མཁའ་འགྲོའི་ཚེ་སྒྲུབ་ཟབ་མོ༔

Previous Text Back to Volume Page Next Text

Wylie title	mkha' 'gro'i tshe sgrub zab mo
Location	bdud 'joms rin po che'i bka' 'bum Volume 16, Text 7, Pages 39-40 (Folios 1a1 to 1b6)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Mkha' 'gro'i tshe sgrub zab mo. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 16: 39-40. Kalimpong: Dupjung Lama, 1979-1985.
Side notes	Recto: tshe sgrub Verso: mkha' 'gro'i thugs thig
More details More details
Tertön	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་ (Dudjom Rinpoche)
Genre	Longevity Rituals - tshe sgrub
Cycle	ཟབ་ལམ་མཁའ་འགྲོའི་ཐུགས་ཐིག་ (zab lam mkha' 'gro'i thugs thig)

[edit]

༁ྃ༔ མཁའ་འགྲོའི་ཚེ་སྒྲུབ་ཟབ་མོ་ཨྠིྀ༔ མཁའ་འགྲོ་ཚེ་ཡི་སྒྲུབ་པ་ནི༔ ཌཱ་ཀིའི་མཎྜལ་དབུས་ཉིད་དུ༔ རིན་ཆེན་བུམ་པ་བཅུད་ལྡན་བཤམ༔ ཚེ་གལ་མཆོད་པ་བཟང་པོས་བསྐོར༔ བདག་མདུན་ཡེ་ཤེས་མཁའ་འགྲོ་ཡི༔ ཐུགས་ཀར་རྒྱ་གྲམ་གྱིས་བསྡམས་པའི༔ ཉི་ཟླའི་གྭའུའི་དབུས་སུ་ཧྲཱིཿ འོད་འབར་ཉི་ཟླའི་ཁ་བྱེ་ནས༔ ནམ་མཁའི་མཐའ་ཁྱབ་སྤྲོས་པ་ཡིས༔ རང་གི་བླ་ཚེ་ཆད་ཉམས་དང་༔ འཁོར་འདས་བརྟན་གཡོའི་དྭངས་བཅུད་ཀུན༔ འོད་ཟེར་བདུད་རྩིའི་རྣམ་པར་བསྡུས༔ བདག་དང་སྒྲུབ་པའི་རྫས་ལ་ཐིམ༔ འཆི་མེད་ཚེ་ཡི་དངོས་གྲུབ་དང་༔ བདེ་ཆེན་ཡེ་ཤེས་རྒྱས་པར་བསམ༔ རྩ་སྔགས་ཤམ་དུ༔ ཨཱ་ཡུརྫྙཱ་ན་ཚེ་བྷྲུྃ༔ ཞེས་བཟླ་ཐུན་མཚམས་ཚེ་འགུགས་བསྐུལ༔ ཧྲཱིཿ པདྨ་རྣམ་པར་རྒྱས་པའི་ཞིང་༔ བདེ་ཆེན་འབར་བ་དབང་གི་དལ༔ ཟླ་གམ་ཚེ་ཡི་ཕོ་བྲང་ནས༔ འཆི་མེད་ཡེ་ཤེས་དྷཱ་ཀིནཱི༔ རིགས་ཀྱི་མཁའ་འགྲོ་འབུམ་ཕྲག་དང་༔ ཡང་སྤྲུལ་ཕོ་ཉ་མགྱོགས་མའི་ཚོགས༔ གྲངས་མེད་ཉི་ཟེར་རྡུལ་ལྟར་འཁྲིགས༔ དེང་འདིར་ཐུགས་དམ་རྒྱུད་བསྐུལ་ལོ༔ སྒྲུབ་མཆོག་རྣལ་འབྱོར་བདག་ཅག་གི༔ བླ་ཚེ་འཁྱམས་དང་ཡར་བ་དང་༔ འབྱུང་པོས་བརྐུས་ཤིང་འཕྲོག་པ་རྣམས༔ དྲེགས་པ་རང་རང་ལ་གནས་ཁུག༔ ས་ཆུ་མེ་རླུང་ནམ་མཁའི་བཅུད༔ ཤ་ཁྲག་དྲོད་འབུགས་སེམས་ལ་བསྟིམ༔ སྐྱེ་འགྲོའི་ཚེ་བསོད་དཔལ་ཡོན་སྟོབས༔ རྩ་གསུམ་རྒྱལ་བའི་བྱིན་རླབས་དབྱིག༔ དྲང་སྲོང་རིག་འཛིན་གྲུབ་པའི་ཚེ༔ མ་ལུས་སྒོ་གསུམ་ཐིག་ལེར་སྡུས༔ རྒས་མེད་ལང་ཚོའི་གཟི་མདངས་སྐྱེད༔ ནད་མེད་བདེ་བའི་དགའ་བ་སྤེལ༔ འཆི་མེད་རྡོ་རྗེ་སྲོག་རྩ་ཚུགས༔ སྐྱེ་འཆི་བསྒྲེས་རྒུད་དང་བྲལ་བ༔ མི་ཤིགས་གཞོན་ནུ་བུམ་པ་སྐུའི༔ རྟག་པ་དམ་པའི་དངོས་གྲུབ་སྩོལ༔ ཞེས་བསྐུལ་བདུད་རྩིས་ལུས་ལང་བའི༔ དྭངས་མ་ཧྲཱིཿལ་འདུས་ནས་སུ༔ གྭའུ་ཁ་འགྲིགས་རྒྱ་གྲམ་གྱི༔ རྭ་མདུད་འོད་ཀྱི་ཐག་པས་བསྡམས༔ མི་ཤིགས་རྡོ་རྗེའི་སྲོག་འགྲུབ་བསམ༔ བྷྲུྃ༔ ཚེ་ཡི་དངོས་གྲུབ་དྭངས་མའི་བཅུད༔ མི་ཤིགས་ཙིཏྟའི་དཀྱིལ་དུ་སྦ༔ འགྱུར་མེད་དབྱིངས་ཕྱུག་ཡུམ་གྱི་ཀློང་༔ གཞོམ་ཞིག་བྲལ་བར་རྒྱས་གདབ་བོ༔ དྷརྨ་དྷཱ་ཏུ་ཨ་ཨ་ཨ༔ ཞེས་པས་རྒྱས་གདབ་པར་བྱ༔ རྟགས་མཐོང་ཚེ་བུམ་སྤྱི་བོར་བླངས༔ ཧཱུྃ༔ ཡེ་ཤེས་མཁའ་འགྲོ་ཚེ་ཡི་བདག༔ སྒྲིབ་པའི་དྲི་མ་ཀུན་བྲལ་བ༔ སྐྱེ་འཆི་མེད་པ་རྡོ་རྗེའི་སྐུ༔ འཆི་མེད་ཚེ་ཡི་དངོས་གྲུབ་སྩོལ༔ ཨོཾ་ཨཱ་ཡུརྫྙཱ་ན་ཚེ་བྷྲུྃ་ཧཱུྃ༔ ཐབས་ཤེས་རྫས་རོལ་ཤིས་པ་སྤེལ༔ དེས་ནི་རྡོ་རྗེའི་ཚེ་དང་ནི༔ རྒས་མེད་ལང་ཚོ་ཡུང་དྲུང་ལུས༔ རྡོ་རྗེའི་སྲོག་རྩ་འགྲུབ་པར་འགྱུར༔ ས་མ་ཡ༔