TTDL-ZABTER-01-KA-036

༠༠༠༠༠བརྡ་ཡིག༔ ཟབ་གསང་མཁའ་འགྲོའི་སྙིང་ཐིག་ལས༔ སྒོ་དབྱེ་འཕྲུལ་གྱི་ལྡེའུ་མིག་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ ༠༠༠༠༠བརྡ་ཡིག༣༣༡༔ སྒྲུབ་པའི་ཕྱི་སྒོ་ཕྱེ་བ་ལ༔ དཀར་གཏོར་གསེར་སྐྱེམས་བཤམས་ནས་སུ༔ ཟག་མེད་ཡེ་ཤེས་བདུད་རྩི་ལ༔ རྣམ་པ་འདོད་རྒུའི་དཔལ་དུ་བསྐྱེད༔ དེ་ལ་སྭ་བྷཱ་ཝས་སྦྱངས༔ ཨ་ཀཱ་རོས་སྤེལ༔ ཀྱཻ༔ ཤར་ཕྱོགས་སྲིད་པའི་ལྷ་མ་སྲིན༔ གཞི་བདག་ལྷ་འདྲེ་དྲག་རྩལ་ཅན༔ གསེར་སྐྱེམས་གཏོར་མ་འདི་བཞེས་ལ༔ ཡས་དང་ཟོར་གྱི་ལམ་ཕྱེས་ལ༔ མཐུ་དང་དཔུང་བསྐྱེད་དམག་ལ་ཆོས༔ དགྲ་བགེགས་མ་ཤོར་སྐུ་བཟུར་ལ༔ དྲག་པོའི་ཕྲིན་ལས་འགྲུབ་པར་མཛོད༔ ཀྱཻ༔ སྲིད་པ་ལྷོ་ཡི་ལྷ་མ་སྲིན༔ གཞི་བདག་ལྷ་འདྲེ་དྲག་རྩལ་ཅན༔ གསེར་སྐྱེམས་གཏོར་མ་འདི་བཞེས་ལ༔ ཡས་དང་ཟོར་གྱི་ལམ་ཕྱེས་ལ༔ མཐུ་དང་དཔུང་བསྐྱེད་དམག་ལ་ཆོས༔ དགྲ་བགེགས་མ་ཤོར་སྐུ་བཟུར་ལ༔ དྲག་པོའི་ཕྲིན་ལས་འགྲུབ་པར་མཛོད༔ ཀྱཻ༔ སྲིད་པ་ནུབ་ཀྱི་ལྷ་མ་སྲིན༔ གཞི་བདག་ལྷ་འདྲེ་དྲག་རྩལ་ཅན༔ གསེར་སྐྱེམས་གཏོར་མ་འདི་བཞེས་ལ༔ ཡས་དང་ཟོར་གྱི་ལམ་ཕྱེས་ལ༔ མཐུ་དང་དཔུང་བསྐྱེད་དམག་ལ་ཆོས༔ དགྲ་བགེགས་མ་ཤོར་སྐུ་བཟུར་ལ༔ དྲག་པོའི་ཕྲིན་ལས་འགྲུབ་པར་མཛོད༔ ཀྱཻ༔ སྲིད་པ་བྱང་གི་ལྷ་མ་སྲིན༔ གཞི་བདག་ལྷ་འདྲེ་དྲག་རྩལ་ཅན༔ གསེར་སྐྱེམས་གཏོར་མ་འདི་བཞེས་ལ༔ ཡས་དང་ཟོར་གྱི་ལམ་ཕྱེས་ལ༔ མཐུ་དང་དཔུང་སྐྱེད་དམག་ལ་ཆོས༔ དགྲ་བགེགས་མ་ཤོར་སྐུ་བཟུར་ལ༔ དྲག་པོའི་ཕྲིན་ལས་འགྲུབ་པར་མཛོད༔ ཀྱཻ༔ མཚམས་བཞི་སྟེང་འོག་ལ་གནས་པའི༔ སྣང་ཞིང་སྲིད་པའི་ལྷ་འདྲེ་དང་༔ གཞི་བདག་ལྷ་འདྲེ་དྲག་རྩལ་ཅན༔ མ་ལུས་ལུས་པ་མེད་པ་ཀུན༔ གསེར་སྐྱེམས་གཏོར་མ་འདི་བཞེས་ལ༔ ཡས་དང་ཟོར་གྱི་སྒོ་ཕྱེས་ཤིག༔ ཐུན་ཟོར་དགྲ་བགེགས་སྲོག་ལ་ཕོབ༔ ཟོར་སྒོ་དགྲ་དང་བགེགས་ལ་ཕྱེས༔ མིང་ཙམ་མེད་པར་རྡུལ་དུ་རློག༔ བདག་ནི་མ་ཉེས་མ་ལན་ཏེ༔ གལ་ཏེ་གདོང་ལ་ཐུག་གྱུར་ཀྱང་༔ ཆད་པ་དགྲ་དང་བགེགས་ལ་ཕོབ༔ དུས་གསུམ་རྒྱལ་བ་སྲས་བཅས་ཀྱི༔ བཀའ་དམ་གཉན་པོ་དཔང་བཞག་ནས༔ བཀའ་བསྒོ་ཡིན་ནོ་བཀའ་མ་བཅག༔ དམ་ཚིག་ཡིན་ནོ་དམ་མ་ཉམས༔ བཅོལ་བའི་ཕྲིན་ལས་འགྲུབ་པར་མཛོད༔ ཨོཾ་སརྦ་ལོ་ཀ་པཱ་ལ་ཨེ་དཾ་བ་ལིངྟ་ཁཱ་ཧི༔ དེ་ནས་དཀྱིལ་འཁོར་ནང་གི་སྒོ་དབྱེ་ལ༔ ཛཿདཀྱིལ་འཁོར་ཤར་གྱི་སྒོ་སྐྱོང་ཞིང་༔ སྙིང་རྗེའི་སྒོ་མ་ལྕགས་ཀྱུ་མ༔ མེ་ལོང་ཡེ་ཤེས་ཤར་སྒོ་ཕྱེས༔ ཞི་བའི་ཕྲིན་ལས་འགྲུབ་པར་མཛོད༔ བཛྲ་པྲ་བེ་ཤ་ཡ་ཕཊ༔ ཧཱུྃ༔ དཀྱིལ་འཁོར་ལྷོ་ཡི་སྒོ་སྐྱོང་ཞིང་༔ བྱམས་པའི་སྒོ་མ་ཞགས་པ་མ༔ མཉམ་ཉིད་ཡེ་ཤེས་ལྷོ་སྒོ་ཕྱེས༔ རྒྱས་པའི་ཕྲིན་ལས་འགྲུབ་པར་མཛོད༔ རཏྣ་པྲ་བེ་ཤ་ཡ་ཕཊ༔ བཾ༔ དཀྱིལ་འཁོར་ནུབ་ཀྱི་སྒོ་སྐྱོང་ཞིང་༔ དགའ་བའི་སྒོ་མ་ལྕགས་སྒྲོག་མ༔ སོར་རྟོག་ཡེ་ཤེས་ནུབ་སྒོ་ཕྱེས༔ དབང་གི་ཕྲིན་ལས་འགྲུབ་པར་མཛོད༔ པདྨ་པྲ་བེ་ཤ་ཡ་ཕཊ༔ ཧོཿདཀྱིལ་འཁོར་བྱང་གི་སྒོ་སྐྱོང་ཞིང་༔ བཏང་སྙོམས་སྒོ་མ་དྲིལ་བུ་མ༔ བྱ་གྲུབ་ཡེ་ཤེས་བྱང་སྒོ་ཕྱེས༔ དྲག་པོའི་ཕྲིན་ལས་འགྲུབ་པར་མཛོད༔ ཀརྨ་པྲ་བེ་ཤ་ཡ་ཕཊ༔ ཀྱཻ༔ དཀྱིལ་འཁོར་གྱི་ལྷ་རྣམས་སྟེང་གི་ནམ་མཁའ་ལ་གཤེགས་ཏེ་བདག་སྒྲུབ་པ་པོ་ལ་དབང་དང་དངོས་གྲུབ་ཀྱི་ཆར་ཆེན་པོ་འབེབས་ཤིང་སྩོལ་བར་བསམ༔ གནད་དེས་རྣམ་བཞིའི་ཕྲིན་ལས་འགྲུབ༔ དངོས་གྲུབ་རྣམ་གཉིས་ངེས་ཐོབ་འགྱུར༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཨྠིྀ༔ གུ་ཧྱ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་གཏན་ལ་ཕབ་པའི་ཡི་གེ་པ་ནི་ཡེ་ཤེས་ཉི་མ་མཐའ་རྒྱས་སོ།།དགེའོ།།དགེའོ།།དགེའོ།།ལེགས་སོ།།སརྦ་མངྒ་ལཾ།།།།