TTDL-ZABTER-02-KHA-016

Previous Text Back to Volume Page Next Text

Wylie title
Location	bdud 'joms gling pa zab gter Volume 2, Text 16, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

[edit]

༠༠༠བརྡ་ཡིག༢༤༧ཟབ་གསང་མཁའ་འགྲོའི་སྙིང་ཐིག་ལས༔ འཇམ་དཔལ་གཤིན་རྗེའི་གཤེད་ཀྱི་རྩ་དབང་རྡོ་རྗེའི་བུམ་བཅུད་བཞུགས་སོ༔ ༠༠༠༠བརྡ་ཡིག༢༤༨ན་མོ་གུ་རུ་པདྨ་ཀ་ར་ཡེ༔ ༠༠༠༠བརྡ་ཡིག༢༤༨མ་འོངས་ལས་ཅན་སྐལ་བ་རུ༔ ཐབས་མཆོག་མྱུར་ལམ་ཟབ་མོའི་ཆོས༔ འཇམ་དཔལ་གཤིན་རྗེའི་སྒྲུབ་ཐབས་བསྟན༔ དེ་ཡི་སྙིང་པོ་རྩ་བའི་དབང་༔ ཚུལ་བཞིན་བསྐུལ་བའི་རིམ་པ་ནི༔ དབང་དང་ལྡན་བའི་བླ་མ་ཡིས༔ དཀྱིལ་འཁོར་བསྙེན་སྒྲུབ་རྟགས་རྫོགས་ནས༔ སྣོད་ལྡན་བུ་ལ་བསྐུར་བར་བྱ༔ ཁྲུས་བྱ་བགེགས་བསྐྲད་སྲུང་འཁོར་བསྒོམ༔ སྐྱབས་སུ་འགྲོ་ཞིང་སེམས་བསྐྱེད་ནས༔ དང་པོ་ལོ་རྒྱུས་བཤད་པ་ནི༔ འོ༔ ནམ་མཁའ་དང་མཉམ་པའི་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ལ་དཀྲི་བར་བྱ༔ དེ་ཡི་ཆེད་དུ་འཇམ་དཔལ་གཤིན་རྗེའི་གཤེད་ཀྱི་དབང་ཟབ་མོ་བསྐུར་བ་ལ་འདིའི་ལོ་རྒྱུས་ནི༔ སྔོན་ཚེ་འདས་པའི་དུས་སུ་རི་རབ་ཆེན་པོའི་ཁོང་གསེང་དུ་རྒྱ་མཚོ་ཆེན་པོའི་རླབས་དང་མེ་འབར་རྡོ་ཡི་ཚ་དབལ་འཐབ་པ་ལས་སྐྱེས་པའི་ལས་ཀྱི་གཤིན་རྗེ་ནག་པོ་ཟས་སུ་ཤ་དང་སྐོམ་དུ་ཁྲག་ལ་མི་ཚིམ་པ༔ ལས་སུ་སྐྱེ་འགྲོའི་སྲོག་དབུགས་ལེན་པ་སྣང་སྲིད་ལྷ་འདྲེ་དང་ལྷ་སྲིན་དྲེགས་པ་ཅན་ཐམས་ཅད་བྲན་དང་ལས་ལ་བཀོལ་བ་གང་གིས་ཀྱང་མི་ཐུལ་བ་བྱུང་ཚེ༔ ཕྱོགས་བཅུ་དུས་གསུམ་གྱི་རྒྱལ་བ་ཐམས་ཅད་ཀྱི་ཞལ་བསྡུར་དགོངས་པ་བསྡུར་ཏེ་འཇམ་དཔལ་ཡ་མཱནྟ་ཀར་སྤྲུལ་ནས་ལས་ཀྱི་གཤིན་རྗེ་འཆི་བདུད་ནག་པོ་སྒྲོལ་བའི་དབང་བསྐུར་མངའ་གསོལ་ཏེ་མངགས་པས་འཆི་བདག་ལས་ཀྱི་གཤིན་རྗེ་དེ་དབང་དུ་བསྡུས༔ སྲོག་སྙིང་འཕྲོག༔ ནུས་མཐུ་བཅོམ༔ བྲན་དུ་བཀོལ༔ འཁོར་སྣང་སྲིད་ལྷ་སྲིན་དྲེགས་པ་ཅན་ཐམས་ཅད་བཅོམ་ནས་སངས་རྒྱས་ཀྱི་བསྟན་པ་སྲུང་བར་བཀའ་བསྒོས༔ གཉེར་གཏད༔ དམ་ཚིག་གཉན་པོའི་སྲོག་གཏད་པ་ཡིན་པས༔ འཇམ་དཔལ་གཤིན་རྗེ་གཤེད་པོའི་བཀའ་དང་དམ་འོག་ཏུ་མ་འདུས་པ་གཅིག་ཀྱང་མེད་པས་འདི་ཡི་དབང་ཐོབ་ནས་འཆི་བདག་གཤིན་རྗེ་ནག་པོ་ལ་སོགས་སྣང་སྲིད་ཀྱི་ལྷ་འདྲེ་ཐམས་ཅད་ཀྱི་ཕྱོགས་ལས་རྣམ་པར་རྒྱལ་བར་གདོན་མི་ཟའོ༔ ཕྱོགས་བཅུའི་རྒྱལ་བ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་ལ་ལོངས་སྤྱོད་པའི་སྐལ་བ་ཐོབ་པ་ཡིན་ཏེ༔ དཔལ་ཨོ་རྒྱན་གྱི་མཁན་པོ་པདྨ་འབྱུང་གནས་བདག་གིས་བཀའ་ལུང་དགོངས་བཅུད་ཐམས་ཅད་བསྡུས་ནས་ལྔ་བརྒྱ་སྙིགས་མའི་འགྲོ་བ་རྣམས་ལ་བརྩེ་བ་ཆེན་པོའི་སྒོ་ནས་གཏེར་དུ་སྦོས༔ བཀའ་སྲུང་གཟའ་བདུད་ནག་པོ་དང་གནོད་སྦྱིན་ཤན་པ་དབང་དྲག་གི་རྒྱལ་པོ་གཉིས་ལ་བཀའ་འདི་གཏད་དོ་གཉེར་རོ་བཀའ་དང་ཐ་ཚིག་གཉན་པོའི་དམ་རྒྱའོ༔ མ་འོངས་སྙིགས་མའི་དུས་སུ་པད་འབྱུང་དངོས་སུ་བྱོན་པ་སྦས་པའི་རྣལ་འབྱོར་ཁྲག་འཐུང་བདུད་འཇོམས་རྡོ་རྗེ་གྲོ་ལོད་རྩལ་ལ་སྤྲོད་ཅིག༔ ས་མ་ཡ༔ གསང་སྔགས་ཟབ་མོའི་དབང་ཞུ་བ་ལ་གསོལ་བ་འདེབས་པ་འདིའི་རྗེས་ཟློས་མཛོད༔ ཀྱེ༔ དུས་གསུམ་སངས་རྒྱས་འདུས་པའི་སྐུ༔ བླ་མ་མགོན་པོ་དགོངས་སུ་གསོལ༔ བདག་ཅག་སྐལ་ལྡན་སློབ་བུ་ལ༔ འཇམ་དཔལ་ཡ་མཱནྟ་ཀ་ཡི༔ རྩ་དབང་ཡོངས་རྫོགས་བསྐུར་དུ་གསོལ༔ ལན་གསུམ་ཞུ༔ ཧོཿདད་དམ་ནོར་ལྡན་སློབ་བུ་ལ༔ གསང་སྔགས་ཟབ་མོའི་དཀྱིལ་འཁོར་དུ༔ དབང་གིས་སྨིན་ཅིང་གྲོལ་བར་བགྱི༔ དཀྱིལ་འཁོར་ལྷ་ཚོགས་དགོངས་སུ་གསོལ༔ འགྲོ་འདི་རྗེས་སུ་བཟུང་དུ་གསོལ༔ དེ་ནས་དམ་ཆུ་སྦྱིན་པ་ནི༔ ཧོཿདམ་ཚིག་ཆེན་པོ་མནའ་ཡི་ཆུ༔ སྐལ་ལྡན་ཁྱོད་ཀྱི་ལྕེ་ལ་བཞག༔ གསང་སྔགས་རིག་སྔགས་གཟུངས་སྔགས་དང་༔ སྙིང་པོ་སྔགས་ཀྱི་བདེན་སྟོབས་ཀྱིས༔ དམ་ཚིག་གཉན་གྱི་སྲོག་ཐོབ་ཤོག༔ སྲུངས་ཤིག་སོམས་ཤིག་དམ་ལ་འདུས༔ བཛྲ་ས་མ་ཡ༔ དེ་ནས་སློབ་མ་ལྷར་བསྐྱེད་དེ༔ ཡེ་ཤེས་དབབ་བསྟིམ་བརྟན་བཞུགས་ནས༔ བུམ་དབང་ཟབ་མོ་བསྐུར་བ་ནི༔ ཧཱུྃ༔ བུམ་པ་ལྷ་ཡི་གཞལ་ཡས་ཁང་༔ བསྐྱེད་རིམ་ལྷ་རྣམས་ཡོངས་སུ་རྫོགས༔ སྐལ་ལྡན་ཁྱོད་ལ་དབང་བསྐུར་རོ༔ འཇམ་དཔལ་ཡ་མཱནྟ་ཀ་ཡི༔ བསྐྱེད་པ་སྐུ་ཡི་དབང་ཐོབ་ཤོག༔ རྩ་སྔགས༔ ཀཱ་ཡ་ཨ་བྷི་ཥིཉྩ་ཨོཾ༔ ཨོཾ༔ སྐུ་ཡི་དཀྱིལ་འཁོར་གཤིན་རྗེའི་གཤེད༔ ཨཱཿགསུང་གསང་ཀླུ་བདུད་རྡོ་རྗེའི་སྐུ༔ ཧཱུྃ༔ ཐུགས་གསང་རྡོ་རྗེ་བདུད་འདུལ་བ༔ སྭཱ༔ ཡོན་ཏན་ཡཀྴ་མེ་དབལ་སྐུ༔ ཧཱ༔ ཕྲིན་ལས་ཚེ་བདག་ནག་པོར་ཤར༔ ཛཿསྙིང་རྗེའི་རང་གཟུགས་ལྕགས་ཀྱུ་མ༔ ཧཱུྃ༔ བྱམས་པའི་རང་གཟུགས་ཞགས་པ་མ༔ བཾ༔ དགའ་བའི་རང་གཟུགས་ལྕགས་སྒྲོག་མ༔ ཧོཿབཏང་སྙོམས་རང་གཟུགས་དྲིལ་བུ་མ༔ གཅིག་ལས་གཉིས་པ་རེ་འཕྲོས་པས༔ སློབ་མའི་ལུས་ལ་ཐིམ་པ་ཡིས༔ ལུས་སྒྲིབ་ཀུན་དག་བུམ་དབང་ཐོབ༔ སྤྲུལ་པའི་སྐུ་རུ་མངོན་གྱུར་ནས༔ རྣམ་སྨིན་རིག་འཛིན་མཆོག་ཐོབ་ཤོག༔ རྩ་སྔགས༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་གསང་དབང་ནི༔ བྷནྡྷ་བདུད་རྩི་ཐོགས་ལ༔ ཧོཿཡེ་ཤེས་དབྱིངས་ཀྱི་བྷནྡྷ་རུ༔ གསུང་གསང་འདུས་པའི་བདུད་རྩི་འཁྱིལ༔ སྐལ་ལྡན་ཁྱོད་ཀྱི་ངག་ཏུ་བླུད༔ གསུང་གི་དབང་མཆོག་ཡོངས་ཐོབ་ཤོག༔ རྩ་སྔགས༔ ཝཱཀ་ཨ་བྷི་ཥིཉྩ་ཨོཾ༔ དེ་ནས་ཕྲེང་བ་སྔགས་བཅས་གཏད༔ ཧཱུྃ༔ སྔགས་ཀྱི་འཁོར་ལོ་གསུང་གསང་རྫོགས༔ སྔགས་ཀྱི་འདྲེན་ཕྲེང་གསུང་དབང་འདུས༔ སྐལ་ལྡན་ཁྱོད་ལ་གཏད་པ་ཡིས༔ འོད་དམར་ཨཱཿམཚན་མགྲིན་པར་ཐིམ༔ ངག་སྒྲིབ་དག་ནས་གསང་དབང་ཐོབ༔ ལོངས་སྤྱོད་རྫོགས་སྐུར་མངོན་གྱུར་ནས༔ ཚེ་དབང་རིག་འཛིན་ཉིད་ཐོབ་ཤོག༔ རྩ་སྔགས༔ ཝཱཀཱ་ཨ་བྷི་ཥིཉྩ་ཨཱཿརལ་གྲི་ཐོགས་ལ༔ ཧཱུྃ༔ ཤེས་རབ་རལ་གྲིའི་ཐུགས་གསང་རྫོགས༔ སྐལ་ལྡན་བུ་ལ་དབང་བསྐུར་རོ༔ འཇམ་དཔལ་ཡ་མཱནྟ་ཀ་ཡི༔ ཐུགས་དབང་ཡོངས་སུ་རྫོགས་ཐོབ་ཤོག༔ རྩ་སྔགས༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་ཕུར་པ་ཐུན་མཚོན་གཏད་ལ༔ ཧཱུྃ༔ ཕུར་བ་ཁམས་གསུམ་སྒྲོལ་བའི་དབལ༔ ཐུན་མཚོན་མེ་ཧོམ་ལས་བྱེད་དབང་༔ རྒྱལ་བ་ཐུགས་ཀྱི་དབང་རྣམས་རྫོགས༔ སྐལ་ལྡན་བུ་ལ་དབང་བསྐུར་བས༔ ཐུགས་དབང་ཡོངས་སུ་རྫོགས་ཐོབ་ཅིང་༔ ཁམས་གསུམ་ཡོངས་སྒྲོལ་མཐུ་ཐོབ་ཤོག༔ རྩ་སྔགས༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་ཧཱུྃ་མཱུཾ་གཏད་ལ༔ ཧཱུྃ༔ འོད་མཐིང་ཧཱུྃ་མཱུྃ་མཚན་པ་ཅན༔ རྒྱལ་བ་རྒྱ་མཚོ་ཐུགས་དབང་བཅུད༔ སློབ་མའི་སྙིང་གར་ཐིམ་གྱུར་ནས༔ ཡིད་སྒྲིབ་དག་ནས་ཤེར་དབང་ཐོབ༔ ཆོས་ཀྱི་སྐུ་རུ་མངོན་འཕོས་ཏེ༔ ཕྱག་རྒྱའི་རིག་འཛིན་ཉེར་ཐོབ་ཤོག༔ རྩ་སྔགས༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་ཐིག་ལེ་གཏད་ལ༔ ཧཱུྃ༔ གཞི་དབྱིངས་ཀ་དག་ཐིག་ལེ་འདི༔ འཇམ་དཔལ་ཡེ་ཤེས་དཀྱིལ་འཁོར་ཏེ༔ སྐལ་ལྡན་ཁྱོད་ཀྱི་སྙིང་གར་ཐིམ༔ ཡེ་ཤེས་ཁྱོད་ཀྱི་སེམས་ལ་འཕོས༔ ཁྱོད་སེམས་ཆོས་སྐུའི་ཀློང་དུ་འཕོས༔ རིག་པ་རྩལ་གྱི་དབང་ཆེན་ཐོབ༔ ལྷུན་གྲུབ་རིག་འཛིན་བདེ་ཆེན་ངང་༔ དབྱེར་མེད་འདྲེས་ཏེ་བུམ་སྐུར་གྲོལ༔ ཕྱིར་མི་ལྡོག་པའི་རྒྱས་གདབ་བོ༔ ཨ་ཨ་ཨ་ཕཊ༔ དེ་ནས་བཀྲ་ཤིས་རྫས་བརྒྱད་གཏད་ལ༔ ཧཱུྃ༔ བཀྲ་ཤིས་རྫས་བརྒྱད་ལོངས་སྤྱོད་མཆོག༔ མཚན་དཔེའི་ཁྱད་ཆོས་བཀྲ་ཤིས་རྟགས༔ ལོངས་སྤྱོད་རྨད་བྱུང་རྒྱལ་པོའི་སྲིད༔ སྐལ་ལྡན་ཁྱོད་ལ་གཏད་ཅིང་སྦྱིན༔ རྣམ་མཁྱེན་རྫོགས་པའི་སངས་རྒྱས་ཀྱི༔ གོ་འཕང་མཆོག་ལ་དབང་ཐོབ་ཤོག༔ མངྒ་ལཾ་མ་ཎི་རཏྣ་ཨ་བྷི་ཥིཉྩ་མཾ༔ མཐར་ནི་གཏང་རག་ཚོགས་འཁོར་བསྐོར༔ བསྔོ་སྨོན་ཟབ་མོས་རྒྱས་གདབ་བྱ༔ འདི་ཐོབ་དམ་ཚིག་གཉན་སྲུང་ཞིང་༔ ཉམས་སུ་ལེན་པའི་སྐལ་ལྡན་བུ༔ བདུད་དང་བགེགས་ལས་རྣམ་རྒྱལ་ཞིང་༔ ལྷ་སྲིན་སྡེ་བརྒྱད་བྲན་དུ་ཁོལ༔ ལས་ཀྱི་གཤིན་རྗེས་ཕྲིན་ལས་སྒྲུབ༔ འདོད་དོན་ཡིད་བཞིན་འགྲུབ་གྱུར་ནས༔ ཚེ་འདིར་རིག་འཛིན་ས་ཐོབ་འགྱུར༔ པདྨ་འབྱུང་གནས་རྡོ་རྗེའི་ཚིག༔ བཀའ་སྲུང་གནོད་སྦྱིན་གཟའ་གཤིན་རྗེས༔ སྲུང་ལ་བརྒྱུད་འཛིན་འདོད་དོན་སྒྲུབ༔ དགྲ་བགེགས་གདུག་པའི་སྙིང་ཁྲག་རོལ༔ ས་མ་ཡ༔ སྐུའི་རྒྱ༔ གསུང་གི་རྒྱ༔ ཐུགས་ཀྱི་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱཿབརྡ་ཐིམ༔ ཨྠིྀ༔ ཞེས་པ་འདི་ཡང་ཁྲག་འཐུང་རྡོ་རྗེ་གྲོ་ལོད་བདུད་འཇོམས་རོལ་པ་རྩལ་གྱིས་གསེར་སྨད་རྔ་ལ་སྟག་རྩེའི་གཡས་ལོགས་ཤྭ་བྲག་རྡོ་རྗེ་ནས་བཏོན་ཏེ་མི་ལོ་བཅོ་ལྔའི་བར་དུ་བཀའ་རྒྱ་བྱས་ཏེ་མཐར་སྨར་མདོ་བཀྲ་ཤིས་དགའ་འཁྱིལ་དུ་དག་པར་ཕབ་པའི་ཡི་གེ་པ་ནི་ཀུན་བཟང་དགའ་རབ་བོ།།དགེའོ།།དགེའོ།།དགེའོ།།།།