TTDL-ZABTER-15-BA-094

Previous Text Back to Volume PageNext Text

Wylie title	dag snang ye she drwa ba las: gter srung rma rgyal spom ra la brten pa'i g.yang 'gugs rdo rje'i lcags kyu:
Location	bdud 'joms gling pa'i zab gter Volume 15, Text 94, Pages 379-380 (Folios 1a1 to 1b6)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Dag snang ye she drwa ba las gter srung rma rgyal spom ra la brten pa'i g.yang 'gugs rdo rje'i lcags kyu. In Sprul pa'i gter chen bdud 'joms gling pa'i zab gter gsang ba'i chos sde, Vol. 15: 379-380. Thimphu, Bhutan: Lama Kuenzang Wangdue, 2004.
Side notes	Recto: g.yang 'gugs   Verso: bdud 'joms srung ma rma rgyal spom ra
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Prosperity Rituals - gyang 'gugs
Cycle	དག་སྣང་ཡེ་ཤེས་དྲྭ་བ་ (dag snang ye shes drwa ba)
Deity	rma rgyal spom ra
Colophon	ཞེས་པ་འདི་ཀུན་བཟང་ཤེས་རབ་ཀྱིས་ནན་དུ་བསྐུལ་ངོར་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བའོ། །དགེའོ། །དགེའོ། །དགེའོ། །ལེགས་སོ །།སརྦ་མངྒ་ལཾ།།
	zhes pa 'di kun bzang shes rab kyis nan du bskul ngor bdud 'joms rdo rjes dag snang ye shes drwa ba las bsgyur ba'o/_/dge'o/_/dge'o/_/dge'o/_/legs so_//sarba mang+ga laM//

Tibetan Text

[edit]

༁ྃ༔ དག་སྣང་ཡེ་ཤེ་དྲྭ་བ་ལས༔ གཏེར་སྲུང་རྨ་རྒྱལ་སྤོམ་ར་ལ་བརྟེན་པའི་གཡང་འགུགས་རྡོ་རྗེའི་ལྕགས་ཀྱུ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ གཏེར་སྲུང་རྨ་རྒྱལ་སྤོམ་ར་ལ༔ བརྟེན་པའི་གཡང་འགུགས་བྱ་བ་ནི༔ འབྲུ་སྣ་ཟས་སྣ་གཏོར་མ་སྐྱེམས༔ འབྱོར་ཚོགས་སྤྱན་གཟིགས་སྣ་ཚོགས་བཀོད༔ རང་ཉིད་ཡི་དམ་ལྷར་གསལ་ཞིང་༔ བཀའ་སྲུང་གཉན་པོ་བསྒྲུབ་ནས་སུ༔ འགྲུབ་རྟགས་མངོན་དུ་གྱུར་བྱས་ཏེ༔ མདའ་དར་གཡབ་ཅིང་འདི་སྐད་དོ༔ ཀྱཻ༔ སྔོན་ཚེ་པདྨ་ཐོད་ཕྲེང་གི༔ བཀའ་དམ་ལ་གནས་གཏེར་གྱི་བདག༔ ལྷ་སྲས་རྨ་ཆེན་སྤོམ་ར་ཁྱོད༔ འདིར་གཤེགས་དགྱེས་པའི་གདན་ལ་བཞུགས༔ བཀའ་དམ་གཉན་པོ་དཔང་གཙུགས་ཏེ༔ ཐུགས་དམ་གནད་བསྐུལ་ཕྲིན་ལས་ལས༔ བཅོལ་ལོ་སྤྲུལ་པ་ཡང་སྤྲུལ་དང་༔ མཐུ་སྟོབས་ནུས་པའི་རྩལ་ཤུགས་བསྐྱེད༔ ཕྱྭ་གཡང་འགུགས་པའི་ཕྲིན་ལས་མཛོད༔ སྟེང་ཕྱོགས་སྲིད་པའི་ཕྱྭ་གཡང་ཁུག༔ ལྷ་གཡང་མི་ལ་འབེབ་པར་མཛོད༔ འོག་ཕྱོགས་སྲིད་པའི་ཕྱྭ་གཡང་ཁུག༔ ཀླུ་གཡང་བདག་ལ་འབེབས་པར་མཛོད༔ གཉན་གྱི་ཡུལ་ནས་ཕྱྭ་གཡང་ཁུག༔ རྨ་གཡང་དངོས་གྲུབ་འདིར་ཕོབ་ཅིག༔ ཅང་ཤེས་རྟ་ཡི་རྟ་གཡང་ཁུག༔ སྤུ་ནག་གནག་གི་ཕྱུགས་གཡང་ཁུག༔ གཡང་དཀར་ལུག་གི་ལུག་གཡང་ཁུག༔ ཚེ་ཚེ་ར་ཡི་ར་གཡང་ཁུག༔ རིན་ཆེན་ནོར་གྱི་ནོར་གཡང་ཁུག༔ བཟའ་བཏུང་ལོངས་སྤྱོད་ཟས་གཡང་ཁུག༔ རྐང་གཉིས་མི་ཡི་གཡང་ཁུག་ཅིག༔ ཁེ་དྲག་བཙན་རྒྱལ་གཡང་ཁུག་ཅིག༔ མི་རྣམས་དཔའ་བའི་གཡང་ཁུག་ཅིག༔ རྟ་ཕོ་མགྱོགས་པའི་གཡང་ཁུག་ཅིག༔ གོ་ཁྲབ་བཙན་པའི་གཡང་ཁུག་ཅིག༔ མཚོན་ཆ་རྣོ་བའི་གཡང་ཁུག་ཅིག༔ མདོར་ན་ཡིད་ལ་གང་འདོད་པའི༔ འདོད་རྒུའི་དཔལ་དང་ལོངས་སྤྱོད་གཏེར༔ དབང་ཐང་བུ་ཡི་དངོས་གྲུབ་སྩོལ༔ བཟའ་མི་ཕན་ཚུན་བྱམས་བརྩེ་ཡི༔ བདེ་ཞིང་མཐུན་པའི་གཡང་ཁུག་ཅིག༔ འཐབ་དང་རྩོད་པ་མི་འབྱུང་ཞིང་༔ རྫོགས་ལྡན་དུས་ཀྱི་བསྐལ་པ་བཞིན༔ དགེ་ཞིང་ཚེ་རིང་བདེ་སྤྱོད་ཅིང་༔ ནད་དང་གནོད་པ་ཀུན་འབྲལ་ནས༔ རྟག་ཏུ་དམ་པའི་ཆོས་སྤྱོད་ཅིང་༔ གཏན་གྱི་བདེ་བ་མཆོག་ཐོབ་ཤོག༔ ཀུ་མ་རི་ཕུ་ཏྲི་སརྦ་རཏྣ་བ་སུ་སིདྡྷི་བསྡུས་བསྡུས་པཱ་ཤཾ་ཀུ་རུ་ཡེ་སྭཱ་ཧཱ༔ (བརྡ་ཡིག་) བསྒྲུབ་པའི་རྟགས་ཚད་རྫོགས་ནས་སླར༔ དེ་ལྟར་དུས་གསུམ་གཡང་འགུགས་བྱ༔ ལོངས་སྤྱོད་ནོར་གྱི་དངོས་གྲུབ་འཐོབ༔ འདོད་དོན་འགྲུབ་པར་གདོན་མི་ཟ༔ ས་མ་ཡ༔ རྒྱ་རྒྱ་རྒྱ༔ ཞེས་པ་འདི་ཀུན་བཟང་ཤེས་རབ་ཀྱིས་ནན་དུ་བསྐུལ་ངོར་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བའོ། །དགེའོ། །དགེའོ། །དགེའོ། །ལེགས་སོ །།སརྦ་མངྒ་ལཾ།། །།