TTDL-ZABTER-15-BA-055

Previous Text Back to Volume Page Next Text

Wylie title
Location	bdud 'joms gling pa zab gter Volume 15, Text 55, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. '*. In Sprul pa'i gter chen bdud 'joms gling pa'i zab gter gsang ba'i chos sde, Vol. 15: . Thimphu, Bhutan: Lama Kuenzang Wangdue, 2004.*
Side notes	Verso: bdud 'joms
More details More details
Tertön	བདུད་འཇོམས་གླིང་པ་ (bdud 'joms gling pa)
Genre
Cycle	དག་སྣང་ཡེ་ཤེས་དྲྭ་བ་ (dag snang ye shes drwa ba)

[edit]

དག་སྣང་ཡེ་ཤེས་སྒྱུ་འཕྲུལ་ལས༔ དམ་སྐོང་ངན་སོང་དོང་སྤྲུགས་བཞུགས་སོ༔ བརྡ་ཡིག༠༠༠༠༢༤༢ན་མོ་གུ་རུ་པདྨ་ཀ་ར་ཡེ༔ དམ་སྐོང་ངན་སོང་དོང་སྤྲུགས་ལ༔ རང་ཅག་གི་མདུན་གྱི་ནམ་མཁར་ཡེ་ཤེས་དབྱིངས་ཀྱི་དཀྱིལ་འཁོར་ཡོངས་སུ་རྫོགས་པ་བསྒོམ་པའི་མདུན་དུ་ཕྱག་འཚལ་ཞིང་ཉེས་ལྟུང་ལ་འགྱོད་ཚངས་དྲག་པོའི་སྒོ་ནས་བཤགས་པར་བྱའོ༔ མདུན་གྱི་ནམ་མཁར་རང་སྣང་ལྷུན་གྲུབ་འོག་མིན་བདེ་བ་ཆེན་པོའི་གནས་མཆོག༔ ཡེ་ཤེས་ལྔ་ཡི་གཞལ་ཡས་ཁང་རིམ་པ་གཉིས་ཀྱི་འོག་མར་སྤྱི་དཔལ་ཆེན་པོ་གཙོ་བོར་བཞུགས་པའི་ཁྲག་འཐུང་ཁྲོ་བོའི་དཀྱིལ་འཁོར༔ སྟེང་མར་ཀུན་བཟང་ཡབ་ཡུམ་གཙོ་བོར་གྱུར་པའི་ཞི་བ་དང་རིག་འཛིན་བླ་མའི་དཀྱིལ་འཁོར་ཡོངས་སུ་རྫོགས་པར་གསལ་བའི་གནས་གསུམ་ལས་འོད་ཟེར་རབ་ཏུ་འཕྲོས་པས་ཕྱོགས་བཅུའི་རྒྱལ་བ་སྲས་དང་བཅས་པ་སྤྱན་དྲངས་ལ་གཉིས་སུ་མེད་པར་ཐིམ་པར་གྱུར༔ ཨོཾ་སརྦ་ཏ་ཐཱ་ག་ཏ་བཛྲ་ས་མ་ཡ་ཛ་ཛ་ཏིཥྛ་ལྷན༔ བདག་གིས་སྒོ་གསུམ་གུས་པ་ཆེན་པོའི་སྒོ་ནས་དམ་ཚིག་ཉམས་ཆག་སྡིག་ལྟུང་བཤགས་པའི་ཆེད་དུ་དཀྱིལ་འཁོར་ལྷ་ཚོགས་རྣམས་ཀྱི་མཚན་བརྗོད་དེ་ཕྱག་འཚལ་ཞིང་ཡིད་ལ་དྲན་པར་བྱའོ༔ ཁྱེད་རྣམས་ཀྱིས་བདག་སོགས་བག་མེད་པའི་དབང་དུ་གྱུར་ཞིང་ཉམས་ཆགས་གིས་གོས་པའི་སོ་སྐྱེས་རྣམས་ལ་ཞལ་གྱིས་ཕྱོགས༔ སྤྱན་གྱིས་གཟིགས༔ ཐུགས་བརྩེ་ཐུགས་རྗེ་དང་ལྡན་པའི་ངང་ནས་དགོངས་སུ་གསོལ༔ བཅོམ་ལྡན་འདས་ཀུན་བཟང་འོད་མི་འགྱུར་བ་ལ་ཕྱག་འཚལ་ལོཿབཅོམ་ལྡན་འདས་རྣམ་པར་སྣང་མཛད་ལ་ཕྱག་འཚལ་ལོཿབཅོམ་ལྡན་འདས་རྡོ་རྗེ་མི་བསྐྱོད་པ་ལ་ཕྱག་འཚལ་ལོ༔ བཅོམ་ལྡན་འདས་རིན་ཆེན་འབྱུང་ལྡན་ལ་ཕྱག་འཚལ་ལོ༔ བཅོམ་ལྡན་འདས་སྣང་བ་མཐའ་ཡས་ལ་ཕྱག་འཚལ་ལོ༔ བཅོམ་ལྡན་འདས་དོན་ཡོད་གྲུབ་པ་ལ་ཕྱག་འཚལ་ལོ༔ བདག་གི་སྒོ་གསུམ་བག་མེད་པའི་དབང་གིས་དམ་ཚིག་ཉམས་ཆགས་འགལ་འཁྲུལ་དུ་གྱུར་པ་ཐམས་ཅད་མཐོལ་ལོ་བཤགས་སོ་མི་འཆབ་བོ་མི་སྦེད་དོ་གནོང་ངོ་འགྱོད་དོ༔ སླན་ཆད་ཀྱང་བསྡམ་པར་བགྱིའོ༔ དག་ཅིང་སོར་ཆུད་ནས་ཚངས་པ་མཆོག་གི་དངོས་གྲུབ་ད་ལྟ་ཉིད་དུ་སྩལ་དུ་གསོལ༔ ཨོཾ་བཛྲ་སཏྭ་ཧཱུྃ༔ བཛྲ་ས་མ་ཡ་ཤུདྡེ་ཨ༔ བཅོམ་ལྡན་འདས་ཀུན་ཏུ་བཟང་མོ་ལ་ཕྱག་འཚལ་ལོ༔ སངས་རྒྱས་རིགས་ཀྱི་ཡུམ་ནམ་མཁའི་དབྱིངས་ཕྱུག་མ་ལ་ཕྱག་འཚལ་ལོ༔ རྡོ་རྗེ་རིགས་ཀྱི་ཡུམ་མ་མཱ་ཀི་ལ་ཕྱག་འཚལ་ལོ༔ རིན་ཆེན་རིགས་ཀྱི་ཡུམ་སངས་རྒྱས་སྤྱན་མ་ལ༴པདྨ་རིགས་ཀྱི་ཡུམ་གོས་དཀར་མོ་ལ༴ལས་ཀྱི་རིགས་ཀྱི་ཡུམ་དམ་ཚིག་སྒྲོལ་མ་ལ༴བདག་གི་ཚེ་རབས་འཁོར་བ་ཐོག་མ་མེད་པ་ནས་བསགས་པའི་དམ་ཚིག་ཉམས་ཆག་ཉེས་ལྟུང་དྲི་མའི་ཚོགས་ཐམས་ཅད་མཐོལ་ལོ་བཤགས་སོ་མི་འཆབ་བོ་མི་སྦེད་དོ༔ གནོང་ངོ་འགྱོད་དོ་སླན་ཆད་ཀྱང་བསྡམ་པར་བགྱིད་ལགས་སོ༔ ཨོཾ་བཛྲ་སཏྭ་ཧཱུྃ༔ བཛྲ་ས་མ་ཡ་ཤུདྡྷེ་ཨ༔ བྱང་ཆུབ་སེམས་དཔའ་ས་ཡི་སྙིང་པོ་ལ་ཕྱག་འཚལ་ལོ༔ བྱང་ཆུབ་སེམས་དཔའ་བྱམས་པ་ལ་ཕྱག་འཚལ་ལོ༔ བྱང་ཆུབ་སེམས་དཔའ་ཀུན་ཏུ་བཟང་པོ་ལ༴བྱང་ཆུབ་སེམས་དཔའ་ནམ་མཁའི་སྙིང་པོ་ལ༴བྱང་ཆུབ་སེམས་དཔའ་སྤྱན་རས་གཟིགས་ལ༴བྱང་ཆུབ་སེམས་དཔའ་འཇམ་དཔལ་གཞོན་ནུ་ལ༴བྱང་ཆུབ་སེམས་དཔའ་སྒྲིབ་པ་རྣམས་སེལ་ལ༔ བྱང་ཆུབ་སེམས་དཔའ་ཕྱག་ན་རྡོ་རྗེ་ལ༴བདག་གིས་ཚེ་རབས་འཁོར་བ་ཐོག་མ་མེད་པ་ནས་བསགས་པའི་དམ་ཚིག་ཆག་ཉམས་འགལ་འཁྲུལ་ཉེས་ལྟུང་ཐམས་ཅད་མཐོལ་ཞིང་བཤགས་སོ་བྱང་ཞིང་དག་པར་མཛད་དུ་གསོལ༔ ཨོཾ་བཛྲ་ས་ཏྭ་ཧཱུྃ༔ བཛྲ་ས་མ་ཡ་ཤུདྡྷེ་ཨ༔ སེམས་མ་ཆེན་མོ་ལཱ་སྱེ་མ་ལ་ཕྱག་འཚལ་ལོ༔ སེམས་མ་ཆེན་མོ་པུཥྤེ་མ་ལ༴སེམས་མ་ཆེན་མོ་མཱ་ལེ་མ་ལ༴སེམས་ཆེན་མོ་དྷུ་པེ་མ་ལ༴སེམས་མ་ཆེན་མོ་གཱི་རྟི་མ་ལ༴སེམས་མ་ཆེན་མོ་ཨཱ་ལོ་ཀེ་ལ༴སེམས་མ་ཆེན་མོ་གནྡྷེ་མ་ལ༴སེམས་མ་ཆེན་མོ་ནིརྟི་མ་ལ་ཕྱག་འཚལ་ལོ༔ བདག་གིས་ཚེ་རབས་འཁོར་བ་ཐོག་མ་མེད་པ་ནས་ད་ལྟའི་བར་དུ་དམ་ཚིག་ཉམས་ཆག་འགལ་འཁྲུལ་ཉེས་ལྟུང་མདོར་ན་སྡིག་པ་མ་དགེ་བའི་ལས་ཅི་བསགས་པ་ཐམས་ཅད་མཐོལ་ཞིང་བཤགས་སོ༔ གནོང་ངོ་འགྱོད་དོ༔ མི་འཆབ་བོ༔ མི་སྦེད་དོ༔ སླན་ཆད་ཀྱང་བསྡམ་པར་བགྱིའོ༔ ཨོཾ་བཛྲ་སཏྭ་ཧཱུྃ༔ སཛྲ་ས་མ་ཡ་ཤུདྡྷེ་ཨ༔ བཅོམ་ལྡན་འདས་དབང་པོ་བརྒྱ་བྱིན་ལ་ཕྱག་འཚལ་ལོ༔ བཅོམ་ལྡན་འདས་ཐག་བཟང་རིས་ལ༴བཅོམ་ལྡན་འདས་ཤཱཀྱ་ཐུབ་པ་ལ༴བཅོམ་ལྡན་འདས་སེང་གེ་རབ་བརྟན་ལ༴བཅོམ་ལྡན་འདས་ཁ་འབར་དྷེ་ཝ་ལ༴བཅོམ་ལྡན་འདས་ཆོས་ཀྱི་རྒྱལ་པོ་ལ་ཕྱག་འཚལ་ལོ༔ བདག་ཅག་གིས་ཚེ་རབས་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་བག་ཆགས་ལས་ཉོན་དམ་ཚིག་ཉམས་ཆག་འགལ་འཁྲུལ་ཉེས་ལྟུང་ཐམས་ཅད་མཐོལ་ཞིང་བཤགས་སོ༔ མི་འཆབ་བོ༔ མི་སྦེད་དོ༔ གནོང་ངོ་འགྱོད་དོ༔ སླན་ཆད་ཀྱང་བསྡམ་པར་བགྱིད་ལགས་སོ༔ ཨོཾ་བཛྲ་སཏྭ་ཧཱུྃ༔ བཛྲ་ས་མ་ཡ་ཤུདྡྷེ་ཨ༔ སྒོ་བ་རྣམ་པར་རྒྱལ་ལ་ཕྱག་འཚལ་ལོ༔ སྒོ་བ་གཤིན་རྗེའི་གཤེད་པོ་ལ༴སྒོ་བ་རྟ་མགྲིན་རྒྱལ་པོ་ལ༴སྒོ་བ་བདུད་རྩི་འཁྱིལ་བ་ལ༴བདག་ཅག་གིས་ཚེ་རབས་འཁོར་བ་ཐོག་མ་མེད་པ་ནས་ད་ལྟ་ལ་ཐུག་གི་རབ་དུ་སྒོ་གསུམ་གྱི་སྡིག་པ་མི་དགེ་བའི་ལས་ཉོན་བག་ཆགས་དམ་ཚིག་ཆག་ཉམས་འགལ་འཁྲུལ་ཉེས་ལྟུང་ཐམས་ཅད་མཐོལ་ཞིང་བཤགས་སོ༔ མི་འཆབ་བོ༔ མི་སྦེད་དོ༔ གནོང་ངོ་འགྱོད་དོ༔ སླད་ཆད་ཀྱང་བསྡམ་པར་བགྱིད་ལགས་སོ༔ ཨོཾ་བཛྲ་སཏྭ་ཧཱུྃ༔ བཛྲ་མ་ཡ་ཤུདྡྷེ་ཨ༔ སྒོ་མ་ཆེན་མོ་ལྕགས་ཀྱུ་མ་ལ༴སྒོ་མ་ཆེན་མོ་ཞགས་པ་མ་ལ༴སྒོ་མ་ཆེན་མོ་ལྕགས་སྒྲོག་མ་ལ༴སྒོ་མ་ཆེན་མོ་དྲིལ་བུ་མ་ལ་ཕྱག་འཚལ་ལོ༔ ༴བདག་གིས་ཚེ་རབས་འཁོར་བ་ཐོག་མ་མེད་པ་ནས་ལུས་ངག་ཡིད་གསུམ་གྱི་སྒོ་ནས་ཉོན་མོངས་པ་དུག་ལྔ་དུག་གསུམ་ཀུན་རྟོག་བརྒྱད་ཁྲི་བཞི་སྟོང་གི་སྒོ་ནས་བསགས་པའི་སྡིག་པ་མི་དགེ་བའི་ལས་དང་བག་ཆགས་དམ་ཚིགས་ཉམས་ཆག་འགལ་འཁྲུལ་ཉེས་ལྟུང་ཐམས་ཅད་མཐོལ་ལོ་བཤགས་སོ༔ མི་འཆབ་བོ༔ མི་སྦེད་དོ༔ གནོང་ངོ་༔ འགྱོད་དོ༔ སླན་ཆད་ཀྱང་གཅོད་ཅིང་བསྡམས་པར་བགྱིད་ལགས་སོ༔ དག་ཅིང་ཚངས་པ་མཆོག་གི་དངོས་གྲུབ་ད་ལྟ་ཉིད་དུ་སྩལ་དུ་གསོལ༔ ཨོཾ་བཛྲ་སཏྭ་ཧཱུྃ༔ བཛྲ་ས་མ་ཡ་ཤུདྡྷེ་ཨ༔ ཨ་ལ་ལ་ཧོ༔ འཇམ་དཔལ་སྐུ་ཡི་དཀྱིལ་འཁོར་ལ་ཕྱག་འཚལ་ལོ༔ པདྨ་གསུང་གི་དཀྱིལ་འཁོར་ལ༴ཡང་དག་ཐུགས་དཀྱིལ་འཁོར་ལ༴ཆེ་མཆོག་ཡོན་ཏན་གྱི་དཀྱིལ་འཁོར་ལ༴ཕུར་པ་ཕྲིན་ལས་ཀྱི་དཀྱིལ་འཁོར་ལ༴རིག་འཛིན་སློབ་དཔོན་གྱི་དཀྱིལ་འཁོར་ལ༴མ་མོ་རྦོད་གཏོང་གི་དཀྱིལ་འཁོར་ལ༴འཇིག་རྟེན་མཆོད་བསྟོད་ཀྱི་དཀྱིལ་འཁོར་ལ༴དམོད་པ་དྲག་སྔགས་ཀྱི་དཀྱིལ་འཁོར་ལ༴གསང་སྔགས་རྒྱུད་སྡེ་བཞི་དྲུག་གི་དཀྱིལ་འཁོར་ལྷ་ཚོགས་མ་ལུས་ཤིང་ལུས་པ་མེད་པ་ཐམས་ཅད་ལ་ཕྱག་འཚལ་ལོ༔ སྐྱབས་སུ་མཆིའོ་༔ མཆོད་པ་འབུལ་ལོ༔ གསོལ་བ་འདེབས་སོ༔ བྱིན་གྱིས་བརླབ་ཏུ་གསོལ༔ བདག་གིས་ཚེ་རབས་འཁོར་བ་ཐོག་མ་མེད་པ་ནས་ད་ལྟའི་བར་དུ་སྒོ་གསུམ་མ་རིག་གཟུང་འཛིན་གྱི་དབང་དུ་གྱུར་ཏེ་ཐར་པ་དང་ཐམས་ཅད་མཁྱེན་པའི་ལམ་ལ་རྒྱབ་ཀྱིས་ཕྱོགས་ཤིང་རིང་དུ་གྱུར་པའི་ལས་ཉོན་སྡིག་སྒྲིབ་བག་ཆགས་སྡོམ་དང་བསླབ་པ་དམ་ཚིག་འགལ་འདས་ནོར་འཁྲུལ་དུ་གྱུར་པ་ཐམས་ཅད་མཐོལ་ལོ་བཤགས་སོ༔ མི་འཆབ་བོ༔ མི་སྦེད་དོ༔ གནོང་ངོ་༔ འགྱོད་དོ༔ སླན་ཆད་ཀྱང་གཅོད་ཅིང་སྡོམ་པར་བགྱིད་ལགས་སོ༔ བྱང་ཞིང་དག་ནས་ཚེ་འདི་ཉིད་ལ་འཕོ་མེད་ཕྱག་རྒྱ་ཆེན་པོ་མཆོག་གི་དངོས་གྲུབ་དམ་པ་ཐོབ་པར་གྱུར་ཅིག༔ ཨོཾ་བཛྲ་སཏྭ་ཧཱུྃ༔ བཛྲ་ས་མ་ཡ་ཤུདྡྷེ་ཨ༔ ཨ་ལ་ལ་ཧོ༔ བཅོམ་ལྡན་འདས་ཁྱབ་བདག་སྤྱི་དཔལ་ཆེན་པོ་ཆེ་མཆོག་ཧེ་རུ་ཀ་ལ་ཕྱག་འཚལ་ལོ༔ བུདྡྷ་ཧེ་རུ་ཀ་ལ་འཚལ་ལོ༔ བཛྲ་ཧེ་རུ་ཀ་ལ༴རཏྣ་ཧེ་རུ་ཀ་ལ༴པདྨ་ཧེ་རུ་ཀ་ལ༴ཀརྨ་ཧེ་རུ་ཀ་ལ༴ཧོ༔ དགོངས་སུ་གསོལ་ལོ༔ བདག་གིས་ཚེ་རབས༴སོགས་འགྲེའོ༔ ཨ་ལ་ལ་ཧོ༔ མ་ཧཱ་ཀྲོ་དྷི་ཤྭ་རི་མ་ལ་ཕྱག་འཚལ་ལོ༔ བུདྡྷ་ཀྲོ་དྷི་ཤྭ་རི་མ་ལ༴བཛྲ་ཀྲོ་དྷི་ཤྭ་རི་མ་ལ༴རཏྣ་ཀྲོ་ངྷི་ཤྭ་རི་མ་ལ༴པདྨ་ཀྲོ་དྷི་ཤྭ་རི་མ་ལ༔ ཀརྨ་ཀྲོ་དྷི་ཤྭ་རི་མ་ལ༴ཧོཿདགོངས་སུ་གསོལ་ལོ༔ བདག་གིས་ཚེ་རབས་འཁོར་བ་ཐོག་མ་མེད་པ་ནས་ད་ལྟའི་སོགས་འགྲེའོ༔ ཨ་ལ་ལ་ཧོཿཀཽ་རི་མ་ལ་ཕྱག་འཚལ་ལོ༔ ཙཽ་རི་མ་ལ་ཕྱག་འཚལ་ལོ༔ པྲ་མོ་ཧ་ལ་ཕྱག་འཚལ་ལོ༔ བཻ་ཏ་ལི་ལ༴པུཥྐ་སཱི་ལ༴གསྨ་རི་ལ༴ཙནྡྷ་ལཱི་ལ༴སྨེ་ཤ་ནི་ལ༴ཧོཿདགོངས་སུ་གསོལ་ལོཿབདག་གིས་ཚེ་རབས་སོགས༔ ཨ་ལ་ལ་ཧོ༔ སེང་གདོང་མ་ལ་ཕྱག་འཚལ་ལོ༔ སྟག་གདོང་མ་ལ་ཕྱག་འཚལ་ལོ༔ ཝ་གདོང་མ་ལ༴སྤྱང་གདོང་མ་ལ༴བྱ་རྒོད་གདོང་ལ༴དུར་བྱའི་གདོང་ལ༴བྱ་རོག་གདོང་ལ༴འུག་གདོང་མ་ལ༴ཧོཿདགོངས་སུ་གསོལ་ལོ༔ བདག་གིས་ཚེ་རབས་སོགས་ཨ་ལ་ལ་ཧོ༔ སྒོ་མ་རྟ་གདོང་མ་ལ་ཕྱག་འཚལ་ལོ༔ ཕག་གདོང་མ་ལ༴སེང་གདོང་མ་ལ༴སྦྲུལ་གདོང་མ་ལ་ཕྱག་འཚལ་ལོ༔ ཧོཿདཀྱིལ་འཁོར་གྱི་ལྷ་ཚོགས་ཐམས་ཅད་བདག་ལ་དགོངས་སུ་གསོལ༔ བདག་གིས་ཚེ་རབས་འཁོར་བ་སོགས༔ སྲིན་མོ་གཡག་གདོང་མ་ལ་ཕྱག་འཚལ་ལོ༔ ཚངས་པ་སྦྲུལ་གདོང་མ་ལ༴ལྷ་ཆེན་གཟིག་གདོང་མ་ལ༴གཏོགས་འདོད་སྲེ་གདོང་མ་ལ༴གཞོན་ནུ་དྲེད་གདོང་མ་ལ༴བརྒྱ་བྱིན་དོམ་མགོ་མ་ལ༴རྡོ་རྗེ་ཕ་ཝཾ་མགོ་ལ༴ཞི་བ་ཆུ་སྲིན་མགོ་ལ༴བདུད་རྩི་སྡིག་གདོང་མ་ལ༴ཟླ་བ་ཁྲ་མགོ་མ་ལ༴བེ་ཅོན་ཝ་གདོང་མ་ལ༴སྲིན་མོ་སྟག་གདོང་མ་ལ༴ཟ་བ་བྱ་རྒོད་མགོ་ལ༴དགའ་བ་རྟ་གདོང་མ་ལ༴སྟོབས་ཆེན་ཁྱུང་གདོང་མ་ལ༴སྲིན་མོ་ཁྱི་གདོང་མ་ལ༴འདོད་པ་པུ་ཤུད་མགོ་ལ༴ནོར་སྲུང་ཤ་མགོ་མ་ལ༴རླུང་ལྷ་སྤྱང་གདོང་མ་ལ༴མི་མོ་སྐྱིན་གདོང་མ་ལ༴ཕག་མོ་ཕག་གདོང་མ་ལ༴རྡོ་རྗེ་ཁྭ་གདོང་མ་ལ༴སྣ་ཆེན་གླང་ཆེན་མགོ་་ལ༴ཆུ་ལྷ་སྦྲུལ་གདོང་མ་ལ༴རྡོ་རྗེ་ཁུ་བྱུག་མགོ་ལ༴རྡོ་རྗེ་ར་གདོང་མ་ལ༴རྡོ་རྗེ་སེང་གདོང་མ་ལ༴རྡོ་རྗེ་སྦྲུལ་གདོང་མ་ལ༴ཆོས་སྐུ་སྐྱེ་བ་མེད་པའི་དབྱིངས་ལ་ཕྱག་འཚལ་ལོ༔ ལོངས་སྐུ་འགགས་པ་མེད་པའི་དབྱིངས་ལ༴སྤྲུལ་སྐུ་འགྲོ་ཁམས་ཁྱབ་ལ༴སངས་རྒྱས་སྐུ་བཞིའི་བདག་ཉིད་ལ༴དམ་ཆོས་བདེན་པ་གཉིས་ལྡན་ལ༴དགེ་འདུན་མི་ཕྱེད་འདུན་པ་ལ༴བླ་མ་བརྒྱུད་པ་དགུ་ལྡན་ལ༴ཡིད་དམ་རྒྱལ་བའི་དཀྱིལ་འཁོར་ལ༴མ་མོ་མཁའ་འགྲོ་ཡོངས་རྫོགས་ལ༴བཀའ་སྲུང་དམ་ཅན་རྒྱ་མཚོ་ལ༴ཀུན་འདུས་རྡོ་རྗེ་སློབ་དཔོན་ལ༴རྡོ་རྗེ་སྤུན་གྲོགས་མཆེད་ལྕམ་ལ་ཕྱག་འཚལ་ལོ༔ ཕྱོགས་བཅུའི་དུས་གསུམ་ན་གཤེགས་ཤིང་བཞུགས་པའི་སངས་རྒྱས་བྱང་སེམས་རིག་འཛིན་ཕོ་མོ་བཀུར་འོས་མཆོད་འོས་སྐྱབས་འོས་ཕྱག་འོས་བརྟེན་འོས་མ་ལུས་ཤིང་ལུས་པ་མེད་པ་ལ་ཕྱག་འཚལ་ཞིང་སྐྱབས་སུ་མཆིའོ་མཆོད་ཅིང་གསོལ་བ་འདེབས་སོ༔ ཧོཿདགོངས་སུ་གསོལ་ལོ༔ སྐྱབས་ཀྱི་དམ་པ་རྣམས་ཀྱི་ཞབས་ཀྱི་པདྨོ་ལ་སྤྱི་བོས་བཏུད་དེ་བདག་གི་ཚེ་རབས་འཁོར་བ་ཐོག་མ་མེད་པ་ནས་ད་ལྟ་ལ་ཐུག་གི་བར་དུ་སྒོ་གསུམ་བག་མེད་པའི་དབང་དུ་གྱུར་ཏེ་བླ་མ་དང་རྡོ་རྗེའི་འཆེད་ལྕམ་སྤུན་སྲིང་ཐམས་ཅད་ལ་སྨད་པ་དང་གཤེ་སྐུར་དང་ལོག་ལྟ་དང་སྐུ་འཕྲོག་དང་བརྡེག་བརྡུང་དང་སྐྱོན་བལྟ་དང་ཉེས་བཙུག་ལ་སོགས་པ་སྐུ་ཡི་དམ་ཚིག་ཉམས་ཆག་ཐམས་ཅད་མཐོལ་ལོ་བཤགས་སོ༔ བྱང་ཞིང་དག་པར་མཛད་དུ་གསོལ༴ཨོཾ་བཛྲ་ས་མ་ཡ༔ ལྷ་ཡི་བསྒོམ་བཟླས་དང་ཏིང་ངེ་འཛིན་མ་གསལ་ཞིང་ཉམས་ཏེ་འཁྲུལ་པ་དང་༔ ཕྱག་རྒྱ་རྣམ་པ་བཞི་ལེ་ལོར་གཡེལ་ཞིང་སྔགས་དང་བཟླས་བརྗོད་ཀྱི་མཚམས་དང་བར་ཆོད་པ་ཅ་ཅོ་དང་བྲེ་མོའི་ཚིག་གིས་བཅོམ་པ་ལ་སོགས་པ་གསུང་གི་དམ་ཚིག་ཉམས་ཆག་ཐམས་ཅད་མཐོལ་ཞིང་བཤགས་སོ༔ བྱང་ཞིང་དག་ནས་ཉམས་པ་སོར་ཆུད་པར་མཛད་དུ་གསོལ༔ ཨཱཿབཛྲ་ས་མ་ཡ༔ གསང་བ་བཅུ་སོགས་མན་ངག་ཁྱད་པར་ཅན་གྱི་གཉེར་གཏད་དེ་གསང་བར་བསྔགས་པ་ལས་ནོར་ཟས་ཟང་ཟིང་ཟོལ་ཟོག་གི་དབང་གིས་ཡུལ་དང་དུས་མ་ཡིན་པར་འཆད་སྒྲོགས་བསྟན་སྤེལ་བྱས་ནས་དམ་བཅའ་རལ་པ་སྤྱོད་ལམ་རྩིང་པ་གསང་སྒོ་འཆོལ་བ་ལ་སོགས་པ་ཐུགས་ཀྱི་དམ་ཚིག་ཉམས་ཆག་འགལ་འཁྲུལ་དུ་གྱུར་པ་ཐམས་ཅད་མཐོལ་ཞིང་བཤགས་སོ༔ བྱང་ཞིང་དག་ནས་ཚངས་པ་མཆོག་གི་དངོས་གྲུབ་དམ་པ་སྩལ་དུ་གསོལ༔ ཧཱུྃ་བཛྲ་ས་མ་ཡ༔ སྦྱོར་བ་དང་སྒྲོལ་བ་དང་མ་བྱིན་ལེན་པ་དང་རྫུན་དང་ཚིག་རྩུབ་ལ་སོགས་པ་གཞན་དོན་དང་ཚུལ་བཞིན་སྤྱོད་པའི་བཀའ་དང་ལུང་བཞིན་མ་གྱུར་ཏེ་བག་མེད་རང་ཁར་འཆོལ་བའི་དབང་བྱས་ནས་སྤྱད་པར་བྱ་བའི་དམ་ཚིག་ཉམས་ཆག་འགལ་འཁྲུལ་ཐམས་ཅད་མཐོལ་ཞིང་བཤགས་སོ༔ བྱང་ཞིང་དག་ནས་སོར་ཆུད་པར་མཛད་དུ་གསོལ༔ ཨོཾ་བཛྲ་སཏྭ་ཧཱུྃ༔ བཛྲ་ས་མ་ཡ་ཤུདྡྷེ་ཨ༔ ཉོན་མོངས་པ་གཏི་མུག་དང་ཞེ་སྡང་དང་ང་རྒྱལ་དང་འདོད་ཆགས་དང་ཕྲག་དོག་འདི་དག་ངོ་བོ་ཡེ་ནས་སངས་རྒྱས་ལྔ་ཡི་རང་བཞིན་དུ་གནས་པ་ལ་གནས་སུ་དག་པར་རང་སར་སྦྱོང་བ་ལས་ལྡོག་ནས་སྤང་ཞིང་འགོག་པ་ཉོན་མོངས་པ་རང་ཁར་བྱུང་རྒྱལ་དུ་སྤྱོད་པ་སྟེ་མི་སྤང་བའི་དམ་ཚིག་ཉམས་ཆག་འགལ་འཁྲུལ་ཉེས་ལྟུང་ཐམས་ཅད་མཐོལ་ཞིང་བཤགས་སོ༔ བྱང་ཞིང་དག་ནས་ཚངས་པ་མཆོག་གི་དངོས་གྲུབ་སྩལ་དུ་གསོལ༔ ཨོཾ་བཛྲ་ས་ཏྭ་ཧཱུྃ༔ བཛྲ་ས་མ་ཡ་ཤུདྡྷེ་ཨ༔ དྲི་ཆེན་དང་དྲི་ཆུ་དང་དམར་ཆེན་དང་ཟིལ་པ་དང་མཱཾ་ས་ལ་སོགས་པའི་དམ་རྫས་བསྒྲུབ་དང་ཡན་ལག་གི་སྒོ་ནས་རྣམ་པར་རྟོག་པ་སྦྱངས་ཏེ་དངོས་གྲུབ་ཀྱི་ཐབས་ཆེན་པོ་ལས་ལྡོག་ནས་གཙང་རྨེ་དང་གཉིས་འཛིན་རང་རྒྱུད་ཀྱི་དབང་གིས་ལོག་པར་བལྟས་ནས་དང་དུ་བླང་བའི་དམ་ཚིག་ཉམས་ཆག་འགལ་འཁྲུལ་ཐམས་ཅད་མཐོལ་ཞིང་བཤགས་སོ༔ བྱང་ཞིང་དག་ནས༴ཨོཾ་བཛྲ་སཏྭ་ཧཱུྃ༔ བཛྲ་ས་མ་ཡ་ཤུདྡྷེ་ཨ༔ ཕུང་པོ་ལྔ་དང་ཉོན་མོངས་པ་ལྔ་ཁ་དོག་ལྔ་ཡུལ་ལྔ་འབྱུང་བ་ལྔ་རྣམ་པར་ཤེས་པ་ལྔ་རྣམས་ནི་རིགས་ལྔ་ཡེ་ཤེས་ལྔ་ཡབ་ལྔ་ཡུམ་ལྔ་སེམས་དཔའ་སེམས་མ་སྒོ་སྐྱོང་དང་བཅས་པ་ཡེ་ནས་ཡིན་པའི་རང་བཞིན་ཤེས་ནས་རྟོགས་པ་ཙམ་གྱིས་གྲོལ་བ་ཐོབ་པའི་གནད་ལས་ལྡོག་ནས་བཟང་ངན་དང་རེ་དོགས་དང་སྤང་བླང་དང་དགག་བསྒྲུབ་སོགས་རྨོངས་འཁྲུལ་ཏེ་ཤེས་པར་བྱ་བའི་དམ་ཚིག་ཉམས་ཆག་འགལ་འཁྲུལ་ཐམས་ཅད་མཐོལ་ཞིང་བཤགས་སོ༔ བྱང་ཞིང་དག་ནས་ཨོཾ་བཛྲ་སཏྭ་ཧཱུྃ༔ བཛྲ་ས་མ་ཡ་ཤུདྡྷེ་ཨ༔ སངས་རྒྱས་ཀྱི་རིགས་དང་༔ རྡོ་རྗེ་དང་རིན་ཆེན་དང་པདྨ་དང་ལས་ཀྱི་རིགས་ལ་སོགས་ཏེ༔ རིགས་ལྔ་གདོད་ནས་རང་ལ་རྫོགས་ཤིང་བསྒྲུབ་པ་ཙམ་གྱིས་རྫོགས་པའི་སངས་རྒྱས་ཆེགས་མེད་དུ་འགྲུབ་པའི་གནད་དོར་ནས་བསྒོམ་བསྒྲུབ་ལེ་ལོར་འཆོར་ཏེ་བརྩོན་འགྲུས་དང་སྙིང་རུས་ཞན་ཅིང་བག་མེད་དུ་ཁ་འཁྱལ་ནས་བསྒྲུབ་པར་བྱ་བའི་དམ་ཚིག་ཉམས་ཆག་འགལ་འཁྲུལ་ཐམས་ཅད་མཐོལ་ཞིང་བཤགས་སོ༔ བྱང་ཞིང་དག་ནས་ཨོཾ་བཛྲ་སཏྭ་ཧཱུྃ༔ བཛྲ་ས་མ་ཡ་ཤུདྡྷེ་ཨ༔ བུམ་དབང་དང་གསང་དབང་དང་ཤེར་དབང་དང་ཚིག་དབང་དང་རྩལ་དབང་གི་དོན་ངེས་ཚིག་ཚུལ་ལམ་རང་གཞུང་དུ་ངེས་པའི་དམ་ཚིག་ཉམས་ཆག་འགལ་འཁྲུལ་ནོར་བ་ལོག་རྟོག་ཐམས་ཅད་མཐོལ་ཞིང་བཤགས་སོ༔ བྱང་ཞིང་དག་ནས༴ཨོཾ་བཛྲ་སཏྭ་ཧཱུྃ༴བཛྲ་ས་མ་ཡ་ཤུདྡྷེ་ཨ༔ གདོད་ནས་འཁོར་འདས་རང་སྣང་ལས་མི་གཞན་པའི་ངང་ཚུལ་མ་རིག་ཉོན་ཤེས་ཀྱིས་བསྒྲུབས་ཏེ་བདག་འཛིན་གཉིས་འཛིན་གཟུང་འཛིན་གྱི་དབང་དུ་གྱུར་ཏེ་རང་རྒྱུད་ལ་གོལ་ཞེན་བག་ཆགས་ལ་སོགས་རང་བཞིན་ལྟ་བའི་དམ་ཚིག་ཉམས་ཆག་འགལ་འཁྲུལ་ཐམས་ཅད་མཐོལ་ཞིང་བཤགས་སོ༔ བྱང་ཞིང་དག་ནས༴ཨོཾ་བཛྲ་སཏྭ་ཧཱུྃ༔ བཛྲ་ས་མ་ཡ་ཤུདྡྷེ་ཨ༔ འཁོར་འདས་འུབ་ཆུབ་རྫོགས་པ་ཆེན་པོའི་ཀློང་དུ་བྱང་ཆུབ་པའི་ངང་དུ་བཤགས་བྱ་བཤགས་བྱེད་བཤགས་ཡུལ་ཐམས་ཅད་ཡེ་སངས་རྒྱས་པའི་ངང་དུ་དག་མཉམ་ཆེན་པོར་རིག་སྟེ་རང་གྲོལ་གྱི་ངང་དུ་ཨ་ཨཱཿཨོཾ་བཛྲ་སཏྭ་ས་མ་ཡ་སོགས༔ ཧོཿརྩ་གསུམ་དམ་ཅན་སྲུང་མའི་ཚོགས༔ ཐུགས་རྗེ་བརྩེ་དགོངས་ཆེན་པོས་གསོན༔ བདག་གི་འཁོར་ཚེ་ཐོག་མེད་ནས༔ མ་རིག་ཉོན་ཤེས་བསྒྲིབ་དབང་གིས༔ སོ་ཐར་བྱང་སེམས་གསང་སྔགས་ཀྱི༔ སྡོམ་དང་བསླབ་པ་དམ་ཉམས་པ༔ མི་འཆབ་མི་སྦེད་མཐོལ་ཞིང་བཤགས༔ ཚངས་པ་མཆོག་གི་དངོས་གྲུབ་སྩོལ༔ ཡི་གེ་བརྒྱ་པ་རབ་འབུམ་མམ་ཁྲི༔ འབྲིང་སྟོང་ངམ་བརྒྱ༔ ཐ་ན་ཉེར་གཅིག་གམ་བརྒྱད་སོགས་བརྗོད༔ སླར་ཡང་སྨོན་ལམ་དག་པའི་སྟོབས་བསྐྱེད་པ་ནི༔ ཨ་ལ་ལ་ཧོཿམཆོག་གསུམ་སྐུ་གསུམ་རྩ་གསུམ་སྲུང་མའི་ཚོགས་དང་༔ ཆོས་ཉིད་ངོ་བོ་གདོད་ནས་དག་ཅིང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པའི་མཐུ་སྟོབས་བྱིན་རླབས་ལ་བརྟེན་ནས༔ མི་ང་ཡི་ཚེ་རབས་ཐམས་ཅད་དུ་བསགས་པའི་ཉེས་བྱས་ཉམས་ཆག་སྡིག་སྒྲིབ་སྔོན་ལས་འཕྲལ་རྐྱེན་ངན་པ་ཐམས་ཅད་སྐད་ཅིག་ཉིད་ལ་བྱང་ཞིང་དག་པར་གྱུར་ཅིག༔ བདག་གི་བློ་སྣ་དམ་པའི་ཆོས་སུ་གྱུར་ནས་བྱ་བ་དང་བྱེད་པ་ཐམས་ཅད་དམ་པའི་ཆོས་ཤ་སྟག་ཏུ་འགྱུར་བར་ཤོག་ཅིག༔ འཁོར་བར་རྒྱབ་ཀྱིས་ཕྱོགས་ཏེ་ངེས་མེད་ཀྱི་དབེན་པར་འགྱུར་མེད་གཏན་དུ་བདེ་བའི་བཙན་ས་ཟིན་པར་ཤོག་ཅིག༔ རྐྱེན་ངན་བར་ཆད་བསླུ་བདུད་ངན་པའི་དབང་དུ་སྐད་ཅིག་ཙམ་ཡང་མི་འགྱུར་བར་ཤོག་ཅིག༔ ངའི་སྐྱེ་བ་ཚེ་རབས་ཐམས་ཅད་དུ་གཞན་ལ་གནོད་པའི་རིགས་དང་ལུས་སུ་མི་སྐྱེ་བར་ཤོག་ཅིག༔ གཞན་ཕན་བྱང་ཆུབ་ཀྱི་སེམས་དང་མི་འབྲལ་ཞིང་འགྲོ་ཁམས་རྒྱ་མཚོ་དོང་ནས་སྤྲུགས་པའི་མཐུ་ནུས་དང་ལྡན་པར་ཤོག་ཅིག༔ ཡུལ་ངན་དང་གྲོགས་ངན་ཕྱིན་ཅི་ལོག་གི་རྗེས་སུ་སྐད་ཅིག་ཙམ་ཡང་མི་འགྱུར་བར་ཤོག་ཅིག༔ བླ་མ་དང་མཆེད་ལྕམ་བསྟན་འཛིན་གྱི་སྐྱེས་བུ་དམ་པ་དག་གི་ཚེ་བསོད་དཔལ་འབྱོར་རླུང་རྟ་བླ་གཟའ་སྙན་གྲགས་མངའ་ཐང་ཡོན་ཏན་བསྟན་པ་ཐམས་ཅད་ཟླ་བ་ཡར་གྱི་ངོ་བཞིན་དུ་གོང་ནས་གོང་འཕེལ་དུ་རྒྱས་ཤིང་ནུབ་མེད་དུ་བརྟན་ཅིང་གནས་པར་གྱུར་ཅིག༔ ཆོས་སྐུ་ཀུན་ཏུ་བཟང་པོ་རྡོ་རྗེ་སེམས་དཔའ་དགའ་རབ་རྡོ་རྗེ་ཤྲཱི་སིངྷ་པདྨ་ཀ་ར་རྒྱ་གར་གྱི་རིག་འཛིན་བརྒྱད་དང་གྲུབ་ཆེན་བརྒྱད་ཅི་བོད་ཀྱི་རྗེ་འབངས་ཉེར་ལྔ་ལ་སོགས་པའི་རིག་འཛིན་བརྒྱུད་པ་དང་བཅས་པའི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་ཐམས་ཅད་བདག་གི་རྒྱུད་ལ་ད་ལྟ་ཉིད་དུ་འཕོ་བར་གྱུར་ཅིག༔ ཐིམ་པར་གྱུར་ཅིག༔ གཉིས་སུ་མེད་པར་ཡོངས་སུ་རྫོགས་པར་གྱུར་ཅིག༔ བདག་གི་སྒོ་གསུམ་རྡོ་རྗེ་གསུམ་གྱི་གྲོང་དུ་འཕོས་ཏེ་རྨད་བྱུང་རྡོ་རྗེ་ཐེག་པའི་གསང་ལམ་ལ་ཚུད་ནས་ཉམས་དང་རྟོགས་པའི་ཡོན་ཏན་ཐམས་ཅད་གོང་ནས་གོང་དུ་འཕེལ་ཞིང་རྒྱས་ཏེ་རིག་འཛིན་རྣམ་པ་བཞིའི་ས་ལམ་རིམ་གྱིས་ཚེ་འདི་ཉིད་ལ་བསྒྲོད་ནས་མཐར་ཕྱིན་པར་ཤོག་ཅིག༔ འོད་གསལ་རྫོགས་པ་ཆེན་པོ་འཁོར་འདས་འུབ་ཆུབ་རོལ་པའི་ལྟ་སྒོམ་ཕྱིན་ཅི་མ་ལོག་པ་བདག་གི་རྒྱུད་ལ་ད་ལྟ་ཉིད་དུ་སྐྱེ་བར་ཤོག་ཅིག༔ ཐུན་མོང་གི་དངོས་གྲུབ་གྲུབ་པ་བརྒྱད་དང་འབྱུང་བ་ལྔ་ལ་རང་དབང་བསྒྱུར་ནུས་ཤིང་མཆོག་གི་དངོས་གྲུབ་རླུང་སེམས་གཉིས་དང་སྐྱེ་འཇུག་གཉིས་ལ་རང་དབང་ཐོབ་ནས་གཞན་དོན་རླབས་པོ་ཆེ་འགྲུབ་པར་ཤོག་ཅིག༔ ཚེ་འདི་ཉིད་དུ་བདག་གིས་ཆོས་ཅན་གྱི་སྣང་བ་ཆོས་ཉིད་ཀ་དག་གཞོན་ནུ་བུམ་སྐུའི་ཀློང་དུ་ཟད་ནས་ལུས་འཇའ་ལུས་ཟང་ཐལ་ཆེན་པོ་སེམས་ཡེ་གཞི་ཆོས་སྐུའི་ཀློང་དུ་ཡང་དག་པར་རྫོགས་པའི་སངས་རྒྱས་དགའ་རབ་རྡོ་རྗེའི་གོ་འཕང་ཐོབ་པར་ཤོག་ཅིག༔ མཆོག་གསུམ་སྐུ་གསུམ་རྩ་གསུམ་རིག་འཛིན་རྒྱལ་བ་རྒྱ་མཚོ་ཆོས་ཉིད་རྣམ་པར་དག་ཅིང་རྒྱུ་འབྲས་བསླུ་བ་མེད་པ་རྣམས་ཀྱི་བདེན་པའི་མཐུ་སྟོབས་ནུས་རྩལ་གྱིས་བདག་གིས་སྨོན་ལམ་བཏབ་པ་དེ་རྣམས་ད་ལྟ་ཉིད་དུ་འགྲུབ་པར་གྱུར་ཅིག༔ ཅེས་ལན་བདུན་དང་གཞན་ཡང་བདེན་ཚིག་འགྲུབ་སྔགས་མང་དུ་བཟླ་བར་བགྱི་འདི་ལྟར་རྟག་དུ་བཟླས་བརྗོད་ན༔ ངན་སོང་འཁོར་བ་ལས་གྲོལ་ཏེ༔ རྣམ་མཁྱེན་ཡེ་ཤེས་མངོན་གྱུར་ནས༔ འགྲོ་བའི་མགོན་དུ་གདོན་མི་ཟ༔ འདི་ནི་ཆོས་རྣམས་ཀུན་གྱི་བཅུད༔ རིག་འཛིན་པདྨའི་སྙིང་ཁྲག་དངོས༔ མཁའ་འགྲོ་འབུམ་གྱི་གསང་ཆེན་པོ༔ ཉམས་སུ་ལོངས་ཤིག་ཕྱི་རབས་རྣམས༔ བཀའ་སྲུང་དྲང་སྲོང་ཆེན་པོར་གཉེར༔ ཐུབ་པར་སྲུངས་ཤིག་ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ཡང་སྤྲང་མ་ནུས་བདུད་འཇོམས་རྡོ་རྗེ་ལ་ཡེ་ཤེས་མཁའ་འགྲོས་འོད་གསལ་དག་པའི་དབྱིངས་ནས་གདམས་ཏེ་དག་པར་ཕབ་པའི་ཡི་གེ་པ་ནི་རང་སློབ་དམ་པ་པདྨ་བཀྲ་ཤིས་ཀྱིས་བགྱིས་པའི་དགེ་བས་འཁོར་བ་མྱང་འདས་ཆེན་པོའི་དབྱིངས་སུ་སངས་རྒྱས་པར་གྱུར་ཅིག།དགེའོ།།དགེའོ།།དགེའོ།།སརྦ་མངྒ་ལཾ།ཞུས་སོ༔