TTDL-ZABTER-02-KHA-004

༠༠༠༠བརྡ་ཡིག༥༣འཇམ་དཔལ་གསང་བ་འདུས་པའི་གསོལ་འདེབས་ཤིན་ཏུ་བསྡུས་པ་བཞུགས༔ ན་མོ་གུ་རུ་པདྨ་ཀ་ར་ཡེ༔ ཨེ་མ་ཧོཿགདོད་མའི་མགོན་པོ་ཆོས་སྐུ་ཀུན་ཏུ་བཟང་༔ ལྷུན་གྲུབ་ལོངས་སྐུ་རིགས་ལྔ་གངས་ཆེན་མཚོ༔ སྤྲུལ་པའི་སྐུ་མཆོག་རིགས་གསུམ་འགྲོ་བའི་མགོན༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ དགའ་རབ་ཤྲཱི་སེང་འཇམ་དཔལ་བཤེས་གཉེན་དང་༔ པདྨ་འབྱུང་གནས་མཁར་ཆེན་མཚོ་རྒྱལ་དང་༔ རྗེ་འབངས་ཉི་ཤུ་རྩ་ལྔ་དང་བཅས་ལ༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ རིགས་ཀྱི་ཁྱབ་བདག་རྩ་བའི་བླ་མ་དང་༔ འཇམ་དཔལ་རིགས་ལྔ་དབྱངས་ཅན་ལྷ་མོ་བཞི༔ ནོར་རྒྱུན་མ་དང་གཤིན་རྗེ་རིགས་བཞི་སོགས༔ རྩ་གསུམ་དཔའ་བོ་མཁའ་འགྲོ་ཆོས་སྐྱོང་ལ༔ གསོལ་བ་འདེབས་སོ་བདག་རྒྱུན་བྱིན་གྱིས་རློབས༔ མཁྱེན་གཟིགས་ཡེ་ཤེས་མངོན་གྱུར་དངོས་གྲུབ་སྩོལ༔ དེ་ལྟར་གསོལ་བ་བཏབ་པའི་མཐུ་བྱིན་གྱིས༔ བདག་དང་མཐའ་ཡས་འགྲོ་བ་མ་ལུས་པའི༔ སྒྲིབ་གཉིས་བག་ཆགས་དྲི་མ་ཀུན་དག་ནས༔ གཞོན་ནུ་བུམ་སྐུར་ཡང་དག་སངས་རྒྱས་ཤོག༔ ཁྱད་པར་འཇམ་དཔལ་གསང་འདུས་སྒྱུ་འཕྲུལ་ལྷ༔ བསྒྲུབ་པ་ཙམ་གྱིས་འབྲས་བུ་མངོན་གྱུར་ཏེ༔ སྒོ་གསུམ་རྡོ་རྗེ་གསུམ་གྱི་རོལ་པ་རུ༔ སྨིན་ཅིང་གྲོལ་ནས་ཡེ་ཤེས་སྒྱུ་མའི་སྐུ༔ འཇམ་དཔལ་དཔའ་བོའི་གོ་འཕང་མྱུར་ཐོབ་ཤོག༔ ཅེས་གཞུང་ལས་བསྡུས་ཏེ་ཉེར་མཁོའི་ཆེད་དུ་བདུད་འཇོམས་རྡོ་རྗེས་བྲིས་པ་འདི་ཡང་སློབ་བུ་བློ་གྲོས་ཀྱིས་བསྐུལ་ངོར་དོན་ཡོད་པའི་ཕྱིར་རོ།།དགེའོ།།དགེའོ།།དགེའོ།།།།