གཏེར་ཆེན་རྗེ་དྲུང་ཕྲིན་ལས་བྱམས་པའི་འབྱུང་གནས་སམ་གསང་བའི་མཚན་དུ་བདུད་འཇོམས་ནམ་མཁའི་རྡོ་རྗེར་གྲགས་པའི་ཟབ་ཆོས་རྩ་གསུམ་ཚེ་སྒྲུབ་པདྨ་གསང་ཐིག་གི་སྐོར་ཇི་ལྟར་ཐོབ་པའི་ཚུལ།

Previous Text Back to Volume Page Next Text

Wylie title	gter chen rje drung phrin las byams pa'i 'byung gnas sam gsang ba'i mtshan du bdud 'joms nam mkha'i rdo rjer grags pa'i zab chos rtsa gsum tshe sgrub pad+ma gsang thig gi skor ji ltar thob pa'i tshul
Location	bdud 'joms rin po che bka' 'bum Volume 20, Text 28, Pages 501-503 (Folios 251a1 to 252a5)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Gter chen rje drung phrin las byams pa'i 'byung gnas sam gsang ba'i mtshan du bdud 'joms nam mkha'i rdo rjer grags pa'i zab chos rtsa gsum tshe sgrub pad+ma gsang thig gi skor ji ltar thob pa'i tshul. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 20: 501-503. Kalimpong: Dupjung Lama, 1979-1985.
Side notes	Recto: thob yig Verso: karma mai tri'i pad+ma gsang thig skor
More details More details
Genre	Records of Teachings Received - thob yig - gsan yig
Cycle	ཟབ་པ་དང་རྒྱ་ཆེའི་དམ་པའི་ཆོས་ཀྱི་ཐོབ་ཡིག་རིན་ཆེན་སྒྲོན་མེ། (zab pa dang rgya che'i dam pa'i chos kyi thob yig rin chen sgron me)

[edit]

༄༅། ། [251a] ཨོཾ་སྭསྟི། ལང་གྲོ་ལོ་ཙཱ་བ་ཆེན་པོའི་རྣམ་འཕྲུལ་རྩོད་བྲལ་སྤྲུལ་པའི་གཏེར་ཆེན་རྗེ་དྲུང་ཕྲིན་ལས་བྱམས་པའི་འབྱུང་གནས་སམ་གསང་བའི་མཚན་དུ་བདུད་འཇོམས་ནམ་མཁའི་རྡོ་རྗེར་གྲགས་པ་གང་གིས་ཁམས་ཀྱི་གླ་བ་རྐང་གཅིག་ཡེ་རྒྱལ་ནམ་ཁའ་མཛོད་ནས་སྤྱན་དྲངས་པའི་ཟབ་ཆོས་རྩ་གསུམ་ཚེ་སྒྲུབ་པདྨ་གསང་ཐིག་གི་སྐོར་རྣམས་རང་སྐལ་དུ་ཇི་ལྟར་ཐོབ་པའི་ཚུལ་ལ། ཐོག་མར་གཏེར་ཆེན་བླ་མ་ཉིད་ཀྱིས་ལྗགས་བསྒྲིགས་རྩ་བའི་དབང་བསྐུར་རྒྱས་པའི་ཆོ་ག་ཡེ་ཤེས་ཆུ་རྒྱུན་ལྟར་རས་བྲིས་ཀྱི་དཀྱིལ་འཁོར་ལ་བརྟེན་ནས་ཕྱི་ནང་གི་འཇུག་པ་སྔོན་དུ་འགྲོ་བས། དངོས་གཞི་སྤྲོས་བཅས་བུམ་དབང་ཆེན་མོ། རྗེས་འབྲེལ་སྐུ་གསུང་ཐུགས་དབང་། མཐའ་རྟེན་ཚེ་ཡི་དབང་བསྐུར། སྤྲོས་མེད་མཆོག་དབང་རྣམ་གསུམ་བཅས་སྨིན་བྱེད་ཡོངས་རྫོགས་དང་། དེ་དང་འབྲེལ་བར་པདྨ་ཟབ་པ་རྩ་བའི་རྒྱུད་ལྟར་དབང་བཞི་སོ་སོའི་ལམ་གྱི་རིམ་པ་ལ། བསྐྱེད་རིམ་དབྱིངས་ཀྱི་རྣལ་འབྱོར། རྩ་རླུང་ཐིག་ལེའི་རྣལ་འབྱོར། བདེ་བ་ཆེན་པོའི་རྣལ་འབྱོར། དེ་ཁོ་ན་ཉིད་ཀྱི་མན་ངག་བཅས་སྨིན་གྲོལ་ [251b] ཚང་སྤྲུགས་སུ་ཐོབ་བོ། །རྒྱབ་བརྟེན་ལུང་ལ། རྩ་བ་དང་ཡན་ལག་གཉིས་ལས། དང་པོ་རྩ་བ་གཏེར་གཞུང་གི་སྐོར་ལ། འཆི་མེད་ཚེ་ཡི་ཕྲིན་ལས། ཚེ་འགུགས་ཐུགས་དམ་བསྐུལ་བ། སྨིན་བྱེད་དབང་གི་བྱང་བུ། ཐུན་མོང་ཚེ་ཡི་དབང་བསྐུར། པདྨ་ཟབ་པ་རྩ་བའི་རྒྱུད་དང་། དེའི་ཁ་སྐོང་མན་ངག་ཐོར་བུའི་རྒྱུད་བཅས། གཉིས་པ་ཁ་སྐོང་ཆོག་ཁྲིགས་ཀྱི་སྐོར་ལ། བརྒྱུད་པའི་གསོལ་འདེབས་བདུད་རྩིའི་ཟིལ་དངར། རྒྱུན་གྱི་རྣལ་འབྱོར་ཕྱག་རྒྱ་ལམ་རྫོགས། ཞི་ཁྲོའི་ཆོ་ག་ཀུན་བཟང་ཁྲུས་ཆབ། བདག་འཇུག་ཡེ་ཤེས་ཆུ་བོ། རྩ་དབང་རྒྱས་པ་ཡེ་ཤེས་ཆུ་རྒྱུན། ཚེ་དབང་འཆི་མེད་གྲུབ་པའི་བཅུད་ལེན། ཆོས་སྲུང་རྒྱུན་གསོལ་བསྟན་དགྲ་ཚར་གཅོད། སྔོན་འགྲོའི་ངག་འདོན་རྣམ་མཁྱེན་ཤིང་རྟ། གནས་ལུང་ཐུགས་རྗེའི་ལྕགས་ཀྱུ། སྦྱིན་སྲེག་སྣ་ཚོགས་ནོར་བུའི་བང་མཛོད། བསྙེན་ཡིག་རིམ་གཉིས་གྲུབ་པའི་ཤིང་རྟ། བླ་བསླུ་བྱ་ཚུལ་སྲོག་འཚོའི་ལྗོན་ཤིང་། ཚོགས་བསྡུས་བདེ་ཆེན་འཁོར་ལོ། རྩ་རྒྱུད་པདྨ་ཟབ་པའི་བསྡུས་འགྲེལ་བཅས་གཏེར་ཆེན་ཉིད་ཀྱི་ལྗགས་བསྒྲིགས་མའོ། །དེ་ལྟར་ཆོས་སྐོར་ཡོངས་རྫོགས་ཐོབ་པའི་བརྒྱུད་པ་ནི། ཆོས་སྐུ་ [252a] སྣང་བ་མཐའ་ཡས། ལོངས་སྐུ་པདྨ་གར་དབང་། སྤྲུལ་སྐུ་པདྨ་ཀུན་ཏུ་འཆང་བ། དྷཱ་ཀི་ཡེ་ཤེས་མཚོ་རྒྱལ། ལོ་ཙཱ་བ་དཀོན་མཆོག་འབྱུང་གནས། གྲུབ་མཆོག་མཉམ་མེད་གྲགས་པ། སྤྲུལ་པའི་གཏེར་ཆེན་བླ་མ་བཀའ་དྲིན་མཚུངས་མེད་རྡོ་རྗེ་དྲུང་ཕྲིན་ལས་བྱམས་པའི་འབྱུང་གནས་སམ། བདུད་འཇོམས་ནམ་མཁའི་རྡོ་རྗེ་གང་གི་ཞལ་སྔ་ནས། བདག་འཇིགས་བྲལ་ཡེ་ཤེས་རྡོ་རྗེ་ལ་སྩལ་བའོ། །སྔོན་འགྲོ། གནས་ལུང་། སྦྱིན་སྲེག་རྣམས་བསྐུལ་བ་པོ་སངས་སྤྲུལ་ངེས་དོན་རྒྱ་མཚོ་ལས་བདག་གིས་ཐོབ་པའོ། །ཡང་རྗེ་གང་གི་དག་སྣང་སྲོང་བཙན་བླ་སྒྲུབ་ཀྱི་སྨིན་གྲོལ་རྒྱབ་བརྟེན་དང་བཅས་པ། གཏེར་ཆེན་ཉིད་ཀྱི་ཞལ་ལས་དངོས་སུ་ཐོབ་པའི་སྐལ་བཟང་དུ་གྱུར་ཏོ། ། ༈ ། ཡང་རྗེ་དྲུང་རིན་པོ་ཆེའི་མདུན་ནས་ལྕེ་བཙུན་སྙིང་ཐིག་གི་སྨིན་གྲོལ་རྒྱབ་བརྟེན་དང་བཅས་པའང་ལེགས་པར་ནོས།། །།