TTDL-ZABTER-03-GA-063

{{Text |classification=Tibetan Publications |subclass=Tibetan Texts |collectiontitle=bdud 'joms gling pa zab gter |collectiontitletib=བདུད་འཇོམས་གླིང་པ་ཟབ་གཏེར། |totalvolumes=21 |author=bdud 'joms gling pa |authortib=བདུད་འཇོམས་གླིང་པ་ |citation=Khrag 'thung [[Bdud 'joms gling pa]. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004. |language=Tibetan |pagestatus=Temporary stub only |volumenumber=03 |volumeLetter=GA |textnuminvol=063 |pdflink=File:TTDL-ZABTER-03-GA-063.pdf |InitCategories=Dudjom Tersar Project; TTDL-ZABTER-Volume-03-GA }}

[edit]

ཟབ་གསང་མཁའ་འགྲོའི་སྙིང་ཐིག་ལས༔ གསང་བདག་རྡོ་རྗེ་གཏུམ་པོའི་སྐོར་ལས༔ བསྐུལ་ཟློག་མངོན་སྤྱོད་ལྷུན་གྲུབ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ ༠༠༠༠བརྡ་ཡིག༥༩༣བསྐུལ་ཟློག་མངོན་སྤྱོད་ལྷུན་གྲུབ་འདི༔ ལག་ཏུ་ལེན་པའི་རིམ་པ་ནི༔ དམར་གཏོར་ཁྲག་གིས་རབ་བྲན་ནས༔ འགུགས་གཞུག་བསྒྲལ་དམིགས་བྱས་པའི་མཐར༔ བསྐུལ་ཟློག་འདི་ཉིད་བརྗོད་པའོ༔ ཧཱུྃ་ཧཱུྃ་ཛཿརི་རྒྱལ་ལྷུན་པོའི་བྱང་ཕྱོགས་ལྕང་ལོ་ཅན༔ དེ་ཡི་སྟེང་ཕྱོགས་དཔག་ཚད་འདས་པ་ན༔ ཡེ་ཤེས་མེ་འབར་དྲག་པོའི་གཞལ་ཡས་ནས༔ གསང་བདག་རྡོ་རྗེ་གཏུམ་པོ་སྐུ་བཞེངས་ཤིག༔ རང་སྣང་བདེ་ཆེན་དོན་གྱི་འོག་མིན་ནས༔ དཔལ་ཆེན་ཕྱག་ན་རྡོ་རྗེ་སྐུ་བཞེངས་ཤིག༔ གཞི་དབྱིངས་ཀ་དག་ཁྱབ་བརྡལ་གཞལ་ཡས་ནས༔ ལྷུན་གྲུབ་ལོངས་སྐུའི་རོལ་པ་སྐུ་བཞེངས་ཤིག༔ གང་འདུལ་སྤྲུལ་བསྒྱུར་མངོན་སྤྱོད་ཕྲིན་ལས་ཀྱིས༔ ལོག་འདྲེན་གདུག་པ་འདུལ་བའི་དུས་ལ་བབ༔ ཡེ་ཤེས་དབྱིངས་ལ་གཤེགས་བཞུགས་མི་མངའ་ཡང་༔ འགྲོ་བློའི་མོས་ངོར་སྤྲུལ་པའི་སྐུར་བཞེངས་ལ༔ སྐད་ཅིག་གནས་འདིར་སྤྱན་འདྲེན་གཤེགས་སུ་གསོལ༔ ཤ་ཁྲག་དམར་གྱི་གཏོར་མ་འདི་བཞེས་ལ༔ སྒོ་བཞིའི་མཐའ་དམག་བདུད་སྡེ་རྡུལ་དུ་རློག༔ ཕྱི་རྐྱེན་འབྱུང་བ་ལྔ་ཡི་གཡོ་འཁྲུགས་ཟློག༔ ནང་རྐྱེན་སྡེ་བརྒྱད་ལྷ་འདྲེ་རྒོལ་ངན་ཟློག༔ གསང་རྐྱེན་ཉོན་མོངས་དུག་ལྔའི་གཡོ་འཁྲུགས་ཟློག༔ བྱད་མ་རྦོད་གཏོང་སྔོན་ལས་འཕྲལ་རྐྱེན་སོགས༔ མི་མཐུན་གནོད་པའི་རྐྱེན་ངན་ཐམས་ཅད་ཀུན༔ བཟློག་ཅིག་བསྒྱུར་ཅིག་རྗེས་ཤུལ་མེད་པར་མཛོད༔ དྲག་པོ་མངོན་སྤྱོད་ལས་ཀྱིས་ཤུགས་ཕྱུངས་ལ༔ དགྲ་བགེགས་ཐལ་བའི་རྡུལ་བཞིན་བརླག་པར་མཛོད༔ བསྐུལ་ལོ་བསྐུལ་ལོ་ཐུགས་དམ་བསྐུལ༔ བཞེངས་ཤིག་བཞེངས་ཤིག་དབྱིངས་ནས་བཞེངས༔ ཤ་ཁྲག་གཏོར་མ་འདི་བཞེས་ལ༔ ཕྲིན་ལས་རབ་འབྱམས་ལྷུན་གྲུབ་མཛོད༔ ཨོཾ་ར་བཛྲ་ས་མ་ཡ༔ དམིགས་པའི་གནད་དང་ལྡན་པ་ཡིས༔ བསྐུལ་ན་ཕྲིན་ལས་ཡོངས་འགྲུབ་འགྱུར༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ།།དགེའོ།།དགེའོ།།དགེའོ།།ལེགས་སོ།།སརྦ་མངྒ་ལཾ།།།།