TTDL-ZABTER-02-KHA-006

༠༠༠༠བརྡ་ཡིག༡༡༣ཟབ་གསང་མཁའ་འགྲོའི་སྙིང་ཐིག་ལས༔ འཇམ་དཔལ་གསང་བ་འདུས་པའི་ཛཔྲ་དགོངས་ཡེ་ཤེས་དྲྭ་བ་བཞུགས་སོ༔ ༠༠༠༠བརྡ་ཡིག༡༡༣ན་མོ་གུ་རུ་པདྨ་ཀ་ར་ཡེ༔ ༠༠༠༠བརྡ་ཡིག༡༡༣བསྒྲུབ་པའི་སྒོ་རུ་འཇུག་པའི་སྐྱེས་བུ་རྣམས༔ ཁ་དང་ལག་པའི་བྱ་བྱེད་ཙམ་མིན་པར༔ སྒོ་གསུམ་རྡོ་རྗེ་གསུམ་གྱི་གྲོང་འཇུག་པའི༔ བསྐྱེད་རིམ་གནད་དང་ལྡན་པར་བྱ་བ་ནི༔ སྒྲུབ་པ་ཀུན་གྱི་གནད་དང་ཆིངས་གཅིག་ཡིན༔ དེ་ཕྱིར་རང་ཉིད་ཡེ་ཤེས་ལྷར་བསྐྱེད་དེ༔ ལྷ་ཡི་ང་རྒྱལ་བརྟན་པོ་རབ་ཏུ་བཟུང་༔ ཧཱུྃ༔ རང་ཉིད་འཇམ་དཔལ་ཡབ་ཡུམ་གྱི༔ སྤྲུལ་པ་སྒྱུ་འཕྲུལ་རོལ་པའི་ལྷ༔ ཉི་མའི་ཟེར་དང་འོད་ཇི་བཞིན༔ དོན་ལ་གཉིས་མེད་ཆེན་པོར་རིག༔ གསང་འདུས་ཐུགས་ཀར་པད་ཟླའི་སྟེང་༔ ཤེས་རབ་རལ་གྲིའི་ནང་ཁོངས་སུ༔ ཐུགས་སྲོག་ས་བོན་དྷཱིཿཡིག་སེར༔ དེ་མཐར་གསང་སྔགས་རིག་སྔགས་དང་༔ གཟུངས་སྔགས་སྙིང་པོ་གཅིག་དྲིལ་བའི༔ ངོ་བོ་ཡི་གེ་འབྲུ་བདུན་པོ༔ འཛམ་བུའི་ཆུ་གསེར་གྱིས་བྲིས་ལྟར༔ གཡས་སུ་བསྐོར་བའི་འོད་ཟེར་གྱིས༔ རབ་འབྱམས་རྒྱལ་བ་རྟེན་བརྟེན་པར༔ མ་ལུས་འཇམ་དཔལ་གསང་འདུས་ཀྱི༔ སྒྱུ་འཕྲུལ་འཁོར་ལོའི་རྣམ་རོལ་དུ༔ རྒྱུན་ཆད་མེད་པར་ཡང་ཡང་བསྟིམ༔ སྒོ་གསུམ་རྡོ་རྗེ་གསུམ་དུ་འཕོས༔ གཏན་དུ་མི་འབྲལ་དམ་བཅའ་འོ༔ དེ་ནས་བསྐུལ་བ་ནི༔ ཧཱུྃ་༔ བསྐུལ་ལོ་ཐུགས་དམ་གནས་ནས་བསྐུལ༔ བཞེངས་ཤིག་ཆོས་ཀྱི་དབྱིངས་ནས་བཞེངས༔ ནམ་མཁའ་ཁྱབ་པར་གར་བསྒྱུར་ཅིང་༔ འབྲུག་སྟོང་ལྡིར་བཞིན་སྔགས་སྒྲ་སྒྲོགས༔ འཁོར་བ་ཡོངས་སྒྲོལ་ཡེ་ཤེས་བསྐྱེད༔ སྒྲུབ་མཆོག་རྣལ་འབྱོར་འཁོར་བཅས་ཀྱི༔ བསྒོམ་བཟླས་དམིགས་པའི་རྣོ་ནུས་བསྐྱེད༔ སྒོ་གསུམ་རྡོ་རྗེ་གསུམ་དང་ནི༔ འཁོར་བ་མྱང་འདས་ཆེན་པོར་སྒྲོལ༔ ཆོས་ཉིད་རོལ་པའི་སྔགས་སྒྲ་སྒྲོགས༔ ཡུམ་གྱི་ཐུགས་ཀར་པད་ཉིའི་སྟེང་༔ ཡི་གེ་ཧྲཱིཾཿཡིག་ལྗང་སྔོན་ལ༔ འོད་ཟེར་མགལ་མེ་ལྟ་བུས་བསྐོར༔ དབྱིངས་ལས་དབྱངས་ཅན་སྤྱན་དྲངས་བསྟིམས༔ ཨོཾ་ཨ་ར་པ་ཙ་ན་དྷཱིཿཧྲཱིཾཿདེ་ལྟར་བསྙེན་པའི་དུས་སུ་རང་ཉིད་འཇམ་དཔལ་དམར་སེར་དུ་གསལ་བའི་ཐུགས་ཀར་པདྨ་དང་ཟླ་བ་རྒྱས་པའི་ལྟེ་བར་གསེར་གྱི་རལ་གྲི་སོར་བཞི་བའི་ཡུ་བ་གདན་ལ་བརྟེན་ཅིང་རྩེ་ལ་ཡེ་ཤེས་ཀྱི་མེ་དཔུང་འབར་བ༔ སོ་གཅིག་སྔ་སོར་བསྟན་ཅིང་༔ སོ་གཅིག་རྒྱབ་ཏུ་བསྟན་པའི་ཡུ་བའི་སྟེང་རལ་གྲིའི་ནང་ཁོངས་སུ་དྷཱིཿཡིག་སེར་པོ་འཛམ་བུའི་ཆུ་གསེར་གྱིས་བྲིས་པ་ལྟ་བུའི་མཐར་སྔགས་ཀྱི་ཕྲེང་བ་གཡས་སུ་འཁོར་བར་གསལ༔ ཡུམ་གྱི་ཐུགས་ཀར་པདྨ་འདབ་མ་བརྒྱད་དུ་གྱེས་པའི་ལྟེ་བར་ཉི་མའི་གདན་ལ་ཡི་གེ་ཧྲཱིཾཿལྗང་སྔོན་གྱི་མཐར་འོད་ཟེར་ཁ་དོག་ལྔ་དང་ལྡན་པ་མགལ་མེའི་འཁོར་ལོ་བསྐོར་བ་ལྟར་ཀྱི་ལི་ལི་འཁོར་བར་བསམ་ལ༔ རིགས་བཞི་སྒོ་སྐྱོང་དང་བཅས་པ་གཙོ་བོའི་ཡེ་ཤེས་ཀྱི་རང་གདངས་ཉི་མ་དང་ཉི་ཟེར་ཉི་འོད་ལྟ་བུ་དོན་ལ་ལྷ་སྔགས་ཐ་མི་དད་པ་ལ༔ གཞན་གྱིས་བལྟ་སྣང་ལ་གཅིག་ལས་དུ་མ་སྣང་བ་རྒྱ་མཚོའི་གཟའ་སྐར་མང་དུ་སྣང་ཡང་དོན་ལ་ཆུ་ཉིད་ལས་གཞན་དུ་མ་གྲུབ་པ་ལྟར༔ དུ་མ་སོ་སོ་རུ་སྣང་ཡང་དོན་ལ་གཙོ་བོ་ཉིད་ཀྱི་དབྱིངས་སུ་རོ་གཅིག་པ་རུ་ཤེས་པར་བྱའོ༔ དེ་ནས་རང་ཉིད་ལྷའི་ང་རྒྱལ་དང་མ་བྲལ་བ་གཞིར་བཞག་སྟེ༔ འོད་དང་འོད་ཟེར་རབ་ཏུ་འཕྲོས་པས་ཕྱོགས་བཅུའི་རྒྱལ་བ་སྲས་དང་བཅས་པའི་ཞིང་ཁམས་གཞལ་ཡས་ཁང་ལྷ་དང་བཅས་པ་ཐམས་ཅད་མགོན་པོ་འཇམ་པའི་དབྱངས་ཀྱི་རྟེན་དང་བརྟེན་པའི་འཁོར་ལོའི་རྣམ་པར་མཚོ་ཆེན་པོ་ལ་ཁ་ཆར་བབ་པ་ལྟར་བདག་མདུན་ལ་སིབ་སིབ་ཐིམ་པར་ཡང་ཡང་བར་སྐབས་རྣམས་སུ་གྲངས་མང་པོར་བསམ་པ་གནད་དུ་ཤེས་པར་བྱའོ༔ འདི་ནི་བསྙེན་པ་ཡིན་ཏེ་ལྷ་སྣང་དང་བྲལ་མི་རུང་བ་ཡིན་པས་ཤེས་པར་བྱའོ༔ འདི་ཡི་དུས་སུ་སྒོ་གསུམ་ལྷ་རུ་འཕོ་བ༔ ལྷ་ལ་ཡེ་ཤེས་པ་དབབ་པ༔ སྒྲ་གྲགས་གསུང་གི་འཁོར་ལོ༔ དྲན་རྟོག་ཐུགས་ཀྱི་རོལ་པ་རུ་ཤེས་པར་བྱའོ༔ བསྐུལ་བ་ཙམ་གྱིས་དུས་གསུམ་གྱི་རྒྱལ་བ་སྲས་དང་བཅས་པའི་ཐུགས་དམ་གྱི་རྒྱུད་རབ་ཏུ་བསྐུལ་ཏེ་ཆོས་ཀྱི་དབྱིངས་ལས་གཟུགས་ཀྱི་སྐུ་འཇམ་དཔལ་སྒྱུ་འཕྲུལ་རོལ་པའི་སྐུར་བཞེངས་ཏེ་སྣང་སྲིད་ཀྱི་ཁམས་ཐམས་ཅད་གང་ནས་གྲགས་སྟོང་སྔགས་ཀྱི་སྒྲ་འབྲུག་སྟོང་ལྡིར་བ་ལྟར་སྒྲོགས་པས་བདག་ཉིད་ལུས་ལྷ་རུ་བསྒྱུར་བ་དང་༔ ངག་སྔགས་ཀྱི་རོལ་པ་དང་༔ ཡིད་ཆོས་ཉིད་ཀྱི་རོལ་པར་སངས་རྒྱས་པར་བསམ་ལ༔ མི་ཚིག་གིས་བར་མ་ཆད༔ སྟན་གྱི་དྲོད་མི་ཡལ༔ ཤེས་པ་གཞན་དུ་མི་གཡེང་བར་བསྒྲུབ་པར་བྱའོ༔ རང་གི་སྒོ་གསུམ་ལྷར་གསལ་ཏེ༔ ཡ་སོ་ཐམས་ཅད་དཔའ་བོ༔ མ་སོ་ཐམས་ཅད་དཔའ་མོ༔ ལྕེ་འཇམ་དཔལ་སྨྲ་བའི་སེང་གེ༔ བ་སྤུ་ཐམས་ཅད་ཀྱང་དེ་བཞིན་བྱང་ཆུབ་སེམས་དཔའ་དང་སེམས་མའི་རང་བཞིན་དུ་གྱུར་བ་དང་༔ རང་ལུས་ཀྱང་འཇམ་དཔལ་ཡེ་ཤེས་སེམས་དཔའི་སྐུ་རྡུལ་ཕྲ་རབ་ཀྱི་ཆ་ཙམ་ཚོགས་པའི་ཕུང་པོར་བསྒོམ༔ དེ་དག་ཐམས་ཅད་ཀྱང་གསུང་གྲགས་སྟོང་སྔགས་ཀྱི་སྒྲ་དི་རི་རི་སྒྲོགས་པར་མོས་ལ་བསྙེན་པར་བྱའོ༔ རིལ་བུའི་སྐབས་སུ་ཡང་༔ ཧཱུྃ་༔ རང་ཉིད་ཡེ་ཤེས་སྒྱུ་འཕྲུལ་ལྷའི༔ ཐུགས་རྗེའི་རང་གདངས་རོལ་པ་ལས༔ བྱད་དང་མེ་ལོང་ཇི་བཞིན་དུ༔ མདུན་གྱི་དཀྱིལ་འཁོར་རྟེན་བརྟེན་པར༔ རང་བྱུང་རང་ཤར་ཆེན་པོར་བསྒོམ༔ ཨོཾ་ཨ་ར་པ་ཙ་ན་དྷཱིཿཧྲཱིཾཿསྐད་ཅིག་གིས་དུས་གསུམ་གྱི་རྒྱལ་བ་སྲས་དང་བཅས་པའི་གཟི་བྱིན་ནུས་པ་ཐམས་ཅད་བུམ་པ་ལ་ཐིམ་པས་འོད་དུ་མེར་གྱིས་ཞུ་ནས་ཡེ་ཤེས་ལྔ་ལྡན་རང་བྱུང་ལྷུན་གྱིས་གྲུབ་པའི་གཞལ་ཡས་ཁང་ཡངས་ཤིང་རྒྱ་ཁྱོན་ཆོས་ཀྱི་དབྱིངས་དང་མཉམ་པ་ལ་མཚན་ཉིད་བཀོད་པ་ལྷུན་གྱིས་གྲུབ་པའི་ནང་དུ་རིལ་བུ་རྣམས་འཇམ་དཔལ་ཡེ་ཤེས་སེམས་དཔའི་སྐུ་གསུང་ཐུགས་ཡོངས་སུ་རྫོགས་པ་རེ་རེར་གྱུར་པའི་གནས་གསུམ་རྡོ་རྗེ་གསུམ་གྱི་སྙིང་པོ་ལས་འོད་འཕྲོས་པས་ཕྱོགས་བཅུ་དུས་བཞིའི་རྒྱལ་བ་སྲས་དང་བཅས་པ་ཐམས་ཅད་སྤྱན་དྲངས་ཏེ་རྒྱ་མཚོ་ཆེན་པོ་ལ་ཁ་ཆར་བབ་པ་ལྟར་བསྐྱེད་པའི་ལྷ་རྣམས་ལ་སིབ་སིབ་ཏུ་ཐིམ་པར་བསམ་ལ༔ ན་མོ་མཉྫུ་ཤྲཱི་སརྦ་ས་པ་རི་ཝཱ་ར་བཛྲ་ས་མ་ཡ་ཛ་ཛ༔ ས་མ་ཡ་ཧྲཱིཾཿཛཿཨ་བེ་ཤ་ཡ་ཨ་ཨ༔ དེ་ནས་བུམ་པ་ལ་ཡང༔ ཨོཾ་མ་ཧཱ་ཤུ་ནྱ་ཏཱ་སོགསབུམ་པ་མི་དམིགས་པ་སྟོང་ཉིད་དུ་གྱུར༔ སྟོང་པའི་ངང་ལས་ཡེ་ཤེས་ལྔ་ལས་གྲུབ་པའི་རང་བཞིན་ཕྱི་བུམ་པའི་དབྱིབས་མཛེས་ཤིང་ཡིད་དུ་འོང་བ༔ ཁ་གཡེལ་བ༔ མགྲིན་པ་ཕྲ་བ༔ ལྟོ་བ་ལྡིར་བ༔ ཞབས་ཞུམ་པ༔ དཔག་བསམ་ཤིང་གི་ཁ་རྒྱན་བྱས་ཤིང་༔ ལྷའི་དར་པཉྩ་ལི་ཀའི་མགུལ་ཆིངས་བྱས་པ༔ རིན་པོ་ཆེ་སྣ་ཚོགས་ཀྱི་དྲྭ་བ་དང་དྲྭ་ཕྱེད་འཕྱང་བ༔ ཡེ་ཤེས་ཀྱི་རང་མདངས་འོད་ཀྱི་པ་ཏྲ་རིས་སུ་འཁྱིལ་བའི་བར་མཚམས་སུ་ཕྱག་མཚན་འཁོར་ལོ༔ རྡོ་རྗེ༔ རིན་ཆེན༔ པདྨ༔ རྒྱ་གྲམ་གྱི་གཟུགས་རང་བྱུང་ཤར་བའི་ནང་དུ་བུམ་ཆུ་བདུད་རྩིའི་རྒྱ་མཚོ་ཆེན་པོ་འཁྱིལ་བའི་ཀློང་དུ་པཾ་ལས་པདྨའི་སྡོང་པོ་ཡན་ལག་རགས་ལ་ལོ་འདབ་རྒྱས་པའི་སྟེང་དུ་ཟླ་བའི་གདན་ལ་འཇམ་དཔལ་ཡེ་ཤེས་སེམས་དཔའ་སྐུ་མདོག་དམར་སེར་མཚན་དང་དཔེ་བྱད་ཀྱིས་སྤྲས་ཤིང་གཞོན་ནུ་བཅུ་དྲུག་ལོན་པའི་ངང་ཚུལ་ཅན་གཡས་ཤེས་རབ་ཀྱི་རལ་གྲི་དང་༔ གཡོན་པོ་ཏི་བསྣམས་ཤིང་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ༔ ལོངས་སྤྱོད་རྫོགས་སྐུའི་ཆས་ཐམས་ཅད་ཀྱིས་བརྒྱན་པ༔ ཡུམ་དབྱངས་ཅན་སྔོན་མོ་དང་འཁྲིལ་བ་འཇའ་ཚོན་འོད་ལྔའི་ཀློང་དུ་བཞུགས་པར་བསྒོམ༔ ཤར་དུ་ཐུགས་ཀྱི་སྤྲུལ་པ་འཇམ་དབྱངས་དཀར་པོ་ཡབ་ཡུམ༔ ལྷོ་རུ་ཡོན་ཏན་གྱི་སྤྲུལ་པ་འཇམ་དབྱངས་སེར་པོ་ཡབ་ཡུམ༔ ནུབ་ཏུ་གསུང་གི་སྤྲུལ་པ་འཇམ་དབྱངས་དམར་པོ་ཡབ་ཡུམ༔ བྱང་དུ་ཕྲིན་ལས་ཀྱི་སྤྲུལ་པ་འཇམ་དབྱངས་ནག་པོ་ཡབ་ཡུམ༔ མཚམས་བཞིར་ཚད་མེད་རྣམ་བཞིའི་རང་གཟུགས་གཤིན་རྗེ་གཤེད་ཆེན་རྣམ་བཞི༔ གཞན་ཡང་ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་མ་ལུས་ཤིང་ལུས་པ་མེད་པ་རྣམས་དམ་ཚིག་གི་དབང་གིས་ཐུགས་དམ་གྱི་རྒྱུད་རབ་ཏུ་བསྐུལ་ནས་སྐད་ཅིག་ཉིད་དུ་སྤྱན་དྲངས་ཏེ་བསྟིམ་མོ༔ བཛྲ་ས་མ་ཡ་ཛཿཛ༔ ཞེས་སྤྱན་འདྲེན་བཞུགས་གསོལ་སོགས་གཞུང་བཞིན་བྱའོ༔ དེ་ནས་མདུན་བསྐྱེད་བྱ་བ་ལ༔ རང་ཉིད་ལྷའི་དཀྱིལ་འཁོར་རྟེན་དང་བརྟེན་པར་བཅས་པ་ཐམས་ཅད་གསལ་བ་ལས་འོད་འཕྲོས་པས་འོད་ཕུང་ཡོངས་སུ་གྱུར་པ་ལས་བྱུང་བའི་མདུན་བསྐྱེད་དངོས་གྲུབ་འབྱུང་གནས་ཀྱི་དཀྱིལ་འཁོར་ཡོངས་སུ་རྫོགས་པར་བསྐྱེད་ལ༔ ཧཱུྃ༔ རང་ཉིད་གསང་འདུས་སྒྱུ་འཕྲུལ་ལྷའི༔ ཡེ་ཤེས་རོལ་པའི་རང་གདངས་ལས༔ རྣམ་དག་བདེ་ཆེན་ཞིང་ཁམས་སུ༔ ལྷུན་གྲུབ་བཀོད་པ་རབ་རྫོགས་པའི༔ ཡེ་ཤེས་ལྔ་ལྡན་གཞལ་ཡས་དབུས༔ ཆགས་བྲལ་པདྨ་ཟླ་གདན་ལ༔ དྷཱིཿལས་མགོན་པོ་འཇམ་དཔལ་དབྱངས༔ དམར་སེར་ལོ་བརྒྱད་གཞོན་ནུའི་ཚུལ༔ མཚན་དང་དཔེ་བྱད་ཡོངས་སུ་རྫོགས༔ ཞི་འཛུམ་མཛེས་པའི་ལང་ཚོ་རྒྱས༔ ཕྱག་གཡས་ཤེས་རབ་རལ་གྲི་ཕྱར༔ གཡོན་པས་ཨུཏྤལ་གླེགས་བམ་བསྣམས༔ ཞབས་གཉིས་རྡོ་རྗེའི་སྐྱིལ་ཀྲུང་བཞུགས༔ ལོངས་སྤྱོད་རྫོགས་སྐུའི་ཆས་ཀྱིས་བརྒྱན༔ ནམ་མཁའི་དབྱིངས་ཅན་སྔོན་མོས་འཁྱུད༔ ཕྱག་གཡས་རལ་གྲི་གཡོན་ཨུཏྤལ༔ མཛེས་སྡུག་བལྟ་བའི་ཆོག་མི་ཤེས༔ ཟུང་འཇུག་བདེ་བ་ཆེན་པོར་རོལ༔ ཤར་དུ་དྲི་མེད་རྡོ་རྗེ་དཀར༔ ཆུ་ཁམས་དབྱངས་ཅན་དཀར་མོ་སྦྱོར༔ ལྷོ་རུ་ཡོན་ཏན་འབྱུང་གནས་སེར༔ ས་ཁམས་དབྱངས་ཅན་སེར་མོས་འཁྱུད༔ ནུབ་ཏུ་སྨྲ་བའི་སེང་གེ་དམར༔ མེ་ཁམས་དབྱངས་ཅན་དམར་མོས་འཁྱུད༔ ཀུན་ཀྱང་མཚན་དང་དཔེ་བྱད་བརྒྱན༔ རལ་གྲི་གཡས་ལ་པོ་ཏི་གཡོན༔ ལོངས་སྐུའི་རྒྱན་རྫོགས་གཞོན་ནུའི་ཚུལ༔ ཡེ་ཤེས་འཇའ་གུར་ཀློང་དཀྱིལ་དུ༔ ཞབས་གཉིས་རྡོ་རྗེའི་སྐྱིལ་ཀྲུང་བཞུགས༔ བྱང་དུ་མངོན་སྤྱོད་དྲག་པོ་རྩལ༔ མཐིང་ནག་ཁྲོ་གཏུམ་རྔམས་པའི་སྐུ༔ རལ་གྲི་གཡས་ལ་པོ་ཏི་གཡོན༔ ཞབས་གཉིས་ཕྱེད་པའི་སྐྱིལ་ཀྲུང་བཞུགས༔ མེ་ཡི་རལ་པ་གནམ་དུ་གཟིང་༔ སྟག་ཤམ་གསོལ་ཞིང་ཐོད་སྦྲུལ་བརྒྱན༔ རླུང་ཁམས་ནོར་རྒྱུན་ལྗང་མོས་འཁྲིལ༔ ལྕགས་མདའ་གཡས་ལ་ནོར་བུ་གཡོན༔ གཅེར་བུ་རུས་པའི་རྒྱན་གྱིས་སྤྲས༔ ཡེ་ཤེས་མེ་དཔུང་ཀློང་དུ་བསྐྱེད༔ ཤར་སྒོར་གཤིན་རྗེ་ཞི་བྱེད་དཀར༔ རལ་གྲི་གཡས་ལ་ལྕགས་ཀྱུ་གཡོན༔ ལྷོ་རུ་གཤིན་རྗེ་འཆིང་བྱེད་སེར༔ རལ་གྲི་གཡས་ལ་ཞགས་པ་གཡོན༔ ནུབ་ཏུ་གཤིན་རྗེ་རྨོངས་བྱེད་དམར༔ རལ་གྲི་གཡས་ལ་ལྕགས་སྒྲོག་གཡོན༔ བྱང་དུ་གཤིན་རྗེ་མྱོས་བྱེད་ནག༔ རལ་གྲི་གཡས་ལ་དྲིལ་བུ་གཡོན༔ ཀུན་ཀྱང་དུར་ཁྲོད་ཆས་རྫོགས་ཤིང་༔ ཁྲོ་གཏུམ་གྱད་ཀྱི་འདོར་སྟབས་བསྒྲད༔ ཡེ་ཤེས་མེ་དཔུང་ཀློང་དུ་འགྱིང་༔ དཀྱིལ་འཁོར་བར་ཁྱམས་ཁོར་ཡུག་ཏུ༔ རྩ་གསུམ་དམ་ཅན་སྲུང་མར་བཅས༔ མ་འདྲེས་ཡོངས་རྫོགས་ཆེན་པོར་གསལ༔ གནས་གསུམ་རྡོ་རྗེའི་སྙིང་པོ་ལས༔ འོད་འཕྲོས་དབྱིངས་ནས་སྤྱན་དྲངས་བསྟིམས༔ སྤྱན་འདྲེན་ནས་བཟུང་ལས་གཞུང་བསྲང་༔ དེ་ནས་བསྒྲུབ་ལ་འཇུག་པ་ལ༔ ཧཱུ༔ རང་ཉིད་ལྷ་ཡི་ཐུགས་ཀ་རུ༔ ཐུགས་སྲོག་མཐའ་མར་སྔགས་ཕྲེང་བ༔ གདན་ནས་འཕགས་ཏེ་གཡས་སུ་འཁོར༔ འོད་དང་འོད་ཟེར་རབ་འཕྲོས་པས༔ ཕྱོགས་བཅུའི་རྒྱལ་བ་སྲས་བཅས་དང་༔ ལྷ་དང་དྲང་སྲོང་པཎ་གྲུབ་ཚོགས༔ མ་ལུས་ལུས་པ་མེད་པ་ཡི༔ སྐུ་གསུང་ཐུགས་ཡོན་ཕྲིན་ལས་ཀྱི༔ དབང་བྱིན་དངོས་གྲུབ་ཐམས་ཅད་དང་༔ མཁྱེན་བརྩེ་ནུས་པ་མ་ལུས་ཀུན༔ འོད་ལྔའི་རྣམ་པར་སྤྱན་དྲངས་ཏེ༔ བདག་དང་བསྒྲུབ་པའི་རྫས་ལ་བསྟིམས༔ ཨོཾ་ཨ་ར་པ་ཙ་ན་དྷཱིཿཧྲཱིཾཿམདུན་དུ་བུམ་པ་གཞལ་ཡས་ཁང་གི་ནང་དུ་རིལ་བུ་རྣམས་འཇམ་དཔལ་ཡབ་ཡུམ་རེ་རེ་བསྒོམ་པའི་གནས་གསུམ་དུ་ཡི་གེ་གསུམ་ལས་འོད་འཕྲོས་པས་སྐུ་གསུམ་དག་པའི་ཞིང་ཁམས་ནས་ཡེ་ཤེས་པ་དཔག་ཏུ་མེད་པ་སྤྱན་དྲངས་ཏེ་རྒྱ་མཚོ་ཆེན་པོ་ལ་ཁ་ཆར་བབ་པ་བཞིན་དུ་གཉིས་སུ་མེད་པར་ཐིམ་པར་བསྒོམས་ལ༔ ཨོཾ་ཨ་ར་པ་ཙ་ན་དྷཱིཿཧྲཱིཾཿདེ་ལྟར་སྤྲོ་བསྡུ་ལ་ནན་དུ་འབད་པར་བྱའོ༔ སླར་ཡང་བསྒྲུབ་པ་བྱ་བ་ལ༔ ཧཱུ༔ རང་གི་སྙིང་གའི་སྲོག་ཡིག་ལས༔ འོད་ཀྱི་ཟེར་ཐག་འཇའ་ལྟ་བུ༔ རལ་གྲིའི་ཁོངས་བརྒྱུད་རྩེ་ནས་ཐོན༔ ཡབ་ནས་ཡུམ་གྱི་ཞལ་དུ་བཞུགས༔ སྐུ་ཡི་དབྱིབས་བརྒྱུད་པདྨོ་ནས༔ རྡོ་རྗེའི་ཁོང་གསེང་ལམ་ཞུགས་ཏེ༔ ཐུགས་ཀའི་དྷཱིཿཡིག་ལ་ཐིམ་འཁོར༔ དགའ་བ་བཞི་ཡི་བྱེད་ལས་ཀྱིས༔ བདེ་ཆེན་ཡེ་ཤེས་འབར་བར་བསྒོམ༔ ཨོཾ་ཨ་ར་པ་ཙ་ན་དྷཱིཿཧྲཱིཾཿསླར་ཡང་བསྒྲུབ་པ་བྱ་བ་ལ༔ ཧཱུ༔ བདག་ཉིད་གསང་འདུས་ཡབ་ཡུམ་གྱི༔ བདེ་དང་སྟོང་པའི་ཆོ་འཕྲུལ་ལས༔ ཐུགས་སྲོག་སྔགས་ཀྱི་འོད་ཟེར་ཐིག༔ མདུན་བསྐྱེད་ལྷ་ཡི་ཞལ་དུ་ཞུགས༔ སྦྱོར་མཚམས་བརྒྱུད་དེ་ཡང་དེ་བཞིན༔ བདག་བསྐྱེད་ཟུང་འཇུག་སྦྱོར་མཚམས་བརྒྱུད༔ བདེ་སྟོང་ཡེ་ཤེས་རབ་འབར་བའི༔ སྟོབས་ཀྱིས་འོད་ཟེར་རབ་འཕྲོས་པས༔ ཁམས་གསུམ་བརྟན་གཡོ་ཐམས་ཅད་ཀུན༔ རྨི་ལམ་དབྱིངས་སུ་སད་པ་ལྟར༔ ཞིང་དང་གཞལ་ཡས་ཡེ་ཤེས་ལྷའི༔ རོལ་པ་ཆེན་པོར་དག་པར་སྦྱོར༔ སྣང་བ་སྐུ་དང་སྒྲ་གྲགས་གསུང་༔ དྲན་རྟོག་ཐུགས་ཀྱི་རོལ་པར་གསལ༔ ཨོཾ་ར་པ་ཙ་ན་དྷཱིཿཧྲཱིཾཿདེ་ལྟར་བཟླས་པའི་ཚེ་ན་བདག་བསྐྱེད་གསང་འདུས་ཡབ་ཡུམ་སྦྱོར་བའི་བདེ་སྟོང་ཡེ་ཤེས་ཆེན་པོའི་ཤུགས་འབྱུང་ལས་འོད་ཟེར་འཇའ་ཡི་ཐིག་པ་ལྟ་བུར་མདུན་བསྐྱེད་ཀྱི་ལྷ་རྣམས་ཀྱི་ཞལ་དུ་ཞུགས་ཏེ་ཡབ་ཡུམ་གྱི་བདེ་སྟོང་བྱང་ཆུབ་སེམས་ཀྱི་རོལ་པའི་འོད་ཟེར་ཁ་དོག་དཀར་དམར་གྱི་རྣམ་པ་སྦྱོར་མཚམས་ནས་ཐོན་ཏེ་བདག་བསྐྱེད་ཡབ་ཡུམ་གྱི་སྦྱོར་མཚམས་ནས་ཞུགས་ཏེ་བར་མ་ཆད་པར་མགལ་མེའི་འཁོར་ལོ་བཞིན་དུ་འཁོར་བའི་རང་གདངས་འོད་ཀྱི་ཕུང་པོ་མཁའ་ལ་ཉི་གཞོན་ཤར་བ་བཞིན་དུ་འཕྲོས་ཤིང་འབར་ཏེ་ཁམས་གསུམ་ཐམས་ཅད་ཡོངས་སུ་ཁྱབ་ནས་ཕྱི་སྣོད་ཀྱི་འཇིག་རྟེན་ཐམས་ཅད་འོག་མིན་རྣམ་མཛེས་ཆེན་པོ༔ ནང་བཅུད་ཀྱི་སེམས་ཅན་ཐམས་ཅད་འཇམ་དཔལ་སྒྱུ་འཕྲུལ་རོལ་པའི་ལྷ་ཚོགས༔ སྒྲ་རུ་གྲགས་པ་ཐམས་ཅད་གྲགས་སྟོང་སྔགས་ཀྱི་རོལ་པ༔ དྲན་རྟོགས་གང་ཤར་ཐམས་ཅད་ཐུགས་ཆོས་ཉིད་ཀྱི་རོལ་པར་བསྒོམ་ལ༔ རང་གིས་སྔགས་བཟླས་པ་ཙམ་གྱིས་ཚོགས་པས་རམ་བུ་བཏེགས་པ་ལྟར་སྣང་བ་ལྷ་རུ་གྱུར་པ་དེ་རྣམས་ཀྱི་གྲགས་སྟོང་སྔགས་ཀྱི་ཛཔྲ་དབྱངས་བུང་བའི་ཚང་ཞིག་པ་ལྟར་འུར་འུར་དིར་དིར་སྒྲོགས་པར་བསྒོམ་པ་དང་༔ མདུན་བསྐྱེད་བུམ་པའི་གཞལ་ཡས་ཁང་གི་རིལ་བུ་ལྷ་རུ་གསལ་བ་རྣམས་རེ་རེ་ལས་ཀྱང་བརྒྱ་སྟོང་ཁྲི་འབུམ་གྲངས་མེད་དུ་འཕྲོས་ཏེ་བུམ་པ་གཞལ་ཡས་ཁང་དུ་གསལ་བ་ཆེར་སོང་བས་ཆོས་ཀྱི་དབྱིངས་དང་མཉམ་པར་གྱུར་པའི་ནང་སྟོང་ཁམས་ཐམས་ཅད་འཇམ་དཔལ་སྒྱུ་འཕྲུལ་དྲྭ་བའི་རོལ་པར་གྱུར་ཏེ་ཀུན་གྱིས་སྔགས་ཀྱི་སྒྲ་དི་རི་རི་སྒྲོགས་པའི་སྟོབས་ཀྱིས་མཐུ་སྟོབས་ནུས་པ་དབང་བྱིན་ཡེ་ཤེས་རབ་ཏུ་བསྐྱེད་ཅིང་གོང་ནས་གོང་དུ་འཕེལ་ཞིང་རྒྱས་པར་བསྒོམ་ལ༔ ཨོཾ་ཨ་ར་པ་ཙ་ན་དྷཱིཿཧྲཱིཾཿཨ་ར་པ་ཙ་མི་དྷཱིཿཧྲཱི་ད་ཡེ་སྭཱ་ཧཱ༔ སརྦ་པྲཛྙཱ་ཛྙཱ་ན་སིདྡྷི་སིདྡྷི་ཡེ་སྭཱ་ཧཱ༔ དེ་ལྟར་བསྒྲུབ་པ་རྣམ་པ་གསུམ་གྱི་སྐབས་ཀུན་ཏུ་འོད་ཟེར་དཔག་ཏུ་མེད་པ་ཕྱོགས་བཅུར་འཕྲོས་པས་འཇམ་དཔལ་སྒྱུ་འཕྲུལ་རོལ་པའི་དཀྱིལ་འཁོར་ལ་སོགས་པའི་ཕྱོགས་བཅུའི་རྒྱལ་བ་སྲས་དང་བཅས་པའི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་ཐམས་ཅད་དང་༔ པཎ་གྲུབ་རིག་འཛིན་སོ་སྐྱེ་རྣམས་ཀྱི་ཤེས་རབ་དང་ཡེ་ཤེས༔ འབྱུང་བ་བཞིའི་བཅུད་དང་དྭངས་མ་ཐམས་ཅད་རྗེས་ཤུལ་ལྷག་མ་ཙམ་ཡང་མ་ལུས་པ་འོད་ཀྱི་རྣམ་པར་བསྡུས་ཏེ་རང་དང་བསྒྲུབ་རྫས་ལ་བསྟིམ་པས་ཤེས་རབ་དང་ཡེ་ཤེས་ཆེན་པོ་རབ་ཏུ་འབར་ཞིང་རྒྱས་པར་བསྒོམ་པ་གནད་དུ་ཤེས་པར་བྱའོ༔ སྔགས་བཟླས་པའི་མཐུ་བྱིན་གྱིས་སྒོ་གསུམ་རྡོ་རྗེ་གསུམ་གྱི་རོལ་པར་བསྒྱུར་ཏེ་གཟི་བྱིན་རབ་ཏུ་འབར་བར་བསྒོམ་བའི་ངང་ནས་བཟླ་བར་བྱའོ༔ དེ་ནས་ལས་ལ་སྦྱོར་བ་ནི༔ སྔ་དྲོ་ཞི་བའི་དུས་སུ༔ རང་ཉིད་འཇམ་དཔལ་དཀར་པོ་ལོངས་སྤྱོད་རྫོགས་པའི་ཆས་ཀྱིས་བརྒྱན་པ༔ གཡས་པས་རྡོ་རྗེས་ཡུ་བ་བྱས་པའི་རལ་གྲི་དང་༔ གཡོན་ཨུཏྤལ་དཀར་པོའི་སྟེང་དུ་བརྒྱད་སྟོང་པའི་གླེགས་བམ་བསྣམས་པའི་ཆོས་ཀྱི་འོད་ཟེར་ཆེན་པོས་སེམས་ཅན་ཐམས་ཅད་ཀྱི་བློའི་མ་རིག་པའི་མུན་པ་སེལ་བ༔ ཡུམ་དབྱངས་ཅན་དཀར་མོ་གཡས་རལ་གྲི་དང་༔ གཡོན་ཨུཏྤལ་བསྣམས་པ་དར་དང་རིན་པོ་ཆེའི་རྒྱན་གྱིས་བརྒྱན་པ་དང་འཁྲིལ་བ་ཡབ་ཡུམ་གཉིས་ཀ་གཞོན་ནུ་ལོ་བརྒྱད་ལོན་པའི་ཆ་ལུགས་ཅན་ཞི་བ་བསིལ་བ༔ དྭངས་གསལ་རྙོགས་པ་དང་བྲལ་བ་མཐོང་ན་མི་མཐུན་པ་མེད་པ་ཞིག་ཏུ་བསྒོམ་པའི་སྐུའི་ཆ་ཐམས་ཅད་ནས་འོད་དང་འོད་ཟེར་རབ་ཏུ་འཕྲོས་པས་ཕྱོགས་བཅུའི་བདེ་བར་གཤེགས་པ་ཐམས་ཅད་ལ་མཉེས་པས་མཆོད་ཅིང་དེ་དག་གི་ཐུགས་རྗེ་དང་བྱིན་རླབས་ཐམས་ཅད་དཀར་གསལ་འོད་ཀྱི་རྣམ་པར་སྤྱན་དྲངས་ཏེ་བདག་ལ་ཐིམ་པས་ནད་གདོན་སྡིག་སྒྲིབ་བག་ཆགས་ཐམས་ཅད་སངས་ཀྱིས་དག་ནས་ཞི་བའི་དབང་དང་དངོས་གྲུབ་ཐམས་ཅད་ཐོབ་པར་བསྒོམ༔ སླར་ཡང་འོད་ཟེར་རབ་ཏུ་འཕྲོས་པས་ཁམས་གསུམ་གྱི་སེམས་ཅན་ཐམས་ཅད་ཀྱི་ལས་ཉོན་སྒྲིབ་གཉིས་བག་ཆགས་དང་བཅས་པ་ཐམས་ཅད་སངས་ཀྱིས་དག་ནས་ཐམས་ཅད་གཉིད་བཙན་ཐབས་ཀྱིས་དཀྲོག་པ་བཞིན་དུ་ཡེ་ཤེས་ལྷའི་རྟེན་དང་བརྟེན་པའི་རང་བཞིན་དུ་སངས་རྒྱས་ཏེ་ཞི་བའི་ཕྲིན་ལས་ལྷུན་གྱིས་གྲུབ་པར་བསྒོམ་ལ༔ ཧཱུྃ་༔ རང་ཉིད་རྡོ་རྗེ་རྣོན་པོ་ནི༔ ཡབ་ཡུམ་གཉིས་སུ་མེད་པ་ཡི༔ སྐུ་གསུང་ཐུགས་ཀྱི་འོད་ཟེར་གྱིས༔ རྒྱལ་བ་མཆོད་ཅིང་དབང་བྱིན་བསྡུས༔ བདག་གི་སྒྲིབ་གཉིས་དྲི་མ་སྦྱངས༔ མར་འཕྲོས་འགྲོ་ཀུན་སྒྲིབ་གཉིས་སྦྱངས༔ མ་རིག་འཁྲུལ་པའི་སྣང་སེམས་ཀུན༔ སྒྱུ་མའི་འཁྲུལ་འཁོར་ཞིག་པ་ལྟར༔ དོན་གྱི་འོག་མིན་ཆེན་པོར་འཕོས༔ ཡེ་ཤེས་སྒྱུ་འཕྲུལ་རོལ་བའི་ལྷའི༔ རྟེན་དང་བརྟེན་པའི་རང་བཞིན་དུ༔ མངོན་གྱུར་ཆེན་པོར་རྫོགས་སངས་རྒྱས༔ ཨོཾཨ་ར་པ་ཙ་ན་དྷཱིཿཧྲཱིཾཿཨོཾ་ཝ་ཀྱཻ་དཾ་ན་མཿཞེས་བརྗོད་ཅིང་ཉིན་གུང་རྒྱས་པའི་ཕྲིན་ལས་བསྒྲུབ་པ་ལ༔ རང་ཉིད་འཇམ་དཔལ་སེར་པོ་མཚན་དང་དཔེ་བྱད་ཀྱིས་བརྒྱན་པ༔ གཡས་རིན་པོ་ཆེས་ཡུ་བ་བྱས་པའི་རལ་གྲི་དང་གཡོན་གོང་བཞིན་ཨུཏྤལ་དང་གླེགས་བམ་བསྣམས་པ༔ ཡུམ་དབྱངས་ཅན་སེར་མདོག་གཡས་རལ་གྲི་དང་གཡོན་ནོར་བུ་བསྣམས་པ་དང་མཉམ་པར་སྦྱོར་བ་ལོངས་སྤྱོད་རྫོགས་པའི་ཆས་ཐམས་ཅད་ཀྱིས་བརྒྱན་པར་བསྒོམ་ལ༔ སྐུའི་ཆ་ཐམས་ཅད་ནས་འོད་དང་འོད་ཟེར་དཔག་ཏུ་མེད་པ་འཕྲོས་པས་དུས་གསུམ་གྱི་རྒྱལ་བ་སྲས་དང་བཅས་པ་ཐམས་ཅད་ལ་མཉེས་པའི་མཆོད་པ་དཔག་ཏུ་མེད་པ་ཕུལ༔ ཐུགས་དམ་གྱི་རྒྱུད་རབ་ཏུ་བསྐུལ་ཏེ་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་ཐམས་ཅད་སེར་གསལ་འོད་ཀྱི་རྣམ་པར་སྤྱན་དྲངས་ཏེ་བདག་ལ་ཐིམ་པ་དང་༔ གཞན་ཡང་ཉན་རང་བྱང་སེམས་རིག་འཛིན་དྲང་སྲོང་པཎ་གྲུབ་དང་སོ་སྐྱེ་རྣམས་ཀྱི་ཤེས་རབ་ཡོན་ཏན་ཐམས་ཅད་བསྡུས་ཏེ་བདག་ལ་ཐིམ༔ ཉི་ཟླ་ནོར་བུ་འབྱུང་ལྔའི་དྭངས་བཅུད་ཐམས་ཅད་ལྷག་མ་མ་ལུས་པར་བསྡུས་ཏེ་བདག་ལ་ཐིམ་པས་ཚེ་དང་བསོད་ནམས་ཡེ་ཤེས་ཡོན་ཏན་ཐམས་ཅད་རབ་ཏུ་འཕེལ་ཞིང་རྒྱས་པར་བསྒོམ༔ འཁོར་འདས་ཡོངས་ཀྱི་གཟི་བྱིན་ཚེ་བསོད་ནུས་མཐུ་ཐམས་ཅད་བསྡུས་ཏེ་རང་ལ་ཐིམ་པས་སྣང་སྲིད་ཐམས་ཅད་འོག་མིན་དཔལ་དང་ལྡན་པའི་རྟེན་དང་བརྟེན་པའི་རང་བཞིན་དུ་སངས་རྒྱས་ཏེ་རྒྱས་པའི་ཕྲིན་ལས་ཐམས་ཅད་ལྷུན་གྱིས་གྲུབ་པར་བསྒོམ་ལ༔ ཧཱུྃ་༔ རང་ཉིད་མཁྱེན་རབ་དབང་པོ་ནི༔ ཡབ་ཡུམ་གཉིས་སུ་མེད་པ་ཡི༔ ཐུགས་ཀའི་སྔགས་ཀྱི་ཕྲེང་བ་ལས༔ འོད་དང་འོད་ཟེར་རབ་འཕྲོས་པས༔ རྒྱལ་བ་མཆོད་ཅིང་དངོས་གྲུབ་བསྡུས༔ འགྲོ་བའི་རྒྱུད་སྦྱངས་དག་པར་སྦྱོར༔ འཁོར་འདས་གཟི་བྱིན་དབང་དངོས་གྲུབ༔ ནུས་བཅུད་དྭངས་མ་ཤེས་རབ་དང་༔ ཡེ་ཤེས་ཆེན་པོར་བཅུད་དུ་དྲིལ༔ ཚུར་འདུས་བདག་ལ་ཐིམ་པ་ཡིས༔ རྒྱས་པའི་ཕྲིན་ལས་ཡོངས་གྲུབ་བསམ༔ ཨོཾ་ར་པ་ཙ་ན་དྷཱིཿཧྲཱིཾཿཨོཾ་ཝཱ་གཱི་ཤྭ་རི་མཱུཾ༔ ཞེས་བཟླས་ཤིང་དགོང་མོ་དབང་གི་ཕྲིན་ལས་བསྒྲུབ་པ་ལ་ཡང་༔ རང་ཉིད་འཇམ་དཔལ་དམར་པོ་གཡས་པདྨས་ཡུ་བ་བྱས་པའི་རལ་གྲི་དང་༔ གཡོན་ཨུཏྤལ་དང་པོ་ཏི་བསྣམས་པ༔ ཡུམ་དབྱངས་ཅན་དམར་མོ་རལ་གྲི་དང་ཨུཏྤལ་དམར་པོ་བསྣམས་པ་དང་འཁྲིལ་བ༔ ཡབ་ཡུམ་གཉིས་ཀ་གཞོན་ནུ་མཚན་དང་དཔེ་བྱད་ཀྱིས་མཛེས་ཤིང་ལོངས་སྤྱོད་རྫོགས་པའི་ཆས་ཐམས་ཅད་ཀྱིས་བརྒྱན་པ་སེང་ཁྲི་དང་པད་ཟླར་བཞུགས་པའི་སྐུ་ལས་འོད་དང་འོད་ཟེར་དམར་པོ་འཕྲོས་པས་ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་ལ་མཉེས་པའི་མཆོད་པ་དཔག་ཏུ་མེད་པ་ཕུལ་བས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དབང་དང་དངོས་གྲུབ་ཐམས་ཅད་མ་ལུས་ཤིང་ལུས་པ་མེད་པ་རང་ལ་ཐིམ་པས་འཁོར་འདས་ཡོངས་ལ་དབང་བསྒྱུར་བའི་དབང་ཐོབ་པར་བསམ་ལ༔ ཡང་འོད་ཟེར་མར་འཕྲོས་པས་ཁམས་གསུམ་གྱི་སེམས་ཅན་ཐམས་ཅད་ཀྱི་སྒྲིབ་གཉིས་བག་ཆགས་ཐམས་ཅད་བ་མོ་ལ་ཉི་ཟེར་ཕོག་པ་ལྟར་སྦྱངས༔ སྣང་སེམས་ཐམས་ཅད་ནམ་མཁའ་ལ་ཉི་མ་ཤར་བ་ལྟར་བདེ་ཆེན་དག་པ་མཁའ་སྤྱོད་ཀྱི་རྟེན་དང་བརྟེན་པའི་རང་བཞིན་དུ་སངས་རྒྱས་ཏེ་བདག་གི་འཁོར་འབངས་མངའ་འོག་ཏུ་འདུས་ཤིང་བསྒོ་བའི་བཀའ་ཉན་ཅིང་ཕྲིན་ལས་རབ་འབྱམས་བསྒྲུབ་པའི་གཉེར་བླང་ཞིང་དམ་བཅས་ཏེ་བྱང་ཆུབ་སེམས་དཔས་འགྲོ་བའི་དོན་བསྒྲུབ་ཅིང་རྒྱལ་བ་རྒྱ་མཚོའི་ཕྲིན་ལས་ཀྱི་ཁུར་ཆེན་པོ་དང་དུ་ལེན་པར་བསྒོམ་ལ༔ ཧཱུྃ་༔ རང་ཉིད་སྨྲ་བའི་སེང་གེ་ནི༔ ཡབ་ཡུམ་གཉིས་སུ་མེད་པ་ཡི༔ སྐུ་ལས་འོད་ཟེར་དཔག་མེད་འཕྲོས༔ རྒྱལ་དང་རྒྱལ་སྲས་མ་ལུས་མཆོད༔ དབང་དང་དགའ་བཞི་མཁྱེན་གཉིས་ཀུན༔ སྐུ་ལས་འོད་ཟེར་དཔག་མེད་འཕྲོས༔ རྒྱལ་དང་རྒྱལ་སྲས་མ་ལུས་མཆོད༔ དབང་དང་དགའ་བཞི་མཁྱེན་གཉིས་ཀུན༔ འོད་ཕུང་དམར་པོའི་རྣམ་པར་བསྡུས༔ རང་ཉིད་ལྷར་གསལ་ལ་ཐིམ་པས༔ དབང་དང་དངོས་གྲུབ་མ་ལུས་ཐོབ༔ མར་འཕྲོས་ཁམས་གསུམ་སེམས་ཅན་གྱི༔ སྒྲིབ་གཉིས་བག་ཆགས་ཀུན་སྦྱངས་ནས༔ ཀུན་ཀྱང་དཔའ་བོ་དཔའ་མོ་ཡི༔ རོལ་པར་གྲོལ་ནས་ཐམས་ཅད་ཀུན༔ བདག་གི་མངའ་འོག་དབང་དུ་འདུས༔ རབ་འབྱམས་ཕྲིན་ལས་མ་ལུས་པ༔ བསྒྲུབ་པའི་གཉེར་དང་ཁུར་བླངས་ནས༔ དབང་གི་ཕྲིན་ལས་ཡོངས་གྲུབ་བསམ༔ ཨོཾ་ར་པ་ཙ་ན་དྷཱིཿཧྲཱིཾཿཨོཾ་ཧྲཱི་དྷཱི་མ་མི་དྷཱི་བཾ་མཉྫུ་ཤྲི་མཱུཾ་ཧྲཱི་པྲཛྙཱ་ཝརྡྷཱ་ན་ཧྲཱིཿདྷཱིཿསྭཱ་ཧཱ༔ ཞེས་མི་ཚིག་གིས་བར་མ་ཆད་པར་སྔགས་བཟླས༔ སྟན་གྱི་དྲོད་མ་ཡལ་བར་སྡོད་ཚུགས་པར་གདན་བསྲུང་༔ ཤེས་པ་གཞན་དུ་མ་གཡེང་བར་ལྷའི་ང་རྒྱལ་བཟུང་ཞིང་འོད་ཟེར་སྤྲོ་བསྡུ་ལ་འབད་པར་བྱའོ༔ སྲོད་དྲག་པོའི་དུས་སུ་ཡང་༔ རང་ཉིད་འཇམ་དཔལ་མཐིང་ནག་ཁྲོས༔ ཤིང་གཏུམ་པ་ཞབས་གཉིས་བརྐྱང་བསྐུམ་དུ་བཞུགས་པ་ཞལ་གདངས་ཤིང་ལྗགས་གློག་དམར་ལྟར་དུ་འཁྱུགས་པ༔ ཁྲོ་གཉེར་ཆུའི་གཉེར་མ་ལྟར་འཁྲིགས་ཤིང་ཚེམས་ཕྲེང་གངས་རི་ལྟར་དཀར་བ༔ མཆེ་བ་ཟླ་ཚེས་ལྟར་རྣོ་དཀར་མན་དུ་གཙིགས་པ༔ སྤྱན་གསུམ་སྡང་མིག་ཏུ་གཡོ་ཞིང་སྤྱན་རྩ་གློག་དམར་ལྟར་གཡོ་བ༔ སྨ་ར་ལས་བསྐལ་པའི་མེ་དཔུང་འབར་ཞིང་སྨིན་མ་གློག་སྟོང་འཁྱུགས་པ༔ ཕྱག་གཡས་ཤེས་རབ་ཀྱི་རལ་གྲི་མེ་འབར་བ་ཀླད་ལ་བསྐོར་ཐབས་སུ་འཛིན་ཅིང་གཡོན་པས་མེའི་ཞགས་པ་བསྣམས༔ སྐུ་ལ་སྦྲུལ་དང་མི་མགོའི་ཕྲེང་བས་བརྒྱན་པ༔ སྐུ་སྨད་ལ་སྟག་ལྤགས་རློན་པའི་ཤམ་ཐབས་གསོལ་བ༔ འོད་ཕུང་དུས་མཐའི་མེ་ལྟར་འབར་བའི་ཀློང་དུ་བཞུགས་པ༔ དེ་ཡི་ཐུགས་ཀར་པད་ཟླའི་གདན་ལ་རལ་གྲི་མེ་འབར་བའི་ཡུ་བ་གྱེས་མཚམས་ཀྱི་ནང་ཁྲོད་དུ་དྷཱིཿཡིག་ནག་པོ་མེ་འབར་བ་ལ་དུས་གསུམ་གྱི་རྒྱལ་བ་སྲས་དང་བཅས་པའི་མཐུ་སྟོབས་ནུས་པ་ཐམས་ཅད་རྫོགས་པར་བསྒོམ་པའི་མཐར་ནང་རིམ་དུ་རྩ་བའི་སྔགས་དང་༔ ཕྱི་རིམ་དུ་དྲག་སྔགས་རང་སྒྲ་དང་བཅས་པ་འཁོར་བ་ལས་ཡེ་ཤེས་ཀྱི་མེ་དཔུང་རབ་ཏུ་འབར་བའི་འོད་ཀྱིས་མ་རིག་པའི་བག་ཆགས༔ མི་ཤེས་པའི་དྲི་མ༔ ནད་གཅོད་སྡིག་སྒྲིབ་ལས་ཉོན་དང་བཅས་པ་ཐམས་ཅད་གཞོབ་ཐུལ་གྱིས་བསྲེགས་ཏེ་རྗེས་ཤུལ་ལྷག་མ་ཙམ་ཡང་མེད་པར་བསྒོམ༔ དེ་ཡི་པང་དུ་ཡུམ་མཆོག་ནོར་རྒྱུན་མཐིང་ནག་ཁྲོ་གཏུམ་རབ་ཏུ་འཇིགས་པའི་ངང་ཚུལ་ཅན་གཡང་གཞི་དང་གཟིག་ཤམ་གསོལ་བ་ཞབས་གཉིས་ཡབ་ཀྱི་སྐེད་ལ་འཁྱུད་ཅིང་ཕྱག་གཡས་རལ་གྲི་དང་༔ གཡོན་པས་ནོར་བུ་བསྣམས་ནས་ཡབ་ཀྱི་མགུལ་དུ་འཁྲིལ་ཞིང་ཞལ་སྦྱོར་བའི་ཐུགས་ཀར་ཧྲཱིཾཿཡིག་དམར་པོ་ལ་འོད་ཀྱི་འཁོར་ལོ་དམར་སྒ་ར་ར་འཁོར་བར་བསམ༔ ཡབ་ཡུམ་གཉིས་ཀྱི་ཐུགས་ཀའི་སྔགས་འཁོར་ལས་མེ་དཔུང་དམར་ནག་རབ་ཏུ་འབར་བས་གཟུང་འཛིན་གཉིས་ཀྱིས་བསྡུས་པའི་སྣོད་བཅུད་གཉིས་སྣང་བག་ཆགས་དང་བཅས་པ་ཐམས་ཅད་གཞོབ་ཐུལ་གྱིས་བསྲེག་ནས་འཁོར་འདས་སྟོང་ཉིད་ཆེན་པོའི་རོལ་པར་ཞིག་སྟེ་འབྱམས་ཀླས་པར་གྱུར༔ མཁྱེན་གཉིས་ཡེ་ཤེས་ཆེན་པོའི་རྩལ་ལས་ཤེས་རབ་ཀྱི་མེ་ཆེན་རབ་ཏུ་འབར་བས་ས་བདག་ཀླུ་གཉན་ནད་རིམས་དང་བཅས་པ་ཐམས་ཅད་གཞོབ་ཐུལ་གྱིས་བསྲེགས་ནས་རྗེས་ཤུལ་ལྷག་མ་ཙམ་ཡང་མེད་པར་བསྒོམ་ལ༔ ཨོཾ་ཨ་ར་པ་ཙ་ན་དྷཱིཿཧྲཱིཾཿཨོཾ་པྲ་སོད༔ ཆུ་སོད༔ དུར་ཏ་སོད༔ དུར་མེ་སོད༔ གཉན་མགོ་ལ་ཆོད༔ ཁ་ལ་ཛཿཀང་ཤང་རྦད་ཕཊ་སྭཱ་ཧཱ༔ བར་མ་ཆད་པར་ཆུ་ཀླུང་དྲག་པོ་ལྟར་བཟླའོ༔ ལྷ་བསྒོམ་པའི་དུས་སུ་རིམ་བཞིན་ཆད་འཛོལ་དུ་མ་སོང་བར་ཁབ་མིག་ཏུ་སྐུད་པ་འཛུད་པ་ལྟར་བྱའོ༔ འཁོར་འདས་རང་སྣང་ལས་མི་གཞན་པར་ཤེས་པའི་ལྟ་བ་ཟབ་མོའི་གནད་ཤེས་ཤིང་སྒྱུ་མ་ལྟ་བུའི་ངང་ཚུལ་དང་མི་འབྲལ་བ་གཞི་རུ་ཆེ་ལ་འཁོར་འདས་ཡོངས་ཀྱི་སྲོག་ལ་དབང་བྱེད་པའི་གནད་ཡིན་ནོ༔ རང་མིར་འཛིན་གྱི་ཤེས་པ་ལས་ལྡོག་ཅིང་ལྷའི་གསལ་སྣང་མངོན་དུ་བྱེད་ཅིང་ལྷ་ཡིན་གྱི་ཤེས་པ་སྒོ་མ་འགགས་པ་དང་མི་འབྲལ་བའི་ང་རྒྱལ་བསྟན་པོར་བྱའོ༔ ལྷ་སྐུའི་དབུ་ཡི་ཐོར་གཙུག་མན་ཆད་ནས་གདན་པདྨ་ཡན་ཆད་ཡིད་ལ་མངོན་དུ་བྱས་སྟེ་བཟླ་བ་དང་༔ རེས་འགའ་གང་འདོད་ཐམས་ཅད་འོད་ཟེར་སྤྲོ་བསྡུས་གཅུན་ཏེ་དམིགས་པའི་ལྡེ་ཁ་བསྒྱུར་བར་བྱའོ༔ རང་ཉིད་ལྷར་གསལ་བའི་ཤེས་པ་རྒྱུན་ཆགས་ལ་བརྟན་པ་ཐོབ་པར་བྱ་བ་ནི་ལྷ་བསྒྲུབ་པའི་གནད་ཀྱི་ཡང་སྙིང་དམ་པ་ཡིན་ནོ༔ གནད་འདི་མེད་ན་ལོ་བརྒྱར་བསྒྲུབ་ཀྱང་འགྲུབ་པར་མི་འགྱུར་བ་དང་༔ འབྲས་བུ་འབྱིན་པའི་གནད་མེད་ངེས་སོ༔ དེས་ན་གནད་དེ་བཟུང་ལ་བསྒྲུབ་པར་གྱིས་ཤིག༔ དེ་ལྟར་ཤེས་པ་གཞན་དུ་མི་གཡེང་བར་ལྷར་སྣང་དང་མ་བྲལ་བའི་གནད་དང་ལྡན་ན་ཟླ་བ་དྲུག་གིས་ངེས་པར་འགྲུབ་པའི་རྟགས་མངོན་དུ་འགྱུར་བ་ཡིན་པས་ཤེས་པར་གྱིས་ཤིག༔ མདུན་བསྐྱེད་གསལ་བ་ལ་ཡང་གསལ་སྣང་ཐོན་པའི་ངང་ནས་ཡིད་ཀློང་དུ་ཆུབ་ཅིང་༔ ཡུལ་དུ་འབྲལ་བ་མེད་པར་བསྟེན་པར་བྱའོ༔ རང་གདན་ལས་ལྡང་བའི་སྐབས་སུ་རང་གི་ཕྲེང་བ་རྣམས་གཤིན་རྗེའི་མགོ་བོ་ཁྲག་འཛག་པ་བསྟར་ལ་བརྒྱུས་པའི་རང་བཞིན་ཁ་ནས་སྔགས་ཀྱི་སྒྲ་འབྲུག་ལྟར་ལྡིར་བ་རུ་བསྐྱེད་ཅིང་གསལ་ནས་བཞག་གོ༔ རྣམ་པར་གཡེང་བ་དང་ལེ་ལོ་མེད་པར་བསྒྲུབ་པ་ལ་འབད་པར་བྱའོ༔ དྲི་ཆེན་དང་དྲི་ཆུ་འདོར་བའི་ཚེ་སྤྱི་བོར་བླ་མ་བསྒོམ་པའི་སྐུ་ལས་ཡེ་ཤེས་ཀྱི་བདུད་རྩི་བབ་པས་རང་གི་ནད་གདོན་སྡིག་སྒྲིབ་བག་ཆགས་གདོས་བཅས་ཤ་ཁྲག་གི་ཕུང་པོ་དང་བཅས་པ་ཐམས་ཅད་འོག་སྒོ་གཉིས་ནས་ནག་ནུ་རུ་རུ་ཐོན་ནས་འོག་གཞི་དབང་ཆེན་གསེར་གྱི་ས་གཞིའི་སྟེང་དུ་དབབ་པས་ས་གཞིའི་ཁམས་ཐམས་ཅད་གང་ནས་གནོད་བྱེད་གདོན་བགེགས་ཐམས་ཅད་ཀྱིས་ཧབ་ཐོབ་ཏུ་རོལ་པས་མགུ་ཞིང་ཚིམས་ཏེ་ལན་ཆགས་བྱང་༔ བུ་ལོན་སོད༔ ཤ་མཁོན་དག་ནས་གནོད་བྱེད་ཐམས་ཅད་གཏན་དུ་བདེ་བའི་གནས་ལ་འཁོད་པར་བསམ་པ་གནད་དུ་བཟུང་ངོ་༔ བསྙེན་བསྒྲུབ་ཀྱི་སྐབས་སུ་ཟས་སྐོམ་རོལ་པའི་དུས་སུ་དབྱིངས་ནས་ཡི་གེ་འབྲུ་གསུམ་ཆར་དུ་བབས་ཏེ་ཟས་ལ་ཐིམ་པས་བདེ་སྟོང་ཟག་པ་མེད་པའི་བདུད་རྩི་རོ་བརྒྱ་ནུས་པ་སྟོང་དང་ལྡན་པའི་ངོ་བོ་ལ་འདོད་ཡོན་ནམ་མཁའ་མཛོད་དུ་གྱུར་པར་དམིགས༔ ལུས་རྒྱལ་བའི་དཀྱིལ་འཁོར༔ ལག་སོར་མཆོད་ལྷ་རུ་བསྒོམ་སྟེ་ལྷ་རྣམས་ལ་ཚོགས་ཀྱི་འཁོར་ལོས་མཆོད་ཅིང་ཐུགས་བདེ་སྟོང་གི་རོས་ཚིམས་པར་བསམ་པའི་ངང་ནས་རོལ་བར་བྱའོ༔ ལས་སྦྱོར་གྱི་སྐབས་སུ་བཟའ་བཏུང་གོང་བཞིན་ཡེ་ཤེས་ཀྱི་བདུད་རྩིའི་ངོ་བོ་ལ་རྣམ་པ་འདོད་རྒུའི་དཔལ་ཡོན་ཕུན་སུམ་ཚོགས་པ་རུ་བསྒོམ་སྟེ༔ རང་ལུས་རྒྱལ་བའི་དཀྱིལ་འཁོར༔ ཁ་ཧོམ་ཁུང་༔ ལག་པ་དགང་གཟར་བླུགས་སུ་བསྐྱེད་དེ་ཕུལ་བས་ཐུགས་མཉེས་ཤིང་ཚིམ་ནས་ཕྲིན་ལས་རྣམ་བཞིའི་ལས་དུས་དང་བསྟུན་ཏེ་གྲུབ་པར་བསྒོམ་ལ་སྤྱོད་དོ༔ དེ་ནས་དྲག་དམིགས་འཁྲུལ་འཁོར་ལ༔ རང་ཉིད་གཤིན་རྗེའི་གཤེད་ནག་པོ༔ ཕྱག་གཡས་རལ་གྲི་གཡོན་མེ་ཞགས༔ མེ་ཡི་རལ་པ་གནམ་དུ་གཟིང་༔ སྨ་ར་སྨིན་མར་མེ་སྟག་འཕྲོ༔ སྟག་ཤམ་སྦྲུལ་དང་ཐོད་རྒྱན་སྤྲས༔ ཞབས་གཉིས་ཕྱེད་པའི་སྐྱིལ་ཀྲུང་བཞུགས༔ ཁྲོ་བོ་མི་བཟད་འཇིགས་པའི་ཞལ༔ བསྐལ་པ་མེ་ལྟར་འབར་བའི་ཀློང་༔ ནོར་རྒྱུན་ཁྲོ་གཏུམ་ནག་མོས་འཁྱུད༔ རལ་གྲི་དང་ནི་ནོར་བུ་བསྣམས༔ ཡབ་ཡུམ་གཉིས་སུ་མེད་པ་ཡི༔ ཐུགས་ཀའི་དྷཱིཿདང་ཧྲཱིཾཿཡིག་ལས༔ ཡེ་ཤེས་མེ་དཔུང་རབ་འབར་བས༔ སྒྲིབ་གཉིས་བག་ཆགས་ཐམས་ཅད་དང་༔ ནད་གདོན་སྡུག་བསྔལ་མ་ལུས་པ༔ སྦུར་མ་མེ་ལ་བསྲེག་བཞིན་བརླག༔ གཞན་ཡང་འོད་ཕུང་མེ་དཔུང་བཅས༔ སྣང་ཞིང་སྲིད་པ་ཁྱབ་པར་འཕྲོས༔ སྣོད་དང་བཅུད་དུ་འཛིན་པ་ཡི༔ གཟུང་དང་འཛིན་པའི་སྣང་སེམས་ཀུན༔ རྗེས་ལྷག་མེད་པར་བསྲེགས་ཤིང་སྦྱངས༔ འོག་མིན་རྣམ་མཛེས་ཆེན་པོའི་ཞིང་༔ མངོན་འགྱུར་ཆེན་པོར་སངས་རྒྱས་སོ༔ མ་རིག་རྒྱུད་འཁྲུལ་གནས་རིགས་དྲུག༔ རྨི་ལམ་དབྱིངས་སུ་སད་པ་ལྟར༔ འོག་མིན་རྣམ་མཛེས་ཆེན་པོར་འཕོས༔ ལས་ཉོན་བག་ཆགས་སྡུག་བསྔལ་ཀུན༔ ཆོས་ཉིད་ཀ་དག་དབྱིངས་སུ་བཤིག༔ ཐམས་ཅད་ཕྱམ་གཅིག་མངོན་སངས་རྒྱས༔ ཨོཾ་ཨ་ར་པ་ཙ་ན་དྷཱིཿཧྲཱིཾཿཨོཾ་པྲ་སོད༔ ཆུ་སོད༔ དུར་ཏ་སོད༔ དུར་མེ་སོད༔ གཉན་མགོ་ལ་ཆོད༔ ཁ་ལ་ཛཿཀང་ཤང་རྦད་ཕཊ་སྭཱ་ཧཱ༔ དེ་ནས་དགྲ་བོ་བསྒྲལ་བའི་ལས་བསྒྲུབ་པར་འདོད་ན༔ རང་ཉིད་འཇིགས་བྱེད་གཏུམ་དྲག་ནག་པོར་གསལ་བའི་མདུན་མཁར་རཀྟའི་རྒྱ་མཚོ་འཁྱིལ་བའི་ཁྲག་ལྦུའི་ཀློང་དུ་མི་རོ་དང་རྟ་རོ་འཁྲིགས་པ༔ རྦ་རླབས་དང་རླངས་པ་འཕྱོ་བའི་ཀློང་ནས་གསོད་བྱེད་ཀྱི་ཤན་པ༔ བཤའ་གཅོད་ཀྱི་ལག་དམར༔ འཛིན་བྱེད་ཀྱི་ཕོ་ཉ༔ ལས་བྱེད་ཀྱི་དམག་ཚོགས་དཔག་ཏུ་མེད་པ་འཕྲོ་བར་བྱེད་པའི་དབུས་སུ་ཡཾ་ལས་རླུང་གི་དཀྱིལ་འཁོར་གྱི་སྟེང་དུ་གནམ་ལྕགས་ཀྱི་རྡོ་རྗེ་མེ་འབར་བ་ལས་གྲུབ་པའི་ལྕགས་ཀྱི་སྐུ་མཁར་ནག་པོ་རྩེ་མོ་བ་གམ་གཟུགས་མེད་པའི་ཁམས་སུ་སླེབ་པ༔ སྟོད་ཆ་གཟུགས་ཁམས་ན་ཡོད་པ༔ སྨད་ཆས་འདོད་ཁམས་ཁྱབ་པ༔ རྨིང་རི་དམྱལ་བའི་གནས་སུ་ཟུག་པ༔ ཕྱི་ནས་མེ་རླུང་ཐོགས་སེར་འཁྱུག་ཅིང་ནང་ན་སྡེ་བརྒྱད་ཀྱི་དམག་དཔུང་འཚོགས་པའི་དབུས་སུ་གནས་རིགས་དྲུག་གི་སེམས་ཅན་རྣམ་པ་སྣ་ཚོགས་པའི་རོ་ཕྱི་དབུགས་དང་བྲལ་ཞིང་༔ ནང་དབུགས་མ་ཆད་པ་ཙམ་གྱི་རོའི་ཁྲི་ཁར༔ བདག་ཉིད་ཡི་དམ་གྱི་ཐུགས་ཀ་ནས་ཡཿཡིག་ནག་པོ་དང༔ ཙཿཡིག་མཐིང་ག་འོད་དང་བཅས་པ་འཕྲོས་པས་མ་ཧེ་སྔོ་ནག་མགོ་གཡས་ཕྱོགས་སུ་བསྟན་པ་དང་༔ ཆུ་གླང་ནག་པོ་མགོ་གཡོན་ཕྱོགས་སུ་བསྟན་པ༔ མ་ཧེ་སྔོན་དུ་འགྲོ་སྟེ་ཆུ་གླང་ཕྱི་འགྲོས་བྱེད་པ་བསྐལ་པའི་རླུང་དང་མེ་ཡི་ཤུགས་འཆང་བ་དེའི་སྒལ་སྟེང་དུ་ཡཿཙཿལས་འོད་འཕྲོས་པས་དཀོན་མཆོག་རྩ་གསུམ་ཆོས་སྐྱོང་དམ་ཅན་རྒྱ་མཚོ་མ་ལུས་ཤིང་ལུས་པ་མེད་པའི་མཐུ་སྟོབས་དང་ནུས་པ་ཐམས་ཅད་བསྡུས་ཏེ་ཡིག་འབྲུ་གཉིས་ལ་ཐིམ༔ མར་འཕྲོས་ཞིང་བཅུའི་བསྟན་དགྲ་གདུག་པ་ཅན་ཐམས་ཅད་ཚར་བཅད༔ ཚུར་འདུས་པ་ལས་ཁམས་གསུམ་སེམས་ཅན་ཐམས་ཅད་ཀྱི་མཐུ་སྟོབས་ནུས་པ་ཐམས་ཅད་བསྡུས་ཏེ་ཡིག་འབྲུ་གཉིས་ལ་ཐིམ་པས་ཡཿལས་གཤིན་རྗེ་ཡ་མ་ར་ཙ་མཐིང་ནག་ཤིན་ཏུ་ཁྲོས་ཤིང་ཨམ་གཙིགས་བསྡམས་པའི་མཆེ་བ་ཟླ་ཚེས་ལྟར་རྣོ་དཀར་མན་དུ་གཙིགས་པ་ཁྲོ་གཉེར་ཆུ་ཡི་གཉེར་མ་ལྟར་འཁྲིགས་ཤིང་སྤྱན་གསུམ་སྡང་མིག་ཏུ་གཡོ་ཞིང་སྤྱན་རྩ་ལས་གློག་སྟོང་འཁྱུགས་པ༔ ཤངས་ནས་བསྐལ་པའི་རླུང་དམར་གཡོ་ཞིང་མེ་ཡི་སྨ་ར་དང་སྨིན་མ་དང་རལ་པ་གཡོ་བའི་ཀློང་ནས་ཐོག་དང་སྐྱིན་ཐང་དབབ་པ༔ ཕྱག་གཡས་སྲོག་གཅོད་ཀྱི་དགྲ་སྟྭ་ཕྱར་ཞིང་གཡོན་པས་འཛིན་བྱེད་ཀྱི་ལྕགས་ཀྱུ་བསྣམས་པ༔ སྐེད་པ་ལ་སྟག་རལ་དང་གཟིག་ཤུབ་དང་སྤུ་གྲི་ངར་མས་བརྒྱན་པ༔ སྟག་ལྤགས་རློན་པའི་འདུང་མ་གྱོན་ནས༔ མི་མགོ་ཁྲག་འཛག་པའི་ཕྲེང་བའི་སེ་རལ་ཁ་བྱས་པ༔ ཞབས་གཉིས་འདོར་སྟབས་སུ་བཞུགས་པའི་པང་དུ་ཙ༔ ལས་ཡུམ་མཆོག་ནག་མོ་ཁྲག་གི་རལ་པ་ཅན་གཡས་ན་སྤུ་གྲི་ངར་མ་དང་༔ གཡོན་པས་དགྲ་སྙིང་དྲོན་མོ་ཡབ་ལ་སྟོབ་པ༔ གཟིག་ལྤགས་ཀྱི་འདུང་མ་གྱོན་ནས་ཞབས་གཉིས་ཡབ་ཀྱི་སྐེད་ལ་འཁྱུད་པ༔ ཁྲོ་གཏུམ་རབ་འཇིགས་བལྟར་མི་བཟོད་པ་ལ་འཁོར་ལས་ཀྱི་ཕོ་ཉ་ནག་པོ་ཁྲི་དང་༔ སྤྲུལ་པ་ལྷ་སྲིན་སྡེ་བརྒྱད་ཀྱིས་བསྐོར་བ༔ ལྷ་མིའི་དམག་དང་དཔུང་ཆེན་པོ་གོ་སར་འདུས་པ་བཞིན་དུ་བསྐོར་ཞིང་ཚོགས་པར་བསྒོམས༔ ཟ་བྱེད་བྱ་དང་གཅན་གཟན་གྱི་ཚོགས་མང་པོས་དགྲ་བོའི་མིག་དཔྲལ་བ་ནས་འབྲུ་ཞིང་སྙིང་ཁོང་ནས་འབྱིན་ཏེ་སྙིང་ཁྲག་ཁ་ནས་འདྲེན་ཅིང་ཧུབ་ཀྱིས་འདེབས་པ༔ གླལ་བཟང་ཟང་བྱེད་ཅིང་གླལ་སྒྲ་ཏིར་ཏིར་སྒྲོགས་པར་བསྒོམ་ལ༔ ཧཱུྃ༔ རང་ཉིད་དྲག་པོའི་ཐུགས་ཀྱི་འོད་ཕུང་ལས༔ གྲུབ་པའི་མདུན་དུ་དུག་ཁྲག་འདྲེས་པ་ཡི༔ དམར་ནག་རྒྱ་མཚོ་རྒྱ་ཆེ་གཏིང་ཟབ་པའི༔ ཁྲག་ལྦུའི་ཀློང་ན་མི་རོ་རྟ་རོ་འཁྲིགས༔ རྦ་རླབས་རླངས་པ་གནམ་དུ་འཕྱོ་བ་ལས༔ ཕོ་ཉ་ལས་མཁན་སྐྱིན་ཐང་བཞིན་དུ་འཕྲོ༔ དབུས་སུ་ཡཾ་འཕྲོས་རླུང་གི་དཀྱིལ་འཁོར་སྟེང་༔ ཏྲཾ་འཕྲོས་གནམ་ལྕགས་ལས་གྲུབ་སྐུ་མཁར་ནི༔ རྒྱ་ཆེ་དཔངས་མཐོ་ཕྱི་ན་མེ་རླུང་འཚུབས༔ ནང་དུ་ལས་གཤིན་སྡེ་བརྒྱད་དམག་དཔུང་དབུས༔ ཏྲི་ལས་མ་ཧེ་ཆུ་གླང་སྔོ་ནག་ཟུང་༔ གཡས་དང་གཡོན་གྱི་ཕྱོགས་སུ་ཁ་བལྟས་པའི༔ སྒལ་སྟེང་མི་རོའི་སྒ་ཆ་བྱས་པ་ཡི༔ སྒ་གོང་པད་ཉི་རོ་ཡི་གདན་སྟེང་དུ༔ ཡཿདང་ཙཿཡིག་འོད་འབར་འཕྲོས་ཤིང་བབས༔ འོད་ཟེར་ཡར་འཕྲོས་རྒྱལ་བ་སྲས་བཅས་མཆོད༔ ཐམས་ཅད་མ་ལུས་ཚུར་འདུས་ཡི་གེར་ཐིམ༔ མར་འཕྲོས་ཁམས་གསུམ་འགྲོ་བའི་སྒྲིབ་པ་སྦྱངས༔ དགྲ་བགེགས་གདུག་ཅན་མ་ལུས་ཚར་བཅད་དེ༔ སེམས་ཅན་ཀུན་གྱི་ཚེ་བསོད་མཐུ་ནུས་སྟོབས༔ སྣོད་བཅུད་འབྱུང་བའི་དྭངས་མ་བཅུད་དང་བཅས༔ ཚུར་འདུས་ཡིག་འབྲུ་གཉིས་ལ་ཐིམ་པ་ཡི༔ གནས་གྱུར་གཤིན་རྗེ་ཡ་མ་ར་ཙ་ནི༔ མཐིང་ནག་ཁྲོ་གཏུམ་ཨམ་གཙིགས་རབ་ཏུ་བསྡམས༔ སྨ་ར་ཨག་ཚོམ་སྨིན་མ་དམར་ནག་ལ༔ མེ་སྟག་ཐོག་མདའ་བུ་ཡུག་སྐར་ལྟར་འཁྲིགས༔ རལ་པའི་གསེབ་ནས་མཚོན་ཐུན་བུ་ཡུག་འཚུབས༔ ཕྱག་གཡས་དགྲ་སྟྭ་ངར་མ་ཀླད་ལ་བསྐོར༔ གཡོན་པས་ལྕགས་ཀྱུ་འབར་བས་ཁམས་གསུམ་འགུགས༔ ཞབས་གཉིས་བརྐྱང་བསྐུམ་སྟབས་སུ་བཞུགས་པ་ཡི༔ སྐུ་ལ་སྟག་ལྤགས་རློན་པའི་འདུང་མ་གསོལ༔ མི་མགོ་དང་ནི་སྦྲུལ་གྱི་ཆས་རྒྱན་འཆང་༔ དེ་ཡི་པང་དུ་ཡུམ་མཆོག་སྲོག་ལེན་ནག༔ ཕྱག་གཉིས་སྤུ་གྲི་དང་ནི་དགྲ་སྙིང་བསྣམས༔ གཟིག་ལྤགས་འདུང་གསོལ་སྙིང་དང་ཐོད་པས་བརྒྱན༔ ཞབས་གཉིས་ཡབ་ཀྱི་སྐེད་ལ་འཁྱུད་ཅིང་སྦྱོར༔ ཡབ་ཡུམ་གཉིས་ཀྱི་གནས་གསུམ་འབྲུ་གསུམ་ལས༔ བར་མེད་འོད་དང་འོད་ཟེར་རབ་འཕྲོས་པས༔ ཁམས་གསུམ་བརྟན་གཡོ་འཁོར་འདས་ཁམས་ཀུན་ནས༔ བསྒོམ་པ་དེ་འདྲ་དཔག་མེད་སྤྱན་དྲངས་བསྟིམས༔ རྒྱལ་བ་སྲས་བཅས་མ་ལུས་ཐམས་ཅད་དང་༔ བཀའ་སྲུང་སྡེ་བརྒྱད་མ་ལུས་སྤྱན་དྲངས་བསྟིམས༔ ཞེས་བདག་མདུན་རྣམས་ཀྱི་ཐུགས་ཀ་ནས་འོད་དང་འོད་ཟེར་རབ་ཏུ་འཕྲོས་པས་ནམ་མཁའི་གཤིན་རྗེ་མཐིང་ནག་དཔག་ཏུ་མེད་པ་བསྐྱེད་པའི་ལྷ་ལ་ཐིམ་པར་བསམ་པ་དང་༔ རེས་འགའ་ཆུ་ཡི་གཤིན་རྗེ་དཀར་པོ༔ རེས་འགའ་ས་ཡི་གཤིན་རྗེ་སེར་པོ༔ རེས་འགའ་མེ་ཡི་གཤིན་རྗེ་དམར་པོ༔ རེས་འགའ་རླུང་གི་གཤིན་རྗེ་ལྗང་ནག༔ རེས་འགའ་འདོད་པའི་ཁམས་ནས་གཤིན་རྗེ་ནག་པོ༔ གཟུགས་ཀྱི་ཁམས་ནས་སྔོན་པོ༔ གཟུགས་མེད་པའི་ཁམས་ནས་མཐིང་ནག་དཔག་ཏུ་མེད་པ་སྤྱན་དྲངས་ཏེ་བསྐྱེད་པའི་ལྷ་ལ་བསྟིམ་མོ༔ རེས་འགའ་རྒྱལ་བའི་ཞིང་དང་མྱང་འདས་ཀྱི་ཁམས་ནས་གཤིན་རྗེའི་ཁ་དོག་མ་ངེས་པ་སྣ་ཚོགས་མཚོ་ལ་ཁ་ཆར་བབ་པ་བཞིན་དུ་བསྐྱེད་པའི་ལྷ་དེ་ལ་ཐིམ་པར་བསམ་པའི་ངང་ནས་རབ་ཏུ་གནས་ཤིང་བརྟན་པ་དང་༔ མ་གྲུབ་པ་གྲུབ་པར་བྱས༔ མེད་པ་ཡོད་པར་བྱས༔ མི་གནས་པ་གནས་པར་བྱས༔ འོད་ཟེར་སྤྲོ་བསྡུའི་དམིགས་གནད་ལ་འབད་པར་བྱ་བ་དང་༔ ལྷར་སྣང་ཡིད་ཀྱིས་མི་བཏང་བ་ཤིན་ཏུ་གཅེས་པའི་གནད་དུ་བཟུང་བ་གཉིས་ནི་བསྒྲུབ་པའི་གནད་ཀྱི་ཡང་ཐིག་པ་དམ་པ་ཡིན་པས་ཤེས་པར་གྱིས་ཤིག༔ ཨོཾ་ཀཱ་ལ་རཱུ་པ་ཡ་མ་ར་ཙ་ཙ་མུནྟྲི་ས་མ་ཡ་ཛ་ཛཿཞེས་འབོད་པའི་དུས་སུ་ཁྲོམ་མང་པོ་འདུ་ཚོགས་བྱེད་པ་དང་༔ མི་མང་པོ་འདུ་བ་དང་༔ མི་ཆེན་སྟོབས་དང་ལྡན་པ་རང་གི་འབངས་སུ་འདུད་པ་དང་༔ དམག་ཆེན་གོ་སར་འདུ་བ་དང་༔ རང་གི་བྲན་དབང་དུ་སྡེ་ཡུལ་ཆེན་པོ་འདུ་བ་དང་༔ བསྡུ་བ་རྣམས་བྱུང་ན་འབོད་པའི་རྟགས་བྱུང་བ་ཡིན་ནོ༔ དེ་ནས་རྦད་པ་ལའང་༔ རང་གི་ཐུགས་ཀ་ནས་འོད་འཕྲོས་པས་ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་ཀྱི་རྒྱུད་རབ་ཏུ་བསྐུལ་ནས་དེ་དག་གི་ཐུགས་ཀ་ནས་འོད་དང་འོད་ཟེར་རབ་ཏུ་འཕྲོས་པས་འཆི་བདག་ལས་ཀྱི་གཤིན་རྗེ་འཁོར་དང་རིགས་སུ་གཏོགས་པ་ཐམས་ཅད་ལ་ཕོག་པས་དམ་ཚིག་གཉན་པོའི་ཐུགས་དམ་གྱི་རྒྱུད་བསྐུལ་བས་རེ་རེ་ལས་ཀྱང་བརྒྱ་སྟོང་ཁྲི་འབུམ་བྱེ་བ་ས་ཡ་གྲངས་མེད་དུ་འཕྲོས་པས་གང་ལ་དམིགས་པའི་དགྲ་བོའི་མི་ནོར་དཀོར་དང་བཅས་པ་ཐམས་ཅད་ཐལ་བའི་རྡུལ་ཕྲན་བཞིན་དུ་བརླག་སྟེ་རྗེས་ལྷག་ཙམ་ཡང་མེད་པར་བྱས༔ བླ་ཚེ་སྲོག་གསུམ་ཉེས་ཅན་བཙོན་དུ་བཟུང་བ་བཞིན་དུ་ཁྱེར་ནས་ལིངྒ་ལ་བསྟིམ་སྟེ་ལས་མཁན་རྣམས་ཀྱིས་མཚོན་ཆ་སྣ་ཚོགས་ཕྱར་ཞིང་ཁ་ནང་དུ་འཁོར་ཏེ་སྲུང་བས་བྲོས་ཤིང་ཐར་དུས་མེད་པར་བསམ་ལ༔ དམིགས་པ་འདི་ལ་ཡང་ཡང་འབད་ཅིང་གནད་དུ་བསྣུན་པར་བྱའོ༔ རེས་འགའ་ནི་བཀའ་སྲུང་དྲེགས་པའི་ཚོགས་ཐམས་ཅད་དགྲ་བོའི་མི་ནོར་གྱི་སྟེང་དུ་ཐོག་ལྟར་བབས་པས་མེ་སྟག་ཆུས་བསད་པ་བཞིན་དུ་བསད༔ ཚེ་བསོད་ནམས་ཐམས་ཅད་ཆུ་ཐིག་ཧུབ་ཀྱིས་བཏབ་པ་བཞིན་དུ་གཞོམ༔ མི་ནོར་ལོངས་སྤྱོད་ཐམས་ཅད་གཅན་གཟན་བཀྲེས་པས་ཤ་ལ་རོལ་པ་ལྟར་ཧབ་ཐོབ་ཏུ་རོལ་པར་ཡང་ཡང་བསམ་ལ༔ ཨོཾ་ཀཱ་ལ་རཱུ་པ་ཡ་མ་ར་ཙ་ཙ་མུནྟྲི་ཨཿཡཿམཿདུཿརུཿཙཿཤཿནཿས་མ་ཡ་ཆོས་ཆོས༔ དགྲ་བོའི་ལུས་ལ་རྦད་རྦད༔ ངག་ལ་རྦད་རྦད༔ སྲོག་ལ་རྦད་རྦད༔ བླ་ཚེ་དབུགས་ལ་རྦད་རྦད༔ མི་ནོར་དཀོར་ལ་རྦད་རྦད་བྷྱོ༔ ཞེས་རྦད་པའི་དུས་སུ་དམག་དཔུང་ཆེན་པོས་སྡེ་ཡུལ་མང་པོ་བཅོམ་པ༔ བཙོན་དུ་བཟུང་བ༔ དགྲ་བོ་དངོས་སུ་ཁྲིད་པ༔ མི་ནག་ལིང་པ་མང་པོས་ཁྱི་འགྱེད་ཅིང་མཚོན་གྱིས་བཏབ་ནས་རི་དྭགས་གཅན་གཟན་བྱ་རིགས་གསོད་པ༔ ཡང་ན་མི་མང་པོས་གཡུང་དྭགས་བཟུང་ནས་བསད་གཅོད་ལ་ཆས་པ་རྣམས་འབྱུང་བ་དང་༔ གཞན་ཡང་སྲོག་ཆགས་གང་དག་གཞན་གྱིས་དེད་ནས་སྒྲུབ་ཁང་གི་ནང་དུ་འབྱུང་བ་རྣམས་དངོས་ཉམས་རྨི་ལམ་གང་རུང་དུ་འབྱུང་བ་ནི་རྦད་པའི་ལྟས་སོ༔ བསད་པའི་དུས་སུ་ཡང་དགྲ་དངོས་སུ་གསོད་པ་དང་༔ མི་གསོད་པ་དང་༔ སྲོག་ཆགས་གསོད་པ་དང་༔ ཤ་ཁྲག་དམར་གཡོས་བྱེད་པ་དང་༔ རང་དང་རང་གི་ཉེ་འཁོར་རྩ་ལག་ཕ་སྤུན་བུ་ཚ་གང་ཡང་རུང་བས་སེམས་ཅན་གང་རུང་རུང་གསོད་པ་རྨིས་ན་བསད་པའི་རྟགས་ཡིན་ནོ༔ ཤ་རློན་པ་མང་པོ་རྨིས་ཚེ་ད་དུང་བསྒྲུབ་པ་མ་བསྐྱར་ན་ཡུན་རིང་པོར་འགོར་བའི་ལྟས་ཡིན་ནོ༔ ཤ་བཙོས་མ་ཡང་ཡང་རྨི་ལམ་དུ་བྱུང་ཚེ་ལོ་ཟླ་འགའ་ལ་འགྱངས་པས་ད་དུང་བསྒྲུབ་པ་བསྐྱར༔ ཤ་སྐམ་བྱུང་ན་ལོར་མི་འགྱང་༔ རུས་པ་བརྡུང་བ་དང་པགས་པ་མཉེ་བ་རྨིས་ན་ཟླ་བ་གསུམ་ལས་མི་འགྱང་ངེས་པ་ཡིན་ནོ༔ གཞན་ཡང་གཤིན་རྗེ་ནག་པོའི་མཐུ་ནུས་འོད་ནག་པོའི་རྣམ་པར་དགྲ་བོའི་བཟའ་བཏུང་ལ་ཐིམ་པས་དགྲ་བོའི་ཁོང་དུ་སོང་བ་ཙམ་གྱིས་བསྒྲལ་ཆས་དང་མཚོན་ཆ་སྣ་ཚོགས་པར་གྱུར་ཏེ་ནང་རོལ་ཐམས་ཅད་གཏུབ་ཅིང་ཁ་ནས་སྐྱུགས༔ འོག་ནས་ཐོན་པས་མིད་པ་དང་གཤང་ལམ་ཐམས་ཅད་ཁྲོལ་མ་རུ་གཏུབ་ནས་ཕྱིར་ཐོན་པར་བསམ༔ ལིངྒ་ལ་ཐུན་མཚོན་གྱིས་བརྡེག་ཅིང་སྔགས་འདི་བཟླའོ༔ ཨེ་ཀཱ་ལ་རཱུ་པ་ཡ་མ་ར་ཙ་ཙ་མུནྟྲི་ཨཿཡཿམཿདུཿརུཿཙཿཤཿནཿས་མ་ཡ༔ དགྲ་བོའི་བླ་ཚེ་སྲོག་དབུགས་མཱ་ར་ཡ་སོད་སོད༔ ལུས་ངག་ཡིད་ལ་ཐུན་རྦད་བྷྱོ༔ ཕུང་ཁམས་སྐྱེ་མཆེད་ཐམས་ཅད་ཧུར་ཐུམ་སོད༔ མཱ་ར་ཡ་རྦད་རྦད༔ མཱ་ར་ཡ་བྷྱོ་བྷྱོ༔ མཱ་ར་ཡ་སོད་སོད༔ ཅེས་བརྗོད་པའི་ཚེ་དགྲ་བོའི་ཚེ་བླ་སྲོག་གསུམ་མེ་སྟག་ཏུ་བསྒོམ་ལ༔ ཐུན་མཚོན་ཆུ་རུ་བསྒོམ་པས་ནག་ཐིབ་ཀྱིས་བསད་པར་ཡང་ཡང་བསམ་མོ༔ ཡང་དགྲ་བོའི་ཚེ་བླ་སྲོག་གསུམ་སྤུ་ཤད་དུ་བསྒོམ་ལ་ཐུན་མཚོན་མེ་རུ་བསྒོམ་སྟེ་ཐལ་བ་ཙམ་ཡང་མེད་པར་ཡང་ཡང་བསྒོམ༔ དེ་ལྟར་བསྒོམ་པས་དགྲ་བོ་རྗེས་མེད་དུ་བརླག་པར་འགྱུར་རོ༔ དེ་ལྟར་བསྒོམ་པ་དང་བཟླས་པ་ཡང་ཡ་མ་བྲལ་བར་བྱས་ཏེ་བསྒྲུབ་པར་བྱའོ༔ གཞན་ཡང་ཛཔྲ་བཟླས་ཀྱི་ཚེ་འོད་ཟེར་སྤྲོ་བསྡུ་དང་དམིགས་པའི་བསྒྱུར་ཁ་ལ་མཁས་པར་བྱའོ༔ དམིགས་པའི་བསྒྱུར་ཁ་མ་ཤེས་ན་ལས་གང་ཡང་འགྲུབ་པར་མི་འགྱུར་བས་དེའི་ཕྱིར་དམིགས་པའི་གནད་ལ་མཁས་པར་བྱའོ༔ དམིགས་པའི་བསྒྱུར་ཁ་ལ་མཁས་ཚེ་འདོད་རྒུ་ཐམས་ཅད་ངང་གིས་འགྲུབ་པར་འགྱུར་རོ༔ དང་པོ་ལྷ་བསྐྱེད་པའི་དུས་སུ་དབུའི་གཙུག་ཏོར་མན་ཆད་ནས་ཞབས་ཀྱི་འཁོར་ལོ་ཡན་ཆད༔ སྤྱན་གྱི་དཀར་ནག་ཚུན་ཆད་ཡིད་ཐོག་ཏུ་གསལ་བར་བྱ་བ་ནི་གསལ་བ་མངོན་བྱེད་ཀྱི་གཟེར་ཞེས་བྱའོ༔ དེ་ནས་ཀུན་ཏུ་བཟང་པོ་མན་ཆད་ནས་བདུད་དང་རཱུ་ཏྲ་ཡན་ཆད་ཀྱི་འཁོར་འདས་གཉིས་ཀྱིས་བསྡུས་པའི་སངས་རྒྱས་དང་སེམས་ཅན་ཐམས་ཅད་རང་སྣང་ལས་མི་གཞན་པའི་ངང་ཚུལ་ཇི་ལྟ་བ་བཞིན་དུ་ཤེས་པར་བྱ་བ་ནི༔ ལྟ་བ་བརྡལ་ཁྱབ་མཉམ་པ་ཉིད་ཀྱི་གཟེར་ཞེས་བྱ་བ་ཡིན་ནོ༔ ཤེས་པ་གཞན་དུ་མི་གཡེང་བར་ལྷར་སྣང་དང་འབྲལ་བ་མེད་པར་བདག་སྣང་ལྷ་རུ་བརྗེ་བའི་ངང་ནས་ལྷ་ཡིན་གྱི་ཤེས་པ་སྒོ་མ་འགགས་པ་དང་འབྲལ་བ་མེད་པར་ང་རྒྱལ་བརྟན་པ་ནི༔ ཏིང་འཛིན་མི་འགྱུར་བའི་གཟེར་ཞེས་བྱ་བ་ཡིན་ནོ༔ འོད་ཟེར་སྤྲོ་བསྡུའི་དམིགས་པ་བར་སྐབས་ཐམས་ཅད་དུ་ཡང་ཡང་ཡིད་ལ་བྱ་བ་ནི་སྤྲོ་བསྡུ་ལས་ཀྱི་གཟེར་ཞེས་བྱ་བ་ཡིན་པས་དེ་ལྟར་གནད་བཞི་པོ་འདི་ཉིད་ཤེས་པར་བྱ་བ་སྒྲུབ་པའི་སྙིང་རྡོ་དམ་པར་གྱུར་པ་ཡིན་ནོ༔ དེ་ལྟར་བསྒྲུབ་པའི་ལྟས་མཚན་མངོན་དུ་གྱུར་ནས་མཐར་གཞན་ལ་ཆོས་འཆད་པའི་དུས་སུ་རང་ཉིད་འཇམ་དཔལ་དམར་སེར་ཡབ་ཡུམ་དུ་གསལ་བའི་སྐུའི་འོད་ཟེར་གྱིས་སློབ་མའི་རྒྱུད་ཀྱི་ལས་ཉོན་བག་ཆགས་ཐམས་ཅད་བ་མོ་ལ་ཉི་ཟེར་ཕོག་པ་ལྟར་སངས་ཀྱིས་དག་པར་བྱས་ཏེ་ཉན་པ་པོ་རྣམས་རྗེ་བཙུན་འཕགས་མ་སྒྲོལ་མ་སྐུ་མདོག་ལྗང་གུ་གཡས་མཆོག་སྦྱིན་དང་གཡོན་ཨུཏྤལ་བསྣམས་པ་ལོངས་སྤྱོད་རྫོགས་པའི་ཆས་ཐམས་ཅད་ཀྱིས་བརྒྱན་ཅིང་ཞབས་བརྐྱང་བསྐུམ་གྱིས་པད་ཟླའི་གདན་ལ་བཞུགས་པ་མཚན་དང་དཔེ་བྱད་ཐམས་ཅད་རྫོགས་པའི་སྙན་གྱི་དབང་པོ་པདྨ་ཁ་ཕྱེས་པའི་རྣམ་པར་གསལ་བའི་སྙིང་གར་པད་ཟླའི་གདན་ལ་ཏཱཾ་ཡིག་ལྗང་གུ་འོད་ཐིག་གི་ཀློང་དུ་ཉི་མའི་ཟེར་ལྟ་བུའི་འོད་ཟེར་རབ་ཏུ་འབར་བ་ཞིག་ཏུ་བསྒོམ༔ རང་ཉིད་འཇམ་དཔལ་ཡབ་ཡུམ་གཉིས་སུ་མེད་པའི་ལྗགས་ཀྱི་དབང་པོ་འཇམ་དཔལ་སྨྲ་བའི་སེང་གེ་རུ་གསལ་བའི་ཐུགས་སྲོག་གི་ངོ་བོ་ལས་བདེན་པ་གཉིས་ཀྱིས་བསྡུས་པའི་ཆོས་ཐམས་ཅད་ཡིག་འབྲུ་འོད་ཕུང་འབར་བའི་རྣམ་པ་ཅན་དུ་ཆར་དང་ཆུ་རྒྱུན་ལྟར་བབ་ནས་སློབ་མའི་རྣ་བའི་དབང་པོ་ནས་ཡུ་བའི་བུ་གར་བརྒྱུད་དེ་སྙིང་གའི་འོད་ཐིག་ལ་ཕོག་པས་དོན་རབ་འབྱེད་པའི་ཤེས་རབ་ཆེན་པོས་དོན་ཐམས་ཅད་མཁྱེན་ཅིང་གསལ་ཏེ་ཐུགས་སྲོག་འོད་ཟེར་ཅན་ལ་ཕོག་པས་མི་བརྗེད་པའི་གཟུངས་ཆེན་པོ་ཐོབ་ཅིང་བརྟན་པར་བསྒོམ་ལ་འཆད་པར་བྱའོ༔ གཞན་ལ་རྩོད་པ་བྱེད་པའི་དུས་སུ་རང་ཉིད་འཇམ་དཔལ་ནག་པོ་གཡས་པས་རལ་གྲི་མེ་འབར་བ་ཀླད་ལ་བསྐོར་བས་ཕ་རོལ་པོའི་ལྷ་སྲུང་དགྲ་བླ་ཐམས་ཅད་ཀྱི་ནུས་པ་བཅོམ་སྟེ་དཔའ་བཀོང་ནས་རྒོལ་བ་པོ་ཁོ་རང་ལ་རྩོད་པས་རྒོལ་བ་དང་༔ གཡོན་པས་མེའི་ཞགས་པ་ཕ་རོལ་པོའི་བློ་ཡིད་ཤེས་པ་ཐམས་ཅད་འཆིང་ནས་རྨོངས་ཤིང་རྨུག་པར་བྱེད་པའི་བདག་ཉིད་ཅན་དུ་བསྒོམ༔ རང་གི་སྤྱི་བོར་ཤཱཀྱ་ཐུབ་པ་བསྒོམ་པའི་ཐུགས་རྡོ་རྗེ་ལྟ་བུའི་ཏིང་ངེ་འཛིན་གྱིས་ཕ་རོལ་པོའི་ཤེས་བྱ་ཐམས་ཅད་ཟིལ་གྱིས་གནོན་ཅིང་ཇི་ལྟ་ཇི་སྙེད་ཡེ་ཤེས་ཆེན་པོས་བདག་གི་རྒྱུད་ལ་ཉི་མ་ཤར་བ་ལྟར་ཁྱབ་སྟེ་གསལ་ཞིང་རྒྱས་པའི་བདག་ཉིད་ཅན་དུ་བསྒོམ་པ་དང་༔ རང་གི་སྙིང་གར་འཇམ་དབྱངས་དཀར་པོ་ཟླ་གཞོན་ཤར་བ་ལྟ་བུའི་ཐུགས་ཀར་འཇམ་དབྱངས་དམར་སེར་ཉི་མ་ཤར་བ་ལྟ་བུ་ཞིག་བསྒོམ༔ མགྲིན་པར་འཇམ་དབྱངས་སྨྲ་བའི་སེང་གེ་པདྨ་རཱ་གའི་ཕུང་པོ་ལ་ཉི་འོད་ཕོག་པ་ལྟ་བུ་ཞིག་ཏུ་གསལ༔ དཔྲལ་བར་འཇམ་དཔལ་གཞོན་ནུ་སེར་པོ་གསེར་གྱི་རི་བོ་ལ་ཉི་མ་ཤར་བ་ལྟ་བུ་ཞིག་བསྒོམ༔ ལྟེ་བར་འཇིགས་བྱེད་གཤིན་རྗེ་རིགས་བཞི་བསྒོམ་པས་ཕ་རོལ་པོའི་སྟོབས་ནུས་དང་ཤེས་པ་དཔའ་ཟིལ་ཐམས་ཅད་ཉི་འོད་ཆེན་པོས་མུན་པའི་ཚོགས་ཐམས་ཅད་ཟིལ་གྱིས་གནོན་པ་ལྟར་བསྡུས་པར་བྱེད་ཅིང་༔ གསང་བའི་གནས་སུ་ལྷ་ཆེན་དབང་ཕྱུག་ཆེན་པོ་ཡབ་ཡུམ་གྱི་སྐུ་ལས་འོད་ཕུང་ཆེན་པོ་ཕ་རོལ་པོའི་སྣང་སེམས་ཐམས་ཅད་དབང་དུ་བསྡུས་ཏེ་བདག་གི་མངའ་འོག་ཏུ་སྡུད་པར་བསྒོམ༔ དེ་དག་ཐམས་ཅད་ཀྱིས་ཕ་རོལ་པོ་ལ་ཞལ་གྱིས་ཕྱོགས་ཤིང་རྩོད་པའི་ལས་བྱེད་དེ་རྒོལ་བ་ཐམས་ཅད་གཞོམ་པར་བསམ་ལ་རྩོད་པར་བྱའོ༔ གཡས་སུ་དབང་སྡུད་ཀྱི་གིང་ཆེན་གནོད་སྦྱིན་ཤན་པ་དམར་ནག༔ གཡོན་དུ་ཟིལ་གནོན་གྱི་གིང་ཆེན་ལས་ཀྱི་གཤིན་རྗེ་ནག་པོ༔ དེ་གཉིས་ཀྱིས་ཀྱང་ཕ་རོལ་པོ་ལ་རྒོལ་བར་བསམ་ནས་རྩོད་པར་བྱའོ༔ རྩོད་པ་བྱེད་པ་ཡང་ཞེ་སྡང་དང་བདག་རྒྱལ་འདོད་ཀྱི་བསམ་པ་ཁོ་ནས་མ་ཡིན་པར་བསྟན་པའི་ཆེ་བ་འདོད་ཅིང་བསྐྱེད་པ་དང་༔ སེམས་ཅན་གྱིས་ཡིད་ཆེས་ཏེ་བློ་དམ་པའི་ཆོས་ལམ་དུ་གཟུད་པའི་ཆེད་དུ་དམིགས་ཏེ་རྩོད་པར་བྱའོ༔ རྩོམ་པའི་དུས་སུ་རང་ཉིད་འཇམ་དཔལ་དམར་སེར་དུ་གསལ་བའི་ཐུགས་ཀར་འཇམ་དཔལ་དཀར་པོ༔ དེ་ཡི་ཐུགས་ཀར་ཀུན་བཟང་ཡབ་ཡུམ༔ མགྲིན་པར་འཇམ་དཔལ་སྨྲ་བའི་སེང་གེ༔ ལྟེ་བར་འཇམ་དཔལ་སེར་པོ༔ གསང་གནས་སུ་འཇམ་དཔལ་ནག་པོ༔ སྤྱི་བོར་རྒྱལ་བ་ཤཱཀྱ་ཐུབ་པ་རྣམས་གསལ་ལ༔ དེ་དག་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་ཐམས་ཅད་རོ་གཅིག་ཏུ་འདྲེས་པ་རྒྱ་མཚོ་ཆེན་པོ་ལྟ་བུའི་ཀློང་ནས་དམ་པའི་ཆོས་ཐམས་ཅད་ཆུ་ཕྲན་འཕྲོ་བ་བཞིན་དུ་རྒྱུན་མི་ཆད་པར་འབྱུང་བར་བསམ་པའི་ངང་ནས་བརྩམ་པར་བྱའོ༔ རྩོམ་པ་ཡང་རང་ཉིད་ཆེ་འདོད་དང་གྲགས་འདོད་དང་རང་འདོད་ཁོ་ནའི་བསམ་པས་མ་ཡིན་པར་ཁམས་གསུམ་གྱི་སེམས་ཅན་ཐམས་ཅད་རྣམ་མཁྱེན་རྫོགས་པའི་སངས་རྒྱས་ཀྱི་ས་ལམ་ལ་སྦྱོར་བའི་ཕྱིར་དུ་དམིགས་ནས་ཆོས་ཆོས་སུ་འགྲོ་བ་ཡང་དག་དོན་རབ་བྱེད་པའི་རྩོམ་པའོ༔ ཉན་པའི་དུས་སུ་ཡང་རང་ཉིད་འཇམ་དཔལ་དམར་སེར་དུ་གསལ་བའི་སྙན་གྱི་དབང་པོ་ལྷ་མོ་དབྱངས་ཅན་མ་རུ་གསལ་བའི་སྐུའི་འོད་ཟེར་སྙིང་གའི་འཇམ་དཔལ་དཀར་པོའི་ཐུགས་ཀའི་ཀུན་བཟང་ཡབ་ཡུམ་དང་བཅས་པར་འབྲེལ་བ༔ སློབ་དཔོན་སྟོན་པ་རྫོགས་པའི་སངས་རྒྱས་སུ་གསལ་བའི་ཞལ་གྱི་པདྨོ་ནས་ཆོས་ཀྱི་ཆར་ཆེན་པོ་བབས་ནས་དབྱངས་ཅན་གྱི་ཐུགས་བརྒྱུད་དེ་ཐུགས་ཀའི་འཇམ་དཔལ་གྱི་སྐུ་ལ་ཐིམ་པས་དོན་རབ་གསལ་བའི་ཤེས་རབ་ཀྱི་སྒོ་ཕྱེས་ཏེ་ཀུན་བཟང་ཡབ་ཡུམ་གྱི་ཐུགས་ཀར་ཐིམ་པས་མི་བརྗེད་པའི་གཟུངས་ཆེན་པོ་ཐོབ་པར་བསྒོམ༔ དེ་ལྟར་བསྐྱེད་རིམ་གཟེར་བཞིའི་གནད་ལྡན་པའི༔ བར་མེད་ལོ་གསུམ་ཟླ་གསུམ་ཞག་གསུམ་དུ༔ བསྒྲུབ་ལ་གཞོལ་བའི་སྐྱེས་བུ་གང་སུ་དག༔ མཁས་པའི་དབང་པོ་བི་མ་ལ་དང་མཉམ༔ བསྐྱེད་པའི་གནད་མེད་བསྒོམ་པའི་འཆིང་མེད་པར༔ ངག་གིས་བཟླས་པ་ལོ་བརྒྱར་བཟླས་གྱུར་ཀྱང་༔ གྲུབ་པའི་རྟགས་མཚན་དངོས་གྲུབ་རྡུལ་ཕྲན་ཙམ༔ འབྱུང་དུས་མི་སྲིད་ལྷ་ལ་ཡི་ཆད་ཅིང་༔ གདམས་ངག་བློས་དོར་སྨད་ཚིག་འཆོལ་སྒྲོགས་བྱེད༔ དེ་འདྲའི་མགོ་རྨོངས་དམུས་ལོང་ཐམས་ཅད་ཀུན༔ རང་གི་ཐར་པའི་ས་བོན་བསྲེགས་མ་བྱེད༔ བསྒྲུབ་པའི་སྙིང་པོ་བསྐྱེད་རིམ་བསྒོམ་དམིགས་ཡིན༔ ཚུལ་བཞིན་གནད་དང་ལྡན་པས་ཉམས་སུ་ལོངས༔ སྣང་སེམས་ཐམས་ཅད་ཡེ་ཤེས་རོལ་པའི་ལྷ༔ རྟེན་དང་བརྟེན་པའི་འཁོར་ལོར་འཕོ་བ་ཡིན༔ གདམས་པ་འདི་ནི་ལོ་གསུམ་གནད་དུ་བསྣུན༔ དེ་ནས་དུས་ཀུན་ཡི་དམ་ལྷ་རུ་ཟུངས༔ ཚེ་འདིར་གྲོལ་བ་ཐོབ་བོ་སྐལ་ལྡན་རྣམས༔ ཚེ་རབས་མང་པོར་བསོད་ནམས་བསགས་པ་དང་༔ སྨོན་ལམ་བཟང་པོའི་སྟོབས་ཤུགས་བསྐྱེད་པ་ཡི༔ སྐལ་བཟང་སྐྱེས་བུ་དམ་པ་མ་གཏོགས་པ༔ གདམས་པ་འདི་དང་ཤིན་ཏུ་འཕྲད་པར་དཀའ༔ གདམས་པ་འདི་འཕྲད་ཉམས་ལེན་བྱེད་པ་ཡི༔ སྐལ་པ་བཟང་པོའི་སྐྱེས་བུ་གང་སུ་དག༔ ཚེ་འདིར་མཁྱེན་གཉིས་ཡེ་ཤེས་མངོན་གྱུར་ཏེ༔ རྣམ་མཁྱེན་རྫོགས་པའི་སངས་རྒྱས་སར་འགོད་འགྱུར༔ སྙིང་ཕྱུང་ལག་མཐིལ་བཀྲམ་འདྲའི་གདམས་པ་འདི༔ ལྔ་བརྒྱའི་སེམས་ཅན་དམུས་ལོང་བླུན་པོའི་རིགས༔ བསྐྱེད་དམིགས་ཟུར་ཙམ་དགོས་པར་མ་ཐོས་ཤིང་༔ ཐོས་ཀྱང་མི་ཤེས་བསྟན་ཀྱང་མི་གོ་བའི༔ དབུ་རྒོད་རྣམས་ཀྱི་དོན་དུ་འདི་བཞག་སྟེ༔ འདི་ཙམ་མི་ཤེས་བསྒྲུབ་པ་བྱས་སྙམ་རྣམས༔ བསྒྲུབ་པའི་ཐ་སྙད་ཙམ་ཡང་ཡོད་མ་ཡིན༔ དེ་ཕྱིར་འདི་ཙམ་བསྐྱེད་བསྒོམ་དམིགས་པའི་གནད༔ ཤེས་ནས་ཉམས་སུ་ལེན་པའི་སྐྱེས་བུ་ལ༔ བསྒྲུབ་པའི་འབྲས་བུ་དངོས་གྲུབ་ངེས་པར་འབྱུང་༔ རྒྱ་ཆེ་གྲངས་མང་རྒྱུད་ལུང་མན་ངག་ཚོགས༔ ཤེས་པའི་ཤེས་རབ་བརྟན་པ་ཤིན་ཏུ་དཀོན༔ ཤེས་ཀྱང་ཤེས་པ་ལུང་མ་བསྟན་སོང་ལས༔ ཤེས་བཞིན་ཉམས་ལེན་བྱེད་པ་ཤིན་ཏུ་དཀོན༔ དེ་ཕྱིར་ཁ་ཙམ་མིན་པར་རྒྱུད་ལུང་གི༔ ཉེ་དུས་བརྒྱུད་ཕྱིར་འདི་ཙམ་བསྟན་པ་ཡིན༔ དེ་ཕྱིར་མ་ནོར་ཉམས་སུ་ལེན་པ་རྣམས༔ ཚེ་འདིར་གྲོལ་བ་མངོན་དུ་མ་གྱུར་ན༔ པདྨ་བདག་གིས་བརྒྱུད་འཛིན་བསླུས་པ་ཡིན༔ དེ་དོན་སོམས་ལ་གནད་དང་ལྡན་པ་ཡིས༔ ངེས་པར་ཉམས་སུ་ལོངས་ཤིག་ཕྱི་རབས་རྣམས༔ འཇམ་དཔལ་གསང་འདུས་སྒྱུ་འཕྲུལ་རོལ་པ་ཡི༔ བསྒྲུབ་པ་འདི་ནི་རྒྱལ་ཀུན་སྲོག་ཏིག་སྟེ༔ རིག་འཛིན་བླ་མ་རྣམས་ཀྱི་ཏིང་འཛིན་དང་༔ དུས་གསུམ་རྒྱལ་བ་ཀུན་གྱི་དགོངས་པ་དང་༔ མ་དང་མཁའ་འགྲོ་རྒྱ་མཚོའི་ཡེ་ཤེས་དང་༔ བཀའ་སྲུང་དྲེགས་པ་ཡོངས་ཀྱི་མཐུ་ནུས་ཀྱིས༔ བྱིན་གྱིས་བརླབས་ཤིང་སྙིང་པོའི་བཅུད་དྲིལ་བའི༔ རྣོ་ནུས་བྱིན་རླབས་དངོས་གྲུབ་ཤིན་ཏུ་མྱུར༔ འབྲེལ་ཚད་རྣམ་པར་གྲོལ་བའི་གདམས་པ་ཡིན༔ བཀའ་སྲུང་དྲེགས་པ་དབང་ཕྱུག་ཆེན་པོ་དང་༔ གནོད་སྦྱིན་ཤན་པ་དབང་དྲག་རོལ་པ་རྩལ༔ ཆོས་འདིས་སྣང་སྲིད་ཁྱབ་པའི་བྱེད་པོ་གྱིས༔ བརྒྱུད་འཛིན་སྐྱེས་བུའི་དབང་གི་ལས་སྒྲུབས་ཤིག༔ སྙན་དང་གྲགས་པའི་བ་དན་ཕྱོགས་བརྒྱར་སྤེལ༔ གཟའ་བདུད་རྒྱལ་པོ་འཇིགས་པའི་དྲག་ཤུལ་བདག༔ ཁྱོད་ལ་བཀའ་འདི་གཏད་ཀྱིས་བསྟན་པ་སྲུངས༔ བསྟན་དགྲ་དམ་ཉམས་ཐམས་ཅད་ཆམ་ལ་ཕོབ༔ ལྟ་ལོག་བདུད་སྡེའི་སྙིང་ཁྲག་ཧུབ་ཀྱིས་འཐུང་༔ གཤེ་སྐུར་སྒྲོ་འདོགས་མཁན་ལ་ཆད་པ་ཆོད༔ བཀའ་སྲུང་དྲེགས་པ་སྡེ་གསུམ་འཁོར་བཅས་ཀྱི༔ སྒྲུབ་ལ་བར་ཆད་དམ་སྲི་བདུད་བགེགས་ཀུན༔ རྗེས་ལྷག་མེད་པར་ཆམ་ལ་ཕབ་པ་དང་༔ བྲན་དུ་ཁོལ་ལ་བསྟན་པའི་སྲུང་མར་བཀོལ༔ བཀའ་ནན་གྱིས་ཤིག་ཁྲིམས་ཀྱི་འོག་ཏུ་ཆུགས༔ བཀའ་དང་དམ་ལ་མ་འདའ་ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ནི་ས་མོ་ལུག་གི་ལོ་ཧོར་ཟླ་བཅུ་གཅིག་པའི་ཚེས་བཅུའི་ཉིན་གསེར་སྨད་རྔ་ལ་སྟག་རྩེའི་གཡས་ལོགས་རྡོ་རྗེ་བྲག་ཅེས་བྱ་བ་ནས་གདན་དྲངས་བའི་ཚེ་ནམ་མཁའ་བར་སྣང་ས་གཞི་ཐམས་ཅད་ལ་འཇའ་ཚོན་འོད་ལྔས་ཁྱབ་ནས་དྲི་བཟང་གི་ན་བུན་ཐུལ༔ རི་དྭགས་རྙི་ལས་བཏོན༔ རོལ་མོའི་རང་སྒྲ་ལྡིར་བ་ལ་སོགས་པའི་དགེ་ལེགས་ཡ་མཚན་ཅན་གྱི་ལྟས་བཟང་དཔག་ཏུ་མེད་པ་བྱུང་ནས་རྟེན་འབྲེལ་ཁྱད་པར་ཅན་འགྲིགས་པ་དང་༔ བརྒྱུད་འཛིན་གྱི་སྐྱེས་བུ་ཐམས་ཅད་རི་དྭགས་རྒྱ་ནང་ནས་བཏོན་པ་ལྟར་སྲིད་པ་སྡུག་བསྔལ་གྱི་རྒྱ་མཚོ་ལས་འགྲོ་བའི་ལྟས་བཟང་མངོན་དུ་གྱུར་པ་འདི་ཉིད༔ ཁྲག་འཐུང་བདུད་འཇོམས་རྡོ་རྗེའི་གཏེར་གྱི་ཡང་བཅུད་དམ་པ་འབྲེལ་ཚད་རྣམ་པར་གྲོལ་བའི་དམ་ཆོས་མཆོག་གྱུར་འདི་ནི་མི་ལོ་སུམ་ཅུའི་བར་དུ་བཀའ་རྒྱ་བྱས་མཐར་རྟེན་འབྲེལ་དུས་ལ་བབས་ཚེ་ཆོས་ཀྱི་བདག་པོ་ཀུན་བཟང་ཆོས་ཀྱི་གྲགས་པ་དང་༔ རེ་སྐོང་ཕྱོགས་ཀྱི་སྐྱེས་བུ་དགེ་འདུན་རྒྱ་མཚོ་གཉིས་ཀྱིས་ནན་དུ་བསྐུལ་ངོར་གཏན་ལ་ཕབ་སྟེ་མཐར་ཆོས་ཀྱི་བདག་པོ་བཅུ་གསུམ་གྱིས་དང་དུ་བླངས་ཏེ་འཛིན་སྐྱོང་སྤེལ་གསུམ་བྱས་ནས་གདུལ་བྱ་མང་པོ་ཐར་བ་དང་རྣམ་མཁྱེན་གྱི་གོ་འཕང་དུ་འཕེན་པར་འགྱུར་བའོ།།དགེའོ།།དགེའོ།།དགེའོ།།ལེགས་སོ།།སརྦ་མངྒ་ལཾ།།།།