DJYD-KABUM-18-TSHA-019

Previous Text Back to Volume Page Next Text

Wylie title
Location	bdud 'joms rin po che bka' 'bum Volume 18, Text 19, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. '*. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 18: . Kalimpong: Dupjung Lama, 1979-1985.*
Side notes
More details More details
Tertön	ཨ་པཾ་གཏེར་སྟོན་ཆོས་དབྱིངས་རྡོ་རྗེ་ (a paM gter ston chos dbyings rdo rje)
Genre
Cycle	རྡོ་རྗེའི་ཚིག་བདུན་ཟབ་སྒྲུབ་ (rdo rje'i tshig bdun zab sgrub)

[edit]

༄༅། །རྡོ་རྗེའི་ཚིག་བདུན་ཟབ་སྒྲུབ་ཀྱི་དབང་བསྐུར་བཀླག་ཆོག་དངོས་གྲུབ་མཆོག་སྟེར་ཞེས་བྱ་བ་བཞུགས་སོ། །

༄༅། །ཨོཾ་སྭསྟི། སྐད་ཅིག་དྲན་པའི་མོད་ཉིད་ལ། །ཐུགས་རྗེ་གློག་ལས་མྱུར་བ་ཡིས། །དངོས་གྲུབ་འདོད་རྒུར་སྩོལ་མཛད་པ། །ཁྱབ་བདག་གུ་རུས་བདག་བྱིན་རློབས། །（རྡོ་རྗེའི་ཚིག་བདུན་བླ་སྒྲུབ་འདིའི་སྒོ་ནས་སྐལ་ལྡན་སློབ་མ་རྗེས་སུ་འཛིན་པ་ལ། གཙང་མའི་གནས་སུ་དམ་ཚིག་གི་རྟེན་བཀྲམ་པའི་སྤྱན་སྔར་གཞི་སྟེགས་སུ་རས་བྲིས་ཀྱི་དཀྱིལ་འཁོར་སྒོ་རྫོགས་སྤྱི་མཐུན་ལྟེ་བ་རྡོ་རྗེ་ཧྲཱིཿཡིག་གིས་མཚན་པ་ཅན་བཀྲམ་པའམ་མ་འབྱོར་ན་མཎྜལ་ལ་འབྲུ་དཀར་གྱིས་ཚོམ་བུ་གཅིག་བཀོད་པའི་སྟེང་དུ་མཉྫིའི་ཁར་བུམ་པ་དྲི་དང་སོ་ལྔའི་བཅུད་ལྡན་མགུལ་ཆིངས་ཅན་ཁ་རྒྱན་གསེབ་ཏུ་གུ་རུའི་སྐུ་ཙཀ་བཙུགས་པ་བཀོད། མདུན་དང་གཡས་གཡོན་དུ་བཛྲ་གུ་རུའི་（2ན）སྔགས་བྱང་། བཟླས་ཕྲེང་། ཐིག་ལེ་ཧྲཱིཿས་མཚན་པ་ཅན་བཀོད་པའི་མཐར་ཉེར་སྤྱོད་གཏོར་མ་སྨན་རཀ་སོགས་བཀོད་མཛེས་སུ་བསྟར་ལ། སློབ་དཔོན་གྱིས་བདག་མདུན་དབྱེར་མེད་ཀྱི་བསྐྱེད་བཟླས་ཏིང་འཛིན་གྱི་དབང་བླང་བ་བཅས་གྲུབ་ནས། ལས་བུམ་རྟ་སྔགས་ཀྱིས་བརླབ། སློབ་མ་རྣམས་ཁྲུས་ནས་དབྱུང་། བགེགས་བསལ་ཞིང་སྲུང་འཁོར་བསྒོམ། མཎྜལ་བཀྱེ་བསྡུ་བྱས་ལ།）འོ། ནམ་མཁའ་དང་མཉམ་པའི་སེམས་ཅན་ཐམས་ཅད་ཁྱབ་བདག་བླ་མ་ཀུན་བཟང་པདྨ་བདེ་བ་ཆེན་པོའི་གོ་འཕང་ལ་འགོད་པར་བྱ། དེའི་ཆེད་དུ་སྨིན་བྱེད་ཀྱི་དབང་བསྐུར་བ་ཟབ་མོ་གསན་ནས་ལམ་རིམ་གཉིས་ཀྱི་（2བ）རྣལ་འབྱོར་ཚུལ་བཞིན་ཉམས་སུ་ལེན་པར་བྱའོ་སྙམ་པའི་སྒོ་ནས་ལེགས་པར་གསན་འཚལ། གསན་བྱའི་ཆོས་སྐབས་སུ་བབས་པ་ཨོ་རྒྱན་དུས་གསུམ་མཁྱེན་པ་ཉིད་ཀྱི་རྡོ་རྗེའི་གསུང་ལས། བདག་ཉིད་པདྨ་ཀུན་ཏུ་འཆང་༔ གདོད་མའི་དབྱིངས་སུ་སྙོམས་ཞུགས་ཚེ༔ ཆོས་ཉིད་རང་རྩལ་རྡོ་རྗེའི་སྒྲ༔ ཚིག་བདུན་རང་བྱུང་དབྱངས་ཀྱིས་བསྐུལ༔ ལོངས་སྐུ་གཟི་བརྗིད་དཔག་མེད་བཞེངས༔ མཁའ་ཁྱབ་ངེས་པ་ལྔ་ལྡན་གྱི༔ ཞིང་དང་སྐུ་ཡི་བཀོད་པ་བསྟན༔ དེ་ཚེ་དབྱིངས་ཀྱི་ཡུམ་ལྔ་ཡིས༔ འགྲོ་དོན་ཚིག་བདུན་གླུ་ཡིས་བསྐུལ༔ བདེ་ཆེན་ཞིང་དུ་འོ་མའི་མཚོར༔ པད་སྡོང་རྩེ་ལ་སྐུར་བཞེངས་པ༔ ཐོད་ཕྲེང་སྡེ་ལྔ་ཞེས་སུ་གྲགས༔ རྣམ་ཐར་མཛད་པ་བསམ་ལས་འདས༔ སླར་ཡང་ཡེ་ཤེས་མཁའ་འགྲོ་མ༔ བྱེ་བ་ཕྲག་བརྒྱས་མགྲིན་གཅིག་ཏུ༔ འཛམ་གླིང་ཤཱཀྱའི་གདུལ་ཞིང་དུ༔ ཚིག་བདུན་དབྱངས་ཀྱིས་སྤྱན་དྲངས་པའི༔ སྔགས་ཀྱི་འབྱུང་གནས་ཨོ་རྒྱན་ཡུལ༔ ངྷ་ན་ཀོ་ཤའི་མཚོ་གླིང་དུ༔ ངོ་མཚར་པདྨའི་སྡོང་པོའི་རྩེར༔ བདེ་ཅན་ཞིང་ནས་སྤྲུལ་སྐུར་བྱོན། མཚོ་སྐྱེས་རྡོ་རྗེ་ཞེས་སུ་གྲགས༔ （3ན）བསམ་མི་ཁྱབ་པའི་ཆོ་འཕྲུལ་བསྟན༔ ཡ་མཚན་བཀོད་པ་ཚད་ལས་འདས༔ མཚོ་གླིང་དཔའ་བོ་མཁའ་འགྲོ་མར༔ གསང་ཆེན་གསང་བའི་ཡང་སྙིང་ནི༔ པདྨ་སྒྱུ་འཕྲུལ་དྲྭ་བ་ཡི༔ རྒྱུད་ལུང་མན་ངག་བྱེ་ཕྲག་བརྒྱ༔ གདུལ་བྱའི་བསམ་པ་ཐ་དད་པར༔ བྱུང་དང་འབྱུང་འགྱུར་དོན་ཕྱིར་གསུངས༔ ཀུན་ཀྱང་རྩ་གསུམ་གཅིག་འདུས་དངོས༔ བདག་ཉིད་གུ་རུ་སྒྲུབ་པའི་ཐབས༔ དེ་ཀུན་རྩ་བ་ཚིག་བདུན་པ༔ གཞི་ཡི་རྣམ་ཤེས་ཚོགས་བདུན་པོ༔ ལམ་དུས་བྱང་ཆུབ་ཡན་ལག་བདུན༔ དོན་དམ་དཀོར་བདུན་འབྲས་བསྐུར་སྩལ༔ རྩ་གསུམ་ལྷ་ཚོགས་སྤྲིན་བཞིན་འདུ༔ དངོས་གྲུབ་རྣམ་གཉིས་ཐོགས་མེད་སྟེར༔ དངོས་ཉམས་རྨི་ལམ་ང་དང་མཇལ༔ འཇའ་འོད་འཁྱིལ་ཞིང་དྲི་བཟང་འཐུལ༔ བརྡ་དབྱངས་ཅང་ཏེའུའི་སྒྲ་སྐད་ཐོས༔ ལུས་ངག་ཡིད་ལ་བྱིན་ཆེན་ཕེབས༔ རིག་རྩལ་ཐོད་རྒལ་རྟོགས་པ་སྐྱེ༔ སྡེ་བརྒྱད་དྲེགས་པར་（3བ）བཀའ་བཙན་ཞིང་༔ འབྲེལ་ཚད་དོན་ལྡན་བྱིན་ནུས་ཐོབ༔ མྱུར་དུ་རིག་འཛིན་སར་གཤེགས་ནས༔ པདྨ་བདག་དང་དབྱེར་མེད་འགྱུར༔ ཞེས་གསུངས་ཤིང་། རྡོ་རྗེའི་ཚིག་བདུན་འདིའི་ལོ་རྒྱུས་སུ་རྡོ་རྗེ་མཁའ་འགྲོ་མ་རྣམས་ཀྱིས་གུ་རུ་རིན་པོ་ཆེ་ཚོགས་འཁོར་ལ་སྤྱན་དྲངས་པའི་ཚིག་ཡིན་པར་གྲགས་ཤིང་། སྔོན་ཤྲཱི་ན་ལེནྡྲའི་གཙུག་ལག་ཁང་དུ་མུ་སྟེགས་ཀྱི་སྟོན་པ་སྒྲ་ཚད་ལ་མཁས་པ་ལྔ་བརྒྱ་ལྷགས་ནས་བསྟན་པ་ཉམས་དམས་པར་བྱས་དུས། ནང་པའི་པཎྜི་ཏ་རྣམས་ཀྱིས་རྩོད་པར་མ་ནུས་པའི་ཚེ། པཎྜི་ཏ་རྣམས་ཕལ་ཆེར་ལ་རྨི་ལམ་དུ་མཐུན་པར། མཁའ་འགྲོ་མ་ཞི་བ་མཆོག་གིས་ལུང་བསྟན་པ། ཁྱེད་རྣམས་ཀྱིས་མུ་སྟེགས་བཟློག་པར་ག་ལ་ནུས། ངའི་མིང་པོ་རྡོ་རྗེ་ཐོད་ཕྲེང་རྩལ་དུར་ཁྲོད་མུན་པ་ཅན་དུ་བཞུགས་པ་དེ་སྤྱན་མ་དྲངས་ན་བསྟན་པ་འཇིག་པར་འགྱུར་རོ། །ཞེས་སྨྲས་པ་ལས། དེར་བགྲོད་དཀའ་བས་སྤྱན་མི་དྲོངས་བྱས་པས། མཁའ་འགྲོ་ན་རེ། ཁྱེད་རྣམས་ཀྱིས་གཙུག་ལག་ཁང་གི་ཐོག་ཏུ་མཆོད་པ་རྒྱ་ཆེན་པོ་བཤམས་ནས་སྤོས་དང་རོལ་མོ་བཅས་གུས་པ་རྒྱ་ཆེན་པོས་མགྲིན་གཅིག་ཏུ་གསོལ་བ་འདི་ལྟར་ཐོབ་ཅེས་（4ན）ཚིག་བདུན་གསོལ་འདེབས་བསླབ་པ་དེ་བཞིན་བྱས་པས། སྐད་ཅིག་དེ་ཉིད་ལ་གུ་རུ་རིན་པོ་ཆེ་ནམ་མཁའ་ལས་བྱོན་ནས་པཎ་ཆེན་ལྔ་བརྒྱའི་གཙོ་བོར་བཞུགས། མུ་སྟེགས་སྟོན་པ་ལྔ་བརྒྱ་ལུང་རིག་གིས་ཚར་བཅད། སླར་མཐུ་འགྲན་པ་ལས་མཁའ་འགྲོ་སེང་གདོང་མས་བསེ་སྒྲོམ་གཏད་ནས་མུ་སྟེགས་གདུལ་བར་བཀའ་བསྒོས་པ་ལྟར་ཐོག་ཕབ་ནས་མུ་སྟེགས་མ་རུངས་པ་ཐམས་ཅད་ཚེ་བཅད། ལྷག་མ་རྣམས་ནང་པའི་བསྟན་པ་ལ་བཙུད་དེ་གསོལ་འདེབས་འདི་ཐམས་ཅད་དུ་རྒྱས་པར་གྱུར་ཏོ། །སླར་གུ་རུ་རིན་པོ་ཆེ་བོད་ཡུལ་དུ་བྱོན་ནས་སངས་རྒྱས་ཀྱི་བསྟན་པ་བཙུགས་པའི་ཚེ་ལས་ཅན་རྗེ་འབངས་རྣམས་ལ་གནང་ཞིང་། ཕྱི་རབས་ཀྱི་གདུལ་བྱ་རྣམས་ལ་དགོངས་ཏེ་སྦས་པའི་གཏེར་ཁ་ཐམས་ཅད་དུ་ཡང་རྡོ་རྗེའི་ཚིག་བདུན་པོ་འདི་ཉིད་མ་བྱུང་བ་མེད་པ་ལྟ་བུ་ལས། འདིར་ནི་སློབ་དཔོན་ཆེན་པོ་ཉིད་ཡར་ལུང་ཤེལ་གྱི་བྲག་ཕུག་ཏུ་བཞུགས་པའི་སྐབས། མཁའ་འགྲོ་ཡེ་ཤེས་མཚོ་རྒྱལ་དང་། ལྷ་སྲས་མུ་ཏིག་བཙན་པོ་གཉིས་ཀྱིས། ཚོགས་ཀྱི་འཁོར་ལོ་རྒྱ་ཆེན་པོ་བསྐོར་ཏེ་གསོལ་བ་བཏབ་པའི་（4བ）ངོར་རྡོ་རྗེའི་ཚིག་བདུན་སྒྲུབ་པའི་མན་ངག་གནད་དུ་དྲིལ་ཏེ་མནོག་ཆོས་སུ་བསྩལ། མ་འོངས་སྙིགས་མའི་གདུལ་བྱ་སྐལ་བ་ཅན་རྣམས་ཀྱི་དོན་དུ་ཐ་ཚིག་གཏད་རྒྱ་དང་བཅས་མདོ་ཁམས་མདོ་སྙིང་ཤར་རྩེ་བྲག་དཀར་བདེ་ཆེན་རོལ་པའི་ཕོ་བྲང་དུ་གཏེར་རྒྱས་བསྡམས་པར་མཛད་པ་ཉིད། དེང་སང་གདུལ་བའི་དུས་སུ་སོན་པ་ན། ལྷ་སྲས་ཉིད་ཀྱི་རྣམ་རོལ་འགྲོ་འདུལ་དཔའ་བོ་ཆོས་དབྱིངས་རྡོ་རྗེའམ། ཨོ་རྒྱན་ཕྲིན་ལས་གླིང་པས་བར་ཆད་མེད་པར་སྤྱན་དྲངས་ཏེ་གསང་བའི་དམ་ཚིག་མཐར་ཕྱིན་པ་ན་སྐལ་ལྡན་གྱི་གདུལ་བྱ་རྣམས་ལ་སྤེལ་བར་མཛད་པ་བྱིན་རླབས་དངོས་གྲུབ་ཀྱི་གཏེར་ཆེན་པོར་གྱུར་པ་འདིའི་སྒོ་ནས་སྐལ་ལྡན་རྗེས་འཛིན་སྨིན་བྱེད་དབང་གི་སྙིང་པོ་སྐུ་གསུང་ཐུགས་ཀྱི་རྗེས་གནང་ཟབ་མོ་སྒྲུབ་པ་ལ། བདག་ཉིད་སློབ་དཔོན་གྱིས་བགྱི་བར་འོས་པ་རྣམས་སྔོན་དུ་སོང་ནས་ཁྱེད་རང་སློབ་མ་རྣམས་ཀྱི་ངོ་སྐལ་དུ་གྱུར་པ་ཐོག་མར་བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པའི་དྲུང་དུ་བྱིན་རླབས་དབང་བསྐུར་ཟབ་མོ་ཞུ་བའི་ཡོན་དུ་མཎྜལ་ཞིག་འབུལ་མཛོད། （ཅེས་མཎྜལ་འབུལ་དུ་གཞུག）ཐལ་མོ་མེ་ཏོག་བཅས་གསོལ་བ་འདེབས་པ་འདིའི་（5ན）རྗེས་ཟློས་མཛོད། ཀྱེཿ དཔལ་ལྡན་བླ་མ་ཨོ་རྒྱན་རྡོ་རྗེ་འཆང་༔ སྙིང་པོ་རྡོ་རྗེ་ཚིག་བདུན་ཟབ་མོ་ཡི༔ བྱིན་རླབས་དབང་གི་བདུད་རྩིའི་ཆར་རྒྱུན་གྱིས༔ བདག་རྒྱུད་དགེ་བའི་ལོ་འབྲས་སྨིན་པར་མཛོད༔ （ལན་གསུམ།）དེ་ལྟར་གསོལ་བ་བཏབ་པ་ལ་ཟབ་མོའི་བསླབ་བྱ་འབོགས་པའི་སྒོ་ནས་ལན་བྱིན་པ་འདི་ལ་གསན་འཚལ༔ ཧོཿ བླ་མ་མཆོག་ལ་བརྟེན་པའི་སྐལ་བ་ཅན༔ རིམ་གཉིས་རྣལ་འབྱོར་ཟབ་མོ་ཚུལ་བཞིན་བསྒོམ༔ རྒྱུན་དུ་དད་དང་དག་སྣང་མོས་གུས་བསྐྱེད༔ གསོལ་འདེབས་རྡོ་རྗེའི་ཚིག་བདུན་ཡི་དམ་ཟུངས༔ ཐོག་མར་རྒྱུད་སྦྱོང་བའི་སླད་དུ། སློབ་དཔོན་དང་མདུན་བསྐྱེད་ཐ་མི་དད་པ་ཨོ་རྒྱན་རྡོ་རྗེ་འཆང་མཆོག་གསུམ་རྩ་གསུམ་སྐྱབས་ཡུལ་ཀུན་འདུས་ཀྱི་ངོ་བོར་བཞུགས་པའི་སྤྱན་སྔར་བདག་སོགས་སེམས་ཅན་ཐམས་ཅད་བྱང་ཆུབ་མ་ཐོབ་ཀྱི་བར་དུ་སྐྱབས་སུ་འགྲོ་ཞིང་། ཕ་མར་གྱུར་པའི་སེམས་ཅན་ཐམས་ཅད་ཀྱི་དོན་དུ་ལམ་ཟབ་མོའི་སྒོར་ཞུགས་ནས་ཚུལ་བཞིན་ཉམས་སུ་བླངས་ཏེ་འགྲོ་ཀུན་བྱང་ཆུབ་མཆོག་གི་གོ་འཕང་ལ་འགོད་པར་བགྱིའོ་（5བ）སྙམ་པས་འདིའི་རྗེས་ཟློས། དཀོན་མཆོག་ཀུན་དངོས་གུ་རུ་པདྨ་ལ༔ བྱང་ཆུབ་བར་དུ་བདག་སོགས་སྐྱབས་སུ་མཆི༔ འགྲོ་རྣམས་རྫགས་པའི་བྱང་ཆུབ་ཐོབ་པའི་ཕྱིར༔ སྨོན་འཇུག་བླ་ན་མེད་པའི་སེམས་མཆོག་བསྐྱེད༔ （ལན་གསུམ།）ཚོགས་ཀྱི་ཞིང་མཆོག་བླ་ན་མེད་པའི་སྤྱན་སྔར་བསགས་སྦྱོང་སྤེལ་གསུམ་གྱི་སྙིང་པོར་གྱུར་པ་ཡན་ལག་བདུན་པ་ཚུལ་བཞིན་བགྱི་བའི་བློས་འདིའི་རྗེས་ཟློས། ཞིང་ཁམས་རྒྱ་མཚོའི་རྡུལ་སྙེད་ལུས་སྤྲུལ་ནས༔ སྒོ་གསུམ་གུས་པའི་ཡིད་ཀྱིས་ཕྱག་འཚལ་ལོ༔ ཆོས་དབྱིངས་རབ་འབྱམས་གང་བའི་མཆོད་པའི་སྤྲིན༔ རྣམ་གསུམ་དག་པའི་ཚུལ་གྱིས་འབུལ་གྱི་བཞེས༔ ཐོག་མེད་འཁྲུལ་པའི་ལས་བགྱིས་སྡིག་སྒྲིབ་ཚོགས༔ མགོན་པོ་ཁྱོད་ཀྱི་སྤྱན་སྔར་མཐོལ་ཞིང་བཤགས༔ སྲིད་དང་ཞི་བའི་དགེ་ཚོགས་ཇི་སྙེད་པ༔ གཞན་དོན་རྗེས་སུ་མཐུན་པར་རྗེས་ཡི་རབ་༔ ཁམས་གསུམ་འགྲོ་རྣམས་བྱང་ཆུབ་མ་ཐོབ་བར༔ ཟབ་རྒྱས་ཆོས་ཀྱི་འཁོར་ལོ་རྒྱ་ཆེན་བསྐོར༔ ཕྲིན་ལས་རྣམ་བཞི་འགྲོ་དོན་རྒྱུན་ཆད་མེད༔ མཛད་པ་ལྷུན་གྲུབ་གསང་གསུམ་རྡོ་རྗེར་བཞུགས༔ （6ན）བདག་གཞན་དུས་གསུམ་བསགས་པའི་རྣམ་དཀར་དགེ༔ མཐའ་ཡས་འགྲོ་ཀུན་བྱང་ཆུབ་ཐོབ་ཕྱིར་བསྔོ༔ （ལན་གསུམ།）དེ་ནས་བྱིན་རླབས་ཀྱི་གཞི་སྒྲུབས་པ་ཡེ་ཤེས་པ་དབབ་པའི་སླད་དུ་ཁྱེད་རང་རྣམས་སྒོ་གསུམ་གྱི་གནད་གཅུན་ལ་དམིགས་པ་འདི་བཞིན་དུ་སྒོམས་ཤིག །（ལས་སྔགས་དང་སྭ་བྷཱ་ཝས་བསང་སྦྱང་།）སློབ་དཔོན་རྒྱལ་དབང་པདྨ་ཡབ་ཡུམ་དུ་གསལ་བའི་ཐུགས་ཀ་ནས་འོད་ཟེར་འཕྲོས། སློབ་མ་ལ་ཕོག་པས་རྣམ་སྨིན་གདོས་བཅས་ཀྱི་ཕུང་པོ་སྟོང་པར་སྦྱངས། སེམས་ཉིད་ཧཱུྃ་ཡིག་གི་རྣམ་པར་གྱུར་པ་ཡབ་ཀྱི་ཞལ་དུ་དྲངས། ཡབ་ཡུམ་སྙོམས་པར་ཞུགས་པས་བྱང་སེམས་ཀྱི་རྣམ་པར་སྐུ་ཡི་དབྱིབས་བརྒྱུད། ཡུམ་གྱི་པདྨོར་སོན་པས་སྲས་ཀྱི་རྣམ་པར་གྱུར་པ་རྒྱལ་དབང་པདྨ་འབྱུང་གནས་རྒྱན་དང་ཆ་ལུགས་ཐམས་ཅད་རྫོགས་པ་ཤར་སྒོའི་ནང་གི་ཁྱམས་ལ་དབང་སྟེགས་པདྨ་འདབ་བརྒྱད་ལ་འཁོད། དེའི་གནས་གསུམ་དུ་ཡིག་འབྲུ་གསུམ་གྱིས་མཚན་པ་དང་སློབ་དཔོན་གྱི་ཐུགས་ཀའི་འོད་ཟེར་གྱིས་བསྐུལ་བས་ཟངས་མདོག་དཔལ་གྱི་རི་བོ་སོགས་འོག་མིན་སྤྲུལ་པའི་ཞིང་རབ་འབྱམས་ནས་（6བ）མཁའ་ཁྱབ་ཀྱི་རྒྱལ་བ་སྲས་དང་བཅས་པ་ཐམས་ཅད་གུ་རུ་པདྨ་ཐོད་ཕྲེང་རྩལ་གྱི་རྣམ་པར་བཞེངས་ནས་སྐུ་གསུང་ཐུགས་ཀྱི་དབང་བྱིན་དངོས་གྲུབ་མ་ལུས་པ་ཕྱག་རྒྱ་ཡིག་འབྲུ་ཕྱག་མཚན་གྱི་རྣམ་པར་ཁ་ཆར་བུ་ཡུག་འཚུབས་པ་ལྟར་སྤྱན་དྲངས་ཏེ་ཁྱེད་རང་རྣམས་ལ་སིབ་སིབ་ཐིམ་པར་མོས་ཤིག （ཞེས་འབེབས་རྫས་བཏུལ་ཞིང་ཐོད་རྔ་རོལ་མོའི་སྒྲ་དང་བཅས་ཚིག་བདུན་གསོལ་འདེབས་ལན་གསུམ་མཐར་བཛྲ་གུ་རུ་ལ།）ཛྙཱ་ན་ཨ་བེ་ཤ་ཡ་ཨ་ཨཱ༔ （བཏགས་པ་མང་དུ་བཟླས་པས་དབབ།）དེ་ལྟར་བྱིན་དབབ་པའི་ཡེ་ཤེས་པ་དེ་ཉིད་བྱང་ཆུབ་མ་ཐོབ་ཀྱི་བར་དུ་བརྟན་པར་གྱུར་པར་མོས་ཤིག །（སྤྱི་བོར་རྡོ་རྗེ་རྒྱ་གྲམ་དུ་བཀོད་ལ།）ཏིཥྛ་བཛྲ་（ཞེས་བརྗོད།）དེས་བྱིན་རླབས་ཀྱི་གཞི་འགོད་པ་སོང་ནས། དབང་བསྐུར་བ་དངོས་ལ། བུམ་པ་རང་བྱུང་གི་ཕོ་བྲང་ཡེ་ཤེས་ཀྱི་གཞལ་མེད་ཁང་ཆེན་པོར་བུམ་བཅུད་པདྨ་ཐོད་ཕྲེང་རྩལ་གྱི་ལྷ་ཚོགས་བཞུགས་པའི་སྐུ་ལས་ཟག་མེད་བདུད་རྩིའི་ཆུ་རྒྱུན་བབས་པ་ཁྱེད་རང་རྣམས་ཀྱི་སྤྱི་བོ་ནས་ཞུགས། ལུས་ཀྱི་ནང་ཐམས་ཅད་གང་བས་རྣམ་སྨིན་གདོས་བཅས་ཀྱི་དྲི་མ་སྦྱངས་ཏེ་ཟག་མེད་འཇའ་ལུས་རྡོ་རྗེ་སྐུའི་དབང་མཆོག་ཐོབ་པར་མོས་ཤིག །（7ན）（བུམ་པ་ཐོགས་ལ།）ཧཱུྃ༔ རང་བྱུང་མཐའ་བྲལ་བུམ་པའི་གཞལ་ཡས་སུ༔ རྒྱལ་དབང་ཨོ་རྒྱན་པདྨའི་ལྷ་ཚོགས་བཞུགས༔ དེང་འདིར་སྐལ་ལྡན་བུ་ལ་དབང་བསྐུར་བས༔ འགྱུར་མེད་སྐུ་ཡི་དབང་མཆོག་ཐོབ་པར་ཤོག༔ （རྩ་སྔགས་དང་།）ཀཱ་ཡ་ཨ་བྷི་ཥིཉྩ་ཧཱུྃ༔ （ཞེས་བུམ་པ་སྤྱི་བོར་བཞག་ལ་བུམ་ཆུ་བྱིན།）མདུན་བསྐྱེད་ཀྱི་ཐུགས་ཀ་ནས་གསུང་རྡོ་རྗེ་གསང་སྔགས་ཀྱི་སྙིང་པོ་སྔགས་ཕྲེང་འོད་ཟེར་འབར་བའི་རྣམ་པ་ཅན་དཔག་ཏུ་མེད་པ་བྱུང་། ཁྱེད་རང་རྣམས་ཀྱི་མགྲིན་པར་ཐིམ་པས་ལས་རླུང་སྲོག་རྩོལ་གྱི་རྒྱུ་བ་ངྷུ་ཏིར་དག་སྟེ་འགག་མེད་ཚངས་དབྱངས་གསུང་གི་དངོས་གྲུབ་ཐོབ་པར་མོས་ཤིག །（སྔགས་བྱང་མགྲིན་པར་བཞག་ལ།）ཧཱུཾ༔ འགག་མེད་དབྱངས་ལས་རང་བྱུང་རྡོ་རྗེའི་སྒྲ༔ དངོས་གྲུབ་ཀུན་བདག་གསང་སྔགས་ཐབས་ཀྱི་སྒོ༔ འཕྲད་པ་དོན་ལྡན་འོད་འབྱུང་རིན་ཆེན་གཏེར༔ དབང་བསྐུར་ཉག་གཅིག་དགོངས་པ་མཐར་ཕྱིན་ཤོག༔ （རྩ་སྔགས་དང་།）ཝཱ་ཀ་ཨ་བྷི་ཥིཉྩ་ཧཱུཾཿ （སྔགས་ཕྲེང་ལག་ཏུ་གཏད་ལ།）ཧཱུྃ༔ ཕྲིན་ལས་བཞི་ལ་རང་དབང་བསྒྱུར་བའི་ཐབས༔ རིན་ཆེན་ལ་སོགས་（7བ）རྒྱུ་ལས་གྲུབ་པ་ཡི༔ ཕྲེང་བ་འདི་གཏད་རྒྱུན་དུ་མ་ཡེངས་པར༔ ཡི་དམ་སྙིང་པོ་རྩེ་གཅིག་བཟླ་བར་མཛོད༔ སྔགས་ཀྱི་རྗེས་ཟློས་ལན་གསུམ་གྱིས་ཐོག་དྲངས་ཏེ་བརྒྱ་རྩ་བཟླ་བར་ཞུ། （ཞེས་ཕྲེང་བ་སྦྲེལ་ལ་བཛྲ་གུ་རུ་བརྒྱ་རྩ་བཟླར་གཞུག） ། མདུན་བསྐྱེད་ཀྱི་ཐུགས་ཀ་ནས་ཐུགས་བདེ་སྟོང་གཉིས་སུ་མེད་པའི་ཡེ་ཤེས་ཀྱི་ངོ་བོ་འོད་ལྔའི་ཐིག་ལེ་ཧྲཱིཿཡིག་གིས་མཚན་པ་རྒྱངས་ཀྱིས་འཕྲོས། ཁྱེད་རང་རྣམས་ཀྱི་སྙིང་དབུས་སུ་ཐིམ་པས་ལྔ་ལྡན་ཡེ་ཤེས་སྙིང་པོ་ཨོ་རྒྱན་རྡོ་རྗེ་འཆང་གི་དགོངས་པ་མངོན་དུ་བརྙེས་ནས་གུ་རུ་ཉིད་དང་སྤངས་རྟོགས་ཡོན་ཏན་མཉམ་པ་ཉིད་དུ་གྱུར་ཏེ་རྩོལ་བ་མེད་པའི་ཕྲིན་ལས་ལ་མངའ་དབང་འབྱོར་བར་མོས་ཤིག （ཐིག་ལེ་ཧྲཱིཿཡིག་སྙིང་གར་བཞག་ལ།）ཧཱུྃ༔ དུས་གསུམ་རྒྱལ་བའི་ཐུགས་ཀྱི་རང་བཞིན་དབྱིངས༔ སྐུ་གསུམ་ཡེ་ཤེས་ལྔ་ལྡན་ཡོན་ཏན་བདག༔ ཐུགས་རྗེ་རྗེས་ཆགས་ཧྲཱིཿཡིས་དབང་བསྐུར་བས༔ གུ་རུའི་ཐུགས་དང་དབྱེར་མེད་རོ་གཅིག་ཤོག༔ （རྩ་སྔགས་དང་།）ཙིཏྟ་ཨ་བྷི་ཥིཉྩ་ཧཱུྃ༔ དེ་ལྟར་ཟབ་མོའི་དབང་ཐོབ་པ་ལ་སློབ་དཔོན་ལྷ་དང་བཅས་པས་བཀྲ་ཤིས་པའི་བདེན་ཚིག་བརྗོད་ཅིང་མེ་ཏོག་གི་ཆར་སིལ་མར་བསྙིལ་བས་（8ན）བདེ་ལེགས་སུ་བྱས་པར་མོས་ཤིག （ཅེས་རྟེན་སྙིང་གིས་ཐོག་དྲངས་ཤིས་བརྗོད་ཇི་ལྟར་རིགས་པ་རྒྱ་ཆེར་སྤེལ།） དེས་རྡོ་རྗེ་ཚིག་བདུན་སྒྲུབ་པའི་མན་ངག་ཟབ་མོའི་བྱིན་རླབས་དབང་གི་རིམ་པ་ལེགས་པར་གྲུབ་པ་ཡིན་པས་རྡོ་རྗེ་ཐེག་པའི་དམ་ཚིག་སྤྱི་དང་བྱེ་བྲག་གིས་བསྡུས་པ་མཐའ་དག་ཚུལ་བཞིན་དུ་བསྲུང་སྙམ་པས་འདིའི་རྗེས་ཟློས། ཧོཿ རྒྱལ་ཀུན་ཐུགས་རྗེའི་རང་གཟུགས་སྤྱན་རས་གཟིགས༔ རང་བྱུང་པདྨ་ལས་འཁྲུངས་སྐྱེ་འཆི་མེད༔ བཀའ་དྲིན་སངས་རྒྱས་ཀུན་ལས་ལྷག་པ་ལ༔ རྟག་ཏུ་གསོལ་འདེབས་རྡོ་རྗེའི་ཚིག་བདུན་དང་༔ བདེ་གཤེགས་ཡོངས་འདུས་སྙིང་པོ་སིངྔྷི་མཆོག༔ རྟག་ཏུ་བཟླ་ཞིང་ཡི་དམ་མཆོག་ཏུ་བཟུང་༔ རྩ་གསུམ་ནོར་ལྷ་བཀའ་སྲུང་ཡོངས་འདུས་དཔྱིད༔ ཀུན་འདུས་རིན་ཆེན་ཡིད་བཞིན་ནོར་བུའི་ཚུལ༔ ནམ་ཡང་མི་འབྲལ་སྲོག་གི་གཏའ་རུ་བཟུང་༔ སོ་བྱང་སྔགས་ཀྱི་དམ་ཚིག་མ་ལུས་པ༔ ཀུན་བཟང་གུ་རུ་སྐྱབས་གཅིག་བླ་མེད་ཀྱི༔ གསང་གསུམ་རྡོ་རྗེའི་བྱིན་རླབས་སྒོ་གསུམ་དུ༔ མྱུར་འཇུག་ཚེ་འདིར་གྲོལ་བར་མཛད་དུ་གསོལ༔ （ལན་གསུམ། གཏང་（8བ）རག་གི་མཎྜལ་དང་ལུས་དབུལ་དགེ་བསྔོ་སྤྱི་ལྟར་བྱས་ལ་སློབ་མ་གྲོལ། སློབ་དཔོན་གྱིས་དཀྱིལ་འཁོར་བསྡུ་ཆོག་ཀྱང་སྤྱི་ལྟར་བྱས་པས་གྲུབ་བོ། །འདིས་ཀྱང་ཟབ་ལམ་ཕྲིན་ལས་རྒྱུན། །ཕྱོགས་མཐར་འདྲེན་པའི་རྒྱུར་གྱུར་ཏེ། །འབྲེལ་ཚད་པདྨ་འོད་ཞིང་དུ། །སྟོན་འཁོར་དགོངས་པ་རོ་གཅིག་ཤོག །ཅེས་པའང་གཏེར་ཆེན་ཉིད་ཀྱི་དངོས་སློབ་ཆོས་བདག་བླ་མ་བྱང་ཆུབ་རྡོ་རྗེའི་བཞེད་སྐོང་དུ་འཇིགས་བྲལ་ཡེ་ཤེས་རྡོ་རྗེས་མཚམས་སྦྱོར་མདོར་བསྡུས་བཀླག་ཆོག་ཏུ་བསྡེབས་པ་སིངྔྷི་རསྟུ།། །།）