TTDL-ZABTER-05-CA-015

༠༠༠༠བརྡ་ཡིག༡༩༡ཟབ་གསང་མཁའ་འགྲོའི་སྙིང་ཐིག་ལས༔ ཐུགས་སྒྲུབ་གསང་བའི་རྒྱ་ཅན༔ དཔལ་ཆེན་ཕྲིན་ལས་སྒྲུབ་པའི་སྐོར་ལས༔ གདབ་ལས་གནམ་ལྕགས་ཐོག་མདའ་བཞུགས་སོ༔ ན་མོ་གུ་རུ་སརྦ་ཧ་རི་ནི་ས་བྷྱ༔ ༠༠༠༠༠༠བརྡ་ཡིག༡༩༡བདག་འདྲ་བདུད་འདུལ་རྡོ་རྗེ་གྲོ་ལོད་ངས༔ མ་འོངས་ལས་ཅན་བུ་ཡི་དོན་ཆེད་དུ༔ བསྒྲལ་ལས་གནམ་ལྕགས་ཐོག་མདའ་ཞེས་བྱ་བསྟན༔ འདི་ཉིད་ལག་ཏུ་ལེན་པའི་རིམ་པ་ནི༔ ཟོར་ཀོང་ཁྲག་གིས་བྱུག་པ་དགུ་བཅའ་སྟེ༔ གྲི་ཁྲག་བྱུག་པའི་རྩང་མདའ་གསུམ་བསྣོལ་འོད༔ ལྕགས་སམ་དྲག་པོའི་ཤིང་ཕུར་དཔལ་གནམ་བསྟན༔ ཡུངས་ཀར་ཁྲག་མཚོ་དུག་མཚོན་མདའ་རྡོ་དང་༔ དམར་གྱི་གཏོར་མ་དགུ་ནི་བཙུགས་བྱས་ཏེ༔ དྲག་པོའི་སྔགས་དང་དམིགས་པའི་ངར་བླུད་ནས༔ དགྲ་བགེགས་གཟུགས་ཕུང་རཱུ་པའི་སྟེང་དུ་གདབ༔ ཕཊ༔ སྐུ་གསུམ་ལྷུན་གྲུབ་མཚོན་ཆར་གྱིས༔ རཱུ་དྲའི་དུག་གསུམ་འཁྲུལ་བ་བཤིག༔ དུག་གསུམ་སྒྲོལ་བའི་མཚོན་ཆར་བསྔགས༔ གསང་གསུམ་རྡོ་རྗེ་མཚོན་ཆར་གྱིས༔ རཱུ་ཏྲའི་སྒོ་གསུམ་ཐལ་བར་བརླག༔ ཁམས་གསུམ་ཡོངས་སྒྲོལ་མཚོན་ཆར་བསྔགས༔ ཡེ་ཤེས་ལྔ་ཡི་མཚོན་ཆར་གྱིས༔ རཱུ་དྲའི་དུག་ལྔ་ཕུང་ལྔ་བསད༔ དུག་ལྔ་སྒྲོལ་བའི་མཚོན་ཆར་བསྔགས༔ ཆོས་ཕུང་བརྒྱད་ཁྲིའི་མཚོན་ཆར་གྱིས༔ རཱུ་ཏྲའི་ཉོན་མོངས་བརྒྱད་ཁྲི་བསྒྲལ༔ གཉིས་འཛིན་སྒྲོལ་བའི་མཚོན་ཆར་བསྔགས༔ རྡོ་རྗེ་གཞོན་ནུས་དབང་ཡང་བསྐུར༔ ཕྱག་ན་རྡོ་རྗེས་བྱིན་གྱིས་བརླབས༔ བདག་མེད་རྟོགས་པས་ངར་ཡང་བླུད༔ ཆོས་ཉིད་བདེན་པས་རྣོ་ཕྱུང་ནས༔ དྲག་པོ་སྔགས་ཀྱི་རྫས་སུ་བསྐུལ༔ འཁོར་བ་ཡོངས་སྒྲོལ་མངའ་གསོལ་ལོ༔ མི་ཤིགས་རྡོ་རྗེ་འབར་བའོ༔ སྤུ་གྲིའི་སྔགས་ཤམ་གྱིས་བཏགས་ཏེ༔ ཁམས་གསུམ་ཡོངས་སུ་སྒྲོལ་བའི་ནུས་པ་དང་ལྡན་པར་བསམ༔ དེ་ནས་འགུགས་གཞུག་བྱ་བ་ནི༔ ཧཱུྃ་བྷྱོ༔ བདེ་གཤེགས་རྒྱལ་བ་མ་ལུས་འདུས་པའི་དཔལ༔ དཔལ་ཆེན་ཁྲོ་རྒྱལ་རྡོ་རྗེ་གཞོན་ནུ་ཡི༔ སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི༔ བདེན་པ་ཆེན་པོས་དགྲ་འདྲེ་གདོན་གསུམ་རྣམས༔ སྟོང་གསུམ་རི་རབ་གླིང་བཞི་གར་གནས་ཀྱང་༔ གཟུགས་ཕུང་རཱུ་པ་འདི་ལ་མྱུར་དུ་ཁུག༔ ཛཿཧཱུྃ་བཾ་ཧོཿཨ་ཝེ་ཤ་ཡ་ཨཱཿདེ་ནས་ཕུར་པ་ཐོགས་ལ༔ ཧཱུྃ་བྷྱོ༔ དཔལ་ཆེན་རྡོ་རྗེ་གཞོན་ནུ་སྲས་འཁོར་བཅས༔ མ་གཡེལ་མ་གཡེལ་ཆོས་ཀྱི་དབྱིངས་ལས་བཞེངས༔ མངོན་སྤྱོད་དྲག་པོའི་ཕྲིན་ལས་དུས་ལ་བབ༔ ༈དགྲ་བགེགས་ཉོན་མོངས་འདུས་པའི་ཕུང་པོ་ལ༔ ཐོགས་མེད་གནམ་ལྕགས་རྡོ་རྗེའི་ཐུན་ཆར་ཕོབ༔ ཕུར་ཐུན་དྲག་པོ་ཐོག་ལྟར་ཤ་ར་ར༔ དགྲ་གདོན་བགེགས་ཀྱི་སྒོ་གསུམ་རྡུལ་དུ་རློག༔ རྣམ་པར་ཤེས་པ་ཆོས་ཀྱི་དབྱིངས་སུ་སྤོར༔ སྤུ་གྲིའི་སྔགས་ཤམ་དུ༔ དགྲ་གདོན་བགེགས་ཚོགས་རྣམས་ཀྱི་ལུས་ངག་ཡིད་གསུམ་ལ་ཕོབ་ཛཿརྦད༔ དེ་ནས་ཡུངས་ཐུན་ཐོགས་ལ༔ དགྲ་བགེགས་ཉོན་མོངས་འདུས་པའི་ཕུང་པོ་ལ༔ ཐོགས་མེད་གནམ་ལྕགས་རྡོ་རྗེའི་ཐུན་ཆར་ཕོབ༔ ཡུངས་ཐུན་དྲག་པོར་སེར་ལྟར་ཧྲི་ལི་ལི༔ དགྲ་གདོན་བགེགས་ཀྱི་སྒོ་གསུམ་རྡུལ་དུ་རློག༔ རྣམ་པར་ཤེས་པ་ཆོས་ཀྱི་དབྱིངས་སུ་སྤོར༔ སྤུ་གྲིའི་སྔགས་ཤམ་དུ༔ དགྲ་གདོན་བགེགས་ཚོགས་རྣམས་ཀྱི་ལུས་ངག་ཡིད་གསུམ་ལ་ཕོབ་ཛ་རྦད༔ དེ་ནས་ཁྲག་ཐུན་ཐོགས་ལ༔ དགྲ་བགེགས་ཉོན་མོངས་འདུས་པའི་ཕུང་པོ་ལ༔ ཐོགས་མེད་གནམ་ལྕགས་རྡོ་རྗེའི་ཐུན་ཆར་ཕོབ༔ ཁྲག་ཐུན་དམར་པོ་མཚོ་ལྟར་ཆི་ལི་ལི༔ དགྲ་གདོན་བགེགས་ཀྱི་སྒོ༴རྣམ་པར་ཤེས་པ༴སྤུ་གྲིའི་སྔགས་ཤམ་དུ༔ དགྲ་གདོན་བགེགས་ཚོགས་རྣམས་ཀྱི་ལུས་ངག༴མཚེ་ཐུན་ཐོགས་ལ༔ དགྲ་བགེགས་ཉོན་མོངས་འདུས་པའི་ཕུང་པོ་ལ༔ ཐོགས་མེད་གནམ་ལྕགས་རྡོ་རྗེའི་ཐུན་ཆར་ཕོབ༔ མཚེ་ཐུན་དྲག་པོ་མདའ་ལྟར་ད་ལ་ལ༔ དགྲ་གདོན་བགེགས་ཀྱི་སྒོ་གསུམ་རྡུལ་དུ་རློག༔ རྣམ་པར་ཤེས་པ་ཆོས་ཀྱི་དབྱིངས་སུ་སྤོར༔ སྤུ་གྲིའི་སྔགས་ཤམ་དུ༔ དགྲ་གདོན་བགེགས་ཚོགས་རྣམས་ཀྱི་ལུས་ངག་ཡིད་གསུམ་ལ་ཕོབ་ཛཿརྦད༔ དུག་ཐུན་ཐོགས་ལ༔ དགྲ་བགེགས་ཉོན་མོངས་འདུས་པའི་ཕུང་པོ་ལ༔ ཐོགས་མེད་གནམ་ལྕགས་རྡོ་རྗེའི་ཐུན་ཆར་ཕོབ༔ དུག་ཐུན་དྲག་པོ་ཆུ་ལྟར་ཆུ་རུ་རུ༔ དགྲ་གདོན་བགེགས་ཀྱི་སྒོ་གསུམ་རྡུལ་དུ་རློག༔ རྣམ་པར་ཤེས་པ་ཆོས་ཀྱི་དབྱིངས་སུ་སྤོར༔ སྤུ་གྲིའི་ཤམ་དུ༔ དགྲ་གདོན་བགེགས་ཚོགས༴མཚོན་ཐུན་ཐོགས་ལ༔ དགྲ་བགེགས་ཉོན་མོངས་འདུས་པའི་ཕུང་པོ་ལ༔ ཐོགས་མེད་གནམ་ལྕགས་རྡོ་རྗེའི་ཐུན་ཆར་ཕོབ༔ མཚོན་ཆ་སྣ་ཚོགས་རླུང་ལྟར་འཚུབས་སེ་འཚུབ༔ དགྲ་གདོན་བགེགས་ཀྱི་སྒོ་གསུམ་རྡུལ་དུ་རློག༔ རྣམ་པར་ཤེས་པ་ཆོས་ཀྱི་དབྱིངས་སུ་སྤོར༔ སྤུ་གྲིའི་ཤམ་དུ༔ དགྲ་གདོན་བགེགས་ཚོགས་རྣམས་ཀྱི་ལུས་ངག་ཡིད་གསུམ་ལ་ཕོབ་ཛཿརྦད༔ མདའ་ཐུན་ཐོགས་ལ༔ དགྲ་བགེགས་ཉོན་མོངས་འདུས་པའི་ཕུང་པོ་ལ༔ ཐོགས་མེད་གནམ་ལྕགས་རྡོ་རྗེའི་ཐུན་ཆར་ཕོབ༔ མདའ་ཐུན་དྲག་པོ་ཚྭ་ཚྭ་སྐར་ལྟར་འཁྲིགས༔ དགྲ་གདོན་བགེགས་ཀྱི་སྒོ་གསུམ་རྡུལ་དུ་རློག༔ རྣམ་པར་ཤེས་པ་ཆོས་ཀྱི་དབྱིངས་སུ་སྤོར༔ སྤུ་གྲིའི་ཤམ་དུ༔ དགྲ་གདོན་བགེགས་ཚོགས༴རྡོ་ཐུན་ཐོགས་ལ༔ དགྲ་བགེགས་ཉོན་མོངས་འདུས་པའི་ཕུང་པོ་ལ༔ ཐོགས་མེད་གནམ་ལྕགས་རྡོ་རྗེའི་ཐུན་ཆར་ཕོབ༔ རྡོ་ཐུན་དྲག་པོ་ཆར་ལྟར་འབེབས་ཤིང་འཚུབས༔ དགྲ་གདོན་བགེགས་ཀྱི་སྒོ་གསུམ་རྡུལ་དུ་རློག༔ རྣམ་པར་ཤེས་པ་ཆོས་ཀྱི་དབྱིངས་སུ་སྤོར༔ སྤུ་གྲིའི་ཤམ་དུ༔ དགྲ་གདོན་བགེགས་ཚོགས་རྣམས་ཀྱི་ལུས༴གཏོར་ཐུན་ཐོགས་ལ༔ དགྲ་བགེགས་ཉོན་མོངས་འདུས་པའི་ཕུང་པོ་ལ༔ ཐོགས་མེད་གནམ་ལྕགས་རྡོ་རྗེའི་ཐུན་ཆར་ཕོབ༔ དཔལ་གྱི་གཏོར་ཐུན་གློག་ལྟར་འཁྱུག་ཅིང་འདེབས༔ དགྲ་གདོན་བགེགས་ཀྱི་སྒོ་གསུམ་རྡུལ་དུ་རློག༔ རྣམ་པར་ཤེས་པ་ཆོས་ཀྱི་དབྱིངས་སུ་སྤོར༔ སྤུ་གྲིའི་ཤམ་དུ༔ དགྲ་གདོན་བགེགས་ཚོགས་རྣམས་ཀྱི་ལུས་ངག་ཡིད་གསུམ་ལ་ཕོབ་ཛཿརྦད༔ ས་མ་ཡ༔ རྒྱ་རྒྱ་རྒྱ༔ དེ་ལྟར་ཡུལ་ལ་མཚོན་ཐུན་འདེབས་པའི་ཚེ༔ རྣལ་འབྱོར་རང་བསྲུང་རྡོ་རྗེའི་གོ་ཆ་གནད༔ རང་ཉིད་ཡི་དམ་དྲག་པོའི་སྐུར་གསལ་བའི་སྐུ་སྟོད་ཀྱི་ཆ་ལ་བཀའ་རྒྱུད་བླ་མ༔ སྐེད་པ་བར་གྱི་ཆ་ལ་ཡི་དམ་རྒྱལ་བའི་དཀྱིལ་འཁོར༔ སྐུ་སྨད་ཀྱི་ཆ་ལ་མ་སྲིང་མཁའ་འགྲོ་རྒྱ་མཚོ༔ མཐའ་བསྐོར་དུ་བསྟན་སྲུང་དམ་ཅན་རྒྱ་མཚོའི་ཚོགས་མ་ལུས་ལུས་པ་མེད་པར་སྤྲིན་དཔུང་འཐིབ་པ་ལྟར་བསྒོམ༔ སྤྱི་བོ་མན་ཆད་རྐང་མཐིལ་ཡན་ཆད་ལ་གཟུང་འཛིན་འཕྱང་པས་མ་འབྲེལ་བར་སྐུ་འོད་དུ་སྣང་བའི་ཆར་སྐུ་རྡུལ་ཕྲན་གྱི་ཆ་ཙམ་གྱིས་མ་འདྲེས་བར་མེད་དུ་གང་བ༔ ཡེ་ཤེས་མེ་འོད་མཚོན་ཐུན་སྣ་ཚོགས་ཀྱི་ཆར་བབས་པས་དགྲ་བགེགས་ཀྱི་སྙིང་ལ་ཐོག་ལྟར་བབ་ཅིང་རྡུལ་དུ་བརླག་པར་བསམ༔ ཐུན་འདེབས་པའི་དུས་སུ་ཐུན་ཆར་བབ་པས་ཁོ་ཡི་སྒོ་གསུམ་རྡོ་རྗེ་གསུམ་གྱི་ཀློང་དུ་བསད༔ དུག་གསུམ་སྐུ་གསུམ་གྱི་ངང་དུ་བསྒྲལ༔ དུག་ལྔ་ཡེ་ཤེས་ལྔའི་ངང་དུ་བསད༔ ཉོན་མོངས་བརྒྱད་ཁྲི་བཞི་སྟོང་ཆོས་ཕུང་བརྒྱད་ཁྲི་བཞི་སྟོང་གི་ངང་དུ་བསད་པས་ཀློང་ཆེན་ཀུན་ཏུ་བཟང་མོའི་མཁའ་ཀློང་དུ་སངས་རྒྱས་པར་བསམ༔ དགྲ་བགེགས་ཉོན་མོངས་འཁྲུལ་པས་བསླུས་ཤིང་འཁོར་བའི་འཁོར་ལོར་བཟོད་མེད་སྡུག་བསྔལ་གྱིས་གདུང་བའི་ཕ་མ་དྲིན་པོ་ཆེ་འདི་རྣམས་སྙིང་རེ་རྗེ༔ འཁྲུལ་བའི་རྒྱུ་རྐྱེན་བསྒྲལ་ནས་ཐར་བའི་ལམ་ལ་འདྲེན་པར་བྱའོ་བསམ་ཞིང་བསྒྲལ་བ་ནི་བྱང་ཆུབ་སེམས་ཀྱི་སྟོབས་ཏེ་གནད་དམ་པའོ༔ ས་མ་ཡ༔ རྒྱ་རྒྱ་རྒྱ༔ དེ་ཡིས་ལོག་པར་ལྟ་བ་ཐམས་ཅད་འཇོམས༔ ལེགས་པའི་ཡོན་ཏན་གོང་ནས་གོང་དུ་འཕེལ༔ ཐབས་བཟང་ལམ་གྱིས་རྣམ་སྨིན་བག་ཆགས་འཇོམས༔ བསྟན་སྲུང་རྣམས་ཀྱི་འགྲོ་དོན་དགོངས་པ་བསྒྲུབ༔ པད་མ་བདག་གི་སྙིང་ཐིག་ཟབ་མོ་འདི༔ ཡེ་ཤེས་མཚོ་རྒྱལ་ཁྱོད་ཀྱིས་ཡི་གེར་ཐོབས༔ བཀའ་འདི་དཔལ་ལྡན་རང་བྱུང་རྒྱལ་མོར་བཅོལ༔ ཐུབ་པར་སྲུངས་ཤིག་བཀའ་དང་དམ་ཚིག་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་འོད་གསལ་རྫོགས་པ་ཆེན་པོ་ཀ་དག་ཀློང་ཆེན་ནམ་མཁའི་རྣལ་འབྱོར་པ་རིག་འཛིན་བདུད་འཇོམས་གླིང་པས་ཟབ་གསང་མཁའ་འགྲོའི་བརྡ་རིས་ལས་ཞལ་བཤུས་ཏེ་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་ཀྱིས་བགྱིས་སོ།།མངྒ་ལཾ།།།།