TTDL-ZABTER-05-CA-048

༠༠༠༠བརྡ་ཡིག༤༦༣རིག་འཛིན་སྙིང་གི་ཡང་ཐིག་ལས༔ དཔལ་ཆེན་རྡོ་རྗེ་གཞོན་ནུའི་བསྐུལ་བྱང་ཞིང་བཅུ་ཚར་གཅོད་བཞུགས༔ ན་མོ་གུ་རུ་པདྨ་ཀ་ར་ཡེ༔ དབྱིངས་ནས་ཡེ་ཤེས་བསྐུལ་བ་ལ༔ ཤ་ཁྲག་དམར་གཏོར་སྐྱེམས་ཕུད་བཤམས༔ ཧ་ཧོ་ཧྲཱི་ཡིས་འདོད་རྒུར་སྤེལ༔ རང་གི་སྙིང་གའི་འོད་ཟེར་གྱིས་རང་བཞིན་གྱི་གནས་ན་བཞུགས་པའི་རྒྱལ་བ་སྲས་དང་བཅས་པ་མཁའ་ཁྱབ་ཀྱི་འཁོར་ལོར་སད་པར་གྱུར༔ ཧཱུྃ༔ བཞེངས་ཤིག་ཆོས་ཀྱི་དབྱིངས་ནས་བཞེངས༔ བསྐུལ་ལོ་མི་མངོན་དབྱིངས་ནས་བསྐུལ༔ མཛོད་ཅིག་དྲག་པོའི་ཕྲིན་ལས་མཛོད༔ དམ་ཚིག་ཆེན་པོའི་དུས་ལ་བབ༔ རྡོ་རྗེ་སྲིན་པོའི་དུས་ལ་བབ༔ ཤྭ་ན་ཆེན་མོའི་དུས་ལ་བབ༔ བདག་ཉིད་ཆེན་མོའི་དུས་ལ་བབ༔ ས་བདག་ཆེན་མོའི་དུས་ལ་བབ༔ སྒྲོལ་གིང་རྣམ་བཞིའི་དུས་ལ་བབ༔ དབང་ཕྱུག་མ་བརྒྱད་དུས་ལ་བབ༔ གིང་ཆེན་ལང་ཀ་འབར་མའི་ཚོགས༔ དབྱིངས་ནས་སྐུར་བཞེངས་དུས་ལ་བབ༔ ཤ་ཁྲག་གཏོར་སྐྱེམས་འདི་བཞེས་ལ༔ ཕྱོགས་བཞི་མཚམས་བརྒྱད་སྟེང་འོག་ལས༔ གནོད་བྱེད་དྲག་ཤུལ་རྒོལ་སྡང་བའི༔ སེམས་ལྡན་གཟུགས་ཅན་དགྲ་བོ་དང་༔ གཟུགས་མེད་གནོད་པར་བྱེད་པའི་བགེགས༔ ཕྲིན་ལས་མངོན་སྤྱོད་དྲག་ཤུལ་གྱིས༔ ཚར་གཅོད་རྡུལ་དུ་བརླག་མཛོད་ལ༔ ཤ་ཁྲག་རུས་པ་ཟས་སྐལ་རོལ༔ རྣམ་ཤེས་ཆོས་ཀྱི་དབྱིངས་སུ་རོལ༔ རྗེས་ཤུལ་ཙམ་ཡང་མེད་པར་མཛོད༔ རང་དམ་གཉན་པོ་དཔང་བཙུགས་ཏེ༔ མ་འདའ་བཛྲ་ས་མ་ཡ༔ ཅེས་བརྗོད་གཏོར་སྐྱེམས་ཕྱི་རུ་དོར༔ རྣམ་བཞིའི་ཕྲིན་ལས་མྱུར་འགྲུབ་འགྱུར༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ གུ་ཧྱ༔ བརྡ་ཐིམ༔ ཞེས་པ་འདི་སློབ་བུ་ཀུན་བཟང་ཆོས་གྲགས་ཀྱིས་ནན་དུ་བསྐུལ་ངོར་བདུད་འཇོམས་རྡོ་རྗེས་ཡེ་ཤེས་མཁའ་འགྲོའི་བརྡ་རིས་ལས་དག་ཕབ་པའི་ཡི་གེ་པ་ནི་བསྐུལ་བ་པོ་དེ་ཉིད་དོ།།བཀྲ་ཤིས།