DUDJOM-THROMA-030

དབུ་ཁྲིད་བརྡ་ཡིག་༠༠༠༠༠༢༨༥༔ མགྲོན་འབོད་བྱ་བ་ལ༔ ཀྭི་ཀྭི༔ མ་རིག་གཉིས་འཛིན་འཁོར་བའི་འདྲེ་བོ་ཆེ༔ ཞེ་སྡང་ཕོ་གདོན་རྒྱལ་འགོང་༔ འདོད་ཆགས་མོ་གདོན་འདྲེ་མོ༔ གཏི་མུག་ཀླུ་གདོན་ས་བདག༔ དཀར་པོ་ལྷ་ཡི་སྡེ་ཚོགས༔ དམར་པོ་བཙན་གྱི་སྡེ་ཚོགས༔ འཆི་བདག་གཤིན་རྗེའི་སྡེ་ཚོགས༔ སྲོག་བདག་རྒྱལ་པོའི་སྡེ་ཚོགས༔ སྲིད་པ་མ་མོའི་སྡེ་ཚོགས༔ མི་སྲུན་གནོད་སྦྱིན་གྱི་སྡེ་ཚོགས༔ ནག་པོ་བདུད་ཀྱི་སྡེ་ཚོགས༔ གཏུམ་པོ་ཀླུ་ཡི་སྡེ་ཚོགས༔ འདྲེ་གདོན་མ་ནིང་གི་སྡེ་ཚོགས་ཐམས་ཅད་འདིར་གཤེགས་ཤིག༔ འདིར་འདུས་ཤིག༔ ཕཊ་ཕཊ་ཕཊ༔ འོ་ནད་རིམས་ཡམས་ཀྱི་བདག་པོ༔ ཡ་བདུད་རྒྱལ་པོ༔ མ་བདུད་རྒྱལ་མོ༔ བཙན་ཁ་བཞི༔ མགྱོགས་པ་བདུད་བཞི༔ འཕྲོག་མ་མ་བུ་ལྔ་བརྒྱ༔ བྱིས་པའི་གདོན་ཆེན་བཅོ་ལྔ༔ སྲིད་པ་ཆགས་པའི་འདྲེ་དགུ༔ གཙུག་ལག་ཁང་གི་གདོན་བཅུ༔ ཕུང་སྲི་གྲི་བོ་བཅོ་བརྒྱད༔ སྣང་སྲིད་ཡུལ་གཞིའི་བདག་པོ་ཐམས་ཅད་འདིར་གཤེགས་ཤིག༔ འདིར་འདུས་ཤིག༔ ཕཊ་ཕཊ་ཕཊ༔ ཁྱད་པར་དུ་བདག་དང་ནད་པ་འདི་ལ་གནོད་ཅིང་འཚེ་བར་བྱེད་པའི་འདྲེ་གདོན་འབྱུང་པོ༔ དང་པོ་ནད་ཀྱི་སྣ་འདྲེན་པ༔ བར་དུ་གདོན་གྱི་ཚང་བཅའ་བ༔ ཐ་མ་ཚེ་དང་སྲོག་ལ་རྒོལ་བའི་གནའ་འདྲེ་རྙིང་པ༔ ད་འདྲེ་གསར་པ༔ གནས་ན་གནས་པའི་གནས་གདོན༔ ལུས་དང་འགྲོགས་པའི་ལུས་གདོན༔ ཡུལ་ནས་བྱུང་བའི་ཡུལ་གདོན༔ ཟ་བའི་འདྲེ༔ ཕུང་བའི་སྲི༔ ནད་ཀྱི་བདག་པོ་བདག་མོ༔ རིམས་ཀྱི་བདག་པོ་བདག་མོ༔ ཡམས་ཀྱི་བདག་པོ་བདག་མོ༔ མི་སྡུག་པའི་གཟུགས་སྟོན་པ༔ མི་བདེ་བའི་ཟུག་རྔུ་སློང་བ༔ མི་འདོད་པ་ཐོག་ཏུ་འབེབས་པ༔ མི་དགའ་བའི་རྣམ་འགྱུར་ངོམས་པ༔ མི་སྲུན་པའི་ལ་ཡོག་འདོར་བ༔ ནད་ནད་བདག་དང་བཅས་པ༔ གདོན་སྣ་འདྲེན་དང་བཅས་པ༔ དཔུང་ཚོགས་རྒྱབ་བརྟེན་དང་བཅས་པ་ཐམས་ཅད་སྐད་ཅིག་ཉིད་དུ་འདིར་གཤེགས་ཤིག༔ འདིར་འདུས་ཤིག༔ ཕཊ་ཕཊ་ཕཊ༔ ཀྱཻ་སྣང་སྲིད་ཀྱི་ལྷ་འདྲེ་ཁྱེད་རྣམས་ལ་ངས་དམ་པའི་ཆོས་ཀྱི་ཕན་པ༔ བྱང་ཆུབ་སེམས་ཀྱི་བྱིན་རླབས༔ ལོངས་སྤྱོད་འདོད་ཡོན་གྱི་སྦྱིན་པ་སྟེར་ཞིང་ཐར་པ་བདེ་བའི་ས་ལ་འགོད་པ་ཡིན་པས་བཀའ་ལ་ཉོན་ཅིག༔ དམ་སྡོམ་ལོངས་ཤིག༔ གདུག་སེམས་དང་སྡང་སེམས་སྤོངས་ལ་ཞི་ཞིང་དེས་པའི་སེམས་ཀྱིས་ཉོན་ཅིག༔ ཕཊ་ཕཊ་ཕཊ༔ འདིའང་རང་སློབ་དམ་པ་ཚེས་བཅུས་ནན་དུ་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་སྨྲས་པའོ།། དབུ་ཁྲིད་བརྡ་ཡིག་༠༠༢༨༧༔ དེ་ནས་མགྲོན་འབོད་པ་ནི༔ ཀྭི་ཀྭི༔ མཐོ་སྲིད་པའི་རྩེ་མོ་མན་ཆད༔ དམའ་ན་རཀ་དམྱལ་ཁམས་ཡན་ཆད་ཀྱི་ཁམས་གསུམ་དུ་གནས་ཤིང་རྒྱུ་བའི༔ དཀར་པོ་ལྷ་ཡི་སྡེ་ཚོགས༔ འཆི་བདག་གཤིན་རྗེའི་སྡེ་ཚོགས༔ སྲིད་པ་མ་མོའི༴ ནག་པོ་བདུད་ཀྱི༴ མགྱོགས་པ་བཙན་གྱི༴ སྲོག་བདག་རྒྱལ་པོའི༴ མི་སྲུན་གནོད་སྦྱིན་གྱི༴ གཏུམ་པོ་ཀླུའི༴ རཀྴ་སྲིན་པོའི༴ སྟེང་གདོན་གཟའ་ཡི༴ བར་གདོན་འབྱུང་པོའི༴ འོག་གདོན་གཉན་གྱི་སྡེ་ཚོགས་ཐམས་ཅད་མ་ལུས་མ་འགྱང་མ་ཐོགས་པར་གཉན་མིག་འདི་རུ་ཤོག་ཅིག༔ འདི་རུ་འདུས་ཤིག༔ ཕཊ་ཕཊ་ཕཊ༔ འཻ་གཙོ་བོ་གདོན་ཆེན་བཅོ་ལྔ༔ འཕྲོག་མ་མ་བུ་ལྔ་བརྒྱ༔ བགེགས་རིགས་སྟོང་ཕྲག་བརྒྱད་ཅུ༔ སྲིད་པའི་ཡུལ་གྱི་འདྲེ་དགུ༔ གཙུག་ལག་ཁང་གི་གདོན་བཅུ༔ ཕོ་གདོན་ལས་ཀྱི་རྒྱལ་འགོང་༔ མོ་གདོན་ལས་ཀྱི་འདྲེ་མོ༔ ཀླུ་གདོན་ལས་ཀྱི་ས་བདག་ཐམས་ཅད་འདིར་གཤེགས་ཤིག༔ འདིར་འདུས་ཤིག༔ ཕཊ་ཕཊ་ཕཊ༔ འཻ་མི་ངའི་སྔོན་གྱི་ལས་ལས་གྱུར་པ༔ འཕྲལ་གྱི་རྐྱེན་ལས་གྱུར་པ༔ ལས་ཉོན་བག་ཆགས་གཟུང་འཛིན་རྒྱུ་རྐྱེན་ལས་གྲུབ་པའི་འདྲེ་གདོན་འབྱུང་པོ༔ ཁ་ཡི་དབུགས་འཕྲོག་ཅིང་ཁོང་པའི་སྲོག་གཅོད་པ༔ ལུས་ཀྱི་མདངས་འཕྲོག་ཅིང་ལོངས་སྤྱོད་ཀྱི་དཔལ་འཕྲོག་པ༔ ཚེ་ལ་རྐུ་བ༔ བླ་ལ་འཇབ་པ༔ ཡིད་ལ་བརྣག་པའི་སེམས་ཅན༔ གནོད་པའི་སེམས་དང་ལྡན་པ༔ གདུག་པའི་སེམས་དང་ལྡན་པ༔ དྲག་ཤུལ་གྱི་སེམས་དང་ལྡན་པ་ཐམས་ཅད་འདིར་ཤོག་ཅིག༔ ཕཊ་ཕཊ་ཕཊ༔ འཻ་མཐོ་སྲིད་པའི་རྩེ་མོ་མན་ཆད༔ དམའ་ན་རཀ་དམྱལ་ཁམས་ཡན་ཆད་ཀྱི་ཁམས་གསུམ་སེམས་ཅན་ཐམས་ཅད་སྣང་སྲིད་ལྷ་འདྲེ་ཁྱེད་རྣམས་ལ་ངའི་མགོའི་རལ་པའི་ཅོད་པན་མན་ཆད༔ རྐང་སེན་རྩེ་རྣོན་པོ་ཡན་ཆད་ཀྱི༔ ཤ་ཁྲག་རུས་པ་རྐང་དང་རྩ་རྒྱུས་ལྤགས་པ་དང་བ་སྤུ་ཚུན་ཆད་ལ་བདག་ཏུ་མི་འཛིན་པར༔ དུས་དེ་རིང་སྤྱིར་སེམས་ཅན་ཐམས་ཅད་སྒོས་དྲིན་ཆེན་ཕ་མ་དང་འབྲེལ་ཐོགས༔ ཡང་སྒོས་རྩ་བའི་བླ་མའི་སྐུ་གླུད་དུ་འབུལ་ཞིང་སྟེར་བ་ཡིན་པས༔ ལྷག་མ་རྡུལ་ཕྲན་ཙམ་ཡང་མ་ལུས་པར་ལོངས་ཤིག༔ ཟོ་ཞིག༔ ཁྱེར་ཅིག༔ ཕཊ་ཕཊ་ཕཊ༔ ཅེས་བདུད་འཇོམས་པས་ཆོས་ཉིད་ནམ་མཁའི་ཀློང་མཛོད་ལས་སོ། །དགེའོ། །དགེའོ།། །།