TTDL-ZABTER-18-TSHA-130

Previous Text Back to Volume Page Next Text

Wylie title
Location	bdud 'joms gling pa zab gter Volume 18, Text 130, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. '*. In Sprul pa'i gter chen bdud 'joms gling pa'i zab gter gsang ba'i chos sde, Vol. 18: . Thimphu, Bhutan: Lama Kuenzang Wangdue, 2004.*
Side notes	Recto: zhal gdams Verso: bdud 'joms gsung mgur skor
More details More details
Genre	Advice - zhal gdams

[edit]

རྗེ་འགྲོ་བའི་མགོན་པོ་པདྨ་འབྱུང་། །གནས་མི་འབྲལ་སྙིང་གི་དབུས་སུ་བཞུགས། །སྣང་སྲིད་དང་འཁོར་འདས་ཆོས་རྣམས་ཀུན། །གཞི་ཁྱབ་བརྡལ་ངང་དུ་རོ་གཅིག་པའི། །ངང་རྨི་ལམ་སྣང་བ་སྣོད་བཅུད་ཆོས། །ཡུལ་འདོད་ཡོན་ལྔ་ཡི་ཆོས་སོ་ཅོག།གཉིད་སད་ཚེ་ནམ་མཁའ་ནམ་མཁར་ཞིག།ཉིན་སྣང་བ་དེ་བཞིན་ཆོས་རྣམས་ཀུན། །མཚན་རྨི་ལམ་གཉིད་དུ་ཕྱོགས་པའི་ཚེ། །འཇའ་ནམ་མཁར་ཡལ་བཞིན་དབྱིངས་ལ་ཐིམ། །དེའི་ཕྱིར་ན་འཁོར་འདས་གཉིས་བསྡུས་ཀྱི། །ཆོས་ཐམས་ཅད་ནམ་མཁའི་འཁོར་ཡུག་སྟེ། །ནམ་མཁའ་ནི་སྤྲོས་བྲལ་སྟོང་པ་ཉིད། །སྟོང་པ་ཡི་མཚན་ཉིད་དེ་བཞིན་ཉིད། །ཚུལ་ཇི་ལྟར་རིག་ན་གཞིའི་རིག་པ། །ངང་མངོན་གྱུར་ལམ་གྱི་རིག་པ་སྟེ། །རིག་པ་དེ་སྨྲ་བསམ་བརྗོད་ལས་འདས། །རིག་པ་ལ་མྱོང་ཞེན་སྤུ་ཙམ་མེད། །རིག་པ་ལ་བསྒོམ་དང་མི་བསྒོམ་མེད། །རིག་པ་ལ་གཟའ་དང་གཏད་སོ་མེད། །རིག་པ་ལ་རིག་དང་མ་རིག་མེད། །ཁྱབ་བརྡལ་གྱི་རིག་པ་ཟང་ཀ་མ། །ཤུགས་འབྱུང་གི་ཡེ་གནས་ཡེ་བབ་ཏུ། །འཇོག་པ་ནི་རྣལ་འབྱོར་ལམ་གྱི་མཆོག།མིག་ཤེས་དང་ཡེ་ཤེས་གཉིས་མེད་པས། །མངོན་བྱེད་ཀྱི་ཤེས་རབ་མིག་ཤེས་ཡིན། །སྒོ་གསུམ་གྱི་བྱ་བ་དགུ་ཕྲུགས་བཏང་། །མཉམ་བཞག་ཅེས་བྱ་བ་དེ་ལས་མེད། །ཟ་ཉལ་དང་འགྲོ་འདུག་དུས་ཀུན་ཏུ། །མངོན་གྱུར་གྱི་ངང་ལས་མི་འདའ་བ། །རྗེས་ཐོབ་ཅེས་ཟེར་བ་དེ་ལས་མེད། །ཆོས་བརྒྱད་ཀྱི་ཡུལ་ལ་མ་ཞེན་པར། །རྩེ་གཅིག་ཏུ་སྙིང་པོར་གཞོལ་བ་ན། །རྣམ་གྲོལ་གྱི་ས་ལ་རིང་མི་ཐོགས། །ཁ་བཤད་ཀྱི་གདམས་ངག་གསོན་པོ་ཡིས། །གོ་བ་དང་གཏིང་དཔོག་མི་འོང་ན། །ཡིག་རིས་ཀྱི་ཚིག་རོ་བྲིས་བྲིས་ཀྱང་། །གོ་བ་ནི་ཤིན་ཏུ་དཀའ་ལས་ཡོད། །བརྡ་འཕྲོད་ན་དེ་ག་གདམས་ངག་ཡིན། །དོན་གོ་བ་མེད་ན་ལམ་ཁ་ཡི། །རྡོ་བཞིན་དུ་ཐོབ་ལེན་མེད་ལ་ལྟོས། །ཐེ་ཚོམ་དང་ཡིད་གཉིས་བློ་སྤོངས་ལ། །ཐག་ཐད་ཀར་ཆོད་ལ་རང་ཐོག་ཏུ། །གདིང་ཚུགས་ལ་རང་ས་ཟིན་པར་གྱིས། །མི་རྒན་པོའི་འཆོལ་གཏམ་དེ་ག་ཡིན། །དེ་མ་བརྗེད་སྙིང་གི་མེ་ལོང་གྱིས། །ཅེས་སློབ་བུ་མགོན་རྡོར་གྱི་ནན་དུ་བསྐུལ་ངོར་བདུད་འཇོམས་པས་སྨྲས་པ་དགེའོ། །ཞུས་སོ། །། །