ཟབ་གསང་མཁའ་འགྲོའི་སྙིང་ཐིག་ལས༔ འཇམ་དཔལ་གསང་བ་འདུས་པའི་བསྐུལ་བཟློག་རྡོ་རྗེའི་ཕ་ལམ༔

Previous Text Back to Volume Page Next Text

Wylie title	zab gsang mkha' 'gro'i snying thig las: 'jam dpal gsang ba 'dus pa'i bskul bzlog rdo rje'i pha lam:
Location	bdud 'joms gling pa zab gter Volume 2, Text 13, Pages 221-223 (Folios 1a1 to 2a5)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las 'jam dpal gsang ba 'dus pa'i bskul bzlog rdo rje'i pha lam. In Sprul pa'i gter chen bdud 'joms gling pa'i zab gter gsang ba'i chos sde, Vol. 2: 221-223. Thimphu, Bhutan: Lama Kuenzang Wangdue, 2004.
Side notes	Recto: bskul zlog Verso: bdud 'joms 'jam dpal zhi ba
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Averting or Dispelling Rites- zlog pa · Invocations - bskul ba
Cycle	འཇམ་དཔལ་གསང་བ་འདུས་པ་ ('jam dpal gsang ba 'dus pa)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	'jam dpal dbyangs
Colophon	ཞེས་པ་འདི་ཡང་སློབ་བུ་ཀུན་དཔལ་དང་དགེ་འདུན་གཉིས་ཀྱིས་ནན་དུ་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཡེ་ཤེས་མཁའ་འགྲོའི་བརྡ་རིས་ལས་ལས་དག་པར་ཕབ་པའོ། །དགེའོ། །དགེའོ། །དགེའོ།།
Colophon	zhes pa 'di yang slob bu kun dpal dang dge 'dun gnyis kyis nan du bskul ngor khrag 'thung bdud 'joms rdo rjes ye shes mkha' 'gro'i brda ris las las dag par phab pa'o/_/dge'o/_/dge'o/_/dge'o//

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ འཇམ་དཔལ་གསང་བ་འདུས་པའི་བསྐུལ་བཟློག་རྡོ་རྗེའི་ཕ་ལམ་བཞུགས་སོ༔ ན་མོ་གུ་རུ་ཝེ༔ (བརྡ་ཡིག་) གསེར་སྐྱེམས་གཏོར་མཆོད་བཤམས་པ་ལ༔ འགུགས་གཞུག་བསྒྲལ་བའི་ཤ་ཁྲག་བསྐྱིལ༔ འཇམ་དཔལ་སྒྱུ་འཕྲུལ་རོལ་པ་ལས༔ སྤྲུལ་དང་ཡང་སྤྲུལ་དཔག་མེད་ཀྱིས༔ སྣང་སྲིད་ཁམས་ཀུན་ཡོངས་གང་ནས༔ དགྲ་བགེགས་གནོད་བྱེད་མ་ལུས་པ༔ བསྒྲལ་བས་དབྱིངས་སུ་བཤིག་པར་དམིགས༔ ཧཱུྃ་ཧྲཱིཿཀ་དག་སྤྲོས་མཐའ་བྲལ་བའི་ཕོ་བྲང་ནས༔ དུས་གསུམ་རྒྱལ་བ་ཀུན་གྱི་ཁྱབ་བདག་དཔལ༔ ཆོས་སྐུ་ཀུན་བཟང་ཡབ་ཡུམ་ཐུགས་དམ་བསྐུལ༔ བཞེངས་ཤིག་ཆོས་ཀྱི་དབྱིངས་ནས་སྐུར་བཞེངས་ཤིག༔ གཟུང་དང་འཛིན་པ་བདག་མེད་ཆེན་པོར་ཟློག༔ ལྷུན་གྲུབ་བདེ་ཆེན་རོལ་པའི་དཀྱིལ་འཁོར་ནས༔ ལོངས་སྐུ་རིགས་ལྔའི་ཐུགས་དམ་གནད་ནས་བསྐུལ༔ སྐུ་དང་ཡེ་ཤེས་དབྱིངས་ནས་སྐུར་བཞེངས་ལ༔ ཉོན་མོངས་དུག་ལྔའི་གཡོ་འཁྲུགས་དབྱིངས་སུ་ཟློག༔ མཁྱེན་གཟིགས་ཡེ་ཤེས་རོལ་པའི་དཀྱིལ་འཁོར་ནས༔ འཇམ་དཔལ་རིགས་ལྔའི་ཐུགས་དམ་གནད་ནས་བསྐུལ༔ ཤེས་རབ་གསལ་ཁྱབ་དབྱིངས་ནས་སྐུར་བཞེངས་ཤིག༔ མ་རིག་འཁྲུལ་པ་རིག་སྟོང་ངང་དུ་ཟློག༔ རྣམ་ཐར་གསུམ་ལྡན་བཙུན་མོའི་བྷ་ག་ནས༔ དབྱངས་ཅན་ལྷ་མོ་རིགས་ལྔའི་ཐུགས་དམ་བསྐུལ༔ ཆོས་ཉིད་སྤྲོས་བྲལ་དབྱིངས་ནས་སྐུར་བཞེངས་ཤིག༔ སེམས་དང་སེམས་བྱུང་བག་ཆགས་དབྱིངས་སུ་བཟློག༔ རབ་འབྱམས་ཕྲིན་ལས་ཡོངས་གྲུབ་དཀྱིལ་འཁོར་ནས༔ འཇིགས་བྱེད་གཤིན་རྗེ་རིགས་བཞིའི་ཐུགས་དམ་བསྐུལ༔ ཚད་མེད་རྣམ་བཞིའི་དབྱིངས་ལས་སྐུར་བཞེངས་ལ༔ རྟག་ཆད་མཐའ་བཞི་མཐའ་བྲལ་ཆེན་པོར་ཟློག༔ བདག་རྟོག་དབྱིངས་སྒྲོལ་མི་རོའི་བ་གམ་ནས༔ ཡེ་ཤེས་འཇིག་རྟེན་ཆོས་སྐྱོང་སྲུང་མ་རྣམས༔ བཀའ་དང་དམ་ཚིག་གཉན་པོས་ཐུགས་དམ་བསྐུལ༔ མངོན་སྤྱོད་རོལ་པའི་དབྱིངས་ནས་སྐུར་བཞེངས་ཤིག༔ གཟུགས་ཅན་གཟུགས་མེད་དགྲ་བགེགས་གནོད་བྱེད་ཟློག༔ དཀོན་མཆོག་རིན་ཆེན་གསུམ་དང་རྩ་བ་གསུམ༔ སྐུ་གསུམ་རྒྱལ་བ་སྲས་དང་བཅས་པ་རྣམས༔ མ་གཡེལ་ཐུགས་དམ་གཉན་པོ་གནད་ནས་བསྐུལ༔ བཞེངས་ཤིག་མི་མངོན་དབྱིངས་ནས་སྐུར་བཞེངས་ཤིག༔ བྱང་ཆུབ་སྒྲུབ་པའི་ཉེར་འཚེ་བར་ཆད་ཟློག༔ མི་ནད་ནོར་གྱི་གོད་ཡམས་ཐམས་ཅད་ཟློག༔ དགྲ་གདོན་བགེགས་ཀྱི་རྒོལ་ངན་ཐམས་ཅད་ཟློག༔ དུས་མིན་འཆི་དང་འཇིགས་བྱེད་ཐམས་ཅད་ཟློག༔ ཆོས་སྲིད་ནོར་ལ་གནོད་བའི་དགྲ་འདྲེ་ཀུན༔ སྡང་བར་བྱེད་པའི་དགྲ་བོའི་སྟེང་དུ་ཟློག༔ གནོད་པར་བྱེད་པའི་བགེགས་ཀྱི་སྟེང་དུ་ཟློག༔ དཀོན་མཆོག་དབུ་འཕང་སྨད་པའི་སྟེང་དུ་ཟློག༔ བསྟན་དགྲ་གདུག་པ་ཅན་གྱི་སྟེང་དུ་ཟློག༔ སྔོན་གྱི་ལས་དང་འཕྲལ་རྐྱེན་ངན་པ་ཀུན༔ མ་ལུས་བསྡུས་སྟེ་སྡང་བའི་དགྲ་ལ་ཟློག༔ རྗེས་ཤུལ་མེད་པར་ཡུལ་མེད་ཆེན་པོར་ཟློག༔ ཨོཾ་ཨཱཿཧཱུྃ་གུ་རུ་དྷེ་ཝ་ཌཱཀི་ནཱི་སརྦ་དྷརྨཱ་ནིརྨ་སཾ་བྷོ་ཀཱ་ཡ་སརྦ་ས་མ་ཡ༔ ནྲི་ཏྲི་ཤ་ཏྲུཾ་མཱ་ར་ཡ་བྷྱོ་བྷྱོ་ཟློག༔ ཡ་མཱནྟ་ཀ་ཧཱུྃ་ཨ་ཡ་མ་དུ་རུ་ཙ་ཤ་ན་ས་མ་ཡ༔ གནོད་བྱེད་དགྲ་བགེགས་ཐམས་ཅད་མཱ་ར་ཡ་རྦད་རྦད་བྷྱོ་བྷྱོ་ཟློག༔ གནད་དེས་རྐྱེན་ངན་བར་ཆད་ཐམས་ཅད་སེལ༔ མི་མཐུན་མི་འདོད་རྐྱེན་ངན་ཀུན་ཟློག་བྱེད༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ཡང་སློབ་བུ་ཀུན་དཔལ་དང་དགེ་འདུན་གཉིས་ཀྱིས་ནན་དུ་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཡེ་ཤེས་མཁའ་འགྲོའི་བརྡ་རིས་ལས་ལས་དག་པར་ཕབ་པའོ། །དགེའོ། །དགེའོ། །དགེའོ།། །།