TTDL-ZABTER-14-PHA-065

༄༅།།སྭསྟི༔ རྒྱལ་དང་རྒྱལ་སྲས་མ་ལུས་འདུས་པའི་ཞལ༔ མཁྱེན་གཉིས་ཡོན་ཏན་དུ་མའི་གཏེར་ཆེན་པོ༔ མགོན་པོ་འཇམ་པའི་དབྱངས་ལ་གསོལ་བ་འདེབས༔ མ་རིག་བག་ཆགས་སྒོང་རྒྱར་དུབ་པ་ཡི༔ གཟུང་འཛིན་ལམ་དུ་འཕྱན་པའི་སྐྱེས་བུ་བདག༔ མཁྱེན་གཟིགས་ཡེ་ཤེས་ཆེན་པོའི་ངང་དུ་རློབས༔ སྟོང་པ་ཡེ་ཤེས་མི་གཡོ་ཆོས་ཀྱི་སྐུ༔ གསལ་བ་འགགས་མེད་ཡེ་ཤེས་ལོངས་སྤྱོད་རྫོགས༔ ཀུན་ཁྱབ་ཡེ་ཤེས་ཕྱོགས་མེད་སྤྲུལ་པའི་སྐུ༔ མཉམ་ཉིད་ངང་གནས་ཡེ་ཤེས་ངོ་བོ་ཉིད༔ སྐུ་བཞིའི་བདག་ཉིད་མགོན་པོ་འཇམ་པའི་དབྱངས༔ གསོལ་བ་འདེབས་སོ་མཁྱེན་བརྩེ་ནུས་པས་དགོངས༔ སྣང་འགྱུར་སྲིད་པར་རང་རྒྱུད་འཐས་པ་ཡི༔ མི་གཞན་རང་ལ་ཡུལ་དང་བདག་རྒྱུད་གོལ༔ གནས་འགྱུར་སྲིད་པ་རླུང་གི་འཁོར་ལོར་བཅུག༔ འཁྲུལ་སྣང་འདི་ལས་དཔའ་བོས་བསྒྲལ་དུ་གསོལ༔ མ་རིག་མལ་ནས་ཐུགས་རྗེས་བསླང་དུ་གསོལ༔ གཉིད་འཐུག་འདི་ལས་བླ་མས་དཀྲོག་པར་མཛོད༔ སྡུག་བསྔལ་འདི་ལས་མགོན་པོས་བསྐྱབ་ཏུ་གསོལ༔ སྐུ་གསུམ་ལྷུན་གྲུབ་ཆེན་པོའི་དགོངས་ཀློང་དུ༔ སྒོ་གསུམ་དག་མཉམ་རྡོ་རྗེའི་གདིང་ཐོབ་ནས༔ བཅུ་གསུམ་རྡོ་རྗེ་འཛིན་པའི་ས་ཐོབ་ཤོག༔ ཨོཾ་ཨ་ར་པ་ཙ་ན་དྷཱིཿཅེས་པ་འདི་ནི་བདུད་འཇོམས་རྡོ་རྗེ་ཁྲོ་ལོད་རྩལ་གྱིས་སོ།།།།