TTDL-ZABTER-09-TA-008

༠༠༠༠བརྡ་ཡིག༤༧ཟབ་གསང་མཁའ་འགྲོའི་སྙིང་ཐིག་ལས༔ གཟའ་རྒོད་སྒྲུབ་པའི་ཆ་ལག་རང་སྲུང་རྡོ་རྗེའི་གོ་ཁྲབ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ གཟའ་བདུད་ནག་པོ་སྒྲུབ་པའི་ཚེ༔ རང་སྲུང་ཟབ་མོ་འདི་མེད་ན༔ འདི་ནི་ཤིན་ཏུ་མི་སྲུན་པ༔ གྲིབ་དང་ཟིལ་གྱིས་གནོད་འབྱུང་སྲིད༔ དེ་ཕྱིར་འདི་ལ་བརྩོན་པར་མཛོད༔ རང་ཉིད་ཡི་དམ་གནས་སུ་གྱུར་པ་ལས་དཔལ་གསང་བའི་བདག་པོ་ཕྱག་ན་རྡོ་རྗེ་སྐུ་མདོག་མཐིང་ནག་ཞལ་གཅིག་ཕྱག་གཉིས་གཡས་པ་གནམ་ལྕགས་ཀྱི་རྡོ་རྗེ་གསོར་ཞིང་གཡོན་པས་སྦྲུལ་གྱི་ཞགས་པ་བསྣམས་ཞིང་ཞབས་གཉིས་སྡེ་བརྒྱད་ཕོ་མོའི་གདན་ལ་འགྱིང་བ་ཁྲོ་གཏུམ་རྔམས་བརྗིད་འབར་བའི་ཉམས་དང་ལྡན་པའི་ཐུགས་ཀར་རྡོ་རྗེ་སྔོན་པོའི་ལྟེ་བར་ཉི་ཟླའི་གྭའུ་ཁ་སྦྱོར་བའི་ནང་དུ་ཧཱུྃ་མཐིང་ནག་ལ་སྔགས་ཀྱིས་བསྐོར་བར་བསྒོམ༔ ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ༔ ཅེས་གསལ་བའི་ངང་ནས་བརྒྱ་རྩ་བརྗོད་མཐར༔ དཔལ་གསང་བའི་བདག་པོ་གནས་སུ་གྱུར་པ་ལས་རང་ཉིད་ཡེ་ཤེས་པའི་གཟའ་བདུད་ནག་པོ་སྐུ་མདོག་མཐིང་ག་དབུ་དགུའི་སྟེང་དུ་བྱ་རོག་གི་གདོང་ནག་པོས་ཤ་སྐད་སྒྲོགས་པ༔ དབུ་རེ་རེ་ལ་སྤྱན་གསུམ་གསུམ་ཡོད་པ༔ ཞལ་གདངས་ཤིང་ལྗགས་འདྲིལ་བ་རྣོ་དབལ་གྱི་མཆེ་བ་གཙིགས་པ༔ སྨ་ར་ལས་མེ་ཡི་ཚྭ་ཚྭ་འཕྲོ་ཞིང་སྨིན་མར་གློག་འཁྱུག་པ༔ དབུ་སྐྲ་དམར་སེར་སྲིད་པའི་རྩེ་རུ་མེ་ལྟར་དུ་འབར་བ་སྐུ་སྨད་སྦྲུལ་དུ་འཁྱིལ་བ་ཕྱག་བཞི་གཡས་ཀྱི་དང་པོ་ན་རལ་གྲི་མེ་འབར་བ་བསྣམས་ཤིང་དགྲ་བགེགས་གདུག་པ་ཅན་གྱི་མགོ་བོ་ཚལ་པ་བརྒྱ་རུ་འགེམ་ཞིང་ལུས་དུམ་བུར་གཏུབས་པ༔ གཡོན་གྱི་དང་པོ་ན་ཆུ་སྲིན་གྱི་རྒྱལ་མཚན་དང་སྦྲུལ་ཞགས་བསྣམས་པ་ཐ་མ་གཉིས་ཀྱིས་མདའ་གཞུ་འགེང་ཞིང་ཡན་ལག་ལ་སྦྲུལ་གྱི་ཆུན་པོས་བརྒྱན་པ༔ མགོ་ལུས་མེད་པར་མིག་གིས་གང་ཞིང་དུག་རླངས་འཕྲོས་པས་དགྲ་བགེགས་གནོད་བྱེད་ཐམས་ཅད་ཧུར་ཐུམ་དུ་གསོད་པའི་ནུས་པ་དང་ལྡན་པར་བསྒོམ༔ ཐུགས་ཀར་དུས་གསུམ་གྱི་རྒྱལ་བ་ཐམས་ཅད་ཀྱི་སྲོག་གི་ངོ་བོ་ཧཱོུྃཾ་མཐིང་ནག་ལ་སྔགས་ཀྱིས་བསྐོར་བར་བསྒོམ༔ ཨོཾ་ཤྲཱི་མ་ཧཱ་ཀཱ་ལ་རཀྵ་རཱ་ཧུ་ལ་ཧཱུྃ་ཕཊ༔ ཅེས་བརྗོད་པ་ཙམ་གྱིས་འཁོར་འདས་ཡོངས་ཀྱི་ནུས་བྱིན་ཐམས་ཅད་རྫོགས་པར་བསམ༔ དེ་བརྒྱ་རྩ་བརྗོད་མཐར་མདུན་བསྐྱེད་ལ་འཇུག་གོ༔ དེ་ཡིས་རང་སྲུང་མཆོག་དུ་གྱུར༔ བཀའ་སྲུང་གཟའ་མཆོག་རྒྱལ་པོས་སྲུངས༔ དམ་ཉམས་ལག་ཏུ་མ་བཏང་ཞིག༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ བརྡ་ཐིམ༔ ཞེས་པ་འདི་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་མཐར་རང་སློབ་དགེ་འདུན་རྒྱ་མཚོས་བསྐུལ་བའི་ངོར་གཏན་ལ་ཕབ་པའོ།།དགེའོ།།