TTDL-ZABTER-08-NYA-060

Previous Text Back to Volume PageNext Text

Wylie title
Location	bdud 'joms gling pa zab gter Volume 8, Text 60, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

Tibetan Text

[edit]

བརྡ་ཡིག་༠༠༠༠༠༠༔ ཟབ་གསང་མཁའ་འགྲོའི་སྙིང་ཐིག་ལས༔ གནོད་སྦྱིན་ཤན་པ་དམར་ནག་གི་བསྐུལ་བ་རྡོ་རྗེའི་ཐོག་མདའ་བཞུགས་སོ༔ བརྡ་ཡིག་༠༠༠༠༠༠༥༡༠༔ ན་མོ་གུ་རུ་པདྨ་ཀ་ར་ཡེ༔ མ་འོངས་པདྨའི་བརྒྱུད་འཛིན་རྣམས༔ ལས་ཀ་མཐུ་ལ་བརྩོན་པའི་ཚེ༔ བསྐུལ་བ་རྡོ་རྗེའི་ཐོག་མདའ་དགོས༔ ལག་ཏུ་ལེན་པའི་རིམ་པ་ནི༔ དམར་གཏོར་ཤ་ཁྲག་གིས་བརྒྱན་ཅིང་༔ རཀྟས་བྲན་ཞིང་སྐྱེམས་བཅས་བཤམས༔ རང་གི་གདོང་ལ་ཁྲག་ཀྱང་བྱུག༔ སྐྲ་བཤིག་འཇིགས་པའི་ཆས་སུ་ཞུགས༔ ལྷ་ཡི་ང་རྒྱལ་བརྟན་པོས་འདི༔ ཧཱུྃ་ཛཿསྐྱབས་ཀྱི་དམ་པ་དཀོན་མཆོག་གསུམ༔ རྩ་གསུམ་རྒྱལ་བའི་དཀྱིལ་འཁོར་ལྷས༔ མི་མངོན་དབྱིངས་ནས་སྤྱན་གྱིས་གཟིགས༔ གསོན་ཅིག་དགོངས་ཤིག་དཔང་དགོངས་འཚལ༔ ཧྲཱིཿཀྵ༔ དབང་ཆེན་གསང་བའི་སྲས་མཆོག་དཔལ༔ གནོད་སྦྱིན་ཤན་པ་ཆེན་པོ་ཁྱོད༔ བརྒྱུད་གསུམ་རིག་འཛིན་བླ་མ་ཡི༔ སྤྱན་སྔར་ཁས་བླངས་དམ་བཅས་པ༔ བསྟན་དང་བསྟན་འཛིན་སྡེ་སྐྱོང་ཞིང་༔ ཞིང་བཅུའི་སྲོག་བདུད་ཤན་པ་རུ༔ དང་པོ་སྤྲུལ་ཞིང་བར་དམ་བཅས༔ ཐ་མ་དབང་བསྐུར་བྱིན་རླབས་ཐོབ༔ ཁྱོད་ཀྱི་དམ་ཚིག་དེ་ཡིན་ལ༔ བདག་ནི་རྣལ་འབྱོར་སྒྲུབ་པ་པོ༔ བརྒྱུད་ལྡན་བླ་མའི་རྗེས་སུ་ཞུགས༔ གདམས་པའི་མན་ངག་བརྒྱུད་པ་བཟུང་༔ སྐྱབས་སུ་དཀོན་མཆོག་གསུམ་པོ་ཁུར༔ གྲོགས་དང་དཔུང་དུ་ལྷ་ཁྱོད་བསྟེན༔ དང་པོ་དད་དམ་སྒོ་ནས་བསྟེན༔ བར་དུ་དཀའ་བ་དང་བླངས་བསྒྲུབ༔ ཐ་མ་བཀའ་དམ་ཁྲིམས་བཞིན་བསྐུལ༔ དེ་ལྟར་རྩེ་གཅིག་མཆོད་བསྙེན་ན༔ ལང་ཀའི་མི་སྲུན་ཕོ་མོ་ཡང་༔ ཕ་མ་སྲིང་བཞིན་བྱམས་བརྩེས་གདུང་༔ ལྷ་དང་སྲུང་མར་སྨོས་ཀྱང་ཅི༔ བསྙེན་བསྒྲུབ་དཀའ་སྤྱད་རྣལ་འབྱོར་ང་༔ བསླུའམ་མི་བསླུ་ཁྱོད་ཀྱིས་ཤེས༔ གལ་ཏེ་བསླུས་པར་གྱུར་ན་ནི༔ བདེན་པ་རྫུན་བསྒྱུར་བརྒྱུད་པ་བསླུས༔ བཀའ་དམ་ཁྲིམས་བཤིགས་བདག་ཡིད་བསད༔ རྡོ་རྗེ་དམྱལ་བར་ལྟུང་ཏ་རེ༔ དེ་བས་དམ་ཚིག་གཉན་ལ་འདུས༔ ང་ནི་མ་ཉེས་མ་ལེན་པར༔ དམ་ཉམས་དགྲ་བོས་དྲག་ཏུ་རྒོལ༔ བསམ་སྦྱོར་ངན་པའི་ལས་དབལ་བཏབ༔ སྲུང་མ་གཉན་པོ་མེད་དམ་ཅི༔ དྲག་རྩལ་མཐུ་ནུས་གང་དུ་མཆིས༔ ཛཿཧེ་ཆེན་བརྡལ་བའི་དུར་ཁྲོད་ནས༔ གནོད་སྦྱིན་དམར་ནག་ཡབ་ཡུམ་འཁོར༔ དམ་ཚིག་ཐུགས་དམ་གནད་ནས་བསྐུལ༔ མ་གཡེལ་མ་འགྱངས་དགྲ་ལ་རྒྱུགས༔ ཤར་ཕྱོགས་སྟག་འདུ་ལྷ་ཁང་ནས༔ རྒྱལ་པོ་ཆེན་པོ་སྟག་གདོང་ཅན༔ དྲི་ཟའི་དམག་དཔུང་དང་བཅས་བསྐུལ༔ མ་འགྱང་དགྲ་ལ་དྲག་ཏུ་རྒྱུགས༔ ལྷོ་ཕྱོགས་འུབ་ཆུམ་བྲག་རི་ནས༔ གཤིན་རྗེའི་རྒྱལ་པོ་གཟིག་གདོང་ཅན༔ འཆི་བདག་དམག་དཔུང་དང་བཅས་བསྐུལ༔ མ་འགྱང་དགྲ་ལ་དྲག་ཏུ་རྒྱུགས༔ ནུབ་ཕྱོགས་བྲག་དམར་ཁྱུང་ཚང་ནས༔ བཙན་རྒྱལ་ཆེན་པོ་དོམ་གྱི་གདོང་༔ ཆུ་ལྷའི་དམག་དཔུང་དང་བཅས་བསྐུལ༔ མ་འགྱང་དགྲ་ལ་དྲག་ཏུ་རྒྱུགས༔ བྱང་ཕྱོགས་བྲག་ནག་མུ་ལའི་ཚལ༔ བདུད་རྒྱལ་ཆེན་པོ་འབྲོང་གི་གདོང་༔ གནོད་སྦྱིན་དམག་དཔུང་དང་བཅས་བསྐུལ༔ མ་འགྱང་དགྲ་ལ་དྲག་ཏུ་རྒྱུགས༔ ཤར་ལྷོ་ཕུང་བྱའི་གྲོང་ཁྱེར་ནས༔ སྲིན་རྒྱལ་ཆེན་པོ་ནེ་ཙོའི་གདོང་༔ གྲུལ་བུམ་དམག་དང་དཔུང་བཅས་བསྐུལ༔ མ་འགྱང་དགྲ་ལ་དྲག་ཏུ་རྒྱུགས༔ ལྷོ་ནུབ་རོལ་གཏིང་མཚོ་ནག་ནས༔ ལྷ་མོ་ཆེན་པོ་རྨ་བྱའི་གདོང་༔ སྲིན་པོའི་དམག་དཔུང་དང་བཅས་བསྐུལ༔ མ་འགྱང་དགྲ་ལ་དྲག་ཏུ་རྒྱུགས༔ ནུབ་བྱང་ཡངས་པ་རིམ་ལུང་ནས༔ གཟའ་བདུད་རྒྱལ་པོ་ཤང་ཤང་གདོང་༔ རླུང་ལྷའི་དམག་དཔུང་དང་བཅས་བསྐུལ༔ མ་འགྱང་དགྲ་ལ་དྲག་ཏུ་རྒྱུགས༔ བྱང་ཤར་གཏིང་ལོ་མཚོ་ཡི་གནས༔ ཀླུ་བདུད་རྒྱལ་པོ་ཉ་མོའི་གདོང་༔ དབང་ལྡན་དམག་དཔུང་དང་བཅས་བསྐུལ༔ མ་འགྱང་དགྲ་ལ་དྲག་ཏུ་རྒྱུགས༔ དགའ་བདེ་འཕྲུལ་གྱི་ཕོ་བྲང་ནས༔ ལྷ་ཆེན་ཚངས་པ་འཁོར་བཅས་བསྐུལ༔ གནམ་ལྕགས་མེ་འབར་ཕོ་བྲང་ནས༔ འཆི་བདག་གཤིན་རྗེ་འཁོར་བཅས་བསྐུལ༔ ཁྲག་མཚོ་རྦ་ཀློང་འཁྲིགས་པ་ནས༔ སྲིད་རྒྱལ་མ་མོ་འཁོར་བཅས་བསྐུལ༔ ནག་པོ་ལྕགས་ཀྱི་སྐུ་མཁར་ནས༔ བདུད་པོ་བསྐོས་རྗེ་འཁོར་བཅས་བསྐུལ༔ བྲག་དམར་ལྗོན་ཤིང་འདུས་པའི་ཚལ༔ བཙན་རྒྱལ་ཡམ་ཤུད་འཁོར་བཅས་བསྐུལ༔ གཙུག་ལག་འཕྲུལ་གྱི་ལྡིང་ཁང་ནས༔ རྒྱལ་པོ་པེ་ཧར་འཁོར་བཅས་བསྐུལ༔ རོ་ཐང་བརྡལ་བའི་དུར་ཁྲོད་ནས༔ གནོད་སྦྱིན་ནག་པོ་འཁོར་བཅས་བསྐུལ༔ རྒྱ་མཚོ་ཆུ་ཡི་དཀྱིལ་འཁོར་ནས༔ ཀླུ་བདུད་ནག་པོ་འཁོར་བཅས་བསྐུལ༔ སྟེང་ཕྱོགས་ནམ་མཁའི་དཀྱིལ་ཡངས་ནས༔ གཟའ་བདུད་ནག་པོ་འཁོར་བཅས་བསྐུལ༔ འོག་ཕྱོགས་ས་ཡི་དཀྱིལ་འཁོར་ནས༔ ས་བདག་འཁོར་ལོས་སྒྱུར་རྒྱལ་བསྐུལ༔ བཀའ་སྲུང་གཉན་པོ་ཁྱེད་རྣམས་ནི༔ དམ་ཚིག་དཔང་དུ་བཙུགས་ནས་བསྐུལ༔ ལོ་ཟླ་ཞག་ཏུ་མ་འགྱང་བར༔ སྐད་ཅིག་ཉིད་དུ་དམག་ལ་ཆོས༔ ནམ་མཁར་ཁྲག་སྤྲིན་སྡུད་ཅིང་སོང་༔ བར་སྣང་གློག་དམར་འཁྱུག་ཅིང་སོང་༔ ས་གཞིར་ཐོག་སེར་ཕོབ་ལ་སོང་༔ དགྲ་བོའི་ཡུལ་ཁམས་དམག་གིས་ཁེངས༔ གཟའ་དང་སྐར་མ་ཐང་ལ་ཕོབས༔ འདྲེ་ངན་སྐད་ངན་སྒྲོག་ཅིང་སོང་༔ མོ་བདུད་འོ་དོད་འབོད་ཅིང་སོང་༔ ཕོ་བདུད་མཚོན་ཆར་འབེབ་ཅིང་སོང་༔ བྱ་རོག་ཤ་སྐད་སྒྲོག་ཅིང་སོང་༔ འུག་པ་ལྷག་ལྷག་དགོད་ཅིང་སོང་༔ སྤྲེལ་དམར་རོ་ཁུར་གྲོང་རྒྱུག་སོང་༔ སྤྱང་མོ་ངུ་འདུར་བྱེད་ཅིང་སོང་༔ ཝ་མོ་ཉིན་བརྒྱལ་བྱེད་ཅིང་སོང་༔ དུད་འགྲོས་མི་གཏམ་བྱེད་ཅིང་སོང་༔ རྣོ་བའི་མཚོན་ཆ་ཐོགས་ལ་སོང་༔ མགྱོགས་པའི་བང་ཆེན་ཞོན་ལ་སོང་༔ བཙན་པའི་གོ་ཁྲབ་གྱོན་ལ་སོང་༔ ཀུ་སྒྲ་ཆོ་སྒྲ་སྒྲོག་ཅིང་སོང་༔ ས་གཡོ་འོད་འཁྱུག་བྱེད་ཅིང་སོང་༔ མྱུར་མགྱོགས་སྟོབས་ཤུགས་ཕྱུང་ལ་སོང་༔ དྲག་རྔམས་བརྣག་པའི་ཡུས་ཀྱིས་སོང་༔ མངོན་སྤྱོད་མཐུ་དང་རྩལ་གྱིས་སོང་༔ ཛཿདམ་ཚིག་ཆེན་པོའི་དུས་ལ་བབ༔ དམ་ཅན་དམ་ལ་མ་འདའ་ཞིག༔ བསྐུལ་བའི་ལྷ་སྲུང་ཐུགས་མ་གཡེལ༔ རྦད་པའི་ལས་མཁན་ལས་མ་འགྱང་༔ མངགས་པའི་ཕོ་ཉ་རྩལ་མ་ཞན༔ མགྱོགས་པའི་ཞོན་པ་བང་མ་བུལ༔ བརྡེག་པའི་མཚོན་ཆ་ངར་མ་ཆུང་༔ གསོད་བྱེད་ཤན་པ་ལག་མ་སྡུམ༔ མཐུ་རྩལ་བདག་པོ་ད་རེམ་ཞིག༔ ཡིད་ལ་བརྣག་པའི་དགྲ་བོ་འདི༔ སྣང་སྲིད་གང་གནས་གར་ཡོད་ཀྱང་༔ མ་ཤོར་མ་བཏང་དམ་དུ་ཟུང་༔ བླ་སྲོག་དོན་སྙིང་སྤར་གྱིས་ཐོབས༔ ཁོང་ཁྲག་དམར་པོ་ཁ་ནས་དྲོངས༔ གློ་བུར་ཧུར་ཐུམ་ནད་ཀྱིས་སོད༔ དབང་པོ་མིག་འབྲས་ཐང་ལ་འཕོངས༔ མགོ་ཁོས་ཀླད་ཁྲག་ཞོ་ལྟར་རོལ༔ ནང་འཁྲུགས་མཚོན་གྱི་ཡོ་ལངས་ཐོབ༔ དགྲ་བོའི་ཕོ་རྣམས་གྲི་རུ་སོད༔ དགྲ་བོའི་མོ་རྣམས་གཟེར་གྱིས་སོད༔ དགྲ་བོའི་ཕྲུ་གུ་བརྒྱལ་ནས་སོད༔ དགྲ་བོའི་ཟས་ནོར་ཧབ་ཐོབ་ཀྱིས༔ དགྲ་མཁར་ཤིག་ལ་ལོ་ཐོག་ཆོམས༔ དབུལ་ཕོངས་འབྱོར་རྒུད་ཉེས་པ་ཐོབ༔ ལོ་ཟླར་བཞག་པའི་ལོངས་མེད་ཀྱི༔ དོ་ནུབ་ཉིད་ནས་བརླག་པར་མཛོད༔ ནམ་གྱི་ཕར་མ་ཚུར་ཕྱེད་ལ༔ བླ་རྐུན་ཇག་པ་ལས་ལ་ཁྱེས༔ བླ་འཁྱམས་ཟུངས་ལ་ལིང་གར་ཕོབས༔ བསད་ཅིང་བརླག་པའི་ལས་མཛོད་ཅིག༔ དམ་ཚིག་ཡིན་ནོ་དམ་མ་ཉམས༔ བཀའ་བསྒོ་ཡིན་ནོ་བཀའ་མ་བཅག༔ མནའ་ཐོ་གཏའ་འོ་མནའ་མ་ཟ༔ དགྲ་བོའི་དཔུང་གཉེན་ལྷག་མེད་ཐོངས༔ འགོ་བའི་ལྷ་སྲུང་བདུད་དུ་ཕོབས༔ ཤ་ཟོ་ཁྲག་འཐུང་རུས་པ་མུར༔ རྗེས་ཤུལ་ཙམ་ཡང་མེད་པར་མཛོད༔ མཐུ་ནུས་ཕྱིར་ལ་མ་ལྡོག་ཅིག༔ སྡུག་ཡུས་རང་ལ་མ་འདྲེན་ཅིག༔ དམ་ཚིག་ཇི་བཞིན་ཕྲིན་ལས་མཛོད༔ ཨེ་ཧེ་དམའ་རུ་རྩེ་གུ་ཎ་ཧྲཱིཿཏྲི་ཨཿཡཿམཿདུཿརུཿཙཿཤཿནཿསརྦ་ས་པ་རི་ཝཱ་ར་བཛྲ་ས་མ་ཡ་ཆོ་ཆོ་རྒྱུག་རྒྱུག༔ དགྲ་བོའི་སྲོག་ལ་ཧུར་ཐུམ་རྦད༔ ཅེས་སྔགས་དེ་བརྒྱ་རེ་བརྗོད་ཅིང་༔ སྐྲ་གསིག་དར་གཡབ་ཐལ་མོ་བརྡབ་བོ༔ དེ་ཡི་ཚེ་གཞུང་བཞིན་དུ་གནོད་སྦྱིན་འཁོར་དང་བཅས་པས་སོད་རྒྱོབ་ཀྱི་སྒྲ་དང་བཅས་ཏེ་དགྲ་བོའི་ཡུལ་དུ་སོང་བར་བསམ༔ དགྲ་ལ་མཐུ་བྱེད་པའི་ཚེ་འདི་ལ་དུས་བཞིར་འབད་པར་བྱའོ༔ འདི་ནི་གནད་ཀྱི་ཡང་གཅེས་ཏེ༔ བསྒྲུབ་པའི་སྔགས་པ་དམ་ལྡན་གྱིས༔ ཉམས་སུ་བླངས་པས་དགྲ་སྒྲོལ་ཞིང་༔ མཐུ་ཡི་གྲགས་པས་ས་སྟེང་ཁྱབ༔ གཞན་གྱིས་མི་ཐུབ་དྲག་ཤུལ་འཐོབ༔ བཀྲ་ཤིས་དབང་ལྡན་ནོར་ཡང་འཕེལ༔ བསྟན་དང་འགྲོ་བའི་དོན་ཕྱིར་དུ༔ དབང་ཆེན་ཐུགས་ཀྱི་སྤྲུལ་པར་ཤར༔ དེ་བསྒྲུབ་ཟབ་མོའི་ལས་ཀྱི་ཆ༔ མཚོ་རྒྱལ་ཁྱོད་ཀྱིས་ཡི་གེར་ཐོབ༔ ཁམས་ཡུལ་སྲིན་མོའི་རྫོང་དུ་སྦོས༔ བཀའ་སྲུང་རྡོ་རྗེ་ལེགས་པས་སྲུངས༔ ཕྱི་གཉེར་རྒྱལ་པོ་གཡུ་ཕྲེང་ཅན༔ དམ་ཉམས་ལག་ཏུ་མ་ཤོར་ཅིག༔ བཀའ་དང་དམ་ཚིག་གཉན་པོའི་རྒྱ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཅེས་པ་འདི་ནི་འོད་གསལ་རྫོགས་པ་ཆེན་པོའི་རྣལ་འབྱོར་པ་ཁྲག་འཐུང་རྡོ་རྗེ་ཁྲོ་ལོད་རྩལ་གྱིས་གསེར་སྨད་རྒྱལ་པོ་གཡུ་ཕྲེང་ཅན་གྱི་མགུལ་ནས་བཏོན་ཏེ་མི་ལོ་ཉི་ཤུའི་བར་དུ་བཀའ་རྒྱ་བྱས་མཐར་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ།།དགེའོ།།ལེགས་སོ།།སརྦ་མངྒ་ལཾ།།།།