DJYD-KABUM-08-NYA-017

Previous Text Back to Volume Page Next Text

Wylie title
Location	bdud 'joms rin po che bka' 'bum Volume 8, Text 17, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. '*. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 8: . Kalimpong: Dupjung Lama, 1979-1985.*
Side notes
More details More details
Tertön	རྡོ་རྗེ་ཐོགས་མེད་ (rdo rje thogs med)
Genre
Cycle	ཟབ་ཆོས་ཡིད་བཞིན་འོད་འཕྲོ་ (zab chos yid bzhin 'od 'phro)
Deity	bla ma snang srid zil gnon

[edit]

ཟབ་ཆོས་ཡིད་བཞིན་འོད་འཕྲོའི་རིག་འཛིན་བརྒྱུད་པའི་གསོལ་འདེབས་བྱིན་རླབས་བཅུད་འབེབས་ཞེས་བྱ་བ་བཞུགས་སོ། ། སྲིད་ཞིའི་ཁྱབ་བདག་རང་བྱུང་གདོད་མའི་གཞི། །འཕོ་འགྱུར་ཡོངས་བྲལ་རྡོ་རྗེ་སྙིང་པོའི་ཁམས། །ཐིག་ལེའི་ཉག་གཅིག་གཞོན་ནུ་བུམ་པའི་སྐུ། །ཀུན་བཟང་སྣང་བ་མཐའ་ཡས་ལ་གསོལ་བ་འདེབས། །གཞི་སྣང་ལྷུན་གྲུབ་འདོད་གསལ་བདེ་བ་ཆེ། །འགག་མེད་ཁ་སྦྱོར་ཟུང་འཇུག་རྡོ་རྗེའི་དངོས། །ངེས་པ་ལྔ་ལྡན་ལོངས་སྤྱོད་རྫོགས་པའི་སྐུ། །འཕགས་མཆོག་འཇིག་རྟེན་དབང་ཕྱུག་ལ་གསོལ་བ་འདེབས། །དཔག་ཡས་ཐུགས་རྗེ་མཁའ་ཁྱབ་ཡེ་ཤེས་སྤྲིན། །བསམ་གྱིས་མི་ཁྱབ་སྒྱུ་འཕྲུལ་དྲྭ་བའི་གར། །གདུལ་བྱའི་ཁམས་ལ་གང་འདུལ་སྤྲུལ་པའི་སྐུ། །གུ་རུ་སྣང་སྲིད་ཟིལ་གནོན་ལ་གསོལ༴ ། ཀུན་ཏུ་བཟང་མོ་ཤེས་རབ་ཕར་ཕྱིན་ཡུམ། །བདེ་ཆེན་མཁའ་སྤྱོད་ཌཱ་ཀིའི་རྗེ་མོའི་ཚུལ། །རྒྱལ་ཀུན་བསྐྱེད་མཛད་གསང་སྔགས་མཛོད་འཛིན་མ། །དབྱིངས་ཕྱུག་ཡེ་ཤེས་མཚོ་རྒྱལ་ལ༴ ། བཻ་རོས་རྗེས་བཟུང་གུ་རུའི་ཐུགས་ཀྱི་སྲས། །མཁྱེན་པ་གཉིས་ལྡན་རྟོགས་གྲོལ་ཟུང་འཇུག་བརྙེས། །འཁྲུལ་པའི་ཆོས་ཟད་ཀ་དག་གྲོལ་གཞིར་གཤེགས། །སྒྲ་བསྒྱུར་གཡུ་སྒྲ་སྙིང་པོ་ལ༴ (1བ)མཉམ་ཉིད་དགོངས་པས་འཁོར་འདས་ཟིལ་གྱིས་གནོན། །ཧེ་རུ་ཀ་དཔལ་གྲུབ་པའི་འཁོར་ལོས་བསྒྱུར། །གཡུ་སྒྲའི་རྣམ་འཕྲུལ་པདྨ་ཐོད་ཕྲེང་དངོས། །རིག་འཛིན་རྡོ་རྗེ་ཐོགས་མེད་ལ༴ ། སྲིད་ལ་མི་གནས་ཀུན་བཟང་རྒྱལ་ཐབས་འཛིན། །ཞི་ལ་མི་གནས་འགྲོ་ཁམས་དོང་ནས་སྤྲུགས། །བི་མ་དངོས་བྱོན་སྐྱེ་མཐའི་སངས་རྒྱས་མཆོག །པདྨ་འགྲོ་མགོན་རྡོ་རྗེ་ལ༴ ། ཆོས་ཉིད་གཞི་རྫོགས་དགོངས་པ་ཀློང་ནས་བརྡོལ། །དབྱིངས་རིག་བདེ་སྟོང་ཡེ་ཤེས་འདུ་འབྲལ་མེད། །མཆོག་གྲུབ་རྣམ་རོལ་དཔལ་ཆེན་རིག་པ་འཛིན། །གར་དབང་འཆི་མེད་རྡོ་རྗེ་ལ༴ ། རྒྱལ་ཐབས་སྤྱི་བླུགས་དོན་གྱི་དབང་བསྐུར་བརྙེས། །འཕོ་བའི་སྒྲིབ་བཅོམ་འབྱུང་བཞི་དབང་དུ་བསྒྱུར། །མཚོ་རྒྱལ་ཐུགས་སྤྲུལ་ཡེ་ཤེས་ཌཱ་ཀི་དངོས། །རིགས་འདུས་ཟླ་འོད་དབང་མོ་ལ༴ ། འཁོར་འདས་མཉམ་བརྡལ་རིག་པའི་རྩལ་ཆེན་རྫོགས། །ས་ལམ་ཆིག་ཆོད་འཁྲུལ་པའི་མཚན་མ་ཟད། །ཁྲི་སྲོང་རྣམ་སྤྲུལ་གསང་ཆེན་བསྟན་པའི་བདག །པདྨ་ཟིལ་གནོན་མཆོག་རབ་ལ༴ ། ཡེ་ཤེས་ལྷུན་འབྱམས་རྟོགས་པ་ཀློང་དུ་གྱུར། །འོད་གསལ་ཁོར་ཡུག་ཏིང་འཛིན་ཚད་ལ་ཕེབས། །ནམ་སྙིང་རོལ་གར་མཁྱེན་བརྩེ་ནུས་པའི་གཏེར། །རྒྱལ་ཚབ་པདྨ་བསྟན་དར་ལ༴ ། (2ན)ཆོས་ཉིད་རང་བབ་གཉུག་མའི་དེ་ཉིད་གཟིགས། །བྱར་མེད་ལྷུན་རྫོགས་རེ་དོགས་གཟེབ་ལས་གྲོལ། །གུ་རུའི་གསུང་སྲས་སྦས་པའི་བརྟུལ་ཞུགས་འཆང་། །པདྨ་དབང་གི་རྒྱལ་པོ་ལ་གསོལ༴ ། རབ་འབྱམས་རྒྱལ་བ་མ་ལུས་འདུས་པའི་ཞལ། །དཔལ་ལྡན་རིགས་ཀུན་ཁྱབ་བདག་རྡོ་རྗེ་སེམས། །བསླུ་མེད་སྐྱབས་ཀྱི་མཐར་ཐུག་འཁོར་ལོའི་མགོན། །དྲིན་ཆེན་རྩ་བའི་བླ་མ་ལ༴ ། མོས་པའི་བུ་ལ་བྱིན་རླབས་ཆར་ཆེན་འབེབས། །སྐལ་པ་ཅན་ལ་དངོས་གྲུབ་རྒྱ་མཚོར་བསྐྱིལ། །དམ་ཚིག་ལྡན་ལ་ཕྲིན་ལས་ཁ་ལོ་བསྒྱུར། །རྩ་གསུམ་འདུས་པའི་ལྷ་ཚོགས་ལ་གསོལ༴ ། ཐུགས་རྗེའི་སྟོབས་དང་མོས་པའི་རྟེན་འབྲེལ་ལས། །རྩ་བརྒྱུད་བླ་མ་དཀྱིལ་འཁོར་འཁོར་ལོའི་ལྷས། །རྟག་ཏུ་འབྲལ་མེད་བརྩེ་བས་རྗེས་བཟུང་ནས། །བྱིན་རླབས་དགོངས་བརྒྱུད་སྙིང་ལ་འཕོ་བར་ཤོག །དད་དང་ངེས་འབྱུང་ཐར་པའི་ཞིང་ས་རུ། །སྨིན་བྱེད་དབང་བཞིའི་ས་བོན་ལེགས་བཏབ་པ། །གྲོལ་བྱེད་གདམས་ཟབ་བདུད་རྩིས་བསྐྱེད་བསྲིངས་ཏེ། །བླ་མེད་སྐུ་བཞིའི་འབྲས་བཟང་མངོན་གྱུར་ཤོག །ཁྱད་པར་འོད་གསལ་རྡོ་རྗེའི་གསེང་ལམ་ལས། །སྣང་བཞི་མཐར་ཕྱིན་ཆོས་ཉིད་ཟད་སར་འཁྱོལ། །འཕོ་ཆེན་འཇའ་ལུས་སྒྱུ་མའི་སྐུ་མཆོག་ ( 2བ)གིས། །རྣམ་མང་འགྲོ་ཁམས་དོང་སྤྲུགས་མཐུ་ཐོབ་ཤོག །（ཅེས་པའང་ལམ་འདིའི་བཀའ་བབ་ལུང་ཐོབ་ཀྱི་སྐལ་བཟང་ཉམས་སུ་མྱོང་བ་རིག་འཛིན་གྱི་མྱུ་གུ་འཇིགས་བྲལ་ཡེ་ཤེས་རྡོ་རྗེས་གསོལ་བ་བཏབ་པ་དགེ། གོང་གི་སྒམ་པོ་པ་ཨོ་རྒྱན་འགྲོ་འདུལ་གླིང་པའམ་པདྨ་འགྲོ་མགོན་རྡོ་རྗེ་ཉིད་ད་ལྟའི་སྨིན་གྲོལ་གྱི་བརྒྱུད་པའི་གྲལ་དུ་མི་བཞུགས་ཀྱང་རྩ་བའི་ཆོས་བདག་མཆོག་ཏུ་གྲུབ་པ་དང་། ཆོས་གླིང་གར་དབང་འཆི་མེད་རྡོ་རྗེ་ནི་མཚོ་རྒྱལ་བདེ་ཆེན་དཀར་མོའི་སྨིན་གྲོལ་གྱི་བརྒྱུད་པར་ཐུག་པ་བཅས་གཉིས་ཀར་གཏེར་ཆེན་ཉིད་ཀྱི་ཐུན་མོང་མ་ཡིན་པའི་ཐུགས་ཀྱི་སྲས་སུ་གྱུར་པ་ཙམ་དུ་མ་ཟད་སྦས་ཡུལ་གནས་གཏེར་རྒྱ་མཚོའི་སྒོ་བརྒྱ་ཐོག་མར་འབྱེད་པའི་ཤིང་རྟ་ཆེན་པོར་དེས་པའི་ཕྱིར་རིག་འཛིན་རྣམ་པ་གསུམ་པོ་དཀྱུས་གཅིག་ཏུ་བཀོད་པའོ།། །།）