TTDL-ZABTER-13-PA-090

Previous Text Back to Volume PageNext Text

Wylie title	chos nyid nam mkha'i klong mdzod las: gnod sbyin dkor gyi bdag po'i gsol mchod yid bzhin nor bu:
Location	bdud 'joms gling pa'i zab gter Volume 13, Text 90, Pages 329-332 (Folios 1a1 to 2b6)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Chos nyid nam mkha'i klong mdzod las gnod sbyin dkor gyi bdag po'i gsol mchod yid bzhin nor bu. In Sprul pa'i gter chen bdud 'joms gling pa'i zab gter gsang ba'i chos sde, Vol. 13: 329-332. Thimphu, Bhutan: Lama Kuenzang Wangdue, 2004.
Side notes	Recto: gsol mchod   Verso: bdud 'joms srung ma gnod sbyin dkor bdag
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Protector Rituals - gsol mchod
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Deity	gnod sbyin dkor bdag
Colophon	ཞེས་པ་འདི་ཉིད་རིགས་སྲས་དྲི་མེད་འོད་ཟེར་དང་སློབ་བུ་ཐུབ་བསྟན་གཉིས་ཀྱིས་བསྐུལ་ངོར་དང་རང་ཅག་འགའ་ཡི་དོན་དུ་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའི་ཡི་གེ་པ་ནི་མཁྱེན་རབ་རྒྱ་མཚོའོ། །དགེའོ། །དགེའོ། །དགེའོ། །སརྦ་མངྒ་ལཾ། ཤུ་བྷཾ།།
	zhes pa 'di nyid rigs sras dri med 'od zer dang slob bu thub bstan gnyis kyis bskul ngor dang rang cag 'ga' yi don du bdud 'joms rdo rjes chos nyid nam mkha'i mdzod las bsgyur ba'i yi ge pa ni mkhyen rab rgya mtsho'o/_/dge'o/_/dge'o/_/dge'o/_/sarba mang+ga laM/_shu b+haM//

Tibetan Text

[edit]

དྡྂ།༔ ཆོས་ཉིད་ནམ་མཁའི་ཀློང་མཛོད་ལས༔ གནོད་སྦྱིན་དཀོར་གྱི་བདག་པོའི་གསོལ་མཆོད་ཡིད་བཞིན་ནོར་བུ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) གནོད་སྦྱིན་དཀོར་གྱི་བདག་པོ་ཡི༔ སྲོག་སྒྲུབ་ཟབ་མོ་ཉམས་ལེན་ན༔ ཤ་ཁྲག་དམར་གྱིས་བརྒྱན་པ་ཡི༔ གཏོར་མ་མཁྱིད་གང་མཛེས་ལྡན་ལ༔ སྙིང་དང་ཤ་ཚིལ་དར་སྣས་བརྒྱན༔ ནོར་བུ་ལྕགས་ཀྱུ་གཟུགས་མཛེས་དང་༔ གོ་མཚོད་ཌཱ་དྲིལ་རྐང་གླིང་སོགས༔ ཡོ་བྱད་ཆ་མ་ཆོ་དགུ་བཤམས༔ སྭ་བྷཱ་ཝ་ཡིས་སྦྱངས་ནས་སུ༔ ནམ་མཁའ་མཛོད་དང་ཨ་ཀཱ་རོས༔ འདོད་ཡོན་ནམ་མཁའ་མཛོད་དུ་སྤེལ༔ ལྟ་བའི་གདིང་དང་བསྐྱེད་པའི་གནད་ལྡན་པས༔ ཙ༔ འདི་ནས་ནུབ་ཀྱི་ཕྱོགས་རོལ་ན༔ རྒྱལ་པོའི་དཀོར་ཁང་ཆོས་འཁོར་སྐྱོང་༔ རབ་དཀར་ག་བུར་དབང་པོ་ཡི༔ མཚན་འཆང་རྫུ་འཕྲུལ་སྟོབས་ཀྱི་བདག༔ མཆོད་པའི་གནས་འདིར་གཤེགས་སུ་གསོལ༔ འདི་ནས་ནུབ་བྱང་མཚམས་ཤེད་ན༔ ཕ་མཁར་འཛིན་སྐྱོང་དྲག་རྩལ་བདག༔ ཆོས་རྒྱལ་ཆེན་པོ་སྨ་ར་ཅན༔ སྣ་ཚོགས་གཟུགས་སུ་བརྫུ་བ་མཁན༔ མ་ངེས་ཆོས་འཕྲུལ་བདག་པོ་ཁྱོད༔ ཁ་བ་ཅན་གྱི་རྒྱལ་ཁམས་འདིར༔ མ་ངེས་སྣ་ཚོགས་གཟུགས་སུ་བརྫུ༔ འགྲོ་བའི་བློ་ཡིད་ཁ་ལོ་བསྒྱུར༔ དཀོར་སྲུང་རྒྱལ་པོ་ཡིད་བཞིན་དབང་༔ མཆོད་པའི་གནས་འདིར་གཤེགས་སུ་གསོལ༔ ཨོ་རྒྱན་པདྨ་འབྱུང་གནས་དང་༔ རིག་འཛིན་ཀློང་གསལ་སྙིང་པོ་ཡི༔ བཀའ་དམ་གཉན་པོ་དཔང་དུ་བཞག༔ དཀོར་སྲུང་གཉན་པོ་ཁྱོད་འབོད་ཀྱིས༔ མ་ཐོགས་མྱུར་དུ་གཤེགས་སུ་གསོལ༔ གཤེགས་ནས་དཀོར་གྱི་སྲུང་མར་བཞུགས༔ ཁྱེད་ལ་མཆོད་པ་འབུལ་བ་ནི༔ དམར་གྱི་གཏོར་མ་རྒྱན་ལྡན་དང་༔ བཙོས་ཤ་རྗེན་ཤ་ཁུ་བ་རྐང་༔ དམར་ཆེན་ཁྲག་གི་ཨརྒྷཾ་དང་༔ ཆུ་སེར་ཞབས་བསིལ་གཙང་ལྡན་དང་༔ དབང་པོ་རྣམ་ལྔའི་མེ་ཏོག་དང་༔ ཚིལ་དང་ཞག་གི་བདུག་སྤོས་དང་༔ རྐང་ཆེན་ཞུན་གྱི་མར་མེ་དང་༔ དམར་ཆེན་ཁྲག་གི་དྲི་ཆབ་དང་༔ ཤ་སྣའི་ཞལ་ཟས་སྣ་ཚོགས་དང་༔ ཌཱ་དྲིལ་རྐང་གླིང་རོལ་མོ་དང་༔ གཟུགས་མཛེས་སྒྲ་སྙན་དྲི་ཞིམ་དང་༔ རོ་མངར་རེག་བྱ་འཇམ་ལ་སོགས༔ སྣ་ཚོགས་མཆོད་པའི་ཡོ་བྱད་དང་༔ གསེར་རམ་མཆོང་དངུལ་རིན་ཆེན་དཀོར༔ གསེར་སྐྱེམས་གཏོར་མ་མཆོད་འབུལ་བཞེས༔ མཐུན་རྫས་འདོད་རྒུའི་ལོངས་སྤྱོད་ཀུན༔ ཅི་ནུས་ཡིད་ཀྱིས་སྤྲུལ་ཏེ་འབུལ༔ ཐུགས་དམ་གཉན་པོ་བསྐང་གྱུར་ཅིག༔ དེ་ལྟར་མཆོད་གསོལ་བྱས་པ་དང་༔ ཆོས་ཉིད་རྣམ་པར་དག་པ་དང་༔ རྟེན་འབྲེལ་བསླུ་མེད་བདེན་སྟོབས་མཐུས༔ སྐུ་ཡི་གཟི་མདངས་རྒྱས་གྱུར་ཅིག༔ གསུང་གི་འགགས་པ་ཁྲོལ་གྱུར་ཅིག༔ ཐུགས་ཀྱི་དགྱེས་པ་བསྐང་གྱུར་ཅིག༔ ཕྲིན་ལས་ཐོགས་པ་མེད་པ་ཡི༔ མཐུ་སྟོབས་ནུས་དང་ལྡན་པར་ཤོག༔ ཁྱེད་ནི་ཐོག་མ་མེད་དུས་ནས༔ མདོ་སྔགས་བསྟན་ལ་རབ་གདུང་ནས༔ ཐུགས་བསྐྱེད་དང་ནི་སྨོན་ལམ་མཐུས༔ ཐབས་ཀྱི་དྲེགས་པའི་སྐུར་བཞེངས་ཏེ༔ བསྒྲུབ་དང་གསོལ་མཆོད་སྐྱེས་བུ་དང་༔ དཀོར་གཉེར་གཏད་པའི་གང་ཟག་ཀུན༔ བདེ་སྐྱིད་འདོད་རྒུའི་དཔལ་སྟེར་བ༔ ཁྱོད་འདྲ་འཇིག་རྟེན་འདི་ན་དབེན༔ བསྟོད་ཅིང་བསྔགས་པ་འདི་བརྗོད་པས༔ རབ་འབྱམས་ཕྲིན་ལས་མཐུ་ཐོབ་ཤོག༔ ཁྱེད་ལ་ཕྲིན་ལས་བཅོལ་བ་ནི༔ བདག་ཅག་བསྒྲུབ་པའི་སྐྱེས་བུ་རྣམས༔ ཇི་སྲིད་འཚོ་ཡི་བར་དུ་ནི༔ བྱམས་དང་བརྩེ་བས་རྟག་ཏུ་སྐྱོངས༔ བདོག་པའི་རྟ་ལུག་གནག་ཕྱུགས་དཀོར༔ ཀུན་ལ་ཉིན་རྫི་མཚན་གྱི་མེལ་རྩེ་དང་༔ རྟག་ཏུ་གཡེལ་བ་མེད་པར་སྲུང་སྐྱོབ་མཛོད༔ ལྷོག་པ་སྐེ་འགགས་གློ་གོར་ཧོན་གསུམ་སོགས༔ རྟ་ལུག་གནག་ཕྱུགས་ནད་རྣམས་མེད་པར་མཛོད༔ སྐྱེ་འགྲོ་ཕོ་མོའི་བློ་ཡིད་དབང་བསྒྱུར་ལ༔ གཟུགས་འགྲོས་དཀོར་ནོར་ལོངས་སྤྱོད་དབང་དུ་བསྡུས༔ བདག་ལ་འདོད་རྒུའི་ལོངས་སྤྱོད་ཆར་ལྟར་ཕོབས༔ ཆོས་སྲིད་བསྟན་པའི་མངའ་ཐང་འཕེལ་རྒྱས་མཛོད༔ བདག་གི་དཀོར་གཉེར་གཏད་དོ་གཉེར་ཁ་མཛོད༔ སྡང་བའི་དགྲ་དང་གནོད་པའི་བགེགས་རྣམས་ཀུན༔ ཁྱོད་ཀྱི་མཐུ་རྩལ་དྲག་ཤུལ་སྟོབས་ཀྱིས་སོད༔ སྲིད་འཚོའི་བར་དུ་སྲུང་སྐྱོབ་མཛད་པ་ལས༔ ཕྱི་མར་ཐར་ལམ་བར་ཆད་གེགས་མ་བྱེད༔ བླ་མ་ཡི་དམ་རིག་འཛིན་རྒྱ་མཚོ་ཡིས༔ བཀའ་བསྒོ་ཡིན་ནོ་བཀའ་ལས་འདའ་མ་བྱེད༔ དམ་ཚིག་ཡིན་ནོ་དམ་ལས་མ་འདའ་ཞིག༔ བཅོལ་བའི་ཕྲིན་ལས་མ་ལུས་འགྲུབ་པར་མཛོད༔ ར་ཙ་ཙནྡྲ་ས་མ་ཡ་ཕེཾ་ཕེཾ་ཛ་ཛཿ ཞེས་གསོལ་ཞིང་མཆོད་པས་ཕྲིན་ལས་བསྒྲུབ་པར་གདོན་མི་ཟའོ༔ ལྷ་དང་སྲུང་མ་གཞན་ལས་ཁྱད་པར་འཕགས༔ མཆོད་གསོལ་མ་གཏོགས་བསྐྱེད་གསལ་མི་དགོས་ཏེ༔ རང་རྒྱུད་པ་རུ་བསྒྲུབ་པས་འགྲུབ་པ་ཡིན༔ བཀྲ་ཤིས་དགེ་ལེགས་ལོངས་སྤྱོད་དཔལ་རྒྱས་བྱེད༔ ས་མ་ཡ༔ རྒྱ་རྒྱ་རྒྱ༔ ཨྠིྀ༔ ཞེས་པ་འདི་ཉིད་རིགས་སྲས་དྲི་མེད་འོད་ཟེར་དང་སློབ་བུ་ཐུབ་བསྟན་གཉིས་ཀྱིས་བསྐུལ་ངོར་དང་རང་ཅག་འགའ་ཡི་དོན་དུ་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའི་ཡི་གེ་པ་ནི་མཁྱེན་རབ་རྒྱ་མཚོའོ། །དགེའོ། །དགེའོ། །དགེའོ། །སརྦ་མངྒ་ལཾ། ཤུ་བྷཾ།། །།