TTDL-ZABTER-02-KHA-038

{{Text |classification=Tibetan Publications |subclass=Tibetan Texts |collectiontitle=bdud 'joms gling pa zab gter |collectiontitletib=བདུད་འཇོམས་གླིང་པ་ཟབ་གཏེར། |totalvolumes=21 |author=bdud 'joms gling pa |authortib=བདུད་འཇོམས་གླིང་པ་ |citation=Khrag 'thung [[Bdud 'joms gling pa]. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004. |language=Tibetan |pagestatus=Temporary stub only |volumenumber=02 |volumeLetter=KHA |textnuminvol=038 |pdflink=File:TTDL-ZABTER-02-KHA-038.pdf |InitCategories=Dudjom Tersar Project; TTDL-ZABTER-Volume-02-KHA }}

[edit]

༠༠༠༠བརྡ་ཡིག༣༩༡ཟབ་གསང་མཁའ་འགྲོའི་སྙིང་ཐིག་ལས༔ བདེ་ཆེན་ཞིང་སྒྲུབ་ཀྱི་སྐོར་ལས༔ ཚེ་འདས་རྗེས་འཛིན་ཁྲུས་ཀྱི་ཆོ་ག་བཞུགས་སོ༔

༠༠༠༠བརྡ་ཡིག༣༩༢ན་མོ་གུ་རུ་པདྨ་ཀ་ར་ཡེ༔ ༠༠༠༠བརྡ་ཡིག༣༩༢ཚེ་འདས་རྗེས་སུ་འཛིན་པའི་ཕྱིར༔ ཁྲུས་ཀྱི་ཆོ་ག་བྱེད་པ་ལ༔ ལག་ཏུ་ལེན་པའི་རིམ་པ་ལ༔ དཀྱིལ་འཁོར་བཀོད་ལེགས་ཁོད་སྙོམས་སྟེང་༔ མེ་ཏོག་ཚོམ་བུ་རབ་བཀོད་ཅིང་༔ ཁྲུས་བུམ་དྲི་བཟང་ཆུས་བཀང་ལ༔ མགུལ་ཆིངས་ལེ་བརྒན་དཀར་པོས་དཀྲིས༔ མཆོད་པའི་བྱེ་བྲག་སྣ་ཚོགས་བཤམ༔ དང་པོ་བུམ་པ་སྒྲུབ་པའི་ཐབས༔ ཨོཾ་མ་ཧཱ་ཤུ་ནྱ་ཏཱ་ཛྙཱ་ན་སོགསགཟུང་འཛིན་གཉིས་ཀྱིས་བསྡུས་པ་ཡི༔ ཆོས་རྣམས་ཆོས་ཉིད་དབྱིངས་སུ་ཞིག༔ ལས་ཀྱི་བུམ་པ་མི་དམིགས་ངང་༔ ལྷུན་གྲུབ་བདེ་ཆེན་གཞལ་ཡས་སུ༔ པདྨ་ཟླ་བའི་གདན་སྟེང་དུ༔ ཧྲཱིཿལས་འཕགས་མཆོག་སྤྱན་རས་གཟིགས༔ དཀར་གསལ་མདངས་ལྡན་འོད་ཕུང་འབར༔ བཅུ་དྲུག་གཞོན་ནུའི་ལང་ཚོས་མཛེས༔ ཞི་འཛུམ་མཚན་དང་དཔེ་བྱད་རྫོགས༔ ཞལ་གཅིག་ཕྱག་བཞིས་རིམ་པ་བཞིན༔ ཐལ་སྦྱར་བགྲང་ཕྲེང་པད་དཀར་འཛིན༔ ཞབས་གཉིས་རྡོ་རྗེའི་སྐྱིལ་ཀྲུང་བཞུགས༔ ལོངས་སྤྱོད་རྫོགས་སྐུའི་ཆས་ཀྱིས་བརྒྱན༔ གནས་གསུམ་འོད་ཟེར་རབ་འཕྲོས་པས༔ པོ་ཊ་ལ་ནས་ཡེ་ཤེས་པ༔ སྤྱན་དྲངས་གཉིས་མེད་རོ་གཅིག་གྱུར༔ དེ་ནས་སྤྱན་འདྲེན་པ་ནི༔ ཧཱུྃ༔ རང་སྣང་རྣམ་དག་བདེ་ཆེན་ནས༔ འཕགས་མཆོག་ཐུགས་རྗེའི་གཏེར་ཆེན་པོ༔ དམ་ཚིག་ཐུགས་རྗེའི་རྒྱུད་བསྐུལ་ལོ༔ གནས་འདིར་སྤྱན་འདྲེན་གཤེགས་སུ་གསོལ༔ བཛྲ་ས་མ་ཡ་ཛ་ཛཿདེ་ནས་བཞུགས་སུ་གསོལ་བ་ནི༔ ཧཱུྃ༔ དམ་ཚིག་ཡེ་ཤེས་དབྱེར་མེད་ངང་༔ བཞུགས་ནས་འགྲོ་ཀུན་རྗེས་སུ་ཟུངས༔ སྒོ་གསུམ་གུས་པ་ཆེན་པོའི་ངང་༔ ལྷག་པའི་ལྷ་ལ་གུས་ཕྱག་འཚལ༔ ས་མ་ཡ་སྟྭཾ༔ ན་མོ་ཨཪྻ་ལོ་ཀི་ཤྭ་ར་ཡེ༔ དེ་ནས་མཆོད་པ་འབུལ་བ་ནི༔ ཧཱུྃ་ཧྲཱིཿམི་མཇེད་འཇིག་རྟེན་དཔག་མེད་ན༔ སྣ་ཚོགས་ལོངས་སྤྱོད་འདོད་ཡོན་དཔལ༔ སྣང་བ་ཆེན་པོའི་བཀོད་པའི་རྒྱན༔ མ་ལུས་མཉམ་པ་ཆེན་པོའི་ངང་༔ བསྡུས་ཏེ་ལྷག་པའི་ལྷ་ལ་འབུལ༔ བཞེས་ནས་མཁྱེན་བརྩེའི་ནུས་སྟོབས་ཀྱིས༔ འགྲོ་ཀུན་སྒྲིབ་པ་སྦྱང་དུ་གསོལ༔ ཨོཾ་ཨཪྻ་ལོ་ཀི་ཤྭ་ར་སརྦ་ས་པ་རི་ཝཱ་ར་ཨརྒྷཾ་པཱདྱཾ་སོགས་ནསཤཔྡ་རཱུ་པ་ཤཔྡ་སོགསསྤཪྴེ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ༔ དེ་ནས་བསྟོད་པ་བྱ་བ་ནི༔ ཧཱུྃ ་ཧྲཱིཿཁྱབ་བརྡལ་དགོངས་པ་ཕྱོགས་མཐའ་ཡས་པའི་ངང་༔ འཁོར་འདས་ཆོས་ཀུན་ཆོས་སྐུར་ཆོས་ཉིད་རོལ༔ ཐམས་ཅད་བྱང་ཆུབ་ཆེན་པོར་སྒྲོལ་མཛད་དཔལ༔ མགོན་པོ་སྤྱན་རས་གཟིགས་ལ་ཕྱག་འཚལ་བསྟོད༔ དེ་ནས་ཛཔྲ་བསྙེན་ནི༔ གཙོ་བོའི་ཐུགས་ཀ་ནས་འོད་ཟེར་ཁ་དོག་དཀར་པོ་སྐར་མདའ་ལྟ་བུར་འཕྲོས་ཏེ་བུམ་ལྷའི་ཐུགས་ཀར་ཕོག་པས་ཐུགས་དམ་གྱི་རྒྱུད་རབ་ཏུ་བསྐུལ༔ སྐུ་ཡི་ཆ་ཐམས་ཅད་ནས་དག་བྱེད་ཡེ་ཤེས་ཀྱི་བདུད་རྩིའི་རྒྱུན་ལྟ་བུར་བབས་པས་བུམ་པ་མེར་གྱིས་གང་བར་དམིགས༔ ཐུགས་ཀར་ཟླ་བའི་སྟེང་དུ་ཧྲཱིཿལ་སྔགས་ཀྱི་ཕྲེང་བས་བསྐོར་བ་ལས་འོད་ཟེར་ཆེན་པོ་ཁམས་གསུམ་ཐམས་ཅད་ལ་ཁྱབ་པར་བརྡལ་བས་སེམས་ཅན་སྤྱི་དང་བྱེ་བྲག་ཚེ་འདས་ཆེ་གེ་མོའི་སྡིག་སྒྲིབ་ལས་ཉོན་བག་ཆགས་ཐམས་ཅད་བ་མོ་ལ་ཉི་ཟེར་ཕོག་པ་ལྟར་སངས་ཀྱིས་དག་ནས་ཐམས་ཅད་ཆོས་ཉིད་ཀྱི་རོལ་པར་སད་ཅིང་འཕགས་པའི་སྐུར་གྱུར་ཏེ་སྣང་སྲིད་དག་པ་རབ་འབྱམས་ཀྱི་དཀྱིལ་འཁོར་དུ་བསྒོམ་ལ༔ ཨོཾ་མ་ཎི་པདྨེ་ཧཱུྃ་ཧྲཱིཿསྟོང་ལས་མི་ཉུང་བར་བཟླས་མཐར་མཆོད་ཅིང་བསྟོད་ནས༔ ཡེ་ཤེས་པ་གཤེགས༔ དམ་ཚིག་པ་ཆུར་ཞུ་བས་བུམ་པ་གང་བར་བསམ༔ དེ་ནས་མིང་བྱང་སྲོག་རྟེན་མདུན་དུ་བཞག་སྟེ་དགུག་གཞུག་གི་རིམ་པ་ནི༔ ཧཱོུྃཾ་ཧྲཱིཿརང་ཉིད་སྣང་བ་མཐའ་ཡས་ལ༔ སངས་རྒྱས་བྱང་སེམས་དཔག་མེད་པས༔ བསྐོར་ནས་འགྲོ་བ་སེམས་ཅན་གྱི༔ སྒྲིབ་སྦྱང་དབུགས་འབྱིན་མཛད་པར་གྱུར༔ མདུན་དུ་ནྲྀཿཡིག་གནས་གྱུར་ཏེ༔ ཚེ་འདས་རྣམ་པར་ཤེས་པའི་རྟེན༔ གཞོན་ཚུལ་མཛེས་པའི་ལང་ཚོ་ལྡན༔ གཟུགས་ཁམས་སྐྱེ་མཆེད་ཀུན་ཚང་ཞིང་༔ གསོན་གྱི་གནས་སྐབས་ལྟ་བུར་གསལ༔ དད་གུས་མོས་པས་བག་ཕེབས་ནས༔ རང་དབང་ཕུན་ཚོགས་དང་ལྡན་ཞིང་༔ བསྒོ་བའི་བཀའ་ལ་ཉན་པར་གྱུར༔ བདག་ཉིད་ཐུགས་ལས་འོད་ཟེར་འཕྲོས༔ ཚེ་འདས་རྣམ་པར་ཤེས་པ་ནི༔ ཁམས་གསུམ་སྲིད་པ་གར་གནས་ཀྱང་༔ བཀུག་ནས་རྟེན་ལ་གཉིས་མེད་བསྟིམ༔ ན་མོ༔ དཀོན་མཆོག་གསུམ་གྱི་བདེན་པ་དང་༔ རྩ་གསུམ་སྐུ་གསུམ་མཐུ་སྟོབས་དང་༔ བདེན་པ་གཉིས་ཀྱི་བདེན་སྟོབས་ཀྱིས༔ ཚེ་ལས་འདས་པ་ཆེ་གེ་མོའི༔ རྣམ་ཤེས་ཁམས་གསུམ་གར་གནས་ཀྱང་༔ གཟུགས་བྱང་འདི་ལ་གཉིས་མེད་ཁུག༔ ཅེས་བཅུ་ལས་མི་ཉུང་བར་བརྗོད་མཐར༔ ཤི་བ་ངོ་སྤྲད་རྟེན་ལ་དབབ་པ་ནི༔ ཀྱེ་ཧོ་ཚེ་འདས་ཆེ་གེ་མོ༔ ཁྱོད་ཀྱི་ཚེ་འདིའི་སྣང་བ་ནུབ༔ འཇིག་རྟེན་ཕྱི་མའི་སྣང་བ་ཤར༔ ད་ནི་སྐྱབས་དང་སྐྱེལ་མ་ཀུན༔ སྐྱབས་གནས་དཀོན་མཆོག་གསུམ་ལས་མེད༔ མཚན་བྱང་གཟུགས་དང་དབྱེར་མེད་པར༔ དད་གུས་མོས་པས་བག་ཕེབས་ནས༔ མ་ཡེངས་དམ་པའི་ཆོས་ལ་ཉོན༔ ཚེ་ལས་འདས་པ་ཏིཥྛ་ལྷན༔ དེ་ནས་བག་ཆགས་བསྲེག་པ་ནི༔ ཧྲཱིཿབདག་ཉིད་ལྷ་ཡི་ཐུགས་ཀ་ནས༔ ཡེ་ཤེས་འོད་ཟེར་མེ་ལྟར་འཕྲོས༔ ཚེ་འདས་དུག་ལྔའི་རྒྱུ་རྐྱེན་གྱི༔ བག་ཆགས་འཐས་པ་འགྲོ་དྲུག་གི༔ ས་བོན་དང་བཅས་མ་ལུས་པ༔ རྗེས་ཤུལ་མེད་པར་བསྲེག་པར་གྱུར༔ ཅེས་བྱེ་མ་བྲབ་ཅིང་༔ ཨོཾ་ན་མོ་བྷ་ག་ཝ་ཏེ་ཨ་མི་ཏེ་ཨ་མི་ཏོབྷ་ཝ༔ ཨ་མི་ཏ་སཾ་བྷ་བེ༔ ཨ་མི་ཏ་བི་ཀྲཱནྟེ་ག་མི་ནི༔ ག་ག་ན་ཀཱིརྟི་ཀ་རི༔ སརྦ་ཀ་ལེ་ཤ་ཀྵ་ཡཾ་ཀ་རི་སྭཱ་ཧཱ༔ དེ་ནས་ངོ་སྤྲོད་གདབ་པ་ནི༔ ཀྱཻ༔ ཉོན་ཅིག་ཚེ་འདས་རིགས་ཀྱི་བུ༔ མི་ལུས་རིན་ཆེན་ཐོབ་ལགས་ཀྱང་༔ མི་རྟག་འཆི་བ་ཐོག་བབས་ནས༔ རྣམ་ཤེས་བར་དོའི་གནས་སུ་འཁྱམས༔ འཁྲུལ་པའི་སྣང་བ་མ་ངེས་ཤར༔ དངངས་སྐྲག་འཇིགས་སྣང་མི་བཟོད་ཀྱང་༔ དེ་ལ་བདེན་འཛིན་མ་བྱེད་ཅིག༔ རྨི་ལམ་མིག་འཕྲུལ་སྒྱུ་མ་ལྟར༔ གཞན་ལས་གྲུབ་པ་མ་ལགས་ཏེ༔ ཉོན་མོངས་མཚུངས་ལྡན་རང་གཟུགས་ཤར༔ རང་སྣང་གཞན་བཟུང་འཁྲུལ་བར་འཕྱན༔ སེམས་ཉིད་ཀ་དག་སྤྲོས་མཐའ་བྲལ༔ སྐྱེ་འཆི་འཇིགས་པ་ཀུན་ལས་འདས༔ གཟུང་འཛིན་འཁྲུལ་བའི་བག་ཆགས་ཀྱིས༔ རང་སྣང་གཞན་བཟུང་གཉིས་སྣང་ཤར༔ དོན་ལ་གཉིས་མེད་ཆོས་ཀྱི་དབྱིངས༔ འཁོར་འདས་དག་མཉམ་ཀློང་ཆེན་པོ༔ རང་བྱུང་ངོ་བོ་ཉིད་ཀྱི་ངང་༔ ངོ་ཤེས་ངང་དུ་གདིང་ཐོབ་མཛོད༔ ཆོས་སྐུའི་རྒྱལ་སྲིད་དེ་ཀའོ༔ ཤེས་པར་གྱིས་ཤིག་རིགས་ཀྱི་བུ༔ ཁྱོད་ལ་གདོས་བཅས་ཕུང་པོ་མེད༔ སྟོང་པ་ཉིད་ཀྱི་རང་བཞིན་ལ༔ སྐྱེ་འཆིའི་འཇིགས་པ་མེད་པའི་ཚུལ༔ ཤེས་པར་གྱིས་ཤིག་རིགས་ཀྱི་བུ༔ དེ་ནས་ཁྲུས་ཀྱིས་སྦྱང་བ་ནི༔ ཧཱུྃ༔ སངས་རྒྱས་སྐུ་ཡིས་བྱིན་བརླབས་པའི༔ དག་བྱེད་ཡེ་ཤེས་བདུད་རྩི་ཡིས༔ ཚེ་འདས་ཁྱོད་ལ་ཁྲུས་བགྱིའོ༔ ལུས་ཀྱི་སྒོ་ནས་བསགས་པ་ཡི༔ སྡིག་སྒྲིབ་བག་ཆགས་ལས་ཉོན་ཀུན༔ དག་ནས་རྡོ་རྗེའི་སྐུ་ཐོབ་ཤོག༔ ཨོཾ་ཨ་མི་དྷེ་ཝ་ཧྲཱིཿཨོཾ་མ་ཎི་པདྨེ་ཧཱུྃ༔ ན་མོ་རནྟ་ཏྲ་ཡ་ཡཱ༔ ཨོཾ་ཀཾ་ཀ་ནི་སོགསཚེ་ལས་འདས་པའི་ལས་ཉོན་བག་ཆགས་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ༔ ཞེས་བརྗོད་མཐར༔ ཧཱུྃྃ༔ སངས་རྒྱས་གསུང་གིས་བྱིན་བརླབས་པའི༔ དག་བྱེད་ཡེ་ཤེས་བདུད་རྩི་ཡིས༔ ཚེ་འདས་ཁྱོད་ལ་ཁྲུས་བགྱིའོ༔ ངག་གི་སྒོ་ནས་བསགས་པ་ཡི༔ སྡིག་སྒྲིབ་བག་ཆགས་ལས་ཉོན་ཀུན༔ དག་ནས་རྡོ་རྗེའི་གསུང་ཐོབ་ཤོག༔ གོང་གི་སྔགས་ཤམ་བརྗོད༔ ཧཱུྃ༔ སངས་རྒྱས་ཐུགས་ཀྱིས་བྱིན་བརླབས་པའི༔ དག་བྱེད་ཡེ་ཤེས་བདུད་རྩི་ཡིས༔ ཚེ་འདས་ཁྱོད་ལ་ཁྲུས་བགྱིའོ༔ ཡིད་ཀྱི་སྒོ་ནས་བསགས་པ་ཡི༔ སྡིག་སྒྲིབ་བག་ཆགས་ལས་ཉོན་ཀུན༔ དག་ནས་རྡོ་རྗེའི་ཐུགས་ཐོབ་ཤོག༔ སྔགས་ཤམ་བརྗོད༔ ཧཱུྃ༔ རྒྱལ་བའི་ཐུགས་རྗེས་བྱིན་བརླབས་པའི༔ དག་བྱེད་ཡེ་ཤེས་བདུད་རྩི་ཡིས༔ ཚེ་འདས་ཁྱོད་ལ་ཁྲུས་བགྱིའོ༔ སྒྲིབ་གཉིས་བག་ཆགས་ཀུན་དག་ནས༔ དོན་གཉིས་ལྷུན་གྱིས་འགྲུབ་པར་ཤོག༔ སྔགས་ཤམ་བརྗོད༔ ཧཱུྃ༔ དཀོན་མཆོག་གསུམ་གྱི་བདེན་པ་དང་༔ རྟེན་འབྲེལ་ཟབ་མོའི་བདེན་སྟོབས་ཀྱིས༔ ཚེ་འདས་ལས་ཉོན་བག་ཆགས་ཀུན༔ སྐད་ཅིག་ཉིད་དུ་དག་གྱུར་ཅིག༔ སྔགས་ཤམ་བརྗོད༔ ཧཱུྃ

༔ ཚེ་འདས་སྡིག་སྒྲིབ་ཀུན་དག་ནས༔ རང་སྣང་ལྷུན་གྲུབ་དཀྱིལ་འཁོར་དུ༔ སྐུ་དང་ཡེ་ཤེས་རོལ་པར་སད༔ འཇིགས་མེད་གདིང་ཆེན་ཐོབ་པར་བསམ༔ དེ་ནས་ལོངས་སྤྱོད་གཏད་པ་ནི༔ ཨོཾ་སྭ་བྷཱ་ཝ་སོགསའདོད་ཡོན་མི་དམིགས་པ་སྟོང་པ་ཉིད་དུ་གྱུར༔ སྟོང་པའི་ངང་ལས་ཏྲཾཿལས་རིན་པོ་ཆེ་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ཨཱཿཧཱུྃ་གསུམ་འོད་དུ་ཞུ་བ་ལས་བྱུང་བའི་གཟུགས་སྒྲ་དྲི་རོ་རེག་བྱ་ནུས་པ་ཕུན་སུམ་ཚོགས་པ་མི་ཟད་པ་རྒྱན་གྱི་འཁོར་ལོ་ནམ་མཁའི་མཐའ་ཀླས་པར་གྱུར་པར་བསམ༔ ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་སོགས་ནམ་མཁའ་མཛོད་སྔགས་ཀྱི་མཐར༔ ཨོཾ་ཨཱཿཧཱུྃ༔ གཟུགས་མཛེས་སྒྲ་སྙན་དྲི་ཞིམ་དང་༔ རོ་མངར་རེག་བྱ་འཇམ་ལ་སོགས༔ དབང་པོ་དྲུག་གི་སྤྱོད་ཡུལ་དང་༔ མཐུན་པའི་འདོད་ཡོན་མི་ཟད་གཏེར༔ ཚེ་འདས་ཁྱོད་ལ་བསྔོ་འོ་སྦྱིན༔ རྣམ་མཁྱེན་སངས་རྒྱས་མ་ཐོབ་བར༔ བདེ་སྐྱིད་དགའ་ཆེན་མཆོག་ལྡན་ཞིང་༔ འགྲོ་བ་འདྲེན་པའི་མཐུ་ཐོབ་ཤོག༔ ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུྃ༔ ལན་གསུམ་མཐར༔ འདོད་ཡོན་མི་ཟད་གཏེར་ཐོབ་ནས༔ སྡུག་བསྔལ་ཟུག་རྔུ་དང་བྲལ་ཏེ༔ བྱང་སེམས་མྱུ་གུ་གོང་འཕེལ་རྒྱས༔ མཐར་ཐུག་རྣམ་མཁྱེན་སངས་རྒྱས་ཤོག༔ དེ་ནས་ལམ་བསྟན་པ་ནི༔ ཀྱཻ༔ ཉོན་ཅིག་ཚེ་འདས་རིགས་ཀྱི་བུ༔ ཁམས་གསུམ་འཁོར་བ་མཐོ་དམན་ཀུན༔ སྡུག་བསྔལ་གསུམ་གྱི་ཁྲི་མུན་གནས༔ སྐད་ཅིག་ཙམ་གྱི་དགའ་བདེ་ཡང་༔ མི་རྟག་འགྱུར་བའི་ཆོས་ཅན་ཏེ༔ འདི་ལ་ཆགས་ཞེན་མ་བྱེད་པར༔ བདེ་ཆེན་ཞིང་ཁམས་ཡིད་ལ་གྱིས༔ དེ་ནས་གནས་སྤར་ནི༔ ཁྱོད་ཀྱི་སྤྱི་བོར་པད་ཟླའི་སྟེང་༔ སངས་རྒྱས་ཀུན་འདུས་བླ་མ་ནི༔ འོད་དཔག་མེད་མགོན་རྣམ་པར་བཞུགས༔ མཚན་དཔེ་འོད་ཀྱི་ཕུང་པོར་འབར༔ དུས་གསུམ་སངས་རྒྱས་སྐུ་ལ་རྫོགས༔ དེ་ཉིད་དྲན་པས་གསོལ་བ་ཐོབ༔ དེ་ནས་འཕོ་བ་ལ༔ ཁྱོད་ཀྱི་སེམས་ཉིད་ཡི་གེ་ཧྲཱིཿདྭངས་མ་ལྔ་ལྡན་ཐིག་ལེར་བསྒོམ༔ ནམ་མཁའི་སྐར་མདའ་ཆད་པ་ལྟར༔ སྤྱི་བོའི་གཙུག་ཏུ་ཕཊ་ཀྱིས་འཕོ༔ སྣང་མཐའི་ཐུགས་དང་དབྱེར་མེད་བསྲེ༔ བདེ་བ་ཅན་གྱི་ཞིང་དུ་གཤེགས༔ ཕཊ་ཕཊ་ཕཊ༔ ཅེས་སྤར་གཤེགས་པར་བསམ༔ དེ་ནས་བྱང་བུ་མེ་ལ་སྦར༔ ཧཱུྃ༔ ལྷུན་གྲུབ་བདེ་ཆེན་དཀྱིལ་འཁོར་ནས༔ ཡེ་ཤེས་ལྔ་ཡི་མེ་འབར་བས༔ ཁམས་གསུམ་འཁོར་བའི་བག་ཆགས་བསྲེག༔ ཆོས་སྐུ་སྐྱེ་མེད་དབྱིངས་སུ་ཨ༔ སརྦ་པ་པཱཾ་ཛྭ་ལ་རཾ༔ ཞེས་བསྲེག༔ ཟོལ་མེད་དོན་གྱི་རྣལ་འབྱོར་པས༔ བདེ་ཆེན་ཞིང་སྒྲུབ་ལ་བརྟེན་ནས༔ འདི་ལྟར་ཁྲུས་ཀྱི་ཆོ་ག་ལ༔ བརྩོན་པས་འགྲོ་བའི་དོན་འགྲུབ་འགྱུར༔ བདག་འདྲ་པདྨ་བདུད་འདུལ་ངས༔ འདི་ནི་ལག་ལེན་ཁྲིགས་སུ་བཀོད༔ མ་འོངས་བརྒྱུད་འཛིན་དོན་གྱི་ཆེད༔ ཡེ་ཤེས་མཁའ་འགྲོ་མཚོ་རྒྱལ་ཁྱོད༔ ཟབ་གསང་བརྡ་ཡི་རིས་སུ་ཐོབ༔ བཀའ་སྲུང་ཀུན་དགའ་གཞོན་ནུས་སྲུངས༔ བཀའ་དང་ཐ་ཚིག་གཉན་པོའི་རྒྱ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཨྠིྀ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་མཐར་སློབ་བུའི་མཆོག་གྱུར་ཆོས་ཀྱི་རྡོ་རྗེས་བསྐུལ་ངོར་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ།།དགེའོ།།དགེའོ།།དགེའོ།།སརྦ་མངྒ་ལཾ།།།།