DJYD-KABUM-02-KHA-001

༄༅། །བོད་ཀྱི་ཆོས་འབྱུང་མདོར་བསྡུས་དང་ཐེག་པ་ཆེ་ཆུང་གི་རྣམ་དབྱེ་བཅས་བཞུགས། ། ༄༅། །བོད་ཀྱི་ཆོས་འབྱུང་མདོར་བསྡུས་དང་ཐེག་པ་ཆེ་ཆུང་གི་རྣམ་དབྱེ་བཅས་བཞུགས། ། （1བ）༄༅། །ཨོཾ་སྭསྟི་སིངྔྷཾ། དེའང་འཇིག་རྟེན་དུ་སངས་རྒྱས་ཀྱི་བསྟན་པ་རིན་པོ་ཆེ་ཇི་ལྟར་བྱོན་པའི་ཚུལ་མདོ་ཙམ་སྨོས་པ་ལ། ཐོག་མར་འཕགས་ཡུལ་དུ་ཇི་ལྟར་བྱོན་པའི་ཚུལ་ནི། འོ་སྐོལ་གྱི་སྟོན་པ་མཉམ་མེད་ཤཱཀྱའི་རྒྱལ་པོ་འདི་ཉིད་ངེས་དོན་ཡིན་ལུགས་ཀྱི་དབང་དུ་བྱས་ན། ཐོག་མ་མེད་པའི་དུས་ནས་མངོན་པར་སངས་རྒྱས་ཏེ་ཆོས་ཉིད་འོད་གསལ་གྱི་ཞིང་ཁམས་སུ་སྐུ་དང་ཡེ་ཤེས་འདུ་འབྲལ་མེད་པའི་ངང་ལ་དུས་གསུམ་གྱི་སངས་རྒྱས་ཐམས་ཅད་དང་དགོངས་པ་རོ་གཅིག་ཏུ་བཞུགས་པ་ལས་མ་གཡོས་བཞིན་དུ་སེམས་ཅན་（2ན）རྣམས་ཀྱི་དོན་དུ་དེ་བཞིན་གཤེགས་པ་སྤྲུལ་པའི་སྐུའི་རྣམ་རོལ་བསམ་གྱིས་མི་ཁྱབ་པར་བསྟན་ཏེ་གདུལ་བྱའི་དོན་མཛད་པ་ཡིན་ལ། ཐ་སྙད་རྣམ་འཇོག་གི་དབང་དུ་བྱས་ན། སྟོན་པ་འདི་སྔོན་རྫ་མཁན་གྱི་ཁྱེའུ་སྣང་བྱེད་དུ་གྱུར་པ་ན་ཤཱཀྱ་ཐུབ་པ་ཆེན་པོའི་དྲུང་དུ་དང་པོ་བྱང་ཆུབ་མཆོག་ཏུ་ཐུགས་བསྐྱེད། བར་དུ་བསྐལ་པ་གྲངས་མེད་གསུམ་དུ་བསོད་ནམས་དང་ཡེ་ཤེས་ཀྱི་ཚོགས་རྨད་དུ་བྱུང་བ་བསགས། མཐར་མ་ག་དྷ་རྡོ་རྗེ་གདན་གྱི་སྤོར་ཡིད་བཞིན་གྱི་ནོར་བུ་དང་འདྲ་བའི་ཤིང་ཨ་ཤྭ་རྠའི་དྲུང་དུ་མངོན་པར་རྫོགས་པར་སངས་རྒྱས་ཏེ（2བ）ཝ་ར་ནཱ་སཱི། བྱ་རྒོད་ཕུང་པོའི་རི་བོ་ལ་སོགས་པའི་གནས་རྣམས་སུ་ཆོས་ཀྱི་འཁོར་ལོ་རིམ་པ་གསུམ་དུ་བསྐོར་ནས། ཐུན་མོང་གི་གདུལ་བྱ་རྣམས་རང་རང་གི་དབང་པོ་དང་འཚམས་པར་ཐེག་པ་གསུམ་གྱི་ལམ་རྣམ་པར་དག་པ་ལ་བཀོད། གདུལ་བྱ་ཐུན་མོང་མ་ཡིན་པ་རྣམས་ཀྱི་སྣང་ངོར། འོག་མིན་གཞན་འཕྲུལ་དབང་བྱེད་ཀྱི་གནས་དང་། རི་རབ་ཀྱི་རྩེ་མོ། མིའི་གནས་འཇིག་རྟེན་དཔལ་ལྡན་འབྲས་སྤུངས་དང་། ས་ཧོ་ར། ཨོ་ཊཱིཡ་ན། རི་བོ་བྱ་རྐང་ཅན། བསིལ་བའི་ཚལ་ལ་སོགས་པ་གནས་དང་དུས་དང་འཁོར་རྣམས་མཐའ་གཅིག་ཏུ་མ་ངེས་པ་ལ་དཀྱིལ་འཁོར་སྤྲུལ་བཤད་ལ་སོགས་པའི་སྒོ་ནས་སྔགས་ཀྱི་རྒྱུད་སྡེ་མཐའ་ཡས་པར་གསུངས། ཐུབ་དབང་ཆོས་ཀྱི་དབྱིངས་སུ་མཛད་པ་བརྟུལ་བའི་རྗེས་སུ། གནས་བརྟན་འོད་སྲུང་ཆེན་པོ་དང་། འཕགས་པ་ཀུན་དགའ་བོ་སོགས་བསྟན་པའི་གཏད་རབས་སངས་རྒྱས་དང་འདྲ་བའི་ཉན་ཐོས་ཆེན་པོ་བདུན་ནམ་ཉི་མ་གུང་པ་བསྣན་པས་བརྒྱད་དང་། གཞན་ཡང་བླ་མ་གྲགས་པ་དང་། བསོད་བྱིན་སོགས་བསྟན་པ་སྐྱོང་བའི་དགྲ་བཅོམ་པའི་སྡེ་དང་། བླ་མ་འོད་སྲུང་ཡང་སྟོན་སོགས་བཙུན་པའི་སྡེ་དང་། （3ན）རྒྱལ་བ་ལེགས་རྒྱལ་དགེ་བ་སོགས་བསྟན་པ་ལ་བྱ་བ་བྱས་པའི་བྲམ་ཟེ་ཆེན་པོའི་སྡེ་ལ་སོགས་པ་རྣམས་ཀྱིས་བསྟན་པ་ཡུན་རིང་དུ་བསྐྱངས་ཤིང་། དེ་རྗེས་འཕགས་པ་ཀླུ་སྒྲུབ། ཐོགས་མེད། ཕྱོགས་གླང་། ཨཱརྻ་དེ་བ། དབྱིག་གཉེན། ཆོས་ཀྱི་གྲགས་པ་སྟེ་འཛམ་གླིང་མཛེས་པར་བྱེད་པའི་རྒྱན་དྲུག །སློབ་དཔོན་དཔའ་བོ། སྒྲ་གཅན་འཛིན། ཡོན་ཏན་འོད། ཆོས་སྐྱོང་སྟེ་ཆེན་པོ་བཞི། ཞི་བ་ལྷ་དང་། ཙནྡྲ་གོ་མི་སྟེ་རྨད་བྱུང་གི་སློབ་དཔོན་གཉིས་སོགས་རྒྱལ་བའི་གསུང་རབ་ཀྱི་དོན་ལ་དབང་འབྱོར་བའི་སློབ་དཔོན་མཐའ་ཡས་པ་རྣམས་ཀྱིས་གཙོ་བོར་རྒྱུ་མཚན་ཉིད་ཀྱི་ཐེག་པ་ཕ་རོལ་ཏུ་ཕྱིན་པའི་བསྟན་པ་གསལ་བར་མཛད། རྒྱ་གར་ཤར་ཕྱོགས་སུ་རྒྱལ་པོ་ཛཿཡབ་སྲས། སྒེག་པ་རྡོ་རྗེ། སངས་རྒྱས་གསང་བ། སྠི་ར་མ་ཏི། བདེ་བ་གསལ་མཛད་ལ་སོགས་པ་རྣམས་ཀྱིས་འབྲས་བུ་རྡོ་རྗེ་ཐེག་པ་བླ་ན་མེད་པའི་རྒྱུད་མ་ཧཱ་ཡོ་ག་དང་། ཨ་ནུ་ཡོ་ག །རྒྱ་གར་ནུབ་ཕྱོགས་སུ་སློབ་དཔོན་ཆེན་པོ་དགའ་རབ་རྡོ་རྗེ། འཇམ་དཔལ་བཤེས་གཉེན། ཤྲཱི་སིངྷ་སོགས་ཀྱིས་མན་ངག་རྫོགས་པ་ཆེན་པོ་ཨ་ཏི་ཡོ་ག །གྲུབ་པ་བརྙེས་པའི་སློབ་（3བ）དཔོན་ཆེན་པོ་བརྒྱད་དང་། སངས་རྒྱས་གཉིས་པ་པདྨ་འབྱུང་གནས་ལ་སོགས་པས་སྒྲུབ་པ་ཆེན་པོ་སྡེ་བརྒྱད་དང་། གཞན་ཡང་ཡེ་ཤེས་ཞབས་སོགས་རྣམ་གནོན་ཚུལ་གྱིས་བསྔགས་པའི་སློབ་དཔོན་བཅུ་གཉིས། གྲུབ་ཐོབ་བརྒྱད་ཅུ་རྩ་བཞི། མཁས་པ་སྒོ་དྲུག །དུས་འཁོར་ཞབས་པ་ཆེ་ཆུང་སོགས་གྲུབ་པའི་དབང་ཕྱུག་རྣམས་ཀྱིས་ཐེག་ཆེན་གསང་སྔགས་ཀྱི་སྒོ་ནས་སྐལ་ལྡན་དཔག་ཏུ་མེད་པ་སྨིན་གྲོལ་ལ་བཀོད།། །། ༈ དེ་ནས་བོད་དུ་བསྟན་པ་ཇི་ལྟར་བྱོན་ཚུལ་ནི། འཕགས་པ་སྤྱན་རས་གཟིགས་ཀྱི་ཞིང་ཁམས་གངས་ཅན་བོད་ཀྱི་ལྗོངས་སུ་རྒྱལ་བའི་ཕྲིན་ལས་ཀྱི་སྒོ་འཕར་འཇུག་པའི་རྟེན་འབྲེལ་དུ་བོད་སྤྱི་ལ་དབང་བའི་རྒྱལ་པོ་མི་རྗེ་ལྷས་མཛད་པ་ལ་སྔ་བ་ཤཱཀྱ་ལི་ཙཱ་བིའི་རིགས་ལས་དམག་བརྒྱ་པའི་སྲས་ཡ་མཚན་ཅན་མི་ལས་འདས་པ་ཞིག་བཙས་པ་ལྷ་འདྲེའི་སྤྲུལ་པར་དོགས་ནས་སྤྱུགས་པ་ཡུལ་ཡར་ལུང་གི་ལྷ་རི་རོལ་པའི་སྟེང་ནས་ལྷ་སྐས་ལ་བརྒྱུད་བཙན་ཐང་སྒོ་བཞིར་བབས་པ་ཕྱོགས་དེའི་སྐྱེ་བོ་རྣམས་ཀྱིས་གཉའ་བར་ཁྲི་བྱས་ཏེ་གདན་དྲངས་པས་གཉའ་ཁྲི་བཙན་པོར་གྲགས་པ་ནས་བཟུང་། གནམ་གྱི་ཁྲི་བདུན། སྟོད་ཀྱི་སྟེངས་གཉིས། སའི་ལེགས་དྲུག །བར་ལ་（4ན）ལྡེ་བརྒྱད་སོགས་རིམ་པར་བྱོན་པ་ལས། རྒྱལ་རབས་ཉེར་བདུན་པ་ལྷ་ཐོ་ཐོ་རི་གཉན་བཙན་གྱི་དུས་སུ་མདོ་སྡེ་ཟ་མ་ཏོག་དང་ཡི་གེ་དྲུག་མ་སོགས་ཁང་སྟེང་དུ་བབས་ཏེ་དམ་པའི་ཆོས་ཀྱི་དབུ་བརྙེས། དེ་ནས་རྒྱལ་རབས་ལྔའི་ཐ་མ་གནམ་རི་སྲོང་བཙན་གྱི་སྲས་ཆོས་རྒྱལ་སྲོང་བཙན་སྒམ་པོའི་དུས་སུ་ཇོ་ཤཱཀ་རྣམ་གཉིས་བཙུན་མོ་གཉིས་ཀྱི་བརྫོངས་སུ་སྤྱན་དྲངས་ཤིང་། ར་ས་འཕྲུལ་སྣང་གཙུག་ལག་ཁང་གི་གཙོས་མཐའ་འདུལ་དང་ཡང་འདུལ་གྱི་ལྷ་ཁང་སོགས་བཞེངས། མི་ཆོས་གཙང་མ་བཅུ་དྲུག་དང་ལྷ་ཆོས་དགེ་བ་བཅུའི་ཁྲིམས་ཕོགས་ཤིང་། བོད་ཡི་གེ་མེད་པ་ལ་ཡི་གེའི་བརྡ་དག་ཕྱེས་ཏེ་སྤྱན་རས་གཟིགས་ཀྱི་མདོ་རྒྱུད་བོད་སྐད་དུ་བསྒྱུར་བ་སོགས་བསྟན་པའི་སྲོལ་བཏོད། དེ་ནས་རྒྱལ་རབས་ལྔ་པ་ཁྲི་ལྡེ་གཙུག་བརྟན་མེས་ཨག་ཚོམ་གྱི་སྲས་ཆོས་རྒྱལ་ཁྲི་སྲོང་ལྡེའུ་བཙན་གྱི་དུས་སུ་དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་སོགས་བཞེངས། དབུའི་མཆོད་གནས་སུ་དཀའ་བ་དུ་མས་སྤྱན་དྲངས་པ་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས། ཟ་ཧོར་གྱི་མཁན་ཆེན་བྱང་ཆུབ་སེམས་དཔའ་ཞི་བ་འཚོ། པཎ་ཆེན་བི་མ་ལ་མི་ཏྲ། （4བ）སློབ་དཔོན་ཀ་མ་ལ་ཤྲཱི་ལ། འདུལ་འཛིན་ཛི་ན་མི་ཏྲ། ཤིནྟཾ་གརྦྷ། དྷརྨ་ཀིརྟི། དཱ་ནཤྲཱི་ལ། སརྦ་ཛྙཱ་དེ་བ། ཤྲཱི་ལེནྡྲ་བོ་ངྷི། སུ་ཏྲ་བོ་དྷི་སོགས་རྒྱ་གར་གྱི་པཎ་གྲུབ་ཆེས་མཆོག་ཏུ་གྱུར་པ་བརྒྱ་རྩ་བརྒྱད་དུ་གྲགས་པ་དང་། སྤྲུལ་པའི་ལོ་ཙཱ་བ་ཆེན་པོ་བེེ་རོ་ཙ་ན། རྨ་རིན་ཆེན་མཆོག །གཉགས་ཡེ་ཤེས་གཞོན་ནུ། སྐ་ཅོག་ཞང་གསུམ་སོགས་ལོ་ཙཱ་བ་ཆེན་པོ་བརྒྱ་རྩ་བརྒྱད་དུ་གྲགས་པ་རྣམས་ཀྱིས་གསུང་རབ་རིན་པོ་ཆེ་མཐའ་དག་བསྒྱུར་བཤད་ལག་ལེན་གྱི་སྒོ་ནས་གཏན་ལ་ཕབ་སྟེ་བོད་ཡུལ་མུན་པའི་གླིང་དུ་རྒྱལ་བསྟན་སྣང་བའི་སྒྲོན་མེ་གཞིར་བཞེངས་སུ་སྦར། སད་མི་མི་བདུན་སོགས་རབ་ཏུ་བྱུང་སྟེ་དགེ་འདུན་གྱི་སྡེ་བཙུག །ཀློག་པའི་ཆོས་གྲྭ་ཆེན་པོ་བཅུ་གཉིས། སྒྲུབ་གྲྭ་ལ་མཆིམས་ཕུའི་གྲུབ་ཆེན་ཉེར་ལྔ། ཡང་རྫོང་གི་རྟོགས་ལྡན་ང་ལྔ། ཤེལ་བྲག་གི་སྔགས་པ་སུམ་ཅུ། ཡེར་པ་དང་ཆུ་བོ་རིའི་སྒོམ་ཆེན་བརྒྱ་རྩ་བརྒྱད། འོད་སྐུར་གཤེགས་པའི་མཁའ་འགྲོ་ཉེར་ལྔ་སོགས་གངས་ཅན་གྱི་ལྗོངས་ཐམས་ཅད་བསྟན་འཛིན་གྱི་སྐྱེས་བུས་མཛེས་པར་བྱས། ཁྱད་པར་གསང་སྔགས་བླ་ན་མེད་པའི་རྒྱུད་སྡེ་ཐུན་མོང་མ་ཡིན་པ་མདོ་སྒྱུ་སེམས་གསུམ་དང་། སྒྲུབ་（5ན）སྡེ་སྤྱི་དང་བྱེ་བྲག་གི་རྒྱུད་ཟབ་ཅིང་རྒྱ་ཆེ་བ་མཐའ་ཡས་པ་ཞིག་བབས་སོ་བདུན་གྱི་སྒོ་ནས་སྤྱན་དྲངས་ཏེ་སེམས་ཅན་དཔག་ཏུ་མེད་པ་སྨིན་གྲོལ་གྱི་ལམ་ལ་བཀོད་པར་མཛད་པ་སྟེ། ཕྱིས་ཇོ་བོ་རྗེས་བསམ་ཡས་ཀྱི་རྒྱ་དཔེ་རྣམས་གཟིགས་པ་ན་སྔར་མ་གསན་པའི་རྒྱུད་དུ་མ་གཟིགས་པས། འདི་དག་སློབ་དཔོན་པདྨས་མཁའ་འགྲོའི་གསང་མཛོད་སོགས་ལས་བླངས་པ་ཡིན་མཆི། དེང་སང་རྒྱ་གར་ན་དཔེ་ཙམ་ཡང་མི་སྣང་། བོད་དུ་གསང་སྔགས་ཀྱི་བསྟན་པ་དར་བ་འདྲ་བ་རྒྱ་གར་དུའང་མ་བྱུང་བ་འདྲ་ཞེས་བསྔགས་པར་མཛད། ཁྲི་སྲོང་གི་རྗེས་སུ་ལྷ་སྲས་སྐུ་མཆེད་ཀྱིས་ཀྱང་བསྟན་པ་བླ་ནས་བླར་སྤེལ་ཞིང་། རྒྱལ་རབས་གསུམ་པ་ཁྲི་རལ་པ་ཅན་གྱིས་སྔོན་ཡབ་མེས་ཀྱི་དུས་སུ་བསྒྱུར་བའི་གསུང་རབ་ཕལ་ཆེར་སྐད་གསར་བཅད་ཀྱིས་གཏན་ལ་ཕབ་པ་དང་། བླ་སྒོ་དང་པོ་དགེ་འདུན་ལ་འབུལ་བ་སོགས་ཆབ་སྲིད་དམ་པའི་ཆོས་སུ་བསྒྱུར། དེ་ཡན་ཆད་ལ་བསྟན་པ་སྔ་དར་དུ་གྲགས། དེ་ནས་ཁྲི་རལ་གྱི་གཅུང་གླང་དར་མ་ལོག་པའི་སྨོན་ལམ་གྱི་དབང་གིས་ཐུགས་ལ་གདོན་གསོལ་ཏེ་བསྟན་པ་བསྣུབས་པ་ན། གསང་སྔགས་ཀྱི་བསྟན་པ་ནི་སྔགས་པ་གོས་དཀར་ལྕང་ལོ་ཅན་རྣམས་ཀྱིས་རི་སུལ་དག་ཏུ་བཟུང་（5བ）ཞིང་གནུབས་ཆེན་གྱི་ནུས་པས་རྒྱལ་པོ་སྡིག་ཅན་སྤ་བཀོང་བ་ལ་བརྟེན་ནས་བསྣུབས་པར་མ་ནུས་ཀྱང་། ཀློག་པའི་ཆོས་གྲྭ་རྣམས་ཀྱི་རྒྱུན་བཅད་ཅིང་རབ་ཏུ་བྱུང་བ་རྣམས་བསད་ཅིང་ཕབ་པ་སོགས་ཀྱིས་འདུལ་བ་འཛིན་པའི་དགེ་འདུན་གྱི་སྡེ་རྩ་མེད་དུ་བསྣུབས་ནས་བར་སྐབས་བོད་ཡུལ་ཆོས་ཀྱིས་ཕོངས་པའི་མུན་བསྐལ་དུ་གྱུར། འོན་ཀྱང་རྦ་རཏྣའི་མཁན་བུ་སྨར་གཡོ་གཙང་གསུམ་གྱིས་དམ་ཆོས་འདུལ་བའི་གླེགས་བམ་དྲེལ་ཁལ་གཅིག་བཀལ་ནས་ཁམས་སུ་བྲོས་ཏེ་བཞུགས་པ་ལས། ཕྱིས་བསྟན་པའི་ཉི་མ་བླ་ཆེན་དགོངས་པ་རབ་གསལ་གྱིས་སྡོམ་པ་བླངས་ཤིང་ནུས་པ་ཅན་ཀླུ་མེས་སོགས་མི་བཅུས་བསྟན་པ་སྔ་དར་གྱི་འདུལ་བའི་སྡོམ་རྒྱུན་དང་བཤད་རྒྱུན་སྤྱན་དྲངས་ཏེ་སླར་བོད་དུ་བསྟན་པ་ཕྱི་དར་གྱི་འགོ་ཚུགས། མངོན་པ་གོང་འོག་གཉིས་ལྷ་ལུང་དཔལ་རྡོར་གྱི་སློབ་མ་ཅོག་གྲུས་སེང་བཙུན་དབང་གཞོན་ལ་བཤད་པར་འགར་དང་ཞུ་སོགས་ནས་བརྒྱུད་དེ་བྲང་ཏི་ལ་བབས་པ་དང་། ཕ་རོལ་ཏུ་ཕྱིན་པའི་བཤད་སྒྲུབ་སྐ་ཅོག་ཞང་ནས་སྦས་རྒྱལ་བ་ཡེ་ཤེས་དང་གྲུམ་གཉིས་ནས་སེང་བཙུན་དབང་གཞོན་ལ་བརྒྱུད་དེ་འབྲེ་ཆེན་ཤེས་རབ་འབར་ལ་བཀའ་བབས་པ་སོགས་སྔ་འགྱུར་སྡེ་སྣོད་གསུམ་གྱི་བཤད་སྒྲུབ་རྒྱུན་མ་（6ན）ཆད་པར་སྐྱེས་བུ་དམ་པ་རྣམས་ཀྱིས་བཟུང་བས། དེ་ལས་བརྒྱུད་ནས་གངས་ཅན་གྱི་ལྗོངས་སུ་དགེ་འདུན་གྱི་སྡེ་དཔག་ཏུ་མེད་པར་དར། སྔ་འགྱུར་སྔགས་བཀའ་མ་མདོ་སྒྱུ་སེམས་གསུམ་དང་སྒྲུབ་སྡེའི་སྐོར་རྣམས་རྡོ་རྗེ་ཐེག་པའི་བསྟན་པ་ཐོག་མར་གཉགས་ལ་བབས། བར་དུ་གནུབས་ལ་བབས། མཐའ་མ་ཟུར་ལ་བབས་ཞེས་གྲགས་པ་ལྟར་ཆུ་བོ་བཞི་འདུས་ཀྱི་སྒོ་ནས་རིམ་པར་བརྒྱུད། རྫོགས་པ་ཆེན་པོ་ཐིག་ལེ་གསང་སྐོར་སྲོག་གི་དྭངས་མའི་ཚུལ་རྣམས་ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་རབ་འབྱམས་ལ་བཀའ་བབས་ཤིང་། མདོ་དང་སྒྱུ་འཕྲུལ་སྒྲུབ་སྡེ་ཕལ་མོ་ཆེ་ནི་ལོ་ཆེན་བེེ་རོ་ཙ་ནའི་སྤྲུལ་པའི་སྐུ་རིག་འཛིན་གཏེར་བདག་གླིང་པ་ལ་བཀའ་བབས་པ་སོགས་ནས་རིམ་བཞིན་བརྒྱུད་དེ་བོད་དང་བོད་ཆེན་པོའི་ལྗོངས་ཀུན་ཏུ་དུས་ཀྱི་ཐ་མ་དེང་སང་གི་བར་དུ་གདུལ་བྱའི་བསོད་ནམས་ཀྱི་ཉེར་འཚོར་གསལ་བཞིན་པ་འདི་ལྟ་བུ་སྟེ། དེ་དག་ནི་བོད་དུ་དམ་ཆོས་ཐོག་མར་དར་བ་སྔ་འགྱུར་བཀའ་མའི་ལོ་རྒྱུས་ས་བོན་ཙམ་མོ།། །། ༈ ད་ནི་དེ་དང་འབྲེལ་བར་ཟབ་མོ་གཏེར་གྱི་ལོ་རྒྱུས་མདོ་ཙམ་བརྗོད་ན། འཕགས་པ་བསོད་ནམས་ཐམས་ཅད་སྡུད་པའི་ཏིང་ངེ་འཛིན་གྱི་མདོ་ལས། （6བ）དྲི་མ་མེད་པའི་གཟི་བརྗིད་ཆོས་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཀྱི་གཏེར། རི་དང་། རི་སུལ་དང་། ཤིང་དག་གི་ནང་དུ་བཅུག་པ་དག་ཡོད་དེ། གཟུངས་དང་ཆོས་ཀྱི་སྒོ་མཐའ་ཡས་པ་གླེགས་བམ་དུ་བྱས་པ་དག་ཀྱང་ལག་ཏུ་འོང་བར་འགྱུར་རོ། །ཞེས་དང་། ཆུ་ཀླུང་རོལ་པའི་མདོ་ལས་ཀྱང་། ང་ཡི་བསྟན་པའི་ཆོས་ཀྱི་གཞུང་། །ཐུགས་ནས་ཐུགས་ཀྱི་གཏེར་དུ་སྦས། །ཡང་ན་ས་ཡི་སྙིང་པོ་བྱ། །ཅི་ཕྱིར་མུ་སྟེགས་ཅན་མགོ་རྒོད། །དེས་དོན་དཀྲུག་པར་འགྱུར་ཏ་རེ། །དེ་ཕྱིར་ཆུ་ཀླུང་རྒྱུན་མི་གཅོད། །ཅེས་སོགས་རྒྱ་ཆེར་གསུངས་པ་ལྟར། སྙིགས་མའི་དུས་སུ་བཀའ་མ་རྣམས་ཚོང་དུས་ཀྱི་འོ་མ་བཞིན་དབང་དང་གདམས་ངག་གི་བཀའ་འཆལ་ཞིང་། བརྒྱུད་པ་མང་པོས་བར་དུ་ཆོད་པས་དམ་ཚིག་གི་སེལ་དང་འདྲེས་ཁྱེར་གྱི་བསླད་ཞུགས་པ་མང་བས་བྱིན་རླབས་ཀྱི་བབས་སོ་ཉམས། དུས་ཀྱི་རྒུད་པ་མི་བཟད་པ་བདོ་བས་སྐྱེ་འགྲོ་རྣམས་སྡུག་བསྔལ་གྱི་རྦ་ལ་གཡེང་བར་མཁྱེན་ནས། གསང་སྔགས་ཀྱི་བསྟན་པ་མི་ནུབ་པ་དང་། སྙིགས་མའི་འགྲོ་བ་རྣམས་སྐྱོབ་པའི་ཆེད་དུ། ཨོ་རྒྱན་སངས་རྒྱས་གཉིས་པས་སྐུ་ཚབ་ལས་ཅན་གྱི་སྐྱེས་བུ་འབྱུང་བར་ལུང་བསྟན། གསུང་ཚབ་བླ་（7ན）གཏེར་ཐུགས་གཏེར་གྱིས་མཚོན་པའི་གཏེར་ཁའི་རིགས་བཅོ་བརྒྱད་སྦས། ཐུགས་ཀྱི་དགོངས་པ་རྗེ་འབངས་གྲོགས་གསུམ་སོགས་ལས་ཅན་གྱི་བུ་ལ་གཏད་དེ་སྨོན་ལམ་གཏད་རྒྱ་མཛད་ཅིང་། ཁྱད་པར་གཏེར་དུ་བཞུགས་པའི་ཟབ་ཆོས་ཕལ་མོ་ཆེ་མཁའ་འགྲོ་བརྡའི་ཡི་གེས་བཅིངས་པ་སྟེ། དེ་ནི་སྐལ་མཉམ་གྱི་གང་ཟག་ལས་གཞན་གྱིས་ཁྲོལ་མི་སྲིད་པས་ན། ཨོ་རྒྱན་ཆེན་པོའི་བཀའ་རྟགས་ཕྱག་རྒྱའི་རི་མོ་དངོས་ལ་ཐུག་པས་གང་ཟག་ཕལ་པའི་བརྒྱུད་པས་བར་དུ་མ་ཆོད་ཅིང་ཁུངས་བཙུན་པ་དང་། བརྡ་མ་བཅོས། ཚིག་མ་འཁྲུལ། དོན་མ་ནོར་བར་མཁའ་འགྲོ་གསང་བའི་བརྡ་བསྒྱུར་བས་གཞུང་ཟབ་ཅིང་བྱིན་རླབས་ཆེ་བ་དང་། སྐལ་བ་དང་མི་ལྡན་པའི་གང་ཟག་བློ་ཇི་ལྟར་སྒྲིན་ཀྱང་དམུས་ལོང་གིས་གླང་ཆེན་དཔྱད་པ་ལྟར་ཕྱོགས་ཙམ་ཡང་བརྟག་མི་བཟོད་པས་གཏེར་འབྱིན་སྐྱེས་བུ་ཉིད་ཕལ་པའི་སྤྱོད་ཡུལ་ལས་འདས་པར་ཡིད་ཆེས་པ་ཡིན་ལ། ཕྱི་རབས་གནས་དུས་སྨོན་ལམ་ཟབ་མོའི་རྟེན་འབྲེལ་དུས་ལ་བབས་པ་ན། རིག་འཛིན་སྤྲུལ་པའི་སྐྱེས་ཆེན་གཏེར་སྟོན་མཆོག་གཉིས། གླིང་པ་བརྒྱད། ནུས་ལྡན་ཉེར་གཅིག་སོགས་གཏེར་ཆེན་བརྒྱ་རྩ། གཏེར་ཕྲན་སྟོང་རྩའི་ཕྲེང་བ་རིམ་པར་བྱོན་ནས་ཟབ་མོའི་（7བ）ཆོས་མཛོད་ཆེན་པོ་དང་། མཐོང་གྲོལ་རྟེན་གསུམ། མྱོང་གྲོལ་དམ་རྫས་ལ་སོགས་པའི་སྒོ་འཕར་ཕྱེས་ཏེ་གྲོལ་བ་བཞི་ལྡན་གྱི་ཕྲིན་ལས་རྨད་དུ་བྱུང་བ་སྤེལ་བས། སྙིགས་དུས་ཀྱི་རྩུབ་འགྱུར་ངན་པ་མཐའ་དག་ཕྱིར་བསྲིང་བ་དང་། དེང་སང་འདུལ་མདོའི་བསྟན་པ་མི་བཞུགས་པའི་གནས་སུའང་རྡོ་རྗེ་ཐེག་པའི་བསྟན་པ་ཁོལ་བུ་ཁོལ་བུར་མི་ནུབ་དར་ཞིང་རྒྱས་ཏེ་འགྲོ་བ་གདུལ་དཀའ་བ་མང་པོ་སྒྲོལ་བའི་ཕྲིན་ལས་རྒྱ་ཆེ་ཞིང་རྒྱུན་ཆགས་པ་འདི་ལྟ་བུའང་གསང་སྔགས་སྔ་འགྱུར་བའི་ཁྱད་པར་གྱི་ཆོས་སུ་གྲུབ་པ་ཡིན་ནོ། །། ། ༈ བོད་དུ་སངས་རྒྱས་ཀྱི་བསྟན་པ་གཅིག་ལ་གསར་རྙིང་གི་ལམ་སྲོལ་གཉིས་སུ་སྣང་བའི་རྒྱུ་མཚན་གང་ཞེ་ན། ལོ་ཆེན་རིན་ཆེན་བཟང་པོ་མ་བྱོན་གོང་གི་འགྱུར་རྣམས་ལ་སྔ་འགྱུར་རྙིང་མ་དང་། དེ་ཚུན་ཆད་ཀྱི་འགྱུར་རྣམས་ལ་ཕྱི་འགྱུར་གསར་མ་ཞེས་སུ་གྲགས། རྙིང་མ་ལའང་སྤྱིར་བཀའ་མའི་གཞུང་གིས་ཁོག་ཕུབ། གཏེར་མའི་མན་ངག་གིས་ཟུར་བརྒྱན་ཏེ་བཤད་སྒྲུབ་ཀྱི་སྲོལ་འཛིན་པ་ལས། བཀའ་བབས་ཀྱི་ཆུ་བོ་ཕྱོགས་མང་དུ་གྱེས་ཤིང་དུས་བབས་ཀྱི་ཟབ་ཆོས་ཕྱོགས་བཞི་དབུས་ལྔས་མཚོན་བའི་གཏེར་ཁ་ཐ་དད་པ་མང་བའི་དབང་གིས་ནང་གསེས་ལུགས་སྲོལ་ཤིན་ཏུ་མང་། （8ན）གསར་མའི་ཕྱོགས་སུའང་རྒྱ་གར་གྱི་པཎ་གྲུབ། དེའི་ཐུགས་ཉམས་སུ་བསྟར་བའི་མན་ངག །བོད་ཀྱི་ལོ་ཙཱ་གདམས་ངག་ལེན་པ་པོ་བཅས་དུས་སྐབས་སྔ་ཕྱི་ཐ་དད་ཅི་རིགས་པར་བྱོན་པའི་སྟབས་ཀྱིས་རང་རང་གི་བཞེད་གཞུང་ལུགས་སྲོལ་ཀྱང་དེ་སྙེད་དུ་འཕེལ་བས་ནང་གསེས་མི་འདྲ་བ་མང་དུ་མཆིས་མོད། འོན་ཀྱང་སྔ་ཕྱི་ཡོངས་རྫོགས་ཀྱི་རྩ་བའི་བཀའ་སྲོལ་གཙོ་ཆེ་བ་ནི་སྒྲུབ་བརྒྱུད་ཤིང་རྟ་བརྒྱད་དུ་གྲགས་པ་སྟེ། ༈ དེ་ལས་དང་པོ་སྔ་འགྱུར་ནི། གསང་སྔགས་རྙིང་མ་ཞེས་པའི་ཆོས་ཀྱི་མཚན་གཞི་མཁན་སློབ་ཆོས་གསུམ་གྱི་དུས་སུ་བསྒྱུར་བཤད་གཏན་ལ་ཕབ་པའི་མདོ་སྔགས་ཀྱི་བསྟན་པ་ཡོངས་རྫོགས་ལ་བྱ་སྟེ། དེའི་བབས་ཚུལ་གོང་དུ་བསྟན་པ་སྔ་དར་གྱི་སྐབས་སུ་སྨོས་ཟིན་པ་ལྟར་ལ། རིང་ལུགས་འདིས་གཙོ་བོར་རྟོགས་པའི་བསྟན་པ་སྒྲུབ་པ་ཁོ་ན་ལ་རྩལ་དུ་འདོན་པས་གྲུབ་པ་བརྙེས་པའི་སྐྱེས་བུ་བསམ་གྱིས་མི་ཁྱབ་པ་བྱོན་དང་འབྱོན་བཞིན་པ་དང་། གདོས་བཅས་འཇའ་ལུས་འོད་ཀྱི་ཕུང་པོར་དེངས་པ་དེང་སང་གི་བར་དུ་ཇི་སྙེད་པ་བྱུང་བ་ཡིན་ནོ། །། ། གཉིས་པ་བཀའ་གདམས་ནི། འདི་མན་ཆད་ཀྱི་ཤིང་རྟ་བདུན་པོ་ཕྱི་འགྱུར་གསར་མའི་ཕྱོགས་སུ་གཏོགས་པ་སྟེ། （8བ）ནག་ཚོ་ལོ་ཙཱ་བ་ཚུལ་ཁྲིམས་རྒྱལ་བས་འཕགས་ཡུལ་ནས་དཔལ་ལྡན་ཇོ་བོ་རྗེ་ཨ་ཏི་ཤ་བོད་དུ་སྤྱན་དྲངས། དེ་ཉིད་ཀྱིས་དབུ་མའི་ལྟ་བ་དང་འདུལ་བའི་སྤྱོད་པ་གཙོར་སྟོན། གཞུང་ལུགས་གདམས་ངག་དང་འབྲེལ་བ་བྱང་ཆུབ་ལམ་གྱི་སྒྲོན་མ་ཞེས་བྱ་བ་སྐྱེས་བུ་གསུམ་གྱི་རིམ་པ་ཡོངས་སུ་རྫོགས་པའི་བསྟན་བཅོས་ཆེན་པོ་མཛད་ནས་དམ་པའི་ཆོས་ཀྱི་སྒོ་མོ་མཐའ་དག་དེའི་ནང་དུ་འདུས་པར་བསྟན། སློབ་མ་མཐའ་ཡས་པ་བྱོན་པ་རྣམས་ཀྱི་ནང་ནས་གཙོ་བོར་གྱུར་པ་དབུས་ཀྱི་ཁུ་རྡོག་འབྲོམ་གསུམ་དང་། ལྷག་པར་སྤྱན་རས་གཟིགས་ཀྱི་སྤྲུལ་པ་འབྲོམ་སྟོན་རྒྱལ་བའི་འབྱུང་གནས་ཀྱིས་ཁྱད་པར་འཕགས་པའི་ལྷ་བཞི་དང་། ཆོས་སྡེ་སྣོད་གསུམ་སྟེ་ལྷ་ཆོས་བདུན་ལྡན་གྱི་སྒོ་ནས་བསྟན་པ་བསྐྱངས་པས་བཀའ་གདམས་རིན་པོ་ཆེ་ཞེས་ཡོངས་སུ་གྲགས། འབྲོམ་གྱི་སློབ་མ་སྐུ་མཆེད་གསུམ་དུ་གྲགས་པ་ལ་གཞུང་གདམས་ངག་མན་ངག་གི་བཀའ་སྲོལ་ཆེན་པོ་གསུམ་གྱི་བཀའ་བབས་ནས། དེ་གསུམ་གྱི་བརྒྱུད་འཛིན་འཕགས་ཆེན་བྱང་སེམས་ཕྱིར་མི་ལྡོག་པའི་ས་ལ་གནས་པ་དུ་མ་བྱོན་ནས་འཁྲུལ་པ་མེད་པའི་བྱང་ཆུབ་ཀྱི་ལམ་བཟང་སྤེལ་ཞིང་གསལ་བར་མཛད་པས་གངས་ཅན་གྲུབ་མཐའ་ཡོངས་ལ་ཁྱབ་པར་（9ན）གྱུར་མོད། ཕྱི་དུས་རང་རྐང་འཛིན་པའི་སྡེ་ཅུང་ཟད་འགྲིབ་པ་ལྟར་སྣང་བ་ན། རྗེ་བཙུན་འཇམ་དཔལ་དབྱངས་ཀྱི་རྣམ་རོལ་ཆོས་ཀྱི་རྒྱལ་པོ་ཙོང་ཁ་པ་བློ་བཟང་གྲགས་པའི་དཔལ་གྱིས་བཀའ་གདམས་གཞུང་པའི་ལུགས་ཀྱི་བཤད་སྲོལ་གཙོར་བཏོན། ལུགས་གསུམ་གྱི་ཟབ་དོན་མན་ངག་ཏུ་དྲིལ་བ་བྱང་ཆུབ་ལམ་རིམ་ཆེན་མོ་མཛད་པ་ལ་གདམས་པའི་སྲོག་ཏུ་འཛིན་པ་བཀའ་གདམས་གསར་མ་སྟེ། ད་ལྟ་དགེ་ལྡན་པར་ཡོངས་སུ་གྲགས་པ་འདི་བྱུང་བ་ཡིན་ལ། སྔགས་ཕྱོགས་སུ་གསང་བདེ་འཇིགས་གསུམ་གཙོ་བོར་གྱུར་པའི་ཕྱི་འགྱུར་གྱི་རྒྱུད་སྡེ་རྣམས་ཀྱི་བཀའ་སྲོལ་སྐྱོང་ཞིང་། འཁོར་དག་པ་རྣམ་བརྒྱད་སོགས་རྗེའི་སློབ་མ་སྡེ་སྣོད་འཛིན་པ་དགོན་སྡེ་ཐེབས་པའང་བརྒྱ་དང་བཞི་བཅུ་ལྷག་ཙམ་བྱོན་པས་མཚོན་ཆོས་བརྒྱུད་ཀྱི་ཕྲིན་ལས་གངས་ཅན་ཙམ་དུ་མ་ཟད། རྒྱ་ཧོར་སོགས་ཕྱོགས་ཀྱི་ཐ་གྲུ་ཕལ་མོ་ཆེར་ཁྱབ་པར་བརྡལ། རིང་ལུགས་འདིས་གཙོ་བོར་བཤད་པ་ལ་བརྟེན་ནས་རྒྱལ་བསྟན་རིན་པོ་ཆེ་གསལ་བར་མཛད་པའི་ཕྱིར་ལུང་གི་བསྟན་པ་ལ་འདི་ཁོ་ན་བཀའ་དྲིན་ཆེ་བ་ཡིན་ནོ། ༈ གསུམ་པ་ལམ་འབྲས་ནི། གསང་སྔགས་ཕྱི་དར་གྱི་སྐབས་སུ་བླ་ཆེན་འབྲོག་（9བ）མི་ལོ་ཙཱ་བ་ཤཱཀྱ་ཡེ་ཤེས་ལ་བཀའ་བབས་པ་ཀྱཻ་རྡོ་རྗེའི་བསྐྱེད་རྫོགས་ཀྱི་རྣལ་འབྱོར་གྲུབ་ཆེན་བི་རཱུ་པ་དང་མཚོ་སྐྱེས་ཞབས་སོགས་ལམ་སྲོལ་དགུའི་གདམས་བཅུད་དང་། མཁས་པ་སྒོ་དྲུག་གི་ཆོས་འབྲེལ་རྩ་བ་མེད་པ། ཕྱིས་སུ་ས་ཆེན་ཀུན་དགའ་སྙིང་པོ་ལ་ཉེ་བརྒྱུད་དུ་བྱུང་བའི་ལམ་སྦས་བཤད་དང་། གྲགས་པ་རྒྱལ་མཚན་གྱི་བརྡ་དོན་གསལ་བ་སོགས་གདམས་ངག་ཐམས་ཅད་ཀྱི་གཙོ་བོ་གསུང་ངག་རིན་པོ་ཆེ་ལམ་འབྲས་བུ་དང་བཅས་པ་ཡི་གེ་དྲུག་ཅུ་མན་ངག་ཕྲ་མོ་དང་བཅས་པ་ལ་དེང་སང་ལམ་འབྲས་ཞེས་ཡོངས་སུ་གྲགས་པ་སྟེ། འབྲོག་མིའི་སློབ་བརྒྱུད་ལས་རིམ་པར་བརྒྱུད་སྲོལ་བཅོ་བརྒྱད་ཙམ་དུ་གྱེས་ཤིང་དེ་ལས་ཀྱང་གཙོ་བོར་ས་སྐྱ་བ་ལ་བཀའ་བབས་པ་བཞིན་འཇམ་དཔལ་དབྱངས་ས་སྐྱ་པཎ་ཆེན་དང་། འགྲོ་མགོན་ཆོས་རྒྱལ་འཕགས་པ་སོགས་གདུང་བརྒྱུད་རིན་པོ་ཆེའི་ཕྲེང་བ་དང་། ངོར་ཆེན་ཀུན་དགའ་བཟང་པོ། ཚར་ཆེན་བློ་གསལ་རྒྱ་མཚོ་སོགས་སློབ་བརྒྱུད་མཁས་གྲུབ་ཆེན་པོ་བསམ་གྱིས་མི་ཁྱབ་པ་རྣམས་ཀྱིས་ཚོགས་བཤད་དང་སློབ་བཤད་སོགས་ཀྱི་སྒོ་ནས་བསྟན་པ་འཛིན་སྐྱོང་སྤེལ་བར་མཛད་པ་དགྱེས་པ་རྡོ་རྗེའི་བསྐྱེད་རྫོགས་ཀྱི་ཕྲིན་ལས་ད་ལྟའི་བར་དུ་མི་ཉམས་དར་རྒྱས（10ན）སུ་བཞུགས་སོ། ༈ བཞི་པ་བཀའ་བརྒྱུད་ནི། ཌོམ་བི་ཧེ་རུ་ཀའི་རྣམ་འཕྲུལ་ལྷོ་བྲག་མར་པ་ཆོས་ཀྱི་བློ་གྲོས་ཉིད་འཕགས་ཡུལ་དུ་ལན་གསུམ་བྱོན། ནཱ་རོ་པ་གཙོ་བོར་གྱུར་པའི་མཁས་གྲུབ་ཀྱི་བླ་མ་མང་པོ་བསྟེན་ནས་བདེ་དགྱེས་གསང་གསུམ་གཙོས་རྒྱུད་སྡེ་དུ་མའི་དབང་བཤད་གདམས་ངག་སྙན་བརྒྱུད་དང་བཅས་པ་གསན་ཅིང་། ཁྱད་པར་ནཱ་རོ་པ་དང་མེ་ཏྲི་པ་གཉིས་ཀྱིས་བྱང་ཕྱོགས་ཁ་བ་ཅན་འདུལ་བའི་རྒྱལ་ཚབ་ཏུ་དབང་བསྐུར་བ་བརྙེས་པ་དེ་ལ་སློབ་ཚོགས་མཐའ་ཡས་པ་བྱོན་པའི་གཙོ་བོར་ཀ་ཆེན་བཞིའི་རྔོག་མཚུར་མེས་གསུམ་ལ་བཤད་པའི་བཀའ་བབས་ཤིང་བརྒྱུད་འཛིན་བུ་སློབ་ཀྱང་མང་དུ་འཕེལ་ཏེ་ཕྲིན་ལས་རྒྱ་ཆེ་བ་བྱུང་། ལྷག་པར་རྗེ་བཙུན་མི་ལ་རས་པ་ལ་སྒྲུབ་བརྒྱུད་ཀྱི་བཀའ་བབས་ཏེ་སྐུ་ཚེ་དེ་ཉིད་ལ་ཟུང་འཇུག་གི་གོ་འཕང་མངོན་དུ་མཛད་ནས་མི་དང་མི་མ་ཡིན་པའི་འགྲོ་བ་ཚད་མེད་པ་བཏུལ་ཞིང་། མཚན་ཡོངས་སུ་གྲགས་པའི་སློབ་མ་མང་དུ་བྱོན་པའི་ནང་ནས་གཙོ་བོ་སྙན་བརྒྱུད་འཛིན་པའི་ཐུགས་སྲས་ཟླ་བ་ལྟ་བུ་རས་ཆུང་རྡོ་རྗེ་གྲགས་པ་དང་། ཉི་མ་ལྟ་བུ་མཉམ་མེད་དྭགས་པོ་ལྷ་རྗེ་སྟེ། རས་ཆུང་པས་རྒྱ་གར་ནས་ལུས་མེད་མཁའ་འགྲོའི་ཆོས་སྐོར་ཕྱི་མ་སྤྱན་དྲངས་（10བ）ཤིང་སྙན་བརྒྱུད་ཀྱི་བཀའ་ཀར་འབྲུག་གཉིས་ལ་བབས་པ་དང་། ཚེ་དཔག་མེད་འགྲོ་དོན་གྱི་ཤམ་བུ་ཅན་ས་ཀར་དགེ་གསུམ་ཐམས་ཅད་ལ་ཁྱབ། དྭགས་པོ་རིན་པོ་ཆེ་ནི་རྒྱལ་བས་ལུང་བསྟན་དགེ་སློང་འཚོ་བྱེད་ཅེས་ཡོངས་སུ་གྲགས་པ་ལྟར་མཐོང་ཐོས་དྲན་རེག་ཐམས་ཅད་ད་ལྟའི་བར་དུ་རྒྱུད་སྨིན་གྲོལ་དུ་མཛད་པའི་རྣམ་ཐར་བསམ་གྱིས་མི་ཁྱབ་ཅིང་། སློབ་མ་ལས་ཅན་དགྲ་བཅོམ་པ་ལྟ་བུ་ལྔ་བརྒྱ་སོགས་མཐའ་ཡས་པ་ལས། གཙོ་བོ་ཐུགས་སྲས་ཁམས་པ་མི་གསུམ་སོགས་ལས་བུ་སློབ་དང་ཡང་སློབ་རིམ་པར་གྱེས་ཏེ་བཀའ་བརྒྱུད་ཆེ་བཞི་ཆུང་བརྒྱད་དུ་གྲགས་པ་རྣམས་བྱུང་ཞིང་། དེ་རྣམས་རེ་རེ་ལའང་། ཆོས་བརྒྱུད། གདན་ས། ཕྲིན་ལས་ཀྱི་ཆེ་བ་བློས་གཞལ་བར་དཀའ་བའི་གྲུབ་ཐོབ་ཀྱི་ཚང་ཆེན་པོ་བརྡོལ། འབྲུག་པ་བཀའ་བརྒྱུད་གཅིག་ལ་མཚོན་ནའང་བྱ་རྒོད་པོའི་ཉིན་ལམ་བཅོ་བརྒྱད་དུ་སྒྲུབ་བརྒྱུད་ཀྱི་བསྟན་པ་དར་ཁྱབ་བྱུང་ཞིང་། ད་ལྟའི་བར་དུ་མཉམ་མེད་དྭགས་པོ་བཀའ་བརྒྱུད་ཅེས་རྟོགས་པའི་བསྟན་པ་སྒྲུབ་པས་འཛིན་པ་ལ་རིང་ལུགས་འདི་གྲུབ་མཐའ་ཀུན་ལས་ཁྱད་པར་དུ་གྱུར་པའོ། ། ༈ ལྔ་པ་ཤངས་པ་བཀའ་བརྒྱུད་ནི། མཁས་གྲུབ་ཁྱུང་པོ་རྣལ་འབྱོར་ཞེས་བྱ་བས་འཕགས་ཡུལ་ནས་ཡེ་ཤེས་（11ན）ཀྱི་ཌཱ་ཀི་གཉིས། ཁྱད་འཕགས་ཀྱི་བླ་མ་བཅུ་གསུམ། རྩ་བའི་བླ་མ་རྣམ་བཞི་སོགས་མཁས་གྲུབ་བརྒྱ་དང་ལྔ་བཅུའི་ཐུགས་བཅུད་ཆོས་ཀྱི་མཛོད་མ་ལུས་པ་གསན་ཏེ། བོད་ཀྱི་གཙང་གཡས་རུ་ཤངས་ཀྱི་ཞང་ཞང་དུ་གདན་ས་མཛད་པས་བླ་མ་ཤངས་པ་དང་བརྒྱུད་འཛིན་རྣམས་ལ་ཤངས་པ་བཀའ་བརྒྱུད་དུ་གྲགས། དེ་ལ་སྔ་བུ་ལྔ་དང་ཕྱི་བུ་གཅིག་དང་དྲུག་གིས་གཙོས་བཤེས་གཉེན་ཁྲི་ཁྲག་བཅོ་བརྒྱད་སོགས་གདུལ་བྱ་མཐའ་ཡས་པ་སྨིན་གྲོལ་དུ་མཛད་པ་ལས། རིན་ཆེན་བདུན་བརྒྱུད་སྔ་ཕྱི་ལས་རིམ་པར་སློབ་བརྒྱུད་མང་དུ་གྱེས་ཤིང་བཀའ་སྲོལ་བར་མ་ཆད་པའི་རིང་བརྒྱུད་དང་། གྲུབ་ཆེན་ཐང་སྟོང་རྒྱལ་པོར་མཁའ་འགྲོ་ནི་གུ་མས་དངོས་སུ་གནང་བའི་བཀའ་བབས་སྔ་ཕྱི་བར་གསུམ་གྱི་ཉེ་བརྒྱུད། ཡེ་ཤེས་ཌཱ་ཀིས་འཇམ་མགོན་ཀུན་དགའ་གྲོལ་མཆོག་རྗེས་སུ་བཟུང་བའི་ངོ་མཚར་ཤིན་ཏུ་ཉེ་བརྒྱུད་བཅས། རྩ་བ་ཤངས་པའི་སྙན་བརྒྱུད་ཀྱི་གསེར་ཆོས་གཙང་མ་ལ། གདམས་ངག་རྣོ་སོ་ཉེ་བརྒྱུད་མཁའ་འགྲོའི་ཁ་རླངས་ཅན་གྱིས་ཟུར་བརྒྱན་པ་ཟབ་དོན་ཐང་བརྡལ་མ་སོགས་གསང་བདག་སྒྲོལ་མགོན་ཞབས་ཀྱི་བཀའ་སྲོལ་ཁྱད་པར་ཅན་གྱི་ཕྲིན་ལས་མ་ཉམས་པར་བཞུགས་སོ། ། ༈ དྲུག་པ་ཞི་བྱེད་ནི། （11བ）འཕགས་ཡུལ་གྱི་གྲུབ་ཆེན་ཀ་མ་ཤཱི་ལའམ་བོད་དང་རྒྱ་གར་ཏུ་ཕ་དམ་པ་སངས་རྒྱས་ཞེས་མཚན་ཡོངས་སུ་གྲགས་པ་དེ་ཉིད་བོད་དུ་ལན་ལྔར་ཕེབས་ཏེ། གང་ཟག་སོ་སོའི་ཁམས་དང་དབང་པོ་ཇི་བཞིན་དུ་གཟིགས་པས་དེ་དག་དང་མཐུན་པའི་གདམས་ངག་སྣ་རེས་གྲོལ་བར་མཛད་པས་གཞུང་དང་ལུགས་སྲོལ་གཅིག་ཏུ་མ་ངེས་མོད་ཀྱང་། གཙོ་བོར་གཞུང་ཨཱ་ལི་ཀཱ་ལི་ཆུ་ཀླུང་ཆེན་པོའི་རྒྱུད་དང་། ཕྱག་རྒྱ་ཆེན་པོ་བརྡའི་རྒྱུད་སོགས་ལ་བརྟེན་ནས་ཆོས་ཀྱི་འཁོར་ལོ་བསྐོར་བས་ལས་ཅན་གནམ་གྱི་སྐར་མའི་གྲངས་ལྟ་བུའི་འགྲོ་བ་མང་པོ་བསྒྲལ་བར་མཛད་པའི་ཆོས་དེ་ལ་སྤྱི་མིང་སྒེར་དུ་ཆགས་ཏེ་དམ་ཆོས་སྡུག་བསྔལ་ཞི་བྱེད་ཅེས་སུ་གྲགས། བརྒྱུད་པ་སྔ་ཕྱི་བར་གསུམ་བྱུང་ཞིང་བཀའ་བབས་རྣམས་ཀྱིས་རྒྱ་ཆེར་སྤེལ་བས་ཕྲིན་ལས་ཀྱི་རྒྱུན་མ་ནུབ་པར་མཆིས། དེ་དང་འབྲེལ་བ་ངོ་བོ་ཕ་རོལ་ཏུ་ཕྱིན་པ་སྔགས་དང་རྗེས་སུ་མཐུན་པའི་གདམས་པ་དམ་ཆོས་བདུད་ཀྱི་གཅོད་ཡུལ་ཅེས་བྱ་བ། ཕ་དམ་པས་སྐྱོ་ཤཱཀྱ་ཡེ་ཤེས་དང་ཡར་ལུང་སྨ་ར་སེར་པོ་ལ་མདོ་ལུགས་རང་རྐང་གི་གཅོད། ཨཱརྻ་དེ་བའི་གཞུང་ཆུང་ལྔ་བཅུ་པའི་དོན་གདམས་ངག་བྲུལ་ཚོ་དྲུག་པ་ཞེས་བྱ་བ་གནང་བ་སྨྱོན་པ་བེ་རེ་སོགས་ནས་བརྒྱུད་པ་ཕོ་གཅོད་དུ་གྲགས་པ་དང་། མ་གཅིག་（12ན）ལབ་སྒྲོན་གྱིས་ཤེར་ཕྱིན་གྱི་དགོངས་དོན་ཉིད་ཀྱི་དགོངས་ཉམས་ལས་འཁྲུངས་པའི་རྟོགས་ཆོས་གཅོད་ཡུལ་ཞེས་ཡོངས་སུ་གྲགས་པའི་ལམ་སྲོལ་རྒྱ་ཆེར་ཕྱེས་ཏེ་གཞུང་གདམས་ངག་བསམ་གྱིས་མི་ཁྱབ་པ་མཛད་པའི་རྒྱུན་ལ་མོ་གཅོད་ཅེས་བྱ་སྟེ། ཞལ་སློབ་བུ་ཆེན་དྲུག་ཅུ་གཙོ་བོར་གྱུར་པའི་གྲུབ་ཐོབ་ཕོ་མོ་བརྒྱ་རྩ་བརྒྱད་ལ་སོགས་པ་སློབ་ཚོགས་རྣམས་ཀྱིས་སྤེལ་ཞིང་བཟུང་བས་ད་ལྟའི་བར་དུ་འགྲོ་དོན་ཕྲིན་ལས་རྒྱུན་མ་ཆད་པ་ཉིད་དོ། ། ༈ བདུན་པ་རྡོ་རྗེའི་རྣལ་འབྱོར་ནི། དུས་འཁོར་རྩ་རྒྱུད་སྟོང་ཕྲག་བཅུ་གཉིས་པ་སོགས་སྔགས་རྒྱུད་རྒྱས་པ་རྣམས་ཀྱིས་མགྲིན་གཅིག་ཏུ་གསལ་བར་བསྟན་པའི་རྫོགས་རིམ་ཐམས་ཅད་ཀྱི་སྙིང་བཅུད་རྡོ་རྗེ་གསུམ་གྱི་རྣལ་འབྱོར་དང་འབྲེལ་བའི་སྦྱོར་བ་ཡན་ལག་དྲུག་པ་ཞེས་བྱ་བ་བླ་མེད་ནས་གསུངས་པའི་རིམ་གཉིས་ཐམས་ཅད་ཀྱི་སྐྱེལ་སོ་སྟེ། ཟླ་བ་བཟང་པོ་སོགས་ཆོས་རྒྱལ་བདུན་དང་། འཇམ་དཔལ་གྲགས་པ་སོགས་རྡོ་རྗེའི་རིགས་ལྡན་རྣམས་ཀྱིས་ཞལ་ལུང་དུས་ཞབས་པ་ཆེ་ཆུང་སོགས་ནས་བརྒྱུད་དེ། བོད་དུ་སྔོན་བྱོན་བཞི། བར་བྱོན་ལྔ། ཕྱིས་བྱོན་གཉིས་སུ་གྲགས་པ་གཙོ་བོར་གྱུར་པའི་ལུགས་སྲོལ་ཉི་ཤུ་ཐམ་པའི་རྒྱུན་ཀུན་སྤང་ཐུགས་རྗེ་བརྩོན་（12བ）འགྲུས་ལ་འདུས་ཤིང་། གཞན་ཡང་གོ་བྲག་པ་སོགས་ལུགས་གཞན་མང་པོའང་བྱུང་བ་དང་བཅས་ཐམས་ཅད་ཀྱི་བཀའ་ཀུན་མཁྱེན་དོལ་པོ་པ་དང་། རྗེ་བཙུན་སྒྲོལ་མགོན་ཞབས་ལ་བབས་ཏེ་ཤིང་རྟའི་ལམ་སྲོལ་ཕྱེས་པ་ནས་བཟུང་ད་ལྟའི་བར་དུ་སྒྲུབ་བརྒྱུད་འདིའི་བསྟན་པ་མ་ཉམས་པར་བཞུགས་བཞིན་པའོ། ། ༈ བརྒྱད་པ་རྡོ་རྗེའི་བསྙེན་སྒྲུབ་ནི། གྲུབ་ཆེན་ཨོ་རྒྱན་པ་རིན་ཆེན་དཔལ་དེ་ཉིད་རྒྱ་གར་ནུབ་ཕྱོགས་ཨོ་རྒྱན་གྱི་ཡུལ་དུ་བྱོན་ནས་རྡོ་རྗེ་རྣལ་འབྱོར་མ་དངོས་ལས་གསན་པ་བསྙེན་སྒྲུབ་སྒྲུབ་ཆེན་གསུམ་གྱི་མན་ངག་ལ་བརྟེན་ནས་བརྩོན་འགྲུས་ཅན་ཚེ་གཅིག་ལ་སྐུ་གསུམ་མངོན་དུ་བྱེད་པའི་གདམས་པ་ཟབ་མོ་སྟེ། བོད་དུ་བྱོན་ནས་མཁའ་འགྲོའི་ལུང་བཞིན་རིན་པོ་ཆེ་མཁར་ཆུང་བ་ལ་གནང་བ་ནས་བརྒྱུད་པ་རིམ་པར་འཕེལ་ཞིང་ཀུན་མཁྱེན་རང་བྱུང་རྡོ་རྗེས་གདམས་ངག་གི་གནད་གསལ་བར་མཛད་དེ། སློབ་རྒྱུད་དང་བཅས་པས་རྒྱ་ཆེར་སྤེལ་བས་ད་ལྟའི་བར་དུ་བཀའ་སྲོལ་གྱི་རྒྱུན་མ་ཉམས་པར་བཞུགས་པ་ཡིན་ནོ། ། ༈ ད་ནི་ཐེག་པ་ཆེ་ཆུང་དང་མདོ་སྔགས་ཀྱི་རྣམ་གཞག་སྐོར་ས་བོན་ཙམ་སྨོས་ན། ནང་པ་སངས་རྒྱས་པའི་ཆོས་ལ་ཐེག་དམན་དང་། ཐེག་ཆེན་གཉིས་སུ་ཡོད་（13ན）པ་ལས། དང་པོ་ཐེག་དམན་ལའང་ཉན་རང་གཉིས་ལས། དང་པོ་ཉན་ཐོས་ནི། སློབ་དཔོན་གཞན་ལ་བརྟེན་ཞིང་དེ་ལས་ཐོས་པ་དག་ཡུལ་གཞན་ལ་སྒྲོག་པས་ཐོས་སྒྲོག་གམ་ཉན་ཐོས་ཞེས་བྱ། འཇུག་པའི་སྒོ་ནི། ཤེས་བྱ་སྡུག་བསྔལ་བདེན་པ། སྤང་བྱ་ཀུན་འབྱུང་བདེན་པ། ཐོབ་བྱ་འགོག་པའི་བདེན་པ། བརྟེན་བྱ་ལམ་གྱི་བདེན་པ་སྟེ་འཕགས་པའི་བདེན་པ་བཞི་ལ་བརྟེན་ནས་འཇུག །བསྲུང་བྱའི་སྡོམ་པ་ངེས་འབྱུང་གི་བསམ་པས་ཀུན་ནས་བསླང་བ་གཞན་གནོད་གཞིར་བཅས་སྤོང་བའི་སེམས་པ་མཚུངས་ལྡན་དང་བཅས་སོ་སོར་ཐར་པའི་ཚུལ་ཁྲིམས་བསྲུང་། རྟོགས་བྱའི་ལྟ་བ་གང་ཟག་གི་བདག་མེད་གཙོ་བོར་རྟོགས། ཐོབ་བྱའི་འབྲས་བུ་འགོག་པའི་མྱང་འདས་དགྲ་བཅོམ་པའི་གོ་འཕང་ཐོབ་པའོ། ། ༈ གཉིས་པ་རང་རྒྱལ་ནི། སློབ་དཔོན་གཞན་ལ་མ་ལྟོས་པར་རང་གི་བྱང་ཆུབ་རང་གི་ཤེས་རབ་ཀྱི་རྩལ་གྱིས་མངོན་དུ་བྱེད་པས་ན་རང་རྒྱལ་ཅེས་བྱ། འཇུག་པའི་སྒོ་རྟེན་འབྲེལ་ཡན་ལག་བཅུ་གཉིས་ཀྱི་སྒོ་ནས་འཇུག །བསྲུང་བྱའི་སྡོམ་པ་སོ་ཐར་གྱི་ཚུལ་ཁྲིམས་ཉན་ཐོས་དང་མཚུངས། རྟོགས་བྱའི་ལྟ་བ་གང་ཟག་གི་བདག་མེད་རྟོགས་པའི་སྟེང་དུ་ཆོས་ཀྱི་བདག་（13བ）གི་ཕྱོགས་གཅིག་བཟུང་བའི་དོན་རང་བཞིན་མེད་པར་རྟོགས། ཐོབ་བྱའི་འབྲས་བུ་ལྷག་བཅས་དང་ལྷག་མེད་ཀྱི་མྱང་འདས་གཉིས་ཏེ་ཉན་ཐོས་དང་འདྲ་བ་ལས། བསེ་རུ་ལྟ་བུ་དང་། ཚོགས་ན་སྤྱོད་པ་གཉིས་སུ་དབྱེར་ཡོད་དོ། ། ༈ གཉིས་པ་ཐེག་ཆེན་ལ། རྒྱུ་མཚན་ཉིད་ཀྱི་ཐེག་པ་དང་། འབྲས་བུ་རྡོ་རྗེ་ཐེག་པ་གཉིས་ལས། དང་པོ་རྒྱུ་མཚན་ཉིད་ཀྱི་ཐེག་པ་ནི། ཐེག་པ་འདིར་ཞུགས་ན་སངས་རྒྱས་སུ་བགྲོད་པར་བྱེད་པའི་སྟོབས་ཡོད་པ་དང་། ཤེས་རབ་རྒྱ་ཆེ་ཞིང་སྤྱོད་ཡུལ་ཡངས་པ་དང་། མངོན་མཐོའི་དགའ་བ་དང་ངེས་ལེགས་ཀྱི་བདེ་བ་ཐམས་ཅད་ཐོབ་པར་བྱེད་པས་ན་ཐེག་པ་ཆེན་པོ་ཞེས་བྱ། འཇུག་པའི་སྒོ་བདེན་པ་གཉིས་ཀྱི་སྒོ་ནས་ལྟ་སྤྱོད་དམ་ཐབས་ཤེས་སམ་ཚོགས་གཉིས་ཟུང་དུ་འབྲེལ་བའི་ཚུལ་གྱིས་འཇུག །བསྲུང་བྱའི་སྡོམ་པ་ནི་ཉེས་སྤྱོད་སྡོམ་པའི་ཚུལ་ཁྲིམས་སོགས་ལྷག་པ་ཚུལ་ཁྲིམས་ཀྱི་བསླབ་པ་དང་། དགེ་བའི་ཆོས་སྡུད་ཅིང་སེམས་ཅན་སྨིན་པར་བྱ་བ་སོགས་ལྷག་པ་སེམས་ཀྱི་བསླབ་པ་དང་། མཚན་མ་དང་རྣམ་པར་རྟོག་པ་ཐམས་ཅད་སྤངས་ཏེ་རྣམ་པར་རྟོག་པ་མེད་པར་ལྷུན་གྱིས་གྲུབ་པ་དང་རྗེས་ཐོབ་སྒྱུ་མ་ལྟ་བུར་སྤྱོད་པ་ལྷག་པ་ཤེས་རབ་ཀྱི་བསླབ་（14ན）པ་ལ་སློབ། རྟོགས་བྱའི་ལྟ་བ་ནི་ཀུན་རྫོབ་ཏུ་ཆོས་ཐམས་ཅད་ཆུ་ཟླ་ལྟར་མེད་བཞིན་དུ་སྣང་བ་དང་། དོན་དམ་པར་སྤྲོས་པའི་མཚན་མ་ཐམས་ཅད་ཉེ་བར་ཞི་བའི་ཚུལ་གྱིས་བདེན་པ་གཉིས་ཀྱི་གནས་ལུགས་ཕྱིན་ཅི་མ་ལོག་པ་རྟོགས། ཐོབ་བྱའི་འབྲས་བུ་སྤྲོས་པ་ཐམས་ཅད་ཉེ་བར་ཞི་བའི་མྱང་འདས་ཚོགས་གཉིས་ཡོངས་སུ་རྫོགས་པའི་མཐུ་ལས་རང་དོན་དུ་ཆོས་ཀྱི་སྐུ་དང་། གཞན་དོན་དུ་གཟུགས་ཀྱི་སྐུ་གཉིས་མངོན་དུ་གྱུར་པའོ། ། ༈ གཉིས་པ་འབྲས་བུ་རྡོ་རྗེ་ཐེག་པ་ནི། མདོ་སྔགས་གཉིས་ཀྱི་མཐར་ཐུག་གི་འབྲས་བུ་དོན་དུ་གཉེར་བྱ་མི་གནས་པའི་མྱང་འདས་ཙམ་དུ་གཅིག་ཀྱང་། ལམ་གྱི་འཇུག་སྒོ་ཐབས་ཀྱི་ཆ་ལ་མ་རྨོངས་པ་དང་། གདུལ་བྱའི་དབང་པོ་དང་མཐུན་པར་དབྱེ་སྒོ་མཐའ་ཡས་པའི་ཕྱིར་ཐབས་མང་བ་དང་། དེའང་དཀའ་ཐུབ་སོགས་ལ་མ་ལྟོས་པར་རང་གི་ཇི་ལྟར་འདོད་པ་བཞིན་སྤྱོད་སྒོ་ཡངས་པས་ཚེགས་ཆུང་ཞིང་དཀའ་བ་མེད་པ་དང་། གདུལ་བྱ་དབང་པོ་རྣོན་པོའི་དབང་དུ་བྱས་པ་སྟེ་ཁྱད་པར་བཞིའི་སྒོ་ནས་འཕགས་པ་ཡིན་ལ། དེ་ཡང་གདུལ་བྱ་སོགས་ལ་དགོངས་ཏེ་རྒྱུད་སྡེ་བཞིར་དབྱེ་རུ་ཡོད་པ་ལས། དང་པོ་བྱ་（14བ）རྒྱུད་ནི། ཕྱིའི་ཀུན་སྤྱོད་ཁྲུས་དང་གཙང་སྦྲ་སོགས་གཙོ་བོར་སྟོན་པའི་སྒོ་ནས་སྔགས་ཀྱི་སྤྱད་པ་སྤྱོད་པའི་ཕྱིར་བྱ་བའི་རྒྱུད་ཅེས་བྱ་སྟེ། ནང་གསེས་སུ་རིགས་དྲུག་ཏུ་དབྱེ། འཇུག་པའི་སྒོ་ནི་ཆུ་དང་ཅོད་པན་གྱི་དབང་གིས་ཆོས་སྐུ་དང་གཟུགས་སྐུའི་ནུས་པ་བཞག་པའི་སྨིན་བྱེད་ནོད་དེ་རང་གཞུང་ནས་བཤད་པའི་དམ་ཚིག་རྣམས་བསྲུང་། ལམ་མངོན་རྟོགས་ནི་མདུན་བསྐྱེད་ཀྱི་ལྷ་རྗེ་དང་བདག་ཉིད་ཁོལ་པོའི་ཚུལ་གྱིས་མཆོག་དམན་དུ་ལྟ་བས་བསྙེན་པ་མཐར་ཕྱིན་ནས། དངོས་གྲུབ་བསྒྲུབ་པས་སྒྲུབ་བྱེད་དང་མཐུན་པར་རིགས་གསུམ་གང་ཡང་རུང་བའི་བྱང་ཆུབ་ཀྱི་གོ་འཕང་ཐོབ་པའོ། ། ༈ གཉིས་པ་སྤྱོད་རྒྱུད་ནི། ཕྱི་ལུས་ངག་གི་བྱ་བ་དང་། ནང་སེམས་ཀྱི་ཏིང་ངེ་འཛིན་ཆ་མཉམ་པར་སྤྱོད་པས་ན་སྤྱོད་པའི་རྒྱུད་ཅེས་བྱ་སྟེ། ནང་གསེས་སུ་སྐུ་གསུང་ཐུགས་གསུམ་དུ་དབྱེ། འཇུག་པའི་སྒོ་དབང་ནི་ཕྱི་འཇུག་ཆུ་སོགས་དབང་ལྔ་ནོད་དེ་རང་ལུགས་ཀྱི་རྩ་ལྟུང་ཡན་ལག་བཅས་བསྲུང་། ལམ་མངོན་རྟོགས་ནི་ལྷ་དང་བདག་སྤུན་ནམ་གྲོགས་པོའི་ཚུལ་ཙམ་དུ་བལྟས་ཏེ་མཚན་བཅས་དང་མཚན་མེད་ཀྱི་རྣལ་འབྱོར་གཉིས་ལ་གོམས་པར་བྱས་པ་ལས། དབང་པོའི་རིམ་པ་（15ན）བཞིན་རིག་པ་འཛིན་པའི་ལུས་ཀྱིས་རྣམ་སྣང་ཆེན་པོའི་གོ་འཕང་མངོན་དུ་བྱེད་པའོ། ། ༈ གསུམ་པ་རྣལ་འབྱོར་རྒྱུད་ནི། ནང་ཐབས་ཤེས་ཀྱི་རྣལ་འབྱོར་སྒོམ་པ་གཙོ་བོར་གྱུར་པས་ན་རྣལ་འབྱོར་གྱི་རྒྱུད་ཅེས་བྱ་སྟེ། ནང་གསེས་སུ་རིགས་ལྔ་སོགས་སུ་དབྱེ། འཇུག་སྒོ་དབང་ནི་དལ་དུ་ཞུགས་ཏེ་སློབ་མའི་དབང་ལྔ་དང་སློབ་དཔོན་གྱི་དབང་བསྐུར་དྲུག་ནོད་ནས་དམ་ཚིག་སྡོམ་པ་གཞུང་བཞིན་དུ་བསྲུང་། ལམ་མངོན་རྟོགས་ནི་ཕྱག་རྒྱ་བཞི་དང་འབྲེལ་བའི་ལྷའི་རྣལ་འབྱོར་བསྒོམ་པ་སོགས་མཚན་བཅས་དང་མཚན་མེད་ཀྱི་རྣལ་འབྱོར་ཟབ་མོ་ཉམས་སུ་བླངས་པས། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཡེ་ཤེས་ལྔའི་ངོ་བོར་འཚང་རྒྱ་བའོ། ། ༈ བཞི་པ་རྣལ་འབྱོར་བླ་ན་མེད་པའི་རྒྱུད་ལ། གསར་མའི་ཕྱོགས་སུ་ཕ་རྒྱུད་མ་རྒྱུད་གཉིས་མེད་ཀྱི་རྒྱུད་གསུམ་དུ་དབྱེ་ཞིང་། རྙིང་མའི་ཕྱོགས་སུ་བྱ་སྤྱོད་རྣལ་འབྱོར་གསུམ་དཀའ་ཐུབ་རིགས་བྱེད་ཀྱི་ཐེག་པ་ཞེས་སྤྱི་རྒྱུད་དུ་བཞག་ནས། འདིར་རྒྱུད་མ་ཧཱ། ལུང་ཨ་ནུ། མན་ངག་ཨ་ཏི་ཡོ་ག་གསུམ་ལ་དབང་བསྒྱུར་ཐབས་ཀྱི་ཐེག་པ་ནང་རྒྱུད་སྡེ་གསུམ་ཞེས་སྟོན་པ་སྟེ། གདུལ་（15བ）བྱ་ཞེ་སྡང་ཤས་ཆེ་ཞིང་རྟོག་པ་མང་བའི་དོན་དུ་སྣང་བ་ཐབས་ཀྱི་རང་བཞིན་ཕ་རྒྱུད་མ་ཧཱ་ཡོ་ག །འདོད་ཆགས་ཤས་ཆེ་ཞིང་སེམས་གནས་པ་ལ་དགའ་བའི་དོན་དུ་སྟོང་པ་དེ་ཁོ་ན་ཉིད་ཀྱི་རྫོགས་རིམ་ཤེས་རབ་མ་རྒྱུད་ཨ་ནུ་ཡོ་ག །གཏི་མུག་ཤས་ཆེ་ཞིང་བྱ་རྩོལ་ལྷོད་པ་ཅན་གྱི་དོན་དུ་གཉིས་སུ་མེད་པའི་རང་བཞིན་ཨ་ཏི་ཡོ་ག་བསྟན་པ་ཡིན་ཅིང་། འདི་དག་གི་གནད་ཞིབ་པར་གསང་སྒྲོག་ཏུ་འགྱུར་ཕྱིར་འདིར་མ་སྤྲོས་པས་རྟོགས་པར་འདོད་ན་ལོགས་སུ་ཤེས་པར་བྱའོ། །ཞེས་པའང་འབྲས་སྤྱི་བློན་ཆེན་མཆོག་ནས་རི་སྲས་བསོད་ནམས་སྟོབས་རྒྱལ་བརྒྱུད་འདི་ལྟ་བུ་ཞིག་བྲིས་ཞེས་བསྐུལ་མ་གནང་བའི་བཞེད་སྐོང་དུ་རྒྱལ་ཁམས་པ་འཇིགས་བྲལ་ཡེ་ཤེས་རྡོ་རྗེས་བྲིས་པ་དགེ་ཞིང་བཀྲ་ཤིས། །། །