TTDL-ZABTER-10-THA-063

Previous Text Back to Volume PageLast text in volume.

Wylie title
Location	bdud 'joms gling pa zab gter Volume 10, Text 63, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. '*. In Sprul pa'i gter chen bdud 'joms gling pa'i zab gter gsang ba'i chos sde, Vol. 10: . Thimphu, Bhutan: Lama Kuenzang Wangdue, 2004.*
Side notes	Verso: bdud 'joms khros ma
More details More details
Tertön	བདུད་འཇོམས་གླིང་པ་ (bdud 'joms gling pa)
Genre
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Deity	khros ma nag mo

[edit]

༠༠༠༠༠དབུ་ཁྲིད༥༤༡༔ ཆོས་ཉིད་ནམ་མཁའི་ཀློང་མཛོད་ལས༔ ཡེ་ཤེས་མཁའ་འགྲོ་ཁྲོས་མ་ནག་མོ་ལ་བརྟེན་པའི་ལས་བཞིའྀ་སྲེག་བླུགས་ཕྲིན་ལས་ལྷུན་གྲུབ་བཞུགས༔ ༠༠༠༠དབུ་ཁྲིད་༥༤༢ ན་མོ་གུ་རུ་ས་ར་ཧ་པ་ཡེ༔ ༠༠༠༠༠བརྡ་ཡིག༥༤༢ ལྔ་བརྒྱ་དུས་ཀྱི་ཐ་མ་ལ༔ རྡོ་རྗེ་ཐེག་པའི་སྒོར་ཞུགས་པའི༔ རྣལ་འབྱོར་ཉིན་མོའི་སྐར་མ་ཙམ༔ རེས་འགའ་འབྱུང་བར་སྲིད་གྱུར་ན༔ ཐབས་མཆོག་ཟབ་མོའི་མྱུར་ལམ་ལ༔ སྤྱོད་ཅིང་བསྙེན་སྒྲུབ་མཐར་ཕྱིན་པའི༔ རྗེས་སུ་ཁ་བསྐང་ལས་བཞི་ཡི༔ སྲེག་བླུགས་ལ་བརྟེན་ལས་ལ་སྦྱོར༔ དེ་ཡི་ལག་ལེན་རིམ་པ་ལ༔ མེ་དཀྱིལ་ལས་བཞི་གང་རུང་གི༔ དབྱིངས་དང་ཐིག་འཁོར་དེ་བཞིན་ནོ༔ དབུས་སུ་པདྨ་འདབ་མ་བཞི༔ ལྟེ་བར་རཾ་དང་ཧཱུྃ་ཡིག་བྲི༔ ཕྱི་རིམ་རྡོ་རྗེ་རིན་ཆེན་དང་༔ པདྨ་རྒྱ་གྲམ་རིས་སུ་བྲིས༔ དེ་མཐར་མེ་རི་གཡོན་འཁྱིལ་བཀོད༔ རྩིག་ཤིང་ལས་བཞི་རང་རང་གི༔ ཚུལ་དང་མཐུན་པའི་ཤིང་ཉིད་ལས༔ རྩིག་པ་ཞི་བར་ཟླུམ་པོ་དང་༔ རྒྱས་པར་གྲུ་བཞི་དབང་ཟླ་གམ༔ དྲག་པོར་གྲུ་གསུམ་ཉིད་དུ་བྱ༔ དེ་ནས་རྡོ་རྗེ་སློབ་དཔོན་གྱི༔ ཆས་གོས་ཁ་དོག་རང་རང་གི༔ ལས་མཐུན་བྱ་བ་ལག་ལེན་ལ༔ ཁ་ཡི་གྱུ་ཕྱོགས་ཡང་དེ་བཞིན༔ རྡོ་དྲིལ་ཌཱ་མ་རུ་ལ་སོགས༔ འོག་ཏུ་མཁོ་བའི་རྫས་རྣམས་ཀུན༔ ཡོངས་སུ་ཚང་བར་བྱས་ནས་སུ༔ བདག་བསྐྱེད་ཆོ་ག་སྔོན་སོང་ནས༔ མཐར་ནི་དངོས་གཞིར་འཇུག་པ་ལ༔ དཀར་ཕྱོགས་ལྷ་ལ་དཀར་གཏོར་འབུལ༔ ནག་ཕྱོགས་བགེགས་ལ་འབྲས་ཆན་བཏང་༔ དེ་ནས་རྡོར་དྲིལ་བྱིན་བརླབ་ནི༔ རང་ཉིད་ལྷའི་ང་རྒྱལ་དང་ལྡན་པའི་ངང་ནས༔ ཧཱུྃ་ལས་རྡོ་རྗེ་ཐབས་ཀྱི་རང་བཞིན༔ མཱུཾ་ལས་དྲིལ་བུ་ཤེས་རབ་ཀྱི་རང་བཞིན༔ གཉིས་ཀའང་ཟུང་འཇུག་བྱང་ཆུབ་སེམས་ཀྱི་རང་བཞིན་དུ་མོས་ལ༔ ལག་གཡས་ཀྱི་རྡོ་རྗེ་ཐུགས་ཀར་གསོར་ཞིང་༔ ཨོཾ་མ་ཧཱ་བཛྲ་ཧཱུྃ༔ གཡོན་པས་དྲིལ་བུ་གསིལ་བཞིན༔ ཨོཾ་བཛྲ་གྷཎྜེ་ཨཱཿ ཡང་དྲིལ་བུ་དཀུར་བརྟེན་ཏེ༔ ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་ར་ག་ཎ་བཛྲ་སྭ་བྷཱ་ཝ་ཨཏྨ་ཀོ྅་ཧཾ༔ ཐུགས་ཀར་འཁྱུད་རྒྱ་བྱ་ཞིང་༔ རྡོ་རྗེ་ཐུགས༔ དྲིལ་བུ་གསུང་༔ ཕྱག་རྒྱ་སྐུ་ཡི་དམ་ཚིག་གོ༔ མཆོད་རྫས་རྣམས༔ རཾ་ཡཾ་ཁཾ༔ བཛྲ་ཌཱ་ཀི་ནཱི་ཧཱུྃ་གིས་བསང་༔ སྭ་བྷཱ་ཝས་སྦྱངས༔ ཕཊ༔ གཟུང་དང་འཛིན་པས་བསྡུས་པ་ཡི༔ ཞེས་སོགས་གཞུང་བཞིན་བྱིན་བརླབ༔ སྟོང་པའི་ངང་ལས་སྐད་ཅིག་གིས་མཆོད་རྫས་རྣམས་བཤམས་པའི་ངོ་བོ་དང་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བྱིན་རླབས་ཡེ་ཤེས་ཀྱི་བདུད་རྩི་དབྱེར་མེད་དུ་ཚུར་འདུས་པ་ལས་རྫས་རྣམས་རང་རང་གི་རྣམ་པ་ལ་ངོ་བོ་ཡེ་ཤེས་ཀྱི་བདུད་རྩི་བཅུད་རོ་བརྒྱ་ནུས་པ་སྟོང་དང་ལྡན་པར་གྱུར༔ ཨོཾ་ཨ་མྲྀ་ཏེ་ཧཱུྃ་ཕཊ་སྭཱ་ཧཱ༔ ལན་བདུན་བརྗོད༔ ནམ་མཁའ་མཛོད་ཀྱི་སྔགས་ཀྱང་དེ་བཞིན་བརྗོད་ལ་སྤེལ༔ རྟེན་འབྲེལ་སྙིང་པོ་ལན་བདུན་གྱིས་བསྐྱེད་ཅིང་རྒྱས་པར་བྱ༔ བསྲེག་རྫས་རྣམས་བདུད་རྩིས་བྲན་ནས་དགང་གཟར་གིས་རེག་ཅིང་༔ རྒྱས་པར་སྤྲོ་ན་རང་རང་གི་སྔགས་སམ༔ ཡང་ན་རྡོ་རྗེ་རྩེ་གཅིག་གི་ཕྱག་རྒྱས་རེག་ཅིང་༔ ཨོཾ་ཧཱུྃ་སྭཱ་ཧཱ༔ རྫས་བཀྲུས༔ ཡམ་ཤིང་ལ༔ ཨོཾ་ཨ་སྭཱ་ཧཱ༔ ཞུན་མར་ལ༔ ཨོཾ་ཤྲཱི་སྭཱ་ཧཱ༔ འབྲུ་རྣམས་ལ༔ ཨོཾ་ཛྲིཾ་སྭཱ་ཧཱ༔ རྫས་གཞན་རྣམས་ལ༔ ཨོཾ་ཀུ་རུ་ཀུ་རུ་སྭཱ་ཧཱ༔ ཤིན་ཏུ་བསྡུ་ན༔ ཨོཾ་ཨཱཿ ཧཱུྃ༔ ཞེས་བརྗོད༔ དེ་ནས་མེ་སྦར་བ་ནི༔ ཨགྣེ་ཛྭ་ལ་རཾ༔ ཞེས་པས་གཡས་སུ་བསྐོར་ནས་ཐབ་ཀྱི་མེ་ཚང་དུ་བཅུད་པའི་ཏིང་ལོ་སྤར་ཞིང་༔ ཧཱུྃ་མང་དུ་བརྗོད་ལ་རླུང་གཡབ་ཀྱིས་མེ་སྦར་ལ༔ ཨོཾ་ཨགྣ་ཡེ་སྭཱ་ཧཱ༔ ཞེས་བླུག་གཟར་གྱི་མར་ཁུའི་ཐིག་པས་གསོ༔ དེ་ནས་མེ་ལྷ་མཆོད་པ་ནི༔ བཛྲ་ཌཱ་ཀི་ནཱི་ཧཱུྃ་གིས་བསང་༔ ཨོཾ་མ་ཧཱ་ཤུ་ནྱ་ཏཱས་སྦྱངས༔ སྟོང་པའི་ངང་ལས་བདེ་ཆེན་ལྷུན་གྱིས་གྲུབ་པའི་དཀྱིལ་འཁོར་རྒྱ་ཆེ་ཞིང་ཁྱོན་ཡངས་པ་ཡེ་ཤེས་བསྐལ་པ་དུས་མཐའི་མེ་ལྟར་འབར་བའི་དབུས་སུ༔ རཾ་ཡིག་ཡོངས་གྱུར་མེ་ལྷའི་རྒྱལ་པོ་ནི༔ གཟི་བརྗིད་རབ་འབར་ཚངས་སྐུད་སེ་རལ་ཁ༔ ཕྱག་གཡས་བགྲང་ཕྲེང་གཡོན་པས་སྤྱི་བླུགས་བསྣམས༔ ར་སྐྱེས་ལ་ཆིབས་དགའ་བདེའི་ཉམས་དང་ལྡན༔ གནས་གསུམ་ཡིག་འབྲུ་གསུམ་ལས་འོད་འཕྲོས་པས༔ རང་བཞིན་གནས་ནས་སྤྱན་དྲངས་གཉིས་མེད་བསྟིམ༔ ཞེས་མེ་ལྷ་ལས་བཞི་རང་རང་གི་ཁ་དོག་དང་མཚུངས་པར་བསྐྱེད༔ དེ་ལ་སྤྱན་འདྲེན་པ་ནི༔ ཀྱཻ༔ དད་པ་དང་ནི་དམ་ཚིག་གིས༔ ཚུར་གཤེགས་ཚུར་བྱོན་དྲང་སྲོང་ཆེ༔ ཤར་ལྷོ་མེ་ལྷོའི་གྲོང་ཁྱེར་ནས༔ ཨགྣེ་རཱ་ཛ་གཤེགས་སུ་གསོལ༔ འབྱུང་བའི་ལྷ་ཆེན་གཤེགས་ནས་ཀྱང་༔ འབར་བའི་གདན་ལ་བཞུགས་སུ་གསོལ༔ ཕྲིན་ལས་སྒྲུབ་ཕྱིར་ཕྱག་ཀྱང་འཚལ༔ ཨགྣ་ཡེ་ས་པ་རི་ཝཱ་ར་བཛྲ་ས་མ་ཡ་ཛ་ཛཿ ཛཿ ཧཱུྃ་བཾ་ཧོཿ ཏིཥྛ་ལྷན༔ ན་མོ་ཧོ༔ དེ་ནས༔ མེ་ལྷ་ཅུང་ཟད་འཛུམ་པའི་ལྗགས་དང་གཟར་བུ་གཉིས་ཀྱི་ཁ་ལ་རཾ་ཡིག་གིས་མཚན་པར་བསམ་ལ༔ ཨོཾ་ཨགྣ་ཡེ་སྭ་ཧཱ༔ ཞེས་ལན་བདུན་དང་༔ མར་ཁུ་བླུགས་གཟར་བདུན་གྱིས་བཀང་བའི་དགང་གཟར་གྱི་ཟག་མཆུ་ལས་བབས་པའི་མར་ཁུ་བདུད་རྩིའི་དྭངས་མར་དྲངས་ཏེ་གསོལ་བས་དགྱེས་ཤིང་ཚིམ་པར་བསམ་ལ༔ དགང་བླུགས་ཁ་སྤྲད་པ་པུས་མོའི་ནང་ལས་ཕྱིར་མི་འདའ་བར་གཡས་སུ་བསྐོར་ཞིང་༔ ཨོཾ་ཨགྣ་ཡེ་དཱེ་བྱ་དཱེ་བྱ་བི་ཤུདྡྷེ་མ་ཧཱ་ཤྲཱི་ཧ་བྱ་ཀ་བྱ་བ་ཧ་ན་ཡ་ཧཱུྃ་ཕཊ༔ མེ་ལྷའི་རྒྱལ་པོ་འཁོར་དང་བཅས་པ་ཁྱེད་རྣམས་ཀྱིས་ཞལ་ཟས་བསྲེགས་བླུགས་ཀྱི་མཆོད་པ་དམ་པ་འདི་བཞེས་ལ་བདག་ཅག་སྒྲུབ་པ་པོའི་ནད་གདོན་འགལ་རྐྱེན་བར་ཆད་མི་མཐུན་པའི་ཕྱོགས་ངན་པ་ཐམས་ཅད་ཞི་བའི་ཕྲིན་ལས་མཛོད་ཅིག༔ འདོད་གསོལ་ལས་བཞི་གང་ཡིན་བཞིན༔ ཞེས་ལན་གསུམ་གྱིས་འབུལ་ཞིང་༔ ཨོཾ་ཨགྣ་ཡེ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་ཡེ་སྭཱ་ཧཱ༔ དེ་བཞིན་ཤཔྡའི་བར་སྦྱར་བས་མཆོད༔ ཧཱུྃ༔ གཟི་བརྗིད་ཆེན་པོ་མེ་ཡི་ལྷ༔ འདོད་པ་ཐམས་ཅད་སྩོལ་མཛད་པ༔ བདག་གཞན་དོན་སྒྲུབ་ས་ལ་བཞུགས༔ འཇིགས་བྱེད་མེ་ལྷ་ཉིད་ལ་བསྟོད༔ ཅེས་བསྟོད་ནས༔ བསྲེག་རྫས་རྣམས་འབུལ་བ་ལས༔ ཡམ་ཤིང་ལ༔ ཨོཾ་ཨགྣ་ཡེ་བོ་དྷི་བྷྲྀཀྵ་ཡེ་སྭཱ་ཧཱ༔ མར་ཁུ༔ ཨོཾ་ཨགྣེ་ཨགྣེ་སྭཱ་ཧཱ༔ དེ་བཞིན་རིགས་འགྲེའོ༔ ཏིལ༔ ཨོཾ་སརྦ་པཱ་པཾ་ད་ཧ་ན་བཛྲ་ཡེ་སྭཱ་ཧཱ༔ ཡུངས་དཀར༔ ཨོཾ་སརྦ་ཨརྠ་སིདྡྷ་ཡེ་སྭཱ་ཧཱ༔ ཞོ་ཟན༔ ཨོཾ་སརྦ་སམྦ་དེ་སྭཱ་ཧཱ༔ འབྲས༔ ཨོཾ་བཛྲ་པུཥྟ་ཡེ་སྭཱ་ཧཱ༔ སོ་བ༔ ཨོཾ་བཛྲ་བཱི་ཛ་ཡེ་སྭཱ་ཧཱ༔ ནས༔ ཨོཾ་མ་ཧཱ་བེ་གཱ་ཡེ་སྭཱ་ཧཱ༔ སྲན་མ༔ ཨོཾ་མ་ཧཱ་བ་ལ་ཡ་སྭཱ་ཧཱ༔ གྲོ༔ ཨོཾ་བཛྲ་གྷསྨ་རཱི་སྭཱ་ཧཱ༔ དཱུརྦ༔ ཨོཾ་བཛྲ་ཨཱ་ཡུ་ཥེ་སྭཱ་ཧཱ༔ ཀུ་ཤ༔ ཨོཾ་ཨ་པྲ་ཏི་ཧ་ཏ་བཛྲ་ཡ་སྭཱ་ཧཱ༔ ཤིང་ཏོག༔ ཨོཾ་ག་གྷ་ནི་ག་གྷ་ནི་བཻ་ལོ་ཀ་ཏེ་སྭཱ་ཧཱ༔ ཞེས་པ་རྣམས་བདུན་ནམ་ཉེར་གཅིག་རེ་ཕུལ༔ སྔགས་སོ་སོའི་མཐར་ཞི་བ་ལ༔ ནད་གདོན་སྡིག་སྒྲིབ་བག་ཆགས་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ༔ ཤམ་བུ་བཅུ་རེའི་མཐར༔ མེ་ལྷའི་རྒྱལ་པོའི་འཁོར་དང་བཅས་པ་ཁྱེད་རྣམས་ཀྱི་ཞལ་ཟས་བསྲེགས་བླུགས་ཀྱི་མཆོད་པ་དམ་པ་འདི་བཞེས་ལ་བདག་ཅག་སྒྲུབ་པ་པོའི་འགལ་རྐྱེན་བར་ཆད་མི་མཐུན་པའི་ཕྱོགས་ངན་པ་ཐམས་ཅད་ཞི་བའི་ཕྲིན་ལས་མཛོད་ཅིག༔ ཅེས་སྤེལ་ཚིག་དང་༔ རྒྱས་པ་ལ༔ ཚེ་བསོད་དཔལ་འབྱོར་ཡེ་ཤེས་ཡོན་ཏན་ཐམས་ཅད་པུཥྟིཾ་ཀུ་རུ་ཡེ་སྭཱ་ཧཱ༔ ཞེས་ཤམ་བུ་དང་༔ ཚེ་བསོད་དཔལ་འབྱོར་མངའ་ཐང་ཡེ་ཤེས་ཡོན་ཏན་རྒྱས་པའི་ཕྲིན་ལས་མཛོད་ཅིག༔ ཅེས་སྤེལ་ཚིག་དང་༔ དབང་ལ་ཡང་དེ་བཞིན་དུ༔ ཁམས་གསུམ་སྲིད་གསུམ་མོས་པ་རྣམ་བཞིས་པཱ་ཤཾ་ཀུ་རུ་ཡེ་སྭཱ་ཧཱ༔ ཞེས་ཤམ་བུ་དང་༔ ཁམས་གསུམ་སྲིད་གསུམ་གྱི་ཟས་ནོར་ལོངས་སྤྱོད་སྐྱེ་འགྲོ་ཕོ་མོ་འདོད་རྒུ་ཡིད་བཞིན་གྱི་བྱེ་བྲག་ཐམས་ཅད་དབང་དུ་འདུ་བའི་ཕྲིན་ལས་མཛོད་ཅིག༔ ཅེས་སྤེལ་ཚིག་དང་༔ དྲག་པོ་ལ༔ དགྲ་བགེགས་སརྦ་ཤ་ཏྲུཾ་མཱ་ར་ཡ་ཀུ་རུ་ཡེ་སྭཱ་ཧཱ༔ ཞེས་ཤམ་བུ་དང་༔ ཉི་མ་ཕྱོགས་བཞི་མཚམས་བརྒྱད་སྟེང་འོག་བར་གསུམ་ནས་གནོད་བྱེད་དགྲ་བགེགས་གདུག་པ་ཅན་སྡང་སེམས་དང་ལྡན་པ་ཐམས་ཅད་རྗེས་ཤུལ་ལྷག་མེད་དུ་བརླག་པའི་ཕྲིན་ལས་མཛོད་ཅིག༔ ཅེས་སྤེལ་ཚིག་བཏགས་པས་འབུལ་ཞིང་༔ དེ་ནས་ཡུངས་དཀར་ཐབ་ཏུ་གཏོར་ཏེ༔ དྲང་སྲོང་ཆེན་པོ་འཁོར་དང་བཅས་པས་བསྲེག་རྫས་ལྷའི་ཞལ་དུ་སྟོབ་པ་དང་༔ མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ཏེ༔ སོགས་གོང་བཞིན་ཁ་བསྒྱུར་རོ༔ ཞེས་གསོལ་ལ་བླུག་གཟར་གྱིས་མར་ཁུ་ཕུལ་ཏེ༔ ཨོཾ་བཛྲ་ཛྭ་ལ་རཾ༔ མེ་ལྷ་འབར་བའི་རྣམ་པར་གྱུར་པར་བསམ་མོ༔ དེ་ནས་རྟེན་དང་བརྟེན་པ་ཡི༔ དཀྱིར་འཁོར་ལྷ་ཚོགས་བསྒོམ་པ་ནི༔ ཕཊ༔ འདི་ལྟར་སྣང་བའི་སྣོད་བཅུད་ཀུན༔ སྒྱུ་མའི་འཁྲུལ་འཁོར་བསྒྱུར་བ་ལྟར༔ དོན་གྱི་འོག་མིན་ཞིང་ཁམས་སུ༔ ལྷུན་གྲུབ་བཀོད་པ་རབ་རྫོགས་པའི༔ གཞལ་ཡས་ཁང་དབུས་མེ་དཔུང་ཀློང་༔ པདྨ་ཉི་ཟླའི་གདན་སྟེང་དུ༔ ལས་བཞི་ལྷུན་གྲུབ་ལྟར་དུ་ནི༔ ཧཱུྃ་ཡིག་མཐིང་ནག་ལས་བཞི་རང་རང་གི་ཁ་དོག་བསྒྱུར་བ་ཞལ་ཤེས་སོ།། མེ་འབར་ལས༔ འོད་འཕྲོས་རྒྱལ་བ་མཆོད་པས་མཉེས༔ ཁམས་གསུམ་སེམས་ཅན་སྒྲིབ་པ་སྦྱངས༔ འཁོར་འདས་ཡོངས་ཀྱི་གཟི་བྱིན་དང་༔ ནུས་སྟོབས་སྲོག་གི་སྙིང་པོར་བཅས༔ ཚུར་འདུས་ཧཱུྃ་ལ་བཅུད་དུ་དྲིལ༔ ཧཱུྃ་ལས་སྐད་ཅིག་དྲན་རྫོགས་སུ༔ དུས་གསུམ་རྒྱལ་བ་བསྐྱེད་པའི་ཡུམ༔ ཤེས་རབ་དབྱིངས་ཆེན་ཁྲོས་མ་མཐིང་༔ སོགས་རང་གཞུང་གི་ལྷ་བསྐྱེད༔ སྤྱན་འདྲེན་བཞུགས་གསོལ༔ ཕྱག་འཚལ༔ མཆོད་པ༔ བསྟོད་པ་ཡན་ལས་བྱང་གི་དཀྱུས་བཞིན་བྱས་ནས་དགང་བླུགས་འབུལ་བ་ནི༔ དཀྱིལ་འཁོར་གྱི་ལྷ་རྣམས་ཅུང་ཟད་འཛུམ་པའི་ལྗགས་དང་གཟར་བུ་གཉིས་ཀྱི་ཁ་ལ་རཾ་ཡིག་གིས་མཚན་པར་གྱུར༔ སོགས་སྔར་དང་འདྲ་བ་ལས༔ རྩ་སྔགས་བདུན་གྱིས་བཀང་ནས༔ ཨོཾ་ཨགྣ་ཡེ་དཱེ་བྱ་དཱེ་བྱ་སོགས་ཀྱིས་ཕུལ་ནས༔ ཡེ་ ཤེས་ཀྱི་མཁའ་འགྲོ་ཁྲོས་མ་ནག་མོའི་དཀྱིལ་འཁོར་གྱི་ལྷ་ཚོགས་ཁྱེད་རྣམས་ཀྱི་ཞལ་དུ་ཞལ་ཟས་བསྲེགས་བླུགས་ཀྱི་མཆོད་པ་དམ་པ་འདི་བཞེས་ལ་བདག་ཅག་སྒྲུབ་པ་པོའི་ནད་གདོན་འགལ་རྐྱེན་བར་ཆད་མི་མཐུན་པའི་ཕྱོགས་ངན་པ་ཐམས་ཅད་ཞི་བའི་ཕྲིན་ལས་མཛོད་ཅིག༔ ཅེས་སྤེལ་ཚིག་དང་བཅས་ལན་གསུམ་དུ་འབུལ༔ བསྲེག་རྫས་གཞན་རྣམས༔ ཡམ་ཤིང་ལ༔ ཨོཾ་བཛྲ་ཀྲོ་དྷི་ཀ་ལི་བྃ་ཧ་རི་ནི་ས་ཧཱུྃ་ཕཊ༔ ཨོཾ་བོ་དྷི་བྷྲྀཀྵ་ཡེ་སྭཱ་ཧཱ༔ ཤམ་བུར་ཞི་བ་ལ༔ ནད་གདོན་སྡིག་སྒྲིབ་བག་ཆགས་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ༔ བཅུ་རེ་སྤེལ་ཚིག་དང་བཅས་འབུལ༔ དེ་བཞིན་དུ་མར་ཁུ་ནས་ཤིང་ཏོག་གི་བར་རྫས་སྔགས་སྤེལ་ཚིག་དང་བཅས་པ་གོང་ལྟར་བྱ༔ མཐར་རྩ་བའི་སྔགས་དང་ཡིག་བརྒྱ་སྤེལ་བས་ཡུངས་དཀར་ཕུལ་ལ་ཕྲིན་ལས་བཅོལ་བ་སྔར་ལྟར་བྱ༔ དེ་ནས་སླར་གཤེགས་སྐྱེམས་ནི༔ དཀྱིལ་འཁོར་གྱི་ལྷ་རྣམས་ཅུང་ཟད་འཛུམ་པའི་ལྗག་དང་གཟར་བུ་གཉིས་ཀྱི་ཁ་སོགས་ནས༔ ཕྲིན་ལས་མཛོད་ཅིག༔ གི་བར་སྔར་བཞིན་ཚར་གསུམ་གྱིས་དགང་བླུགས་ཕུལ་ནས༔ གཏོར་མ་བསང་སྦྱངས་བྱིན་གྱིས་བརླབ༔ ཨོཾ་བཛྲ་ཀྲོ་དྷི་ཀ་ལི་བྃ་ཧ་རི་ནི་ས་ཨེ་དཾ་བ་ལིངྟ་ཁཱ་ཧི༔ ཉེར་གཅིག་གམ་བདུན་གྱིས་ཕུལ་ལ༔ ཧཱུྃ༔ སྐུ་གསུམ་ཡེ་ཤེས་མཁའ་འགྲོའི་ཚོགས༔ ཡོངས་འདུས་བདག་ཉིད་ཁྲོས་མའི་སྐུ༔ ཡེ་ཤེས་རང་རྩལ་མཁའ་འགྲོ་ལྔ༔ འབུམ་ཕྲག་མཁའ་འགྲོའི་ཚོགས་དང་བཅས༔ མཆོད་སྦྱིན་གཏོར་མ་འདི་བཞེས་ལ༔ སོགས་ཀྱིས་ཕྲིན་ལས་བཅོལ༔ གཏང་རག་གི་མཆོད་བསྟོད་ནི༔ ཨོཾ་བཛྲ་ཀྲོ་དྷི་ཀ་ལི་བྃ་ཧ་རི་ནི་ས་ས་པ་རི་ཝཱ་ར་ཨརྒྷཾ་སོགས་ནས་པྱི་ནང་གསང་མཆོད་རྣམས་ཕུལ་ཏེ་མཆོད༔ ཧོཿ གདོད་ནས་གཞི་དབྱིངས་ཆོས་སྐུ་ཡུམ༔ ལྷུན་གྲུབ་རོལ་པ་ཡུམ་ཆེན་ལྔ༔ ཐུགས་རྗེའི་རང་རྩལ་མཁའ་འགྲོའི་དལ༔ ཡོངས་གྲུབ་ཆེན་པོར་ཕྱག་འཚལ་བསྟོད༔ ཅེས་བསྟོད༔ མ་འབྱོར་མ་རྙེད་མ་ཚང་སོགས༔ འགལ་འཁྲུལ་ནོངས་པ་ཅི་མཆིས་པ༔ ཡེ་ཤེས་མཁའ་འགྲོའི་ཚོགས་ལ་བཤགས༔ མི་སྒྲིབ་ཚངས་པའི་དངོས་གྲུབ་སྩོལ༔ ཅེས་ཡི་གེ་བརྒྱ་པ་བརྗོད༔ དེ་ནས་གཤེགས་སུ་གསོལ་བ་ནི༔ ཨོཾ༔ ཡེ་ཤེས་མཁའ་འགྲོ་དབྱིངས་སུ་དེངས༔ དམ་ཚིག་མཁའ་འགྲོ་རང་ལ་བསྡུ༔ སླར་ཡང་ཕྲིན་ལས་སྒྲབ་པའི་ཕྱིར༔ འགྲོ་བའི་དོན་ལ་སྐུར་བཞེངས་ཤིག༔ བཛྲ་མུཿ སླར་ཡང་མེ་ལྷ་སྔར་བཞིན་ཡོངས་སུ་རྫོགས་པར་གསལ་ལ༔ ཡམ་ཤིང་ནས་ཤིང་ཏོག་གི་བར་གྱི་བསྲེག་རྫས་རྣམས་གསུམ་རེ་སོགས་སྔར་བཞིན་ཕུལ༔ གཏོར་མ་ཨ་ཀཱ་རོས་བྱིན་གྱིས་བརླབ༔ ཨོཾ་ཨགྣེ་དེ་ཝ་ས་པ་རིཝཱ་ར་ཨེ་དཾ་བ་ལིངྟ་ཁཱ་ཧི༔ ལན་གསུམ་གྱིས་ཕུལ་ནས༔ ཧཱུྃ༔ འབར་བ་མེ་རུ་བརྫུ་བྱེད་ཅིང་༔ ལོག་རྟོག་བསྲེག་ཅིང་རོལ་པའི་ལྷ༔ དྲང་སྲོང་རྒྱལ་པོ་འཁོར་བཅས་ལ༔ མཆོད་ཅིང་བསྟོད་དེ་ཕྱག་ཀྱང་འཚལ༔ མེ་ལྷའི་རྒྱལ་པོ་འཁོར་དང་བཅས༔ མཆོད་སྦྱིན་གཏོར་མ་འདི་བཞེས་ལ༔ སོགས་ཀྱིས་ཕྲིན་ལས་བཅོལ༔ མ་འབྱོར་པ་དང་སོགས་ཀྱིས་བཤགས་པ་བྱ༔ དེ་ནས་གཤེགས་སུ་གསོལ་བ་ནི༔ ཧཱུྃ༔ བཟི་བརྗིད་འབར་བ་མེ་ཡི་ལྷ༔ རང་བཞིན་གནས་སུ་གཤེགས་སུ་གསོལ༔ ཕྲིན་ལས་མེ་ལྕེ་རབ་འབར་བས༔ སྦྱིན་སྲེག་ཟ་བའི་གདོན་གཞོམ་གྱུར༔ བཛྲ་མུཿ སརྦ་ལོ་ཀ་གཙྪ༔ དེ་ནས་དགེ་བ་བསྔོ་ཞིང་ཤིས་པ་བརྗོད་པ་སོགས་རང་གཞུང་ལྟར་རོ༔ དེ་ལྟར་བསྲེགས་བླུགས་བྱས་པ་ཡིས༔ བསྐྱེད་རིམ་གནད་དང་ལྡན་གྱུར་ན༔ རྣམ་བཞྀའི་ལས་ཀུན་ཐོགས་མེད་འགྲུབ༔ ས་མ་ཡ༔ ཨྠིྀ༔ ཞེས་པ་འདིའང་རང་སློབ་དམ་པ་མཁྱེན་རབ་རྒྱ་མཚོས་ནན་དུ་བསྐུལ་ངོར་རིག་འཛིན་བདུད་འཇོམས་རྡོ་རྗེ་དག་སྣང་ཁ་བསྐང་དང་བཅས་པ་ཁྲིགས་སུ་བསྡེབས་ནས་སྤེལ་བ་ཡོངས་སུ་དགེ་བར་གྱུར་ཅིག །དགེའོ། །སརྦ་མངྒ་ལཾ།། །།