TTDL-ZABTER-09-TA-034

༠༠༠༠༠༠བརྡ་ཡིག༢༤༧ཟབ་གསང་མཁའ་འགྲོའི་སྙིང་ཐིག་ལས༔ བཙན་རྒོད་སྲོག་ལེན་དམར་པོའི་དྲག་བསྐང་རྣོ་བའི་མདེའི་ཐུང་ཞུགས༔ ན་མོ་གུ་རུ་པདྨ་ཀ་ར་ཡེ༔ ༠༠༠༠༠༠བརྡ་ཡིག༢༤༧ཤ་ཁྲག་དམར་གྱི་གཏོར་མ་བཤམས༔ ར་ཚིལ་དང་ནི་ཚིལ་ཆེན་གྱི༔ གསུར་ཆེན་རྒྱུན་མི་འཆད་པར་བཏང་༔ ཨོཾ་སྭ་བྷཱ་ཝ་སོགས་ཀྱིས་སྦྱངས༔ ཨ་ཀཱ་རོ་སོགས་དང་ནམ་མཁའ་མཛོད་སྔགས་ཀྱིས༔ མི་ཟད་རྒྱན་གྱི་ལོངས་སྤྱོད་རྒྱ་ཆེན་སྤེལ༔ རང་ཉིད་ལྷ་ཡི་ང་རྒྱལ་བརྟན་པོས༔ ཀྱཻ༔ ཕྱོགས་ཕྱོགས་དག་ཀྱང་ཕ་གི་ན༔ ཉི་མ་ནུབ་ཕྱོགས་ཕ་གི་ན༔ བཙན་ཡུལ་ཟངས་ཐང་དམར་པོ་ནས༔ བཙན་རྒོད་རོལ་པ་སྐྱ་བདུན་པོ༔ དད་དང་དམ་ཚིག་གཉན་གྱིས་འབོད༔ འཁོར་དང་བཅས་པ་གཤེགས་སུ་གསོལ༔ དམ་ཚིག་ཆེན་པོའི་གདན་ལ་བཞུགས༔ དགྲ་བོ་ཧུར་ཐུམ་གསོད་པའི་ཕྱིར༔ ཉེར་སྤྱོད་བདུན་དང་འདོད་ཡོན་ལྔ༔ སྨན་གཏོར་རཀྟ་ག་ཎ་ཚོགས༔ དགྲ་བོའི་ཤ་ཁྲག་སྲོག་དབུགས་དཀོར༔ བཤོས་བུ་དམར་ནག་ཤ་ཡིས་བརྒྱན༔ ཆང་སྐྱེམས་ཁྲག་སྐྱེམས་ཇ་ཡི་སྐྱེམས༔ གསེར་སྐྱེམས་ཟངས་སྐྱེམས་བདུད་རྩིའི་མཚོ༔ ར་ཤ་ཁྲག་ཚིལ་ཤ་ཆེན་གསུར༔ དངོས་འབྱོར་ཡིད་ཀྱིས་རྣམ་སྤྲུལ་པའི༔ འདོད་ཡོན་ནམ་མཁའ་མཛོད་ཆེན་པོ༔ གནོད་སྦྱིན་ཙིའུ་དམར་ཐུགས་དམ་བསྐང་༔ ཡམ་ཤུད་དམར་པོའི༴སྲོག་ལེན་དམར་པོའི༴གྲི་བཙན་ཐུམ་པོའི༴རྡོ་རྗེ་ལེགས་པའི༴རོལ་པ་སྐྱ་བདུན༴འབར་བ་སྤུན་བདུན༴གནམ་བཙན་མཐིང་ཡུམ༴ཆུ་བཙན་དཀར་པོའི༴ས་བཙན་སེར་པོའི༴མེ་བཙན་དམར་པོའི༴རླུང་བཙན་ལྗང་ཀུའི༴རྡོ་བཙན་ཁྲ་བོའི༴ཤིང་བཙན་སྔོན་པོའི་ཐུགས་དམ་བསྐང་༔ ཐུགས་དམ་བསྐང་ངོ་དགྲ་ལ་རྦད༔ བསྐུལ་ལོ་རྒྱུགས་ཤིག་ལས་ལ་ཆོས༔ དགྲ་ལས་གཞན་དུ་འབྱམས་མ་བྱེད༔ ཐོག་རྡུག་མེད་པར་ཧུར་ཐུམ་སོད༔ སྔགས་མཁན་རང་ལ་སླར་མ་ལྡོག༔ དགྲ་བོའི་མི་ནོར་དཀོར་དང་བཅས༔ རྗེས་ལྷག་མེད་པའི་ས་རུ་གཏུག༔ དུས་གསུམ་རྒྱལ་བ་སྲས་བཅས་ཀྱིས༔ བཀའ་དམ་གཉན་པོ་དཔང་བཞག་སྟེ༔ བཀའ་བསྒོ་ཡིན་ནོ་བཀའ་མ་བཅག་༔ དམ་ཚིག་ཡིན་ནོ་དམ་མ་ཉམས༔ མ་གཡེལ་མ་འགྱངས་ས་མ་ཡ༔ འདི་ལྟར་གྲངས་ལྡན་བསྐང་བ་ཡིས༔ མངོན་སྤྱོད་ཕྲིན་ལས་ཐོགས་མེད་འགྲུབ༔ བསྐང་བ་འདི་མེད་སྲོག་གི་ལས༔ བསྒྲུབ་ཀྱང་འགྲུབ་པ་ཤིན་ཏུ་དཀོན༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ གུ་ཧྱ༔ ཞེས་པ་འདི་ཡང་སློབ་བུ་འཇིགས་མེད་དམ་ཆོས་ཀྱིས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཡི་གེར་ཕབ་པའོ།།