TTDL-ZABTER-15-BA-030

Previous Text Back to Volume Page Next Text

Wylie title
Location	bdud 'joms gling pa zab gter Volume 15, Text 30, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. '*. In Sprul pa'i gter chen bdud 'joms gling pa'i zab gter gsang ba'i chos sde, Vol. 15: . Thimphu, Bhutan: Lama Kuenzang Wangdue, 2004.*
Side notes	Verso: bdud 'joms
More details More details
Tertön	བདུད་འཇོམས་གླིང་པ་ (bdud 'joms gling pa)
Genre
Cycle	དག་སྣང་ཡེ་ཤེས་དྲྭ་བ་ (dag snang ye shes drwa ba)

[edit]

དག་སྣང་ཡེ་ཤེས་དྲྭ་བ་ལས༔ སྒྲོལ་མའི་གསང་སྒྲུབ་བདེ་ཆེན་མྱུར་ལམ་བཞུགས་སོ༔ ན་མོ་གུ་རུ་དྷེ་ཝ་ཌཱ་ཀི་ནི༔ ༠༠༠༠༠བརྡ་ཡིག༡༦༤སྒྲོལ་མའི་གསང་སྒྲུབ་ཉམས་ལེན་ནི༔ དཀྱིལ་འཁོར་བཀོད་ལེགས་མཛེས་ལྡན་སྟེང་༔ མེ་ཏོག་ཚོམ་བུ་རབ་བཀོད་ནས༔ སྒྲུབ་རྫས་གཏོར་མ་སྐུ་གཟུགས་དང་༔ འབྲལ་མེད་རྟེན་གསུམ་དུ་བཙུག་སྟེ༔ འབྱོར་ཚོགས་ཕྱི་ནང་གསང་མཆོད་བཤམས༔ དཀར་ཕྱོགས་སྐྱོང་ལ་དཀར་མཆོད་དང་༔ ནག་ཕྱོགས་སྐྱོང་ལ་དམར་མཆོད་འབུལ༔ དང་པོ་སྐྱབས་སུ་འགྲོ་བ་ལ༔ ན་མོ༔ སངས་རྒྱས་ཆོས་དང་དགེ་འདུན་དང་༔ བླ་མ་ཡི་དམ་མཁའ་འགྲོ་དང་༔ རིག་པ་སྐུ་གསུམ་བདག་ཉིད་ལ༔ བྱང་ཆུབ་བར་དུ་སྐྱབས་སུ་མཆི༔ ལན་གསུམ་བརྗོད་ཅིང་སེམས་བསྐྱེད་ནི༔ ཧོ༔ ནམ་མཁའི་མཐའ་མཉམ་སེམས་ཅན་ཀུན༔ གདོད་མའི་དབྱིངས་སུ་མཉམ་གྲོལ་བའི༔ རང་བྱུང་ཡེ་ཤེས་བྱང་ཆུབ་སེམས༔ བསྐྱེད་དུ་མེད་དེ་མངོན་དུ་བྱ༔ ལན་གསུམ་བརྗོད་ཅིང་བགེགས་བསྐྲད་ནི༔ ཧཱུྃ༔ ང་ནི་ཡུམ་ཆེན་ཆོས་ཀྱི་སྐུ༔ ཉོན་ཅིག་གཟུང་དང་འཛིན་པའི་འདྲེ༔ སྲིད་པར་མངོན་ཞེན་འདོད་ཡོན་ཁྱེར༔ ཡུལ་མེད་ཟང་ཐལ་ཆེན་པོར་ཕཊ༔ ཧཱུྃ་བཞིའི་སྔགས་བརྗོད་ཐུན་གྱིས་བྲབ༔ དེ་ནས་སྲུང་འཁོར་བསྒོམ་པ་ལ༔ ཧཱུྃ༔ གདོད་ནས་འཁོར་འདས་ཡེ་སངས་རྒྱས༔ བདག་མེད་མཉམ་པ་ཉིད་ཀྱི་ངང་༔ སྐུ་དང་ཡེ་ཤེས་རོལ་པ་ཆེ༔ བགེགས་དང་བར་ཆད་མིང་ཡང་མེད༔ ཨོཾ་པྲཛྙཱ་ཛྙཱ་ན་བཛྲ་རཀྵ་རཀྵ་ཧཱུྃ་བྷྲུཾ༔ དེ་ནས་བརྡ་སྒོ་དབྱེ་ཞིང་བརྡ་ཕྱག་འཚལ་བ་ལ༔ ཨཱཿམ་རིག་གཟུང་འཛིན་འཁྲུལ་པའི་བགཿབདག་མེད་ཆོས་ཉིད་མཐའ་རུ་གཏོར༔ ཤེས་རབ་ཡེ་ཤེས་མངོན་གྱུར་བའི༔ བརྡལ་ཁྱབ་རིག་པ་ཨེ་མ་ཧོ༔ དེ་ནས་བྱིན་ཆེན་དབབ་པ་ནི༔ ཧཱུྃ༔ ཀ་དག་སྤྲོས་བྲལ་གཞལ་ཡས་ན༔ སྐུ་གསུམ་སྒྱུ་འཕྲུལ་མཁའ་འགྲོའི་ཚོགས༔ མ་འགགས་ཐབས་ཀྱིས་སྐུར་བཞེངས་ལ༔ འདིར་གཤེགས་དབང་དང་བྱིན་ཆེན་ཕོབ༔ ཨོཾ་ཏཱ་རེ་ཏུཏྟ་རེ་ཧཱུྃ་སརྦ་ས་པ་རི་ཝཱ་ར་བཛྲ་ས་མ་ཡ་ཛ་ཛ་ཨ་ཝེ་ཤ་ཡ་ཨ་ཨ༔ དེ་ནས་མཆོད་པ་བྱིན་བརླབ་ནི༔ ཨོཾ་ཨཱ༔ ཧཱུྃཿསྣང་ཞིང་སྲིད་པའི་འཇིག་རྟེན་ན༔ འདོད་རྒུའི་དཔལ་ཡོན་མི་ཟད་གཏེར༔ ཡེ་ཤེས་སྒྱུ་འཕྲུལ་རོལ་པ་ཡིས༔ ཆོས་ཉིད་ནམ་མཁའ་མཛོད་དུ་སྤེལ༔ མ་ཧཱ་སརྦ་པཉྩ་པཱུ་ཛ་ག་ཎ་ཙཀྲ་ཧོ༔ དེ་ནས་དེ་བཞིན་ཉིད་ཀྱི་ཏིང་ངེ་འཛིན་ནི༔ ཧཱུྃཿསྣང་ཞིང་སྲིད་པ་ཐམས་ཅད་ཀུན༔ རྨི་ལམ་དབྱིངས་སུ་སད་པ་ལྟར༔ ཆོས་ཉིད་སྤྲོས་བྲལ་ཆེན་པོ་ཞིག༔ དེ་བཞིན་ཉིད་དབྱིངས་མངོན་དུ་བྱ༔ ཀུན་ཏུ་སྣང་བའི་ཏིང་ངེ་འཛིན་ནི༔ ཨཱ༔ ཀུན་ཁྱབ་ཡེ་ཤེས་ཆེན་པོ་ཡིས༔ འཁོར་འདས་དག་མཉམ་མངོན་དུ་བྱ༔ དེ་ནས་རྒྱུ་ཡི་ཏེང་འཛིན་ནི༔ ཧཱུྃཿམཁའ་ལས་འཇའ་ཚོན་ཤར་བ་ལྟར༔ རིག་པ་ཏཱྃ་ཡིག་ལྗང་གུར་ཤར༔ དེ་ནས་ཞིང་ཁམས་གསལ་བ་ནི༔ ཧཱུྃ༔ ཏཱྃ༔ ལས་འོད་འཕྲོས་རབ་འཁྲིགས་པའི༔ ནམ་མཁའི་གར་ཁྱབ་འོག་མིན་ཞིང་༔ འོད་ལས་གྲུབ་པའི་ས་གཞི་ལ༔ སྨན་གྱི་སྤང་རི་དྲི་བཟང་འཐུལ༔ ཁ་དོག་སྣ་ཚོགས་པད་མོ་བཞད༔ མནན་ན་ནེམ་ཞིང་གཏེགས་ན་སྤར༔ ངོས་འཇམ་ཁོད་སྙོམས་ཡིད་དུ་འོང་༔ ཡན་ལག་བརྒྱད་ལྡན་ཆུ་མཚོ་ལ༔ ནོར་བུའི་གྲམ་པ་གཡུའི་ནེའུ་སེང་༔ གསེར་གྱི་བྱེ་མ་འོད་འབར་བརྡལ༔ ཅང་ཤེས་གཟུགས་མཛེས་བྱ་རིགས་དང་༔ སྤུ་སྡུག་རྩེ་མཁས་རི་དྭགས་རིགསཿདག་བྱེད་བདུད་རྩིའི་ཆུ་མིག་འབབ༔ དཔག་བསམ་ལྗོན་ཤིང་ལོ་འབྲས་རྒྱས༔ ནམ་མཁར་འཇའ་ཚོན་དྲྭ་བ་འཁྲིགས༔ བར་སྣང་ལྷ་དང་ལྷ་མོ་ཡིས༔ མཆོད་སྤྲིན་སྤེལ་ཞིང་གླུ་གར་བྱེད༔ འདོད་ཡོན་ཡིད་ལ་དྲན་ལས་སྐྱེ༔ འཁོར་ཡུག་ཞིང་ཁམས་རབ་འབྱམས་ཀྱིས༔ གྲོང་པའི་ཚུལ་དུ་འཁོར་བའི་དབུས༔ དེ་ནས་གཞལ་ཡས་ཁང་བསྐྱེད་པ་ལ༔ ཏཱྃཿལས་བྷྲུྃ་ཡིག་འཕྲོས་པ་ལ༔ ཡེ་ཤེས་ལྔ་ཡི་རང་གདངས་ལས༔ བདེ་ཆེན་འབར་བའི་གཞལ་ཡས་ཁང་༔ ཤར་དཀར་ལྷོ་སེར་ནུབ་དམར་ཞིང་༔ བྱང་ལྗང་ཡ་ཕུབ་མཐིང་ནག་ངོམས༔ གྲུ་བཞི་སྒོ་བཞི་རྟ་བབས་ཅན༔ རིན་ཆེན་སྣ་ཚོགས་དྲྭ་ཕྱེད་མཛེས༔ ཡ་ཕུབ་རི་རབ་རིམ་གསུམ་སྟེང་༔ བུམ་པ་བྲེ་དང་ཆོས་འཁོར་གདུགས༔ ཉི་ཟླ་ནོར་བུའི་ཏོག་གིས་མཛེས༔ འཇའ་ཡི་འཕན་དང་རྒྱལ་མཚན་ཤར༔ དྲིལ་གཡེར་སྙན་པའི་ཐག་རྡང་འགུལ༔ དམ་པའི་ཆོས་ཀྱི་རང་སྒྲ་འབྱུང་༔ དེ་དབུས་རིན་ཆེན་ཁྲི་ཡི་ཁར༔ སྣ་ཚོགས་པདྨ་ཟླ་གདན་ལ༔ ཏཱྃ་བབ་དེ་ལས་འོད་འཕྲོས་པས༔ རྒྱལ་བ་མཆོད་ཅིང་འགྲོ་དོན་བྱས༔ འཁོར་འདས་གཟི་བྱིན་དང་བཅས་པ༔ ཚུར་འདུས་ཡོངས་སུ་གྱུར་པ་ལས༔ དེ་ནས་བརྟེན་པ་ལྷ་བསྐྱེད་ལ༔ རང་ཉིད་སྐད་ཅིག་དྲན་རྫོགས་སུ༔ རྗེ་མཙུན་འཕགས་མ་སྒྲོལ་མའི་སྐུ༔ ལྗང་སྔོན་ཞི་འཛུམ་མཚན་དཔེས་སྤྲས༔ བཅུ་དྲུག་གཞོན་ནུའི་ལང་ཚོ་ཅན༔ ཕྱག་གཡས་མཆོག་སྦྱིན་ཕྱག་རྒྱ་ཅན༔ གཡོན་པས་ཨུཏྤལ་ཐུགས་ཀར་བསྣམས༔ ཞབས་གཉིས་གཡས་བརྐྱང་གཡོན་བསྐུམ་བཞུགས༔ རིན་ཆེན་སྣ་ཚོགས་རྒྱན་ཆ་དང་༔ དར་སྣ་ལྔ་ཡི་ན་བཟའ་དང་༔ མེ་ཏོག་ཕྲེང་བས་ཐོད་གདེངས་བྱས༔ འཇའ་དང་འོད་ཀྱི་སྐུ་རུ་བཞུགས༔ ཤར་དུ་སྒྲོལ་མ་དཀར་མོ་ནི༔ ཞི་འཛུམ་ལོ་བརྒྱད་གཞོན་ནུའི་ཚུལ༔ གཡས་བརྐྱང་གཡོན་བསྐུམ་པད་ཟླར་བཞུགས༔ ཕྱག་གཡས་བརྐྱང་ཞིང་ཚེ་བུམ་འཛིན༔ གཡོན་པས་ཨུཏྤལ་དཀར་པོ་བསྣམས༔ ཉ་རྒྱས་ཟླ་བར་སྐུ་རྒྱབ་བརྟེན༔ ལྷོ་རུ་འོད་ཟེར་ཅན་མ་སེར༔ གཡས་བརྐྱང་གཡོན་བསྐུམ་པད་ཟླར་བཞུགས༔ ཕྱག་གཡས་མཆོག་སྦྱིན་གཡོན་ཨུཏྤལ༔ སྣ་ཚོགས་དར་དང་རཏྣས་བརྒྱན༔ ནུབ་ཏུ་རིགས་བྱེད་ཆེན་མོ་དམར༔ ཕྱག་གཡས་མཆོག་སྦྱིན་གཡོན་ཨུཏྤལ༔ ཞབས་གཉིས་གཡས་བརྐྱང་གཡོན་བསྐུམ་བཞུགས༔ བྱང་དུ་ནོར་བདག་ལྷ་མོ་ལྗང་༔ ཕྱག་གཡས་མཆོག་སྦྱིན་ནོར་བུ་དང་༔ གཡོན་པར་ཐུགས་ཀར་ཨུཏྤལ་བསྣམ༔ ཀུན་ཀྱང་གཞོན་ནུ་ལོ་བརྒྱད་ཚུལ༔ ཞི་འཛུམ་མཚན་དཔེའི་ལང་ཚོས་མཛེས༔ ལོངས་སྤྱོད་རྫོགས་པའི་ཆས་ཀྱིས་བརྒྱན༔ ཡེ་ཤེས་འཇའ་འོད་ཀློང་དུ་གསལ༔ ཤར་སྒོར་འགུགས་བྱེད་ཆེན་མོ་ནི༔ དཀར་མོ་ལྕགས་ཀྱུ་པད་དཀར་བསྣམས༔ ལྷོ་སྒོར་འཆིང་བྱེད་ཆེན་མོ་སེར༔ ཕྱག་ན་ཞགས་པ་པདྨ་སེརཿནུབ་སྒོར་རྨོངས་བྱེད་ཆེན་མོ་དམར༔ ཕྱག་ན་ལྕགས་སྒྲོག་པདྨ་དམར༔ བྱང་སྒོར་མྱོས་བྱེད་ཆེན་མོ་ལྗང་༔ ཕྱག་ན་དྲིལ་བུ་པད་ལྗང་བསྣམས༔ ཀུན་ཀྱང་དར་དང་རིན་ཆེན་རྒྱན༔ ཞི་འཛུམ་བཞེངས་པའི་སྟབས་སུ་བཞུགས༔ འཇའ་དང་འོད་ཀྱི་ཀློང་དུ་གསལ༔ ཡེ་ཤེས་ལྔ་དང་ཚད་མེད་བཞིའི༔ རང་གདངས་ཡེ་ཤེས་ལྷ་མོའི་འཕྲུལ༔ སྤྲུལ་པ་རྣམ་འགྱུར་དཔག་ཏུ་མེད༔ ནམ་མཁས་གར་ཁྱབ་ཡོངས་སུ་གང་༔ གནས་གསུམ་རྡོ་རྗེའི་སྙིང་པོ་ལས༔ འོད་འཕྲོས་དུས་གསུམ་རྒྱལ་དང་སྲས༔ ཁྱད་པར་གཡུ་ལོ་བཀོད་པའི་ཞིང་༔ རྟེན་དང་བརྟེན་པ་མ་ལུས་ཀུན༔ སྤྱན་དྲངས་གཉིས་སུ་མེད་པར་བསྟིམ༔ དེ་ནས་སྤྱན་འདྲེན་པ་ནི༔ ཧཱུྃ༔ ཆོས་དབྱིངས་རྣམ་དག་གཞལ་ཡས་ནས༔ ལྷུན་གྲུབ་ལོངས་སྤྱོད་རྫོགས་པའི་སྐུ༔ རྗེ་བཙུན་འཕགས་མ་སྒྲོལ་མ་དང་༔ སྤྲུལ་བའི་ལྷ་མོ་ཉི་ཤུར་བཅས༔ གནས་འདིར་སྤྱན་འདྲེན་གཤེགས་སུ་གསོལ༔ དོན་ལ་གཤེགས་བཞུགས་མེ་མངའ་ཡང་༔ གདུལ་བྱ་ཐབས་ཀྱིས་འདུལ་པའི་ཕྱིར༔ དབྱིངས་ལས་གཟུགས་ཀྱི་སྐུར་བཞེངས་ལ༔ ཐུགས་རྗེའི་དབང་གིས་གཤེགས་སུ་གསོལ༔ ན་མོ་ཨཱཪྻ་ཏཱ་རེ་སརྦ་ས་པ་རི་ཝཱ་ར་བཛྲ་ས་མ་ཡ་ཛ་ཛ༔ དེ་ནས་བཞུགས་སུ་གསོལ་པ་ནི༔ ཧཱུྃ༔ རྗེ་བཙུན་འཕགས་མ་སྒྲོལ་མ་དང་༔ སྤྲུལ་པའི་ལྷ་མོ་བསམ་ཡས་པ༔ ཡེ་ཤེས་དབྱིངས་ལས་སྐུར་བཞེངས་ལ༔ དམ་ཡེ་དབྱེར་མེད་ངོ་བོར་བཞུགས༔ ཨོཾ་ཨཱཪྻ་ཏཱ་རེ་སརྦ་ས་མ་ཡ་ཛ༔ ཏིཥྠ་ལྷན༔ དེ་ནས་ཕྱག་འཚལ་བ་ནི༔ ན་མོ༔ ཀ་དག་སྐྱེ་མེད་སྤྲོས་མཐའ་བྲལ༔ རང་བྱུང་ཡེ་ཤེས་རོལ་པའི་གདངས༔ འགྲོ་བའི་དོན་དུ་གཟུགས་སྐུར་ཤར༔ འཕགས་མ་སྒྲོལ་མ་ལ་ཕྱག་འཚལ༔ ཏཱྃ་ཨཱཪྻ་ཏཱ་རེ་ན་མོ་ཧོ༔ དེ་ནས་མཆོད་པ་འབུལ་བ་ནི༔ ཏིང་འཛིན་ནམ་མཁའ་མཛོད་ཀྱི་འཕྲུལ༔ ཉེར་སྤྱོད་བདུན་དང་འདོད་ཡོན་ལྔ༔ གསང་བ་བླ་མེད་མཆོད་པའི་སྤྲིན༔ ཁམས་གསུམ་སྣང་སྲིད་སྲིད་པའི་ཆོས༔ རང་སྣང་སྤྲུལ་པའི་དཀྱིལ་འཁོར་དུ༔ གཉིས་མེད་རོལ་པར་འབུལ་གྱིས་བཞེས༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་བཛྲ་ཨརྒྷཾ་པཱདྱཾ་སོགས་ནས་ཤཔྡ་པཱུ་ཛ་ཧོ༔ མ་ཧཱ་རཱུ་པ་ཤཔྡ་སོགས་སྤཪྴེ་སརྦ་པཱུ་ཛ་ཧོཿམ་ཧཱ་སརྦ་པཉྩ་ཨ་མྲི་ཏ་རཀྟ་བ་ལིཾ་ཏ་སརྦ་པཱུ་ཛ་ཧོ༔ བོ་དྷི་ཙིཏྟ་མ་ཧཱ་སུ་ཁ་པཱུ་ཛ་ཧོ༔ དེ་ནས་བསྟོད་པ་བྱ་བ་ལ༔ ཧཱུྃ༔ ཆོས་ཉིད་ཀ་དག་སྤྲོས་པའི་མཐའ་དང་བྲལ༔ ལྷུན་གྲུབ་རོལ་པ་སྐུ་དང་ཡེ་ཤེས་མཛོད༔ ཐུགས་རྗེའི་ཐབས་ཀྱིས་འགྲོ་དྲུག་གནས་ནས་འདྲེན༔ རྒྱལ་ཡུམ་རྗེ་བཙུན་སྒྲོལ་མ་ཁྱེད་ལ་བསྟོད༔ སྣ་ཚོགས་ཐབས་ཀྱིས་གདུལ་དཀའ་འདུལ་བྱེད་པའི༔ སྤྲུལ་པའི་ལྷ་མོ་རིགས་བཞི་སྒོ་སྐྱོང་བཅས༔ ཡེ་ཤེས་ལྔ་ཡི་ངོ་བོར་ཕྱག་འཚལ་བསྟོད༔ གཞན་ཡང་རྒྱལ་ཡུམ་སྒྲོལ་མའི་ཐུགས་རྗེའི་གར༔ སྤྲུལ་པ་རྣམ་འགྱུར་མ་ངེས་ཅིར་ཡང་སྟོན༔ ཕྱོགས་བཅུའི་སངས་རྒྱས་ཞིང་བཀོད་བསམ་ཡས་འཕྲུལ༔ དཀྱིལ་འཁོར་ཡོངས་རྫོགས་ལྷ་ལ་ཕྱག་འཚལ་བསྟོད༔ དེ་ནས་འཛབ་དམིགས་ནི༔ ཧཱུྃ༔ རང་ཉིད་རྗེ་བཙུན་སྒྲོལ་མ་ཡི༔ ཐུགས་ཀར་པདྨ་ཟླ་གདན་ལ༔ ཀུན་ཏུ་བཟང་མོ་མཐིང་གསལ་མཛེས༔ སྐྱིལ་ཀྲུང་མཉམ་བཞག་འོད་ཕུང་འབར༔ ཐུགས་ཀར་ཉི་ཟླའི་གྭའུ་རུ༔ ཏཱཾཿཡིག་ལྗང་གུའི་མཐའ་བསྐོར་དུ༔ སྔགས་ཕྲེང་གཡོན་དུ་འཁོར་བ་ལས༔ འོད་འཕྲོས་ཕྱོགས་་བཅུའི་རྒྱལ་དང་སྲས༔ མ་ལུས་འོད་ཀྱི་རྣམ་པ་རུ༔ སྤྱན་དྲང་ཐུགས་སྲོག་ལ་ཐིམ་པས༔ བྱིན་རླབས་གཟི་བརྗིད་འབར་བར་བསྒོམ༔ ཨོཾ་ཏཱ་རེ་ཏུཏྟ་རེ་ཏུ་རེ་སྭཱ་ཧཱ༔ དེ་ནས་སྒྲུབ་པ་བྱ་བ་ལ༔ ཧཱུྃ༔ རང་ཉིད་རྗེ་བཙུན་སྒྲོལ་མ་ཡི༔ ཐུགས་སྲོག་ཏཱྃཿལས་འོད་འཕྲོས་པས༔ དཀོན་མཆོག་གསུམ་དང་རྩ་བ་གསུམ༔ སྐུ་གསུམ་ཞིང་ཁམས་རྟེན་བརྟེན་པ༔ འོད་ལྔའི་སྤྲིན་ཕུང་ལྟ་བུ་ཡི༔ རྣམ་པར་བསྡུས་ཏེ་རང་ལ་བསྟིམ༔ བརྟན་གཡོའི་སྣང་བ་གནས་འགྱུར་ཏེ༔ དཀྱིལ་འཁོར་གསུམ་གྱི་རོལ་པར་གྱུར༔ ཨོཾ་ཏཱ་རེ་ཏུ་རེ་སྭཱ་ཧཱ༔ དེ་ནས་ལས་ལ་སྦྱོར་པ་ནི༔ ཧཱུྃ༔ རང་ཉིད་ལྷར་གསལ་ཐུགས་ཀ་ནས༔ འོད་དང་འོད་ཟེར་རབ་འཕྲོས་པས༔ རྒྱལ་བ་སྲས་དང་བཅས་པ་རྣམས༔ འོད་ཀྱི་རྣམ་པར་སྤྱན་དྲངས་ཏེ༔ བདག་གི་སྙིང་གར་ཐིམ་པ་ལས༔ ནད་གདོན་སྡིག་སྒྲིབ་ཀུན་ཞི་ཞིང་༔ ཚེ་བསོད་དཔལ་འབྱོར་ཡོན་ཏན་རྒྱས༔ འཁོར་འདས་མ་ལུས་དབང་དུ་བསྡུས༔ དགྲ་བགེགས་ལོག་འདྲེན་ཐམས་ཅད་བསྒྲལ༔ དོན་གཉིས་ལྷུན་གྲུབ་དཔལ་ཐོབ་བསམ༔ ཨོཾ་ཏཱ་རེ་ཏུདྟ་རེ་ཏུ་རེ་སྭཱ་ཧཱ༔ བསྙེན་པ་འབུམ་ཕྲག་ཉེར་གཅིག་དང་༔ སྒྲུབ་པ་འབུམ་བཅུ་ལས་སྔགས་ལྔ༔ ཤེས་པ་གཞན་དུ་མ་ཡེངས་པར༔ བཟླས་པས་མཆོག་གི་དངོས་གྲུབ་ཐོབ༔ དེ་ནས་ཉམས་ཆག་བསྐང་བ་དང་༔ ཚོགས་གཉིས་རྫོགས་ཕྱིར་ཚོགས་མཆོད་ནི༔ འབྱོར་ཚོགས་འདོད་ཡོན་ཅི་རིགས་པས༔ ཁམས་གསུམ་སྣང་ཞིང་སྲིད་པའི་ཆོས༔ བྱིན་རླབས་ཟག་མེད་བདུད་རྩི་ཡིས༔ རྡོ་རྗེ་གསུམ་གྱི་དབྱིངས་ཀུན་ཁྱབ༔ གཞན་ཡང་འདོད་པའི་ལོངས་སྤྱོད་དཔལ༔ ནམ་མཁའ་མཛོད་དུ་མངའ་དབང་བསྒྱུར༔ ཨོཾ་ཨཱཿཧཱུྃཿབདག་མེད་རྟོགས་པའི་ཤེས་རབ་ཀྱིས༔ གཟུང་དང་འཛིན་པའི་རྣམ་རྟོག་སྦྱངས༔ ཆོས་ཉིད་ནམ་མཁའི་མཛོད་ཀྱི་འཕྲུལ༔ འདོད་ཡོན་མི་ཟད་གཏེར་དུ་ཤར༔ ཨོཾ་ཨཱ་ཧཱུྃ༔ ལན་གསུམ༔ དེ་ནས་སྦྱན་འདྲེན་པ་ནི༔ ཧཱུྃ༔ རང་སྣང་དོན་གྱི་འོག་མིན་ནས༔ རྩ་བརྒྱུད་བླ་མ་གཤེགས་སུ་གསོལ༔ སྐྱེ་མེད་ཆོས་སྐུའི་གཞལ་ཡས་ནས༔ ཀུན་ཏུ་བཟང་མོ་གཤེགས་སུ་གསོལ༔ ལྷུན་གྲུབ་བདེ་ཆེན་གཞལ་ཡས་ནས༔ རིགས་ལྔའི་ལྷ་མོ་གཤེགས་སུ་གསོལ༔ ཕྱོགས་མེད་ཐུགས་རྗེའི་གཞལ་ཡས་ནས༔ རྒྱལ་ཡུམ་འཕགས་མ་སྒྲོལ་མ་དང་༔ སྤྲུལ་པའི་ལྷ་མོ་ཉེར་གཅིག་བཅས༔ དད་དང་དམ་ཚིགས་སྒྱུད་བསྐུལ་ལོ༔ ཚོགས་ལ་སྤྱན་འདྲེན་གཤེགས་སུ་གསོལ༔ སྒྲུབ་པའི་གནས་མཆོག་དམ་པ་འདི༔ འོག་མིན་ཞིང་དུ་བྱིན་གྱིས་རློབས༔ སྒྲུབ་མཆོག་རྣལ་འབྱོར་ཕོ་མོ་རྣམས༔ དཔའ་བོ་མཁའ་འགྲོར་བྱིན་གྱིས་རློབས༔ སྒྲུབ་ཁང་གཞལ་ཡས་མཛེས་པ་རུ༔ བྱིན་གྱིས་རློབས་ཤིག་རྗེ་བཙུན་མ༔ དུས་ལ་བབ་པོ་ས་མ་ཡ༔ ན་མོ་ཨཱཪྻ་ཏཱ་རེ་སརྦ་ས་པ་རི་ཝཱ་ར་བཛྲ་ས་མ་ཡ་ཛ་ཛ༔ དེ་ནས་ཚོགས་མཆོད་འབུལ་བ་ནི༔ ཧཱུྃཿཟག་མེད་བདེ་སྟོང་བདུད་རྩི་དང་༔ ཞལ་ཟས་རོ་བརྒྱའི་ཚོགས་མཆོད་འདིཿརྩ་བརྒྱུད་རིག་འཛིན་བླ་མ་དང་༔ རྗེ་བཙུན་འཕགས་མ་སྒྲོལ་མ་དང་༔ སྤྲུལ་པ་སྒྱུ་འཕྲུལ་དཀྱིལ་འཁོར་ལཿཚོགས་གཉིས་རྫོགས་ཕྱིར་འབུལ་གྱིས་བཞེསཿན་མོ་ཨཱཪྻ་ཏཱ་རེ་སརྦ་ས་པ་རི་ཝཱ་ར་པཉྩ་ཨ་མྲྀ་ཏ་ཁཱ་ཧི༔ ག་ཎ་ཙཀྲ་ལ་ཁཱ་ཧི༔ དེ་ནས་བཤགས་པ་བྱ་བ་ནི༔ ཧཱུྃ༔ བདག་གིས་ཚེ་རབས་ཐམས་ཅད་དུ༔ སྒོ་གསུམ་བག་མེད་དབང་གྱུར་ཏེ༔ ཉམས་ཆགས་འགལ་འཁྲུལ་ཉེས་ལྟུང་ཀུན༔ ཞལ་ཟས་ཚོགས་ཀྱིས་བསྐང་ཞིང་བཤགས༔ ཨོཾ་ག་ཎ་ཙཀྲ་ས་ཏྭ་ས་མ་ཡ་སོགས་སཏྭ་ཨཱ༔ དེ་ནས་བསྒྲལ་བ་ལ༔ ཧཱུྃ༔ མ་རིག་ལས་ཉོན་གཟུང་འཛིན་གྱིས༔ རྒྱུ་རྐྱེན་རྟེན་འབྲེལ་ཚོགས་པའི་བགེགས༔ བདག་མེད་ཤེས་རབ་སྟོབས་ཀྱིས་བསྒྲལ༔ ཡུལ་མེད་ཟང་ཐལ་ངང་དུ་བསད༔ མ་ཏྲཾ་རཱུ་ཏྲ་པྲ་ཝེ་ཤ་ཡ་ཕཊ༔ དེ་ནས་བསྟབས་པ་ནི༔ ཧཱུྃ༔ ཉོན་མོངས་དུག་ལྔ་དུག་གསུམ་དང་༔ རྒྱུ་རྐྱེན་འབྲེལ་བའི་དགྲ་དང་བགེགས༔ མཉམ་པ་ཉིད་ཀྱི་ཞལ་དུ་བསྟབས༔ ཡེ་ཤེས་ཆེན་པོར་རྫོགས་སངས་རྒྱས༔ རཱུ་ཏྲ་ཧ་ལ་པཉྩ་པཱུ་ཛ་ཁཱ་ཧི༔ དེ་ནས་ལྷག་མ་ནི༔ ཧཱུྃཿལྷག་ལ་དབང་བའི་ལྷག་སྐྱོང་ཚོགསཿདབང་ཕྱུག་འབར་མ་གིང་ལང་ཀ༔ དཀྱིལ་འཁོར་གཉན་པོའི་མཐའ་སྐྱོང་ཞིང་༔ ལེགས་ཉེས་གཉིས་ཀྱི་སྟངས་འཛིན་རྣམས༔ ལྷག་མའི་ཞལ་ཆབ་གཏོར་མ་ལོངས༔ རབ་འབྱམས་ཕྲིན་ལས་ཡོངས་འགྲུབ་མཛོད༔ ས་མ་ཡ་ཨུཙྪིཥྟ་ལིཾ་ཏ་ཁཱ་ཧི༔ དེ་ནས་བསྐུལ་བ་ནི༔ ཧཱུྃ༔ རྗེ་བཙུན་འཕགས་མ་སྒྲོལ་མ་དང་༔ ཕྱོགས་བཅུའི་རྒྱལ་བ་སྲས་བཅས་རྣམས༔ ཆོས་ཀྱི་དབྱིངས་ལས་སྐུར་བཞེངས་ལ༔ ལོག་པར་འདྲེན་པའི་དགྲ་བགེགས་སྒྲོལ༔ དུས་ལ་བབ་པོ་ས་མ་ཡ༔ དེ་ནས་ཆད་མདོ་བཏང་བ་ལ༔ ཧཱུྃ༔ རྒྱལ་བའི་བཀའ་གསང་གཉན་པོ་ཡི༔ བསྟན་པ་བསྲུང་བར་རང་དམ་བཅས༔ བརྒྱུད་འཛིན་ཐར་པའི་ལམ་ལ་གཟུད༔ བསྟན་དགྲའི་སྲོག་ལ་གཟས་པ་ཡི༔ ཆད་མདོ་དམ་ཅན་སྲུང་མ་རྣམས༔ དམར་གྱི་གཏོར་མ་འདི་བཞེས་ལ༔ ཕྲིན་ལས་རབ་འབྱམས་ཡོངས་གྲུབ་མཛོད༔ སརྦ་དྷརྨ་པཱ་ལ༔ ཀྵེ་ཊ་པཱ་ལ༔ ལོ་ཀ་པཱ་ལ་ཨེ་དམ་བ་ལིཾ་ཏ་ཁཱ་ཧི༔ དེ་ནས་བརྟན་མ་ནི༔ ཧཱུྃ༔ བརྟན་མ་ཆེན་མོ་བཅུ་གཉིས་དང་༔ སྨན་མོ་སྨན་ཕྲན་འབུམ་སྡེར་བཅས༔ བཤལ་ཆུའི་གཏོར་མ་འདི་བཞེས་ལ༔ ཁས་བླང་དམ་བཅའ་དྲན་པར་མཛོད༔ བསྟན་དང་འགྲོ་པའི་དཔལ་ཡོན་བསྐྱེད༔ བརྒྱུད་འཛིན་སྐལ་བཟང་སྐྱེས་བུ་རྣམས༔ ལས་རྐྱེན་ངན་པའི་ལམ་ལས་བཟློག༔ བསམ་བློ་དམ་པའི་ཆོས་ལ་བསྒྱུར༔ བློ་ཕུག་གཏན་བདེའི་ས་རུ་བཟུང་༔ དམ་ལ་མ་འདའ་ས་མ་ཡ༔ མ་མ་ཧྲཱིཾ་བྷྱོ་ཛ་ཨེ་དམ་བ་ལིཾ་ཏ་ཁཱ་ཧི༔ དེ་ནས་རྟ་བྲོ་བརྡུང་བ་ནི༔ ཧཱུྃ༔ བྱ་གྲུབ་ཡེ་ཤེས་དཀྱིལ་འཁོར་ནས༔ བདག་མེད་རོལ་པའི་བྲོ་བརྡུང་ངོ་༔ ཁམས་གསུམ་འཁོར་བའི་ལས་ཉོན་ཀུན༔ སྐུ་གསུམ་བདེ་བ་ཆེན་པོར་བྲུབ༔ ཆོས་ཉིད་རོལ་པའི་སྟོབས་ཀྱིས་མནན༔ བྱང་ཆུབ་བར་དུ་མ་ལྡང་ཞིག༔ མཱ་ར་ཡ་སྟྭཾ་བྷ་ཡ་ནན༔ ན་ཤ་ཡ་ནན་ནན༔ དེ་ནས་དངོས་སྒྲུབ་བླང་པ་ནི༔ ཧཱུྃརྒྱལ་ཡུམ་འཕགས་མ་སྒྲོལ་མ་དང་༔ ཡེ་ཤེས་སྒྱུ་འཕྲུལ་མཁའ་འགྲོ་ཡི༔ སྐུ་གསུང་ཐུགས་ཀྱི་དབང་དངོས་གྲུབ༔ ད་ལྟ་ཉིད་དུ་བདག་ལ་སྩོལ༔ ཀཱ་ཡ་ཝཱག་ཙིཏྟ་སརྦ་སིདྡྷི་ཕ་ལ་ཧཱུྃ་ཨཱ༔ དེ་ནས་བཤགས་པ་བྱ་བ་ནི༔ ཧཱུཾ༔ རྗེ་མཙུན་འཕགས་མ་སྒྲོལ་མ་དང་༔ རྒྱལ་བ་སྲས་བཅས་དགོང་སུ་གསོལ༔ དུས་གསུམ་བསགས་པའི་སྡིག་ལྟུང་ཀུན༔ མི་འཆབ་མི་སྦེད་མཐོལ་ཞིང་བཤགས༔ ཡི་གེ་བརྒྱ་བ་བརྗོད༔ དེ་ནས་བསྔོ་བ་སྨོན་ལམ་ནི༔ ཧཱུྃ༔ བདག་གིས་དུས་གསུམ་བསགས་པའི་དགེ༔ འགྲོ་ཀུན་སངས་རྒྱས་ཐོབ་ཕྱིར་བསྔོ༔ ཁམས་གསུམ་རྒྱུད་འཁྲུལ་སེམས་ཅན་ཀུན༔ རྣམ་གྲོལ་སྐུ་གསུམ་ས་ཐོབ་ཤོག༔ དེ་ནས་བསྡུ་བའི་རིམ་པ་ནི༔ ཧཱུྃ༔ རྟེན་དང་བརྟེན་པའི་འཁོར་ལོ་ཀུན༔ སྒྱུ་མའི་འཁྲུལ་འཁོར་ཞིག་པ་བཞིན༔ ཆོས་ཉིད་བརྡལ་ཁྱབ་ཆེན་པོར་ཞིག༔ ནམ་མཁའ་རྣམ་དག་མངོན་དུ་བྱ༔ ཨ་ཨ་ཨ༔ དེ་ནས་རྗེས་ཐོབ་སྒྱུ་མའི་ལྷ༔ ཧཱུྃ༔ སྐད་ཅིག་སྟོང་གསལ་ཆེན་པོ་ལས༔ མཁའ་ལས་འཇའ་ཚོན་ཤར་བ་བཞིན༔ རང་ཉིད་རྗེ་བཙུན་སྒྲོལ་མ་ནི༔ མཚན་དཔེས་ཆས་རྒྱན་རྫོགས་པར་གསལ༔ ཨོཾ་ཏཱ་རེ་ཏུཏྟ་རེ་ཏུ་རེ་སྭཱ་ཧཱ༔ ཞེས་བརྗོད་པས་སྣང་བ་ཐམས་ཅད་སྒྱུ་མའི་དཔེ་བཅུ་ལྟ་བུར་ཤེས་པའི་ངང་ནས་སྤྱོད་ལམ་ལ་འཇུག་གོ༔ དེ་ནས་བཀྲ་ཤིས་ནི༔ ཧཱུྃ༔ ངོ་བོ་སྐྱེ་མེད་ཆོས་སྐུ་ཀུན་བཟང་མོ༔ རང་བཞིན་ལྷུན་གྲུབ་རྒྱལ་བའི་ཡུམ་ཆེན་མོ༔ ཐུགས་རྗེ་ཀུན་ཁྱབ་འཕགས་མ་སྒྲོལ་མའི་སྐུ༔ སྐུ་གསུམ་ལྷུན་གྲུབ་བཀྲ་ཤིས་གང་ལགས་པ༔ དམ་པ་དེ་ཀྱང་དེང་འདིར་བདེ་ལེགས་ཤོག༔ དེ་ལྟར་ཆོས་ཉིད་ནམ་མཁའ་མཛོད་ཀྱི་བཅུད༔ གང་གི་ཉམས་སུ་ལེན་པའི་སྐྱེས་བུ་རྣམས༔ ལོ་གསུམ་ཟླ་གསུམ་ཞག་གསུམ་བར་མེད་དུ༔ ཤེས་པ་གཞན་དུ་མ་ཡེངས་ལྷར་སྣང་གསལ༔ མི་ཚིག་བར་མ་ཆོད་པར་སྔགས་རྒྱུན་བཟུང་༔ སྟན་གྱི་དྲོད་མི་ཡལ་བར་སྡོད་ས་བཟུང་༔ གནད་དེས་ཚེ་འདིར་གྲོལ་བ་མ་ཐོབ་ན༔ ཕ་ཡིས་བསླུས་སོ་ཕྱི་རབས་སྐྱེས་བུ་རྣམས༔ སྨིན་བྱེད་དབང་དང་གྲོལ་བྱེད་གདམས་པ་རྣམས༔ སྒྲུབ་པ་ཀུན་གྱི་སྔོན་དུ་རྫོགས་པ་གལ༔ དེ་ལྟར་ཚུལ་བཞིན་ལྡན་པས་ཉམས་སུ་ལོངས༔ བཀའ་འདི་དབང་ཕྱུག་མ་ཧཱ་དཱེ་ཝར་གཏད༔ ཐུབ་པར་སྲུང་ཤིག་བཛྲ་ས་མ་ཡ༔ ས་མ་ཡ༔ བཀའ་རྒྱ༔ དགོངས་རྒྱ༔ ཟབ་རྒྱ༔ གུ་ཧྱ༔ ཞེས་པ་འདི་སྨོན་ལམ་ལས་སྐལ་གྱི་སྐྱེས་བུ་ཨོ་རྒྱན་རང་ཤར་གྱིས་བསྐུལ་བའི་ངོར་ཨོ་རྒྱན་མཚོ་སྐྱེས་རྡོ་རྗེའི་གསང་མཛོད་ཆེན་པོ་འདི་བདུད་འཇོམས་རྡོ་རྗེས་ནམ་མཁའི་མཛོད་ལས་བསྒྱུར་བའི་ཡི་གེ་པ་ནི་ཕུན་ཚོགས་བཀྲ་ཤིས་སོ།།དགེའོ།།ལེགས་སོ།སརྦ་མངྒ་ལཾ།།།།