TTDL-ZABTER-18-TSHA-131

{{Text |classification=Tibetan Publications |subclass=Tibetan Texts |collectiontitle=bdud 'joms gling pa zab gter |collectiontitletib=བདུད་འཇོམས་གླིང་པ་ཟབ་གཏེར། |totalvolumes=21 |author=bdud 'joms gling pa |authortib=བདུད་འཇོམས་གླིང་པ་ |citation=Khrag 'thung [[Bdud 'joms gling pa]. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004. |language=Tibetan |pagestatus=Temporary stub only |volumenumber=18 |volumeLetter=TSHA |textnuminvol=131 |pdflink=File:TTDL-ZABTER-18-TSHA-131.pdf |InitCategories=Dudjom Tersar Project; TTDL-ZABTER-Volume-18-TSHA }}

[edit]

ལྷ་མཚོ་སྐྱེས་རྡོ་རྗེའི་ཞབས་ལ་འདུད། །བདག་འདི་ཕྱི་གཉིས་ཀྱི་མདོ་མེད་ལ། །ཕ་ཁྱོད་ཀྱི་ཐུགས་རྗེས་བསྐྱབ་ཏུ་གསོལ། །བློ་རེ་དོགས་བྲལ་བར་བྱིན་གྱིས་རློབས། །ཉམས་རྨི་ལམ་འདྲེས་པའི་སྣང་ཆ་ལ། །མ་མཁའ་འགྲོ་དགྱེས་པའི་གླུ་འདི་ཐོས། །ཨཻ།ཡུལ་སྲིབ་ཀ་ནག་པོའི་རྫོང་ཆེན་དུ། །ལྡིང་སྐྱ་གའི་ལུས་རྟེན་བོར་བ་ནས། །མཚོ་རྙོགས་མ་ཅན་དུ་ཉ་མོ་ཞུགས། །དེ་ནུབ་ཕྱོགས་ཨཱཪྻའི་ཡུལ་དུ་འཕོས། །ཆོས་བྱེད་པའི་རྟེན་བཟང་མི་ལུས་ཐོབ། །རྟེན་བོར་ནས་ལྷ་མིན་མོ་རུ་གྱུར། །དེའི་ལུས་རྟེན་བོར་ནས་རྒྱ་ནག་ཏུ། །ཆོས་དགེ་བ་བསྒྲུབ་པའི་རྟེན་བཟང་ཐོབ། །དེ་ཚེ་འཕོས་ར་སའི་ལྷ་ཁང་དུ། །ཡང་དགེ་བཙུན་བློ་འཕེལ་ལྷ་གཉེར་གྲགས། །དེའི་ལུས་རྟེན་བོར་ནས་མདོ་ཁམས་སུ། །སྔོན་དགེ་འབྲས་དུས་སྨིན་མི་ལུས་རྙེད། །མིང་ཀུན་དགའ་འཛིན་པ་ས་རུ་ན། །མཐོ་ལྷ་ལམ་བསྒྲོད་པའི་ནམ་མཁའ་ལྡིང་། །རླུང་སྤུ་གྲིའི་འཁོར་ལོར་ཕོད་བཙུག་ན། །དེའི་འདབ་གཤོག་འཐག་པས་ས་ལ་ལྷུང་། །བྲག་རྩུབ་རིམ་མེད་པའི་འཇམ་ངོས་ལ། །རྒྱ་ཙ་ར་རན་པར་ཚོད་ཟིན་ན། །དེའི་སྲོག་གི་རྟེན་ཡང་འགགས་མི་སྲིད། །མཚོ་མ་གི་ཁ་ཞེང་ཆེ་སྟེ་མཛེས། །དེ་སྐྱིད་ཐང་མཐོང་བའི་ལརྨ་ཏ། །རི་མཐོ་བའི་རྩེ་ནས་མྱུར་མགྱོགས་ཕྱིན། །ལྡིང་རན་ཚོད་བྱས་ན་བདེ་ཡང་སྐྱིད། །སླེབ་ཙམ་ནས་ལྡིང་རྩལ་ཆེས་ན་འཆི། །མི་ལུས་ངག་དབེན་པའི་སྐམ་ས་ན། །སླར་རླན་དང་འདམ་དུ་མི་འབོག་ན། །དེ་འདམ་དུ་ཚུད་པ་སྡུག་མི་བསྔལ། །བརྡ་གོ་འམ་ལེགས་ཉེས་དྲི་བ་མཁན། །ལྷ་ཡི་དམ་བསྒོམ་བསྒྲུབ་རྣལ་དུ་དབབ། །དེའི་བསྙེན་སྔགས་འབུམ་ཕྲག་སྟོང་དུ་བརྗོད། །སྔགས་སྲུང་མ་ཤ་ཟ་དེས་གྲོགས་བྱེད། །དཔལ་འཇམ་དཔལ་གཤིན་རྗེ་ལ་བརྟེན་ན། །ཚེ་ཚད་ཀྱང་བཅུ་ཕྲག་བདུན་དང་བཞི། །ལས་བྱ་བ་རང་ཚོད་འཛིན་མཁས་ན། །བདེ་སྐྱིད་ཀྱི་ཉི་མ་ནུབ་ནས་གསལ། །དེ་ལྟར་འཁྲུལ་བའི་སྣང་ཆ་ཤར། །ཀུན་གྱི་ཡང་ཐ་རྒན་པོ་ངས། །ཀུན་དང་མི་མཐུན་གྲོས་ཤིག་འདེབས། །ཀུན་ལ་འགྲན་པའི་ཆེ་དྲག་ཕྱིར། །ཀུན་གྱི་ཞོར་འདེབས་ཚིག་རྩུབ་དང་། །ཀུན་དང་འགལ་བའི་སྐྱོན་འདྲེན་གསུམ། །ཀུན་གྱི་འགོ་རུ་འཕེན་པའི་སྐྱོན། །ཀུན་དག་སྤོངས་དང་སྐུ་ཚེ་རིང་། །ཀུན་ཏུ་བཟང་པོའི་རྒྱལ་སྲིད་དུ། །ཀུན་མཁྱེན་རྡོ་རྗེས་གཤེགས་ཤུལ་སྙོགས། །ཀུན་གསལ་རང་གཞིའི་ཡུལ་དུ་ཤོག།ཀུན་ཏུ་དགའ་བདེའི་གཏན་ནོར་གཏེར། །ཀུན་དགའ་ཁྱོད་ལ་ཐོབ་རྒྱུ་སྟེ། །ཀུན་ལས་ཡང་སྨྱོན་འཆོལ་པོས་སྨྲས། །ཞུས་སོ། །། །