TTDL-ZABTER-08-NYA-059

Previous Text Back to Volume Page Next Text

Wylie title
Location	bdud 'joms gling pa zab gter Volume 8, Text 59, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

[edit]

བརྡ་ཡིག་༠༠༠༠༠༠༔ ཟབ་གསང་མཁའ་འགྲོའི་སྙིང་ཐིག་ལས༔ གནོད་སྦྱིན་ཤན་པ་ཆེན་པོའི་སྒྲུབ་པའི་གནད་ཐིག་བཞུགས་སོ༔ བརྡ་ཡིག་༠༠༠༠༠༠༥༠༥༔ ན་མོ་གུ་རུ་པདྨ་ཀ་ར་ཡེ༔ མ་འོངས་སྙིགས་མའི་དུས་བབ་ནས༔ ང་ཡི་བརྒྱུད་འཛིན་ཉམས་དམའ་ནས༔ མི་སྲུན་སྐྱེ་བོས་བསྡིགས་པའི་ཚེ༔ གནོད་སྦྱིན་དྲག་པོ་འདི་བསྒྲུབ་ཅིང་༔ ལས་ཀ་མཐུ་ལ་བརྩོན་པའི་ཚེ༔ འདི་ལྟར་ཚད་ལ་བརྟགས་བྱས་ནས༔ གནད་ལ་དབབ་པའི་མན་ངག་ཟུངས༔ འགྲུབ་པའི་ཚད་ནི་ཞག་དགུར་ངེས༔ དེས་མ་འགྲུབ་ན་ལན་དགུར་དཔོག༔ དེས་མ་འགྲུབ་ན་གསུམ་དཔོག་ཅིང་༔ ལན་དགུའི་བར་དུ་དཔོག་བྱས་ནས༔ ཅིས་ཀྱང་འགྲུབ་རྟགས་མ་བྱུང་ན༔ གནད་ལ་དབབ་པའི་མན་ངག་ཟུངས༔ དང་པོ་སྲོག་འཕྲོག་མན་ངག་ནི༔ རང་ཉིད་ཡི་དམ་ལྷར་གསལ་བའི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས་པས་གནོད་སྦྱིན་ཤན་པ་དམར་ནག་སྤྲུལ་འཁོར་བཀའ་སྡོད་དང་བཅས་པའི་སྲོག་སྙིང་ཐམས་ཅད་ཡི་གེ་ཀྵཿཧྲཱིཿའི་རྣམ་པར་བསྡུས་ཏེ་རང་ཡི་དམ་གྱི་ཐུགས་ཀའི་སྲོག་ཡིག་ལ་ཐིམ་པས་ཁོའི་སྲོག་སྙིང་རང་ལ་ཐོབ་ནས་ཕྲིན་ལས་མི་བསྒྲུབ་པའི་དབང་མེད་པར་ཡང་ཡང་བསམ༔ དེས་ནི་འགྲུབ་རྟགས་ངེས་པར་འབྱུང་བ་ཡིན༔ དེས་ཀྱང་འགྲུབ་རྟགས་མ་བྱུང་ན༔ སྔགས་ཀྱང་མགོ་འཇུག་བཟློག་ནས་བཟླས༔ དེས་ཀྱང་འགྲུབ་རྟགས་མ་བྱུང་ན༔ ཤི་ས་བསྟན་པ་འདི་ལ་བརྩོན༔ ཤོག་གུ་ལ་ཁོའི་གཟུགས་བྲིས་ཤིང་རྒྱ་མཚལ་ཅོག་ལ་མིའི་ཁུ་བ་བྱུག༔ མཐར་ཁོའ་ིསྔགས་འཁོར་ཡིག་མགོ་ནང་དུ་བསྟན་ནས་བྲིས༔ མཚོན་ཆ་མང་པོའི་རྩེ་ནང་དུ་བསྟན་པ་བྲིས༔ དེ་འགུགས་གཞུག་མང་དུ་བྱས་ཏེ་བལྟེབས་ནས༔ ཏེའུ་ལོའམ་ཐ་ན་ཕག་ཐོད་དུ་གཅུག་ཅིང་རོ་གཡམ་ལ་རྡོ་རྗེ་རྒྱ་གྲམ་བྲིས་པས་ཁ་བཅད༔ དེ་སྟེང་རང་ཡི་དམ་གྱི་ང་རྒྱལ་དང་མ་བྲལ་བར་ཁོའི་སྔགས་འབྲུ་བཟློག་ཏུ་བཟླ༔ དུས་གསུམ་དུ་འགུགས་གཞུག་ནན་དུ་བྱ་ཞིང་དྲག་སྔགས་བརྗོད་ནས་ཐུན་མཚོན་གྱིས་གཟིར༔ ཡང་ཁ་བཅད་ནས་རང་ཡི་དམ་གྱི་ཁྲོ་འོག་ཏུ་མནན་པས་ཁོས་སྐད་ངན་ཙིར་ཙིར་འདོན་ཞིང་ཁས་ལེན་པར་ཡང་ཡང་བསམ༔ བར་སྐབས་སུ་གཏུམ་པོའི་སྐུ་བསྒོམ་པའི་ཞབས་མཐིལ་གྱིས་མནན་པས་སྐད་ངན་ཤོར་ནས་ཁས་ལེན་པར་བསམ༔ ནམ་ཕྱེད་དུ་བསྐུལ་རྦད་བྱ༔ དེ་དུས་བན་བཙུན་སྔགས་པ་སྐྱེས་པ་ཨ་ཙ་ར་རྣམས་ཕྱག་འཚལ་ཞིང་བྲན་དུ་ཁས་ལེན་པ་དང་༔ གློ་སྙིང་མགོ་བོ་རྣམས་འབུལ་དུ་འབྱུང་བ་དང་༔ ཉེས་ཅན་བཙོན་དུ་བཟུང་བ་དང་༔ དགྲ་བོ་དངོས་སུ་ཁྲིད་བྱུང་ནས་གསོད་པ་དང་༔ སྲོག་ཆགས་གང་ཡང་རུང་བ་དག་གསོད་ཅིང་ཤ་ཁྲག་དམར་གཡོས་བྱེད་པ་རྣམས་བྱུང་ན་གཟུགས་ཐོད་པ་ནས་ཕྱུང་སྟེ་ཁྲུས་དང་བསང་སྦྱངས་བྱས་ཏེ་གསོལ་མཆོད་བསྐང་ཚོགས་བཏང་ཞིང་བསྙེན་བསྒྲུབ་ལ་བརྩོན་པས་དགྲ་བོ་ངེས་པར་ཐུབ་བོ༔ བསད་རྟགས་ངེས་པར་བྱུང་ཡང་དགྲ་བོ་མ་ཤི་ན་དེ་ལྟར་ཤི་ས་བསྟན་པ་ལས༔ དུས་མ་ཡིན་པར་ཤི་ས་བསྟན་ན་རང་སྲོག་ལ་འབབ་པ་ལས་འོས་མེད་པས་དེ་དོན་ཤེས་པར་མཛོད༔ དུས་དང་བསྟུན་ནས་འདི་ལྟར་ཤི་ས་བསྟན་པས་དགྲ་བོ་ངེས་པར་ཐུབ་པ་ཡིན༔ བཀའ་འདི་སྔགས་སྲུང་དམ་ཅན་ཚོགས་ལ་གཉེར༔ ཐུབ་པར་སྲུངས་ཤིག་བཛྲ་ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་གནད་བྱང་ཡང་ཐིག་འདི་ཡང་ཁྲག་འཐུང་རྡོ་རྗེ་ཁྲོ་ལོད་ཀྱིས་གཏེར་ནས་བཏོན་ཏེ་མི་ལོ་ཉི་ཤུའི་བར་དུ་བཀའ་རྒྱ་བཏབ་སྟེ་མཐར་མཚམས་སྤྲུལ་རིན་པོ་ཆེའི་བཀའ་ཡིས་བསྐུལ་ངོར་ཟླ་རྒྱལ་དཔའ་བོའི་ཉེ་འདབས་སུ་གཏན་ལ་ཕབ་པའོ།།དགེའོ།།།།