སྤྲོས་བྲལ་ཆོས་ཉིད་དོན་དམ་བདེན་པ་མཆོག།

First text in section. Back to Volume Page Next Text

Wylie title	spros bral chos nyid don dam bden pa mchog
Location	phrin las nor bu'i gsung 'bum Volume 1, sde tshan 6, Text 14, Pages (Folios to )
Author	ཕྲིན་ལས་ནོར་བུ་
Citation	Thinley Norbu. Spros bral chos nyid don dam bden pa mchog. In Phrin las nor bu'i gsung 'bum, Vol. 1.
Side notes
More details More details
Genre

[edit]

༄༅། །སྤྲོས་བྲལ་ཆོས་ཉིད་དོན་དམ་བདེན་པ་མཆོག །ཇི་བཞིན་གཟིགས་ལས་སྲིད་པའི་འཆིང་བ་གྲོལ། །གཡོ་མེད་ཆོས་སྐུའི་རྒྱལ་ཐབས་མངའ་བརྙེས་པ། །གྲུམ་གྱི་མཁར་ནག་པ་ལ་གསོལ་བ་འདེབས། །གཉིས་སྣང་ཆོས་ཅན་སེམས་ཀྱི་རྟོག་ཚོགས་ཀྱི་སྤྲོས་པ་ཀུན་དང་བྲལ་བའི་ཆོས་ཉིད་དོ༵ན་དམ་པའི་བདེ༵ན་པ༵་གཉིས་སུ་མེད་པའི་ཡེ་ཤེས་དགོངས་པའི་མཆོ༵ག་སྒྲིབ་མེད་ཇི༵་བཞི༵ན་གྲུམ་གྱི་མཁར་ནག་པ་ལ་ན་མོ། ཕུང་པོ་ནམ་ཡང་མི་ཆགས་པ་བཞིན་དུ་སྲི༵ད་པ༵འི་འཆི༵ང་བ༵་མཐའ་དག་རང་ཞིག་ཏུ་གྲོ༵ལ་ཏེ་དུས་གསུམ་ཀུན་ཏུ་ཡིན་པ་གསུམ་གྱི་བདག་ཉིད་ལས་གཡོ༵་བ་མེ༵ད་པ་ཆོ༵ས་སྐུ༵་ཀུན་ཏུ་བཟང་པོའི་རྒྱལ༵་ཐ༵བས་ལ་མང༵འ་བརྙེས༵་པ༵་གྲུམ༵་གྱི༵་གཏེར་སྟོན་མཁ༵ར་ན༵ག་པ༵་སྟེ་དེ་ལ༵་གསོ༵ལ་བ༵་འདེ༵བས་སོ། །དེ་ཡང་ཇི་སྐད་དུ། བོད་འབངས་ཡོངས་ཀྱི་ཆོས་ལུགས་གོད་རེ་བྲོ༔ འཇིག་རྟེན་ཁྱིམ་པའི་ཁ་ནས་ཆོས་སྐད་རེ༔ ར་རོག་ཕད་རོག་ཁྱད་པར་མེད་ཅེས་ཟེར༔ རྒུང་ལ་བསིལ་སྦྱར་ཡས་གདོན་ཡིན་ནོ་ཟེར༔ མཚང་མེད་པོ་རྣམས་ནད་པའི་སྔས་སྲུང་བྱེད༔ མི་རེའི་ལག་ན་རྩིས་ཀྱི་ཤོག་ཁྲ་རེ༔ རྨོངས་ཁྱུ་ཁ་འདྲིལ་མཁས་པ་བསྐྱར་ལ་འདོན༔ མོན་ཁ་སྤ་གྲོར་སྦས་པའི་གཏེར་ཁ་འདི༔ མི་བཞག་འདོན་པའི་རྟགས་དེ་བསྟན་ནས་འབྱུང་༔ གཏེར་སྟོན་གྲུམ་གྱི་མཁར་ནག་པ་ཞེས་འབྱུང་༔ ཞེས་གཏེར་སྟོན་གྲུམ་དང་སྤ་གྲོ་བའི་ཡོན་བདག་ནག་པོ་མཁར་བྱ་བའི་ཡོན་མཆོད་གཉིས་བསྡེབས་ཏེ། སྤ་གྲོ་སྐྱེར་ཆུའི་ལྷ་ཁང་གི་ཁྱུང་རུམ་སྨུག་པོའི་མཆུ་ནང་བསེའི་གྭའུ་ནས་གདན་དྲངས་པར་མཛད་པའི་གཟའ་རྒོད་སྤུ་གྲིའི་དྲག་སྔགས་བར་སྣང་ཧོམ་ཁུང་མར་གྲགས་པའི་དཔེ་ལུང་གི་རྒྱུད་ད་ལྟའང་བཞུགས་པར་སྣང་ཞིང་། རིག་འཛིན་ཀུ་མཱ་རཱ་ཛའི་གཟའ་མཐུ་འཇིགས་པོ་དེའང་འདི་ཉིད་ཡིན་པར་བཤད་པས་ཐོག་སྔ་མོ་ཞིག་ཏུ་བྱོན་པར་གསུངས་སོ། །