TTDL-ZABTER-03-GA-065

༠༠༠༠བརྡ་ཡིགཟབ་གསང་མཁའ་འགྲོའི་སྙིང་ཐིག་ལས༔ གསང་བདག་ཕྱག་ན་རྡོ་རྗེའི་གསང་སྒྲུབ་རྡོ་རྗེའི་ཐེག་པ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ ༠༠༠༠བརྡ་ཡིག༦༠༢འོག་མིན་ཆོས་ཀྱི་དབྱིངས་ཀློང་ཆེན་བརྡལ་ཁྱབ་ཀྱི་ཞིང་དུ༔ ཆོས་སྐུའི་སྟོན་པ་ཀུན་ཏུ་བཟང་པོ་རིགས་དང་དཀྱིལ་འཁོར་ཡོངས་ཀྱི་ཁྱབ་བདག༔ འཁོར་འདས་ཡོངས་ཀྱི་སྤྱི་དཔལ་ཆེན་པོ་མི་འཇིགས་པ་སེང་གེའི་ཁྲི་ལ་བཞུགས་ཏེ༔ ཉིད་ལས་མི་གཞན་པའི་འཁོར་རིགས་ལྔའི་སངས་རྒྱས་སྲས་དང་བཅས་པ་ཐམས་ཅད་དང་༔ སྐུ་གསུམ་རྒྱལ་བའི་དཀྱིལ་འཁོར་ཡོངས་སུ་རྫོགས་པ་ཕུན་སུམ་ཚོགས་པའི་འཁོར་དུ་འདུས་པ་ལས༔ དཔལ་གསང་བའི་བདག་པོས་བཅོམ་ལྡན་འདས་ཀྱི་ཞབས་ལ་སྤྱི་བོས་གཏུགས་ཏེ་འདི་སྐད་ཅེས་ཞུས་སོ༔ ཀྱེ་སྟོན་པ་བཅོམ་ལྡན་འདས་ཁྱེད་ཀྱི་གསང་བའི་བདག་པོ་བདག་གིས་བྱེད་ཀྱིས༔ བདག་ཀྱང་ཁྱེད་ཀྱི་གོ་འཕང་དུ་སྙེགས་ཏེ་འགྲོ་བའི་དོན་ཆེན་པོ་སྒྲུབ་ཀྱིས་ཀློང་མཛོད་ཆེན་པོ་བདག་ཅག་རྣམས་ལ་བསྟན་དུ་གསོལ༔ ཅེས་ཞུས་པས༔ བཅོམ་ལྡན་འདས་ཀྱིས་བཀའ་སྩལ་པ༔ ཀྱཻ་ཧོ་གསང་བའི་བདག་པོ་ཁྱོད་ལེགས་པར་ཉོན་ཅིག༔ ང་ནི་དུས་གསུམ་གྱི་རྒྱལ་བ་ཐམས་ཅད་ཀྱི་མེས་པོར་སངས་རྒྱས་པ་ཡིན་ཏེ༔ སངས་རྒྱས་ཐམས་ཅད་ང་ཡི་ངང་དུ་སངས་རྒྱས་པ་ཡིན༔ སེམས་ཅན་ཐམས་ཅད་ཀྱང་ངའི་ཀློང་ལས་མ་འདའ་བར་འཁྲུལ་བ་ཡིན༔ ང་ཡི་ཀློང་མཛོད་ནི་བསམ་གྱིས་མི་ཁྱབ་སྟེ༔ ང་ནི་དོན་དམ་གཞིའི་སངས་རྒྱས་ཡིན་ཏེ་སངས་རྒྱས་ཀྱི་ཁམས་ཀྱི་ཡེ་ཤེས་ཡོན་ཏན་ཐམས་ཅད་ཀྱི་བཟང་པོར་ཆོས་སུ་ནི་མ་བཅོས༔ སེམས་ཅན་གྱི་ཁམས་ཀྱི་ཉོན་མོངས་སྡུག་བསྔལ་ཐམས་ཅད་ཀྱིས་ཀྱང་ངན་པར་མ་བསྒྱུར་བར་བཟང་ངན་མེད་པར་མཉམ་པར་སྙོམས་པ་ཡིན༔ ཞེས་གསུངས་སོ༔ ཡང་གསང་བའི་བདག་པོས་འདི་སྐད་ཅེས༔ བཅོམ་ལྡན་འདས་གཞི་ཡི་ཆོས་ཉིད་ཁྱེད་ཀྱིས་རང་བཞིན་ཇི་ལྟ་བུ་ལགས༔ ཞེས་ཞུས་པས༔ བཀའ་སྩལ་པ༔ ཀྱེ་གསང་བའི་བདག་པོ་ང་ཡི་རང་བཞིན་ནི་འདི་ལྟ་སྟེ༔ ནམ་མཁའ་ལྟ་བུའོ༔ ནམ་མཁའ་ནི་བེམ་སྟོང་ང་ོ༔ ང་ནི་ཡོན་ཏན་རྫོགས་པའོ༔ ང་ལས་སེམས་ཅན་འཁྲུལ་པའི་གཞི་མ་རིག་པའོ༔ མ་རིག་པ་ནི་སེམས་ཉོན་མོངས་སྐྱེ་བའི་གཞི་ཙམ་དུ་དཔེར་ན་ནམ་མཁའ་སྟོང་གསལ་གྱི་ཀློང་དུ་མུན་པ་འཐིབས་ཀྱང་ནམ་མཁའ་ནི་མུན་པ་མ་ཡིན༔ ནམ་མཁའ་ལས་གཞན་པའི་མུན་པ་ཡང་མ་ཡིན་པ་དེ་བཞིན་དུ་མ་རིག་པ་གཞི་ལས་འདས་པའི་མ་རིག་པ་ཡང་མ་ཡིན་ནོ༔ དེས་ན་གཞི་ལ་བདག་མེད༔ བདག་སྐྱེས་ཙམ་ནས་མ་རིག་པ་ཡང་དེ་མ་ཐག་པའོ༔ གཞི་ཀློང་ཆེན་བརྡལ་ཁྱབ་ལ་གཉིས་སུ་མེད༔ གཉིས་སུ་འཛིན་པ་སྐྱེས་མ་ཐག་པའང་མ་རིག་པའོ༔ གཞི་ལ་དུམ་བུར་འཕྲོ་བའི་རྣམ་རྟོག་མེད༔ རྣམ་པར་རྟོག་པ་སྡུད་པའང་མ་རིག་པའོ༔ དཔེར་ན་ནམ་མཁར་གློག་འགྱུ་བའི་ངོ་བོ་ནམ་མཁའ་སྟོང་པ༔ འགྱུ་བྱེད་གློག༔ ཁྱབ་པའི་འོད་དང་གཉིས་སུ་མེད་པ་ལྟར༔ གཞི་ལས་མ་རིག་པ་དེ་མ་ཐག་པས་སོ༔ ཐ་དད་པ་ཡང་མ་ཡིན༔ སེམས་ཅན་འཁྲུལ་པའི་གཞི་མ་རིག་པ་སྟེ༔ འཁྲུལ་པ་བདག་འཛིན་ཡིན༔ བདག་སྐྱེས་པ་ཙམ་ནས་གནས་དང་ཡུལ་གྲོགས་ཕ་གི་བ་ཐམས་ཅད་བདག་དེ་མ་ཐག་པའོ༔ དཔེར་ན་རྨི་ལམ་གྱི་བདག་གཞན་ཡུལ་གསུམ་ཐམས་ཅད་སད་དུས་རང་ངོར་ཡལ་བ་ལས་བདེན་མེད་དང་༔ ཉིན་གྱི་སྣང་བ་བདག་གཞན་ཡུལ་དང་བཅས་པ་གཉིད་དུས་རང་ངོར་ཡལ་བ་དང་༔ འདིར་སྣང་ཐམས་ཅད་འཆི་བའི་དུས་སུ་ཡང་ཡུལ་ནས་ཡུལ་དུ་འཕོ་བསྒྲོད་མ་ཡིན་ཏེ་སྣང་བ་བདག་གཞན་ཡུལ་གསུམ་ཐམས་ཅད་གནས་སུ་འགྱུར་ནས་སླར་ཡང་སྣང་བ་ཡིན༔ དེ་ལྟར་སྣང་བའི་ཆོས་ཐམས་ཅད་ཀྱི་མིང་དང་ངོ་བོ་སྟོང་པ་ཉིད་དོ༔ སྟོང་པ་ཉིད་གཞིའོ༔ གཞིའི་ཀློང་རྣམ་པར་རྟོག་པའི་རང་ཚུགས་གཞན་དུ་བཟུང་ནས་འཁྲུལ་པ་ལས༔ བདག་མེད༔ ཡུལ་མེད༔ གཞན་མེད༔ སངས་རྒྱས་མེད༔ སེམས་ཅན་མེད༔ རྒྱུ་མེད༔ རྐྱེན་མེད༔ འབྲས་བུ་ཡང་མེད་དོ༔ སེམས་ཅན་འཁྲུལ་པའི་སྣང་བ་ཡང་བདེན་པར་མ་གྲུབ༔ གཞན་བྱུང་ལས་བྱས་པའི་སྡུག་བསྔལ་སྐད་ཅིག་ཙམ་ཡང་མ་མྱོང་༔ བདེ་བ་ཡང་མ་མྱོང་༔ བདག་འཛིན་གཅིག་པུ་བརྟན་པ་ལས་བདག་གཞན་རང་ངོར་འཐས་ནས་འཁྲུལ་པ་ཡིན༔ དེ་ལྟར་འཁྲུལ་པའི་དུས་སུ་ཡང་ང་ལས་འཁྲུལ་པ་མེད་དེ་ཀ་དག་གཞི་ཡི་རང་བཞིན་དུ་གནས་པ་ཡིན༔ ང་ནི་སངས་རྒྱས་ཐམས་ཅད་ཀྱི་ངོ་བོ་ཡིན་ཏེ༔ ང་ལས་གཞན་པའི་སངས་རྒྱས་ནི་གཅིག་ཀྱང་མེད༔ ང་ཡི་རང་བཞིན་གང་ལྟ་བུ་ལགས་ཞེ་ན༔ གསང་བའི་བདག་པོ་ང་ནི་འཁོར་འདས་གང་གིས་མ་མཐོང་མི་མཐོང་མཐོང་བར་མི་འགྱུར་བའི་ཕྱིར་ན་ཡོད་པ་དངོས་པོ་མ་ཡིན༔ འཁོར་འདས་ཀྱི་སྤྱི་གཞི་ཆེན་པོ་ཡིན་པས་མེད་པ་ཡང་མ་ཡིན༔ མཐར་ཐུག་ཡལ་བར་མི་འགྱུར་བས་འགགས་པ་མེད་ཅིང་༔ དུས་གསུམ་དུ་མ་སྐྱེས་པས་སྐྱེ་བ་མེད་པ༔ བྱུང་བའི་གནས་ཡུལ་མེད་པས་མ་བྱུང་བ༔ འགྲོ་བའི་ཡུལ་མེད་པས་འགྲོ་བ་མེད་པ༔ འཁོར་འདས་ཐམས་ཅད་ང་ལས་མི་གཞན་པས་ཐ་མི་དད་པ༔ འཁོར་འདས་མ་འདྲེས་རྫོགས་པས་གཅིག་ཏུ་མ་གྱུར་པ་སྟེ་བརྒྱད་པོ་ནི་ང་ཡི་རང་བཞིན་ནོ༔ ཞེས་གསུངས་སོ༔ ཡང་གསང་བའི་བདག་པོས་བཅོམ་ལྡན་འདས་ཁྱེད་ཀྱི་མཚན་དང་མཚན་ཉིད་ཇི་ལྟ་བུ་ལགས་བསྟན་ཏུ་གསོལ༔ ཞེས་ཞུས་པས༔ བཀའ་སྩལ་པ༔ ཀྱཻ་གསང་བའི་བདག་པོ་ང་ཡི་མིང་ནི་གསང་སྔགས་རྡོ་རྗེ་ཐེག་པ་ཞེས་བྱའོ༔ དོན་ནི་འདི་ལྟ་སྟེ་རྒྱལ་བ་ཐམས་ཅད་ཀྱི་གསང་ཆེན་དུ་གྱུར་པ༔ ཐེག་པ་ཐམས་ཅད་ཀྱི་ཡང་རྩེ་ཆེན་པོ༔ མི་འཇིགས་པའི་ཆོས་བདུན་དང་ལྡན་པ་ཡང་འདི་ལྟ་སྟེ༔ ཉོན་མོངས་པ་སྡུག་བསྔལ་ཐམས་ཅད་ཀྱིས་མི་ཆོད་པ༔ བདུད་དང་བར་ཆད་འཁྲུལ་རྟོག་ཐམས་ཅད་ཀྱིས་མི་ཤིགས་པ༔ རང་ངོ་ཀ་དག་ཏུ་གནས་པས་བདེན་པ༔ སྐྱོན་དང་ཡོན་ཏན་གཞན་གྱིས་ལྷད་མི་འཇུག་པས་སྲ་བ༔ རང་ངོ་ལས་གཞན་དུ་མི་འགྱུར་བས་བརྟན་པ༔ སྣང་བའི་ཆོས་དང་ཤེས་སྒྲིབ་ཕྲ་བ་ཡན་ཆད་འབིགས་ནུས་པས་ཐམས་ཅད་དུ་མི་ཐོགས་པ༔ གཞན་བྱུང་གི་ཡོན་ཏན་དང་སྒྲིབ་པ་བག་ཆགས་གང་གིས་གཞོམ་མི་ནུས་པས་ཐམས་ཅད་དུ་མ་ཕམ་པ་སྟེ༔ སྲ་བ་མཁྲེགས་པ༔ སངས་རྒྱས་ཀྱི་ཁམས་ཀྱི་ཡེ་ཤེས་ཡོན་ཏན་ཐམས་ཅད་དང་༔ སེམས་ཅན་གྱི་ཁམས་ཀྱི་ལས་ཉོན་སྡུག་བསྔལ་ཐམས་ཅད་ཀྱི་བཟང་ངན་གང་དུའང་མ་བཅོས་པར་རང་ཐེག་པའོ༔ ཀྱཻ་གསང་བའི་བདག་པོ་དོན་དམ་པའི་བྱང་ཆུབ་ཀྱི་སེམས་སོ༔ ང་ནི་ཡང་དག་པའི་དོན་ནོ༔ ཆོས་ཐམས་ཅད་ཀྱི་དམ་པར་གྱུར་པའོ༔ སྐྱོན་ཐམས་ཅད་ཡོངས་སུ་བྱང་བའོ༔ ཡེ་ཤེས་ཡོན་ཏན་ཐམས་ཅད་ངང་ཀློང་ཡོངས་སུ་ཆུབ་པའོ༔ འཁོར་འདས་ཀྱི་ཆོས་ཐམས་ཅད་ང་ཡི་ཀློང་དུ་ཆུབ་པ་ལ་དེ་ཡེ་ཤེས་ཆེན་པོ་གཅིག་གི་ཁྱད་པར་བྱེད་པ་ནི་མི་སེམས་པའི་སེམས་པ་ཆེན་པོ་ཡིན་ཏེ༔ གཞན་དུ་བློ་སྦྱོང་བ་དང་བསླབ་པ་དང་དུ་ལེན་ཅིང་ཚུལ་ལ་གནས་པ་ཐམས་ཅད་རྒྱུ་བསྒྲུབ་སྟེ་འབྲས་བུ་ང་ལ་སྨོན་པ་ལས་ལམ་དུ་མ་ཞུགས་པ་ཁོ་ནའོ༔ ལམ་ཡང་དག་པར་འཇུག་པ་དངོས་ནི་ང་ལས་མེད་དོ༔ ཀྱེ་གསང་བའི་བདག་པོ་ང་ནི་ཐིག་ལེ་ཉག་གཅིག་གོ༔ རྟོག་པའི་གྲྭ་ཟུར་ལས་འདས་པ༔ འཁོར་འདས་ངོ་བོ་ཉིད་དུ་གཅིག་པའོ༔ ཀྱེ་གསང་བའི་བདག་པོ་ང་ནི་གཞོན་ནུ་བུམ་སྐུ་ཡིན་ཏེ༔ སྐྱེ་འཆི་བསྒྲེས་རྒུད་ཐམས་ཅད་དང་བྲལ་བ༔ ལྷུན་གྲུབ་ནང་གསལ་ཆེན་པོ་ལས་ཕྱི་རྒྱ་མ་རལ་བ༔ ཡེ་ཤེས་ཡོན་ཏན་ཐམས་ཅད་ཡོངས་སུ་གྲུབ་པའོ༔ ཀྱེ་གསང་བའི་བདག་པོ་ང་ནི་གཞི་ཀ་དག་རྫོགས་པ་ཆེན་པོ་ཞེས་བྱ་སྟེ༔ འཁོར་འདས་ཀྱི་སྤྱི་གཞི་ཆེན་པོ་ཡིན་ནོ༔ གདོད་ནས་རྣམ་པར་དག་པ༔ ཡེ་ཤེས་ཡོན་ཏན་ཐམས་ཅད་རང་བྱུང་ངང་དུ་རྫོགས་པ༔ ཐེག་པ་གཞན་གྱི་ཚད་མི་ཐེབས་པ་དང་ལྡན་པའོ༔ ཀྱཻ་གསང་བའི་བདག་པོ་ང་ནི་ཡེ་ཤེས་ཡོན་ཏན་རང་བྱུང་ལྷུན་གྱིས་གྲུབ་སྟེ་མདངས་ནི་ཤེས་རབ་དང་ཡེ་ཤེས་རྣམ་པར་མཁྱེན་ཅིང་རྣམ་པར་གཟིགས་པའོ༔ ང་ཡི་གདངས་ནི་སྐུ་དང་འོད་གསལ་ཐིག་ལེའི་རོལ་པའོ༔ འཁོར་འདས་ཀྱི་ཆོས་ཐམས་ཅད་ང་ཡི་ངང་དུ་རང་ཆས་སུ་ཡོད་པའི་སྟོང་པ་ཉིད་དོ༔ སྐུ་དང་ཡེ་ཤེས་ཡོན་ཏན་མཁྱེན་གཟིགས་ཀྱི་རང་བཞིན་སྤུངས་པ་ལྟ་བུ་འདི་ཆོས་སྐུའི་སྒྲ་ཞུགས་པའོ༔ དོན་དམ་པར་ང་སྐྱེ་འགགས་འགྱུར་བ་མེད་ཅིང་ཕྱི་ནང་ཟང་ཐལ་ཆེན་པོ་རྒྱ་ཆད་ཕྱོགས་ལྷུང་དང་བྲལ་བའི་ཕྱིར་ན་སྟོང་པ་ཉིད་དོ༔ ང་ཡི་ངང་དང་ཚུལ་ལ་ཚིག་དང་དཔེ་དང་དོན་ཐམས་ཅད་ཀྱིས་མི་མཚོན་པའི་ཕྱིར་ན་མཚན་མ་མེད་པའོ༔ རང་གི་འབྲས་བུ་སྟེ་རང་ལ་རང་གདིང་ཐོབ་པ་སངས་རྒྱས་ཏེ༔ འབྲས་བུ་གཞན་འབྱུང་ལ་ཡིད་སྨོན་ཙམ་ཡང་མེད་པའི་ཕྱིར་ན་སྨོན་པ་མེད་པའོ༔ ཞེས་གསུངས་སོ༔ གསང་བའི་བདག་པོས༔ ཀྱཻ་སྟོན་པ་ཀུན་ཏུ་བཟང་པོ་ཁྱེད་ཀྱི་བྱད་དང་ངང་བཞིན་ཇི་ལྟ་བུ་ལགས་བདག་ཅག་རྣམས་ལ་བསྟན་དུ་གསོལ༔ ཞེས་ཞུས་པས༔ བཀའ་སྩལ་པ༔ ཀྱཻ༔ གསང་བའི་བདག་པོ་ང་ལ་གཟུགས་སུ་གྲུབ་པ་མ་སེམས་ཤིག༔ དེ་ལྟར་སེམས་ན་གཟུགས་ཀྱི་ཕུང་པོས་ཕུང་པའི་སེམས་ཅན་དུ་ལྟ་བ་མ་ལགས་སམ༔ རྣམ་པར་ཤེས་པ་དང་ལྡན་པར་མ་སེམས་ཤིག༔ སེམས་ན་རྣམ་ཤེས་ཀྱི་ཕུང་པོས་ཕུང་པའི་སེམས་ཅན་དུ་ལྟ་བ་མ་ལགས་སམ༔ ཚོར་བ་ཡོད་པར་མ་སེམས་ཤིག༔ སེམས་ན་ཚོར་བའི་ཕུང་པོས་ཕུང་པའི་སེམས་ཅན་དུ་ལྟ་བ་མ་ལགས་སམ༔ འདུ་ཤེས་ཡོད་པར་མ་སེམས་ཤིག༔ སེམས་ན་འདུ་ཤེས་ཀྱི་ཕུང་པོས་ཕུང་པའི་སེམས་ཅན་དུ་ལྟ་བ་མ་ལགས་སམ༔ འདུ་བྱེད་ཡོད་པར་མ་སེམས་ཤིག༔ སེམས་ན་འདུ་བྱེད་ཀྱི་ཕུང་པོས་ཕུང་པའི་སེམས་ཅན་དུ་ལྟ་བ་མ་ལགས་སམ༔ ངས་འགྲོ་དོན་བྱེད་སྙམས་ཀྱི་བློ་སེམས་ཡོད་པར་མ་སེམས་ཤིག༔ སེམས་ན་གཉིས་སྣང་གིས་ཕུང་པའི་སེམས་ཅན་དུ་ལྟ་བ་མ་ལགས་སམ༔ བདེ་སྐྱིད་དང་སྟོན་འཁོར་ལ་མྱོང་ཞེན་དང་སྤྱོད་པ་ཡོད་པར་མ་སེམས་ཤིག༔ སེམས་ན་གཟུང་འཛིན་གྱིས་ཕུང་པའི་སེམས་ཅན་དུ་ལྟ་བ་མ་ལགས་སམ༔ ང་ནི་ཁྱབ་བརྡལ་མཉམ་པ་ཉིད་ཀྱི་ངང་ལ་འབྱམས་ཀླས་པའོ༔ ཞེས་གསུངས་སོ༔ དེ་ནས་གསང་བའི་བདག་པོས་བཅོམ་ལྡན་འདས་ལེགས་སོ༔ ཁྱེད་ཀྱི་གསང་བ་བསམ་གྱིས་མི་ཁྱབ་པ་སྒྲུབ་པའི་ལམ་ཉམས་སུ་ལེན་པ་གང་ལགས་བཅོམ་ལྡན་འདས་ཀྱིས་བསྟན་དུ་གསོལ༔ ཞེས་ཞུས་པས༔ བཀའ་སྩལ་པ༔ ཀྱཻ་གསང་བའི་བདག་པོ་ང་ཡི་གསང་བ་བསམ་གྱིས་མི་ཁྱབ་པའི་སྒྲུབ་པ་ནི༔ ང་ཡི་ཡིན་ལུགས་ཇི་ལྟ་བ་བཞིན་དུ་ཤེས་པ་ནི་ཆོས་ཉིད་ཀྱི་བདེན་པ་མཐོང་བ་སྟེ༔ སྒྲུབ་པ་ཟབ་མོའོ༔ ང་ཡི་གནས་ལུགས་ཤེས་ནས་གཉིས་མེད་མཉམ་པ་ཉིད་དང་༔ འཁོར་འདས་མཉམ་པ་ཉིད་དང་༔ ཐབས་ཤེས་མཉམ་པ་ཉིད་དུ་རྟོགས་ནས༔ ང་ཀུན་ཏུ་བཟང་པོའི་ངང་ཤེས་ནས་ངང་དང་མི་འབྲལ་ཏེ་རྟག་ཏུ་བྱ་རྩོལ་བྲལ་བའི་ངང་དུ་གནས་པ་ནི་གསང་བའི་སྒྲུབ་པ་ཟབ་མོའི༔ ང་སྐད་ཅིག་གིས་འགྲུབ་བོ༔ ཞེས་གསུངས་སོ༔ ཡང་གསང་བའི་བདག་པོས༔ ཀྱཻ་སྟོན་པ་ཀུན་ཏུ་བཟང་པོ་དགོངས་སུ་གསོལ༔ བསྙེན་སྒྲུབ་ཀྱི་ཐབས་མཆིས་སམ་མ་མཆིས༔ ཞེས་ཞུས་པས༔ འཁོར་བ་དབྱིངས་སུ་གཞིག་པའི་སྒྲས་ཚིགས་སུ་བཅད་པ་འདི་གསུངས་སོ༔ ཀྱཻ་ཧོ༔ གསང་བའི་བདག་པོ་རྡོ་རྗེ་འཆང་༔ ང་ནི་རང་བྱུང་སངས་རྒྱས་ཏེ༔ སེམས་ཅན་ཀུན་གྱི་ཡིད་ལ་གནས༔ སེམས་ཅན་ཀུན་ཀྱི་ཡིད་ནང་གནས༔ སེམས་ཅན་ཡིད་ཀྱི་ངོ་བོར་གནས༔ སེམས་ཅན་ཀུན་དང་དབྱེར་མེད་དེ༔ ངོ་ཤེས་ངང་དུ་གནས་གྱུར་ན༔ སྐད་ཅིག་གཅིག་གིས་རྫོགས་སངས་རྒྱས༔ བསྒོམ་པས་སངས་རྒྱས་ང་མི་འགྲུབ༔ མ་བསྒོམ་བཞག་པས་འགྲུབ་པར་འགྱུར༔ བསྒྲུབ་པས་སངས་རྒྱས་ང་མི་འགྲུབ༔ མ་བསྒྲུབ་གནས་པས་སྐད་ཅིག་འགྲུབ༔ བསྙེན་སྔགས་བཟླས་པས་ང་མི་འགྲུབ༔ མ་བཟླས་བཞག་པས་ངེས་པར་འགྲུབ༔ བལྟས་པས་སངས་རྒྱས་ང་མི་མཐོང་༔ མ་བལྟས་བཞག་པས་ངེས་པར་མཐོང་༔ བློ་བཅོས་མཁས་ཀྱང་ང་མི་གསལ༔ ཤེས་པ་གསལ་ཀྱང་ང་མི་ཤེས༔ དཀའ་སྤྱད་བཙལ་བས་ང་མི་རྙེད༔ ང་སྒྲུབ་རྣལ་འབྱོར་རྣམ་པ་བཞི༔ ངོ་བོ་ཉིད་དུ་མཉམ་བཞག་པ༔ རང་རིག་སྤྲོས་བྲལ་རྣལ་འབྱོར་ཡིན༔ གདངས་ཀྱི་ངང་སྐྱོང་གྲོལ་བ་ནི༔ ལྷུན་གྲུབ་རྫོགས་ཆེན་རྣལ་འབྱོར་ཡིན༔ འཁོར་འདས་མ་བཅོས་གཞིར་རྫོགས་སུ༔ རྟོགས་པ་འཁོར་འདས་རྫོགས་ཆེན་པ༔ གདིང་ཐོབ་སྒྱུ་མའི་ལྷུམས་ཞུགས་པ༔ ཀ་དག་རྫོགས་ཆེན་རྣལ་འབྱོར་པ༔ འདི་ནི་གསང་བའི་སྒྲུབ་པའོ༔ སྒོམ་སྒྲུབ་གཞན་གྱིས་ང་མི་འགྲུབ༔ འདི་ནི་སྲོག་གི་སྒྲུབ་པ་ཡིན༔ ཞེས་གསུངས་སོ༔ ཡང་གསང་བའི་བདག་པོས༔ ཀྱཻ་བཅོམ་ལྡན་འདས༔ དེ་ལྟ་བུའི་གསང་བ་བླ་ན་མེད་པའི་སྒྲུབ་པ་ཟབ་མོ་ལྷུར་བླངས་པའི་འབྲས་བུ་ཇི་ལྟར་ལགས༔ བཅོམ་ལྡན་འདས་ཀྱིས་བསྟན་དུ་གསོལ༔ ཞེས་ཞུས་པས༔ བཀའ་སྩལ་པ༔ ཀྱེ་གསང་བའི་བདག་པོ་ང་ནི་བསམ་གྱིས་མི་ཁྱབ་བོ༔ ང་ནི་བརྗོད་དུ་མེད་པའོ༔ འབྲས་བུ་ནི་མཐའ་ཡས་པའོ༔ སེམས་ཅན་བློ་ཆུང་བ་དང་༔ དབང་པོ་དམན་པའི་རིགས་རྣམས་ཀྱིས་འཁུ་ཞིང་གཤེ་བར་འགྱུར་བའི་ཕྱིར༔ འདི་ནི་གསང་བའི་ཡང་གསང་ང་ོ༔ གསང་བའི་བདག་པོ་གསང་བ་ཆེན་པོ་འདིའི་སྒོ་མཐོང་ནས་དང་པོ་གོ༔ བར་དུ་མྱོང་༔ ཐ་མ་གདིང་ཐོབ་པ་ནི་གནད་དམ་པའོ༔ ངའི་གསང་བ་བསམ་གྱིས་མི་ཁྱབ་པ་འདིའི་འབྲས་བུ་ཐོབ་པའི་ཚུལ་ནི༔ ཚེ་གཅིག་ཏིང་འཛིན་བསྒོམ་པའི་རྣལ་འབྱོར་པ་དང་༔ ཆོས་སྒོར་མ་ཞུགས་པའི་སྐྱེ་བོ་གཉིས་ལ་ངོ་མཉམ་དུ་འཕྲོད་ནས་མཉམ་པར་བསྒོམ་ན་གྲོལ་བའི་ཡུན་ལ་རིང་ཐུང་སྤུ་རྩེ་ཙམ་ཡང་མེད་པ་ཀུན་ཏུ་བཟང་པོ་ངའི་གཏན་ཚིག་གོ༔ ཚེ་གཅིག་དགེ་བ་ལ་གོམས་པའི་གང་ཟག་དང་༔ སྡིག་པ་ལ་གོམས་པའི་གང་ཟག་གཉིས་ལ་ངོ་མཉམ་དུ་འཕྲོད་ནས་གྲོལ་བ་ལ་ཁྱད་པར་མེད་པ་ཀུན་ཏུ་བཟང་པོ་ངའི་གཏན་ཚིག་གོ༔ ཚེ་གཅིག་དགེ་བ་ལ་གོམས་པའི་གང་ཟག་དང་༔ སྡིག་པ་ལ་གོམས་པའི་གང་ཟག་གཉིས་ལ་ངོ་མཉམ་དུ་འཕྲོད་ནས་གྲོལ་བ་ལ་ཁྱད་པར་མེད་པ་ཀུན་ཏུ་བཟང་པོ་ངའི་གཏན་ཚིག་གོ༔ ཚེ་གཅིག་སྡོམ་པ་ལ་བརྩོན་པའི་གང་ཟག་དང་༔ ཚེ་གཅིག་སྲོག་གཅོད་ལ་བརྩོན་པའི་སྐྱེ་བོ་གཉིས་ཀས་ངའི་གསང་བ་མཐོང་ནས་གྲོལ་བ་ཐོབ་པ་ལ་ཁྱད་པར་མེད་པ་ཀུན་ཏུ་བཟང་པོ་ངའི་གཏན་ཚིག་གོ༔ ཚེ་གཅིག་རྒྱུད་སྡེ་ཟབ་མོ་ཀློག་འདོན་བྱས་པའི་གང་ཟག་དང་༔ མཚམས་མེད་པ་ལྔ་སྤྱོད་པའི་སྐྱེ་བོ་གཉིས་ཀྱིས་ངའི་གསང་བ་ཆེན་པོ་མཐོང་ནས་གྲོལ་བ་ལ་ཁྱད་པར་མེད་པ་ཀུན་ཏུ་བཟང་པོ་ངའི་གཏན་ཚིག་གོ༔ སྟོང་གསུམ་མོས་གུས་ཀྱིས་བསྐོར་བའི་གང་ཟག་དང་༔ མི་དགེ་བ་བཅུའི་ལས་ལ་བརྩོན་པའི་སྐྱེ་བོ་གཉིས་ཀྱིས་ངའི་གསང་བ་མཐོང་ནས་གྲོལ་ཡུན་ལ་ཉེ་རིང་མེད་པ་ཀུན་ཏུ་བཟང་པོ་ངའི་གཏན་ཚིག་གོ༔ ང་ནི་ཀློང་ཆེན་ཀུན་ཏུ་བཟང་མོའི་བྷ་ག་ཡངས་པར་ཨ་ལ་ལ༔ ཞེས་འབྱམས་ཀླས་སོ༔ སྐད་ཅིག་དེ་ཉིད་ལ་གསང་བའི་བདག་པོ་འབྲས་བུ་རེ་དོགས་དང་བྲལ་བའི་དབྱིངས་སུ་སད་ནས་རོལ་པའི་འཁོར་ལ་བཀའ་སྩལ་པ༔ ཀུན་ཏུ་བཟང་པོ་གསང་ཆེན་པོ༔ འབྲས་བུ་རེ་དོགས་བྲལ་བའི་དབྱིངས༔ རྣམ་པར་གྲོལ་བའི་གནད་ཆེན་པོ༔ ལྷུན་གྲུབ་གསང་བ་ཆེན་པོའི་ལམ༔ ལུས་ངག་ཡིད་ཀྱི་བག་ཆགས་ཀུན༔ བཙན་ཐབས་བསླང་ནས་ཞེན་པ་བཟློག༔ དེ་ནས་སེང་གེ་གླང་པོ་ཆེ༔ དྲང་སྲོང་ལྟ་བུའི་འདུག་སྟངས་ཀྱིས༔ དབང་པོའི་སྒོ་རྣམས་དྲང་པོར་བསྲང་༔ ནམ་མཁའ་བར་སྣང་ས་གཞི་ལ༔ ལྟ་སྟངས་གནད་ལྡན་ངང་ནས་བྱ༔ ཙིཏྟའི་དཀྱིལ་ནས་ཡེ་ཤེས་རྩ༔ མིག་གི་ཨ་འབྲས་དཀྱིལ་དུ་ཕྱེས༔ དེ་ནི་མཁའ་དབྱིངས་ལ་གཅུན་པས༔ ལྷུན་གྲུབ་ནང་དབྱིངས་མངོན་སུམ་མཐོང་༔ འོད་དང་ཟེར་དང་ཐིག་ལེ་དང་༔ གསང་ཆེན་རིག་གདངས་ལུ་གུ་རྒྱུད༔ མངོན་སུམ་མཐོང་ནས་བརྟན་པ་ནི༔ ཆོས་ཉིད་མངོན་སུམ་སྣང་བ་སྟེ༔ བརྟན་ནས་འཕེལ་ཆ་མ་རྫོགས་བར༔ ཉམས་ཀྱི་སྣང་བ་གོང་འཕེལ་ཏེ༔ རྩལ་རྫོགས་ལྷ་སྐུར་སྨིན་པ་ནི༔ རིག་པ་ཚད་ཕེབས་སྣང་བ་སྟེ༔ དེ་ནས་རིམ་གྱིས་ཟད་པ་དང་༔ གཅིག་ཆར་ཟད་པ་ཚད་མ་ངེས༔ དབྱིངས་དང་ཐིག་ལེ་སྐུ་སྣང་ཟད༔ སེམས་དང་སེམས་བྱུང་འཁྲུལ་རྟོག་ཟད༔ གཟུང་དང་འཛིན་པ་དབྱིངས་སུ་ཟད༔ ཆོད་ཉིད་ཟད་པའི་སྣང་བའོ༔ སྣང་ཞིང་སྲིད་པའི་ཆོས་སོ་ཅོག༔ སྒྱུ་མའི་འཁྲུལ་འཁོར་ཞིག་པ་བཞིན༔ ཀ་དག་ཆོས་སྐུའི་དབྱིངས་སུ་ཞི༔ སྐུ་དང་ཡེ་ཤེས་མཁྱེན་གཟིགས་ཀྱི༔ གོ་མ་འགགས་པར་གཏིང་གསལ་ཏེ༔ ཆོས་སྐུ་ཁྱབ་བརྡལ་དགོངས་པར་སད༔ འདི་ནི་རྒྱུད་སྡེ་རྒྱ་མཚོའི་བཅུད༔ དུས་གསུམ་རྒྱལ་བའི་སྲོག་ཐིག་སྟེ༔ མཐོང་ཐོས་དྲན་རེག་རྣམ་གྲོལ་འགྱུར༔ ཁྱད་པར་རལ་པའི་ཅོད་པན་དུ༔ བཅང་ནས་བསྒོམ་པས་མངོན་སངས་རྒྱས༔ ཉམས་རྟོགས་ཡེ་ཤེས་ཡོན་ཏན་འབར༔ ཆོས་ཉིད་དགོངས་པའི་ཀློང་ཆེན་རྡོལ༔ འཇིགས་དང་སྡུག་བསྔལ་ཀུན་ལས་སྒྲོལ༔ བསམ་དོན་ཐམས་ཅད་ཡིད་བཞིན་འགྲུབ༔ ཅེས་གསུངས་སོ༔ ཡེ་ཤེས་སྒྱུ་འཕྲུལ་རོལ་པའི་འཁོར་ཚོགས་ཐམས་ཅད་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ༔ དཔལ་གསང་བའི་བདག་པོའི་གསང་བ་བསམ་གྱིས་མི་ཁྱབ་པའི་སྒྲུབ་པ་རྫོགས་སོ༔ བདག་འདྲ་པདྨ་འབྱུང་གནས་ངས༔ གསང་སྔགས་གསང་བའི་ཡང་ཐིག་འདི༔ སྲོག་ལས་གཅེས་པའི་ནོར་མཆོག་ཏུ༔ གཅེས་པའི་བུ་ལ་ཕ་ཕོག་ཕྱིར༔ དཔལ་ལྡན་མ་ཧཱ་ཀཱ་ལ་དང་༔ ལྷ་ཆེན་ཚོགས་ཀྱི་བདག་པོས་སྲུངས༔ སྣོད་མིན་ལོག་ལྟའི་དབང་པོ་སྣུབས༔ སྣོད་ལྡན་བརྒྱུད་འཛིན་འདོད་དོན་སྒྲུབས༔ བཀའ་དང་དམ་ཚིག་གཉན་པོའི་རྒྱ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཨྠིྀ༔ ཞེས་པ་འདི་ཡང་འོད་གསལ་རྫོགས་པ་ཆེན་པོ་འཁོར་འདས་འུབ་ཆུབ་རོལ་པའི་རྣལ་འབྱོར་པ་བདུད་འཇོམས་རྡོ་རྗེ་གྲོ་ལོད་རྩལ་གྱིས་གསེར་སྨད་རྔ་ལ་སྟག་རྩེའི་གཡས་ལོགས་རྡོ་རྗེ་བྲག་ནས་བཏོན་ཏེ་མི་ལོ་བཅུ་དྲུག་བར་དུ་བཀའ་རྒྱས་བཏབ་སྟེ་མཐར་ཆོས་ཀྱི་རྡོ་རྗེས་ནན་དུ་བསྐུལ་ངོར་སྨར་མདོ་བཀྲ་ཤིས་དགའ་འཁྱིལ་དུ་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ།།དགེའོ།།དགེའོ།།དགེའོ།།སརྦ་མངྒ་ལཾ།།།།