་འཛིན་བླ་མ་ཡི༔ སྤྱན་སྔར་ཁས་བླངས་དམ་བཅས་པའི༔ བཀའ་སྲུང་གཉན་པོ་ཐམས་ཅད་ཀུན༔ འདིར་གཤེགས་དམར་གྱི་གཏོར་མ་ལོངས༔ ཆད་བཞིན་ཕྲིན་ལས་ཡོངས་གྲུབ་མཛོད༔ བཛྲ་ས་མ་ཡ༔ དེ་ནས་བརྟན་སྐྱོང་ལ༔ ཧཱུྃ༔ བོད་ཁམས་སྐྱོང་བའི་མ་སྲིང་སྡེ༔ བརྟན་མ་ཆེན་མོ་བཅུ་གཉིས་རྣམས༔ འདིར་གཤེགས་བཤལ་ཆུའི་གཏོར་མ་ལོངས༔ ཕྱིར་རོལ་བདུད་སྡེའི་དཔུང་ཆོམས་ལ༔ བོད་ཁམས་བདེ་བའི་ཕྲིན་ལས་མཛོད༔ མ་མ་བ་ལིཾ་ཏ་ཁཱ་ཧི༔ དེ་ནས་རྟ་བྲོ་ནི༔ ཧཱུྃ༔ བདེ་ཆེན་འབར་བའི་གཞལ་ཡས་ནས༔ ཡེ་ཤེས་རོལ་པའི་རྟ་བྲོ་བརྡུང་༔ བདག་ལྟ་རཱུ་ཏྲ་འཁོར་བའི་འདྲེ༔ བདག་མེད་ཆེན་པོའི་དབྱིངས་སུ་མནན༔ དེ་ནས་དངོས་གྲུབ་བླངས་ཤིང་བཤགས་པ་ནི༔ ཧཱུྃ༔ རྡོ་རྗེའི་བླ་མ་རིན་པོ་ཆེ༔ གསང་བ་གསུམ་གྱི་དབང་དངོས་གྲུབ༔ མ་ལུས་བདག་ལ་སྩལ་དུ་གསོལ༔ དམ་ཚིག་ཉམས་ཆག་མཐོལ་ལོ་བཤགས༔ ཀཱ་ཡ་ཝཱཀ་ཙིཏྟ་སརྦ་སིདྡྷི་ཧཱུྃ༔ ཨོཾ་བཛྲ་སཏྭ་ས་མ་ཡ༔ སོགས་ཡི་གེ་བརྒྱ་པ་བརྗོད༔ དེ་ནས་བསྡུ་རིམ་ནི༔ ཧཱུྃ༔ ཁམས་གསུམ་སྐུ་གསུང་ཐུགས་སུ་བསྡུ༔ སྐུ་གསུམ་དབྱེར་མེད་བདེ་ཆེན་ངང་༔ ཨ་ཨཱཿདེ་ནས་རྗེས་ཐོབ་ནི༔ ཧཱུྃ༔ ཡེ་ནས་མ་བཙལ་རྫོགས་ལྡན་གྱི༔ ཡེ་རིག་ཆོས་སྐུའི་བླ་མར་ཤར༔ ཧཱུྃ་ཧཱུྃ་ཧཱུྃ༔ དེ་ནས་བསྔོ་སྨོན་ལ༔ ཧཱུྃ༔ བདག་གིས་རྣམ་དཀར་དགེ་བསགས་ཀུན༔ འགྲོ་བ་སེམས་ཅན་ཡོངས་ལ་བསྔོ༔ ཀུན་ཀྱང་རང་རིག་མངོན་གྱུར་ནས༔ རྣམ་མཁྱེན་སངས་རྒྱས་ས་ཐོབ་ཤོག༔ དེ་ནས་བཀྲ་ཤིས་བྱ་བ་ལ༔ ཧཱུྃ༔ དག་མཉམ་གཞི་ཡི་བཀྲ་ཤིས་ཤོག༔ མ་བསྒོམ་ལམ་གྱི་བཀྲ་ཤིས་ཤོག༔ ཡེ་གྲོལ་འབྲས་བུའི་བཀྲ་ཤིས་ཤོག༔ རང་ཐོག་རང་གྲོལ་བཀྲ་ཤིས་ཤོག༔ དེ་ལྟར་རིག་འཛིན་བླ་མ་ཡི༔ སྒྲུབ་པ་ལྷུར་ལེན་སྐལ་བཟང་ཀུན༔ རྣམ་མཁྱེན་ལམ་གྱི་དམ་པ་འཐོབ༔ ཐེ་ཚོམ་མེད་དོ་ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ཡང་ཕྲིན་ལས་འགྲོ་འདུལ་རྡོ་རྗེས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྲུར་བའི་ཡི་གེ་པ་ནི་ཕུན་ཚོགས་བཀྲ་ཤིས་སོ།།དགེའོ།།།།