DJYD-KABUM-25-AA-001

༄༅། །སྤྲུལ་པའི་གཏེར་ཆེན་ཁྲག་འཐུང་བདུད་འཇོམས་གླིང་ པའི་རྣམ་ཐར་གསོལ་འདེབས་མོས་གུས་ཀྱི་ ཤིང་རྟ་ཞེས་བྱ་བ་བཞུགས་སོ། །

（1བ）རྒྱལ་བ་ཀུན་གྱི་སྤྱི་གཟུགས་པདྨ་འབྱུང་། །སྙིགས་མའི་དུས་འདིར་འགྲོ་འདུལ་སྐྱེས་བུའི་ཚུལ། །རིགས་བརྒྱའི་ཁྱབ་བདག་གཏེར་ཆེན་ཆོས་ཀྱི་རྒྱལ། །བདུད་འཇོམས་གླིང་པའི་ཞབས་ལ་གསོལ་བ་འདེབས། །གདོད་ནས་སྤྲོས་མཚན་སྲེད་ལེན་མཚམས་སྦྱོར་ནི། །ཡོངས་སྤངས་ཞི་བའི་བདུད་རྩི་མངོན་བརྙེས་ཀྱང་། །རྣམ་མང་འདུལ་བཞིའི་ཆོ་འཕྲུལ་མཐའ་ཡས་སྤྲིན། །སྒྱུ་འཕྲུལ་གར་བརྒྱས་རོལ་དེར་གསོལ༴ །ཁྱད་པར་རྣམ་འདྲེན་བཞི་པའི་བསྟན་པ་འདིར། །སྟོན་པ་གཉིས་པའི་ཕྲིན་ལས་རྣམ་ཐར་ཅན། །འཕགས་བོད་དགྲ་（2ན）བཅོམ་རིག་འཛིན་པཎ་གྲུབ་སོགས། །སྐྱེས་རབས་ཚར་དུ་དངར་ལ༴ །སྙིགས་མའི་དུས་འདིར་པདྨ་འོད་ཞིང་ནས། སློབ་དཔོན་དུས་གསུམ་མཁྱེན་པའི་རྡོ་རྗེའི་བཀས། །རང་གི་རྒྱལ་ཚབ་མཆོག་ཏུ་མངའ་གསོལ་མཐུས། །བསམ་བཞིན་སྲིད་པ་བཟུང་ལ༴ །གངས་ཅན་མདོ་སྨད་གསེར་ལུང་སྨན་གྱི་ལྗོངས། །འཕགས་པས་བྱིན་བརླབས་ངོ་མཚར་གནས་ཀྱི་ཆར། །མཁས་གྲུབ་དུ་མའི་འབྱུང་གནས་གནུབས་ཀྱི་གདུང་། །རྣམ་དག་རིགས་སུ་དགོངས་ལ༴ །དཔའ་བོ་མཁའ་འགྲོས་སྐྱེལ་མ་བསྙེན་བཀུར་བཅས། །མཚན་ལྡན་བསྐྱེད་ཡུམ་（2བ）ལྷུམས་སུ་ཉེར་ཞུགས་ཚེ། །ངོ་མཚར་དགེ་མཚན་དུ་མས་ཡབ་ཡུམ་གྱི། །ལུས་སེམས་བྱིན་གྱིས་བརླབས་ལ༴ ། ལུག་ལོ་ཆོ་འཕྲུལ་ཟླ་བའི་ཚེས་བཅུའི་ནུབ། །མཛེས་སྐུའི་མཚན་དཔེའི་པདྨོ་བཞད་པ་ན། །འཇའ་འོད་གུར་ཁྱིམ་མེ་ཏོག་སྦྲང་ཆར་སོགས། །ལྟས་བཟང་དཔག་མེད་སྣང་ལ༴ །དེ་ཚེ་མཆོག་གཟིགས་རྣམ་འདྲེན་དུ་མ་ཡིས། །འགྲན་བྲལ་སྤྲུལ་པའི་སྐུ་རུ་ཡོངས་བསྔགས་ཤིང་། །གཞན་དོན་བསམ་ཡས་འགྲུབ་པའི་སྐྱེས་བུ་རུ། །བསླུ་མེད་ལུང་བསྟན་ཐོབ་ལ༴ །།བགྲང་བྱ་གསུམ་བར་མཁའ་འགྲོ་ཆོས་སྐྱོང་ཚོགས། །གླུ་གར་དང་བཅས་མེལ་ཚེར་འགྲོགས་པ་དང་། །རེས་འགར་དམ་སྲིས་གླགས་འཚོལ་གཡུལ་འགྱེད་སོགས། །ཉམས་སྣང་སྣ་ཚོགས་གཟིགས་ལ༴ །སྐབས་ཤིག་བྱང་ཕྱོགས་བཻཌཱུར་སྣང་ཞིང་ཕྱིན། །བཅོམ་ལྡན་གདོན་མི་ཟ་བའི་རྒྱལ་པོ་ཡིས། །རྒྱལ་ཚབ་ཉིད་དུ་དབུགས་དབྱུང་གཟེངས་བསྟོད་མཐུས། །སྔོན་གནས་རྗེས་སུ་དྲན་ལ༴ །མཁའ་སྤྱོད་ཞིང་དུ་དབྱིངས་ཡུལ་རྣལ་འབྱོར་མས། །འབུམ་ཕྲག་ཌཱ་ཀིའི་སྲོག་སྙིང་ཡིག་འབྲུའི་ཚུལ། །སྤྲོས་བསྟིམས་བྱིན་རླབས་འཕོ་བའི་དབང་ཆེན་ཐོབ། །འགལ་རྐྱེན་གཡུལ་ལས་རྒྱལ་ལ༴ །（3ན）གཞོན་ནུ་ཉིད་ནས་སྐྱེས་ཐོབ་རྩལ་རྫོགས་པས། །ཕལ་པའི་ཚུལ་འདས་དམ་པའི་རིགས་མཆོག་སད། །མངོན་པར་ཤེས་དང་རྫུ་འཕྲུལ་དཔག་མེད་པས། །གཟུར་གནས་དད་པ་སྐྱེད་ལ༴ །བགྲང་བྱ་དགུ་པར་ཡེ་ཤེས་ཌཱ་ཀི་ནཱིས། །བདེ་སྐྱོང་བདུད་རྩིའི་སྐྱེས་བཅས་ལུང་བསྟན་བཞིན། །བཤེས་གཉེན་མཆོག་བསྟེན་ཐོས་བསམ་ཡོན་ཏན་སྒོ། །བརྒྱ་ཕྲག་གཅིག་ཅར་ཕྱེས་ལ༴ །བརྩེ་ཆེན་ལྷ་གཅིག་དཀར་མཛེས་གཞོན་ནུའི་ཚུལ། །གྲོགས་ཀྱི་རྣམ་པས་འབྲལ་མེད་ལེགས་བསྐྱངས་ཤིང་། །སྨྲ་བའི་སེང་གེས་དངོས་སུ་རྗེས་བཟུང་བས། །ཤེས་རབ་རྩལ་ཁ་འབར་ལ༴ །རིགས་གསུམ་སེམས་དཔའ་རྒྱལ་ཡུམ་ཏཱ་རེ་མ། །མདའ་བསྣུན་ཞབས་དང་གྲུབ་པའི་རིག་འཛིན་བརྒྱད། །ཀློང་ཆེན་སོགས་ཀྱི་ཡེ་ཤེས་སྒྱུ་མའི་སྐུས། །རྗེས་བཟུང་བྱིན་རླབས་ཐོབ་ལ༴ །ཁྱད་པར་རྔ་ཡབ་དཔལ་རིར་མངོན་གཤེགས་ནས། །ཞག་གཅིག་བགྲང་བྱ་བཅུ་གཉིས་ཡུན་བསྒྱུར་ཏེ། །གུ་རུ་རྗེ་ལས་སྨིན་གྲོལ་བདུད་རྩི་ནོས། །གདུང་འཚོབ་དམ་པར་གྱུར་ལ༴ །ཆེས་ཕྲའི་གོ་སར་གྲངས་མེད་ཞིང་དང་སྐུའི། །རྣམ་ཐར་བཀོད་པ་བསམ་མི་ཁྱབ་པ་གཟིགས། །དེ་སྙེད་རྣམས་（3བ）སུ་རྣམ་འཕྲུལ་མཐའ་ཡས་པས། །ཆོས་སྒོ་དཔག་ཡས་གསན་ལ༴ །མདོར་ན་ཚེ་འདིའི་སྦྱངས་པར་ལྟོས་མིན་པར། །སྔོན་ནས་གོམས་པའི་ལས་ཀྱི་འཕྲོ་སད་དེ། །མཁས་དང་གྲུབ་པར་གྲགས་ཀུན་ཟིལ་གནོན་པའི། །མཁྱེན་རྟོགས་ཕུལ་དུ་བྱུང་ལ༴ །མཚོ་རྒྱལ་ལ་སོགས་ཌཱ་ཀིའི་ཚོགས་རྣམས་ཀྱིས། །བུ་བཞིན་རྗེས་བསྐྱངས་ལྐོག་གྱུར་ལུང་དུ་བསྙད། །དམ་ཅན་གཏེར་སྲུང་ལུས་དང་གྲིབ་མའི་ཚུལ། །ཅི་བགྱིའི་ཕོ་ཉར་བཏུད་ལ༴ །འཛག་བདེ་དམན་པའི་རོ་ལ་མི་ཞེན་པར། །འཛག་མེད་ཚངས་སྤྱོད་མཆོག་ལ་རབ་གནས་ཏེ། །ཆགས་པའི་ལམ་གྱིས་ཆགས་སོགས་ཉེས་ཀུན་སྤོང་། །དོན་གྱི་དགེ་སྦྱོང་གང་དེར༴ །བསྐལ་པར་གོམས་པའི་སྙིང་སྟོབས་ཆེས་བརྟན་པ། །ཤུགས་དྲག་བྱམས་དང་སྙིང་རྗེས་རབ་བསྐྱོད་དེ། །འབྲེལ་ཚད་དོན་ལྡན་རྒྱལ་སྲས་བརྟུལ་ཞུགས་སྤྱོད། །འགྲོ་འདུལ་སེམས་དཔའ་ཆེན་པོས༴ །ཐབས་ཆེན་གསང་བ་མཆོག་གི་མྱུར་ལམ་གྱི། །རིམ་པ་དང་པོའི་མངོན་རྟོགས་མཐར་སོན་པས། །སྣང་གྲགས་དག་པ་ཡེ་ཤེས་འཁོར་ལོར་གཟིགས། །རྣལ་འབྱོར་དབང་ཕྱུག་མཆོག་ལ༴ །འབར་བ་གསུམ་གྱི་ཡེ་ཤེས་མངོན་གྱུར་ཅིང་། །རྣམ་གསུམ་ཕོ་ཉའི་འདུ་བ་སྤྲིན་（4）ལྟར་འདུས། །ལས་བཞི་གྲུབ་པ་བརྒྱད་ལ་དབང་འབྱོར་བས། །ཕྲིན་ལས་འདོད་རྒུར་སྒྱུར་ལ༴ །རོ་རྐྱང་ཉི་ཟླའི་བགྲོད་པ་དྷཱུ་ཏིའི་དབྱིངས། །ངོ་མཚར་བཙན་ཐབས་སྦྱོར་བས་ཡོངས་བཅིངས་ནས། །མ་དག་ལས་རླུང་ཟག་པའི་གྲོང་ཁྱེར་གྱི། །འཁྲུལ་འཁོར་བཅོམ་པར་མཛད་ལ༴ །མཆོག་གི་ཙཎྜ་ལཱི་ཡི་གཟི་བརྗིད་སྟོབས། །འགྱུར་མེད་བཅུ་དྲུག་དགའ་བའི་རོས་མྱོས་ཏེ། །སྣང་སྲིད་ཟིལ་གནོན་བརྟུལ་ཞུགས་གར་བརྒྱ་ཡིས། །སྐལ་ལྡན་བདེ་ཆེན་སྐྱེད་ལ༴ །ཁྱད་པར་གསང་བ་ལས་ཀྱང་ཆེས་གསང་བ། །གསང་ཆེན་རྡོ་རྗེ་རྩེ་མོའི་ལྟ་བའི་གསང་། །མ་བཅོས་ཀ་དག་རིག་སྟོང་རྗེན་པའི་གཤིས། །ཀུན་བཟང་དགོངས་པ་བརྙེས་དེར༴ །ཆོས་ཉིད་བྱ་རྩོལ་བྲལ་བའི་རང་བབས་སུ། །བློ་འདས་གཉུག་མ་ཟང་ཐལ་རྒྱ་ཡན་ཀློང་། །ནམ་མཁའི་རྣལ་འབྱོར་སྒོམ་མེད་ཡེངས་མེད་ངང་། །རྟོགས་གྲོལ་དུས་མཉམ་གྱུར་ལ༴ །ནང་གསལ་ལྷུན་གྲུབ་རིག་རྩལ་དག་པའི་མདངས། །ལམ་སྣང་གཟུགས་སྐུར་ཤར་བའི་ངོ་མཚར་ཆོས། །འོད་གསལ་ཐོད་རྒལ་ཡོན་ཏན་ཚད་ཕེབས་སར། །མིག་འཕྲུལ་བཞིན་དུ་གཤེགས་ལ༴ །ཤེས་རབ་བདེ་སྟེར་དབྱིངས་ཕྱུག་ག་ག་（4བ）ངྷུས། །ཨ་ཏིའི་གནད་བཀྲོལ་མཁའ་འགྲོའི་གསང་མཛོད་གཏད། །དོན་མཆོག་རྒྱ་ཆེའི་ཕྱིར་དུ་ཟབ་གཏེར་གྱི། །སྒོ་འཕར་དབྱེ་བར་བསྐུལ་ལ༴ །ཡེ་ཤེས་གཟིགས་པས་དག་སྣང་འབྱམས་སུ་ཀླས། །འཛད་མེད་ཐུགས་གཏེར་དགོངས་པའི་ཀློང་ནས་བརྡོལ། །མཁའ་འགྲོས་གཏད་རྒྱ་ས་ཡི་ཟབ་གཏེར་ཕྱུང་། །གཏེར་འབྱིན་འཁོར་ལོས་སྒྱུར་ལ༴ །བླ་རྫོགས་ཐུགས་གསུམ་བསྐྱེད་རྫོགས་རྫོགས་པ་ཆེ། །རྩ་བ་ཡན་ལག་ཕྲིན་ལས་ཁ་ཚར་བཅས། །ངོ་མཚར་ཆོས་གཏེར་ནོར་བུའི་བང་མཛོད་ཀྱིས། །སྐལ་བཟང་དགའ་སྟོན་སྤེལ་ལ༴ །རྩོལ་བཅས་ཐེག་པས་གདུལ་དཀའ་ཕྱི་དུས་འདིར། །རྡོ་རྗེ་ལུང་གིས་བསྔགས་པའི་བདེན་དོན་བཞིན། །ངེས་གསང་སྙིང་པོ་ཨ་ཏི་རྫོགས་པ་ཆེའི། བསྟན་པའི་སྒྲོན་མེ་སྦར་ལ༴ །སྒེག་པའི་སྐུ་མཆོག་གོས་དཀར་ལྕང་ལོས་བརྗིད། །དོ་ཧའི་གད་རྒྱང་དཔལ་གྱི་མགུར་ནས་ལེན། །དགོངས་པའི་དྲོད་ཀྱིས་ལས་ཅན་ཤེས་རྒྱུད་དགྲོལ། །བླ་མེད་ཧེ་རུ་ཀ་ལ༴ །ཆོས་ཀུན་བདེན་མེད་སྒྱུ་མ་ལྟར་རྟོགས་ཤིང་། །ཟང་ཐལ་རིག་པའི་དེ་ཉིད་གཟིགས་པའི་མཐུས། །ཐོག་རེག་དངོས་པོ་ཀུན་ལས་ཐལ་བྱུང་བགྲོད། །རྫུ་འཕྲུལ་（5ན）མཐུ་ལྡན་ཁྱོད་ལ༴ །སྙིགས་དུས་བསྟན་དང་འགྲོ་ལ་རབ་འཚེ་བའི། །མི་དང་མི་མིན་འདྲེ་རྒོད་འབྱུང་པོའི་དཔུང་། །དྲག་ཤུལ་ནུས་སྟོབས་འབར་བས་ཚར་བཅད་ནས། །ཕྱོགས་ལས་རྣམ་རྒྱལ་སྤྱོད་ལ༴ །དབང་བསྐུར་སྒྲུབ་མཆོད་ཚོགས་འཁོར་སོགས་ཀྱི་སྐབས། །འཇའ་འོད་མེ་ཏོག་ཆར་འབེབས་དྲི་བཟང་འཐུལ། །མཁའ་འགྲོའི་བརྡ་གླུ་དང་བཅས་སྐལ་ལྡན་རྣམས། །ཡེ་ཤེས་སད་པར་མཛད་ལ༴ །མཐོང་ཐོས་དྲན་དང་ཆ་ཤས་རེག་པ་ཡང་། །གཏན་གྱི་བདེ་བར་དབུགས་འབྱིན་ངེས་པར་སྩལ། །ཆེ་བའི་ཡོན་ཏན་སྙན་པའི་གྲགས་པ་ཡིས། །ནོར་འཛིན་ཁྱོན་ཀུན་ཁྱབ་ལ༴ །ཡེ་ཤེས་ཌཱ་ཀི་ལྔ་དང་སྦས་ཚུལ་གྱི། །དམ་ཚིག་མཁའ་འགྲོ་མཁའ་མདའི་གྲངས་སོགས་ཀུན། །ཆགས་ཆེན་ལམ་ལས་འབྲེལ་གྱུར་ཧེ་རུ་ཀའི། །སྐལ་བ་མཉམ་པར་སྦྱོར་ལ༴ །བྱང་སེམས་རིགས་ཀྱི་གདུང་འཛིན་ཉེ་སྲས་བརྒྱད། །འོད་ལུས་གྲུབ་པ་མཆོག་གི་བུ་བཅུ་གསུམ། །རིག་འཛིན་ས་བརྙེས་བཅུ་ཕྲག་བརྒྱ་ལ་སོགས། །གྲུབ་པའི་རྒྱལ་རབས་བསྐྲུན་ལ༴ །ཐུགས་བསྐྱེད་སྟོབས་སྨིན་གདུལ་བྱ་དུས་བབས་མཐུས། །མངའ་（5བ）རིས་དབུས་གཙང་ལྷོ་མོན་སྦས་པའི་ཡུལ། །སྤུ་བོ་དྭགས་ཀོང་མདོ་ཁམས་རྒྱ་བལ་ཚུན། །ཟབ་གཏེར་ཕྲིན་ལས་བརྡལ་ལ༴ །གང་ཚེ་དངོས་ཀྱི་མཛད་པ་མཐར་ཕྱིན་ཅིང་། །དོན་ཆེན་གཞན་ལ་ཉེ་བར་དགོངས་ནས་སུ། །སྒྲ་འོད་ལ་སོགས་ངོ་མཚར་ལྟས་དང་བཅས། །རྔ་ཡབ་དཔལ་རིར་གཤེགས་ལ༴ །པདྨ་བཀོད་མཛེས་ལ་སོགས་ཞིང་རྣམས་སུ། །པདྨའི་ཕྲིན་ལས་ཕྱོགས་བརྒྱར་སྤེལ་བའི་ཕྱིར། །པདྨའི་རིགས་ཀྱི་མྱུ་གུ་ཆུ་ཟླའི་གར། །བསམ་མི་ཁྱབ་པར་སྟོན་ལ༴ །མགོན་ཁྱོད་རྣམ་ཐར་ཡོན་ཏན་རྒྱ་མཚོའི་ཚུལ། །གུས་པས་དྲན་ཏེ་གདུང་བས་གསོལ་འདེབས་ན། །ཐུགས་རྗེ་རྒྱུན་ཆད་མེད་པའི་བཀའ་དྲིན་གྱིས། །ནམ་ཡང་འབྲལ་མེད་རྗེས་སུ་བཟུང་མཛད་གསོལ། །བརྒྱུད་འཛིན་སྙིང་ནས་མོས་པའི་བུ་རྣམས་ལ། །བརྩེ་བའི་ཞལ་སྟོན་དགྱེས་པའི་ལུང་མཆོག་སྩོལ། །རྡོ་རྗེའི་ཡེ་ཤེས་ཆེན་པོའི་དབང་སྐུར་ལ། །ཉིད་དང་དབྱེ་བ་མེད་པར་བྱིན་གྱིས་རློབས། །གསང་བའི་ལམ་ལས་གདོད་མའི་རྒྱལ་ས་སྙོགས། །ཟབ་མོའི་རིང་ལུགས་འཛམ་གླིང་ཀུན་ཏུ་སྤེལ། །མི་ཟད་རྒྱན་གྱི་འཁོར་ལོའི་རྣམ་ཐར་སྤྲིན། །（6ན）ཆོས་དབྱིངས་ཀུན་ཁྱབ་ཁྱོད་དང་མཚུངས་པར་ཤོག །（ཅེས་པའང་མོས་གུས་ཀྱི་ནོར་དང་ལྡན་པའི་དོན་གཉེར་ཅན་དུ་མས་བསྐུལ་བ་ལས། འཇིགས་བྲལ་ཡེ་ཤེས་རྡོ་རྗེས་བརྗོད་བདེའི་ངག་གིས་རྗེས་སུ་འདོམས་པ་བཞིན་བློ་གསལ་ཕྲིན་ལས་འགྱུར་མེད་ཀྱིས་ཡི་གེའི་ལམ་དུ་སྤེལ་བར་བྱས་པ་སིངྔྷི་རསྟུ།། །།）