TTDL-ZABTER-09-TA-013

Previous Text Back to Volume Page Next Text

Wylie title
Location	bdud 'joms gling pa zab gter Volume 9, Text 13, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. '*. In Sprul pa'i gter chen bdud 'joms gling pa'i zab gter gsang ba'i chos sde, Vol. 9: . Thimphu, Bhutan: Lama Kuenzang Wangdue, 2004.*
Side notes	Verso: bdud 'joms bka' srung dam can
More details More details
Tertön	བདུད་འཇོམས་གླིང་པ་ (bdud 'joms gling pa)
Genre
Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)

[edit]

༠༠༠༠བརྡ་ཡིག༦༥ཟབ་གསང་མཁའ་འགྲོའི་སྙིང་ཐིག་ལས༔ དམ་ཅན་རྡོ་རྗེ་ལེགས་པའི་སྒོས་སྒྲུབ་ཡིད་བཞིན་གཏེར་མཛོད་བཞུགས༔ ༠༠༠༠༠བརྡ་ཡིག༦༦ན་མོ་གུ་རུ་པདྨ་ཀ་ར་ཡེ༔ ༠༠༠༠༠བརྡ་ཡིག༦༦མ་འོངས་ལྔ་བརྒྱའི་སྙིགས་མ་ལ༔ པདྨ་འབྱུང་གནས་བརྒྱུད་འཛིན་རྣམས༔ དམ་ཅན་ཆེན་པོ་བསྒྲུབ་བསྙེན་ནི༔ དང་པོ་བཅའ་གཞིའི་རིམ་པ་ནི༔ མཁར་ཐབས་དམར་ནག་བརྩེགས་གསུམ་པའི༔ རྩེ་ལ་གསེར་གྱི་ཏོག་ཀྱང་བཙུགས༔ ཕྱོགས་བཞིར་དར་དང་རས་ཀྱིས་བརྒྱན༔ སྟེང་མར་དམར་གཏོར་བརྒྱད་ཀྱིས་བསྐོར༔ བར་དང་འོག་མར་ཡང་དེ་བཞིན༔ ཡང་ན་དམར་གཏོར་ཆེ་བ་ལ༔ གཏོར་མ་ཆུང་བ་བཅུ་གཉིས་བསྐོར༔ དེ་ལ་ར་ཡི་རྒྱལ་མཚན་བཙུགས༔ ར་ཤ་ཁྲག་གིས་བརྒྱན་པར་བྱས༔ དར་ཟབ་རས་ཟབ་སྣ་ཚོགས་བརྒྱན༔ ཡང་ན་འབྱོར་བ་མི་ལྡན་པས༔ སྲོག་འཁོར་རྟེན་དུ་བཙུགས་པ་ལ༔ མཆོད་པའི་ཡོ་བྱད་འབྱོར་ཚོགས་བཤམས༔ ས་མ་ཡ༔ དམ་ཚིག་གཉན་པོའི་སྲོག་འཛིན་པའི༔ སྐལ་བཟང་དག་གི་སྲུང་མ་ལགས༔ དེ་ཕྱིར་ཉམས་ཆག་བསྐང་བཤགས་འབད༔ སྔགས་པས་དམ་སྲུང་དགེ་བཙུན་པས༔ སྡོམ་པ་ལ་གནས་གནད་དུ་ཤེས༔ དེ་ལྟར་གནད་དང་ལྡན་པ་ན༔ མི་འགྱངས་མྱུར་དུ་ངེས་པར་འགྲུབ༔ བསོད་ནམས་ལོངས་སྤྱོད་དཔལ་རྒྱས་ཕྱིར༔ དང་པོ་ཚོགས་མཆོད་མང་པོ་བྱ༔ སྒྲུབ་པའི་སྙིང་པོ་སྔགས་ཡིན་ཕྱིར༔ སྔགས་གྲངས་བསྐྱར་བ་མཆོག་ཏུ་ཤིས༔ སྒྲུབ་ཚེ་ཆུད་མི་ཟ་བའི་གནད༔ བསྐྱེད་རིམ་དམིགས་པའི་གནད་དུ་ཟུངས༔ ས་མ་ཡ༔ ཨོཾ་སྭ་བྷཱ་ཝ༴བདག་ཡི་དམ་གྱི་ཐུགས་ཀ་ནས་ཡི་གེ་བྷྲཱུྃཿགཅིག་སྤྲོས་པ་ལས་མདུན་གྱི་ས་གཞི་རབ་ཏུ་མཛེས་ཤིང་ཁྱོན་ཡངས་པ་ངོས་འཇམ་ཞིང་མེ་ཏོག་སྣ་ཚོགས་པས་བརྒྱན་པའི་དབུས་སུ་དུར་ཁྲོད་རབ་ཏུ་འཇིགས་པའི་གནས་མཆོག་ཏུ་ཟངས་ལྕགས་འདྲེས་པའི་ཕོ་བྲང་རྒྱ་ཆེ་ལ་བཀོད་ལེགས་པ་དབྱིབས་མཛེས་ཤིང་འོད་དང་མེ་དཔུང་གཡོ་བའི་ཀློང་དུ༔ བདག་ཉིད་དྲག་པོའི་ཐུགས་ཀ་ནས་ཡི་གེ་ཏྲིཿདམར་ནག་གཅིག་སྤྲོས་ནས་བབ་པ་ལས་འོད་ཟེར་དཔག་ཏུ་མེད་པ་འཕྲོས་པས་རྒྱལ་བ་སྲས་དང་བཅས་པ་ལ་མཉེས་པའི་མཆོད་པ་འབུལ༔ གཟི་བྱིན་ནུས་སྟོབས་ཐམས་ཅད་བསྡུས་ཏེ་ཏྲིཿལ་ཐིམ༔ ཡང་འོད་ཟེར་དཔག་ཏུ་མེད་པ་ཕྱིར་འཕྲོས་ཡེ་ཤེས་དང་འཇིག་རྟེན་གྱི་བཀའ་སྲུང་དམ་ཅན་རྒྱ་མཚོ་ཐམས་ཅད་ག་བུར་རླུང་ལ་དེངས་པ་བཞིན་དུ་འོད་དེ་ལ་དེངས་ནས་འདུས་ཏེ་ཏྲིཿལ་ཐིམ༔ ཡང་འོད་ཟེར་རབ་ཏུ་སྤྲོས་པས་བདག་ཉིད་ཚེ་རབས་ལས་ཀྱི་སྲུང་མ་རྣམས་ཀྱང་འོད་དུ་འདུས་ཏེ་ཐིམ་པ་ལས༔ དམ་ཅན་རྡོ་རྗེ་ལེགས་པ་སྐུ་མདོག་དམར་ནག་ཞལ་གཅིག་ཕྱག་གཉིས་སེང་གེ་དཀར་མོ་ལ་བཅིབས་པ༔ ཕྱག་གཡས་གསེར་གྱི་རྡོ་རྗེ་ཀླད་ལ་བསྐོར་ཐབས་སུ་བསྣམས་པས་སྣང་སྲིད་དབང་དུ་བསྡུས་ཤིང་དགྲ་བགེགས་ཀྱི་མགོ་བོ་ཚལ་པ་བརྒྱ་རུ་གཏོར་བ༔ ཕྱག་གཡོན་པས་དགྲ་བགེགས་གདུག་པ་ཅན་གྱི་དོན་སྙིང་དམར་ཙ་རེ་འདྲེན་ཞིང་ཞལ་དུ་གསོལ་བ༔ སྐུ་ལ་བེར་དམར་དབུ་ལ་སག་ཞུ་དང་ཞབས་ལ་སག་ལྷྭམ་གསོལ་བ༔ ཁྲོ་གཏུམ་འཇིགས་རྔམས་ལྟར་མི་བཟོད་པ་སྤྱན་གསུམ་དམར་ཟླུམ་དུ་འཁྲིགས་ཤིང་སྤྱན་རྩ་ལས་གློག་དམར་འཁྱུགས་པ༔ ཁྲོ་གཉེར་ལས་མུན་པ་འཁྲིགས་ཤིང་ཁ་རླངས་ལས་སྐྱི་སེར་གཡོ་བ༔ སྨ་ར་ལས་མེ་འབར་ཞིང་སྨིན་མ་ལས་གཟའ་སྐར་འཁྲུགས་པ་སྙན་ཆ་གསེར་ལས་བྱས་ཤིང་མི་མགོ་ཕྲེང་བས་སེ་རལ་བྱས་པ༔ སྐེད་པར་སྟག་རལ་དང་གཟིག་ཤུབ་ཀྱིས་བརྒྱན་ཅིང་སྤུ་གྲི་རེག་ན་གཅོད་པའི་རལ་གྲི་སྐེད་སྔོན་ལ་བསྟན་པ༔ ཟངས་སྒ་ལ་སྦྲུལ་ནག་གི་གློ་གོང་བྱས་པ༔ ཡིད་བཞིན་གྱི་ནོར་བུའི་དྲྭ་ཕྱེད་ཀྱིས་སེང་ལྕམ་ལ་རབ་ཏུ་བརྒྱན་པར་བསྐྱེད་དོ༔ གཡས་སུ་ཕ་མོན་པ་ནག་པོ་རིན་ཆེན་དུང་གི་རྣ་ཆ་ཅན༔ གཡས་མདུང་དར་ནག་པོ་ཕྱར་ཞིང་གཡོན་པས་གློག་ཞགས་འཛིན་པ་རྟ་ནག་གྭ་པ་ལ་ཆིབས་ཤིང་མོན་པ་སྟོང་གིས་བསྐོར་བ༔ གཡོན་དུ་མ་མོན་མོ་ནག་མོ་གཡས་གནམ་ལྕགས་ཀྱི་ཤང་ལང་དང་གཡོན་གློ་སྙིང་དྲོན་མོ་བསྣམས་ནས་ཤ་བ་ལ་ཞོན་པ་མོན་མོ་ཁྲག་གི་རལ་པ་ཅན་སྟོང་གིས་བསྐོར་བ༔ གཉིས་ཀའི་སྐུ་ལ་མི་ལྤགས་ཀྱི་སྨད་དཀྲིས་གསོལ་བའོ༔ མདུན་དུ་ཡུམ་ཀོང་བཙུན་དེ་མོ་དམར་མོ་གཡས་པས་ལྕགས་ཀྱུ་དང་གཡོན་པས་མེ་ལོང་འཛིན་པ་འབྲོང་གཡག་བྲེ་བཙུན་ལ་བཅིབས་པ༔ འཁོར་སྨན་ཕྲན་སྟོང་གིས་བསྐོར་བ༔ དེ་མཐར་ཨ་ཙ་ར་དང་མགར་བ་དང་བཙན་དམག་དང་སྡེ་བརྒྱད་ཀྱི་ཚོགས་ཐམས་ཅད་ཀྱིས་བསྐོར་ནས་ལྷ་མིའི་ཁྲོམ་ཚོགས་པ་ལྟ་བུར་བདག་གི་བཀའ་ཉན་ཅིང་གསུང་སྡོད་པར་བསྒོམ༔ དེ་ལྟར་གསལ་བའི་གནས་གསུམ་དང་ཐུགས་སྲོག་ཏྲིཿལས་འོད་ཟེར་འཕྲོས་པས་དམ་ཅན་རྡོ་རྗེ་ལེགས་པ་འཁོར་དང་བཅས་པ་སྤྱན་དྲངས་ལ་བསྟིམ་མོ༔ དེ་ནས་སྤྱན་འདྲེན་པ་ནི༔ ཧོཿདགོངས་སུ་གསོལ་ལོ༔ ལན་གསུམ༔ དམ་ཅན་རྡོ་རྗེ་ལེགས་པ་ནམ་མཁའ་ལ་སེང་ཞོན་གྱི་སྡེ་ཚོགས༔ བར་སྣང་ལ་བྱ་ཞོན་གྱི་སྡེ་ཚོགས༔ ས་གཞི་ལ་ར་ཞོན་གྱི་སྡེ་ཚོགས༔ ཕ་མོན་པ་ནག་པོའི་སྡེ་ཚོགས༔ མ་མོན་མོ་ནག་མོའི་སྡེ་ཚོགས༔ བུ་དམ་ཅན་ཆེན་པོ༔ བཙན་རྒོད་ཆེན་པོ༔ དགྲ་ལྷ་ཆེན་པོ༔ ཚོང་ལྷ་ཆེན་པོ༔ དམག་དཔོན་ཆེན་པོ༔ ཨ་ཇོ་ཆེན་པོ༔ ཇག་དཔོན་ཆེན་པོ༔ ནོར་ལྷ་ཆེན་པོ༔ བཀའ་སྲུང་ཆེན་པོ༔ སྲོག་བདུད་ཆེན་པོ༔ མགར་བ་ཆེན་པོ༔ ཐེའུ་རང་ཆེན་པོ༔ རྒྱུག་བྱེད་ཆེན་པོ༔ མྱུར་མགྱོགས་ཆེན་པོ༔ ཡུལ་ལྷ་ཆེན་པོ༔ གཙུག་ལག་ཁང་གི་སྲུང་མ༔ དུར་ཁྲོད་ཆེན་པོའི་ཞིང་སྐྱོང་༔ གནམ་ས་དང་གཙང་ཆབ་ཕྱེད་ཀྱི་བདག་པོ༔ རིག་འཛིན་བརྒྱུད་པའི་སྲོག་ཤིང་༔ རྣལ་འབྱོར་ཀུན་གྱི་དགྲ་ལྷ༔ བསྟན་དགྲའི་སྲོག་གི་ཤན་པ་ཆེན་པོ་ཁྱོད་འཁོར་དང་བཅས་པ༔ དུར་ཁྲོད་བསིལ་བ་ཚལ་ན་བཞུགས་སམ༔ རྩུབ་འགྱུར་ཚལ་ན༴རྒྱ་གར་རྡོ་རྗེ་གདན་ན༴མ་ལ་ཡ་ན༴ན་ལེནྡྲ་ཡི་གཙུག་ལག་ཁང་ན༴བི་ཀྲ་མ་ཤཱི་ལའི་གཙུག་ལག་ཁང་ན༴བལ་ཡུལ་ཨེ་ཡི་གཙུག་ལག་ཁང་ན༴དབུ་རུ་ཞྭ་ཡི་ལྷ་ཁང་ན༴འོ་ཡུག་ཤང་གི་བྲེ་མོ་ན་བཞུགས་སམ༔ གཞན་ཡང་རི་རབ་གླིང་བཞི་སྣང་སྲིད་གང་ན་བཞུགས་ཀྱང་༔ སྟོན་པ་ཤཱཀྱ་ཐུབ་པ་གསང་བདག་ཕྱག་ན་རྡོ་རྗེ་ཨོ་རྒྱན་པདྨ་འབྱུང་གནས་ལ་སོགས་པའི་དུས་གསུམ་གྱི་རྒྱལ་བ་སྲས་དང་བཅས་པའི་བཀའ་ལུང་དམ་ཚིག་གཉན་པོ་དཔང་དུ་བཙུག་གོ༔ གཏའ་རུ་བཞག་གོ༔ རྒྱབ་བསྟེན་དུ་བྱས་ནས་ཁྱོད་འབོད་དོ༔ སྤྱན་འདྲེན་ནོ༔ དབྱིངས་ནས་བསྐུལ་ལོ༔ ནམ་མཁའི་སྤྲིན་དཔུང་བཞིན་དུ་གཏིབ་ལ་བྱོན་ཅིག༔ བར་སྣང་བྱ་ཚོགས་བཞིན་དུ་འཐིབ་ཅིང་བྱོན་ཅིག༔ ས་གཞིའི་བུ་ཡུག་བཞིན་དུ་འཚུབས་ཤིང་གཤེགས་ཤིག་བྱོན་ཅིག༔ མ་འགྱངས་མ་གཡེལ་མ་བུལ༔ ཏྲི་བཛྲ་ས་དྷུ་ས་མ་ཡ་ཕེཾ་ཕེཾ་ཛ་ཛཿཨ་ཝེ་ཤ་ཡ་ཨ་ཝེ་ཤ་ཡ་ཛཿཧཱུྃ་བཾ་ཧོ༔ སྟྭཾ་སྟྭཾ༔ དེ་ནས་བཞུགས་སུ་གསོལ་བ་ནི༔ བསྭོ༔ བསྙེན་ཅིང་བསྒྲུབ་པའི་དཀྱིལ་འཁོར་འདིར༔ བསྐྱེད་ཅིང་བསྒོམ་པའི་ལྷ་འདི་དང་༔ གཉིས་སུ་མེད་པར་བཞུགས་སུ་གསོལ༔ སྐད་ཅིག་མི་འབྲལ་སྲུང་མར་བཞུགས༔ ཏྲི་བཛྲ་ས་དྷུ་ས་མ་ཡ་ཏིཥྛ་ལྷན༔ དེ་ནས་མངའ་གསོལ་ལ༔ བསྭོ༔ དཀོན་མཆོག་གསུམ་པོར་སྐྱབས་མཆི་ཞིང་༔ བཀའ་དམ་གཉན་པོར་དཔང་བཙུགས་ནས༔ དམ་ཅན་རྡོ་རྗེ་ལེགས་པ་ཁྱོད༔ བདག་གི་སྲུང་མར་མངའ་གསོལ་ལོ༔ བཛྲ་ས་མ་ཡ༔ དེ་ནས་ཕྱག་འཚལ་བ་ནི༔ ཧཱུྃ༔ སྔོན་གྱི་བསྐལ་པ་དང་པོ་ནས༔ སངས་རྒྱས་ཆོས་ཀྱི་སྲུང་མ་ཆེ༔ དམ་ཅན་རྡོ་རྗེ་ལེགས་པ་ལ༔ བསྟན་པ་བསྲུང་ཕྱིར་ཕྱག་འཚལ་ལོ༔ ན་མོ་ས་མ་ཡ་ཧོ༔ དེ་ནས་སྙན་གསན་དབབ་པ་ནི༔ ཧོཿབཀའ་སྲུང་གཉན་པོ་སྙན་གསོན་ཅིག༔ བདག་གི་མི་ནོར་ལོངས་སྤྱོད་འཁོར༔ གཏད་དོ་གཉེར་རོ་ཁྱེད་ལ་བཅོལ༔ སྐད་ཅིག་མི་འབྲལ་སྲུང་སྐྱོབ་མཛོད༔ སྲོག་གི་འཁོར་ལོའི་རྟེན་ལ་བཞུགས༔ དགྱེས་པའི་ཞལ་དང་འགྲུབ་རྟགས་སྟོན༔ བཛྲ་ས་དྷུ་ས་མ་ཡ༔ དེ་ནས་མཆོད་པ་འབུལ་བ་ལ༔ ཧཱུྃ༔ དངོས་འབྱོར་ཡིད་ཀྱིས་རྣམ་སྤྲུལ་པའི༔ ཉེར་སྤྱོད་བདུན་གྱི་མཆོད་པ་འབུལ༔ འདོད་ཡོན་ལྔ་ཡི་མཆོད་པ་འབུལ༔ སྨན་གཏོར་རཀྟའི་མཆོད་པ་འབུལ༔ ཞལ་ཟས་ཚོགས་ཀྱི་མཆོད་པ་འབུལ༔ ཕྱེ་མར་བཤོས་སྐྱེམས་མཆོད་པ་འབུལ༔ གཡག་ལུག་ར་ཡི་མཆོད་པ་འབུལ༔ ར་ཤ་ཁྲག་དང་ར་གསུར་དང་༔ ར་ལྤགས་རྒྱལ་མཚན་དར་སྣ་ཚོགས༔ ཕྱི་ནང་མཆོད་པའི་བྱེ་བྲག་ཀུན༔ རྡོ་རྗེ་ལེགས་པའི་ཚོགས་ལ་འབུལ༔ སྤྲུལ་འཁོར་ཡང་འཁོར་དང་བཅས་མཆོད༔ ཨརྒྷཾ་པཱདྱཾ༴རཱུ་པ་ཤབྡ་གནྡྷེ་རཱ་ས་སྤཪྴེ་དྷརྨ་མ་ཧཱ་པཉྩ་ཨ་མྲྀ་ཏ་རཀྟ་བ་ལིང་ཏ་ཁཱ་ཧི༔ མ་ཧཱ་མཱཾ་ས་རཀྟ་དྷཱུཥྤེ་པྲ་ཏཱིཙྪ་ཧོཿདེ་ནས་ཕྲིན་ལས་བཅོལ་བ་ནི༔ ཧཱུྃ༔ དུས་གསུམ་རྒྱལ་བའི་དམ་ཚིག་གིས༔ དམ་ཅན་རྡོ་རྗེ་ལེགས་པ་ལ༔ ཕྲིན་ལས་གཉན་པོ་བཅོལ་བ་ནི༔ དཀོན་མཆོག་གསུམ་གྱི་བསྟན་པ་སྲུངས༔ རྣལ་འབྱོར་བདག་གི་སྲུང་མ་མཛོད༔ མངོན་སུམ་ཉམས་སམ་རྨི་ལམ་ན༔ ཞལ་སྟོན་ལེགས་ཉེས་སྨྲ་བ་དང་༔ ཆོས་སྲིད་མངའ་ཐང་སྤེལ་ཞིང་བསྐྱེད༔ ཡིད་ལ་འདོད་པའི་དོན་ཀུན་སྒྲུབས༔ ཕྱི་ནང་གསང་བའི་བར་ཆད་ཟློག༔ དགྲ་བགེགས་མ་ལུས་རྡུལ་དུ་རློག༔ དམ་ཚིག་ཡིན་ནོ་དམ་མ་ཉམས༔ བཀའ་བསྒོ་ཡིན་ནོ་བཀའ་མ་བཅག༔ དེ་ནས་བསྟོད་པ་བྱ་བ་ལ༔ ཧཱུྃ་བསྭོ༔ བན་དང་བོན་གྱི་སྲུང་མ་ཆེ༔ ཆེ་བཙན་གནམ་སའི་ཕྱེད་ཆ་དབང་༔ མྱུར་མགྱོགས་བར་སྣང་གློག་ལས་མྱུར༔ དྲག་རྩལ་ནམ་མཁའི་ཐོག་ལས་ཆེ༔ དམ་ཚིག་ཅན་ལ་བུ་ལྟར་སྐྱོང་༔ དམ་ཉམས་སྲོག་གི་གཤེད་པོ་སྟེ༔ དུར་ཁྲོད་ཡོངས་ཀྱི་བདག་པོ་མཛད༔ གཙུག་ལག་ཆོས་འཁོར་ཡོངས་ལ་དབང་༔ ས་གནས་སྒྲུབ་གྲལ་ཀུན་ཏུ་རྒྱུ༔ དམ་ཅན་རྡོ་རྗེ་ལེགས་པ་སྐྱོང་༔ འཁོར་དང་བཅས་ལ་ཕྱག་འཚལ་བསྟོད༔ དེ་ནས་འཛབ་བསྐུལ་ནི༔ ཧོཿརྡོ་རྗེ་ལེགས་པ་འཁོར་དང་བཅས༔ བསྐུལ་ལོ་སྣང་སྲིད་ཀུན་ནས་བསྐུལ༔ བསྙེན་ནོ་སྒྲུབ་བོ་ད་ཚུར་བྱོན༔ དགྱེས་པའི་ཞལ་དང་འགྲུབ་རྟགས་སྟོན༔ སྐྱེས་བུ་རྡོ་རྗེ་ལེགས་ལ་ཁྱོད༔ མཆེད་འཁོར་སུམ་བརྒྱ་དྲུག་ཅུར་བཅས༔ མི་ཆེན་སྐྱེས་མཆོག་ཆས་ཚུལ་དུ༔ བདག་གི་མདུན་སར་མཆིས་པར་མཛོད༔ ཕྲིན་ལས་རབ་འབྱམས་ཡོངས་འགྲུབ་མཛོད༔ དེ་ནས་འཛབ་དམིགས་ནི༔ རང་ཉིད་ཡི་དམ་དྲག་པོའི་མདུན་དུ་དམ་ཅན་རྡོ་རྗེ་ལེགས་པ་འཁོར་དང་བཅས་པ་གསལ་བའི་ཐུགས་ཀར་འོད་ཀྱི་གོང་བུ་དཀར་དམར་ཕྱེད་སྦྱོར་ཐིག་ལེའི་ཁོང་གསེང་དུ་ཡི་གེ་ཏྲིཿདམར་ནག་ལ་སྔགས་ཀྱི་ཕྲེང་བས་བསྐོར་བར་བསྒོམ༔ ཨོཾ་ཏྲི་བཛྲ་ས་དྷུ་ས་མ་ཡ་ཧཱུྃ་ཛཿཞེས་བཟླ༔ དེ་ནས་འབོད་སྔགས་ལ༔ ཏྲི་བཛྲ་ས་དྷུ་ས་མ་ཡ་ཕེཾ་ཕེཾ་ཛ་ཛཿདེ་ནས་རྦད་སྔགས་ལ༔ ཏྲི་བཛྲ་ས་དྷུ་ས་མ་ཡ་ཆོ་ཆོ་རྒྱུག་རྒྱུག་དགྲ་ལ་རྦད༔ དེ་ནས་བསད་སྔགས་ལ༔ ཏྲི་བཛྲ་ས་དྷུ་ས་མ་ཡ་དགྲ་བོའི་བླ་སོད༔ སྲོག་སོད༔ དབུགས་སོད༔ མཱ་ར་ཡ་ཧུར་ཐུམ་སོད༔ དེ་ལྟར་བསྐྱེད་པའི་གནད་ལྡན་ཞིང་༔ བཟླས་པ་བར་མ་ཆད་པར་བྱ༔ བར་བར་བསྐང་དང་གསོལ་མཆོད་འབད༔ དེ་ཡིས་མངོན་སུམ་བྲན་དུ་ཁོལ༔ དགྲ་བགེགས་མ་ལུས་སྒྲོལ་བར་ནུས༔ བཀྲ་ཤིས་བསོད་ནམས་དཔལ་རྒྱས་འགྱུར༔ བཀའ་འདི་བཙན་བདུད་ཆེན་པོར་བཅོལ༔ ཐུབ་པར་སྲུངས་ཤིང་ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་མི་ལོ་ཉེར་ལྔའི་བར་དུ་བཀའ་རྒྱ་བྱས་མཐར་རང་སློབ་དམ་པ་ཨོ་རྒྱན་རྡོ་རྗེས་བསྐུལ་ངོར་ལྷ་ལུང་ནོར་བུའི་གླིང་དུ་གཏན་ལ་ཕབ་པའོ།།