DJYD-KABUM-08-NYA-010

Previous Text Back to Volume Page Next Text

Wylie title
Location	bdud 'joms rin po che bka' 'bum Volume 8, Text 10, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. '*. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 8: . Kalimpong: Dupjung Lama, 1979-1985.*
Side notes
More details More details
Tertön	བདུད་འདུལ་རྡོ་རྗེ་ (bdud 'dul rdo rje)
Genre
Cycle	དམ་ཆོས་སྤྲུལ་སྐུ་སྙིང་ཐིག་ (dam chos sprul sku snying thig)
Deity	sgrol dkar yid bzhin 'khor lo

[edit]

༄༅། །དམ་ཆོས་སྤྲུལ་སྐུའི་སྙིང་ཐིག་ལས། སྒྲོལ་དཀར་ཡིད་བཞིན་འཁོར་ལོ་སྦྱིན་མའི་སྒྲུབ་ཐབས་ཁྲིགས་སུ་བསྡེབས་པ་འཆི་མེད་བདུད་རྩིའི་བུམ་བཟང་ཞེས་བྱ་བར་བཞུགས་སོ།། །།

(1བ) ཨོཾ་སྭསྟི། མཛེས་སྐུ་ཟླ་ཤེལ་གཞོན་ནུའི་འཁྲི་ཤིང་ལས། །ཚེ་དབང་བདུད་རྩིའི་དོ་ཤལ་འབུམ་འཛག་པས། །འཆི་བདག་མུན་དཔུང་མཐར་བྱས་དགེ་ལེགས་ཀྱི། །ཀུནྡའི་ལང་ཚོ་སྤེལ་དེས་ཤིས་པ་སྩོལ། །འཆི་མེད་རིག་འཛིན་གྲུབ་པའི་ཐུགས་ཀྱི་བཅུད། །ངོ་མཚར་འཕགས་མའི་སྒྲུབ་ཐབས་བདུད་རྩིའི་རྒྱུན། །སྐལ་བཟང་མི་ཤིགས་དྭངས་མའི་སྲོག་བསྒྲུབ་ཕྱིར། །ལེགས་བཤད་བུམ་བཟང་བཅུད་དུ་འདི་ན་ལེན། །（དེའང་ཚེ་དང་ཡེ་ཤེས་ཀྱི་དངོས་གྲུབ་མྱུར་དུ་སྩོལ་བ་ལ་ལྷ་གཞན་གང་གིས་ཀྱང་བསྐྲུན་དུ་མེད་པ་འཆི་མེད་འཕགས་མའི་རྣལ་འབྱོར་ཟབ་མོ་ཉམས་སུ་ལེན་པར་འདོད་པས། སྦྱོར་བ་གནས་དབེན་ཅིང་གཙང་ལ་ཡིད་དུ་འོང་བར། དུས་ཉི་མ་བྱང་(2ན)བགྲོད་ཀྱི་ཟླ་བའི་ཡར་ངོའི་ཚེས་བརྒྱད་དམ་མར་ངོའི་ཚེས་བཅུ་སོགས་གཟའ་སྐར་བཟང་པོའི་སྔ་དྲོའི་ཆར། བཀྲ་ཤིས་པའི་ས་ལ་མཎྜལ་གྲུ་བཞི་དབུས་སུ་པད་དཀར་འདབ་བརྒྱད་མུ་ཁྱུད་ལྔ་ལྡན་མཛེས་ཤིང་ཡིད་དུ་འོང་བར་བྲི། དེར་མཉྫིའི་སྟེང་རིན་པོ་ཆེའི་བུམ་པ་མཚན་ལྡན་དར་དཀར་པོའི་མགུལ་ཆིངས་ཅན་གྱི་ནང་གཏན་འཁྱིལ་མཚོའམ་རྒྱུན་འབབས་གངས་ཆུ་བུ་མོ་གཙང་མས་བླངས་པ་ལྔ་ཚན་ལྔའི་རྫས་ཀྱིས་བཀང་བའི་ཁ་རྒྱན་ལྗོན་ཤིང་འབྲས་བུ་ཅན་གྱིས་སྤྲས་པ་བཀོད། ཁ་རྒྱན་གྱི་གསེབ་བམ་ཕྱོགས་གང་བདེར་འཕགས་མའི་དམ་ཚིག་གི་སྐུ་རི་མོར་བྲིས་པའམ་འབུར་དུ་དོད་པ་བཤམ། དེའི་མདུན་དུ་གཏོར་མ། གཡས་སུ་ཚེ་རིལ། གཡོན་དུ་བདུད་རྩི། མཐར་མཆོད་པའི་བྱེ་བྲག་གིས་ལེགས་པར་བསྐོར། གལ་ཏེ་དེ་ཙམ་མ་ལྕོགས་ན། སྟེགས་བུ་རས་དཀར་གྱི་(2བ)ཁེབས་ལྡན་སྟེང་དུ། མཎྜལ་ལ་འབྲུ་དཀར་གྱི་ཚོམ་བུ་གཅིག་བཀོད་པའི་དབུས་སུ་བུམ་པ་གཏོར་མ་སྐུ་གཟུགས་གང་ཡང་རུང་བ་གཅིག་གི་མཐར་ཉེར་སྤྱོད་བཤམས་ཀྱང་འཐུས་ལ། སྤྱིར་བདག་བསྐྱེད་རྒྱུན་གྱི་རྣལ་འབྱོར་ཙམ་ལ་སྤྲོས་པ་མེད་པ་ཏིང་ངེ་འཛིན་ཁོ་ནས་ཀྱང་འགྲུབ་བོ། །དེ་ལྟར་སྟ་གོན་གྲུབ་ནས། གཞི་བདག་དང་འབྱུང་པོའི་ཚོགས་རྣམས་གཏོར་མས་བརྔན་ལ་སྲུང་འཁོར་ཟབ་མོ་བསྒོམ། དྲི་བཟང་གི་ཆུས་ཁྲུས་བྱས་ཤིང་བདེ་བའི་སྟན་ལ་དགའ་ཞིང་གུས་པའི་སེམས་ཀྱིས་འཁོད་དེ།） ན་མོ༔ ཀུན་བཟང་བཀའ་བརྒྱུད་སྣང་མཐའ་མན་ཆད་དང་༔ དྲིན་ཆེན་རྩ་བའི་བླ་མ་ཡན་ཆད་སོགས༔ གཏན་གྱི་རེ་ལྟོས་གྱུར་པའི་སྐྱབས་གནས་ལ༔ བདག་གཞན་གུས་པས་ཕྱག་འཚལ་སྐྱབས་སུ་མཆི༔ （ཞེས་ལན་གསུམ་གྱིས་སྐྱབས་སུ་འགྲོ།） མ་གྱུར་ནམ་མཁའི་མཐའ་ཁྱབ་སེམས་ཅན་རྣམས༔ དུས་མིན་འཆི་བ་མ་ལུས་བཟློག་པ་དང་༔ འགྲོ་དྲུག་སེམས་ཅན་སངས་རྒྱས་ཐོབ་བྱའི་ཕྱིར༔ བདག་ཉིད་བརྩེ་ལྡན་འཕགས་མ་སྒྲོལ་མ་ཡི༔ སྒྲུབ་ཐབས་ཟབ་མོ་ཉམས་སུ་ལེན་པར་བྱ༔ （ཞེས་ལན་གསུམ་གྱིས་སེམས་བསྐྱེད།） ཧོཿ འཕགས་མ་དཀོན་མཆོག་འཁོར་བཅས་ལ༔ རབ་ཏུ་དད་པས་ཕྱག་འཚལ་ལོ༔ དངོས་འབྱོར་ཡིད་སྤྲུལ་མཆོད་པ་འབུལ༔ ལས་དང་ཉོན་མོངས་ཅི་མཆིས་བཤགས༔ འགྲོ་དོན་མཛད་ལ་རྗེས་ཡི་རང་༔ (3ན)ཆོས་ཀྱི་འཁོར་ལོ་བསྐོར་བར་བསྐུལ༔ མྱ་ངན་མི་འདའ་བཞུགས་གསོལ་འདེབས༔ དགེ་བ་བསོད་ནམས་ཅི་བསགས་པ༔ འགྲོ་ཀུན་ཡོངས་ལ་བསྔོ་བར་བགྱི༔ （ཞེས་ཚོགས་བསགས།） མཆོད་རྫས་རྣམས་རཾ་ཡཾ་ཁཾ་（གིས་བསང་སྦྱངས།） སྟོང་པའི་ངང་ལས་གནས་ཁང་འོག་མིན་གཡུལ་ལོ་བཀོད་པའི་གཞལ་མེད་ཁང་ཕུན་སུམ་ཚོགས་པར་རིན་པོ་ཆེ་དང་པདྨ་ལ་སོགས་པའི་སྣོད་བཟང་ཞིང་རྒྱ་ཆེ་བ་རྣམས་སུ་ཕྱི་ནང་གསང་བའི་མཆོད་སྤྲིན་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བ་ནམ་མཁའ་མཛོད་ཀྱི་རང་བཞིན་རྒྱལ་བའི་ཞིང་ཐམས་ཅད་ཁྱབ་པར་གྱུར་པར་（བསམ་ལ།） ཨོཾ་བཛྲ་ཨརྒྷཾ་ཨཱ༔ ཧཱུྃ་（སོགས་ནས་）ཤཔྡའི་（བར་དང་། ནམ་མཁའ་མཛོད་ཀྱི་སྔགས་རྒྱ་ལན་གསུམ་གྱིས་བྱིན་བརླབ།）ཨོཾ་མ་ཧཱ་ཤཱུནྱ་ཛྙཱ་ན་བཛྲ་སྭབྷཱ་ཨཱཏྨ་ཀོ྅ཧཾ། བདག་སྣང་ཐམས་ཅད་མི་དམིགས་སྟོང་པའི་ངང་༔ སྟེང་འོག་ཕྱོགས་ཀུན་རིན་ཆེན་འབར་བའི་དལ༔ འོད་ཟེར་ལྔ་ལྡན་ཀུན་ནས་རབ་འཁྲུགས་པ༔ མི་ཤིགས་སྲ་བརྟན་གསེར་འཁོར་རྩིབས་སྟོང་གཏམས༔ དེ་དབུས་ནོར་བུ་ཆུ་ཤེལ་གཞལ་ཡས་ཁང་། །འདོད་ཡོན་ཕུན་ཚོགས་བདེ་བ་ཅན་གྱི་དབུས། །རང་སེམས་མ་འགས་སྟོང་པའི་རང་རྩལ་ལས༔ པད་དཀར་ཟླ་སྟེང་ཏཱྃ་ཡིག་དཀར་གསལ་(3བ)ནི༔ རིང་ཆ་ཚེག་དྲག་ཅན་ལས་ལྔ་ལྡན་གྱི༔ འོད་འཕྲོས་འཕགས་མཆོད་སེམས་ཅན་ལས་སྒྲིབ་སྦྱངས༔ ཚུར་འདུས་བདག་ཉིད་ཡིད་བཞིན་འཁོར་ལོ་ནི༔ སྐུ་མདོག་དཀར་པོ་ཞལ་གཅིག་ཕྱག་གཉིས་མ༔ ཕྱག་གཡས་པུས་སྟེང་མཆོག་སྦྱིན་ཕྱག་རྒྱ་ཅན༔ གཡོན་པ་ཨུཏྤལ་དཀར་པོའི་ཡུ་བ་ཉིད༔ མཐེབ་སྲིན་གྱིས་འཛིན་སྙན་གཡོན་མེ་ཏོག་རྒྱས༔ དཔྲལ་བ་ཕྱག་ཞབས་ཞི་བའི་སྤྱན་རས་མཚན༔ ཞབས་གཉིས་རྡོར་སྐྱིལ་བཅུ་དྲུག་ལང་ཚོ་ཅན༔ དབུ་སྐྲ་མཐོན་མཐིང་སེར་འབོལ་སྤྱི་བོར་བཅིངས༔ ཟར་བུ་འཕྱང་ཞིང་མེ་ཏོག་ཕྲེང་བས་སྤྲས༔ དར་ཟབ་ལི་ཁྲིའི་མདོག་ཅན་སྐུ་སྟོད་གསོལ༔ ལེ་བརྒན་དམ་པོའི་སྐུ་སྨད་ཤམ་ཐབས་ཅན༔ ཅོད་པན་ནམ་མཁའི་མདོག་ཅན་རླུང་གིས་གཡེང་༔ སྣ་ཚོགས་རིན་པོ་ཆེ་ཡིས་དབུ་བརྒྱན་ཅིང་༔ ཕྱག་གདུབ་ཞབས་གདུབ་རིན་ཆེན་དོ་ཤལ་མཛེས༔ འཇའ་ཟེར་སྣ་ལྔའི་ཀློང་དུ་འགྱིང་བག་ལྡན༔ ཙིཏྟ་པད་དམར་འདབ་བརྒྱད་ཁ་ཟུམ་པའི༔ ནང་དུ་གསེར་གྱི་རྡོ་རྗེ་རྒྱ་གྲམ་ལྟེར༔ ཕ་ལམ་ལས་གྲུབ་འཁོར་ལོ་རྩིབས་བརྒྱད་པ༔ མུ་ཁྱུད་དང་བཅས་ཟླ་བའི་མདོག་ཅན་དབུས༔ ཏཱྃ་ཡིག་དཀར་པོ་རིང་ཆ་(4ན)ཚེག་དྲག་བཅས༔ ཕྱི་རིམ་རྩིབས་བརྒྱད་གསང་སྔགས་འབྲུ་བརྒྱད་དང་༔ རྩིབས་འཁོར་མུ་ཁྱུད་སྔགས་ཕྲེང་སྤེལ་ཚིག་བསྐོར༔ རང་སྒྲ་དང་བཅས་གཡས་སུ་འཁོར་བར་གྱུར༔ ཨོྃ་ཏཱ་རེ་ཏུཏྟཱ་རེ་ཏུ་རེ་པུཎྱེ་པུཥྚིཾ་ཀུ་རུ་ཡེ་སྭཱཧཱ༔ ཏཱྃ་ཡིག་དཀར་པོས་འོད་འཕྲོས་པས༔ སྟོང་པའི་ངང་ལས་རང་མདུན་དལ༔ པད་དཀར་འདབ་སྟོང་ཟླ་བའི་སྟེང་༔ ཏཱྃ་ཡིག་ལས་བྱུང་ལྷ་མོ་ནི༔ ཡིད་བཞིན་འཁོར་ལོ་ཚེ་འཕེལ་མ༔ སྐུ་མདོག་གངས་རི་ཉི་ཤར་ལྟར༔ ཞལ་གཅིག་ཕྱག་གཉིས་འཛུམ་བཅས་བཞད༔ སྤྱན་དཀྱུས་རིང་ཞིང་ནུ་མ་འབུར༔ ཞབས་གཉིས་རྡོ་རྗེའི་སྐྱིལ་ཀྲུང་བཞུགས༔ དབུ་སྐྲ་རལ་པ་མཐོན་མཐིང་ཅན༔ ཕྱག་གཡས་མཆོག་སྦྱིན་པདྨ་དཀར༔ གཡོན་པས་མཉམ་བཞག་ཚེ་བུམ་འཛིན༔ ལོངས་སྤྱོད་རྒྱན་རྫོགས་གཟི་བྱིན་འབར༔ དབུ་གཙུག་འོད་དཔག་མེད་པས་མཚན༔ ཉ་རྒྱས་ཟླ་བའི་རྒྱབ་ཡོལ་མཛད༔ འཇའ་འོད་སྣ་ལྔའི་ཀློང་དཀྱིལ་བཞུགས༔ ཐུགས་ཀར་མན་ཤེལ་ལས་གྲུབ་པའི༔ སྣ་ཚོགས་རྡོ་རྗེ་ཟླ་བའི་སྟེང་༔ འཁོར་ལོ་རྩིབས་བརྒྱད་མུ་ཁྱུད་བཅས༔ དེ་དབུས་ཏཱྃ་ཡིག་དཀར་པོའི་མཐར༔ སྔགས་ཕྲེང་ཆོས་འཁོར་བསྐོར་བར་གསལ༔ གནས་གསུམ་ཟླ་བ་པད་ཉི་ལ༔ (4བ)ཨོྃ་དཀར་ཨཱ༔ དམར་ཧཱུྃ་མཐིང་མཚན༔ དེ་ལས་འོད་ཟེར་རབ་འཕྲོས་པས༔ ཕྱོགས་བཅུའི་ཞིང་ཁམས་རབ་འབྱམས་ནས༔ སངས་རྒྱས་དྲང་སྲོང་རིག་འཛིན་ཚོགས༔ སྒྲོལ་མ་ཉེར་གཅིག་སྐུར་བཞེངས་ནས༔ བདག་མདུན་ལ་ཐིམ་དབང་རྫོགས་གྱུར༔ （ཞེས་བདག་མདུན་དམ་ཚིག་པ་གསལ་བཏབ་ལ།） ཨོཾ༔ ཆོས་དབྱིངས་སྐྱེ་བ་མེད་པའི་ངང་ཉིད་ལས༔ པོ་ཏ་ལ་དང་གཡུ་ལོ་བཀོད་པའི་གནས༔ ཕྱོགས་བཅུའི་སངས་རྒྱས་རིག་འཛིན་གྲུབ་པའི་ཚོགས༔ ཚེ་དབང་རིག་འཛིན་ཚེ་ཡི་རིག་འཛིན་རྣམས༔ རྗེ་བཙུན་སྒྲོལ་མའི་རྣམ་པར་སྐུར་བཞེངས་ལ༔ ཐུགས་དམ་དབང་གིས་མ་ཐོགས་མྱུར་དུ་གཤེགས༔ ཐུགས་རྗེའི་དབང་གིས་གནས་འདིར་གཤེགས་ནས་ཀྱང་༔ བརྩེ་ལྡན་ལྷ་མོ་ཁྱོད་ལ་གསོལ་འདེབས་ཀྱིས༔ སྒྲུབ་མཆོག་བདག་ལ་ཚེ་དབང་དངོས་གྲུབ་སྩོལ༔ ཨོཾ་ཨཱ་རྱ་ཏཱ་རེ་བཛྲ་ས་མ་ཡ་ཛཿཛཿ（ཞེས་ཡེ་ཤེས་ཀྱི་འཁོར་ལོ་སྤྱན་དྲངས་པ།） པདྨ་ཀ་མ་ལཱ་ཡ་སྟྭཾ༔ （གྱིས་དབྱེར་མེད་དུ་བཞུགས་པར་མོས།） ཨཱརྱ་ཏཱ་རེ་ན་མོ་པུ་རུ་ཤཱ་ཡ་ཧོཿ（ས་ཕྱག་བྱ།） ཧཱུྃཿ སྟོང་གསུམ་འཇིག་རྟེན་ཕྱོགས་དུས་ཐམས་ཅད་དུ༔ ལྷ་རྫས་འདོད་ཡོན་མཆོད་པའི་བྱེ་བྲག་ནི༔ དངོས་སུ་འབྱོར་དང་ཡིད་ཀྱིས་ལེགས་སྤྲུལ་ཏེ༔ རྒྱལ་ཡུམ་འཕགས་མའི་ཚོགས་ལ་དབུལ་བར་བགྱི༔ འགྲོ་(5ན)ཀུན་ཚོགས་གཉིས་ཡོངས་སུ་སྨིན་པར་ཤོག༔ ཨོྃ་ཨཱ༔ ཧཱུྃ་ཏཏཱ་རེ་དེ་བ་ཌཱ་ཀི་ནཱི་བཛྲ་ཨརྒྷཾ་པཱ་དྱཾ་པུཥྤེ་དྷཱུཔེ་ཨཱ་ལོ་ཀེ་གནྡྷེ་ ནེཝིདྱཱ་ ཤཔྡ་ཧཱུཾ༔ （ཞེས་མཆོད།） ཨོཾ་དུས་གསུམ་རྒྱལ་བ་ཀུན་གྱི་ཡུམ༔ འཕགས་མ་སྒྲོལ་མ་སྒྲོལ་མཛད་ཡུམ༔ ཡིད་བཞིན་འཁོར་ལོ་ཚེ་འཕེལ་མ༔ ལྷ་མོ་ཁྱོད་ལ་རྟག་ཏུ་འདུད༔ འཁོར་བ་ལས་སྒྲོལ་ཏཱ་རེ་མ༔ ཏུཏྟཱ་ར་ཡིས་འཇིགས་བརྒྱད་སྒྲོལ༔ ཏུ་རེས་ནད་རྣམས་ཀུན་ལས་སྒྲོལ༔ སྒྲོལ་མ་ཡུམ་ལ་ཕྱག་འཚལ་བསྟོད༔ འཁོར་ལོ་དཀར་པོ་འོད་ཟེར་དཀར༔ རྩིབས་བརྒྱད་གསང་སྔགས་འབྲུ་བརྒྱད་པོ༔ ཡོངས་སུ་བསྐོར་བའི་རྣམ་པ་ཅན༔ འཁོར་ལོ་ཅན་ལ་ཕྱག་འཚལ་བསྟོད༔ པད་དཀར་ཟླ་བའི་གདན་སྟེང་དུ༔ མཉམ་ཉིད་རྡོ་རྗེའི་སྐྱིལ་ཀྲུང་བཞུགས༔ ལོངས་སྤྱོད་རྒྱན་རྣམས་མ་ལུས་རྫོགས༔ མཆོག་སྦྱིན་མཛད་ལ་ཕྱག་འཚལ་བསྟོད༔ སྟོན་ཀའི་ཟླ་བའི་མདོག་འདྲ་ཞིང་༔ ཉི་མ་འབུམ་ལས་གཟི་མདངས་ཆེ༔ ཟླ་བ་དག་ལ་རྒྱབ་ཡོལ་མཛད༔ རིན་ཆེན་རྒྱན་གྱིས་རྣམ་པར་སྤྲས༔ འཇའ་ཟེར་སྣ་ལྔའི་ཀློང་དུ་བཞུགས༔ ཚེ་བུམ་ཨུཏྤལ་འཛིན་ཕྱག་འཚལ༔ བརྩེ་ལྡན་ལྷ་མོ་ཚེ་དབང་མྱུར་སྩོལ་མ༔ བདག་ཉིད་རྩེ་གཅིག་གུས་པས་ཁྱེད་བསྒྲུབ་ཀྱིས༔ ནད་གདོན་སྡིག་(5བ)སྒྲིབ་བཀྲ་མི་ཤིས་ཀུན་དང་༔ མི་དང་མི་མིན་འགལ་རྐྱེན་ཉེར་འཚེ་སོགས༔ གློ་བུར་བརྒྱད་དུ་ཚེ་ཡི་བར་ཆད་ཀུན༔ བརྩེ་ལྡན་ལྷ་མོ་ཁྱེད་ཀྱིས་ཞི་བར་མཛོད༔ འཆི་མེད་ཚེ་ཡི་དངོས་གྲུབ་སྩལ་དུ་གསོལ༔ （ཅེས་བསྟོད་ཅིང་གསོལ་བ་གདབ།） ཐུགས་ཀའི་སྔགས་ཕྲེང་གཡས་སུ་འཁོར་བ་ལས༔ འོད་ཟེར་ཁ་དོག་ལྔ་ལྡན་རབ་འཕྲོས་པས༔ མདུན་བསྐྱེད་ལྷ་མོའི་རྒྱུད་བསྐུལ་སྔགས་ཕྲེང་བསྐོར༔ དེ་ལས་འོད་ཟེར་ནམ་མཁའ་གང་བར་འཕྲོས༔ ཕྱོགས་བཅུའི་སངས་རྒྱས་དྲང་སྲོང་རིག་པ་འཛིན༔ སར་གནས་བྱང་སེམས་འཇིག་རྟེན་བརྟན་གཡོ་ཡི༔ ཚེ་བཅུད་ནུས་སྟོབས་མ་ལུས་ཐམས་ཅད་ཀུན༔ ཡི་གེ་ཨ་ནྲྀ་ཏཱཾ་གསུམ་རྣམ་པ་རུ༔ སྟོང་ཁམས་མ་ལུས་ཐེམ་མེར་རབ་ཁེངས་ནས༔ མདུན་བསྐྱེད་ལ་ཐིམ་སྟོབས་དང་གཟི་བརྗིད་འབར༔ ཐུགས་ཀྱི་བདུད་རྩི་ལྔ་ལྡན་འོད་ཟེར་རྒྱུན༔ བར་མ་ཆད་པར་བདག་ཉིད་ཐུགས་ཀར་ཐིམ༔ ནད་གདོན་སྡིག་སྒྲིབ་བར་ཆད་ཀུན་ཞི་ཞིང་༔ ཚེ་བསོད་དཔལ་འབྱོར་སྙན་གྲགས་མངའ་ཐང་རྒྱས༔ རང་ལུས་འོད་ཕུར་གཟི་བརྗིད་མདངས་དང་ལྡན༔ འཆི་མེད་ཚེ་ཡི་རིག་འཛིན་བརྙེས་པར་གྱུར༔ （ཅེས་པའི་དོན་ནན་ཏན་དུ་བསྒོམ་བཞིན་པས། ཨོྃ་ཏཱ་རེ་ཏུཏྟཱ་རེ་ཏུ་རེ་པུཎྱེ་པུཎྱེ་པུཥྚིཾ་ཨ་ཡུཿཔུཥྚིཾ་ཀུ་རུ་ཡེ་སྭཱ་ཧཱཿ ཞེས་བཟླས་པའི་(6ན)སྐྱོན་ཐམས་ཅད་སྤངས་ལ་གཙོ་བོར་བཟླ་ཞིང་། སྐབས་སུ།） ཨོྃ་ཨཱརྱ་ཏཱ་རེ་ཏུཏྟཱ་རེ་ཨཱ་ཡུར་ཛྙཱ་ན་སིདྡྷི་ཕ་ལ་ཧཱུཾ༔ （ཞེས་པའང་ཅུང་ཟད་རེ་བཟླ། ཐུན་གྱི་མཐར་མདུན་བསྐྱེད་སྒྲུབ་རྟེན་ལ་དམིགས་ཏེ།） ཧཱུྃ། ཆོས་ཀྱི་དབྱིངས་ལ་གཤེགས་བཞུགས་མི་མངའ་ཡང༔ མཁྱེན་བརྩེ་ཐུགས་རྗེ་རོལ་པའི་ཕྱག་རྒྱ་སྔགས༔ ལྷམ་མེར་རྟག་ཏུ་གསལ་མཛད་བརྟན་པར་བཞུགས༔ བདེ་ལེགས་ཡིད་བཞིན་འབྱུང་བའི་བཀྲ་ཤིས་ཤོག༔ ཨོཾ་སུ་པྲ་ཏིཥྛ་བཛྲ་ཡེ་སྭཱཧཱ༔ （ཞེས་མེ་ཏོག་འཐོར་ལ་བརྟན་བཞུགས་བྱ།） བདག་བསྐྱེད་ཀྱི་རྣལ་འབྱོར། ཧཱུྃ༔ ཆོས་རྣམས་གཞི་མེད་རྩ་བ་བྲལ༔ རིག་སྟོང་ཡེ་ཤེས་སྙིང་པོ་ཅན༔ སྤྲོ་དང་བསྡུ་བར་མི་དམིགས་ཀྱང་༔ ཀུན་རྟོག་སྦྱངས་ཕྱིར་དབྱིངས་སུ་མུཾ༔ （ཞེས་ལྟ་བ་རྒྱུན་གྱི་ཏིང་ངེ་འཛིན་ལ་གནས་ཤིང་ཐུན་མཚམས་ཁྱེར་སོ་གསུམ་གྱི་རྣལ་འབྱོར་ལམ་དུ་བསླང་།） དགེ་འདིས་བདག་གི་ཚོགས་གཉིས་རྫོགས། །མྱུར་དུ་སྒྲོལ་མའི་ས་མཆོག་བརྙེས། །འགྲོ་ཀུན་སྒྲིབ་པ་གཉིས་སྤངས་ཏེ། །འཆི་མེད་རིག་འཛིན་ཐོབ་པར་ཤོག །（ཅེས་རིམ་གཉིས་དགེ་བ་འགྲོ་ལ་བསྔོ་བས་རྒྱས་གདབ། མེ་ཏོག་གི་ཆར་དབབ་ལ།） རང་བྱུང་འཆི་མེད་ལྷ་མོ་རྡོ་རྗེའི་སྐུ༔ ཐུགས་རྗེ་ཐོགས་པ་མེད་པའི་བྱིན་རླབས་མཐུས༔ དུས་གསུམ་རྒྱལ་བའི་ཚེ་དཔལ་རྡོ་རྗེའི་སྲོག༔ སྐལ་ལྡན་བདག་(6བ)ལ་རྫོགས་པའི་བཀྲ་ཤིས་ཤོག༔ （ཅེས་ཤིས་པ་བརྗོད་པས་བདེ་ལེགས་སུ་བྱའོ། །ཐུན་མཚམས་སུ་གཏོར་མ་འབུལ་བར་འདོད་ན། དཀར་གསུམ་གཙོ་བོར་བྱས་པའི་ཟླུམ་གཏོར་མར་ཁུས་བྱུག་པ་ལ་མཐེབ་ཀྱུས་བསྐོར་བ་སྣོད་གཙང་མར་བཤམས་ནས་ཆང་ངམ་ཆུས་བྲན་ཏེ།） རྃ་ཡྃ་ཁྃ་（གིས་མ་དག་པ་ཐམས་ཅད་བསང་སྦྱངས།） ཨོཾ་ཨཱ༔ ཧཱུྃ་（གིས་གཏོར་མ།） སྣོད་བཅུད་ཕུན་སུམ་ཚོགས་ཤིང་འདོད་ཡོན་དུ་མས་བརྒྱན་པ་ནམ་མཁའ་དང་མཉམ་པར་གྱུར་པར་（མོས།） འཁོར་འདས་ཀྱི་སྣོད་ཐམས་ཅད་བདེ་བ་ཅན་གྱི་ཞིང་ཁམས། བཅུད་མ་ལུས་ཤིང་ལུས་པ་མེད་པ་བཅོམ་ལྡན་འདས་མའི་རང་བཞིན་དུ་གྱུར་ཅིང་། དེ་ཐམས་ཅད་ཀྱི་ལྗགས་རྡོ་རྗེའི་སྦུ་གུས་གཏོར་མའི་བཅུད་དྲངས་ཏེ་གསོལ་བས་དགྱེས་ཤིང་ཚིམ་པར་（བསམ་ལ།） ཨོྃ་ཏཱ་རེ་ཏུཏྟཱ་རེ་ཏུ་རེ་ཨི་དཾ་བ་ལིཾ་ཏ་ཁ་ཁཱ་ཧི་ཁཱ་ཧི། （ཞེས་པ་ལན་བདུན་ནམ་ཉེར་གཅིག་གིས་ཕུལ་མཐར།） འཁོར་བ་ལས་སྒྲོལ་ཏཱ་རེ་མ༔ （ཞེས་སོགས་ཀྱིས་བསྟོད་ཅིང་འདོད་དོན་འགྲུབ་པར་གསོལ་བ་གདབ། ཡི་གེ་བརྒྱ་པས་ནོངས་པ་བཤགས་ལ་འཁོར་འདས་དག་པ་འོད་གསལ་གྱི་འཁོར་ལོ་རྫོགས་པའི་རིམ་པ་ལ་བསྡུ། བསྔོ་སྨོན་བཀྲ་ཤིས་ཀྱི་རྒྱས་གདབ་པར་བྱའོ། །དེ་ཡང་བཅོམ་ལྡན་འདས་མ་བསྙེན་པའི་ཚད་ནི། དུས་ཞག་བདུན་ནས་ཉེར་གཅིག་དང་ཟླ་བ་སོགས་གང་ཡང་རུང་སྟེ། ཞག་བདུན་ཙམ་ཞིག་བརྩོན་པས་ཀྱང་༔ དུས་(7ན)མིན་འཆི་བ་ངེས་པར་ཟློག༔ ཅེས་གསུངས། གྲངས་ནི་ཁྲིའམ་འབུམ་མམ་བྱེ་བ་སོགས་པ་བཟླས་པས་སྐལ་པ་དང་བློའི་རིམ་པས་དུས་མ་ཡིན་པའི་འཆི་རྐྱེན་མཐའ་དག་སེལ་ནས་ཚེ་ཚད་ལ་བསྐྱལ་བ་དང་། ཚེ་ཚད་ལྷག་པར་བསྲིང་བ་དང་། འཆི་མེད་རིག་འཛིན་ཐོབ་པ་རྣམས་སུ་འགྱུར་སྟེ། ཡེངས་མེད་རྩེ་གཅིག་འབུམ་ཕྲག་གཅིག༔ བཟླས་ན་ཚེ་ཡི་རིག་འཛིན་ཐོབ༔ ཅེས་གསུངས་སོ། །）

（རྟགས་ཀྱི་བསྙེན་པ་ནི། རྩ་བར། རབ་དངོས་སུ་ཞལ་མཇལ༔ ལུང་བསྟན༔ འབྲིང་ཉམས༔ ཐ་མའང་རྨི་ལམ་དུ་ཞལ་མཇལ་ལུང་བསྟན༔ འོད་ཕུང་དཀར་པོ་མཐོང་བ་དང་༔ མེ་ཏོག་ཐུ་བ་དང་༔ ཤིང་ཐོག་ཟོས་པ་དང་༔ བདུད་རྩི་འཐུང་བ་དང་༔ ཉི་མ་ཤར་བ་དང་༔ བུ་མོ་དཀར་མོ་ཡིད་འོང་མས༔ རྒྱན་དང་ཕྲེང་བ་ལ་སོགས་དཀར་པོའི་རིགས་རྣམས་བྱིན་པ་དང་༔ མཆོད་རྟེན་དང་ཚྭ་ཚྭ་ལ་སོགས་མཐོང་བ་རྣམས་ཚེ་འགྲུབ་པའི་རྟགས་ངེས་ཅན་ཡིན་ནོ༔ ཞེས་གསུངས་པ་ལྟར་རོ། །དེ་ལྟར་འཕགས་མའི་དུས་གྲངས་མཚན་མའི་བསྙེན་པ་གང་ཡང་རུང་བ་གྲུབ་པའི་སྐབས་སུ་བབས་པ་ན། མདུན་གྱི་དཀྱིལ་འཁོར་སྒྲུབ་རྫས་དང་བཅས་པ་འཕགས་མར་གསལ་བའི་གནས་གསུམ་ལས་འོད་ཟེར་དམར་མཐིང་གསུམ་འཕྲོས་བ་རང་གི་གནས་གསུམ་དུ་ཐིམ་པས་འཆི་མེད་ཚེ་དང་ཡེ་ཤེས་དངོས་གྲུབ་སྟན་ཐོབ་པར་མོས་ལ།） ཨོཾ༔ ཡེ་ཤེས་ལྷ་མོ་དགྱེས་པའི་འོད་རབ་འབྱིན༔ འབྱུང་ལྔ་དབང་སྡུད་མཆོག་གི་བདེ་སྟེར་མ༔ ཡིད་བཞིན་ཚེ་འཕེལ་ཀུན་སྐྱོབས་ལྷ་མོ་དགོངས༔ སྒྲུབ་（7བ）མཆོག་བུ་ལ་མཆོག་ཐུན་དངོས་གྲུབ་སྩོལ༔ བདུད་བཞི་འཇིགས་བརྒྱད་ཚེ་ཡི་བར་ཆད་སོལ༔ དཔལ་བཅུའི་དབང་ཐོབ་ལས་བཞི་གྲུབ་ཆེན་བརྒྱད༔ མ་ལུས་དེང་འདིར་ཐོགས་མེད་མཐུ་ཐོབ་ནས༔ འགྲོ་ཀུན་སྲིད་པའི་མཚོ་ལས་རབ་སྒྲོལ་ཞིང་༔ ཚེ་གཅིག་འཇའ་ལུས་ཆོས་སྐུ་མངོན་གྱུར་སྩོལ༔ （རྩ་སྔགས་ཀྱི་ཤམ་བུར།） མ་མ་ཀཱ་ཡ་ཝཱ་ཀྩིཏྟ་ས་མ་ཡ་ཨདྷི་ཥྛཱ་ན་ཨ་བེ་ཤ་ཡ་ཨ་ཨཱ༔ （ཞེས་བུམ་པ་གནས་གསུམ་དུ་གཏུགས་ཤིང་བུམ་ཆུ་དང་ཚེ་རིལ་ཚེ་ཆང་སོགས་དངོས་གྲུབ་ཀྱི་རྫས་ལ་ལོངས་སྤྱད། མཐར་མདུན་བསྐྱེད་འཕགས་མ་རང་ལ་བསྟིམས་ཏེ་འཆི་མེད་གཉུག་མའི་ངོ་བོར་མཉམ་བར་བཞག་གོ། །འཕགས་མ་ཡིད་བཞིན་ཟླ་བ་ཚེ་སྦྱིན་མའི། །སྒྲུབ་ཐབས་རྣམ་མང་རིན་ཆེན་ཕུང་པོའི་དབུས། །འཆི་མེད་མཚོ་སྐྱེས་བླ་མའི་གདམས་ངག་ཕུལ། །བསམ་འཕེལ་དབང་གི་རྒྱལ་པོ་འདི་ཁོ་ན། །འདིར་འབད་བསོད་ནམས་ཤིང་རྟས་ཉེར་དྲངས་པའི། །འཕགས་མའི་བྱིན་རླབས་ཟླ་བའི་འཛུམ་ཟེར་གྱིས། །འཆི་བདག་མུན་པའི་གཡུལ་ངོ་མཐར་བསྐྲད་དེ། །ལུས་ཅན་རིང་འཚོའི་ཆུ་གཏེར་རབ་སྤེལ་ཤོག །དེ་ལྟར་རིག་འཛིན་ཆེན་པོ་བདུད་འདུལ་གླིང་པའི་གཏེར་བྱོན་སྒྲོལ་དཀར་ཡིད་བཞིན་འཁོར་ལོ་ཚེ་སྦྱིན་མའི་སྒྲུབ་ཐབས་ཁྲིགས་སུ་བསྡེབས་པ་འཆི་མེད་བདུད་རྩིའི་བུམ་བཟང་ཞེས་བྱ་བ་འདི་ནི། རིགས་ལྡན་གྱི་ཤེས་རབ་མ་ལྷ་ལྕམ་ཀུན་བཟང་བདེ་ཆེན་མཚོ་མོའི་བཞེད་པ་སྐོང་བའི་སླད་དུ། རིག་པ་འཛིན་པའི་མྱུ་གུ་འཇིགས་བྲལ་ཡེ་（8ན）ཤེས་རྡོ་རྗེས་རང་ལོ་སུམ་ཅུ་རྩ་བདུན་དུ་སོན་པ་རྣམ་གནོན་ལྕགས་འབྲུག་གི་ལོ་གྲོ་བཞིན་ཟླ་བའི་ཡར་ངོའི་རྒྱལ་བ་གཉིས་པའི་དུས་ཚེས་བཟང་པོ་ལ། སློབ་དཔོན་ཆེན་པོས་བྱིན་གྱིས་བརླབས་པའི་སྦས་ཡུལ་དཔལ་འབྲས་མོ་གཤོངས་ཀྱི་སྐྱེད་མོས་ཚལ་ཉམས་དགའ་བའི་གནས་སུ་གྲུབ་པར་བགྱིས་པ་སྟེ། འདིས་ཀྱང་འགྲོ་བ་ཐམས་ཅད་འཆི་མེད་འཕགས་མའི་ཡེ་ཤེས་ཀྱི་སྐུ་འགྲུབ་པའི་རྒྱུར་གྱུར་ཅིག། སརྦ་དཱ་མངྒལཾ།། །།）