TTDL-ZABTER-03-GA-053

ཟབ་གསང་མཁའ་འགྲོའི་སྙིང་ཐིག་ལས༔ གསང་བདག་སྒྲུབ་པའི་ཆ་ལགས་ལས༔ བྱིན་འབེབས་དངོས་གྲུབ་ཆར་འབེབས་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ ༠༠༠༠བརྡ་ཡིག༥༡༥གསང་བདག་སྒྲུབ་པའི་རྣལ་འབྱོར་གྱིས༔ དཀྱིལ་འཁོར་བྱིན་གྱིས་བརླབ་པའི་ཕྱིར༔ བྱིན་འབེབས་དངོས་གྲུབ་ཆར་འབེབས་འདི༔ མོས་གུས་དམིགས་གནད་ལྡན་པས་བརྗོད༔ སྤོས་བསྲེག་རོལ་མོ་སྣ་ཚོགས་བསྒྲག༔ སྙན་པའི་ངག་གིས་འདི་སྐད་དོ༔ ཧཱུྃ་ཧཱུྃ༔ བདེ་ཆེན་འོག་མིན་ཆོས་དབྱིངས་ཕོ་བྲང་ནས༔ དུས་གསུམ་སངས་རྒྱས་ཡོངས་ཀྱི་སྤྱི་མེས་མཆོག༔ ཆོས་སྐུ་གདོད་མའི་མགོན་པོ་ཡབ་ཡུམ་གྱིས༔ སྒྲུབ་པའི་དཀྱིལ་འཁོར་འདི་ལ་བྱིན་ཆེན་ཕོབ༔ རང་བཞིན་རྣམ་པར་དག་པའི་ཞིང་ཁམས་ནས༔ ལོངས་སྤྱོད་རྫོགས་སྐུའི་ཁྱབ་བདག་རྡོ་རྗེ་སེམས༔ ཡབ་ཡུམ་སྤྲུལ་འཁོར་མ་ལུས་གཤེགས་སུ་གསོལ༔ སྒྲུབ་པའི་དཀྱིལ་འཁོར་འདི་ལ་བྱིན་ཆེན་ཕོབ༔ ཐུགས་རྗེ་འགྲོ་འདུལ་སྤྲུལ་པའི་ཞིང་ཁམས་ནས༔ སྤྲུལ་པའི་སྐུ་མཆོག་དགའ་རབ་རྡོ་རྗེ་ཡི༔ སྤྲུལ་འཁོར་ཡོངས་རྫོགས་རིག་འཛིན་རྒྱ་མཚོའི་ཚོགས༔ སྐད་ཅིག་ཉིད་དུ་གནས་འདིར་གཤེགས་སུ་གསོལ༔ སྒྲུབ་པའི་དཀྱིལ་འཁོར་འདི་ལ་བྱིན་ཆེན་ཕོབ༔ བདེ་ཆེན་པདྨ་འོད་ཀྱི་གཞལ་ཡས་ནས༔ ཨོ་རྒྱན་ཆེ་མཆོག་པདྨ་ཐོད་ཕྲེང་རྩལ༔ རིག་འཛིན་དཔའ་བོ་མཁའ་འགྲོའི་ཚོགས་དང་བཅས༔ གནས་འདིར་སྐད་ཅིག་ཉིད་དུ་གཤེགས་སུ་གསོལ༔ སྒྲུབ་པའི་དཀྱིལ་འཁོར་འདི་ལ༴རང་སྣང་འོད་གསལ་བདེ་ཆེན་གཞན་ཡས་ནས༔ རྗེ་འབངས་ཉེར་ལྔ་རྒྱ་བོད་རིག་འཛིན་ཚོགས༔ གནས་འདིར་སྐད་ཅིག་ཉིད་དུ་གཤེགས་སུ་གསོལ༔ སྒྲུབ་པའི་དཀྱིལ་འཁོར་འདི་ལ༴༈གཞི་སྣང་ལྷུན་རྫོགས་རིག་པའི་དཀྱིལ་འཁོར་ནས༔ ཟབ་གཏེར་མངའ་བདག་བདུད་འཇོམས་རྡོ་རྗེའི་མཚན༔ སྐད་ཅིག་ཉིད་དུ་གནས་འདིར་གཤེགས་སུ་གསོལ༔ སྒྲུབ་པའི་དཀྱིལ་འཁོར་འདི་ལ་བྱིན་ཆེན་ཕོབ༔ ཞེས་པ་ངག་གི་མིང་ཅན་གྱིས་སོ།།གཙུག་ཏོར་འཁོར་ལོ་དོན་གྱི་འོག་མིན་ནས༔ བཀའ་དྲིན་མཉམ་མེད་དྲིན་ཆེན་བླ་མ་དང་༔ བརྒྱུད་གསུམ་བླ་མ་མཁའ་འགྲོ་ཆོས་སྐྱོང་བཅས༔ གནས་འདིར་བྱོན་ལ་དབང་དང་བྱིན་ཕོབ་ཅིག༔ རང་བྱུང་ལྷུན་གྱིས་གྲུབ་པའི་དཀྱིལ་འཁོར་ནས༔ ཡི་དམ་རྒྱུད་སྡེའི་དཀྱིལ་འཁོར་མ་ལུས་པ༔ སྐད་ཅིག་གནས་འདིར་སྤྱན་འདྲེན་གཤེགས་སུ་གསོལ༔ སྒྲུབ་པའི་དཀྱིལ་འཁོར་འདི་ལ་བྱིན་ཕོབ་ཅིག༔ འཁོར་འདས་བརྡལ་ཁྱབ་ཀློང་ཆེན་མཁའ་དབྱིངས་ནས༔ ཡེ་ཤེས་དབྱིངས་ཀྱི་མཁའ་འགྲོ་རྒྱ་མཚོའི་ཚོགས༔ སྐད་ཅིག་ཉིད་ལ་གནས་འདིར་གཤེགས་སུ་གསོལ༔ སྒྲུབ་པའི་དཀྱིལ་འཁོར་འདི་ལ་བྱིན་ཆེན་ཕོབ༔ བཀའ་དང་དམ་ཚིག་གཉན་པོའི་དཀྱིལ་འཁོར་ནས༔ བཀའ་སྲུང་དམ་ཅན་རྒྱ་མཚོ་འཁོར་དང་བཅས༔ སྐད་ཅིག་ཉིད་དུ་གནས་འདིར་གཤེགས་སུ་གསོལ༔ སྒྲུབ་པའི་དཀྱིལ་འཁོར་འདི་ལ་བྱིན་ཆེན་ཕོབ༔ དམ་ཚིག་དབང་གི་ཐུགས་དམ་རྒྱུད་བསྐུལ་ལོ༔ དབྱིངས་ནས་སྐུར་བཞེངས་བརྒྱུད་འཛིན་རྗེས་སུ་ཟུངས༔ སྒྲུབ་པའི་དཀྱིལ་འཁོར་འདི་ལ་བྱིན་ཆེན་ཕོབ༔ དབང་ཆེན་རྣམས་ཀྱིས་དབང་མཆོག་བསྐུར་དུ་གསོལ༔ བྱིན་ཆེན་རྣམས་ཀྱིས་བྱིན་ཆེན་དབབ་ཏུ་གསོལ༔ དངོས་གྲུབ་ཅན་གྱིས་དངོས་གྲུབ་ཆར་ལྟར་ཕོབ༔ སྒྲུབ་པའི་ཚོམ་བུ་རྣམ་མཁྱེན་ས་ལ་སྦྱོར༔ ཀ་དག་མི་འགྱུར་རྡོ་རྗེའི་ཀློང་རྒྱས་ཐོབ༔ ཨོཾ་ཨཱཿཧཱུྃ་གུ་རུ་དྷེ་ཝ་ཌཱ་ཀི་ནཱི་བཛྲ་ས་མ་ཡ་ཛཿཛཿཨེ་ཨ་རལླི་ཕེཾ་ཕེཾ༔ སརྦ་སིདྡྷི་ཕ་ལ་ཨ་ཝེ་ཤ་ཡ་ཨ་ཨ༔ དེ་ལྟར་བྱིན་དབང་དབབ་པ་ཡི༔ དམིགས་གནད་དང་ལྡན་རྣལ་འབྱོར་ལ༔ དཀྱིལ་འཁོར་ཡོངས་ཀྱི་སྤྱི་དབང་ཐོབ༔ ཡང་དག་ལམ་མཆོག་མཐར་ཕྱིན་འགྱུར༔ བཀའ་སྲུང་གནོད་སྦྱིན་ཆེན་པོས་སྲུངས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཨྠིྀ༔ ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ།།དགེའོ།།དགེའོ།།དགེའོ།།སརྦ་མངྒ་ལཾ།།།།