DJYD-KABUM-07-JA-010

Previous Text Back to Volume Page Next Text

Wylie title
Location	bdud 'joms rin po che bka' 'bum Volume 7, Text 10, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. '*. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 7: . Kalimpong: Dupjung Lama, 1979-1985.*
Side notes
More details More details
Tertön	བདུད་འདུལ་རྡོ་རྗེ་ (bdud 'dul rdo rje)
Genre
Cycle	བཀའ་རྫོགས་པ་ཆེན་པོའི་དམ་ཆོས་དགོངས་པ་ཡོངས་འདུས་ (bka' rdzogs pa chen po'i dam chos dgongs pa yongs 'dus)

[edit]

（1ན）（དམ་ཆོས་དགོངས་པ་ཡོངས་འདུས་ཀྱི་བརྒྱུད་པའི་གསོལ་འདེབས་དབང་བྱིན་ཆར་འབེབས་ཞེས་བྱ་བ་བཞུགས་སོ། །）ཁྱབ་བདག་སྟོན་པ་ཀུན་བཟང་སྣང་མཐའ་ཡས། །བརྩེ་ཆེན་ཐུགས་རྗེའི་གཏེར་མངའ་ནམ་མཁའི་རྒྱལ། །རབ་འབྱམས་རྒྱལ་ཀུན་སྤྱི་གཟུགས་པདྨ་འབྱུང་། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །བདེ་ཆེན་ངྷཱ་ཀིའི་གཙོ་མོ་མཚོ་རྒྱལ་ཡུམ། །ཆོས་ཀྱི་རྒྱལ་པོ་འཇམ་མགོན་ཁྲི་ལྡེའི་ཞབས། །ངོ་མཚར་གདམས་པའི་མཛོད་འཛིན་འབྲོག་བན་རྫེ། །གསོལ་བ་འདེབས་སོ༴ །ཟབ་གཏེར་རྒྱ་མཚོའི་ཤིང་རྟ་བདུད་འདུལ་གླིང་། །རྒྱལ་བའི་སྲས་པོ་རྡོ་རྗེ་མཐོང་གྲོལ་རྩལ། །ངེས་དོན་བསྟན་པའི་ཉི་མ་འཆི་མེད་མཚན། །གསོལ་བ༴ །གར་གྱི་དབང་ཕྱུག་ཕྲིན་ལས་ནོར་བུའི་སྡེ། །མཆོག་དངོས་གྲུབ་པ་ཆོས་ཀྱི་རྒྱ་མཚོའི་དཔལ། །འགྲོ་འདུལ་རིག་འཛིན་སྐལ་བཟང་རྡོ་རྗེ་ལ། །གསོལ་བ༴ །སྙིང་པོའི་སྲོལ་འཆང་བསྟན་འཛིན་འཕེལ་རྒྱས་མཆོག །རིགས་ཀུན་བདག་ཉིད་སངས་རྒྱས་རྡོ་རྗེའི་ཞབས། །བཀའ་དྲིན་མཉམ་མེད་རྩ་བའི་བླ་མ་ལ། །གསོལ་བ༴ བྱིན་རླབས་ཆར་（1བ）འབེབས་རིག་འཛིན་བླ་མའི་ཚོགས། །དངོས་གྲུབ་མཆོག་སྩོལ་ཡི་དམ་དཀྱིལ་འཁོར་ལྷ། །ཕྲིན་ལས་མྱུར་མགྱོགས་མཁའ་འགྲོ་ཆོས་སྐྱོང་ལ། །གསོལ་བ༴ རྨད་བྱུང་གསང་ཆེན་མཆོག་གི་དཀྱིལ་འཁོར་དུ། །དབང་བཞིས་ཡོངས་སྨིན་རྣམ་དག་དམ་ཚིག་ལྡན། །ཀུན་རྫོབ་སྣང་ཞེན་སྦྱོང་བ་བསྐྱེད་རིམ་གྱིས། །དག་སྣང་ཡེ་ཤེས་འཁོར་ལོར་འཆར་བར་ཤོག །དོན་དམ་འགྱུར་བ་མེད་དངོས་ལྷན་ཅིག་སྐྱེས། །དེ་བཞིན་ཉིད་སྟོན་ཟབ་མོ་རྫོགས་པའི་རིམ། །གནས་ལུགས་ཀ་དག་ལྷུན་གྲུབ་དོན་རྟོགས་ནས། །ཆོས་ཟད་བློ་འདས་དགོངས་པ་མངོན་འགྱུར་ཤོག །གནས་སྐབས་ལམ་གྱི་འགལ་རྐྱེན་ཀུན་ཞི་ཞིང་། །མཐུན་རྐྱེན་ལེགས་ཚོགས་ཆོས་བཞིན་ཡོངས་འབྱོར་ནས། །དོན་གཉིས་ལྷུན་གྲུབ་ཕན་བདེའི་སྣང་བ་ཡིས། །ཞིང་ཁམས་ཀུན་ཏུ་ཁྱབ་པའི་བཀྲ་ཤིས་སྩོལ། །（ཅེས་པའང་རྩ་གསུམ་ལས་བྱང་རིག་པ་འཛིན་པའི་དགོངས་རྒྱན་དང་འབྲེལ་བར་འཇུག་པ་བདེ་བའི་ཡན་ལག་ཏུ་འཇིགས་བྲལ་ཡེ་ཤེས་རྡོ་རྗེས་སྦྱར་བ་སིངྔྷི་རསྟུ།། །།）