TTDL-ZABTER-06-CHA-010

Previous Text Back to Volume Page Next Text

Wylie title
Location	bdud 'joms gling pa zab gter Volume 6, Text 10, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

[edit]

དབུ་ཁྲིད་བརྡ་ཡིག༔ ༡༠༩ཟབ་གསང་མཁའ་འགྲོའི་སྙིང་ཐིག་ལས༔ སྒྲུབ་སྡེ་དགུའི་གསང་སྒྲུབ་ཆུ་གཏེར་འདུས་པའི་བསྐུལ་བ་བདུད་དཔུང་ཟིལ་གནོན་ཞེས་བྱ་བ་བཞུགས་སོ༔ ན་མོ་གུ་རུ་ཤྲཱི་བཛྲ་ཀྲོ་ཏ་ཡེ༔ ༠༠༠༠༠༠བརྡ་ཡིག༔ ༡༡༠དམིགས་མེད་མཁའ་ལྟར་དག་པ་ཆོས་ཀྱི་དབྱིངས༔ ལྷུན་གྲུབ་འགགས་པ་མེད་པའི་ཡེ་ཤེས་གར༔ སྒྱུ་འཕྲུལ་རོལ་པ་ཚོམ་བུ་དགུ་ཡི་ལྷར༔ མཐོན་མཐིང་རལ་བས་བཏུད་དོ་གུས་པས་འདུད༔ བདག་འདྲ་རིག་འཛིན་རྡོ་རྗེ་གཤོག་རྒོད་ངས༔ མ་འོངས་ལས་ལྡན་སྐལ་བཟང་ཕོ་མོ་རྣམས༔ བར་ཆད་གཡུལ་རྒྱལ་དངོས་གྲུབ་ཐོབ་པའི་ཕྱིར༔ ཚོམ་བུ་དགུ་ཡི་གསང་སྒྲུབ་ཟབ་མོ་བཀོད༔ ས་མ་ཡ༔ དེ་ཡང་སྨད་ལས་འཁོར་བ་ཡོངས་སྒྲོལ་གྱི༔ བར་ཆད་བདུད་ཚོགས་བསྒྲལ་འདྲེན་བྱེད་པའི་ཚེ༔ མེད་མི་རུང་བའི་ལྷ་ཚོགས་བསྐུལ་བ་ནི༔ བདུད་དཔུང་ཟིལ་གནོན་ཕྲིན་ལས་ལྷུན་གྲུབ་བསྟན༔ ས་མ་ཡ༔ རྣལ་འབྱོར་ལྷ་སྔགས་ཏིང་འཛིན་ལྡན་པ་ཡིས༔ རྔ་གླིང་རོལ་མོ་སྣ་ཚོགས་སྒྲ་སྦིར་ཅིང་༔ ཤ་ཆེན་དུད་བཏང་སྙན་པའི་དབྱངས་བཅས་ཏེ༔ གནད་ནས་བསྐུལ་བའི་རིམ་པ་འདི་ལྟར་རོ༔ ཧཱུྃ་བྷྱོ༔ ཆོས་དབྱིངས་དབུས་མཐའ་བྲལ་བའི་འོད་ཀློང་ནས༔ བདེ་གཤེགས་རྒྱལ་ཀུན་མཛོད་འཛིན་ཀུན་ཏུ་བཟང་༔ གཉིས་མེད་དགྱེས་བསྐྱེད་འུབ་ཆུབ་བྱ་བ་མོ༔ ཕུང་ལྔ་རྣམ་དག་རྒྱལ་བ་རིགས་མཆོག་ལྔ༔ འབྱུང་ལྔ་ཀློང་སྒྲོལ་གསང་བ་ཡེ་ཤེས་ཡུམ༔ ཚོགས་ཡུལ་རང་གྲོལ་སེམས་དཔའ་སེམས་མའི་ཞལ༔ དུག་ལྔ་སེར་སྣ་རྣམ་དག་ཐུབ་པ་དྲུག༔ རྟག་ཆད་མུ་བཞི་དབྱིངས་རོལ་སྒོ་སྐྱོང་བཞི༔ རིགས་དྲུག་དབྱིངས་སྒྲོལ་སྤོར་བྱེད་རྣམ་པ་བརྒྱད༔ ཞི་བའི་ལྷ་ཚོགས་བཞི་བཅུ་རྩ་གཉིས་སོགས༔ མི་མངོན་དབྱིངས་ནས་གནས་འདིར་སྤྱན་འདྲེན་གཤེགས༔ དམ་རྫས་བརྒྱན་པའི་གཏོར་མ་འདི་བཞེས་ལ༔ ཁམས་གསུམ་འཁོར་བ་དོང་སྤྲུགས་ཕྲིན་ལས་མཛོད༔ ཧཱུྃ་བྷྱོ༔ རབ་འཇིགས་རྔམས་པ་ཆེན་པོའི་དཀྱིལ་འཁོར་ནས༔ ཁྲོ་རྒྱལ་ཡོངས་འདུས་ཆེ་མཆོག་ཧེ་རུ་ཀ༔ དགྱེས་བསྐྱེད་གནམ་ཞལ་དབྱིངས་ཕྱུག་འཁྲིལ་སྦྱོར་རོལ༔ རིགས་ལྔའི་ཁྲག་འཐུང་ཡབ་ཡུམ་རྣམ་པ་བཅུ༔ ཕྱོགས་སྐྱོང་ཁྲོ་བཅུ་ཏ་ཀྲྀཏ་རིགས་བཞི་དང་༔ བཀའ་ཉན་ལས་བྱེད་ལྕེ་སྤྱང་མ་བརྒྱད་སོགས༔ སུམ་ཅུ་རྩ་དྲུག་རྒྱལ་བ་ཐུགས་དམ་ཅན༔ མི་མངོན་དབྱིངས་ནས་བསྐུལ་ལོ་གནས་འདིར་གཤེགས༔ བརྔན་པའི་དམ་རྫས་མཆོད་གཏོར་འདི་བཞེས་ལ༔ ཉོན་འཁྲུལ་དགྲ་བགེགས་མ་ལུས་བསྒྲལ་བ་དང་༔ ཕྲིན་ལས་རྣམ་བཞི་ལྷུན་གྱིས་གྲུབ་པར་མཛོད༔ ཧཱུྃ་བྷྱོ༔ མཐིང་ནག་གྲུ་གསུམ་འབར་བའི་དཀྱིལ་འཁོར་ནས༔ ཐུགས་ཀྱི་ལྷ་མཆོག་བཛྲ་ཧེ་རུ་ཀ༔ བཛྲ་ཀྲོ་ཏི་གཉིས་མེད་འཁྲིལ་སྦྱོར་རོལ༔ སྐུ་གསུང་ཐུགས་ཡོན་ཕྲིན་ལས་རྣམ་རོལ་གར༔ ཁྲོ་རྒྱལ་ཡབ་ཡུམ་བཅུ་རུ་རྣམ་པར་ཤར༔ ལས་མཛད་ཀཽ་སེང་བཅུ་དྲུག་གློག་ལྟར་འཁྲུགས༔ བཀའ་ཉན་དབང་ཕྱུག་ཉེར་བརྒྱད་འདུ་འཕྲོ་འཁྲིགས༔ ལྔ་བཅུ་རྩ་བརྒྱད་རྒྱལ་བ་ཐུགས་དམ་ཅན༔ མི་མངོན་དབྱིངས་ནས་གཟུགས་ཀྱི་ཕྱག་རྒྱར་བཞེངས༔ བདུད་རྩི་ཕུད་དང་མཆོད་གཏོར་འདི་བཞེས་ལ༔ བརླང་པོར་སྤྱོད་པའི་བདུད་ཚོགས་འདུལ་བ་དང་༔ ཕྲིན་ལས་རྣམ་བཞི་ལྷུན་གྱིས་གྲུབ་པར་མཛོད༔ ཧཱུྃ་བྷྱོ༔ སེར་ནག་གྲུ་གསུམ་འབར་བའི་དཀྱིལ་འཁོར་ནས༔ སྐུ་ཡི་ལྷ་མཆོག་འཇའ་དཔལ་གཤིན་རྗེའི་གཤེད༔ སྦྱོར་ཡུམ་བྷེ་ཏ་སྒྲོལ་ཡུམ་ཨེ་ཀ་ཛ༔ གཤེད་ཆེན་བཅུ་གཉིས་སྦྱོར་སྒྲོལ་ཡུམ་ཟུང་དང་༔ སྐྱེས་བུ་གིང་བཞི་ཤྭ་ཐོགས་རྩིས་པ་བཞི༔ སྲོག་གཅོད་ཤན་པ་ཁྲམ་ཐོགས་བདུད་ལ་སོགས༔ ལྔ་བཅུ་དགུ་ཡི་རྒྱལ་བ་ཐུགས་དམ་ཅན༔ མི་མངོན་དབྱིངས་ནས་གཟུགས་ཀྱི་ཕྱག་རྒྱར་བཞེངས༔ བརྔན་པའི་ཕུད་གཏོར་མཆོད་པ་འདི་བཞེས་ལ༔ ཁེང་སེམས་རྒོལ་སྦྱོར་སྡེ་ཚོགས་བསྒྲལ་བ་དང་༔ ཕྲིན་ལས་རྣམ་བཞི་ལྷུན་གྱིས་གྲུབ་པར་མཛོད༔ ཧཱུྃ་བྷྱོ༔ དམར་ནག་གྲུ་གསུམ་དབང་གི་དཀྱིལ་འཁོར་ནས༔ གསུང་གི་ལྷ་མཆོག་ཧྱ་གྲཱི་ཝ་དང་༔ དགྱེས་བསྐྱེད་པདྨ་གཟི་ལྡན་འཁྲིལ་སྦྱོར་རོལ༔ ཡབ་ཡུམ་ཆ་འཛིན་བྱི་ལ་པུ་ཤུད་མགོ༔ ཟིལ་གནོན་ཡེ་ཤེས་ཁྲོ་བོ་ཡབ་ཡུམ་བཅུ༔ ལས་མཛད་ཕྱོགས་བཞིའི་གདོན་འདུལ་སྒོ་སྐྱོང་བཞི༔ བཀའ་ཉན་ཕོ་ཉ་ཁམས་བརྒྱ་མ་དྲུག་དང་༔ དམུས་ལོང་རྒྱབ་འབྲེལ་འབྲུག་བཞི་ཁྱི་སྤྱང་ཚོགས༔ ལྔ་བཅུ་རྩ་བརྒྱད་རྒྱལ་བ་ཐུགས་དམ་ཅན༔ མི་མངོན་དབྱིངས་ནས་བསྐུལ་ལོ་གནས་འདིར་གཤེགས༔ དམ་རྫས་སྐྱེམས་གཏོར་བརྔན་པ་འདི་བཞེས་ལ༔ ཆགས་འཁྲུལ་ཞེན་པའི་གདོན་ཚོགས་འདུལ་བ་དང་༔ ཕྲིན་ལས་རྣམ་བཞི་ལྷུན་གྱིས་གྲུབ་པར་མཛོད༔ ཧཱུྃ་བྷྱོ༔ ལྗང་ནག་གྲུ་གསུམ་འབར་བའི་དཀྱིལ་འཁོར་ནས༔ དཔལ་ཆེན་ཕྲིན་ལས་ཡོངས་འདུས་ཀུ་མཱ་ར༔ དགྱེས་བསྐྱེད་སྦྱོར་ཡུམ་འཁོར་ལོ་རྒྱས་འདེབས་འཁྲིལ༔ སྒྲོལ་ཡུམ་ཨེ་ཀ་ཛ་ཊཱི་སྲས་མཆོག་ལྔ༔ ཁྲོ་བཅུ་ཡབ་ཡུམ་ཟ་གསོད་ཉི་ཤུ་དང་༔ ཁྲ་ཐབས་ཉེར་གཅིག་སྒོ་སྐྱོང་ཆེན་མོ་བཞི༔ ལས་མཛད་ཕུར་སྲུང་བཅུ་དྲུག་དབང་ཕྱུག་སོགས༔ བདུན་ཅུ་རྩ་གཉིས་རྒྱལ་བ་ཐུགས་དམ་ཅན༔ མི་མངོན་དབྱིངས་ནས་བསྐུལ་ལོ་སྤྱན་འདྲེན་གཤེགས༔ དམ་རྫས་གཏོར་སྐྱེམས་མཆོད་པ་འདི་བཞེས་ལ༔ ཕྲག་དོག་འཁྲུལ་པའི་གདོན་ཚོགས་འདུལ་བ་དང་༔ ཕྲིན་ལས་རྣམ་བཞི་ལྷུན་གྱིས་གྲུབ་པར་མཛོད༔ ཧཱུྃ་བྷྱོ༔ ཤ་ཁྲག་རྒྱ་མཚོ་འཁྱིལ་བའི་དཀྱིལ་འཁོར་ནས༔ གདོན་འདུལ་ཁྲོ་རྒྱལ་བླ་མེད་ཧེ་རུ་ཀ༔ དགྱེས་བསྐྱེད་ཡུམ་མཆོག་ཉིད་བཞི་མུ་ཁ་འཁྲིལ༔ རྟག་རྒྱལ་མ་ལྔ་རྗེ་མོ་བཅུ་གཉིས་དང་༔ སྨན་མོ་ལྔ་བཅུ་རྩ་གཅིག་ལ་སོགས་པའི༔ བདུན་ཅུ་རྩ་གཅིག་རྒྱལ་བ་ཐུགས་དམ་ཅན༔ མི་མངོན་དབྱིངས་ནས་གཟུགས་ཀྱི་ཕྱག་རྒྱར་བཞེངས༔ དམ་རྫས་ཕུད་སྐྱེམས་གཏོར་མ་འདི་བཞེས་ལ༔ མ་རིག་འཁྲུལ་པའི་གདོན་ཚོགས་འདུལ་བ་དང་༔ ཕྲིན་ལས་རྣམ་བཞི་ལྷུན་གྱིས་གྲུབ་པར་མཛོད༔ ཧཱུྃ་བྷྱོ༔ ཐུགས་རྗེའི་གདུང་འཚོབ་སྐུ་ཡི་དཀྱིལ་འཁོར་ནས༔ རྒྱལ་ཀུན་མཛོད་འཛིན་དཔལ་བོ་རྡོ་རྗེ་ཆོས༔ དགྱེས་བསྐྱེད་དབྱིངས་ཡུམ་ཕག་མོ་འཁྲིལ་སྦྱོར་རོལ༔ རྣམ་སྨིན་ཚེ་དབང་ཕྱག་རྒྱ་ལྷུན་གྱིས་གྲུབ༔ རིག་འཛིན་རྣམ་བཞི་དཔའ་བོ་དཔའ་མོ་བརྒྱད༔ གིང་བཞི་མཁའ་འགྲོ་སྡེ་བཞི་དང་བཅས་པའི༔ ཉི་ཤུ་རྩ་གཉིས་རྒྱལ་བ་ཐུགས་དམ་ཅན༔ མི་མངོན་དབྱིངས་ནས་གཟུགས་ཀྱི་ཕྱག་རྒྱར་བཞེངས༔ འདོད་ཡོན་རྣམ་དག་གཏོར་སྐྱེམས་འདི་བཞེས་ལ༔ ལོག་འཁྲུལ་འཁོར་བའི་མཚོ་མོ་སྐེམ་པ་དང་༔ ཕྲིན་ལས་རྣམ་བཞི་ལྷུན་གྱིས་གྲུབ་པར་མཛོད༔ ཧཱུྃ་བྷྱོ༔ དུར་ཁྲོད་འཇིགས་སུ་རུང་བའི་དཀྱིལ་འཁོར་ནས༔ དཔལ་ཆེན་ཡོངས་འདུས་དྲེགས་པ་ཀུན་འདུལ་ཡབ༔ སྲིད་པ་སྤྱི་འདུལ་ཆེན་མོ་འཁྲིལ་སྦྱོར་རོལ༔ ལས་མཛད་བཀའ་ཉན་སྡེ་དཔོན་སུམ་ཅུ་འགྱེད༔ སུམ་ཅུ་རྩ་གཉིས་རྒྱལ་བ་ཐུགས་དམ་ཅན༔ མི་མངོན་དབྱིངས་ནས་གཟུགས་ཀྱི་ཕྱག་རྒྱར་བཞེངས༔ བརྔན་པའི་གཏོར་སྐྱེམས་མཆོད་པ་འདི་བཞེས་ལ༔ ཕྱོགས་བཞིའི་མཐའ་དམག་རུ་འཛིང་འདུལ་བ་དང་༔ དྲག་རྩལ་ཁྱད་ཆོས་སྟོན་པའི་ཕྲིན་ལས་མཛོད༔ ཧཱུྃ་བྷྱོ༔ གཏུམ་དྲག་མེ་ལྟར་འབར་བའི་དཀྱིལ་འཁོར་ནས༔ དྲག་སྔགས་མངའ་བདག་སྟོབས་ལྡན་ནག་པོ་ཡབ༔ དགྱེས་བསྐྱེད་འབྱུང་ལྔའི་བདག་མོ་འཁྲིལ་སྦྱོར་རོལ༔ ལས་མཛད་བཀའ་ཉན་དྲེགས་ཆེན་བཅོ་བརྒྱད་འགྱེད༔ རང་རང་རིགས་ཀྱི་ཕོ་ཉ་ས་ཡ་འབུམ༔ བཅུ་ཕྲག་ཟུང་གི་རྒྱལ་བ་ཐུགས་དམ་ཅན༔ མི་མངོན་དབྱིངས་ནས་གཟུགས་ཀྱི་ཕྱག་རྒྱར་བཞེངས༔ དགྲ་བགེགས་བསྒྲལ་བའི་ཕུང་ཁམས་སྐྱེམས་བཞེས་ལ༔ གདུག་པ་དམ་སྲིའི་དཔུང་ཚོགས་འདུལ་བ་དང་༔ གསང་སྔགས་བསྟན་པ་རྒྱས་པའི་ཕྲིན་ལས་མཛོད༔ ཧཱུྃ་བྷྱོ༔ ཚོམ་བུ་དགུ་ཡི་བར་ཁྱམས་འཁོར་ཡུག་ནས༔ རྣལ་འབྱོར་ཡོངས་ཀྱི་སྲིང་མོ་ཉི་ཤུ་བརྒྱད༔ ལས་མཛད་བཀའ་ཡི་ཕོ་ཉ་གིང་བཅོ་བརྒྱད༔ བདུད་འདུལ་དཔའ་བོ་ལངྐ་རིགས་བཞི་དང་༔ གསང་བའི་དྲོད་བསྐྱེད་མ་བདུན་སྲིང་མོ་བཞི༔ བསྟན་པ་འཛིན་མཛད་མཁའ་འགྲོ་སུམ་ཅུ་གཉིས༔ རིགས་ལྔའི་དམ་འཛིན་འབུམ་ཕྲག་མཁའ་འགྲོ་དང་༔ ཕོ་ཉ་སུམ་བརྒྱ་ས་བདག་སུམ་ཅུ་གཉིས༔ བརྟན་མ་བཅུ་གཉིས་དྲེགས་པ་སྡེ་བརྒྱད་སོགས༔ ལས་མཛད་ཕོ་ཉ་བསམ་ཡས་ཐུགས་དམ་ཅན༔ མི་མངོན་དབྱིངས་ནས་གཟུགས་ཀྱི་ཕྱག་རྒྱར་བཞེངས༔ བརྔན་པའི་མཆོད་གཏོར་སྐྱེམས་ཕུད་འདི་བཞེས་ལ༔ ཞིང་བཅུ་ཚང་བའི་སྡེ་ཚོགས་འདུལ་བ་དང་༔ གང་བཅོལ་ཕྲིན་ལས་འགྲུབ་པའི་སྡོང་གྲོགས་མཛོད༔ ཧཱུྃ་བྷྱོ༔ ངོ་བོ་ཡེ་སངས་རྒྱས་པ་ཆོས་སྐུ་ལས༔ རང་བཞིན་མ་འགགས་ཚོམ་བུ་དགུ་ཡི་ལྷ༔ བདུན་བརྒྱ་ཉེར་ལྔའི་ལྷ་ཚོགས་ཐུགས་དམ་ཅན༔ རྣལ་འབྱོར་སྒྲུབ་པ་པོ་ལ་དགོངས་སུ་གསོལ༔ དེང་སང་སྙིགས་མའི་རུ་འཛིང་འཁྲུགས་པའི་སྐབས༔ ལོག་ལམ་དུག་ལྔའི་མཚོ་མོ་རབ་ཏུ་རྒྱས༔ མི་འདོད་ནད་མུག་མཚོན་འཁྲུག་གཟེང་པ་ལངས༔ དགྲ་ཡི་ཁ་དར་བགེགས་ཀྱི་མགོ་འཕང་མཐོ༔ མཐའ་མི་དབུས་རྡིབ་རྒྱལ་བསྟན་ཉམས་དམའ་ཞིང་༔ ཆོས་བྱེད་བུ་ཡི་ཚེ་སྲོག་དམ་ལ་གླང་༔ མི་མཐུན་སྣ་དགུའི་ཟུག་རྔུ་མ་བཟོད་ནས༔ ཡི་དམ་ལྷག་པའི་ལྷ་ལ་སྙན་གསན་ཕབ༔ ཆོས་སྐྱོང་སྲུང་མའི་ཚོགས་རྣམས་ར་མདར་སྦྲན༔ བདེན་གཉིས་བསླུ་བ་མེད་པའི་ནུས་མཐུ་བདར༔ དྲག་རྩལ་ཁྱད་ཆོས་སྟོན་པའི་དུས་ལ་བབ༔ གདུག་པ་བདུད་ཀྱི་དཔུང་ཚོགས་མིང་མེད་མཛོད༔ དུ་རུ་ཀ་ཡི་རིགས་རྣམས་འདུལ་བ་དང་༔ མི་མཐུན་མི་འདོད་ཉེར་འཚེ་རིགས་རྣམས་ཐུལ༔ བརྔན་པའི་གཏོར་མ་རྒྱན་ཅན་འདི་བཞེས་ལ༔ རྣལ་འབྱོར་བཅོལ་བའི་ཕྲིན་ལས་གྲུབ་པར་མཛོད༔ ཐུགས་དམ་མ་གཡེལ་བཛྲ་ས་མ་ཡ༔ ཨོཾ་བཛྲ་མ་ཧཱ་ཀྲོ་ཏ་པདྨ་ཀྲོ་ཏི་ཤྭ་རི་བཛྲ་ཀཱི་ལི་ཀཱི་ལ་ཡ་མ་ཧཱ་ཡཀྴ་ཀ་ལ་པཱུ་པ་ཀརྨ་རཾ་རཾ་ཛྭ་ལ་རཾ་སརྦ་ཤྲཱི་ཀ་ལ་རཱུ་པ་སརྦ་དུཥྚན་ཨེ་ཛཿབྷྱོ་བིགྷྣཱན་ཤ་ཏྲུཾ་མཱ་ར་ཡ་ཕཊ༔ གནད་ནས་བསྐུལ་ཅིང་རོལ་མོ་དྲག་ཏུ་འུར༔ དམར་སྦྲེང་བཅོལ་གཏད་བྱ་ཞིང་ཕུད་སྐྱེམས་མཆོད༔ རལ་པ་སྤྲུག་ཅིང་བྷྱོ་གདབ་ནན་དུ་བྱ༔ དེས་ནི་དགྲ་དཔུང་ཕ་ལམ་ཡིན་ཡང་འཇིག༔ བདེན་རྫུན་ལག་ཏུ་ལོངས་དང་ངེས་ཤེས་གསལ༔ དཀོན་མོད་རྒྱལ་ཁམས་འགྲིམས་ལ་ལྟོས་དང་མཐོང་༔ གུ་རུ་པདྨའི་སྲོག་ཐིག་དམར་ནག་འདི༔ གྲུབ་ཆེན་འབྲོག་མི་ལོ་ཙཱ་ཁྱོད་ལ་བྱིན༔ ད་དུང་སྤེལ་བའི་དུས་ལ་མ་བབ་པས༔ རིན་ཆེན་བརྡར་ཐོབས་རྩེ་མང་བཻ་རོ་ཟུང་༔ ལྷག་ཆད་མེད་པར་མཛོད་ཅིག་མཚོ་རྒྱལ་མ༔ མི་འགྱུར་རྡོ་རྗེའི་རྫོང་ལ་གཏེར་རྒྱས་ཐོབས༔ མ་འོངས་སྙིགས་མ་སུམ་ཅུ་ཁ་རལ་དུས༔ ང་སྤྲུལ་ང་དང་མི་གཞན་ཁྲོ་བོ་ལོད༔ བདུད་འདུལ་དཔལ་གྱི་རྡོ་རྗེའི་བགོ་སྐལ་ཏེ༔ ལས་ཅན་ཆོས་བདག་རྩེ་མང་མངྒའི་མིང་༔ གཡུ་སྒྲ་སྙིང་པོ་རསྨི་ཟབ་གསང་འཛིན༔ བཻ་རོ་ཙ་ན་དྷརྨའི་མཚན་ཅན་དང་༔ དགེ་ལེག་དཔལ་བཟང་བཅུ་པའི་མིང་ཅན་སོགས༔ ལས་ཅན་རྗེ་འབངས་སྤྲུལ་པ་ཉེར་ལྔ་ཡིས༔ བསྟན་པ་འཛིན་སྐྱོང་སྤེལ་ལ་བདུད་ཚོགས་འདུལ༔ ལོག་སྦྱོར་༠༠༠༠བརྡ་ཡིག༔ ངན་གཏོང་༠༠༠༠བརྡ་ཡིག༔ ཕུང་འགྱེད་༠༠༠བརྡ་ཡིག༔ སྨོན་ལོག་༠༠༠༠༠བརྡ་ཡིག༔ ༡༢༠དེ་སོགས་བདུད་རིགས་ཉི་ཤུ་རྩ་ལྔ་འགུམ༔ སྙན་ཅིང་གྲགས་པའི་བ་དན་ཀུན་ལ་བསྒྲེངས༔ བསྟན་པའི་འགྲོ་དོན་བསམ་མི་ཁྱབ་པ་འབྱུང་༔ ཁྱད་པར་ཡར་སྟོད་ཕྱོགས་སུ་ཉི་བཞིན་གསལ༔ ཐེ་ཚོམ་མེད་དོ་གུ་རུ་པདྨའི་བཀའ༔ བདུད་འཇོམས་དཔའ་བོའི་ཐུགས་ཀྱི་མན་ངག་དེ༔ ཀློང་ཆེན་རྡོ་རྗེ་གཟི་བརྗིད་མཁའ་ལ་སྤྲོས༔ བརྟུལ་ཞུགས་རོལ་པའི་རྡོ་རྗེའི་དཔལ་དུ་ཤར༔ བསྟན་པ་རིན་ཆེན་རྒྱས་ཕྱིར་རྣམ་པར་བཀོད༔ དབང་དྲག་ཤན་པ་དམའ་རུས་ཐུབ་པར་སྲུངས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ གཏད་རྒྱ༔ སྙིང་རྒྱ༔ གབ་རྒྱ༔ སྦས་རྒྱ༔ གུ་ཧྱ༔ ཨྠིྀ༔ ཞེས་པ་འདི་ཡང་སྨོན་ལམ་ལས་ཀྱིས་འབྲེལ་བའི་སྐྱེས་བུ་རིག་པའི་རྡོ་རྗེས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཟབ་གསང་མཁའ་འགྲོའི་བརྡ་རིས་ལས་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ།།སརྦ་མངྒ་ལཾ།།།།