DJYD-KABUM-24-YA-026

Previous Text Back to Volume Page Next Text

Wylie title
Location	bdud 'joms rin po che bka' 'bum Volume 24, Text 26, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. '*. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 24: . Kalimpong: Dupjung Lama, 1979-1985.*
Side notes
More details More details
Genre

[edit]

༄༅། །པད་གླིང་འཁྲུངས་རབས་རྟོགས་བརྗོད་དད་པའི་མེ་ཏོག་གི་ཁ་སྐོང་མོས་པའི་ཟེའུ་འབྲུ་ཞེས་བྱ་བ་བཞུགས་སོ། །

（1བ）པད་གླིང་འཁྲུངས་རབས་རྟོགས་བརྗོད་དད་པའི་མེ་ཏོག་གི་ཁ་སྐོང་མོས་པའི་ཟེའུ་འབྲུ་ཞེས་བྱ་བ། ཨོཾ་སྭསྟི། པདྨ་གསལ་སྤྲུལ་པདྨ་གླིང་པ་ཡི། །འཁྲུངས་རབས་རིན་ཆེན་ཅོད་པན་ཐོད་བཅིངས་ཏེ། །ཚུལ་དེའི་རྟོགས་བརྗོད་དད་པའི་མེ་ཏོག་གི །ཁ་སྐོང་མོས་པའི་ཟེའུ་འབྲུ་འདི་ན་འཛུམ། །དེའང་གཏེར་ཆེན་ཆོས་ཀྱི་རྒྱལ་པོ་པདྨ་གླིང་པ་ནས་བདུན་པ་ཀུན་བཟང་ངག་དབང་ཆོས་ཀྱི་བློ་གྲོས་བར་གྱི་སྐུ་ཕྲེང་གི་རྣམ་ཐར་རྣམས་རྗེ་པད་གླིང་བརྒྱད་པས་མཛད་པའི་འཁྲུངས་རབས་རྟོགས་བརྗོད་དད་པའི་མེ་ཏོག་ལྟར་ལ། དེ་ནས་ད་ལྟའི་བར་གྱི་སྐུ་ཕྲེང་རྣམས་ཀྱི་མཛད་（2ན）རྣམ་མདོར་བསྡུས་ཁ་སྐོང་དུ་འབྲི་བར་སྟེ། པད་གླིང་བརྒྱད་པ་ཀུན་བཟང་བདེ་ཆེན་རྡོ་རྗེའམ་ངེས་དོན་བསྟན་པའི་ཉི་མ་དཔལ་བཟང་པོ་ནི། བུམ་ཐང་དབང་འདུས་ཆོས་གླིང་དུ་ཡབ་མྱོས་གདུང་ཆོས་རྗེ་ཆོས་ཀྱི་རྒྱལ་མཚན་དང་། ཡུམ་སངས་རྒྱས་པདྨོའི་སྲས་སུ་རབ་བྱུང་བཅུ་བཞི་པའི་ཆུ་མོ་ཡོས་ཀྱི་ལོར་སྐུ་འཁྲུངས། བལྟམས་པའི་ཚེ་ངོ་མཚར་བའི་ལྟས་དང་། གསུང་ངག་ཕེབས་ཙམ་ནས་སྔོན་གནས་རྗེས་དྲན་གྱི་ཚུལ་མང་པོ་གསལ་བར་བསྟན་པའི་པད་གླིང་བདུན་པའི་ཡང་སྲིད་རྩོད་མེད་དུ་གྲགས་ཤིང་ངེས་ཤེས་རྙེད། དགུང་ལོ་བཞི་པ་ལ་གདན་ས་ལྷ་（2བ）ལུང་ཐེག་མཆོག་རབ་རྒྱས་གླིང་དུ་སྤྱན་དྲངས་ཏེ་གོང་མའི་ཆོས་ཀྱི་ཁྲི་ལ་མངའ་གསོལ། ཐུགས་སྲས་བརྒྱད་པ་མཆོག་ནས་གདན་སའི་མངའ་དབང་ཡོངས་རྫོགས་འབུལ་བར་མཛད། གོང་མའི་རིགས་སྲས་པདྨ་ཀུན་བཟང་རིག་འཛིན་རྡོ་རྗེ་རིགས་བདག་ཏུ་བསྟེན་ནས། ཐུན་མོང་ཡི་གེ་འབྲི་ཀློག་དང་། རང་ལུགས་ཆོ་ག་ཆོས་སྤྱོད་སོགས་ཀྱི་དཔེ་འཛིན། གདངས་དབྱངས་རོལ་ཚིག་གར་འཆམས་སོགས་ལ་གསན་སྦྱོང་མཛད་ཅིང་བརྡ་བསྟན་པ་ཙམ་གྱི་ཁོང་དུ་ཆུད། ཁྱད་པར་སྔ་འགྱུར་རྒྱུད་འབུམ་ཡོངས་རྫོགས་ཀྱི་བཀླག་ལུང་། གུ་རུ་ཆོས་དབང་། པདྨ་ལས་འབྲེལ་རྩལ། དུང་མཚོ་རས་པ། ཐང་སྟོང་སྙན་བརྒྱུད་རྣམས་ཀྱི་ཆོས་བཀའ་ཡོངས་རྫོགས། ཀློང་ཆེན་པའི་མཛོད་བདུན། ངལ་གསོ་སྐོར་གསུམ། གསང་འགྲེལ་ཕྱོགས་བཅུ་མུན་སེལ་བཅས་ཀྱི་ཁྲིད་ལུང་། ལྷག་པར་པད་གླིང་ཆོས་སྐོར་ཡོངས་རྫོགས་ཀྱི་དབང་ལུང་མན་ངག་ཁྲིད་རྒྱུན་རྣམས་དང་། ཐུགས་སྲས་ལྔ་པའི་བཀའ་འབུམ་བཅས་ཐུན་མིན་གདམས་སྐོར་མཐའ་དག་བུམ་པ་གང་བྱོས་སུ་གསན། གཞན་ཡང་སྨིན་གླིང་ཁྲི་ཆེན་འགྱུར་མེད་ཡིད་བཞིན་དབང་རྒྱལ། རྡོར་འཛིན་འགྱུར་མེད་（3ན）ཚེ་དབང་། མདོ་ཁམས་རྫོགས་ཆེན་པ་རྒྱལ་སྲས་གཞན་ཕན་མཐའ་ཡས། ཀརྨའི་མཁན་རིན་ཆེན་དར་རྒྱས། མཁན་ཆེན་སངས་རྒྱས་ཆོས་འཕེལ་སོགས་ཁམས་བོད་མཁས་གྲུབ་དགེ་བའི་བཤེས་གཉེན་དུ་མ་ལས། རྒྱལ་བའི་བཀའ་འགྱུར་རིན་པོ་ཆེ་དང་། བསྟན་འགྱུར་ལས་དེང་སང་ལུང་རྒྱུན་བཞུགས་རིགས། སྔ་འགྱུར་བཀའ་མའི་ཆོས་སྡེ་ཡོངས་རྫོགས། བཀའ་དགོངས་ཕུར་གསུམ་སོགས་གཏེར་ཁ་གོང་འོག་ནས་བཟུང་གཏེར་བདག་གླིང་པའི་བར་གྱི་གཏེར་ཆོས་ཕལ་མོ་ཆེའི་དབང་ཁྲིད་ལུང་བཅས་ཤིན་ཏུ་མང་པོ། ཞར་ལ་ལཉྫ་ཝརྟུ་སོགས་ཡིག་རིགས། སུམ་ཅུ་པ་དང་རྟགས་ཀྱི་འཇུག་པ། སྙན་ངག་མེ་ལོང་མ། སྡེབ་སྦྱོར་རིན་ཆེན་འབྱུང་གནས། རྩིས་གཞུང་ཉིན་བྱེད་སྣང་བ་དང་། འབྱུང་རྩིས་ཟླ་བའི་འོད་ཟེར། སྒྲ་ཀ་ཙན་དབྱངས་གསུམ། དཀྱིལ་འཁོར་འབྲི་ཐིག་དང་ལྷ་སྐུའི་ཐིག་ཚད་སོགས་བཟོའི་རིགས་བྱེད། རྒྱུད་བཞི་སོགས་གསོ་བ་རིག་པའི་སྐོར། དབུ་ཚད་ཕར་ཕྱིན་མངོན་པ་མཛོད་སོགས་གཞུང་ཆེན་མང་པོའི་བཤད་སྲོལ། མདོར་ན་ཐུན་མོང་རིག་གནས་ཆེ་ཆུང་ནས། ཐུན་མིན་རྡོ་རྗེ་སློབ་དཔོན་གྱི་ལས་（3བ）ཆེན་བཅུ་གསུམ་བར་གསན་བསམ་ཕུལ་དུ་ཕྱིན་པ་གནང་། དགུང་ལོ་ཉེར་གཅིག་བཞེས་སྐབས་གསར་བཏོན་མཛད་པའི་རི་ཐུ་ངོ་མཚར་ཁྱད་ཆོས་ཅན་དེང་སང་ཡང་མཇལ་དུ་ཡོད། སྐབས་ཅི་རིགས་པར་བསམ་འགྲུབ་གུ་རུ་ལྷ་ཁང་དང་། སྦས་ཡུལ་མཁན་པ་ལྗོངས་སོགས་སྒྲུབ་གནས་ཁྱད་པར་ཅན་རྣམས་སུ་ལྷག་པའི་ལྷ་དུ་མའི་བསྙེན་སྒྲུབ་ལ་བརྩོན་པར་མཛད་པ་ན་གྲུབ་པའི་ལྟས་མཚན་ཁྱད་པར་ཅན་མངོན་དུ་གཟིགས་ཤིང་། ལྷ་མོ་དབྱངས་ཅན་མ་ནི་མི་དང་མི་ལབ་པ་བཞིན་ཡིན་པར་གྲགས། བོད་ཀྱི་རྒྱལ་ཚབས་རྟ་ཚག་པས་དབུའི་མཆོད་གནས་སུ་བཀུར་ཏེ་བསྟན་འགྲོའི་བདེ་རིམ་སྤྱི་དང་དུས་འཁྲུགས་མཐའ་དམག་བཟློག་ཐབས་ཡང་ཡང་མཛད། ཁྱད་པར་བསམ་ཡས་རྟ་མགྲིན་གྱི་ཕྱག་སར་འདྲུལ་བ་སྲུས་ཀྱང་འབུལ་མ་ཐུབ་པར་ཡོད་པ་ན། བསྟན་སྲུང་གནོད་སྦྱིན་ཙིའུ་དམར་པོ་སྐུ་རྟེན་པའི་ཁོག་བརླམ་གྱི་ལུང་དོན་བཞིན་རྒྱལ་ཚབས་ནས་གདན་འདྲེན་ཞུས་པ་ལྟར་བསམ་ཡས་སུ་བྱོན་ཏེ་ཕྱག་སྔར་བཞིན་ཕུལ་ནས་སྔ་ཕྱིར་རབ་གནས་ལན་མང་མཛད། མཐའ་འདུལ་མཁོ་མཐིང་ལྷ་ཁང་གི་རྟེན་གཙོ་རྣམ་སྣང་གི་དབུ་འདྲུལ་བ་ཡང་སླར་ཕུལ་ནས་རབ་གནས་དང་། ཁྲོ་བོ་རོལ་པའི་（4ན）གཏོར་ཟློག་སོགས་བསྟན་སྲིད་སྤྱིའི་རིམ་གྲོ་མང་དུ་གནང་། སྔོན་རིག་འཛིན་པད་གླིང་གིས་ལ་ཡག་སྐྱེར་ཆུ་ལྷ་ཁང་ནས་བཞེས་པའི་གཏེར་སྒྲོམ་གྱི་རྡོ་ཆེན་པོ་ཞིག་རྟེན་གཙོ་རྣམ་སྣང་གི་ཕྱག་ཏུ་ཕུལ་ནས་ཡོད་པ། དུས་ཕྱིས་དགེ་ལྡན་པའི་གྲྭ་པ་མང་པོ་ཡོངས་སྟེ་སྐུའི་ཕྱག་ཏུ་རྡོ་འདི་འདྲ་ཕུལ་བ་མི་རིགས་ཟེར་ནས་ཕྱི་རོལ་དུ་བཏོན་པས། དེ་ནས་བཟུང་ཡུལ་དེར་ནད་ཡམས་མུ་གེ་སོགས་རྐྱེན་ངན་དུ་མ་རྒྱུན་མར་བྱུང་བ་ལ་བརྟེན། ལ་ཡག་བླ་དཔོན་ཡུལ་སྡེ་མཐའ་དག་འཛོམ་ནས་སླར་འབུལ་བར་བརྩམས་ཀྱང་གཏན་ནས་འབུལ་མ་ཐུབ་པར་ལུས་ནས་ཡོད་པ། རྗེ་འདི་ཉིད་ཀྱིས་རྣམ་སྣང་གི་ཕྱག་ཏུ་སླར་ཕུལ་ནས་རབ་གནས་མཛད་པས་རྐྱེན་ངན་ཐམས་ཅད་ཞི་བ་མཐོང་ཆོས་སུ་གྱུར། རང་དགོན་ལྷ་ལུང་གཙུག་ལག་ཁང་གི་ཡང་ཐོག་ཀུན་གཟིགས་སྨིན་གྲོལ་ཆོས་ཀྱི་ཕོ་བྲང་དུ་རྟེན་གཙོ་གསེར་ཟངས་ལས་གྲུབ་པའི་རྡོར་སེམས་མི་ཚད་མ། དངུལ་ལས་གྲུབ་པའི་བདེ་གཤེགས་མཆོད་རྟེན་བརྒྱད་དང་། ཉེ་སྲས་བརྒྱད། བཀའ་ཐང་གསེར་ཕྲེང་མ། གྲུབ་ཐོབ་བརྒྱད་ཅུ། པད་གླིང་རྣམ་ཐར་རྒྱས་པའི་གྲལ་ཐང་སོགས་སྐུ་རྟེན་བྲིས་འབུར་མང་པོ། གསུང་（4བ）རྟེན་སྙིང་ཐིག་ཡ་བཞི། ཀློང་ཆེན་མཛོད་བདུན། འཇིགས་གླིང་བཀའ་འབུམ་པོད་དགུ་སོགས་དང་། ཁྱད་པར་པད་གླིང་ཆོས་སྐོར་ཡོངས་རྫོགས། ཐུགས་སྲས་ལྔ་པའི་བཀའ་འབུམ་བཅས་གསར་བཞེངས། ཐུགས་རྟེན་དུ་མཁན་ལྗོངས་སུ་སྒྲུབ་སྡེ་ཀུན་བཟང་ཆོས་གླིང་རྟེན་དང་བརྟེན་པར་བཅས་པ་གསར་བསྐྲུན་མཛད། ལྷོ་ལྗོངས་འབྲུག་ཡུལ་ན་སྐབས་འདི་དག་ཏུ་ནང་འཁྲུགས་བར་མ་ཆད་པར་བྱུང་བ་ལ་བརྟེན་ཀྲོང་སར་དཔོན་སློབ་ཨོ་རྒྱན་དབང་ཕྱུག་ནས་གསོལ་བ་བཏབ་པ་བཞིན་རྗེ་འདི་ཉིད་ཀྱིས་འཁོན་འཁྲུགས་ཞི་བའི་ཐབས་དུ་མ་མཛད་པས་ཡུལ་ཁམས་བདེ་བ་ལ་བཀོད། ཁྱད་པར་དཔོན་སློབ་དེ་ཉིད་བསྟན་པའི་སྦྱིན་བདག་ཆོས་སྐྱོང་བའི་རྗེ་བོ་སྐལ་བ་ཅན་དུ་གཟིགས་ཏེ་དབང་སྡུས་མངའ་ཐང་སྐྱེད་པའི་ལས་སྦྱོར་མཛད་པ་ལ་བརྟེན་ནས་མི་རིང་བར་དཔོན་སློབ་ཨོ་རྒྱན་དབང་ཕྱུག་ཉིད་ལ་འབྲུག་རྒྱལ་པོའི་མཚན་གནས་གློ་བུར་དུ་བྱུང་ཞིང་། དེ་ནས་བཟུང་སྔོན་ཆད་མ་གྲགས་པ་ལ་འབྲུག་རྒྱལ་པོ་དང་འབྲུག་རྒྱལ་ཁབ་ཅེས་པའི་མཚན་དོན་ཡོངས་སུ་གྲགས་པ་འདི་བྱུང་། སྐབས་འདི་དག་ཏུ་མདོ་ཁམས་སུ་འཇམ་མགོན་མཁྱེན་ཀོང་རྣམ་གཉིས་ནས་གུ་རུའི་ལུང་བསྟན་དུས་བབས་ཀྱི་མཛད་（5ན）ཕྲིན་རྒྱ་ཆེན་པོའི་རྣམ་ཐར་སྙན་གྲགས་གསན་པས་ཐུགས་འཕྲོག་སྟེ་རིན་ཆེན་གཏེར་མཛོད་སོགས་སྨིན་གྲོལ་གདམས་ཟབ་སྤྱི་དང་ལྷག་པར་པད་གླིང་ཚེ་སྒྲུབ་ནོར་བུ་ལམ་ཁྱེར་གྱི་དབང་རྒྱུན་རིང་བརྒྱུད་བར་ལམ་ནས་ཆད་པ་རྗེ་འཇམ་དབྱངས་མཁྱེན་བརྩེའི་དབང་པོར་ཉེ་བརྒྱུད་ཁྱད་པར་ཅན་བཞུགས་པ་ཉིད་གསན་པའི་ཕྱིར་སྐུ་དངོས་ཀྱིས་མཇལ་དུ་འབྱོན་པར་བཞེད་ནའང་། གདན་ས་གཙོ་གྱུར་ཆོས་སྡེ་ཁག་གི་འཛིན་སྐྱོང་དང་། སྐྱེས་ཆེན་ཞལ་སློབ་མང་པོའི་བཞེད་སྐོང་སོགས་མཛད་ཕྲིན་རྒྱ་ཆེ་བས་ཞབས་བསྐྱོད་མ་གྲུབ་པར་རྦ་སྤྲུལ་ཁམས་གསུམ་ཡོངས་གྲོལ་ཉིད་སྨིན་གྲོལ་གདམས་ཟབ་བདུད་རྩིའི་སྐྱེས་བཞེས་པར་ཆེད་དུ་མངགས་གཏོང་གནང་ཞིང་། རྗེ་བརྒྱད་པ་འདི་ཉིད་ཀྱིས་བསྐུལ་ངོར་གནང་བའི་ཐུགས་སྒྲུབ་ནོར་རྒྱམ་གྱི་བསྙེན་ཡིག་ཀྱང་འཇམ་མགོན་གུ་ཎའི་བཀའ་འབུམ་ཁྲོད་ན་བཞུགས། སྔར་པད་གླིང་གསུང་སྤྲུལ་གཉིས་པ་རྒྱལ་དབང་བསྟན་འཛིན་གྲགས་པ་དང་། གསུམ་པ་ཀུན་མཁྱེན་ཚུལ་ཁྲིམས་རྡོ་རྗེ། སྨིན་གླིང་ཡབ་རྗེ་གསང་བདག་ཕྲིན་ལས་ལྷུན་གྲུབ་དང་། གཏེར་ཆེན་འགྱུར་མེད་རྡོ་རྗེ་ནས་བཟུང་ད་ལྟའི་བར་ལྷ་ལུང་པ་དང་སྨིན་གླིང་ཐུགས་ནང་དར་（5བ）དཀར་ཡུག་གཅིག་ཏུ་གྱུར་པས། རང་ལུགས་ཆོས་སྲིད་ཕྲིན་ལས་ཀྱི་འབྲེལ་བ་ཟམ་མ་ཆད་པར་ཡོད་པ་བཞིན་རྗེ་འདི་ཉིད་ཀྱང་སྨིན་གླིང་དུ་ཡང་ཡང་ཕེབས་ཤིང་། ཕྱིས་སྨིན་ཁྲི་འགྱུར་མེད་ཡིད་བཞིན་དབང་རྒྱལ་ཞིང་བརྗེས་ཏེ་གདུང་བརྒྱུད་ཆད་ལ་ཉེ་བའི་སྐབས་གདུང་མཆེད་མཁན་ཆེན་བདེ་ཆེན་མཆོག་གྲུབ་ནས་རྗེ་བརྒྱད་པ་འདི་ཉིད་མྱོས་གདུང་བསྙོན་མེད་ལ་བརྟེན་གསུང་བརྒྱུད་གསོ་བར་གསོལ་འདེབས་མཛད་པར་མ་གསན་པའི་ལོ་རྒྱུས་ཀྱང་འབྱུང་། ཐུགས་སྲས་ཞལ་སློབ་ཀྱི་གཙོ་བོ་རྦ་ཁ་རིག་འཛིན་ཁམས་གསུམ་ཡོངས་གྲོལ། མཆོག་གླིང་གཏེར་སྲས་འཇིགས་མེད་ཚེ་དབང་ནོར་བུ། སྨིན་གླིང་མྱོས་གདུང་རྗེ་བཙུན་མ་སྐུ་མཆེད་གཉིས་དང་། རྡོར་འཛིན་རྣམ་གྲོལ་རྒྱ་མཚོ། ཡེ་འབྲོག་ཞྭ་དེའི་འཁྲུལ་ཞིག་མདོ་སྔགས་གླིང་པ་སོགས་བསྟན་འཛིན་གྱི་སྐྱེས་ཆེན་དུ་མ་དང་། གཞན་ཡང་གཏམ་ཞིང་བླ་མ་བདེ་ཆེན། ཉེ་བར་གནས་པ་སྔགས་རམ་པ་ཚུལ་ཁྲིམས་བསྟན་འཕེལ་སོགས་རང་གཞན་དོན་གཉིས་བསྒྲུབ་ནུས་པའི་ཞལ་སློབ་ཤིན་ཏུ་མང་། གཞན་སྔོན་འགྲོ་དངོས་གཞི་དབང་ཁྲིད་ལྗགས་ལུང་སོགས་ཀྱིས་རྗེས་སུ་བཟུང་བའི་སློབ་ཚོགས་ནི་གྲངས་ལས་འདས། དབུས་གཙང་（6ན）ནས་མདོ་ཁམས་ཡན་ལ་རྗེ་འདིའི་མཛད་ཕྲིན་མཚན་སྙན་གྱིས་མ་ཁྱབ་པ་མེད། བར་སྐབས་ཤིག་ན་འབྲུག་རྒྱལ་ཨོ་རྒྱན་དབང་ཕྱུག་ལ་གསུང་ཤོག་ཐོག་བུམ་ཐང་སྐུ་རྗེས་ཉེ་འགྲམ་དུ་བསམ་ལྷུན་མན་ངག་བཅུ་གསུམ་གྱི་སྨན་སྐུ་གཟུངས་རབ་ཚད་ཐུབ་ཅན་གསར་བཞེངས་དང་འབྲེལ་ལོ་བསྟར་དེའི་སྒོ་ནས་འབུམ་ཚོགས་དང་གསོལ་འདེབས་གྲངས་མང་བསྒྲུབ་ན་ལྷོ་ལྗོངས་རྗེ་འབངས་ཡུལ་ཁམས་སྤྱི་ལ་ཕན་ངེས་ཞེས་བཀའ་སློབ་གནང་ཚུལ་གྱི་གསུང་སྒྲོས་རྗེ་རྡོར་འཛིན་རྣམ་གྲོལ་རྒྱ་མཚོའི་ཞལ་སྔ་ནས་ཐོབ། སྐུ་ཚེའི་སྨད་ཕལ་ཆེ་བར་མཁན་ལྗོངས་སྒྲུབ་སྡེ་ཀུན་བཟང་ཆོས་གླིང་དུ་བཞུགས་གཏན་ཆགས། ཇི་ཞིག་ན་རྦ་སྤྲུལ་ཁམས་གསུམ་ཡོངས་གྲོལ་ཉིད་ཁམས་ཕྱོགས་སུ་གསན་བསམ་རྒྱ་ཆེ་བས་ཡུན་རིང་ཙམ་བཞུགས་འགོར་བྱུང་མཐར་སླར་གདན་ས་ལྷ་ལུང་བརྒྱུད་མཁན་ལྗོངས་སུ་ཕྱག་ཕེབས་པ་དང་མཇལ་འཕྲད་ཤིན་ཏུ་མཉེས་ཚོར་ཆེན་པོ་གནང་ཞིང་། གཏེར་མཛོད་སོགས་སྔར་མ་གསན་པ་རྣམས་རིམ་གྱིས་གསན་པར་བཞེད་ནའང་ཕྱོགས་འདུས་དད་ལྡན་མང་པོའི་རེ་སྐོང་སོགས་མཛད་ཕྲིན་རྒྱ་ཆེ་བས་འགྱང་སྟེ་གསན་བཞེས་མ་གྲུབ་པ་དོན་དུ་ཕྱི་མཐའ་གཟིགས་པའི་དགོངས་པ་སྐུའི་ཡང་（6བ）སྲིད་ལ་གཏད་པར་མངོན། གཉུག་མར་གནས་པ་དང་གློ་བུར་ལྷགས་པའི་དད་ལྡན་རྣམས་ལ་སྨིན་གྲོལ་གྱི་བདུད་རྩི་སོ་སོའི་མོས་སྐལ་ལྟར་སྩོལ་བཞིན་པའི་ངང་མི་རིང་བ་ན་གནས་དེ་ཉིད་དུ་གུང་གྲངས་ཞེ་དགུ་བཞེས་པ་རབ་བྱུང་བཅོ་ལྔ་པའི་ལྕགས་ཡོས་ལོར་གཟུགས་སྐུའི་བཀོད་པ་བསྡུས་ཏེ་པདྨ་འོད་ཀྱི་ཕོ་བྲང་ཆེན་པོར་གཤེགས་སོ། །འདི་སྐབས་ཁམས་རྫོང་སར་ན་རྗེ་འཇམ་དབྱངས་མཁྱེན་བརྩེའི་དབང་པོའི་ཞབས་སར་བདག་གི་རིགས་བདག་ཕུག་སྦྲུལ་འགྱུར་མེད་ངེས་དོན་དབང་པོ་ཉིད་བཞུགས་བཞིན་པའི་ཚེ། ནང་གཅིག་རྗེ་མཁྱེན་བརྩེའི་བཀའ་ལས། མདངས་ནུབ་ངེད་ཟངས་མདོག་དཔལ་རིའི་ཕོ་བྲང་གི་སྒོ་དྲུང་ན་སླེབས་འདུག །སྒོའི་ནང་ན་མར་ལ་དཔའ་བོ་མཁའ་འགྲོ་མང་པོས་པདྨ་གླིང་པའི་ཕེབས་བསུ་ལ་འགྲོ་ཞེས་འུར་དིར་གྱིས་བྱུང་། ཇི་ཞིག་ནས་བླ་མ་དགུང་ལོ་ན་ཡོལ་ཙམ་སྐུ་སྒེག་ཉམས་ན་བཟའ་གྲྭ་ཆས་དང་དབུ་ལ་པད་ཞུ་རྡོ་རྗེའི་ཏོག་ཅན་གསོལ་བ། ཞལ་དུ་ཤིང་ཏོག་གམ་གང་ཡིན་ངོ་མ་འཚལ་བའི་དམར་པོ་ཞིག་མུར་བཞིན་པ་འཛུམ་མདངས་ཤིགས་ཤིག་ཕེབས་བྱུང་བ་ན། དཔའས་བོ་མཁའ་འགྲོ་མ་རྣམས་འཚང་ཁ་ཤིགས་ཤིག་མདུན་བསུས་ནས་མཐའ་བསྐོར་ཏེ་སྒོའི་ནང་དུ་གདན་（7ན）དྲངས་སོང་། དེའི་རྗེས་སུ་ངེད་ཀྱང་འགྲོ་སྙམ་གྱིས་སྒོ་ཐེམ་དུ་རྐང་པ་འགོད་ལོངས་ཡོད་མེད་ལ་ནང་ནས་མི་འཇིགས་རྔམས་ཅན་ཞིག་གིས་སྒོ་ཐག་གིས་བཅད་སོང་བས་ནང་དུ་མ་ཐར། ད་ནང་དུ་ནི་མ་ཚུད། སྒོ་བརྡུང་ཡང་མི་དེས་ཕྱེ་མདོག་ཁ་པོ་ཞིག་མི་འདུག །ལོག་འགྲོ་བ་ལས་འོས་མི་འདུག་དགོངས་པ་ན་མནལ་སད། སྒོ་བཅད་པ་དེ་ངེད་ལ་ད་ལྟ་ཡོང་མ་རན་ཟེར་བའི་བརྡ་འདྲ། རང་རེ་སྔ་འགྱུར་བསྟན་པའི་སྲོག་ཤིང་པད་གླིང་བརྒྱད་པ་དེ་ཉིད་དགོངས་པ་གཞན་དོན་དུ་གཟིགས་པར་ཐག་ཆོད་གསུངས་ཏེ་ཐུགས་སྐྱོ་བའི་རྣམ་པ་ཚད་མེད་པ་དང་བཅས་དགོངས་རྫོགས་ཐུགས་སྨོན་གནང་སོང་ཞིང་། དེ་ནས་ཟླ་བ་གཉིས་ལྷག་ཙམ་ནས་བོད་ནས་པད་གླིང་བརྒྱད་པ་ཞིང་བརྗེས་པའི་བཅས་དགོངས་རྫོགས་ཐུགས་སྨོན་གནང་སོང་ཞིང་། དེ་ནས་ཟླ་བ་གཉིས་ལྷག་ཙམ་ནས་བོད་ནས་པད་གླིང་བརྒྱད་པ་ཞིང་བརྗེས་པའི་དགོངས་རྫོགས་འབུལ་མཁན་འབྲུག་པ་རྒྱལ་པོའི་ཞབས་གྲས་རེད་ཟེར་བའི་མི་ངོ་གཡོག་རྟ་དྲེལ་མང་པོ་ཅན་འབྱོར་སོང་ཞེས་ཞལ་ནས་དངོས་སུ་ཐོས་པའི་གསུང་སྒྲོས་ཁོ་བོ་བདུད་འཇོམས་སྤྲུལ་སྐུའི་སེམས་ལ་མ་བརྗེད་པར་ངེས་འདུག །ཞི་བར་གཤེགས་རྗེས་སྐུ་གདུང་རིན་པོ་ཆེ་གདན་ས་ལྷ་ལུང་དུ་སྤྱན་དྲངས་ཏེ་རིག་འཛིན་ཁམས་གསུམ་ཡོངས་གྲོལ་སོགས་ནས་（7བ）གདུང་མཆོད་ཟབ་རྒྱས་དང་བཅས་ཞུགས་འབུལ་གནང་ཞིང་གདུང་རྟེན་བཞེངས་པ་སོགས་གཤེགས་རྗེས་ཀྱི་སྲི་ཞུ་མཐར་ཕྱུང་། འབྲུག་རྒྱལ་ཨོ་རྒྱན་དབང་ཕྱུག་ནས་རྗེའི་སྐུ་དྲིན་གསོབ་པ་སོགས་ཚོགས་ཆེན་གསོག་པའི་དགོངས་བཞེད་བླ་ན་མེད་པས་གཏོང་བའི་མཛོད་སྒོ་གཏན་པ་མེད་པར་ཕྱེས་ཏེ་ཚོགས་ཀྱི་ཞིང་གཞན་ལས་ཁྱད་དུ་འཕགས་པར་དགོངས་ནས་བོད་ཀྱི་ལྷ་ས། བསམ་ཡས། ཁྲ་འབྲུག་སྟེ་ཆོས་འཁོར་རྣམ་གསུམ་གཙོ་བོར་གྱུར་པའི་སྟོད་གངས་རི་ནས་སྨད་དར་མདོ་ཡན་གྱི་བླ་སྤྲུལ་སྐྱེས་ཆེན་དགོན་སྡེ་རི་ཁྲོད་ཆེ་ཁག་རྣམས་སུ་དགོངས་རྫོགས་མཆོད་སྤྲིན་ནམ་མཁའ་མཛོད་དུ་སྤྲོ་བར་མཛད་དོ། །དེ་ལྟར་རྗེ་པད་གླིང་བརྒྱད་པ་འདི་ཉིད་རང་ལུགས་པད་གླིང་ཆོས་སྐོར་གྱི་དབང་ལུང་ཁྲིད་རྒྱུན་སོགས་ལྟ་ཅི་སྨོས། སྔ་འགྱུར་སྤྱིའི་རྒྱུད་ལུང་མན་ངག་མང་པོའི་རྒྱུན་ཤིན་ཏུ་ཉག་ཕྲར་གྱུར་པ་རྣམས་ཀྱང་དངོས་དང་བརྒྱུད་པའི་སྒོ་ནས་འཆི་ཁའི་ནད་པ་འཚོ་བའི་སྲོག་མཐུད་པ་ལྟ་བུར་མཛད་པས་བར་སྐབས་སུ་སྔ་འགྱུར་རིང་ལུགས་འཛིན་པ་རྣམས་ལ་འདི་ལས་བཀའ་དྲིན་ཆེ་བ་མ་བྱུང་ངོ་།། །། ༈ །པད་གླིང་དགུ་པ་བསྟན་འཛིན་ཆོས་ཀྱི་རྒྱལ་མཚན་ནི། དབང་འདུས་ཆོས་གླིང་དུ་ཡབ་མྱོས་（8ན）གདུང་གཏམ་ཞིང་ཆོས་རྗེ་འཆི་མེད་རྡོ་རྗེ་དང་། མ་ཡུམ་ཆོས་སྒྲོན་གྱི་སྲས་སུ་རབ་བྱུང་བཅོ་ལྔ་པའི་ཤིང་རྟ་ལོར་སྐུ་བལྟམས། འཁྲུངས་སྐབས་ཀྱི་ལྟས་དང་སྐུ་ན་ཕྲ་མོ་ནས་སྔ་མའི་རྣམ་འགྱུར་ཤིན་ཏུ་གསལ་བས་རྗེ་བརྒྱད་པའི་ཡང་སྲིད་དུ་ངོས་འཛིན་ཞུས། དགུང་ལོ་ལྔ་པར་གདན་ས་ལྷ་ལུང་དུ་སྤྱན་དྲངས་ཏེ་གོང་མའི་ཆོས་ཀྱི་ཁྲི་ལ་མངའ་གསོལ། ཡོངས་འཛིན་རྗེ་བརྒྱད་པའི་ཞལ་སློབ་རྡོར་འཛིན་པདྨ་ཚེ་དབང་གི་མདུན་ནས་ཡི་གེ་འབྲི་ཀློག་ནས་བརྩམས་རང་ལུགས་ཆོ་གའི་ཚིག་འཛིན་ཕྱག་ལེན་གར་ཐིག་དབྱངས་གསུམ་སོགས་ལ་གསན་སྦྱོང་རིམ་པར་མཛད། དགུང་ལོ་བཅོ་ལྔ་སྐོར་ནས་གཏེར་ཆེན་ཟིལ་གནོན་ནམ་མཁའི་རྡོ་རྗེ་ལས་རང་གཏེར་སོགས་ཀྱི་དབང་ལུང་དང་། ཞར་ལ་སུམ་རྟགས་སྙན་ངག་སོགས་གསན་སྦྱོང་། སྨིན་གླིང་སྒ་རྗེ་རྡོར་འཛིན་ཤེས་རབ་བསྟན་དར་ལས་དབང་གཞུང་ཅི་རིགས་དང་གཞུང་ཆེ་ཆུང་འགའི་བཤད་ཁྲིད། རྦ་ཁ་རིག་འཛིན་ཁམས་གསུམ་ཡོངས་གྲོལ་ལས་པད་གླིང་ཆོས་སྐོར་ཡོངས་རྫོགས་དང་། རིན་ཆེན་གཏེར་མཛོད་གཙོ་བོར་གྱུར་པའི་དབང་ལུང་མན་ངག་ཤིན་ཏུ་མང་བ་གསན། དགུང་ལོ་ཉི་ཤུ་སྐོར་ནས་ལྷ་ལུང་དང་ལ་རྒྱབ་སྒྲུབ་སྡེ་སོགས་དབེན་གནས་རྣམས་སུ་（8བ）རྩ་བ་གསུམ་གྱི་ལྷག་པའི་ལྷ་རབ་འབྱམས་ཀྱི་བསྙེན་སྒྲུབ་ཅི་རིགས་པ་གནང་བཞིན་རང་དགོན་མ་ལག་དང་བཅས་པ་ཆོས་དང་ཟང་ཟིང་གཉིས་ཀའི་སྒོ་ནས་ལེགས་པར་བསྐྱངས། བར་སྐབས་སུ་རྔན་ལུང་སྒང་སྟེང་ནས་གདན་དྲངས་པ་ལྟར་དེར་བྱོན་ནས་པད་ཕྲིན་བརྒྱད་པ་ཕྲིན་ལས་རྡོ་རྗེ་སོགས་ལ་པད་གླིང་ཆོས་སྐོར་ཡོངས་རྫོགས་ཀྱི་དབང་ལུང་སྩལ་ཞིང་། ཕྱོགས་དེའི་དད་ཅན་གྱི་སྐྱེ་འགྲོ་མང་པོར་འབྲེལ་ཚད་དོན་ལྡན་གྱི་ཕྲིན་ལས་བྱིན་རླབས་རྗེས་འཛིན་གནང་། མི་རིང་བ་ན་སླར་ལྷ་ལུང་གདན་སར་ཕེབས་ནས་བཞུགས། སྤྱིར་དམ་པ་འདི་ཉིད་ནས་གང་ཤར་བྱུང་རྒྱལ་གྱི་མཛད་སྤྱོད་དང་ཆ་ལུགས་མ་ངེས་པར་བསྐྱངས་པས་སྐྱེ་བོ་དག་སྣང་གི་མིག་ལྡོངས་པ་འགའ་ཞིག་གི་སྣང་ངོར་མི་མཛའ་བ་ལྟ་བུའང་ཇི་སྙེད་བྱུང་མོད། དོན་སྣང་སེམས་ལ་རང་དབང་ཐོབ་པའི་བརྡ་རྟགས་སྲ་མཁྲེགས་ཀྱི་རྡོ་བ་ལ་ཕྱག་ཞབས་ཀྱི་རྗེས་འདམ་བརྫིས་པ་ལྟར་བཀོད་པ་དང་། ལྐོག་གྱུར་གྱི་ཆོས་རྣམས་མ་འདྲེས་པའི་སྤྱན་གྱིས་མངོན་སུམ་གཟིགས་པ་ལྟར་གསལ་པོར་གསུངས་པའི་སྐབས་ཡང་ཡང་བྱུང་། ཇི་ཞིག་ན་དམ་སྲིའི་འཕྲུལ་གྱིས་གྲྭ་འཁོར་འགའ་ཞིག་ནས་ལོག་སྒྲུབ་ཀྱི་བྱ་བ་ཇི་སྙེད་ཅིག་བརྩམས་（9ན）པའི་ཉེར་ལེན་གྱིས་བདེན་རྫུན་སྟངས་གཅོད་ཕྱིར་ལྷ་ལྡན་རྒྱལ་ཁབ་ཏུ་ཕེབས་དགོས་བྱུང་། སྙིགས་དུས་ཀྱི་རང་རྟགས་མངོན་གྱུར་ལ་ཐུགས་སྐྱོ་བའི་རྣམ་པ་ཚད་མེད་པ་དང་བཅས་སླར་འཁྲུངས་ཡུལ་བུམ་ཐང་དུ་ལོག་བྱོན་པར་ཆས་པའི་ལམ་དུ་སྐུ་ལ་བསྙུང་གཞི་ཞིག་བཞེས་པའི་ཚུལ་བསྟན། ལྷ་ལུང་དང་ཉེ་བའི་ནའོ་ཆེར་ཞག་བཞུགས་མཛད་པའི་ཕྱིར་ཉིན་གསེར་རོས་རྫ་སྒང་ཞེས་པའི་ས་ནས་ཞལ་ལྷ་ལུང་ཕྱོགས་སུ་གཟིགས་ཏེ། ད་རེས་ཀྱི་སྐྱེ་བ་འདིས་པད་གླིང་གི་བསྟན་པ་ལ་ཞབས་འདེགས་མ་འགྲུབ། སྐྱེ་བ་ཕྱི་མར་འགྲུབ་པར་ཤོག་ཅིག་གསུངས་ཏེ། མ་ཧཱ་གུ་རུའི་བྱི་ན་རླབས་ཀྱིས༔ སོགས་སྨོན་ལམ་ཞལ་འདོན་དང་བཅས་ཐུགས་སྨོན་ཤུགས་དྲག་པོ་གནང་ནས། ཀུན་མཁྱེན་ཚུལ་རྡོར་གྱི་གདན་ས་ཆུས་ཁྱེར་རབ་དཀར་བཀྲ་ཤིས་ཆོས་གླིང་དུ་བྱོན། གནས་དེ་ཉིད་དུ་དགུང་གྲངས་སུམ་ཅུ་སོ་གཅིག་བཞེས་པ་ཤིང་མོ་གླང་གི་ལོར་གཟུགས་སྐུའི་བཀོད་པ་ཆོས་ཀྱི་དབྱིངས་སུ་བསྡུས་སོ།། །།

 ༈   །པད་གླིང་བཅུ་པ་པདྨ་འོད་གསལ་འགྱུར་མེད་རྡོ་རྗེའམ་ཐུབ་བསྟན་ཆོས་ཀྱི་རྡོ་རྗེ་ནི།   ཡར་འབྲོག་སྤ་ལུང་བདེ་སྐྱིད་ཁང་གསར་དུ་ཡབ་ཕུན་ཚོགས་རྒྱལ་པོ་ཞེས་（9བ）གཏེར་སྟོན་བསམ་གཏན་གླིང་པའི་གདུང་བརྒྱུད་ཡིན་པར་གྲགས་པ་དེ་དང་།   ཡུམ་བྱང་ཆུབ་ལམ་སྒྲོན་གྱི་སྲས་སུ་རབ་བྱུང་བཅུ་དྲུག་པའི་ལྕགས་ཕོ་རྟའི་ལོར་འཇའ་འོད་ཀྱི་གུར་ཕུབ་པ་སོགས་ངོ་མཚར་བའི་ལྟས་དང་བཅས་སྐུ་བལྟམས།   གངས་ཅན་གཙུག་ནོར་རྒྱལ་མཆོག་བཅུ་གསུམ་པ་ཐུབ་བསྟན་རྒྱ་མཚོས་པད་གླིང་ཡང་སྲིད་འཁྲུལ་བྲལ་དུ་ལུང་བསྟན།    དགུང་ལོ་ལྔ་པར་གདན་ས་ལྷ་ལུང་ཐེག་མཆོག་རབ་རྒྱས་གླིང་དུ་སྤྱན་དྲངས་ནས་པད་གླིང་ཆོས་ཀྱི་རྒྱལ་པོའི་ཁྲི་ལ་མངའ་གསོལ།   ཡོངས་འཛིན་ངག་དབང་མཆོག་ལྡན་ལས་ཡི་གེ་འབྲི་ཀློག་ནས་བརྩམས་རང་ལུགས་ཀྱི་ཆོ་ག་ཆོས་སྤྱོད་སོགས་ཀྱི་དཔེ་འཛིན་དང་ཕྱག་ལེན་གར་ཐིག་དབྱངས་གསུམ་སོགས་ལ་གསན་སྦྱངས་མཛད་པས་ཚེགས་མེད་ད་མཁྱེན།   དགུངས་གྲངས་བརྒྱད་ལ་ཕེབས་སྐབས་ཐུགས་སྲས་དགུ་པ་ཐུབ་བསྟན་དཔལ་འབར་ནས་གདན་སའི་མངའ་དབང་ཡོངས་རྫོགས་འབུལ་བར་མཛད།    བཅུ་གཅིག་བར་དབུ་རུ་ལྷ་ལྡན་དུ་ཁྱུག་ཙམ་ཕེབས་ཏེ་སྤྲུལ་པའི་གཙུག་ལག་ཁང་ཕན་ཚུན་དང་རྩེ་ཤོད་ཕོ་བྲང་སོགས་ལ་གནས་གཟིགས་དང་།   རྒྱལ་ཚབས་ར་སྒྲེང་པ་ལ་གཙུག་ཕུད་ཕུལ།    སླར་རང་གི་གདན་སར་ཕེབས་ཏེ་སྨིན་གླིང་རྡོར་འཛིན་འགྱུར་མེད་བདེ་（10ན）ཆེན་ཆོས་འཛིན་ལྷ་ལུང་དུ་གདན་དྲངས་ནས།   བུམ་ཐང་ཆུ་སྨད་དྲུང་པ་བདེ་ཆེན་འོད་གསལ་ནས་མཐུན་རྐྱེན་དང་བཅས་གཟིམ་སྤྱིལ་མེ་ཏོག་ལྷ་ནང་དུ་པད་གླིང་ཆོས་སྐོར་ཡོངས་རྫོགས་ཀྱི་དབང་ལུང་ཟབ་ཁྲིད་ཡབ་སྲས་རྣམས་ཀྱི་བཀའ་འབུམ་དང་བཅས་པ།    སྨིན་གཏེར་གཏེར་གསར་ཡོངས་རྫོགས་ཀྱི་དབང་ལུང་རྣམས་དང་།   སླར་བསམ་གྲུབ་གུ་རུ་ལྷ་ཁང་དུ་ཕེབས་ནས།    སྒྲུབ་ཐབས་འདོད་འཇོའི་བུམ་བཟང་།  སྒྱུ་འཕྲུལ་ཞི་ཁྲོ།   འདུས་མདོ་དབང་ཆེན་མོ།    །སྙིང་ཐིག་རྩ་པོད་བཅས་ཀྱི་དབང་ལུང་ཡོངས་རྫོགས།    ཀློང་ཆེན་པའི་མཛོད་བདུན།   ངལ་གསོ་སྐོར་གསུམ་སོགས་ཀྱི་བཤད་ལུང་རྣམས་གསན་ཅིང་།   ཞར་ལ་དཀྱིལ་འཁོར་བྲི་ཐིག་སོགས་ལ་སྦྱང་བརྩོན་མཛད།   འདི་སྐབས་ལ་ཡག་གི་ཕུར་སྦལ་ནག་རི་ཞེས་ལྷོ་བྲག་གི་ཆུ་འགོར་ས་དཔྱད་སྦལ་ནག་ཐུར་རྒྱུག་འདྲ་བ་ཡོད་པ་དེའི་ཁ་དང་སྣ་མིག་སོགས་ནས་ཆུ་ལོག་ཐོན་པའི་ཉེན་ཁ་ཆེར་མངོན་སྟབས་ཡུལ་མི་དད་ལྡན་རྣམས་ཀྱིས་གསོལ་བ་བཏབ་པ་བཞིན་དེར་བྱོན་ཏེ།   སྦལ་ནག་རིའི་སྟེང་དུ་བདུད་འདུལ་མཆོད་རྟེན་བཞེངས་ཤིང་རབ་གནས་མཛད་པས་ཆུའི་འཇིགས་པ་མཐོང་ཆོས་སུ་ཞི་བས་（10བ）ཀུན་ཀྱང་དད་ཅིང་དགའ་བའི་གནས་ལ་བཀོད།   བཅོ་ལྔ་པར་བུམ་ཐང་དབང་འདུས་ཆོས་གླིང་པས་གདན་དྲངས་པ་ལྟར་དེར་བྱོན་ནས་བཞུགས་ཤིང་།   རྒྱལ་པོ་འཇིགས་མེད་དབང་ཕྱུག་མཇལ་འཕྲད་གནང་།    ཟླ་ཤས་ནས་སླར་གདན་ས་ལྷ་ལུང་དུ་ཞབས་བཀོད།   བསམ་གྲུབ་གུ་རུ་ལྷ་ཁང་ལ་ཉམས་གསོ་ཕུལ་དུ་བྱུང་བ་གནང་ཞིང་།   འདིའི་ནང་གི་རྟེན་གཙོ་གུ་རུའི་སྣང་བརྙན་བཞེངས་པ་སོགས་ཕྲིན་ལས་ཀྱི་ཞབས་འདེགས་པ་གཙོ་བོ་ནི་ཆོས་དབང་རང་གི་ལུང་ཟིན་གྱི་སྐྱེས་བུ་སློབ་དཔོན་ཆོས་གྲགས་ཏེ།   ཉམས་གསོའི་རྗེས་ཐོག་ཏུ་གུ་རུ་ཆོས་དབང་གི་སྐུ་ཤ་མྱང་གྲོལ་གྱི་འགྲོ་དོན་ཀྱང་རྡོ་རྗེའི་ལུང་དོན་ལྟར་འབྲེལ་ཚད་དོན་ལྡན་གྱི་སྒོ་འཕར་ཕྱེས།    མེ་ཕག་ལོར་ཉམས་གསོ་གྲུབ་པ་ན་རྗེ་ཉིད་དང་།   སྨིན་གླིང་ཡང་དབེན་ཐེག་མཆོག་ཆོས་གླིང་གི་སློབ་དཔོན་ཤེས་རབ་རིན་ཆེན་ལྷན་རྒྱས་པས།   ཉང་གཏེར་བཀའ་བརྒྱད་བདེ་འདུས་སྒོ་ནས་སྒྲུབ་ཆེན་སྨན་སྒྲུབ་དང་འབྲེལ་བར་རབ་གནས་མཛད།   མེ་ཏོག་འཐོར་སྐབས་ནས།   ཁམས་གསུམ་དབང་དུ་སྡུད་མཛད་པ།   །པདྨ་རྒྱལ་པོའི་སྐུ་ལ་བསྟོད།   །ཅེས་པའི་སྒྲ་ཞག་བདུན་ཕྲག་གཅིག་གི་རིང་ཉིན་མཚན་མེད་པར་གྲགས་（11ན）པའི་ཐུག་ཉམས་བྱུང་།   ཞར་ལ་ཆོས་དབང་བླ་མ་གསང་འདུས་དང་བཀའ་བརྒྱད་གསང་རྫོགས་སོགས་ཀྱི་ཆོ་གའི་ཕྱག་ལེན་རྣམས་ལའང་གསན་སྦྱང་མཛད།   གནས་དེར་སྒྲུབ་སྡེ་བརྒྱད་གྲྭ་དང་འབྲེལ་ཡར་མར་གྱི་སྒྲུབ་མཆོད་དུ་མ་གསར་འཛུག་དང།    དེ་གའི་གཟིམ་སྤྱིལ་སྤྲོ་ཁང་ཡིད་འོང་དགའ་ཚལ་དུ་སྐུ་མཚམས་བཅད་རྒྱ་གནང་སྟེ་རྩ་གསུམ་ལྷག་པའི་ལྷ་མང་པོའི་བསྙེན་སྒྲུབ་གནང་།    བཅུ་དགུ་པར་འོག་མིན་ཨོ་རྒྱན་སྨིན་གྲོལ་གླིང་དུ་བྱོན།   ཞེ་ཆེན་རབ་འབྱམས་དྲུག་པ་ཀུན་བཟང་བསྟན་པའི་ཉི་མ་བཤད་སྒྲུབ་ཆོས་ཀྱི་གོ་ཆ་མཆོག་གི་དྲུང་ནས་རིན་ཆེན་གཏེར་གྱི་མཛོད་ཆེན་པོའི་དབང་ལུང་ཡོངས་རྫོགས་དང་།   མཁན་ཆེན་ངག་དབང་མཁྱེན་བརྩེ་ནོར་བུ་ལས་སྒྱུ་འཕྲུལ་གསང་བའི་སྙིང་པོའི་རྒྱུད་འགྲེལ་གསང་བདག་དགོངས་རྒྱན་དང་།   ཕྱོགས་བཅུའི་མུན་སེལ་གྱི་སྟེང་ནས་རྒྱུད་བཤད།   སྡོམ་གསུམ་རྣམ་ངེས་འགྲེལ་པ་དཔག་བསམ་སྙེ་མ་དང་།   འཇམ་དཔལ་དགྱེས་པའི་ཞལ་ལུང་གི་སྟེང་ནས་ཞིབ་ཁྲིད།   དབུ་མ་ལུགས་ཀྱི་སེམས་བསྐྱེད་སྡོམ་པ་བཅས་གསན།   གཞན་ཡང་རིག་འཛིན་ཨོ་རྒྱན་སྐྱེ་མེད་རྡོ་རྗེ་ལས་སྙིང་ཐིག་ཡ་བཞིའི་དབང་ཁྲིད་ལུང་བཅས།   རྫོགས་ཆེན་དགོན་གྱི་（11བ）བླ་མ་མངོན་པ་ལས།   ཞི་བ་ལྷའི་སྤྱོད་འཇུག་དང་།   མི་ཕམ་པའི་མཁས་འཇུག་སོགས་གཞུང་བཤད་མང་པོ།   ཞེ་ཆེན་བླ་མ་ཆེ་བ་ལས་སི་ཏུའི་སུམ་རྟགས་འགྲེལ་ཆེན་སོགས་སྙན་སུམ་རིག་གནས་ཀྱི་སྐོར་རྣམས་གསན།   ཉེར་གཅིག་པར་ཨོ་རྒྱན་སྨིན་གྲོལ་གླིང་གི་གཙུག་ལག་ཁང་དུ་ཐུབ་དབང་མཐོང་གྲོལ་ཆེན་མོའི་སྤྱན་སྔར།   གཅུང་ངག་དབང་ཆོས་ཀྱི་གྲགས་པས་མཁན་པོ་དང་།   མཁན་ཆེན་ངག་དབང་མཁྱེན་བརྩེ་ནོར་བུས་ལས་སློབ་མཛད་དེ་དད་པའི་དགེ་འདུན་གྲངས་ཚང་བའི་དབུས་སུ་བསྙེན་པར་རྫོགས།   དེ་ནས་བཟུང་དམ་ཆོས་འདུལ་པའི་བསླབ་པ་གཙོ་བོར་བརྟེན་ནས་གསོལ་ཆས་ཀྱང་གདན་གཅིག་ཁོ་ན་མཛད།    དེ་ལྟར་སྨིན་གླིང་དུ་གསན་བསམ་རིགས་གྲུབ་ནས་མི་རིང་བར་ལྷ་ས།   ཁྲ་འབྲུག  །བསམ་ཡས་གཙོ་བོར་གྱུར་པའི་གནས་ཆེན་རྣམས་སུ་གནས་མཇལ་ལ་ཕེབས་ཤིང་།  མཆིམས་ཕུའི་ནགས་གསེབ་ནས་གནམ་ལྕགས་རྡོ་རྗེ་རྩེ་ལྔ་པ་གཟི་མདངས་ཅན་ཞིག་ཕྱག་ཏུ་སོན་པ་ཐུགས་སྒམ་པས་འདི་ནས་བྱུང་ཞེས་གསལ་པོ་མ་གསུངས་མོད།   དོན་ལ་གསང་གཏེར་དུ་བཞེས་པར་མངོན་ཞིང་རྡོ་རྗེ་དེ་ད་ལྟ་སྦས་ཡུལ་མཁན་ལྗོངས་ལྷ་ཁང་གི་རྟེན་གཙོ་གུ་རུའི་（12ན）ཐུགས་གཟུངས་སུ་བཞུགས།   ཤུག་གསེབ་ཏུ་རྗེ་བཙུན་ལོ་ཆེན་རིག་འཛིན་ཆོས་ཉིད་དབང་མོ་མཇལ་བར།   ཞལ་ནས་དེ་རིང་ཀུན་མཁྱེན་དྲི་མེད་འོད་ཟེར་མཇལ་བྱུང་བས་ངོ་མཚར་རྟེན་འབྲེལ་ཤིན་ཏུ་བཟང་།   ངའི་ཚེ་ལྷག་མ་འདི་ཉིད་ཁྱེད་ལ་འབུལ་བས་རྗེས་སུ་འཇུག་པར་ཤོག་ཅིག་ཅེསགསུངས་ཤིང་ལྷག་པར་དགྱེས་བཞིན་པའི་ངང་ནས་བརྟན་བཞུགས་ཀྱི་ཚུལ་དུ་ཚེ་དབང་འབུལ་བར་མཛད།   དེ་ནས་ཀུན་མཁྱེན་ཚུལ་རྡོར་གྱིས་ཕྱག་བཏབ་པ་གྲྭ་ཕྱི་དྲག་སྒྲུབ་དགོན་དང་།   གྲྭ་ནང་པདྨ་ཆོས་སྡིངས་སོགས་རང་གི་དགོན་ལག་རྣམས་སུ་བྱོན་ཏེ་ཆོས་དང་ཟང་ཟིང་གཉིས་ཀའི་སྒོ་ནས་ལེགས་པར་བསྐྱངས་ཞིང་རིམ་བཞིན་གདན་ས་ལྷ་ལུང་དུ་ཕྱག་ཕེབས།   བར་སྐབས་གྲྭ་ཚང་དུ་གཞི་གསུམ་གྱི་ཕྱག་ལེན་ཉམས་སྨས་པ་སོར་ཆུད་པར་མཛད་ཅིང་།   སྔགས་ཆོག་སྒྲུབ་ཕྲིན་གར་ཐོག་དབྱངས་རོལ་སོགས་རང་ལུགས་གོང་མའི་ཕྱག་བཞེས་ཀྱི་རྒྱུན་གང་ཡོད་མི་ཉམས་ཡུན་སྐྱོང་གི་སློབ་གསོ་མཛད།   ཉེར་གསུམ་པར་འབྲུག་བུམ་ཐང་ནས་གདན་འདྲེན་ཞུས་པ་བཞིན་དེར་ཕེབས་ཏེ་དབང་འདུས་ཆོས་གླིང་དུ་བཞུགས།   ཁོ་བོ་བདུད་འཇོམས་པའང་འབྲུག་ཤར་ཕྱོགས་ཤར་ཕྱོགས་བཀྲ་ཤིས་སྒང་བརྒྱུད་（12བ）བུམ་ཐང་དུ་འབྱོར་བ་དང་སྐབས་འགྲིགས་ཏེ་རྗེའི་ཞལ་དཀྱིལ་ཐོག་མར་མཇལ་བའི་སྐལ་བཟང་ཐོབ།   དགོངས་བཞེད་བཞིན་པད་གླིང་མ་ནིང་གཞུང་པོད་ཀྱི་བཀླག་ལུང་དང་།    རིམ་པར་བླ་མ་དགོངས་འདུས་གཞུང་པོད་བཅུ་གསུམ་གྱི་དབང་ལུང་ཡོངས་རྫོགས་གསན།   མི་རིང་བར་འབྲུག་རྒྱལ་འཇིགས་མེད་དབང་ཕྱུག་དང་།   དབང་གླིང་ཡུམ་ཆོས་སྒྲོན་སྐུ་གཤེགས་པའི་སྤུར་སྦྱངས་དགོངས་རྫོགས་སོགས་མཛད།   གཏམ་ཞིང་ལྷུན་གྲུབ་ཆོས་གླིང་དུ་བྱོན་ནས་དེར་བདུན་ཕྲག་གསུམ་དུ་བླ་མ་ནོར་བུ་རྒྱ་མཚོའི་རྩ་སྒྲུབ་ཉམས་བཞེས་གནང་།    རྔན་ལུང་སྒང་སྟེང་གསང་སྔགས་ཆོས་གླིང་པས་གདན་དྲངས་པ་བཞིན་དེར་བྱོན་ཏེ་དེ་གའི་བླ་མ་གྲྭ་ཚང་གི་གཙོས་དད་ལྡན་གྱི་སློབ་ཚོགས་མང་དུ་འདུས་པ་ལ་པད་གླིང་ཆོས་སྐོར་ཕལ་ཆེར་གྱི་དབང་ལུང་སྩལ།   སླར་དབང་འདུས་ཆོས་གླིང་དུ་ཞབས་བཀོད་པར་ཡུམ་པདྨ་བདེ་ཆེན་ནས་གསོལ་འདེབས་བདག་རྐྱེན་མཛད་དེ།   ཤར་ཕྱོགས་བླ་མ་ཚེ་དབང་དཔལ་འབྱོར་སོགས་དང་།   ཐར་པ་གླིང་དང་།   ཉི་མ་ལུང་གི་བླ་མ་གྲྭ་ཚང་།   ཕྱོགས་ཀྱི་དད་འདུས་སློབ་ཚོགས་མང་པོ་རྣམས་ལ་པད་གླིང་ཆོས་སྐོར་ཡོངས་རྫོགས་ཀྱི་དབང་ཁྲིད་ལྗགས་ལུང་བཅས་ཟབ་རྒྱས་སུ་སྩལ།   དེ་ནས་མི་རིང་（13ན）བར་གདན་ས་ལྷ་ལུང་དུ་ལོག་ཕེབས་པའི་ལམ་ཕྱོགས་མོན་ལ་དཀར་ཆུང་རྫོགས་ཆེན་མཁན་པོ་པདྨ་ཚེ་དབང་དང་མཇལ་འཛོམ་བྱུང་ཞིང་།    རྫོང་སར་མཁྱེན་བརྩེ་ཆོས་ཀྱི་བློ་གྲོས་མཆོག་གི་ཞལ་སྔ་ནས་སྦས་གནས་མཁན་ལུང་དུ་རྟེན་བཞེངས་དགོས་ཚུལ་གྱི་བཀའ་ལུང་དང་འབྲེལ་ནང་རྟེན་གཟུངས་སྔགས་རྟེན་གསུམ་དམ་རྫས་ཕབ་རྒྱུན།   འབུལ་མཚོན་རིན་གཉིས་འཁོར་ལོ་བརྒྱ་ཕྲག   །རྟེན་འབྲེལ་མཇལ་དར་ཉིན་མོ་བདེ་ལེགས་བཅས་འབུལ་བསྐུར་གནང་བ་ཕྱག་ཏུ་སོན་པ་ན་མཁྱེན་བརྩེ་དངོས་ཞལ་མཇལ་བ་དང་མཚུངས་པའི་དགྱེས་ཚོར་ཚད་མེད་གནང་ཞིང་།    མཀན་པོ་ལས་ཆོས་འབྲེལ་ཀྱང་གསན་པར་མཛད།      དེ་ནས་ལྷ་ལུང་གདན་སར་ཕྱག་ཕེབས་གྲུབ་པ་ན།    བུམ་ཐང་ཐར་པ་གླིང་ནས་ཀཿཐོག་མཁན་པོ་ངག་དབང་ཕྲིན་ལས་ཆེད་དུ་གདན་དྲངས་ཏེ་རང་དགོན་དུ་མདོ་སྔགས་གཞུང་ཆེན་ཁག་གི་བཤད་གྲྭ་བཙུགས།    འདི་སྐབས་ཁོ་བོ་ལྷ་ལྡན་དུ་སྡོད་མུས་ལ་ལྷ་ལུང་ནས་ཞབས་གྲྭས་བང་མི་ཆེད་གཏོང་གནང་སྟེ།    པད་གླིང་ཕུར་པའི་ཕྱོགས་སུ་སྔོན་ཆད་ལྗགས་བསྒྲིགས་ཞལ་གསལ་ཁྱེར་བདེ་ཞིག་གཏན་ནས་མི་འདུག་པས་རང་（13བ）དགོན་དུ་སྒྲུབ་མཆོད་ལས་སྦྱོར་དང་བཅས་པ་གསར་འཛུག་གནང་བཞེད་ལ་ཁྱེར་བདེའི་ཆོག་ཁྲིགས་འདུས་གསལ་ཞིག་ཅིས་ཀྱང་འཕྲལ་དུ་གྲུབ་པར་གྱིས་ཞེས་བཀའ་སྐུལ་ནན་ཏན་གནང་བ་ལྟར་ཆོག་ཁྲིམས་ཡིག་ཆ་གང་ཤེས་བསྒྲིགས་བརྩམས་ཀྱིས་ཕུལ་བ་དགྱེས་རྩེར་སོན་ཏེ་སྤར་དུ་བསྐྲུན་པར་མཛད།   གཞན་ཡང་སྔ་རྗེས་ཅི་རིགས་པར་བདེ་གཤེགས་སོ་ལྔའི་ལྷ་ཚོགས་དང་།   སྒྲོལ་མ་འཇིགས་པ་བརྒྱད་སྐྱོབ་ཀྱི་ལྷ་ཁང་གསར་བཞེངས།   འདོད་འཇོའི་བུམ་བཟང་གི་དཀྱིལ་ཐང་།    ཕུར་པ་སྲོག་གི་སྤུ་གྲིའི་ཨེ་ཁྲམ་སོགས་དབང་དང་སྒྲུབ་ཆེན་གྱི་ཡོ་བྱད།   བླ་མ་ཞི་དྲག   །ཚེ་སྒྲུབ་ནོར་བུ་ལམ་ཁྱེར་སོགས་འདོན་ཆོག་མང་པོ་དང་།   སྨིན་གླིང་གཟུངས་སྤར་ཆ་ཚང་སོགས་ཀྱི་སྦར་གསར་བསྐྲུན།   ལྷག་པར་སྦས་ཡུལ་མཁན་ལུང་དུ་ཨོ་རྒྱན་ལྷ་ཁང་རྟེནདང་བརྟེན་པར་བཅས་པ་གསར་བཞེངས་དང་།   རང་དགོན་གདན་ས་ཡས་མས་རྣམས་སུ་བཟང་གོས་ཀྱི་སྤྱན་གཟིགས་ཕུལ་དུ་བྱུང་བ་འབུལ་སྦྱོར་གནང་།    ཇི་ཞིག་ན་སྨན་ཐང་བརྒྱུད་ཡར་འབྲོག་ཁུལ་དུ་གདན་འདྲེན་ཞུས་པ་ལྟར་དེར་བྱོན་ནས་དད་ལྡན་མང་པོའི་རེ་བ་ཡིད་བཞིན་དུ་སྐོང་བར་མཛད་ནས།   ཞང་རིན་པོ་ཆེའི་（14ན）ཐུགས་སྲས་ནམ་མཁའ་འོད་ཀྱི་གདན་ས་ཡང་སྟེང་དགོན་དུ་ཞག་བཞུགས་མཛད་པར།    དགུང་གྲངས་ཉེར་དྲུག་པ་ཤིང་ལུག་ཟླ་བ་དྲུག་པའི་ཚེས་དགུའི་ནམ་གུང་ཙམ་ནས་མགུལ་གློ་ཅུང་ཟད་ཙམ་བཞེས་པ་ནས་འགྲོ་རྒྱུ་ཡིན་པ་འདྲ་གསུངས་ཤིང་ཚེས་བཅུའི་ནམ་ལངས་སྔ་ཆར་སྐུ་སྐྱིལ་ཀྲུང་དྲང་པོར་བཞུགས་ཏེ་ཕྱག་མཉམ་གཞག་མཛད་མ་ཐག་གཟུགས་སྐུའི་བཀོད་པ་པདྨ་ཀུན་ཏུ་འཆང་གི་ཐུགས་ཀར་བསྡུས་སོ།  །གསུང་སྤྲུལ་འདི་ཉིད་མཁྱེན་རྟོགས་ནུས་པའི་རྩལ་དང་ལྡན་ཅིང་ཐུགས་བསྐྱེད་བཟང་པོ་བསྟན་འགྲོའི་ཕན་བདེའི་གསོས་སུ་ཆེ་བའི་རྣམ་ཐར་ངོ་མཚར་ཅན་དུ་བཞུགས་ཀྱང་།   བསྟན་པའི་སྐུ་གེགས་དང་གདུལ་བྱའི་བསོད་ནམས་ཀྱི་སྐལ་བས་ཕོངས་ཏེ་སྐུ་ཚེ་མཛད་ཕྲིན་མཐར་མ་ཕྱིན་པ་ནི་ཤིན་ཏུ་ཕངས་ཤིང་ཡིད་སྐྱོ་བའི་གནས་སུ་གྱུར།    དེར་སྐུ་གདུང་རིན་པོ་ཆེ་ལྷ་ལུང་དུ་གདན་དྲངས་ནས་ཀཿཐོག་སི་ཏུ་རིན་པོ་ཆེས་ཞུགས་འབུལ་གྱི་ཆོ་ག་གནང་ཞིང་།   མཁན་ངག་དབང་ཕྲིན་ལས་སོགས་ནས་དགོངས་རྫོགས་ཀྱི་མཆོད་སྤྲིན་ཚོགས་གཉིས་སྤེལ་བའི་སྲི་ཞུ་རྒྱ་ཆེན་པོ་བསྒྲུབ་པར་མཛད་དོ།།   །།

༈ །པད་གླིང་བཅུ་གཅིག་པ་ཀུན་（14བ）བཟང་པདྨ་རིན་ཆེན་རྣམ་རྒྱལ་ངེས་དོན་བསྟན་པའི་ཉི་མ་ནི། བུམ་ཐང་ཆུ་སྨད་སྤང་སྟོད་དགོན་དུ་ཡབ་གྲུབ་ཐོབ་ཁྱུངགི་གདུང་རིགས་ལས་གྲོལ་བ་ཕྲིན་ལས་རྣམ་རྒྱལ་དང་། ཡུམ་རིན་ཆེན་བཟང་མོའི་སྲས་སུ་རབ་བྱུང་བཅུ་དྲུག་པའི་ས་ཕོ་སྤྲེལ་ལོར་ཤིན་ཏུ་དགེ་བའི་ལྟས་དང་བཅས་སྐུ་བལྟམས། ལྷ་དང་བླ་མའི་ལུང་གིས་གསུང་སྤྲུལ་གོང་མའི་ཡང་སྲིད་འཁྲུལ་མེད་དུ་ངེས་པ་རྙེད་དེ་དགུང་ལོ་ལྔ་པར་པད་གླིང་ཆོས་ཀྱི་རྒྱལ་པོའི་མཚན་གྱི་ཅོད་པན་དཔྱངས་ཏེ་མངའ་གསོལ་གཟེངས་བསྟོད་ཕུལ། ད་ལྟ་ཡོངས་རྫོགས་དགེ་བའི་བཤེས་གཉེན་དག་ལས་སྐུ་ཡོན་གྱི་རིམ་པ་ཇི་སྙེད་པ་དང་། ཁྱད་པར་དོན་བརྒྱུད་སྨིན་གྲོལ་གདམས་པའི་བདུད་རྩི་མཐའ་དག་རང་ནོར་དུ་ལྷུར་བཞེས་པའི་སྐབས་ཏེ། རང་དོན་དུ་གསན་བསམ་སྒོམ་པའི་ལང་ཚོ་ཡོངས་སུ་རྫོགས་ནས་མཁས་བཙུན་བཟང་གསུམ་གྱི་ཡོན་ཏན་ཕུལ་དུ་བྱུང་བས་བསྟན་པའི་སྲོག་ཤིང་འཛིན་པ་ལ་དབང་འབྱོར། གཞན་དོན་དུ་འཆད་རྩོམ་ཕྲིན་ལས་ཀྱི་འཇུག་པ་ཕྱོགས་མེད་དུ་རྒྱས་པས་རྣམ་མང་གདུལ་བྱ་སྨིན་གྲོལ་གྱི་ལམ་ལ་འགོད་བཞིན་དུ། ཞབས་པད་བསྐལ་པ་རྒྱ་མཚོར་རྟག་བརྟན་འཆི་མེད་（15ན）བདེ་བ་ཆེན་པོའི་ངོ་བོར་བཞུགས་པར་གསོལ་བ་འདེབས་ཤིང་། སྐུའི་མཛད་པ་ཕྲིན་ལས་ཀྱི་རྣམ་པར་ཐར་པའང་སྐལ་བཟང་བརྒྱུད་འཛིན་རྣམས་ཀྱི་དཔལ་དུ་རིམ་གྱིས་སྤྲོ་བར་འགྱུར་རོ། །པད་གླིང་འཁྲུངས་རབས་དད་པའི་མེ་ཏོག་གི །ཁ་སྐོང་མོས་པའི་ཟེའུ་འབྲུ་འཛུམ་འདི་ལས། །སྙན་འཇེབས་ལོ་རྒྱུས་དྲི་བསུང་ངད་ལྡན་པ། །དོན་བཟང་སྦྲང་རྩིའི་ཟིལ་མངར་མཚོན་པ་བཞིན། །ཚུལ་འདི་མོས་ལྡན་བུང་བའི་ཚོགས་རྣམས་ཀྱི། །གདུང་སེལ་དགའ་སྟོན་ཉིད་དུ་གྱུར་ནས་ཀྱང་། །གང་གི་རིང་ལུགས་ཟབ་དོན་རོ་བཅུད་ལ། །ལོངས་སུ་སྤྱོད་པའི་སྐལ་བཟང་མི་ཉམས་ཤོག །ཅེས་པད་གླིང་འཁྲུངས་རབས་རྟོགས་བརྗོད་ཀྱི་ཁ་སྐོང་ཅུང་ཟད་གསལ་བར་བྱས་པ་འདིའང་། སྔ་སོར་ལྷ་ལུང་ཐེག་མཆོག་རབ་རྒྱས་གླིང་གི་བླ་གྲྭ་ལྷན་ནས་སྐུ་ཕྲེང་གསུམ་གྱི་མཛད་རྣམ་ཧྲོབ་བསྡུས་རྩོམ་གཞིའི་ཟིན་བྲིས་དང་བཅས་གོ་བདེའི་བསྒྲིག་རྩོམ་དགོས་ཚུལ་གྱི་གསུང་བསྐུལ་ཡང་ནས་ཡང་དུ་གནང་ཡང་ཟིན་མེད་རྣམ་གཡེང་གི་ཁོལ་པོར་འཕྱན་ཏེ་རིམ་ལུས་སུ་གྱུར་པ། ད་ཆ་རྒྱལ་ཡུམ་ཕུན་ཚོགས་ཆོས་སྒྲོན་མཆོག་ནས་ཆོས་རྒྱུན་མི་（15བ）ཉམས་གོང་འཕེལ་གྱི་བཙས་སུ་གཏེར་ཆོས་སྐོར་ཡོངས་རྫོགས་རྣམ་ཐར་ཁ་སྐོང་དང་བཅས་པ་ཆོས་སྦྱིན་མི་འཛད་པའི་འཕྲུལ་སྤར་དུ་འདེབས་བསྐྲུན་གནང་བ་ན་ལོ་རྒྱུས་ཆ་ཚང་བའི་ཕྱིར་ཤིན་ཏུ་ཉེར་མཁོར་གྱུར་ཏེ། རྩོམ་གཞི་སྔར་ཡོད་ཀྱི་སྟེང་དུ་རིགས་བདག་བླ་མའི་གསུང་སྒྲོས་སོགས་དོན་ལ་གནས་ངེས་པའི་ལོ་རྒྱུས་ཇི་ལྟར་རིགས་པས་གསལ་བར་བྱས་ཤིང་ཕྱོགས་འཛིན་སྒྲོ་བཏགས་ཀྱི་དྲི་མས་མ་སྦག་པར། རྒྱལ་ཁམས་པ་འཇིགས་བྲལ་ཡེ་ཤེས་རྡོ་རྗེས་རང་ལོ་བདུན་ཅུ་རྩ་གཉིས་པར་སོན་པ་རབ་བྱུང་བཅུ་དྲུག་པའི་ཤིང་ཡོས་ས་ག་ཉ་བའི་ཡར་ཚེས་དགེ་བར། བལ་ཡུལ་ཨེའི་གཙུག་ལག་ཁང་གི་ཉེ་འགྲམ་དུ་གྲུབ་པར་བགྱིས་པ་འདི་ཡོངས་སུ་དགེའོ།། །།